Naatajhihe angero oororomeleya

1-2. a) Ni makalelo baani angero eliwa ohiyana ni iyo? b) Dhithu baani dhinaniliganiha ni angero?

NINGA adhaari Yehova, nnokosa epaddi ya emudhi yaye enna odhivela enafwanyeya dhipaddi dhohiyana-hiyana wapela elabo yaatene. Emudhi ela enovolowelavo addibila ni arogola vamodha ni matxikwi ni matxikwi aangero. (Dan. 7:9, 10) Nawubuwelaga angero, podi wera nnapwasedha wubuwela makalelo aliwa eliwa oohiyana ni iyo. Motajhiha, angero yambele okalawo kale, iyo nihinathi opaddusiwa. (Jó 38:4, 7) Teto aliwa bakopolo, boweela ni bowogowa onipitha iyo, mwaha iyo nili athu ohilogomana. — Luk. 9:26.

² Naarive nigahiyanne vanlubale naangero, dhihikalawo dhithu dhowinjhiva dhinanliganiha naliwa. Motajhiha, iyo nnowanda otajhiha dhikalelo dha Yehova, teto nihikanna ofuru wosakula ele eli yapama obe yabure ndala ninga angero. Teto ndala ninga kadda muthu wa iyo, kadda mungero ohukanna ndina naye ni dhikalelo dhaaye. Ohiya eyo, kadda mungero ohukanna mutholo waye athomeliwiye. Teto iyo nipaddusiwe ni efunelo yomwebedha mpaddusi ehu Yehova ndala ninga angero.—1 Ped. 1:12.

3. Ohudhera wula nnone ddi wodhela angero?

³ Woona wihina dhihikalawo dhithu dhowinjhiva dhinaniliganiha ni angero. Yotajhiha yewa yapama, podi onlibiha ni onihudhiha dhithu dhowinjhiva dhathima. Ohudhera wula, nnere woona makalelo owatajhiha angero wodhela ekalelo yewa yokala owiyeviha, wadhivela athu, ovilela ni mabasa enapariwa wi mulogo okale woweela.

ANGERO BOWIYEVIHA

4. a) Nnaatajhihe aavi angero wodhela okala athu owiyeviha? b) Mwahaya bwaddi angero bowiyeviha? (Salmo 89:7)

⁴ Angero oororomeleya bowiyeviha. Naarive aliwa eganonne dhithu dhowinjhiva, egaali akopolo ni athotho, aliwa enowiwelela dhoholela dha Yehova. (Sal. 103:20) Teto mudhidhi yakwanihedhaga mutholo dhewa aliwa kinithukula mwaha wa kopolo dhinlubale enniwana. Ohiya eyo, aliwa enowerana dhatedhene Yehova analobiye nuuhagalala. Teto kinawaddela athu mandina ewa wihina ethetheliwe mudhidhi yakwanihedhaga mutholo dhewa.a (Gén. 32:24, 29; 2 Reis 19:35) Aliwa kinarumedha wakela nriho nnanfwanelela Yehova baahi. Mwahaya bwaddi angero bowiyeviha? Mwaha aliwa enomudhivela ni enomuriha vanlubale Yehova.— Omwileri Salmo 89:7.b

5. Mungero ola onihile aavi wiyeviha mudhidhi amusumululaga murumiwi Juwawu? (Osugwe fotu.)

⁵ Kabeni noone yopadduwa enooniha makalelo angero eliwa owiyeviha. Yaka ya 96 M.W., mungero dhaala ahinawogiwa ndina naye, ahimooniha murumiwi Juwawu yowoniha yootikiniha vanlubale. (Ovuhu. 1:1) Ddiniyani murumiwi Juwawu eriliye numala woona yowoona ele? Oliye afuna amwebedhe mungero ole. Mbwenye mowaguva mungero ole oororomeleya, omukoddiha Juwawu wi ahimwebedhe. Oliye owoga eegi: ‘Pole-pole! Kuwerena eyo! Mwaha miyo gili mudhaari mukwawo ni aaddibilo enna mabasa oovaha onamoona wodhela Yesu. . . Omwebedhe Mulugu.’ (Ovuhu. 19:10) Mohanganyedha madhu aawogile mungero ole, yowoniha wi aali owiyeviha vanlubale! Mungero ole kaafuna wakela nthithimiho ni othetheliwa. Ohiya eyo, mowaguva oliye omwaddela Juwawu wi anafwanelela webedhiwa di Yehova baahi. Naarive mungero ole amulabelaga Yehova muwari mwa yaka dhowinjhiva ni aganna kopolo ompitha Juwawu, oliye kubuwela wi aali athima ompitha murumiwi Juwawu. Mbwenye nuwiyeviha oliye owoga ni Juwawu wi aali mudhaari mukwaye. Teto naarive mungero ole ahoowelaga omusumulula Juwawu, oliye kerilena eyo mwamakalelo abure ni agaali ootakaleliwene. Ohiya eyo, oliye aamusumulunle mwamakalelo apama ni oodhivela. Podi wera mungero ole ahonelamo wi Juwawu aamukokorenle mwaha ootikina yowoona ele ooniliye.

