A SÃMWƐLL PIPI SEBRE

1 Rao a ye n da be, n yit Ramatayim-zofim*+ sẽn be Efrayim soolmã+ zĩig ning sẽn yaa tãensã. A yʋʋr la a Ɛlkana.+ A yaa Efrayim neda, n yaa a Zerowam biiga, t’a Zerowam yaa a Elihu biiga. A Elihu yaa a Tohu biiga, t’a Tohu yaa a Zuf biiga. 2 A Ɛlkana ra tara pagb a yiibu. A ye yʋʋr la a Anne, t’a to wã yʋʋr la a Penina. A Penina ra tara kamba, la a Ann ra pa tar biig ye. 3 Yʋʋmd fãa, a Ɛlkana ra yita a tẽngẽ wã n kẽngd Sɩlo n waoogd Wẽnnaam a Zeova sẽn yaa tãb-biis naabã,* la a kõt-a maando.+ Yaa be la a Eli kom-dibli a yiibã, a Ofni ne a Fineyaas+ sẽn yaa a Zeova maan-kʋʋdbã ra tʋmda.+

4 Daar a ye, a Ɛlkana sẽn maan maoong n kõ Wẽnnaam, a kõo a pag a Penina ne a kom-dibli wã la a kom-pugli wã ned kam fãa pʋɩɩre,+ 5 la yẽ kõo a Ann pʋɩɩr sẽn yaa sõma, bala a ra nonga a Ann n yɩɩda. La a Zeova ra pa kõ a Ann rogem ye.* 6 Sẽn paase, a Ann pʋg-to wã ra yaand-a-la wakat fãa, n sãamd a sũuri, a Zeova sẽn pa kõ-a rogmã yĩnga. 7 A Penina ra maanda woto yʋʋmd fãa. A Ann sã n da kẽng a Zeova roogẽ wã fãa,+ a pʋg-to wã yaand-a lame hal t’a yãbd n pa rat rɩɩb ye. 8 La a sɩd a Ɛlkana sok-a lame yaa: “Anne, bõe yĩng tɩ fo yãbda? Bõe yĩng tɩ fo pa rat rɩɩbo, la bõe yĩng tɩ fo sũurã sãam woto fãa? Mam pa be yõod ne foo n yɩɩd kom-dibli piig sɩda?”

9 La bãmb sẽn zĩnd Sɩlo n dɩ la b yũ n sa, a Ann yikame n looge. Wakat kãng tɩ maan-kʋʋd a Eli ra zĩi a Zeova roogã*+ noore. 10 Sũ-toog n da tar a Ann wʋsgo. Yẽ sɩnga a Zeova pʋʋsgo,+ n yãbd n pa satẽ ye. 11 A pʋlmame n yeele: “Tãb-biis naab a Zeova, ges mam nimbãanegã. Fo sã n tẽeg mam sẽn yaa fo tʋm-tʋmd-poakã yelle, n pa yĩm m yell n kõ-m bi-ribla,+ mam na n dɩk-a lame n kõ a Zeova a vɩɩmã tõre, la barg kõn tik a zugã ye.”+

12 A Ann sẽn wa n pʋʋsd a Zeova n kaoosdẽ wã, a Eli ra geta a noorã. 13 A Ann ra gomda a sũurẽ, tɩ b pa wʋmd a koɛɛgã ye. Yaa a no-bɩmsã bal n da yaagde. Dẽ, a Eli tagsame t’a yũu rãam n su. 14 A Eli yeel-a lame yaa: “Dabʋr la fo rãamã na n yi? Bas f divẽ wã yũubu.” 15 T’a Ann leok yaa: “Ayo, m zu-soaba! Mam yaa pag sũur sẽn sãam hal wʋsgo. Mam pa yũ divẽ wall rãam buud baa a yembr ye. Mam togsda a Zeova m sũur* gomde.+ 16 Ra tags-y tɩ y tʋm-tʋmdã yaa pag sẽn ka bark ye. Bala yaa m sũ-sãangã ne m toogã sẽn yaa wʋsgã yĩng n kɩt tɩ m pʋʋsd n tãag masã wã.” 17 Rẽ la a Eli leok-a yaa: “Kẽng ne laafɩ, la bɩ Israyɛll Wẽnnaamã kõ foo bũmb ning fo sẽn kos-a wã.”+ 18 Dẽ, a Ann yeelame: “Bɩ y ket n maand y tʋm-tʋmd-poakã neere.” Rẽ poore, a loogame n tɩ rɩ, la a pa le gãnem a neng ye.

