Anamaholela mulogo, muhudhere ni yopadduwa ya Jideyawu

1. Mowiwanana ni 1 Pedro 5:2, mutholo baani enna anamaholela mulogo?

ANAMAHOLELA mulogo ehakela mutholo wowasamalela mambila athima a Yehova. Anamaholela mulogo ala enoovaha thima mutholo enniwana wowasamalela aaddibila naarogola, bumwahaya aliwa enowilibihedha vanlubale ‘wihina ekale anamakukula enonne wakukula mambila ewa.’ (Jer. 23:4; Omwileri 1 Pedro 5:2.) Teto iyo nnothabwa otamalela mwaha okanna namaholela mulogo mmulogoni mwehu.

2. Makathamiho baani enafwanya anamaholela mulogo amodha?

² Anamaholela mulogo enofwanyiwa makathamiho owinjhiva yasamalelaga mutholo dhewa. Motajhiha, anamaholela mulogo enohowela olaba vanlubale wihina esamalele mulogo. Namaholela mulogo dhaala anakala Wistadu Unidu anithaniwa Tony, ohowela opendda pama akala eere orumedha mutholo dhimodha obe naari. Oliye onowoga egihina: “Mutipa wa Koronaviru obajhagawene miyo gothabwa wilibihedha wihina gegeredhe mutugumano ni mabasa olaleya. Naarive gilibihedhaga olaba, dhokumelela mutholo dhimodha gahowelimi wakwanihedha. Mwaha wa yeyo, obajha ogirusa omwileri Bibiliya, okanna ohudhera wavayeka ni olobela wa Yehova.” Vano namaholela mmodha anithaniwa Ilir anakala oKosovo ahifwanyiwa makathamiho mamodha. Agaali murudda dhaala wawaniwa koddo kayali yokweya wiwelela dhoholela dha nikuru na Yehova. Oliye anowoga egihina: “Miyo obajha woova addibila oBeteli nugiloba wihina gidhowe gaasamalelege addibila ni arogola yakala murudda yole wawaniwa koddo. Owoga ebaribari gowoova, teto goona ninga dhoholela ndhe kadhagikavihere.” Vano, misiyonariyu dhaala anithaniwa Tim anakala ohAziya kayamukweyela werana dhithu dhatedhene dha kadda labo. Oliye onowoga egi: “Malabo mamodha miyo gakalesa oogomeene.” Enaakavihere ddi anamaholela mulogo enafwanyiwa makathamiho mamodhave?

3. Yotajhiha baani anihiyedhe Jideyawu?

³ Jideyawu yotajhiha yapama anamaholela mulogo enahoweliwa ohara. (Heb. 6:12; 11:32) Oliye oobarela ni oweddiha pama nlogo na Mulugu. (Juí. 2:16; 1 Cró. 17:6) Ndala ninga Jideyawu, anamaholela mulogo ehakela mutholo wosamalela nlogo na Mulugu mudhidhi worusa. (Atos 20:28; 2 Tim. 3:1) Jideyawu aali muthu anonne manddile aye, owiyeviha ni owiwelela. Teto oliye ohowela omparela mabasa Yehova nuuvilela. Aatene iyo nnohowela wavaha thima mabasa enaapara anamaholela mulogo, naarive akala nili anamaholela mulogo obe naari. Teto iyo podi wakavihera anamaholela mulogo enasamalela mulogo watene. — Heb. 13:17.

YARUSAGA OKANNA MANDDILE NI WIYEVIHA

4. Jideyawu onihile aavi wihina ahikanna manddile ni wi aali owiyeviha?

⁴ Jideyawu aali muthu aanonne manddile aye ni aali owiyeviha.b Motajhiha, mungero a Yehova nuuwoga ni Jideyawu, wihina ohusakuliwa wi aavuluse amwaana Ezarayeli mmadani mwamidiyanita, oliye ahaakula nuwiyeviha egihina: ‘Emudhaaga kinna thima vaari va nihimo na Manaseji, teto miyo kaginna thima vaade va makolo aaga.’ (Juí. 6:15) Oliye ubuwela wihina kafwanelela wakela mutholo ole. Mbwenye Yehova ohunona dhithu dhatedhene, bumwahaya ahimukavihera Jideyawu wakwanihedha mutholo dhatedhene.