6. Nnande aavi otajhiha wiyeviha wa angero?

⁶ Nnande aavi otajhiha wiyeviha wa angero? Nihiyoya naakwanihedhaga mutholo dhehu kannafuna withukula obe osayela makalelo wi athu enithethele. (1 Kor. 4:7) Teto kanubuwelege wihina nili athima mwaha wi nnamulabela Yehova muwari mwa mudhidhi wowinjhiva wapitha athu amodha obe mwaha mutholo ninnihuna munikuruni mwa Yehova. Mbwenye sathima wubuwela wi naathabwaga wakela mutholo, nnohowela wiwoonaga ninga athu ang’ono. (Luk. 9:48) Ndala ninga angero, nnafuna naakaviherege athu amodha. Iyo kannafuna wathukulela athu amodha wubuwelaga wi nili athima wapitha aliwa.

7. Nnonihe aavi wi nili athu owiyeviha nafunaga omusumulula obe omulaga muthu?

⁷ Iyo podi woniha wiyeviha nafunaga omusumulula obe omulaga muthu di muthu, podi okala ddibila a mmulogoni obe anihu. Malabo mamodha, nnerege ohowela ovaha yolaga nimwaddelaga muthuya ebaribari. Mbwenye ndala ninga mungero ole anvahile Juwawu yolaga ni makalelo apama, nihiyoya podi omwaddela ebaribari muthuya nnamulagihu wula nahawogile madhu oopiha mbani. Teto akala iyo kannubuwela wi nili athima wapitha athu amodhaya, nnerege ovaha dholaga dhinakumela mBibiliyani ni dhinoniha wi nnowariha ni nnowadhivela athuya nnaalagihu. — Kol. 4:6.

ANGERO ENOWADHIVELA ATHU

8. a) Mowiwanana ni Lukaji 15:10, angero enoniha aavi wi enowadhivela ni enowapwatha athu? b) Ni makalelo baani angero enaakaviheriwa mabasa oolaleya? (Osugwe fotu yavakapani.)

⁸ Angero enowadhivela ni enowapwatha athu. Aliwa enohagalala vanlubale yamoona muthu erilena yothega enlubale agathwaruwile ni yaamoonaga muthu aahiyile omulabela Yehova agahogolowe mmulogoni. Teto aliwa enohagalala vanlubale yamoonaga muthu ahudheraga ebaribari ni aweragana masadduwo mwigumini mwaye wihina amulabele Yehova. (Omwileri Lukaji 15:10.) Ohiya eyo, angero enowakavihera mabasa oolaleya nuuviheya. (Ovuhu. 14:6) Naarive akala aliwa kinalaleya nyumba ni nyumba, aliwa enowaholela anamalelaya wihina edhowe vaade va muthu anafuna omunona Yehova. Ebaribari wi kannanda onona pamadhene nyumba angero eniholeliwa wi nilaleyevo. Mwaha wi Yehova podi olabihedha dhithu dhimodha ninga muzimu waye wotxena wihina anikavihere wafwanya athu enna efunelo. (Dho. 16:6, 7) Naarive dhigaali ndo, oliye anowalabihedha angero wihina enikavihere wapara mabasa oolaleya. Bumwahaya nalaleyaga muthenga dhapama, nikanne ebaribari wi angero enere okala nihiyo wihina enikavihere. — Osugwe kwaduru enna musolo “Malobelo ewa yahakuliwa.”c

