OHUDHERA 20
JHIBO 7 Yehova sikopolo dhehu
Kuwanganyedhege wi Yehova anere wutodola
“Oothithimihiwa di . . . Baabi a thagaraga ni Mulugu ootodola waatewene.” — 2 KOR. 1:3.
DHITHU NNAAHUDHERIHU
Nnere woona makalelo Yehova aatodonliye maJudewu yakala oBabiloniya ni dhithu nnahudherihu.
1. Egumi ya maJudewu yaali aavi mudhidhi egaali oBabiloniya?
MUWARI mwa yaka dhowinjhiva maJudewu kiyamwiwelela Yehova. Mwaha wa yeyo, Yehova wenya wihina aliwa ethukuleliwe o Babiloniya ninga adhaari. Vano kabiha wubuwela makalelo yaliwa nuwoona luwani yewa egujhuliwaga. Ki egumi yewa yaali aavi oBabiloniya? (2 Cró. 36:15, 16, 20, 21) Ebaribari wi maJudewu yahikanna mwana ofuru wowerana dhithu yafuniwa mudhidhi egaali oBabiloniya. (Jer. 29:4-7) Naarive dhigaali ndo, kayaali yokweya okala oBabiloniya. Teto yahavahiwe ofuru wosakula, aliwa newene kayasakule okala oBabiloniya. Aliwa yaali yakala aavi, yonaga dhithu dhatedhene dhaapadduwela oBabiloniya? Kasugwa ethu awogile muJudewu mmodha, oliye owoga eegi: ‘Nigaali sere-sere dha mwihinjhe dhoBabiloniya, iyo okarati ni obajha wunla nimubuwelaga Siyawu.’ (Sal. 137:1) Majudewu ale yaali owukuwene ni yohowela otodoliwa. Ki baani aatodole?
2-3. a) Ddiniyani Yehova anvetheliye Izayiya oleba wihina aakavihere maJudewu yaali oBabiloniya? b) Ohudhera wula nnoone ddi?
2 Yehova, “Mulugu ootodola waateweene.” (2 Kor. 1:3) Yehova anowadhivela vanlubale adhaari aye, bumwahaya oliye onofuna vanlubale watodola ale enafuna omwaddamela. Yehova ahinona wi maJudewu amodha yakale oBabiloniya, yere orumedha osumululiwa ni othoma omulabela mwamakalelo apama. (Isa. 59:20) Bumwahaya yaka 100 mundduli, maJudewu ehinathi othukuleliwa oBabiloniya ninga adhaari, Yehova ahinvethela namavuhulela Izayiya wihina awaddele muthenga wotodola. Muthengaya onafwanyeya livuru na Izayiya. Mwahaya bwaddi Yehova adhe anvethelege Izayiya oleba muthenga ola wotodola? Izayiya anowoga mwahaya eegi: ‘“Mulibihe, mulibihe nlogo naaga,” anawoga di Yehova.’ (Isa. 40:1) Yehova ahilabihedha yovuhulela ya Izayiya wihina aatodole maJudewu yahowela olibihiwa.
3 Ndala ninga maJudewu ale yathukuleliwe oBabiloniya, malabo mamodha nihiyoya nnohowela otodoliwa. Ohudhera wula nnere, woona makalelo mararu Yehova aatodoliye maJudewu: (1) Oliye ahipaganya walevelela ale yathwaruwile ni murima wewa waatene, (2) oliye aahavaha ejhehedhelo ni (3) oliye ahakavihera ogonjhiha woova. Mudhidhi nahudheraga dhithu ndha tharu, opwasedhe woona makalelo madhu ala a Izayiya enaanikaviheriwa.
