Mukale owiweegeredheene nlabo na Yehova nahinafiye

1. Ethu baani nnahowelihu werana wihina nivuluwe nlabo na Yehova?

MBIBILIYANI madhu owi ‘nlabo na Yehova’ onagiwana mudhidhi Yehova anaatorihiye amwiddani aye ni anavulusiye nlogo naaye. Eyo ehipadduwa dila dhowinjhivadhene mundduli. (Isa. 13:1, 6; Eze. 13:5; Sof. 1:8) Mudhidhi wehu, ‘nlabo na Yehova’ nnaabajhe anamathonga yamurijha obe yamugujhula Babiloniya Munlubale ni nnamale va koddo ya Armajedo. Wihina nivuluwe ‘nlabo’ nno nnohowela wiwegeredha ovanene. Yesu ohuhudhiha wihina nnohowela okala owiwegeredhene ‘ohoseya winlubale’ wahinafiye, eyo enoniha wihina nnohowela okala owiwegeredheene malabo amateene. — Mat. 24:21; Luc. 12:40.

2. Mwahaya bwaddi madhu Pawulo aalebeliiye akudda Tesalonika ekala oofuneya peeno?

² Karta noobajha murumiwi Pawulo aalebeliye akudda Tesalonika, ahilabihedha dholaddaniha dhowinjhiva wihina aakavihere makiristawu okala owiwegeredheene nlabo ninlubale na Yehova nihinafiye. Pawulo ahinona wihina nlabo na Yehova kanafiye mudhidhi yole. (2 Tes. 2:1-3) Naarive dhigali ndo, Pawulo ahakongomedha addibila okala owiwegeredhene okalaga ninga nlabo nne nahanle neenaa nufiya. Ni iyoya peeno podi olabihedha yolaga ela. Kabeni noone dhithu Pawulo aasorihiliye wodhela: (1) makalelo nnadhe nlabo na Yehova, (2) baani ahinavuluwe nlabo na Yehova ni (3) makalelo owiwegeredha wihina nivuluwe.

NLABO NA YEHOVA NNAFIYE MWAMAKALELO BAANI?

3. Nimakalelo baani nlabo na Yehova nnadhiwa ninga mbava anadha ni mahiyu? (Osugwe fotu.)

³ ‘Ninga mbava onadha ni mahiyu.’ (1 Tes. 5:2) Nna naladdaniho noobajha murumiwi Pawulo alabihedhiye wihina oonihe makalelo nnafiye nlabo na Yehova. Elabo yaatene ambava enowiya mowaguva ni mahiyu, mudhidhi athu yahajhehedhiwa. Nimakalelo mamodhave, nlabo na Yehova nnadhe mohujhehedha, nnaathukulele athu owinjhiva otikina. Dhithudha dhinapadduwe mowaguva ni podi wera dhinere wathukulela makiristawu mamodha otikina. Mbwenye mohiyana ni athu abure, iyo kannatolosiwe.

4. Nimakalelo baani nlabo na Yehova nnaliganiwa ni widdela woobaala?

⁴ ‘Ndala ninga widdela onanfwanya muhiyana labo naaye noobala.’ (1 Tes. 5:3) Muhiyana akanna wari, oliye kananona mudhidhi wofwanelela anadhiye abaale, mbwenye onokanna ebaribari wi aneere obaala. Mohujhehedha, oliye onofwanyiwa widdela woobaala ni onowoona opa vanlubale. Nimakalelo mamodhave, iyo kannonne nlabo ni mudhidhi nlabo na Yehova nnambeliwa, mbwenye nihikanna ebaribari wi nnere ofiya. Otoriha wa Yehova winakale mowaguva ni athu abure kinavuluwe.

5. Nimakalelo baani ohoseya winlubale winaliganiwa ninga vati vasaga?

⁵ Ninga vati vasaga. Va yoladdaniha yanatharu, Pawulo anowogave wodhela ambava eniiya ni mahiyu. Mbwenye vano, enakala ninga oliye aliganihe nlabo na Yehova ninga vati vasaga, ohiya ninga mbava. (1 Tes. 5:4) Ambava podi oviheyana wiiya ni ofiyedha oddiwala wihina mudhidhi onoovira obe winosa. Vati podi osa aliwa yahonagawo ni podi wooniwa ni athu amodha. Mwamakalelo mamodhave, ohoseya winlubale winere wawoneyiha ale eli ninga ambava, enadidela okala vayiihini yeragana dhithu dhihinamudhivela Mulugu. Mohiyana ni aliwa, iyo nnohowela okala owiwegeredhene wihina nisukume dhithu dhatedhene dhinamutakalela Yehova ni nisayele weragana ‘dhatedhene dhili dhapama, dhowogowa ni dhebaribari.’ (Efé. 5:8-12) Voharela, Pawulo olabihedha dholaddaniha biili wihina onihe athu baani yahinavuluwe nlabo na Yehova nafiya.

