Bʋ-kaoodbã sebre
21 Israyɛll nebã ra wẽena Mizpa+ n yeele: “Tõnd ned baa a ye pa na n dɩk a bi-pugl n kõ Bẽnzame buudã ned t’a maan a pag ye.”+ 2 Woto, nin-buiidã waa Betɛll+ n zĩnd Wẽnnaam taoor hal n tãag zaabre, n da wiisdẽ la b yãbd wʋsgo. 3 Bãmb da yetame: “Israyɛll Wẽnnaam a Zeova! Bõe yĩng tɩ yell a woto maan Israyɛlle? Bõe yĩng tɩ Israyɛll buud a ye menem dũndã?” 4 Vẽkembeoogã yibeoog pĩnda, nin-buiidã yikame n me tẽn-kugri, la b maan maand sẽn yõogd bugum la zems-n-taar maando.+
5 Dẽ, Israyɛll nebã sokame yaa: “Israyɛll buud toɛy-toɛyã sʋka, yaa bʋg n pa wa tigim ne tõnd a Zeova taoore?” Bala bãmb da wẽename tɩ ned ning fãa sẽn pa wa a Zeova taoor Mizpa, b na n kʋ-a lame. 6 Israyɛll nebã sũur sãama wʋsgo, bũmb ning sẽn paam Bẽnzame buudã nebã sẽn yaa b ba-biisã yĩnga. B yeelame: “Rũndã, Israyɛll buud a ye n meneme. 7 Tõnd na n maana wãn n paam pagb n kõ rap nins sẽn kellã? Bala tõnd wẽena ne a Zeova+ tɩ d pa na n kõ-b tõnd bi-pugl baa a ye tɩ b maan b pag ye.”+
8 Bãmb sokame: “Israyɛll buud toɛy-toɛyã sʋka, ãnd n pa wa a Zeova nengẽ Mizpa?”+ Mikame tɩ nin-buiidã sẽn da tigim taab sikã zĩigẽ wã, Zabɛs-galaad ned baa a ye pa wa ye. 9 B sẽn sõd nin-buiidã, b mikame tɩ Zabɛs-galaad ned baa a ye pa be b sʋk ye. 10 Dẽ, nin-buiidã yãka neb tus-piig la a yiib sẽn tar pãng sõma gãndaadã sʋk n tʋm-ba. B yeel-b lame: “Kẽng-y n tɩ kʋ-y Zabɛs-galaad soolmã nebã ne sʋʋga, baa pagbã ne kambã.+ 11 Ad yãmb sẽn tog n maane: Kʋ-y rapã fãa, la pagb nins fãa sẽn zoe n mi rapã.” 12 Zabɛs-galaad soolmẽ wã, b yãa pʋg-sadb kobs-naas sẽn zɩ n kẽ ne raoa. B tall-b lame n wa sikã zĩigẽ Sɩlo+ sẽn be Kanaã soolmẽ wã.
13 Dẽ, nin-buiidã tʋma neb Bẽnzame buudã nebã nengẽ Rimon pĩigẽ wã,+ tɩ b tɩ yeel-b tɩ b wa tɩ b bas tɩ zabrã sa. 14 Woto, Bẽnzame buudã nebã lebg n waa b soolmẽ wã wakat kãnga. Israyɛll nebã kõo bãmb Zabɛs-galaad+ soolmã pagb nins b sẽn pa kʋ wã, la b pa paam tɩ sek b fãa ye. 15 Nin-buiidã sũur sãama wʋsg bũmb ning sẽn paam Bẽnzame buudã nebã+ yĩnga. Bala a Zeova kɩtame tɩ welgr zĩnd Israyɛll buud toɛy-toɛyã sʋka. 16 Nin-buiidã kãsem-dãmbã sokame yaa: “Tõnd na n maana a wãn n paam pagb n kõ rap nins sẽn kellã? Bala Bẽnzame buudã pagbã fãa kiime.” 17 Bãmb leokame yaa: “Bẽnzame buudã nebã sẽn kellã segd n paama pʋɩɩre, sẽn na yɩl tɩ Israyɛll buud a ye da wa menem ye. 18 La tõnd pa tar sor n na n kõ bãmb tõnd kom-pugli wã ye. Bala Israyɛll nebã wẽename n yeele: ‘Kãab-wẽng zĩnd ne ned ning sẽn na n kõ Bẽnzame buudã ned paga.’”+
19 Bãmb yeelame yaa: “Ade! Tigr la b maand yʋʋmd-yʋʋmd a Zeova yĩng Sɩlo.+ Yaa Betɛll nug-rɩtg sẽnesã, so-kãseng ning sẽn yit Betɛll n teesd Sikɛmmã yaanga, la Lebona nug-goabg sẽnesã.” 20 Dẽ, bãmb yeela Bẽnzame buudã rap yaa: “Kẽng-y n tɩ y soond-y viyn pʋtẽ wã. 21 Yãmb sã n wa yã Sɩlo pʋg-sadbã* sẽn yit n na n tɩ naag b taabã n sao, bɩ y ned kam fãa yi viyn pʋtẽ wã n yõk pag Sɩlo pʋg-sadbã sʋka, n leb Bẽnzame soolmẽ wã. 22 B ba-rãmbã wall b tãopã sã n wa n na n zab ne tõndo, d na n yeel-b lame yaa: ‘Maan-y tõnd sugr n sõng-ba. Bala tõnd pa paam pagb zabrẽ wã n kõ bãmb ned kam fãa ye.+ La yãmb me pa tõe n kõ bãmb pag n pa paam taal ye.’”+
23 Bẽnzame buudã nebã maana wa b sẽn yeel bãmbã. Bãmb ned kam fãa yõka pag pʋg-sadb nins sẽn da saoodã sʋka, n tall n looge. Rẽ poore, b leba b soolmẽ wã, n tɩ lebs n me b tẽnsã+ n zĩnd b pʋsẽ.
24 Wakat kãnga, Israyɛll nebã sãeegame tɩ ned kam fãa leb a buudẽ, la a yaab-rãmb roogẽ. La bãmb ned kam fãa yii be n leb a soolmẽ.
25 Wakat kãng tɩ Israyɛll nebã ra pa tar dĩm ye.+ Ned kam fãa ra maanda sẽn yaa tɩrg a meng nifẽ.*