YEHOVA DATHAGARAGA NI ANONILEVELELA
4. Yehova onihile aavi wi Baabi athagaraga? (Isaías 55:7)
4 Yehova “Baabi a thagaraga.” (2 Kor. 1:3) Oliye ahoniha wi dathagaraga, nuupaganya wi eere walevelela maJudewu yathwaruwe ni murima wewa waatene. (Mmwileri Isaías 55:7.)a Yehova ahiwoga eegi: ‘Mwaha wa odhivela wohimala, ginere wuweddelani thagaraga.’ (Isa. 54:8) Yehova onihile aavi wi dathagaraga? Naarive maJudewu yonaga goyi mwaha wa dhothoma dhewa dhabure, Yehova ahapaganya wihina eere wawobola mudhaarini oBabiloniya. Nuuvira mudhidhi maJudewu ale, yeere ohogolowela elabo yewa. (Isa. 40:2) Mohanganyedha madhu ala a Izayiya, yahatodola vanlubale maJudewu yaali mudhaarini, mbwenye yatharuwile ni murima wewa waatene!
5. Dhithu baani dhinanithukulela omutamalela Yehova mwaha onilevelela?
5 Nnahudhera ddi? Yehova onofuna vanlubale walevela adhaari aye ni murima waye wamutene. Peeno iyo nihikanna dhithu dhowinjhiva dhinanithukulela omutamalela Yehova mwaha onilevelela. Dhithu baani? Iyo nnowonelamo pamadhene ethu Yehova eriliyena wihina anilevelele dhothega dhehu. Teto nuuvira yaka dhowinjhiva Izayiya agamanle oleba yovuhulela yaye, Yehova omuruma mwanaye anamudhiveliye vanlubale wihina avelele egumaye ninga mukutho wi awobole aatene yathwaruwe ni murima wewa waatene. Mukutho ola wowobola sithu Yehova analabihedhiye wihina dhothega dhehu “dhileveleliwe.” (Dho. 3:19; Isa. 1:18; Efe. 1:7) Mohanganyedha sapama vanlubale omulabela Mulugu athagaraga!
6. Wubuwela wodhela makalelo Yehova ananileveleliye winanitodola aavi? (Osugwe fotu.)
6 Akala malabo mamodha onokala owukuwene mwaha yothega weriliwena kale, madhu enafwanyeya va Isaías 55:7 podi wutodola. Amodha wa iyo nnowivaha nibili mwaha wa yothega nerilihuna kale, naarive nigathwaruwile. Thabwa-thabwa akala ninna ofwanyiwa makathamiho mwaha yothega nerilihuna kale. Mbwenye akala we ohawaddela anamaholela mulogo yothega yawo ni ohuhiya werana dhithu dhabure, okanne ebaribari wi Yehova ohulevelela. Teto Yehova amulevelela muthu, oliye anothoma ohubuwela dhothegadha. (Omuliganihe ni Jeremias 31:34.) Vano akala Yehova kanubuwela dhothega dhehu nerilihuna kale, eyo enatapulela wi nihiyoya kannahowela odidela wubuwela. (Eze. 33:14-16) Teto mohulegela Baabihu a thagaraga anere omariha goyi yaatene enanifwanya mwaha wa dhothega nerilihuna.
Yehova kanasugwa dhithu dhabure nerilihuna kale, mbwenye anapwasedha osugwa dhithu dhapama nnerihuna ovanene (Osugwe ddima 6)
