Ohiwegeredha wihina ‘okale mwilaboni exa’?

NNOJHEHA mudhidhi enakwanela madhu a Yesu enafwanyeya va Mateus 5:5 enihina: “Oohagalala baathu oopwaseya, mwaha enere wakela elabo yavati.” Alobwana othikitheliwa enere wakela elabo ya vati, yakala mamwene vamodha ni Yesu odhulu. (Apo. 5:10; 20:6) Mbwenye makiristawu owinjhiva peeno enere wakela elabo ya vati mwaha wihina enerege okalawo ni mukalakala, wogowa, ni murenddele nuuhagalala. Wihina eyo epadduwe aliwa enere wapara mabasa owinjhiva. Nnere woona dhotajhiha tharu: Osaddula elabo wihina ekale Parayizu, wasamalela ni wahudhiha ale enaavenyihiwe muukwani. Kubuwela ovanene makalelo owooniha wihina onofuna wapara mabasa ala ni woniha wihina onofuna wapara mparayizu.

WIWEGEREDHE WI OSADDULE ELABO EKALE PARAYIZU

Yehova nuwawaddela athu wi ‘ebaalege ni edhalihe elabo’ oliye ahoniha wihina vang’ono vang’ono athu yere osaddula elabo wihina ekale Parayizu. (Gén. 1:28) Ale enaakele elabo enere wiwelela nlamulo nenna. Woona wihina — mundda wo Ideni kuliwo, wihina elabo ekale Parayizu eneere ohoweleya obajha omaromo. Koddo ya armajedo yamala nnere okanna mabasa owinjhiva wihina niwomihedhe dhipaddi dha elabo athu enongiliwa, teto yegi eyo epadduwe enere ohoweleya wapara mabasa owinjhiva!

Eyo enonubusedha mabasa yaparile amwaana Ezarayeli nukuma elabo ya oBabiloniya ehogolowelaga oJeruzale, dhahivira yaka 70 ohukaliwaga. Mbwenye namavuhulela Izayiya ahiwoga wihina aliwa yere ohogolowela oJeruzale ni yere osaddula elabo ele wihina ekale yoriya. Yovuhulelaya yawoga yegihina: ‘Ginere weeriha wihina elabo wili eddeddere ekale ninga jardi a Yehova’. (Isa. 51:3) Ni siyeyo yapadduwile. Ni makalelo mamodhave nnikavihero na Yehova, ale enaakele elabo yavati enere wanda osaddula wihina ekale parayizu. Teto dhihikalawo dhithu dhimodha dhinukavihere wooniha ovanene wihina onofuna wakavihera mabasa yaala.

Ethu yobajha onahoweliwe wera fuwilibihedha wihina vadevawo dhithudha dhikalege dhowegeredheyadhene, we podi wilibihera werana eyo naarive amwanddamanawo yahivahaga thima. Teto we podi okavihera oxela ni werana dhithu dhimodha onyumbani yoomwene ni dhaamagiwaga nyumba dha musonkano. Wandaga we podi wivahedhela wihina wapare mabasa owivelela, ni makalelo yala we onere woniha wihina oli owiwegeredhene wihina wakavihere addibila ni arogola. We podi wikoha, ‘ethu baani ginahowelimi ohudhera peeno enaagikavihere mwilaboni exa?’

Addibila ni arogola exeelaga onyumbani ya Omwene.

WIWEGEREDHENE WIHINA WAKAVIHERE ALE ENAVENYIHIWE MUUKWANI

Nuvenyihiwa mwana Jayiro, Yesu oloba wihina envahe yoojha. (Mar. 5:42, 43) Kiyaali yokweya omusamalela mwaana ole anna yaka 12. Vano kawubuwele mabasa nnakanihu Yesu awoga wihina ‘aatene eli mmahame eneere wiwa ndhu naaga ni evenye.’ (João 5:28, 29) Naarive Bibiliya ahiwoge dhithu dhowinjhiva enowandeya wonelamo wihina anookwa enere ohowela dhoojha, dhowara ni mburo wokala. Teto we podi obajha woniha ovanene wihina onofuna wakavihera. Kabeni noone dhithu dhimodha onahoweliwe werana.

