Ovenyihedhe wandana wawo ni Yehova

YAKA dhatedhene mambila oofuneya a Yehova enohogolowela mmulogoni. Kubuwela ‘ohagalala onakala odhulu’ kadda nimbila naahogolowaga! (Lucas 15:7, 10) Akala ohogolowele mmulogoni, kuwanganyedhege wi Yehova, Yesu, angero ehihagalala vanlubale mwaha we ohogolowela mwibaribarini. Mbwenye mudhidhi onavenyihedhiwe wandana wawo ni Yehova onere ogumanana makathamiho. Makathamiho ala baavi? Ki enukavihere ddi waagonjhiha?

MAKATHAMIHO ALA BAAVI?

Owinjhiva yahogolowela mmulogoni enowanana mubuwelo wabure. Podi wera we onowiliganiha ni mwene Davidi. Naari agaleveleliwe oliye ohusoriha egi: ‘Dhothega dhaaga dhihithabwa winjhiva’. (Sal. 40:12; 65:3) Athu owinjhiva yamuhogolowela Yehova enowanana mubuwelo wabure obe enokanna manyazo yaka dhowinjhivadhene. Isabelle, nuutxosiwa amanle yaka dhokwaranya 20,a anosoriha egi: “Miyo gubuwela wi Yehova newene kanagilevelele.” Wakala ookwerebeyene wandana wawo ni Yehova onere oridha dila bili. (Pro. 24:10) Kuhiye eyo wupadduwela.

Athu amodha enubuwela wi kinande werana dhinahoweleya wihina evenyihedhe wandana wewa ni Yehova. Nuumala ohogolowela mmulogoni Antoni anosoriha egi: “Enakala ninga miyo gere oddiwala enatapulela ddi okala mukiristawu.” Mwaha wamubuwelo ninga yola athu amodha kinilibihera wapara mabasa oomuzimuni.

Wihina nladdanihe, kubuwela nipevo ninlubale otatarula nyumba. Mwinnya oona wi nyumbaye ehitataruwa oliye anokwerebeya ubuwela mudhidhi ni kopolo anafuniye olabihedha wihina awomihedhe nyumba ele etataruwe. Ethu emodhave enopadduwa werana yothega enavunganyedha wandana wawo ni Yehova. We podi othuwathuwa mwaha kopolo onafuniwe olabihedha wihina ovenyihedhe wandana wawo ni Yehova. Mbwenye kunahowela owanana wekawo.

Yehova anonikongomedha: ‘Mudhe ntxokotxele muladdu dhehu.’ (Isa. 1:18) We ohilibihera vanlubale wihina ‘odhowe watxokotxele muladdu’ wawo ni Yehova. Oliye anowuudhivela mwaha we werana yeyo. Kubuwela: Yehova podi olabihedha yotajhiha yawo, wihina amwakule Saddana!—Pro. 27:11.

Mwaha ohogolowela mwibaribarini, we ononfiyera Yehova ni oliye anopaganya wihina anere wufiyedha. (Tia. 4:8) Mbwenye kuhagalale baahi mwaha ohogolowela mmulogoni. We onohowela olibiha wandana wawo ni baabo, mukwawo, Yehova. Onaawedhe addi werana yeyo?

OKANNE DHOLUBA ONANDIWE WAKWANELIHA

Okanne dholuba onandiwe wakwaneliha. Wubuwele wi nroromelo nawo thinenneve. Obe nere, we onowubuwelave nivano dhohudhiha dhimodha dha Yehova ni mpaganyo dhaye dhosogolo. Mbwenye egumawo yatene ninga mukiristawu enofuna ovenyihedhiwa. Mwa dhithu dhatedhene yathimaya fuhogolowela olaleya, woona mutugumano, ni ojha mudhidhi naaddibilo ni naarogoliyo a munroromeloni. Kasugwa dholuba dhimodha dhinukavihere.

