Kibayã pipi sebre

19 Kaoosg zugẽ, Amon nebã rĩm a Nahaas kiime t’a biig a Hanun ledg-a n lebg rĩma.+ 2 A Davɩɩd sẽn wʋm dẽ wã, a yeelame: “Mam na n maana a Nahaas biig a Hanun neere,+ a ba wã sẽn da maan maam neerã yĩnga.” Woto, a Davɩɩd tʋma neb tɩ b kẽng n na n tɩ pʋʋs a Hanun, a ba wã sẽn maan kaalmã yĩnga. La a Davɩɩd nebã sẽn ta Amon nebã+ soolmẽ wã, 3 Amon nebã nanambsã yeela b zu-soab a Hanun yaa: “Yãmb tẽedame t’a Davɩɩd sẽn tʋm nebã tɩ b wa pʋʋs kʋʋrã yaa sẽn na n waoog y ba wã la? Rẽ yĩnga, pa sẽn na n soos n gilg n ges tẽngã n wa tõog n sãam-a yĩng la a sẽn tʋm-bã sɩda?” 4 Dẽ, a Hanun kɩtame tɩ b yõg a Davɩɩd nebã n põng b toeemsã,+ la b wõrs b futã n ta b seesã, n bas-b tɩ b looge. 5 B sẽn tɩ togs a Davɩɩdã, zĩig pʋgẽ, a tʋma neb tɩ b tɩ seg-ba, bala b paoog-b-la wʋsgo. Rĩmã yeel-b lame yaa: “Pa-y Zeriko+ hal tɩ y toeemsã lebs n yi tɩ y yaool n wa.”

6 Amon nebã wa n mikame tɩ b lebga wa bõn-põosg a Davɩɩd nifẽ. Woto, a Hanun ne Amon nebã tʋma neb ne wanzuri talã* tusri, tɩ b na n tɩ ra saar-dãmb* ne wed-rʋʋdb Mezopotami,* Aram-maaka la Zoba.+ 7 Woto, bãmb daa saar-dãmb tus-pis-tã la a yiibu, la b ra Maaka rĩmã ne a nebã. Dẽ, bãmb waame n tilg b sik Medeba+ noore. Amon nebã yii b tẽnsẽ wã n tigim taab n na n wa zabe.

8 A Davɩɩd sẽn wʋm dẽ, a tʋma a Zowaab+ ne tãb-biisã fãa, hal baa a gãnda-sãeemsã.+ 9 Amon nebã yiime n tong taab tẽngã noor ned fãa ne a zĩig n na n tɩ zabe, tɩ rĩm-dãmb nins sẽn yi wã tɩ yals weoogẽ wã.

10 A Zowaab sẽn yã tɩ b watame n na n zab ne yẽ poorẽ la taoorã, a yãka Israyɛll tãb-biis nins sẽn mi zabr sõma n yɩɩdã kẽere, tɩ b tong taab ned fãa ne a zĩig n na n seg Siiri nebã.+ 11 A kɩtame t’a ba-biig a Abisayi+ lʋɩ tãb-biis nins sẽn ketã taoore, n tong-b ned fãa ne a zĩig tɩ b seg Amon nebã. 12 Rẽ poore, a yeela a Abisayi yaa: “Siiri nebã+ sã n wa rat n tõog maam, fo tog n wa sõnga maam. La Amon nebã sã n dat n tõog foo, mam na n wa sõnga foo. 13 D segd n kenga d sũur la d tall raood+ tõnd nin-buiidã la d Wẽnnaamã tẽns yĩnga, t’a Zeova na n maana sẽn yaa neer a nifẽ.”

14 La a Zowaab ne a nebã kolgame n na n zab ne Siiri nebã, la bãmb zoee a Zowaab taoore.+ 15 Amon nebã sẽn yã tɩ Siiri nebã zoeeme wã, bãmb me zoee a Zowaab ba-biig a Abisayi taoor n kẽ tẽngã pʋgẽ. Rẽ poore, a Zowaab lebg n leba Zerizalɛm.

16 Siiri nebã sẽn yã tɩ Israyɛll nebã tõog-b lame wã, bãmb tʋma neb tɩ b kẽng n tɩ tigim Siiri neb nins sẽn be Kʋɩlgã*+ soolmẽ wã, t’a Sofak sẽn yaa a Hadadezɛɛr tãb-biisã naabã lʋɩ bãmb taoore.+

17 B sẽn tɩ togs a Davɩɩdã, zĩig pʋgẽ, a tigma Israyɛll tãb-biisã fãa tɩ b rʋʋg Zʋrdẽ kʋɩlgã n kẽng b nengẽ. Bãmb da tonga taab ned fãa ne a zĩig n na n tɩ zab ne-ba. A Davɩɩd kɩtame t’a tãb-biisã tong taab ned fãa ne a zĩig n seg Siiri nebã, la bãmb zaba ne-a.+ 18 La Siiri nebã zoee Israyɛll nebã taoore. A Davɩɩd kʋʋ Siiri neb tus a yopoe sẽn da zao saar-dãmba, la b sodaas tus-pis-naas sẽn kẽnd nao. Yẽ kʋʋ bãmb sodaasã naab a Sofak. 19 A Hadadezɛɛr sẽn so rĩm-dãmb ninsã sẽn yã tɩ Israyɛll nebã tõog-b lame wã,+ bãmb yɩɩ tao-tao n bao laafɩ ne a Davɩɩde, t’a Davɩɩd na n soog-ba.+ La Siiri nebã ra pa le rat n sõng Amon nebã ye.