BAANI AHINAVULUWE NLABO NA YEHOVA?

6. Nimakalelo baani athu owinjhiva enakaliwa ninga enoogona? (1 Tessalonicenses 5:6, 7)

⁶ ‘Ale enagona.’ (Omwileri 1 Tessalonicenses 5:6, 7.) Pawulo aaladdanihe ale yahinavuluwe va nlabo na Yehova ni athu enagona. Aliwa kinoona wihina mudhidhi onoovira ni kinoona dhithu dhinapadduwa. Mwaha wa eyo, aliwa kinawedha wonelamo dhithu dhofuneya dhaapadduwaga ni enoodidela ohikosa ethu-sithu. Athu owinjhiva peeno ehigonelavo epaddi yomuzimuni. (Rom. 11:8) Aliwa kinarumedha wihina nnakalawo ‘malabo okuthula’ ni wihina ohoseya winlubale wihaddamela. Dhaapadduwaga dhithu mwilaboni ninga koddo ni mutipa, athu enoobajha okanna efunelo yovuruwana muthenga dha Omwene. Mbwenye dhithudha dhawomela, ohiya aliwa okalave mento aliwa enowakuna mada obe ohogolowela ogona. Naarive ale enarumedha labo notoriha, aliwa enubuwela wi nnere olegela. (2 Ped. 3:3, 4) Mbwenye iyo nnowonelamo wi nlabo nno ninna waddamela ni nnokala mento.

7. Nimakalelo baani ale yahinavuluwe nlabo na Yehova enaliganiwa ni aliba olezela?

⁷ “Aliba olezela.” Pawulo aaliganihe ale enatolosiwe ni Mulugu ninga aliba olezela. Muthu alezela kanonelamo dhithu dhinapadduwa mmambalo mwaaye ni onowerana dhothoma dhabure. Mwamakalelo mamodhave, athu abure kinapwatha dhithu anawoga Mulugu. Aliwa enosakula mweddelo winathukulela omatolosiwelo. Makiristawu enohowela okala txithi obe wiisugwera ni werana dhothoma dhapama. (1 Tes. 5:6) Namasanyiha dhaala a Bibiliya ohuwoga wi muthu anakala txithi “onokalave omaleya, kanasegedheya ni onowubuwela ni makalelo apama teto onowerana dhothoma dhapama.” Mbwenye mwahaya bwaddi eyo ekala ethu yathima? Wihina nihivolosihedhe ni muselu dha pulitika ni dhithu dha mwilaboni. Mudhidhi nnaddamelihu nlabo na Yehova, enerege othabwa oniwaddihedha wihina nivolowele muselu ndha. Mbwenye kanithuwathuwe. Muzimu wa Yehova anere onikavihera okala oomaleyene ni werana dhothoma dhapama. — Luc. 12:11, 12.

NNADE AAVI OKALA OWIWEGEREDHENE NLABO NA YEHOVA NAHINAFIYE?

8. Mowiwanana ni 1 Tessalonicenses 5:8, nniwegeredhe aavi nlabo na Yehova nahinafiye? (Osugwe fotu.)

⁸ “Niware yowara ya mujhila . . . ni . . . Kapaseti.” Pawulo aniliganihe ni anyakoddo eli owiwegeredhene wi ewane koddo. (Omwileri 1 Tessalonicenses 5:8.) Vakoddoni, munyakoddo anakala owiwegeredhene wihina awane ni amwiddani mudhidhi bu mudhidhi. Enopadduwa emodhave nihiyo. Wihina nikale owiwegeredhene wodhela nlabo na Yehova, nnohowela okala owiwegeredhene ni yowara ya mujhila ya nroromelo ni kapaseti a ejhehedhelo. Dhikalelo ndha podi onikavihera vanlubale.