9. Nnande aavi watajhiha angero wodhela wadhivela athu?

⁹ Nnande aavi watajhiha angero wodhela wadhivela athu? Niiwa wihina ddibila ohuhogoloseliwa mmulogoni, iyo podi ohagalala ndala ninga angero. Nnohowela werana ndhe nnandihu wihina nawonihe wi nnowadhivela. (Luk. 15:4-7; 2 Kor. 2:6-8) Iyo podi watajhiha angero wodhela oviheyana mabasa oolaleya. (Ecl. 11:6) Ndala ninga angero enanikaviheriwa naaparaga mabasa oolaleya, iyo nnohowela wakavihera addibila ni arogola nakala mmabasani oolaleya. Motajhiha, iyo podi opangana ni ddibila obe murogola ahalemelele mabasa oolaleya wi nikume vamodha mmalaleyelo, obe wakavihera addibila ni arogola owunnuwelavo obe eli aredda wihina yande wapara mabasa oolaleya.

10. Nnahudhera ddi ni yopadduwa ya Sara?

¹⁰ Ki akala mwaha wa makathamiho enanifwanya kannanda wapara mabasa oolaleya ninga nafunelihu? Naarive dhigaali ndo, iyo podi ofwanya makalelo oolaba vamodha nangero mmabasani oolaleya. Kasugwa yopadduwa ya murogola Sarad anakala elabo yo Indiya. Nuuvira yaka 20 alabaga ninga piyonera, Sara okala muredda ni kaanda ovenya vakamani. Mwaha wa yeyo, Sara ahukuuwa vanlubale. Mbwenye mwaha wa okaviheriwa ni addibila ni omwileri Bibiliya, Sara ohogolowela ohagalala ni okanna monelo wapama wodhela dhithu dhampadduwela. Ebaribari wi Sara ohoowela osaddula makalelo aye oolaleya, mwaha wa makathamiho yanfwanya. Woona wihina Sara kaanda okarati wihina aalebe makarta, ethu andiye werana, yaali olaleya alabihedhaga telefoni. Vano murogola Sara waligarela athu anniyena revisita, nuwindo athu ale onvaha manumero aathu amodha yanna efunelo yomuhudhera Bibiliya. Yokumelelavoya yaali eevi? Dhihinavire mweeri dhowinjhiva, murogola Sara, okanna anamahudhera a Bibiliya owakwana 70, teto kaanda wahudhiha aatene. Vano murogola Sara othoma wagawela anamahudhera aye a Bibiliya addibila a mmulogoni mwaaye. Teto anamahudhera owinjhiva a murogola Sara, ehambela woona mutugumano. Mohanganyedha, angero enohagalala vanlubale yawonaga addibila ni arogola yilibihedhaga wihina yapare mabasa oolaleya ndala ninga murogola Sara!

ANGERO ENOVILELA

11. Ni makalelo baani angero enoonihiwa ovilela?

¹¹ Angero yotajhiha yapama ya athu enonne ovilela. Aliwa enna ovilelana ohogowa ni dhithu dhabure dhinapadduwa mwilaboni yavati muwari mwa yakadhene. Aliwa ehimoona Saddana ni angero amodha emurugunuwelaga Yehova. (Gén. 3:1; 6:1, 2; Juda. 6) Bibiliya anomuwoga mungero oororomeleya aawanile ni demoniyu mmodha akopolo muwari mwa malabo owinjhiva. (Dan. 10:13) Teto muwari mwa yakadhene, angero enna wawoona athu ethomaga omurugunuwela Yehova. Naarive yonaga dhithu dhatedhene ndha, angero ala oororomeleya enoodidela omulabela Yehova nuuhagalala vamodha nuuviheya. Mwaha aliwa ehinona wi Yehova anere omariha obure waatene mudhidhi wofwanelela.

