Bʋ-kaoodbã sebre

12 Efrayim rapã tigma taab n dʋʋg kʋɩlgã n kẽng Zafon* n tɩ yeel a Zɛfte yaa: “Fo sẽn wa n na n tɩ zab ne Amon nebã,+ bõe yĩng tɩ fo pa bool tõnd tɩ d tũ foom? Tõnd na n naaga foom ne f roogã n yõog bugum.” 2 La a Zɛfte leoka bãmb yaa: “Maam ne m nebã talla zab-kãseng ne Amon nebã, tɩ mam bool yãmb tɩ y wa sõng-do, la yãmb pa fãag maam bãmb nugẽ ye. 3 Mam sẽn yã tɩ yãmb pa na n fãag maamã, mam yãka yam n na n gẽneg m yõor n tɩ zab ne Amon nebã,+ la a Zeova ninga bãmb mam nugẽ. Bõe yĩng masã tɩ yãmb wat rũndã n na n zab ne maam?”

4 Dẽ, a Zɛfte tigma Galaad rapã fãa+ tɩ b zab ne Efrayim nebã. Galaad nebã tõoga Efrayim nebã sẽn da yeele: “Yãmb a Galaad nebã sẽn be Efrayim ne Manase soolmẽ wã, yãmb yaa Efrayim neb sẽn zoe n bas b tẽng bala.” 5 Galaad nebã renga Efrayim nebã n tɩ gɩdg Zʋrdẽ kʋɩlgã+ zĩig ning b sẽn tõe n kẽn n dʋʋgã. Efrayim ned sã n da rat n dʋʋg kʋɩlgã n põse, a yetame: “Bas-y tɩ m dʋʋge.” La Galaad nebã sokd-a lame: “Fo yaa Efrayim ned bɩ?” A sã n leok tɩ “ayo,” 6 b yet-a lame: “D bõos tɩ f yeel tɩ Sɩbolɛte.” La a yetame tɩ “Sihibolɛte,” bala a pa tõe n pʋd gom-bilã sõma ye. Dẽ, Galaad nebã yõkd-a lame n kʋ Zʋrdẽ kʋɩlgã zĩig ning b sẽn tõe n kẽn n dʋʋgã sɛɛgẽ. Woto, Efrayim neb tus-pis-naas la a yiib n ki wakat kãnga.

7 A Zɛfte kaoo Israyɛll bʋʋd yʋʋm a yoobe. Rẽ poore, Galaad rao a Zɛfte kiime tɩ b mum-a a tẽngẽ, Galaad soolmẽ wã.

8 A Zɛfte loogr poore, Betlehɛm rao a Ibzan n yɩ Israyɛll bʋ-kaooda.+ 9 A ra tara kom-dibli pis-tã la kom-pugli pis-tã. A kɩtame t’a kom-pugli wã kẽ kãadem ne neb sẽn pa bãmb buudã neba, la a peeg pagb pis-tã n kõ a kom-dibli wã tɩ b maan b pagba. A bʋʋ Israyɛll nebã yʋʋm a yopoe. 10 La a Ibzan wa n kiime tɩ b mum-a Betlehɛmme.

11 A Ibzan loogr poore, Zabulõ rao a Elon n yɩ Israyɛll bʋ-kaooda. A bʋʋ Israyɛll nebã yʋʋm piiga. 12 La Zabulõ rao a Elon wa n kiime, tɩ b mum-a Ayalon sẽn be Zabulõ soolmẽ wã.

13 A Elon loogr poore, Piraton rao a Abdon sẽn yaa a Hilɛll biigã n yɩ Israyɛll bʋ-kaooda. 14 A ra tara kom-dibli pis-naas la yagens pis-tã sẽn da zombd bõens pis-yopoe. A bʋʋ Israyɛll yʋʋm a nii. 15 La Piraton rao a Abdon sẽn yaa a Hilɛll biigã wa n kiime, tɩ b mum-a Piraton sẽn be Efrayim soolmẽ wã, Amalɛk raoã tãngẽ.+