19 Bãmb yika yibeoog pĩnd n wõgemd a Zeova taoore, la b lebg n kuila b yirã Rama.+ A Ɛlkana kẽe ne a pag a Anne, t’a Zeova tẽeg a yelle.+ 20 Yʋʋmd ne a na n ta,* a Ann rɩka pʋg n dog bi-ribla, n pʋd a yʋʋr+ t’a Sãmwɛlle.* Bala a yeelame: “Mam kosa biigã a Zeova.”

21 A Ɛlkana ne a zakã rãmb fãa wa n kẽngame n na n tɩ kõ a Zeova yʋʋmd-yʋʋmd maoongã,+ la a kõ pʋleng maoongo.* 22 La a Ann pa tũ ye.+ Bala a yeela a sɩdã yaa: “Biigã sã n sig bala, mam na n tall-a lame n kẽng a Zeova taoore, la a na n tɩ paa be wakat fãa.”+ 23 La a sɩd a Ɛlkana leoka yẽ yaa: “Maan sẽn yaa sõma ne foo.* Kell n pa yir n tãag biigã sẽn na n sigi. Bɩ a Zeova pids bũmb ning fo sẽn yeelã.” Dẽ, pagã kell n paa yir n yẽsem biigã hal t’a wa sigi.

24 Biigã sẽn sigã bala, a Ann tall-a lame n kẽng Sɩlo. A zãa yʋʋm a tãab loalga, zom efa* a ye, la divẽ yʋ-bedr a yembre,+ n kẽng a Zeova roogẽ wã Sɩlo.+ La yẽ peega biigã me n kẽnge. 25 Bãmb kʋʋ loalgã, la b tall biigã n tɩ kõ a Eli. 26 La a Ann yeelame: “Y gaafare, m zu-soaba! Mam wẽenda ne yãmb sẽn vɩ wã tɩ yaa maam la pag ning sẽn da yals zĩ-kãngã yãmb sɛɛgẽ n pʋʋs a Zeova wã.+ 27 Yaa bi-kãngã poorẽ la m sẽn pʋʋsã, la a Zeova kõo maam bũmb ning mam sẽn kos-a wã.+ 28 Masã, ma-me rɩkda biigã n kõt* a Zeova. A na n yɩɩ a Zeova rẽnd a yõor tɛka.”

La a Ɛlkana wõgemda beenẽ, a Zeova taoore.

2 Dẽ, a Ann pʋʋsame n yeele:

11 A Ɛlkana kuila a yirã Rama, la biigã lebga a Zeova tʋm-tʋmd+ maan-kʋʋd a Eli taoore.

12 La a Eli kom-dibli wã ra yaa nin-wẽnse.+ Bãmb toog ra kae ne a Zeova ye. 13 Ad bũmb ning b sẽn da maande, pʋɩɩrã nin-buiidã sẽn da segd n kõ maan-kʋʋdbã wɛɛngẽ:+ Ned sã n da kõ maoongo, nemdã sẽn ket n kaeed wakate, maan-kʋʋdã tʋm-tʋmd ra wata ne yaagdg sẽn tar yẽn a tãabo, 14 n tʋm-a la-pokẽ wã, la rʋk buud fãa pʋgẽ. Bũmb ning fãa a sẽn yaage, a ra kõt-a-la maan-kʋʋdã. Yaa woto la b ra maand Israyɛll neb nins fãa sẽn da wat Sɩlo wã. 15 Sẽn paase, nand tɩ ned ning sẽn kõ maoongã yõog kaamã tɩ bug-zõosã nusi,+ maan-kʋʋdã tʋm-tʋmd ra watame n yeel-a: “Wa ne maan-kʋʋdã nemd t’a sẽ. A pa rat tɩ f kõ-a nemd sẽn dʋg ye. Yaa nem-kãad bal la a rata.” 16 La nedã sã n yeel-a yaa: “Bas tɩ b yõog kaamã+ nanda. Rẽ poore, f tõe n yãka bũmb ning fãa fo sẽn date.” A ra leokdame: “Ayo! Wa ne mas-masã, sã n pa rẽ, mam na n yãka ne pãnga!” 17 Woto, tʋm-tʋmdbã yel-wẽndã lebga kãseng a Zeova nifẽ.+ Bala nin-kãens ra pa nand maandã nebã sẽn kõt a Zeova wã ye.