7. Ddiniyani enaanikavihere osayela nikavihero na anamaholela mulogo nerana yothega enlubale?
7 Ddiniyani nnahowelihu werana nakala owukuwene ni naathabwaga wivaha nibili mwaha okoya yothega nerilihuna? Bibiliya anihina nnohowela osayela nikavihero na anamaholela mulogo. (Tiya. 5:14, 15) Ebaribari wi iyo podi woovaga wawaddela anamaholela mulogo yothega nerilihuna. Mbwenye ethu enaanikavihere, fuhudduwala wi Yehova anowalabihedha alobwana ala wihina enikavihere. Teto aliwa enere oneeddiha nuudhivela vamodha ni thagaraga ndala ninga Yehova ananeddihiye. Nubuwela dhithu ndha ni nathwaruwa ni murima wehu waatene, enere okala yokweya owoga ni anamaholela mulogo. Kasugwa yopadduwa ya ddibila dhaala anithaniwa Artur,b oliye owivaha nibili mwaha werana yothega, mbwenye nuwubuwela wodhela thagaraga dha Yehova ahitodoleya. Oliye anowoga eegi: “Podi wera miyo gahimala yaka modha gimoonaga pornografiya , mbwenye nuvuruwana mwaha wa vathaddo wawoga wodhela mubuwelo, miyo omwaddela mwaadhaga vamodha ni anamaholela mulogo dhithu gerilimina. Numala wawaddela anamaholela mulogo ni mwaadhaga, mubuwelo waga ohiya oginyemela. Naarive dhigaali ndo, mubuwelo waaga woginyemela malabo mamodha, mbwenye anamaholela mulogo ogubusedha wi Yehova ohugilevelela ni kaagisukume, ohiya eyo, Yehova aagisumulunle mwaha oogidhivela. Madhu ale aanamaholela mulogo yahidanya murima waaga ni yahigikavihera wonelamo wi Yehova ohugilevelela.” Peeno ddibila ola analaba ninga mudhaari ookavihera, teto piyonero. Solibiha vanlubale onona wi Yehova anofuna olevelela dhothega dhehu nathwaruwa ni murima wehu waatene!
YEHOVA ANONIVAHA EJHEHEDHELO
8. a) Yehova aavahile ejhehedhelo baani nlogo naye? b) Mowiwanana ni Isaías 40:29-31, ejhehedhelo yalibihile aavi maJudewu?
8 Moonelo wa athu, yakala ninga maJudewu yaali oBabiloniya kayanna makalelo ohogolowela elabo yewa. Mwaha aBabiloniyu kayahiya adhaari ewa ohogolowela elabo yewa. (Isa. 14:17) Mbwenye Yehova ahavaha ejhehedhelo nlogo naye, teto kaavo ethu yamuhihe wakwanihedha ele aapaganyiliye. (Isa. 44:26; 55:12) Vamentoni va Yehova elabo yoBabiloniya yaali ninga nthubi. (Isa. 40:15) Muthu ahavudhele vang’ono yere orimela. Ejhehedhelo ela yaalibihile aavi maJudewu? Aliwa yahitodoleya teto ohiya watodolave, ejhehedhelo ela yahakavihera mwamakalelo mamodha. Izayiya ahileba eegi: ‘Ale enamujheha Yehova enere okanna kopolo.’ (Mmwileri Isaías 40:29-31.)c Mwebaribarene ejhehedhelo yahakavihera maJudewu okanna kopolo, teto yakala ninga aliwa yere ‘ovava ninga balame.’
9. Dhithu baani dhaathukulela maJudewu ororomela mpaganyo dha Yehova?
9 Yehova aherana dhithu dhaathukulela maJudewu ororomela mpaganyo dhaye. Ni makalelo baani? Kabiha wubuwela dhovuhulela maJudewu yoniliwa dhakwanelaga. Aliwa yahawoona anyakoddo owAsiriya egujhulaga omwene wa mahimo kumi wamwaana Ezarayeli ni ethukuliwaga ninga adhaari. (Isa. 8:4) Teto aliwa yahawoona anyakoddo oBabiloniya egujhulaga luwani yoJeruzale ni yathukulaga athuya ninga adhaari. (Isa. 39:5-7) Ohiya eyo, aliwa yahimoona mwene oBabiloniya amutorolaga mento mwene Zedekiya ni amuthukulaga ninga mudhaari. (Jer. 39:7; Eze. 12:12, 13) Dhatedhene ndha, dhahipadduwa ndala ninga Yehova aawogiliye. (Isa. 42:9; 46:10) Mohanganyedha maJudewu yubuwelaga dhithu dhatedhene dhaapadduwile, nroromelo newa nooliba teto yororomela wi mpaganyo dhatedhene dha Yehova dhinere wakwanela!
