OHUDHERA 34
Nnonihe aavi odhivela ninnihuna ni Yehova?
Vano onoona wi ohuthabwa wandana ni Yehova ohiyana ni mudhidhi obajhaga omuhudhera Bibliya? Onofuna odhowagave olibiha wandana wawo nuliye? Kuddiwale wihina, mudhidhi Yehova oonaga wi odhivela wawo onna wunnuwa, oliye anerege othabwa wudhivela ni wusamalela. Ki onoonihe aavi wihina onomudhivela Yehova?
1. Nnonihe aavi wi nnomudhivela Yehova?
Naamwiwelelaga oliye nnowoniha wi nnomudhivela. (Omwileri 1 João 5:3.) Oliye kanamuwaddihedha muthu omwiwelelaga. Anonvaha kadda muthu wa iyo ofuru womwiwelela obe naari. Mwahaya bwaddi? Mwaha Yehova anajheha wihina ‘nimwiwelelege ni murima waatene.’ (Romanos 6:17) Ni madhu mamodha, oliye anajheha wihina omwiwelelege ohiya mwaha wuwaddihedha mbwenye ni murima wawo waatene. Bumwahaya epaddi yanatharu ni yanennayi ya livuru nna enere wukavihera owoniha odhivela onniwena ni Yehova mwaha werana dhithu dhinamuhagalasa ni oherana ndhe dhinamukula.
2. Mwahaya bwaddi malabo mamodha ekala ethu yorusa woniha odhivela ninnihuna ni Yehova?
‘Owinjhiva bimakathamiho aathu apama.’ (Salmos 34:19) Iyo aatene nnowanana ohulogomana wehu. Malabo mamodha nnofwanyiwa makathamiho ninga ohukanna korowa, obure ni makathamiho mamodha. Naafwanyiwaga makathamiho mwigumini mwehu podi ohukala ethu yokweya werana ndhe Yehova ananilobiye. Eyo enopadduwa mwaha werana ethu yabure podi okala ethu yokweya. Mbwenye wakala oororomeleya ni wamwiwelelaga Yehova onowoniha wihina onomudhivela opitha dhithu dhatedhene. Teto onowoniha wi ori muthu oororomeleya. Bumwahaya Yehova anere okala oororomeleya mwigumini mwawo. Teto kadha unyanyala. — Omwileri Salmos 4:3.
OHUDHERE DHITHU DHIMODHA
Woone mwahaya bwaddi Yehova agaavaha thima wiwelela wawo ni ethu onahoweliwe werana wihina okale oororomeleya wa oliye.
3. Muselu atatamule Saddana onapatha egumawo
MBibliyani va livuru na Jo nnofwanyamo wi Saddana ohimwinkedha Jo ni ohawinkedha athu aatene enafuna omulabela Yehova. Mmwileri Jó 1:1, 6–2:10, mwamala muthapanyedhe makoho enaharela:
Ninga awogile Saddana, ethu baani yamuthukulela Jo omulabela Yehova? — Mmusugwe Jó 1:9-11.
Ki ethu baani Saddana awinkedhiye athu aatene, vamodha ni weya? — Mmusugwe Jó 2:4.
Mmwileri Jó 27:5b, mwamala muthapanyedhe nikoho nnaharela:
Enoniha ddi wihina Jo omudhivela Yehova ni murima waatene?
Jo ohoniha wi oomudhivela Yehova mwaha okala oororomeleya wa oliye
Iyo nnowoniha wi nnomudhivela Yehova nakala oororomeleya wa oliye
4. Ohagalase murima wa Yehova
Mmwileri Provérbios 27:11, mwamala muthapanyedhe nikoho nnaharela:
Yehova anakala aavi weragana dhithu dhapama ni wamwiwelelaga? Mwahaya bwaddi?
5. We podi okala oororomeleya vamentoni va Yehova
Iyo nnomudhivela Yehova, eyo enonithukulela othapanya naathu amodha wodhela oliye. Mwaha okala oororomeleya wa oliye nnofuna omwiwelela naarive werana eyo egaari ethu yorusa. Musugwe VIDIYU, mwamala muthapanyedhe makoho enaharela:
Onoona wi othapanya naathu amodha wodhela Yehova ethu yorusa?
Nvidiyuni muna, emukavihere Kalawudiyu ogonjhiha woova anniyena ddi?
Naadhivelaga dhithu anadhivela Yehova, niiddaga ndhe aniddiye enokweya okala oororomeleya vamentoni vaye. Mmwileri Salmos 97:10, mwamala muthapanyedhe makoho enaharela:
Wubuwela dhithu ohudheriwe, dhithu baani dhinamudhivela Yehova? Ki dhithu baani oliye aniddiye?
Onaahudhere aavi odhivela dhithu dhapama ni widda dhithu dhabure?
6. Omwiwelela Yehova ethu yapama
Omwiwelela Yehova malabo amatene ethu yapama. Mmwileri Isaías 48:17, 18, mwamala muthapanyedhe makoho enaharela:
Onoonamo wihina nnofwanelela ororomelaga wi Yehova ohunona dhithu dhapama dha mwigumini mwehu? Mwahaya bwaddi?
Makalelo baani dhithu ohudheriwe mBibliyani ni wodhela Yehova dhukaviheriwa ofiyedha peeno?
ATHU AMODHA ENAWOGA YEGI: “Mulugu kanapwatha ndhe ginerimina newene ndhe ginahiyimi werana.”
Dholebela baani dha mBibliyani walabihedhiwe wihina woonihe wi dhowera dhehu podi omuukula Yehova obe podi omuhagalasa?
OVIRISEDHA
We podi wooniha wi onomudhivela Yehova wamwiwelelaga ni wakala oororomeleya naarive ofwanyiwaga dhoweha.
Ogwaddela
Dhithu baani ohudheriwe ni yopadduwa ya Jo?
Onoonihe aavi wi onomudhivela Yehova?
Enuukavihere ddi okala oororomeleya wa Yehova?
WEGI ONONE DHITHU DHIMODHA
Woone makalelo ookala oororomeleya wa Yehova ni okala oororomeleya mmulogoni.
Ohudhere dhithu dhimodha Saddana anawotedhiye athu aatene.
“Jo aari oororomeleya” A Bíblia — Qual É a Sua Mensagem? ohudhera 6)
Woone makalelo anamwani enonihiwa wihina enomudhivela Yehova.
Makalelo baani muzombwe aneehiwa ni azombwe amodha anonihiye wi dororomeleya wa Mulugu?