Kujhombele othapanya ni Yehova. Yehova ohunona wi mubuwelo wunyemelaga podi wurusaga olobela. (Rom. 8:26) Mbwenye ‘odidele olobela.’ Omwaaddele Yehova wi onofuna okala mukwaye nyingala-ginyingalevo. (Rom. 12:12) Ddibila Andre anowubuwela: “Miyo gahona wi gahikanna nibili, ni gokanna manyazo. Mbwenye kadda labo galobelimi mubuwelo ola woovuguwa. Miyo gokanna murenddele.” Akala kunonne dhithu onafuniwe owoga walobelaga, we podi omuhudhera Salmos 51 ni 65 wihina wawone malobelo awerilena mwene Davidi nuumala othwaruwa.

Omuhudherege Bibliya kadda labo. Eyo enere olibiha nroromelo nawo ni odhivela wawo ni Yehova. (Sal. 19:7-11) Filipe anosoriha egi: “Mwaha wohimuhudhera Bibliya kadda labo fwigithukulele okwerebeya epaddi yomuzimuni ni omuthegela Yehova.” Oliye onowogave egi: “Miyo kagafuna werana yothega ela dila bili. Bumwahaya miyo othoma werana ohudhera wavayeka. Ohudhera wula wigibarela.” We podi werana ethu emodhave. Wahinona dhithu baani dhohudhera, omulobe nikavihero mukwawo owithwelavo omuzimuni.

Ovenyihedhe wandana wawo naaddibila vamodha naarogola. Athu amodha enahogolowela mmulogoni enowawoova addibila. Lariza anosoriha egi: “Miyo gokanna manyazo ni gowoona wi gahithukuliha manyazo mulogo. Gahimala mudhidhi wowinjhivene nganna mubuwelo ola.” Okanne ebaribari wi anamaholela mulogo naaddibila amodha owithwelavo omuzimuni, enere ohagalala wukavihera wihina ovenyihedhe wandana wawo ni Yehova. (Osugwe kwaduru “Anamaholela mulogo enahoweleya yere ddi?”) Aliwa eli oohagalalene mwaha we omuhogolowela Yehova, ni enofuna wihina odhowegeve okala oohagalalene!—Prov. 17:17.

Onaawedhe addi waddamela mulogo? Woonege mutugumano dhatedhene, ni olaleyege vamodha naaddibila ni arogola. Eyo enukavihera addi? Felix anosoriha egi: “Mulogo waali wohagalalene mwaha miyo ohogolowa. Gahona wi addibila yogidhivela. Mwaha atene yahigikavihera woona wi miyo gokosa epaddi yemudhi dili bili, miyo woona wi gahileveleliwa ni odhowagave osogolo.”—Osugwe kwaduru “Enahoweleya were ddi?”

KUSELELE!

Mudhidhi onawaniwe wihina ovenyihedhe wandana wawo ni Yehova, Saddana anerege “wureyela magoddo” mudila mwawo. Oliye anafuna umorihe. (Lucas 4:13) Bumwahaya wikome ni olibihe nroromelo nawo ovanene.

Awogaga ni mambila aye Yehova ohupaganya egi: ‘Ginere waaja nimbila nirimele, ni ginere odhana nimbila nipupuruwe. Ginere opotha nne niporeye ni ginere okavihera nne nigomile.’ (Eze. 34:16) Yehova ohakavihera adhaari aye owinjhivene ovenyihedha epaddi yewa yomuzimuni. Kuwanganyedhe wi oliye anofuna wukavihera wihina ovenyihedhe wandana wawo onniwena nuliye.

Anamaholela mulogo enahoweleya yere ddi?

Anamaholela mulogo ehikanna mutholo munlubale wowakavihera anamalaleya ehogolowele mmulogoni ovanene ovenyihedha wandana wewa ni Yehova. Kasugwa ethu baani anamaholela mulogo enafuniwa wawerela aliwa.