5. Mudhidhi baani anamaholela mulogo enahoweliwa wooniha wiyeviha ni okala amanddile?

⁵ Anamaholela mulogo enowilibihedha wihina ekale owiyeviha ni amanddile. (Miq. 6:8; Atos 20:18, 19) Aliwa kinithukula mwaha wa dhithu enandiwa werana obe yeriliwana kale. Teto aliwa kinubuwela wihina kinna thima mwaha wa dhoviriganiha dhewa obe mwaha ohilogomana. Mbwenye, werana dhithudha ni makalelo yaala kahiyo ethu yokweya. Motajhiha, namaholela mulogo podi orumedha mutholo dhowinjhiva, mbwenye vasogolova kuhanda wakwaneliha mutholo dhatedhene. Malabo mamodha oliye podi otamaleliwa mwaha wa mabasa aapariliye obe podi owogeliwa obure mwaha makalelo aapariliye mabasaya. Eyo yapadduwa, anamaholela mulogo enamutajhihe aavi Jideyawu?

6. Anamaholela mulogo enamutajhihe aavi Jideyawu wodhela wanonna manddile ewa? (Osugwe fotu.)

⁶ Olobege nikavihero. Muthu anonne manddile aye onowonelamo wihina dhihikalawo dhithu ahinandiye werana. Mwaha okala muthu anonne manddile aye, Jideyawu ahiloba nikavihero naathu amodha. (Juí. 6:27, 35; 7:24) Teto sapama anamaholela mulogo werana emodhave. Tony asorihiwe mundduli anihina: “Mwaha wa makalelo gileliwimi, godhiveliwa wawakela mabasa bi mabasa naarive gihandaga wawakwaneliha. Vano miyo othoma ohudhera wodhela okanna manddile va ohudhera wehu weemudhi. Ohiya eyo, miyo omukoha mwaadhaga akala gowerana dhithudha mwamakalelo apama. Teto miyo ohogolowela woona musayitini mwehu vidiyu enna musolo Imite Jesus no Modo de Treinar, Confiar e Delegar.” Vano Tony obajha waloba nikavihero addibila ammulogoni aafunaga wapara mabasa. Mareeliho baani yaakumelele? Oliye anowoga egihina: “Vano mulogo onosamaleliwa pamadhene, teto miyo ginokanna mudhidhi wowinjhivene wihina gilibihe wandana waaga ni Yehova.”

7. Anamaholela mulogo enamutajhihe aavi Jideyawu yawogeliwaga obure? (Tiago 3:13)

⁷ Wawogeliwaga obure wakulege nuupwaseya. Dhoweha dhimodha dhinaafwanya anamaholela mulogo fuwogeliwa obure. Mbwenye yotajhiha ya Jideyawu podi wakavihera. Onona wihina aali muthu ohilogomana wahimukavihera Jideyawu okala opwaseya mudhidhi alobwana owEfrayim nubajha omuwogela obure. (Juí. 8:1-3) Jideyawu kanyanyuwile. Oliye ahoniha wi aali owiyeviha wodhela wavuruwana alobwana ale yawogiwa, nuupwaseya oliye wakurumusa murima. Sapama anamaholela mulogo ohara yotajhiha ya Jideyawu yawogeliwaga obure, wodhela ovuruwana museluya nuupwaseya. (Omwileri Tiago 3:13.) Ni makalelo yaala aliwa enookavihera odhana murenddele mmulogoni.