18 La a Sãmwɛll ra tʋmda+ a Zeova taoore, n da yer* efood* sẽn wʋg ne lẽ* gĩsi,+ baa a sẽn da yaa bi-bilfã. 19 Sẽn paase, yʋʋmd fãa, a ma wã ra wʋgda kobr sẽn yaa bilf n yaa bãg-vɩɩdo, t’a sã n wa rabd ne a sɩdã n na n tɩ kõ yʋʋmd-yʋʋmd maoongã, bɩ a zã n tɩ kõ-a.+ 20 La a Eli ninga a Ɛlkana ne a pagã bark n yeele: “Bɩ a Zeova kɩt tɩ pʋg-kãngã rog biig n kõ-fo, n ledg biig ning a sẽn dɩk n kõ* a Zeova wã.”+ La bãmb kuila b yirã. 21 A Zeova tẽega a Ann yelle, n kɩt t’a rɩk pʋg+ n dog kom-dibli a tãab ne kom-pugli a yiib n paase. La biig a Sãmwɛll ra bɩta a Zeova taoore.+

22 La a Eli wa n kʋʋla wʋsgo. A wʋma bũmb nins fãa a kom-dibli wã sẽn da maand+ Israyɛllã, la b sẽn da gãe pagb nins sẽn tʋmd sɛk-roogã noorã.+ 23 A ra yeta a kom-dibli wã yaa: “Bõe yĩng tɩ yãmb ket n tʋmd tʋʋm-kãensã? Bala nin-buiidã fãa sẽn yet bũmb ning yãmb zug tɩ mam wʋmdẽ wã yaa wẽnga. 24 Ayo, m kamba. A Zeova nin-buiidã sẽn yet bũmb ning yãmb zug tɩ mam wʋmdẽ wã pa sõma ye. 25 Ned sã n beeg a to, ned tõe n yõka a Zeova sɛɛg a soab yĩnga.* La ned sã n beeg a Zeova,+ ãnd n tõe n pʋʋs a yĩnga?” La bãmb pa kelg b ba wã ye. Bala a Zeova ra yãka yam n na n kʋ-ba.+ 26 Wakat kãnga, biig a Sãmwɛll ra ket n bɩtame, la a Zeova ne nin-buiidã sũur da maneg n nooma ne-a.+

27 Wẽnnaam dao n wa a Eli nengẽ n yeel-a yaa: “Ad a Zeova sẽn yeele: ‘Mam pa vẽneg m meng vẽeneg ne f yaabã roog rãmba, b sẽn wa n yaa yembs Ezɩpt a Farawõ zakẽ wã sɩda?+ 28 Mam yãka yẽ Israyɛll buud toɛy-toɛyã fãa sʋka,+ t’a na n yɩ mam maan-kʋʋd n maand maand mam tẽn-kugrã zugu,+ n yõogd wisdu,* la a yeelgd efood* mam taoore. La mam kõo fo yaabã roog rãmb Israyɛll nebã* kũun nins fãa b sẽn yõogd bugmã.+ 29 Bõe yĩng tɩ yãmb paoogd* kũun nins mam sẽn yeel tɩ b kõt maamã, la maandã mam sẽn yeel tɩ b maand mam doogẽ wã?+ Bõe yĩng tɩ fo waoogd f kom-dibli wã n yɩɩd maam? Yãmb dɩta Israyɛll nebã sẽn yaa mam nin-buiidã maandã babs nins sẽn yaa sõma n yɩɩdã n nobda.+