10. Nnande aavi olibiha ejhehedhelo yehu?
10 Nnahudhera ddi? Nakala ookwerebeyene, ejhehedhelo ninnihuna enonitodola ni enonikavihera ohogolowela okanna kopolo. Iyo nnakalawo malabo oorusa, teto nnoharahariwa ni amwiddani akopolo onipitha iyo. Mbwenye kaniyelele ejhehedhelo, mwaha Yehova anonivaha ejhehedhelo yoriya vanlubale, eli wakela egumi yohimala ni okanna murenddele nuubareleya. Nnohowela olibiha ejhehedhelo ela mmurimani ni mmubuweloni mwehu. Mwaha naherena ndo, ejhehedhelo yehu podi oligana ni muthu anasugwa mburo woriya agaali vajanelani nootakala ni nthubi. Nnande aavi “ofufutha janela” obe nere, olibiha ejhehedhelo yehu? Nnere wanda olibiha ejhehedhelo yehu wodhela opatha mudhidhi wihina nubuwele makalelo enakale egumi yehu mparayizu. Teto iyo podi wileri muselu dhinawoga wodhela parayizu, woona vidiyu ni ovuruwana jhibo dhinawoga wodhela ejhehedhelo yehu. Ohiya eyo, iyo podi olobela wa Yehova nimwaddelaga wodhela mpaganyo nnafunihu woona dhakwanelaga.
11. Ddiniyani enamukavihera murogola Jhoyi okala ooliba murima, naarive afwanyiwaga makathamiho oorusa?
11 Kasugwa makalelo ejhehedhelo enamukaviheriiwa murogola dhaala anithaniwa Jhoyi anna oredda worusa vanlubale. Oliye anowoga egi: “Gakala owukuwene mwaha wa makathamiho enagifwanya, ginoolobela wa Yehova gimwaddelaga dhithu dhatedhene dhinagipadduwela ni makalelo gilimi. Miyo gihinona wi Yehova anowonelamo makalelo gilimi. Mudhidhi galobelaga ginowoona wi Yehova anoogivaha ‘kopolo dhohikala dha masika.’”(2 Kor. 4:7) Teto murogola Jhoyi, anowubuwela makalelo enakale egumi yaye mwilaboni exa, mwaha mudhidhi yoyo ‘kavo onadha era: “Miyo gili muredda.”’ (Isa. 33:24) Nihiyoya podi ohogolowela okanna kopolo, nalobela wa Yehova nimwaddelaga makalelo nilihu ni nubuwelaga ejhehedhelo ninnihuna.
12. Dhithu baani Yehova aneriyena dhinanithukulela ororomela mpaganyo dhaye? (Osugwe fotu.)
12 Ndala ninga Yehova eriliyena dhithu dhaathukulela maJudewu ororomela mpaganyo dhaye, peeno Yehova anowerana dhithu dhinanithukulela orumedha mpaganyo dhaye. Kabiha wubuwela dhovuhulela dhinaakwanela malabo yaala. Motajhiha, nnowoona Potensiya Mundiyale Angulu-Amerikana eli potensiya ‘yovaadda mudhidhi mmodhave yohivaadda,’ ethongaga. (Dan. 2:42, 43) Teto nnowiwa dhopadduwa dhinawoga wodhela “oddiginyeya weelabo mburo dhohiyana-hiyana,” teto nnowapara mabasa oolaleya wapela elabo yaatene, nalaleyaga “athu aatene.” (Mat. 24:7, 14) Dhovuhulela ndha ni dhimodha, dhinolibiha nrororomelo nehu wihina mpaganyo dhatedhene dha Yehova dhinere wakwanela.
Dhovuhulela dhinaakwanela malabo yala dhinonithukulela ororomela mpaganyo dha Yehova (Osugwe ddima 12)
YEHOVA ANONIKURUMUSA NAMBELA WOOVA
13. a) Makathamiho baani yaafwannye maJudewu mudhidhi ehinathi woboliwa oBabiloniya? b) Mowiwanana ni Isaías 41:10-13, Yehova aatodonle aavi maJudewu?