8. Anamaholela mulogo ekalege aavi yatamaleliwaga? Owoge yopadduwa.

⁸ Onvahe Yehova nthithimiho natenene. Jideyawu nuutamaleliwa mwaha wobola nlogo mmadani mwakudda Midiya, oliye onvaha nthithimiho naatene Yehova. (Juí. 8:22, 23) Anamaholela mulogo enamutajhihe aavi Jideyawu? Aliwa podi onvaha nthithimiho naatene Yehova wodhela dhithu dhatedhene eneriwana. (1 Cor. 4:6, 7) Motajhiha, namaholela mulogo atamaleliwa mwaha makalelo aye ohudhiha, oliye podi owoga wihina andile owoga pama mwahaye nnikavihero na dhoholela dha madhu a Mulugu obe nnikavihero na dhoxagiha nnakelihu munikuruni mwa Yehova. Malabo mamodha anamaholela mulogo enohowela wipendda akala enothabwa withithimiha, ohiya omuthithimiha Yehova. Kasugwa empadduwele namaholela mulogo dhaala anithaniwa Timothy. Nuthomeliwa okala namaholela mulogo, oliye oodhiveliwa werana mwaha dhavathaddo. Oliye onowoga egi: “Miyo gowegeredha makalelo oobajha mwahaya ni dhotajhiha dhohiyanahiyana. Mwaha wa yeyo addibila owinjhiva yodha ogitamalela. Mwebaribareene miyo geera withithimiha, ohiya onvaha thima Bibiliya ni omuthithimiha Yehova.” Nuuvira mudhidhi Timothy wonelamo wi ohowela osaddula makalelo aye ohudhiha wihina ahithabwege withithimiha. (Pro. 27:21) Ki yokumelelaya siivi? Oliye onowoga egihina: “Vano addibila enodha ogaddela makalelo mwahaya wakaviheriwa wawanana makathamiho, ovilelana dhoweha ni olibiha wandana wewa ni Yehova. Vano ginothabwa ohagalala mwaha addibila kinagitamalela miyo, mbwenye enatamalela mwaha wa vathaddo giwogilimi.”

YARUSAGA WIWELELA OBE WONIHA OLIBA MURIMA

9. Mwahaya bwaddi kiyaali ethu yokweya Jideyawu okala muthu owiwelela ni oliba murima? (Osugwe fotu yavakapani.)

⁹ Vano Jideyawu nuukala namaholela aamwaana Ezarayeli, ohowela okala owiwelela ni oliba murima, mbwenye eyo kiyaali ethu yokweya. Oliye ahakela mutholo worusa, waali ogujhula dhipwathapwatha dha Bahali dhaali dhaababe. (Juí. 6:25, 26) Vasogolova, dila biili Yehova omuruma Jideyawu wihina aavugule anyakoddo atugumaniye. (Juí. 7:2-7) Teto vaari va mahiyu Jideyawu orumiwa wihina awane ni amwiddani aye. — Juí. 7:9-11.

10. Mudhidhi baani enakaliwa yorusa anamaholela mulogo woniha wihina bowiwelela?

¹⁰ Anamaholela mulogo enohowela ‘okalave owiwelela.’ (Tia. 3:17) Namaholela mulogo owiwelela kanalegela ohara dhinawoga Bibiliya ni dhoholela dha nikuru na Yehova. Yeragana ndo, enere okala yotajhiha yapama wa athu amodha. Mbwenye malabo mamodha podi okala yorusa okala owiwelela. Motajhiha, malabo mamodha namaholela mulogo podi wakela dhoholela dhowinjhiva obe makalelo owerana dhithudha podi osadduwa morurumusa. Teto malabo mamodha aliwa podi obajha wanganyedhaga akala yoholela evahiwiwa enere waweddela pama. Aliwa podi wubuwelaga akala yere orumedha mutholo enonniwa wihina weere wathukulela ovolosihiwa mukambura. Vano anamaholela mulogo enande addi omutajhiha Jideyawu wodhela okala owiwelela yafwanyiwaga makathamiho ninga yala?

11. Ethu baani enakavihere anamaholela mulogo okala owiwelela?

¹¹ Ovuruwane dhoholela ni wilibihedhege oparihedha mabasa. Yehova onvaha Jideyawu dhoholela wodhela makalelo ogujhula dhipwathapwatha dhaababe, wodhela mburo wammagiye altare a Yehova ni mwanenyama aamukuthiye ninga mukutho. Jideyawu kaamukohile Yehova mwahaya bwaddi adhe anvahege dhoholela ndhe, mbwenye oliye ahiiwelela. Peeno nikuuru na Yehova nnonivaha makarta, dhovuwiha ni dhoholela dhinakavihera anamaholela mulogo onona makalelo owasamalela addibila ni arogola epaddi yomwilini ni yomuzimuni. Iyo nnowadhivela anamaholela mulogo mwaha ohara nuuroromeleya dhoholela ndha. Teto eyo enokavihera mulogo waatene. — Sal. 119:112.