Onere ddi wihina woonihe ovanene wi oli owiwegeredhene wihina okale mwilaboni yavati?

Addibila ni arogola ohagalalene vahereportu yajhehaga wawakela addibila amodha enadhela elabo yo Paris.

We wanona wihina nameeddela mulogo a murudda wawo anna odha wihina uwaredheleni, we onowivahedhela wi onvahe yojha? Akala ddibila akavihera oBeteli obe ali nameeddela mulogo onohiya okavihera oBeteli vano okaviheraga mulogo wawo we onowivahedha wi omukavihere waaja mburo wokala? Musonkano wa malabo mararu obe wavayekiwa wereya murudda onakaliwe, we onowivahedha wihina wapare mabasa enapariwe musonkanoya wahinathi obajha ni wamala, obe wawakela addibila enadha wolapela?

WIWEGEREDHE WIHINA WAHUDHIHE ALE ENAVENYIHIWE MUUKWANI

Mowiwanana ni Atos 24:15, podi wera onere ovenyihiwa mbwabwadda ni mbwabwadda waathu. Owinjhiva wa athu yaala kiyanna ofuru womunona Yehova yahinathi okwa. Aliwa enere ovahiwa ofuru yola yavenyihiwa mukwani.a Mulugu anere walabihedha adhaari yaxagele mabasa olaleya wihina yahudhihe ale enaavenyihiwe muukwani. (Isa. 11:9) Murogola dhaala anithaniwa Charlotte alaleye elabo yo Wamerika du Suli ni wAfrika onofuna vanlubale wapara mabasa yaala. Oliye onowoga egi: “Miyo ginokanna munukwela yowahudhiha ale enaavenyihiwe muukwani. Gahudheraga wodhela muthu akwile kale ginowoga gegi, ‘egumi yaye yakale aavi ahere amunona Yehova.’ Ginoojheha nuuthaba wahudhiha wodhela Yehova ale enaavenyihiwe muukwani.”

Adhaari a Yehova yaliwo mudhidhi Yesu ahinathi odha elabo ya vati, enere ohudhihiwa dhithu dhowinjhiva. Kabiha wubuwela, enere okala gari enlubale omuhudhiha Daniyeli dhovuhulela oliye alembiye mbwenye oliye ahoneliyemo, obe kabiha wubuwela makalelo enakale yohagalasa omuhudhiha Ruti ni Nowemi wihina Mesiya adhile weemudhi yewa. Mwebaribarene enere okala yohagalasa wapara mabasa ala olaleya nihovaga newene nihithusiwaga ni athu a elabo ela yabure!

Murogola dhaala anvahaga muhiyana foyetu mburo winafuliwa guwo.

Onere ddi wihina woonihe ovanene wi oli owiwegeredhene wihina wahudhihe ale enaavenyihiwe muukwani? Ekalelo modha yathima, fuudhela wilibihera wihina niwomihedhe ekalelo yehu yohudhiha ni ohijhombela wapara mabasa olaleya. (Mat. 24:14) Naarive wahandaga olaleya ninga wafuneliwe mwaha wuluvala obe mwaha wa dhithu dhimodha, we podi wooniha wihina onofuna walaleya ale enaavenyihiwe mukwani wodhela werana onandiwe mmalaleyelo ovanene.

Vano enakumelelavo siila, we onofuna okala mwilaboni ya vati? Podi weera onojheha nuuhagalala osaddula elabo wi ekale parayizu ni wasamalela ala enaavenyihiwe muukwani ni wahudhiha. We podi wooniha wihina oli owiwegeredhene wodhela ohijhombela mabasa onniwena ovanene ni mabasa enaligana ni mabasa onawakeliwe, wakela elabo yavati.

a Osugwe ohudhera onna musolo “Athu owinjhiva enere othukuleliwa mburo wapama” va Namasugwera a Setembro a 2022.