13 Naarive Yehova agaatodonle maJudewu wodhela wavaha ejhehedhelo yoriya, oliye ahinona wi yere ofwanyiwa makathamiho mudhidhi ehinathi woboliwa oBabiloniya. Yehova ahiwoga wi waddamela mudhidhi maJudewu yafuniwa woboliwa oBabiloniya, mwene mmodhaya akopolo eere waathusa ni wagujhula malogo yaali waddamela oBabiloniya. (Isa. 41:2-5) Nerege maJudewu yohowela othuwathuwa? Woona wihina Yehova ahinona wi nlogo naye nerege woova, oliye onvethela namavuhulela Izayiya wihina aalebe madhu ala ootodola eegi: ‘Kuwoove, miyo gili ni we. Kuthuwathuwe, miyo gili Mulugu awo.’ (Mmwileri Isaías 41:10-13.)d Yehova afuna awoge ddi nuwoga wi ‘Miyo gili Mulugu awo?’ Kahi wihina Yehova awubusedha aliwa wi yohowela omwebedha, mwaha mudhidhi yoole maJudewu yahinona wi yohowela omwebedha. Mbwenye Yehova awubusedha wihina oliye aali naliwa.—Sal. 118:6.
14. Ddiniyani Yehova eriliyena wihina aakurumuse maJudewu yoova?
14 Yehova ahakurumusa maJudewu yoova wodhela wawubusedha kopolo ni thotho anniyena dhohikala dhamasika. Oliye ahaloba maJudewu wi esugwe odhulu wihina yoone thendderi. Ni wawaddela wihina ohiya opaddusave thendderi, oliye ohunona ndina na kadda thendderi. (Isa. 40:25-28) Akala Yehova ohunona ndina na kadda thendderi, mohanganyedha Yehova ahinoona ndina na kadda mudhaari aye! Teto akala Yehova ohukanna kopolo yopaddusa thendderi oliye ahikanna kopolo wihina aakavihere adhaari aye. Mohanganyedha, kayaliwo ethu yaathukulele maJudewu okala oothuwathuwene obe woovaga.
15. Ddiniyani Yehova eriliyena wihina axagihe nlogo naaye wi nande wagonjhiha makathamiho yaadhe osogolo?
15 Yehova ahixagiha nlogo naye wihina yande wagonjhiha makathamiho yaadhe osogolo. Mudhidhi Yehova ahinathi owoga ni nlogo naye wihina yahovege, oliye ahawaddela eegi: ‘Mudhowe mwavolowe mba mweenyu ni nfuge musiwodha. Mwipite mudhidhi vang’ono, ofiyedha ovira owali waatene.’ (Isa. 26:20) Podi wera wakwanela wobajha wa madhu ala, opadduwile mudhidhi mwene Siru numugonjhiha Babiloniya. Namaleba thalako dhaala akale aali muGregu, ohuwoga wi mudhidhi mwene Siru nuuvolowa luwani yoBabiloniya oliye “aharuma anyakoddo aye wihina yaape athu aatene yafuniwa wafwanya ode wa nyumba.” Kubuwela makalelo athu yakala oBabiloniya yaaliwa oothuwathuwene! Podi wera maJudewu yiwelenle dhoholela dha Yehova yahivuluwa.