12. Anamaholela mulogo enande aavi ohara yolaga enafwanyeya va Hebreus 13:17 yakelaga dhoholela dhixa?

¹² Wilibihedhege wihina osaddule monelo wawo. Kubuwela ethu Yehova amurumiliye Jideyawu. Oliye ohowela wavugula anyakoddo aye. (Juí. 7:8) Podi wera Jideyawu ahubuwela egi: ‘Eyo enohoweleya? Gerege dhaaga dhinere ogeddela pama?’ Naarive dhigali ndo, Jideyawu ahiiwelela. Peeno anamaholela mulogo enohara yotajhiha ya Jideyawu wodhela oparihedha mabasa masadduwo enadhela munikuruni mwa Yehova. (Omwileri Hebreus 13:17.) Motajhiha, yaka ya 2014 Nikuru nolamulela osaddula makalelo okavihera omagiwa Nyumba dha Omwene ni Nyumba dha Musonkano. (2 Cor. 8:12-14) Kale mulogo wafuna omaga Nyumba ya Omwene ni Nyumba ya Musonkano, yooboliha korowa dha nikuru na Yehova wihina epariwena mabasaya, yamala addibila yoohogolosa korowadha. Peeno addibila wapela elabo yaatene enovaha dhovelela dhewa, ndo nikuru na Yehova nnolabihedha dhovelela ndha wihina emagiwena Nyumba ya Omwene. Naarive akala mulogoya ohukanna korowa obe naari wihina ehogolose. Ddibila Juze nuwiwa muselu oyo karumendhe wihina dhatedhene dhere weedda pamadhene. Oliye ubuwela ayi: ‘Nimakalelo yala kadhinandeye omagiwa Nyumba Dhomwene, mwaha wuno dhithudha kadhineriwana ndo.’ Ethu baani yamukavihere Juze ohara dhoholela ndha? Oliye onowoga egi: “Madhu enafwanyeya va Provérbios 3:5 ni 6 yahigubusedha wihina gohowela omuroromela Yehova. Mwebaribareene dhokumeleladha dhahigitikiniha! Vano ninna omaga Nyumba dha Omwene dhowinjhiva, ohiya eyenove baahi, nnohudhera ovaha dhovelela dhehu mwamakalelo ohiyanahiyana, wihina nakavihere addibila aatene naaleya ehinanda omaga Nyumba dha Omwene.”

13. (a) Ebaribari baani aanna Jideyawu? (b) Ki anamaholela mulogo enamutajhihe aavi Jideyawu? (Osugwe fotu.)

¹³ Mweregena efunelo ya Yehova nuuliba murima. Jideyawu ahimwiwelela Yehova naarive oovaga ni anonaga wi eere weeka egumaye vang’ovini. (Juí. 9:17) Mbwenye nulibihiwa ni Yehova, Jideyawu ahikanna ebaribari wihina Yehova eere omukavihera obarela nlogo naaye. Anamaholela mulogo enakala murudda mabasa ehu enakoddihiwiwa, enohara yotajhiha ya Jideyawu. Nuuliba murima, aliwa enowasogolela mabasa olaleya ni wegeredha mutugumano, naarive enonaga wi aliwa podi ovokedhiwa mukambura, okohiwa ni anamathonga, wayelela mabasa obe ofwanyiwa makathamiho bi makathamiho.c Muwari mwa ohoseya winlubale, anamaholela mulogo enere ohowela oliba murima wihina yande wiwelela dhoholela enakeliwa naarive egaali yowopiha ohara dhoholeladha. Dhoholela ndha podi okala wodhela makalelo olaleya muthenga wotoriha ni wodhela dhithu nnahoweligihu werana wihina nivuluwe Gogi a Magoge anirijha.— Eze. 38:18; Apo. 16:21.