30 “‘Rẽ n so tɩ Israyɛll Wẽnnaam a Zeova yeel yaa: “Yaa sɩd tɩ mam da yeelame tɩ fo roogã rãmb ne f yaabã roog rãmb na n kẽna mam taoor wakat fãa.”+ La masã, a Zeova yetame: “Pa na n yɩ woto ye. Bala ned ning sẽn waoogd maam, mam na n waoog-a lame.+ La ned ning sẽn paoogd maam, mam na n paoog-a lame.” 31 Gese! Wakat n wat tɩ mam na n kɩt tɩ foo ne f yaabã roog rãmb pãngã* sa, hal tɩ rao sẽn kʋʋl ra le zĩnd fo roogã rãmb sʋk ye.+ 32 Israyɛll nebã vɩɩmã sã n wa noomẽ, fo na n yãa f bɛ fo taoor mam roogẽ wã,+ la rao sẽn kʋʋl pa na n tol n le zĩnd fo roogã rãmb sʋk ye. 33 Fo roogã rao ning mam sẽn na n bas t’a kell n tʋm m tẽn-kugrẽ wã na n kɩtame tɩ fo ninã pãng booge, la a na n waa ne toog n kõ foo.* La sʋʋg n na n kʋ fo roogã rãmb fãa la bala.+ 34 Bũmb ning sẽn na n paam fo kom-dibli a yiib a Ofni ne a Fineyaasã na n yɩɩ bãnde: Bãmb b yiibã fãa na n kii daar-n-yɛnga.+ 35 Rẽ poore, mam na n yãka maan-kʋʋd sẽn yaa sɩd soaba.+ A na n maana bũmba fãa tɩ zems ne mam sũurã raabo, la mam na n kɩtame t’a roogã rãmb yɩ maan-kʋʋdb wakat fãa. Yẽ na n kẽna ned ning mam sẽn zaeyã* taoor daar fãa. 36 Fo roogã ned ning fãa sẽn na n kellã na n wa wõgemda a taoore, n kos-a t’a kõ-a tʋʋm t’a paam ligd bilf la rɩɩbo. A na n yeelame: “M bõos tɩ f bobl-m maan-kʋʋrã tʋʋmd a yembre, tɩ m paam rɩɩb n dɩ.”’”+

3 Wakat kãnga, biig a Sãmwɛll ra tʋmda a Zeova tʋʋmdã+ a Eli taoore. A Zeova ra pa le wae n gomd ne nebã ye. Vẽnegr+ me ra pa le waoog ye.

2 Daar a yembre, a Eli ra gãee a gãagẽ. A ninã nenem ra boogame t’a pa le ne sõma ye.+ 3 Wẽnnaam fɩtlã+ ra ket n witame, la a Sãmwɛll ra gãee a Zeova roogẽ wã,*+ zĩig ning Wẽnnaam Koglgã sẽn da be wã. 4 Dẽ, a Zeova boola a Sãmwɛll t’a sake: “Ad maam!” 5 A wudgame n kẽng a Eli nengẽ n tɩ yeele: “Ad maam! Bala yãmb boola maam.” La a Eli leokame: “Mam pa bool-f ye. Lebg n tɩ gãande.” Dẽ, a Sãmwɛll lebgame n tɩ gãande. 6 A Zeova le boolame: “Sãmwɛlle!” T’a Sãmwɛll yik n kẽng a Eli nengẽ n tɩ yeele: “Ad maam! Bala yãmb boola maam.” La a Eli leokame yaa: “M biiga, m pa bool-f ye. Lebg n tɩ gãande.” 7 (A Sãmwɛll da nan pa bãng a Zeova ye. A Zeova ra nan pa taas-a koɛɛg me ye.)+ 8 A Zeova leb n boola naoor a tãab-n-soaba: “Sãmwɛlle!” La a Sãmwɛll yik n kẽnga a Eli nengẽ n tɩ yeele: “Ad maam! Bala yãmb boola maam.”

Dẽ, a Eli bãngame tɩ yaa a Zeova n boond biigã. 9 Woto, a Eli yeela a Sãmwɛll yaa: “Lebg n tɩ gãande, la a sã n bool-f bɩ f leok yaa: ‘Gom-y-yã Zeova, tɩ y tʋm-tʋmdã kelgdame.’” La a Sãmwɛll lebgame n tɩ gãand a zĩigẽ wã.