16. Mwahaya bwaddi kannahowela woova dhithu dhinapadduwe osogolo? (Osugwe fotu.)
16 Nnahudhera ddi? Mohulegela nnere ofwanyiwa mahoso manlubale yahinapadduwege velaboni yavati. Mahoso manlubale yabajha, athu amwilaboni enere othuwathuwa ni enerege woova. Mbwenye nlogo na Yehova kannathuwathuwege newene kanoovege ethu. Mwaha nihinona wi Yehova di Mulugu ehu. Iyo kanoovege ethu mwaha nihinona wi “woboliwa wehu wihaddamela.” (Luk. 21:28) Naarive wiwanana wa malogo, Bibiliya anithaniye Gogi a Magoge anirijha, iyo nnakale owiimelene txithi nimuroromelaga Yehova. Yehova anere walabihedha angero aye wihina anibarele, teto anere onivaha dhoholela wihina nivuluwe. Ki nnakelege ni makalelo baani dhoholela ndho? Nnerege woona mudhidhi yoyo wafiya, makalelo nnakelegihu dhoholela ndho. Mbwenye, podi wera nnakelege dhoholeladha mmulogoni. Ni makalelo yaala mulogo dhinaakale ninga ‘mba mwehu.’ Nniwegeredhe aavi mwaha wa dhithu dhatedhene dhinafuna opadduwa osogolo? Nnohowela olibiha wandana ninnihuna naaddibila, wiwelela dhoholela dhinadhela munikuruni mwa Yehova ni ororomela ni murima wehu waatene wihina Yehova dinaholela nikuru naye.—Ebe. 10:24, 25; 13:17.
Wubuwela wodhela kopolo dha Yehova ni ewedhelo anniyena yonivulusa enere onikavihera ohuthabwa othuwathuwa mudhidhi wa mahoso manlubale (Osugwe ddima 16)e
17. Onere ddi wihina Yehova utodole?
17 Naarive mudhidhi maJudewu egaali oBabiloniya dhithudha dhirusaga mwigumini mwewa, Yehova ahatodola vanlubale. Teto oliye anere werana emodhave ni iyo. Bumwahaya naarive nifwanyiwaga makathamiho bi makathamiho oorusa osogolo, nididele omusayela Yehova wihina anitodole. Teto akala malabo mamodha onokala owukuwene mwaha yothega weriliwena kale, okanne ebaribari wihina Yehova anere wuweddiha ni thagaraga. Ohiya eyo, olibihe ejhehedhelo yawo. Teto kudduwale wi Yehova di Mulugu awo bumwahaya kunahowela woova ethu.
JHIBO 3 Murenddele, kopolo dhinadha wa nyu Yehova
a Isaías 55:7 Athu abure ehiye weedda dila yewa, Athu a murima wabure, mubuwelo wewa; Emuhogolowele Yehova, anere waweddela thagaraga, Wa Mulugu ehu, mwaha anolevelela ni murima wamutene.
b Mandina mamodha ehisadduliwa.
c Isaías 40:29 Oliye anonvaha kopolo ole agomile; ni ononvaha kopolo ole ahinna kopolo. 30 Ebaribari wi anapongwe enoogoma ni enokukumuwa, teto azombwe enokwakwathuwa ni enomotha, 31 Mbwenye ale enamujheha Yehova enere okanna kopolo. Enerege ovava ninga balame. Enerege othamaga mbwenye kinayelelege kopolo. Enerege weedda mbwenye kinagomege.
d Isaías 41:10 Kuwoove, miyo giri ni we. Kuthuwathuwe, miyo giri Mulugu awo. Ginere wulibiha, hee, ginere wukavihera. Ginere wuhiddela pamadhene ni moono waaga woojha ni wowogowa. 11 Kasugwa! Aatene enunyanyuwelani enere ototiwa manyazo ni onyoziwa. Teto ale enawana ni we enere otolosiwa ni enere ohiya okalawo. 12 Onerege wasayela ale enawana ni we, mbwenye kunadha wafwanya. Ale enawana koddo ni we enakalege ninga ethu yohikalawo, ninga ethu yohikanna mabasa. 13 Miyo Yehova, Mulugu awo, ginohiddela moono wawo woojha; Gili ole anuwaddela egi: ‘Kuwoove. Ginere wukavihera.’
e OTAPULELIWA WA FOTU: Nikuru ning’ono naaddibila egatugumane. Aliwa ehikanna ebaribari wi Yehova ohukanna kopolo ni ewedhelo yobarela nlogo naye, naarive aliwa ekalaga mburo bu mburo velaboni yavati.