YARUSAGA OKALA OVILELA

14. Mudhidhi baani waaliwa worusa, mbwenye Jideyawu wooniha ovilela?

¹⁴ Wihina alabe ninga namaholela aamwaana Izarayeli, Jideyawu ohowela okanna kopolo. Amidiyanita nuuthawa mudhidhi yawaniwa emahiyu yele, Jideyawu wahara okuma oJezereyeli ofiya muhinjhe woJordawu, podi wera yahidhaleliwa makupu dhanna mwinga. (Juí. 7:22) Nerege Jideyawu nufiya muhinjhe woJordawu ahahiya amidiyanita othawa? Naari! Naarive egaali oogomeene, oliye naalobwana aye owakwana 300 wabuwa muhinjhe wojordawu ni odidelave wathamagiha, ofiyedha wafwanya ni wagonjhiha amidiyanita. — Juí. 8:4-12.

15. Mudhidhi baani namaholela mulogo anahoweliye ovilela?

¹⁵ Namaholela mulogo onohowela okala ovilela egi ande osamalela mulogo ni emudhaye. Mbwenye osamalela mutholo ndha podi omuthukulela okala oogomeene. Eyo yapadduwa anamutajhihe aavi Jideyawu?

16-17. Yamukavihere Jideyawu okala ovilela ddi, ki ebaribari baani anamaholela mulogo enahoweliwa okanna? (Isa. 40:28-31) (Osugwe fotu.)

¹⁶ Ororomele wihina Yehova anere wuvaha kopolo. Jideyawu oororomela wihina Yehova eere onvaha kopolo, teto siyeyo Yehova eriliyena. (Juí. 6:14, 34) Nlabo dhaala, Jideyawu naalobwana aye wathamagiha amwene abiili oMidiya. Aliwa yaali ni mweddo mbwenye podi wera mamwene ale yaali naaKamelu. (Juí. 8:12, 21) Naarive dhigaali ndo, nnikavihero na Yehova aliwa yahanda wafwanya ni wagonjhiha amwene ale. Nimakalelo mamodhave anamaholela mulogo podi omuroromela Yehova ole ‘ahinagoma newene ahinakukumuwa.’ Yehova anere wavaha kopolo enahoweliwa. — Omwileri Isaías 40:28-31.

¹⁷ Kasugwa epadduwile nnamaholela dhaala anithaniwa Matthew, analaba Komisawu yakudda koli. Yamukavihere okala ovilela ddi? Oliye onowoga egi: “Miyo gahonelamo ele enawoga Filipenses 4:13. Dila dhowinjhivadhene gakala oogomeene ni owuukuweene, miyo goolobela wa Yehova nuviheya. Miyo gompigireyela Yehova gimulobaga kopolo wihina gande wakavihera addibilaga. Mudhidhi yoyo, miyo gowoona muzimu wotxena wa Yehova ogivahaga kopolo wi gande okalave ovilela.” Ndala ninga Jideyawu, anamaholela mulogo enolaba nuviheya wihina esamalele nlogo na Yehova, naarive ehili yokweya. Mbwenye aliwa enohowela wanona manddile ewa. Teto aliwa podi okanna ebaribari wi Yehova onowavuruwana yalobelaga, yamulobaga nikavihero ni kopolo wihina yande ovilela. — Sal. 116:1; Fil. 2:13.

18. Ninga nonilihu yohudhera ela, anamaholela mulogo enande addi ohara yotajhiha ya Jideyawu?

¹⁸ Ninga nonilihu, anamaholela mulogo podi ohudhera dhithu dhowinjhiva ni yotajhiha ya Jideyawu. Aliwa enohowela wiyeviha ni okanna manddile wodhela onona mutholo mingasi enahoweliwa orumedha, yatamaleliwaga ni yawogeliwaga obure. Aliwa enohowela okala owiwelela ni oliba murima, thabwathabwa vano nnaaddamelihu omakuthulo wa dhithu dhatedhene. Aliwa enohowela ororomela wi Mulugu anere wavaha kopolo naarive efwanyiwaga makathamiho bi makathamiho. Ninga munawogela Bibiliya, iyo nnodidelave wavaha thima alobwana ninga yala, nnovaha thima dhatedhene eneriwa. — Fil. 2:29.