12. Nnande aavi otajhiha ovilela wa angero?

¹² Nnande aavi otajhiha ovilela wa angero? Ndala ninga angero, iyo nnowoona obure winereya mwilaboni ni nnowiddiwa. Mbwenye ndala ninga angero, nihiyoya nihikanna ebaribari wi Yehova anere omariha obure waatene mudhidhi wofwanelela. Bumwahaya nnafuna naatajhihe angero oororomeleya wodhela “ohuselela werana opama.” (Gal. 6:9) Teto Yehova anonipaganya onikavihera okala athu oovilela. (1 Kor. 10:13) Ohiya eyo, iyo podi olobela wa Yehova nimulobaga muzimu waye wotxena. Nerena eyo, nnere wanda ovilela ni okala athu oohagalala. (Gal. 5:22; Kol. 1:11) Ki akala onowanana widdiwa? Omuroromelege Yehova ni murimawo waatene ni kuwovege. Mwaha Yehova kanahiye wukavihera ni wulibiha. — Ebe. 13:6.

ANGERO ENOKAVIHERA MULOGO OKALA WOWEELA

13. Mutholo baani wa vayekiwa Yehova aavahiliye angero malabo yaala ookuthula? (Matewuji 13:47-49)

¹³ Yehova ohavaha mutholo wa vayeka angero wihina yakwanihedhe malabo yaala ookuthula. (Omwileri Matewuji 13:47-49.) Mabasa oolaleya enowadahinya murima matxikwi ni matxikwi aathu wapela elabo yaatene yavati. Amodha wa athu yala, enowawerana masadduwo mwigumini mwewa wihina ekale makiristawu eebaribari, mbwenye amodhaya kinawerana masadduwo ala. Bumwahaya angero ehithomiwa wi “yasakulele athu abure ni athu owogowa.” Ni madhu mamodha, eyo enatapulela wi aliwa ehithomiwa wihina ebarele mulogo wi okale woweela. Mbwenye eyo kinatapulela wi muthu akumihiwa mmulogoni kanadha ahogolowela mmulogoni. Naarive dhigaali ndo, nnohowela okanna ebaribari wi angero enolaba vanlubale wihina mulogo okale woweela.

14-15. Nnande aavi watajhiha angero wodhela othuwathuwela mulogo wi okale woweela? (Osugwe fotu.)

¹⁴ Nnande aavi watajhiha angero wodhela othuwathuwela mulogo wi okale woweela? Nnere wanda watajhiha wodhela werana epaddi yehu wi mulogo okale woweela, epaddi yomwilini ni yomuzimuni. Bumwahaya nnowilibihedha wi nibarele murima wehu. Makalelo apama oobarela murima wehu, fuudhela wasakula akwihu enamudhivela Yehova ni orabela ethu-sithu yabure yanilapelihe ni Yehova. (Sal. 101:3) Teto iyo podi wakavihera addibilihu odidela okala oororomeleya wa Yehova. Motajhiha, nnere ddi noona wi ddibila obe murogola oherana yothega enlubale? Mwaha wa odhivela ninnihuna ni ddibilihu, nnere omukongomedha wihina awaddele anamaholela mulogo ethu eriliyena. Vano oliye akoodda wawaddela anamaholela mulogo, iyo nnohowela wawaddela. Mwaha iyo nnafuna wi muthu di muthu anahowela nikavihero epaddi yomuzimuni, akaviheriwe mowaguva! — Tiya. 5:14, 15.

¹⁵ Mowukuliha, athu amodha enowerana dhothega dhinlubale ofiyedha okumihiwa mmulogoni. Eyo yapadduwa, iyo nnohowela “ohiya weedda” ni athu yala.e (1 Kor. 5:9-13) Mwaha eyo enokavihera mulogo okala woweela, teto nahiya owoga ni muthu akumihiwe mmulogoni, nnomukavihera oliye. Ni makalelo baani? Mwaha eyo enomukavihera muthuya omuhogolowela Yehova. Teto oliye erana eyo, Yehova, angero vamodha nihiyoya, nnere ohagalala vanlubale. — Luk. 15:7.

16. Ni makalelo baani onafuniwe watajhiha angero?

¹⁶ Oneti winlubale onona dhithu vang’ono wodhela angero ni olaba vamodha naliwa! Iyo nnofuna vanlubale otajhiha dhikalelo aliwa enniwana, ninga wiyeviha, wadhivela athu, ovilela ni othuwathuwela wi mulogo okale woweela. Iyo natajhiha angero oororomeleya, nnere okanna oneti wokala epaddi ya emudhi ya Yehova ni omulabela oliye nimukalakala.