10 A Zeova wa n yalsa be n bool-a wa pĩndã: “Sãmwɛlle, Sãmwɛlle!” T’a Sãmwɛll leoke: “Gom-y tɩ y tʋm-tʋmdã kelgdame.” 11 A Zeova yeela a Sãmwɛll yaa: “Kelge, mam na n maana bũmb Israyɛlle, tɩ ned ning fãa sẽn na n wʋm-a bɩ a yɛɛse.*+ 12 Baraare, mam na n pidsa bũmb nins fãa mam sẽn da togs a Eli ne a roogã wɛɛngẽ wã, hal b sɩngrẽ n tãag b sɛɛbo.+ 13 Fo segd n yeel-a lame tɩ m na n sɩbga a roogã neb wakat fãa yĩnga, kongr ning tiir a sẽn mi wã yĩnga.+ Bala a kom-dibli wã tʋʋda* Wẽnnaam,+ la yẽ pa zab-b ye.+ 14 Rẽ n so tɩ mam wẽen n yeel tɩ maoong buud baa a ye pa tol n tõe n yẽes a Eli roogã neb kongrã ye.”+

15 A Sãmwɛll kell n gãandame tɩ beoogã vẽege, t’a yaool n yik n pags a Zeova roogã kʋɩlense. A Sãmwɛll da yɛɛsdame n pa rat n togs a Eli vẽnegrã ye. 16 La a Eli boola a Sãmwɛlle: “M biig a Sãmwɛlle!” T’a Sãmwɛll leoke: “Ad maam!” 17 A Eli sokame yaa: “Yaa bõe koɛɛg la a sẽn taas foomã? M bõos tɩ f ra solg-m dẽ ye. Fo sã n solg maam goam nins a sẽn togs foomã baa yaa a yembre, bɩ Wẽnnaam sɩbg foom ne sɩbg-kãsenga.” 18 Woto, a Sãmwɛll togs-a-la bũmba fãa, n pa solg-a baa fʋɩ ye. Dẽ, a Eli yeelame: “Yaa a Zeova. Bɩ a maan sẽn yaa sõma a nifẽ.”

19 A Sãmwɛll ra ket n bɩtame la a Zeova mengã ra bee ne-a,+ n pa basdẽ t’a Sãmwɛll gomd baa a yembr vaal ye.* 20 Israyɛll nebã fãa, sẽn sɩng ne Dan n tãag Bɛɛr-seba bãngame t’a Zeova yãka a Sãmwɛll t’a yaa b no-rɛɛsa. 21 La a Zeova ra ket n vẽnegda a meng Sɩlo. Bala a Zeova ra vẽnegda a meng ne a Sãmwɛll Sɩlo. Be la a Zeova ra gomd ne a Sãmwɛlle.+

4 A Sãmwɛll goamã ra tata Israyɛll soolmã fãa.

Israyɛll nebã wa n yiime n na n seg Filisti nebã n zab ne-ba. Bãmb tilga b sikã Eben-ezɛɛr sɛɛga, tɩ Filisti nebã tilg b sikã Afɛke. 2 Filisti nebã tonga taab ned fãa ne a zĩig n seg Israyɛll nebã n na n zabe, la Israyɛll nebã konga zabrã. Filisti nebã tõog-b lame, n kʋ na maan neb tus a naas zabrã zĩigẽ weoogẽ wã. 3 Tãb-biisã sẽn lebg n wa sikã zĩigẽ wã, Israyɛll kãsem-dãmbã yeelame yaa: “Bõe yĩng t’a Zeova bas tɩ Filisti nebã tõog tõnd rũndã?+ Wa-y tɩ d kẽng Sɩlo n tɩ tall a Zeova kaoolã koglg n wa,+ sẽn na yɩl t’a zĩnd ne-do, n fãag tõnd d bɛɛbã nugẽ.” 4 Woto, nin-buiidã tʋma rap Sɩlo tɩ b tɩ rɩk tãb-biis naab a Zeova kaoolã koglgo, soab ning sẽn zao a geerã sẽn be seribẽ-rãmbã zugã.*+ A Eli kom-dibli a yiib a Ofni ne a Fineyaas+ ra bee be ne Wẽnnaam kaoolã koglgo.