Mwakavihere woona wi addibila enowadhivela. Murumiwi Pawulo ahinona wi ole erilena yothega mbwenye athwaruwile podi ‘othabwaga wikubanyedha.’ (2 Cor. 2:7) Kahiyo ethu yootikiniha oliye okanna manyazo ni okwerebeya. Bumwahaya Pawulo adhe akongomedhege mulogo egi: ‘Mmulevelele ni murima watene ni mmutodole.’ Ale ehogoloseliwe mmulogoni enohowela nikavihero wihina ekanne ebaribari wi Yehova onowadhivela, teto ni addibilaya atene a munroromeloni enowadhivela. Wihina aliwa ehikwerebeye sathima anamaholela mulogo watamalela ni wakavihera ni dhithu dhinahalela.

Mulobelege ni aliwa. ‘Malobelo a muthu owogowa ehikanna kopolo.’ (Tia. 5:16) Lariza nimuwogilihu mundduli onosoriha egi: “Miyo gahithapanya ni anamaholela mulogo wodhela dhithu ganganyedhimi ni woova waaga. Aliwa yahilobela ni miyo ni yahiwoga ndina naaga elobelaga. Eyo yahigithukulela woona wi anamaholela mulogo kiyatakaleliwe ni miyo. Teto aliwa yofuna ogikavihera ovenyihedha wandana waga ni Yehova.” Oliye anowogave egi: “Malobelo aanamaholela mulogo ehigoniha wi Yehova kanona dhoviriganihave dhaaga baani, mbwenye oliye anogidhivela ni anowoona opama waaga.”

Mwandane ni aliwa. Ale ehogoloseliwe mmulogoni enofuna okanna akwiwa ammulogoni. Namaholela mulogo anithaniwa Justin anosoriha egi: “Opathege ofuru-bufuru onakanniwena wihina olaleye ni aliwa, teto kuddiwale waapada. Teto wandana ni aliwa sathima.” Namaholela mulogo mmodha anithaniwa Henry onosoriha egi: “Addibila amodha ammulogoni yoona wi anamaholela mulogo ehandana ni ale ehogoloseliwe mmulogoni, naaliwaya enerege ofuna watajhiha.”

Mwakavihere ohudhera. Muthu owithwelavo omuzimuni podi omukavihera ole ahogoloseliwe mmulogoni okanna ohudhera wavayeka wapama. Namaholela mulogo anithaniwa Darko onosoriha egi: “Miyo ginodhiveliwa wawaddela athu amodha dhithu dhapama gifwanyilimi geeragana ohudhera waaga wavayeka ni ginodhiveliwa wawoniha makalelo murimaga onakaliwa mwaha womuhudhera Bibliya. Teto gera ndo ginopangana ni ole ahogoloseliwe mmulogoni wihina nisuze vamodha muselu bu muselu ogidhivele.” Namaholela mulogo mmodha anithaniwa Clayton onosoriha egi: “Miyo ginowakongomedha oveda thalako dha mBibliyani dhaathu efwanyiwe makathamiho ninga ewa wihina yoone dhithu baani enaahudheriwavo.”

Mukale anamakukula apama. Ale enahogoloseliwe mmulogoni ehawoona anamaholela mulogo elabaga ninga anamatoriha. Vano aliwa enohowela wawona ninga anamakukula. (Jer. 23:4) Okalege opwasedha wavuruwana ni waguvege watamalela. Kunyanyale owoga ni aliwa. Kasugwa ethu baani anerana namaholela mulogo anithaniwa Marco aadhowaga waapada ale ehogoloseliwe mmulogoni: “Iyo nnothapanyedha muselu wa mBibliyani ni nnowatamalela aliwa, teto kanahiya wawubusedha wi nnowatamalela mwaha wilibihedha wihina emuhogolowele Yehova ni oliye onothabwa ohagalala. Napaganyaga wihina ndhowege iyo nnowawaddela labo nnafunihu ohogolowa.”

a Mandina mamodha muwari mwa musolo ola ehisadduliwa.