9. Nimakalelo baani nroromelo nnanibareliwa?

⁹ Ninga yowara ya mujhila enabareliwa murima wa munyakoddo. Nroromelo ni odhivela winobarela murima wehu. Dhikalelo ndha dhinere onikavihera odhowagave nimulabelaga Mulugu ni nimuharaga Yesu. Nroromelo nnonivaha ebaribari wi Yehova anere wareeliha ale enamusayela ni murima wamutene. (Heb. 11:6) Nroromelo nnonlibiha ni nnonikavihera odidelagave okala ororomeleya wa mwene ehu Yesu naarive nifwanyiwaga makathamiho. Wihina nlibihe nroromelo nehu ni ovilela, nnohowela ohudhera dhotajhiha dha addibilihu enadidela okala ororomeleya naarive eharahariwaga obe egaali ohaweene. Nnohowela okala pasope ni dhithu dhomwilini naatajhihaga addibilihu yajajalihe egumi yewa wihina epwehe Omwene wa Mulugu mburo wobajha.b

10. Omudhivela Yehova ni mwanddamani winanikavihera aavi ovilela?

¹⁰ Odhivela siithu yothabwa ofuneya wihina ndideleve okala mento ni okala owimelene txithi. (Mat. 22:37-39) Odhivela ninnihuna ni Mulugu ononikavihera ovilela nakala mmalaleyelo naarive nifwanyiwaga makathamiho. (2 Tim. 1:7, 8) Nihiyoya nnowawoniha odhivela naaleya yahinamwebedha Yehova mwaha wa eyo nnodidelave olaleya murudda wehu ni ofiyedha olabihedhaga telefoni ni makarta. Iyo kannayelela ejhehedho yowihina nnere ofiya labo athu enaasadduliwa mubuwelo wewa ni yeregena ele eli yowogowa. — Eze. 18:27, 28.

11. Odhivela ninnihuna ni addibila winanikavihera aavi? (1 Tessalonicenses 5:11)

¹¹ Omudhivela mwanddamani enovolowelavo wadhivela addibilihu. Ni iyo podi werana eyo wodhela ‘olibihana ni ovenyihana mmodha ni mukwaye.’ (Omwileri 1 Tessalonicenses 5:11.) Nimakalelo mamodhave ninga anyakoddo enalaba vamodha vakoddoni, ni iyoya nnolibihana mmodha ni mukwaye. Enowoneleyamo wihina munyakoddo podi omporosa mukwaye mudhidhi ewanaga koddo, Mbwenye oliye kanamporosa yapudhave. Mwamakalelo mamodhave, iyo kannafuna wawukula addibilihu pudhave newene wawelihedha kunyawunya. (1 Tes. 5:13, 15) Teto nnowoniha odhivela wehu wodhela waariha addibila enaniholela ni enasamalela mulogo. (1 Tes. 5:12) Mulogo wotesalonika nuwitiwa kiyavinre yaka nuwindo murumiwi Pawulo walebela karta nna. Podi wera alobwana ale yathomiwe ninga anamaholela mulogo yahinaaxagele mabasaya teto podi wera yoviriganiha. Naarive dhigali ndo, yohowela oriihiwa. Waddamelaga ohoseya winlubale, nnohowela waroromela anamaholela mulogo ni oharaga dhoholela dhewa. Podi wera mudhidhi yoyo kannathapanyege ni addibila osede Mundiyale ni ooBeteli, bumwahaya sapama ohudhera wadhivela ni waariha addibila enaniholela mmulogoni mwehu okuma peeno odhowa osogolo. Naarive epadduwaga ethu-sithu, iyo nnere odidelave okala mento ni kannathabwege osugwa dhoviriganiha dhaaddibilihu. Kanaanganyedhege wihina Yehova ni Yesu enowalabihedha alobwana ala oororomeleya wihina enivahe dhoholela.

12. Ejhehedho enabarela aavi mubuwelo wehu?

¹² Ndala ninga kapaseti onabareliye musolo wa munyakoddo, ejhehedho ninnihuna yovulusiwa enobarela mubuwelo wehu. Ejhehedho yooliba ninnihuna enonikavihera wonelamo wi mpaganyo dha Yehova sili dhathima opitha ethu-sithu elabo enanivahiwa. (Fil. 3:8) Ejhehedho ninnihuna enonikavihera okala oomaleyene ni okala txithi. Siyeyo epadduwe ni Wallace ni Laurinda enakavihera elabo yo Afrika. Muwari mwa sumana tharu aabiilene wayelela makolwiwa. Teto mwaha wa mutipa wa Koronaviru aliwa kiyandile ohogolowela owaniwa wihina yakale ni amudhiwa. Wallace anowoga egi: “Ejhehedho yovenyihiwa muukwani enogikavihera wawubuwela aliwa ohiya makalelo yaliwa yahinathi okwa, Mbwenye mwamakalelo enaakaliwa yahogolowela okalawo mwilaboni exa. Ejhehedho ela enokurumusa murimaga gubuwela dhatedhene dhipadduwe.”