5 A Zeova kaoolã koglg sẽn ta tãb-sikã zĩigẽ wã bala, Israyɛll nebã fãa kaasame hal tɩ tẽngã fãa rigimdi. 6 Filisti nebã sẽn wʋm kaasgã rãamdã, b sokame yaa: “Bõe yĩng tɩ Ebre-rãmbã kaasd woto b sikẽ wã?” La b wa n wʋmame tɩ b talla a Zeova Koglgã n wa sikã zĩigẽ. 7 Filisti nebã yɛɛsame, n yeele: “Wẽnnaam waa sikã zĩigẽ!”+ Woto, bãmb yeelame yaa: “Tõnd sa-yã! Bala bũmb a woto na zɩ n maan ye! 8 Tõnd sa-yã! Ãnda n na n fãag tõnd Wẽnnaam-kãngã sẽn yaa kãsengã nugẽ? Yaa yẽ la sẽn kʋ Ezɩpt nebã ne yel-beed buud toor-toor we-raoogẽ wã.+ 9 Filisti neba, keng-y y mens n yɩ rapa, tɩ Ebre-rãmbã ra wa soog yãmb wa yãmb sẽn soog-bã ye.+ Yɩ-y rapa, n zabe!” 10 Dẽ, Filisti nebã zabame n tõog Israyɛll nebã+ tɩ b ned kam fãa zoe n kuil a yiri. B kʋʋ Israyɛll nebã wʋsgo. Yɩɩ hal sodaas tus-pis-tã sẽn kẽnd nao. 11 Sẽn paase, Filisti nebã reega Wẽnnaam Koglgã, la b kʋ a Eli kom-dibli a yiib a Ofni ne a Fineyaase.+

12 Bẽnzame buudã ned a yembr n yi zabrã zĩigẽ n zoe n kẽng Sɩlo daar-n-kãnga. A futã ra pãrsame, t’a zugã yaa tom.+ 13 Raoã sẽn ta wã, a Eli ra zaoo goeel zug sorã noor n getẽ. Bala a sũurã ra kiuusda Wẽnnaam Koglgã yĩnga.+ Raoã kẽe tẽngã pʋg n taas koɛɛgã, tɩ tẽngã tõr fãa sɩng wiisgu. 14 A Eli sẽn wʋm wiisgã rãamde, a sokame yaa: “Bõe n maan la nebã sẽn wiisd woto wã?” Raoã waa a Eli nengẽ tao-tao n togs-a kibarã. 15 (Rẽ t’a Eli tara yʋʋm pis-wɛ la a nii, n get kuii, la a ninã ra pa le ne ye.)+ 16 Raoã yeela a Eli yaa: “Yaa maam la sẽn yi zabrã zĩigẽ n wa wã! Rũndã bal la mam yi be n zoe.” T’a Eli sok-a yaa: “M biiga, bõe n maane?” 17 Tɩ koe-taasdã leoke: “Israyɛll nebã zoee Filisti nebã taoore. Bala b tõog-b lame n kʋ b neb wʋsgo.+ Yãmb kom-dibli a yiib a Ofni ne a Fineyaas me kiime.+ Sẽn paase, b reega Wẽnnaam Koglgã.”+

18 Raoã sẽn gom Wẽnnaam Koglgã yellã bala, a Eli yii a goeelã zug n lʋɩ zãmbɛɛl tẽngã rignoorẽ, t’a yublã kaoog t’a ki. Bala a ra kʋʋlame, n da zɩs me. A bʋʋ Israyɛll yʋʋm pis-naase. 19 A bi-pagã, rat n yeel t’a Fineyaas pagã ra tʋtame n kolg rogem. Pagã sẽn wʋm tɩ b reega Wẽnnaam Koglgã, la t’a sɩdã ba ne a sɩdã fãa kiime wã, a pʋgã tiig n yika zabr t’a yĩgimd n doge. 20 A sẽn dog n sa n dat n ki wã, pagbã sẽn da be ne-a wã yeelame: “Da zoe rabeem ye. Bala fo roga bi-ribla.” A pa yeel tɩ bũmbu, la a pa kelg-b meng ye. 21 A pʋda biigã yʋʋr t’a Ikabood*+ n yeele: “Ziir loog n basa Israyɛlle.”+ A ra gomda b sẽn deeg Wẽnnaam Koglgã yelle, la bũmb ning sẽn paam a sɩdã ba ne a sɩdã.+ 22 Pagã yeelame yaa: “Ziir loog n basa Israyɛlle, bala b reega Wẽnnaam Koglgã.”+