13. Ethu baani nnahowelihu werana wihina naakele muzimu wotxena?

¹³ “Kanithimihe mootho wa muzimu.” (1 Tes. 5:19) Pawulo aliganihe muzimu wotxena ninga mootho oli muwari mwehu. Nakanna muzimu wotxena nnokanna efunelo yowerana ele eli yapama ni nnokanna kopolo wihina nimparele mabasa Yehova. (Rom. 12:11) Mbwenye ethu baani nnahowelihu werana wihina naakele muzimu wotxena? Iyo podi olobela nlobaga muzimu wotxena, omuhudhera Bibiliya ni okosa epaddi ya nikuru naaye. Werana eyo eneere onikavihera okanna ‘dhowima dhomuzimuni.’ — Gál. 5:22, 23.

14. Ddiniyani nnahowelihu orabela neegi nidhowegeve nakelaga muzimu wotxena wa Yehova? (Osugwe fotu.)

¹⁴ Yehova anivaha muzimu waye wotxena, nnohowela okala pasope wihina ‘nahithimihe mootho wa muzimu wotxena’ Yehova anavaha muzimu waye wotxena ale enna mubuwelo wapama ni enerana dhithu dhapama. Iyo nubuwelaga ni neragana dhithu dhabure, Yehova kanaanivahe muzimu waye wotxena. (1 Tes. 4:7, 8) Ohiya eyenove, wihina nidhowegeve nakelaga muzimu wotxena, nnohowela ‘ohunyoza dhovuhulela dha mBibiliyani.’ (1 Tes. 5:20) ‘Dhovuhulela’ ndha dhinovolowelavo muthenga dha Yehova dhinawoga wodhela koddo ya Armajedo ni malabo okuthula. Iyo nihinona wi Armajedo aneere ofiya mowaguva. Nnowoniha wi kanalegele wodhela okanna mweddelo wapama ni ‘waviheyana mabasa a Yehova’ malabo aamatene. — 2 Ped. 3:11, 12.

“MURAJHIHEGE OPENDDA KADDA ETHU”

15. Nnaarabele aavi olekethiwa ni muselu dhowoota dhademoniyu? (1 Tessalonicenses 5:21)

¹⁵ Osogolo, amwiddani a Mulugu enere owoga wi ehikanna “Murenddele nuubareleya!” (1 Tes. 5:3) Ademoniyu enere ovuwiha muselu dhowoota elabo yaatene ni athu owinjhiva eneere olekethewa. (Apo. 16:13, 14) Ki iyo? Iyo kannalekethiwe akala ‘nnorajhiha opendda kadda ethu.’ (Omwileri 1 Tessalonicenses 5:21.) Madhu egeregu etapuleliwe vala owi “opendda” enalabihedhiwa ni anamahana mujhila yafunaga opendda akala mujhilaya bwapama obe naari. Bumwahaya, nnohowela opendda ndhe nniwihu obe nnilerihu akala sebaribari. Eyo yaali ethu yathima wa mulogo wotesalonika ni sathima wa iyo peeno mudhidhi nnaddamelihu ohoseya winlubale. Ohiya orumedhaga dhithu dhatedhene athu anawogiwa, nnohowela olabihedha makalelo ehu owubuwela wihina nladdanihe ndhe nnilerihu obe nniwihu ni ndhe dhinawoga Bibiliya ni nikuru na Yehova. Neerana eyo, kannalekethiwe ni muselu dhowoota dhinavuwiha ademoniyu. — Pro. 14:15; 1 Tim. 4:1.

16. Ebaribari baani ninnihuna wodhela osogolo, ki nnahowela neere ddi?

¹⁶ Iyo nihinona wi ninga nikuru, adhaari a Yehova enere ovuluwa mudhidhi ohoseya winlubale wafiya. Mbwenye kannonne enapadduwe wa kadda muthu wa iyo. (Tia. 4:14) Naarive akala ohoseya winlubale winafiye nigali mento obe nigaakwile, nadidela okalave ororomeleya Yehova aneere onireeliha ni egumi yohimala. Addibila oothikitheliwa enadhowa yakalege ni Yesu odhulu, mbwenye, mambila mamodha enakalege mparayizu, elabo yela yavati. Bumwahaya, nnafuna nilibihedhe wubuwela mpaganyo wehu wohagalasa ni okala owiwegeredhene nlabo na Yehova nihinafiye!