5 Filisti nebã sẽn yõk Wẽnnaam Koglgã n deegã,+ b tall-a-la Eben-ezɛɛr n kẽng Asdoode. 2 Filisti nebã rɩka Wẽnnaam Koglgã n tɩ kẽes b wẽnnaam a Dagõ roogẽ wã, n dɩgl-a n yɛgl a Dagõ.+ 3 Vẽkembeoogã, Asdood nebã sẽn yik pĩnda, b mikame t’a Dagõ bõn-naandgã lʋɩɩme t’a nengã fõg tẽng a Zeova Koglgã taoore.+ Dẽ, bãmb dɩk-a lame n lebs a zĩigẽ wã.+ 4 B sẽn yik vẽkembeoogã yibeoog pĩnda, b mikame t’a Dagõ le lʋɩɩme t’a nengã fõg tẽng a Zeova Koglgã taoore. A Dagõ zugã ne a nusã ra fiuusame n dɩg rigno-koakẽ wã. A yĩngã babg ning sẽn yaa wa zĩnfã bal* n pa wã. 5 Rẽ n so tɩ hal n tãag rũndã, a Dagõ maan-kʋʋdbã la neb nins fãa sẽn kẽed a Dagõ roogã sẽn be Asdoodã pa tabd rigno-koakã ye.

6 A Zeova ra sɩbgda Asdood nebã sõma. A kɩtame tɩ se-noad yõk Asdood ne a soolem toɛy-toɛyã nebã, n sãam-ba.+ 7 Asdood nebã sẽn yã bũmb ning sẽn maandã, b yeelame: “Wa-y tɩ d ra bas Israyɛll Wẽnnaamã Koglgã tõnd nengẽ ye. Bala yẽ sɩbgda tõnd ne d wẽnnaam a Dagõ wʋsgo.” 8 Dẽ, bãmb tʋmame tɩ b tɩ bool Filisti nanambsã n tigim n sok-b yaa: “Tõnd na n maana wãn ne Israyɛll Wẽnnaamã Koglgã?” Tɩ b leoke: “Tall-y-yã-a n kẽng Gate.”+ Dẽ, bãmb talla Israyɛll Wẽnnaamã Koglgã n kẽng be.

9 Bãmb sẽn tall-a n kẽng Gatã, a Zeova kɩtame tɩ yel-beed paam tẽngã nebã, hal n kẽes-b rabeem-kãsenga. Yẽ sɩbga tẽngã nebã, sẽn sɩng ne kom-bõonegã n tãag kãsembã, n kɩt tɩ se-noad yõk-ba.+ 10 Woto, Filisti nebã kɩtame tɩ b tall Wẽnnaam Koglgã n kẽng Ekronne,+ la Wẽnnaam Koglgã sẽn ta Ekronnã bala, a nin-buiidã sɩnga kaasg n yetẽ: “B talla Israyɛll Wẽnnaamã Koglgã n wa tõnd nengẽ n na n kʋ tõnd ne d nebã!”+ 11 Dẽ, bãmb tʋmame tɩ b tɩ bool Filisti nanambsã n tigim n yeel-b yaa: “Kɩt-y tɩ Israyɛll Wẽnnaamã Koglgã leb Israyɛlle. Lebs-y-yã-a a sẽn yiẽ wã, tɩ tõnd ne d nebã ra wa ki ye.” Bala kũumã rabeem kẽe tẽngã fãa gilli. Wẽnnaam ra sɩbgd-b-la hal sõma.+ 12 Se-noad n yõk neb nins sẽn põs kũumã. Tẽngã nebã sẽn da baood sõngrã kelems taa saasẽ.

6 A Zeova Koglgã+ paa Filisti nebã soolmẽ wã kiis a yopoe. 2 Filisti nebã boola maan-kʋʋdbã ne bagbã+ n sok-b yaa: “Tõnd na n maana wãn ne a Zeova Koglgã? Sõng-y tõnd tɩ d bãng d sẽn segd n maan to-to n lebs-a a sẽn yiẽ wã.” 3 B yeel-b lame: “Yãmb sã n na n lebs Israyɛll Wẽnnaam a Zeova kaoolã koglgo, bɩ y ra lebs-a zaalem ye. Yãmb segd n paasa kũun sẽn na n yɩ maoong y taalã yĩnga.+ Yaa yãmb sã n maan woto la y na n paam maagre. La rẽ la y na n bãng bũmb ning sẽn kɩt tɩ b sɩbgd yãmbã.” 4 La b sok-b lame yaa: “Bõe la d segd n tool tɩ yɩ maoong d taalã yĩnga?” Tɩ b leoke: “Tool-y sãnem se-noad a nu, ne sãnem yõens a nu, wa sẽn zems Filisti nanambsã sõorã.+ Bala yaa to-yɛngã n nams yãmb ned kam fãa, ne y nanambsã. 5 Yãmb segd n maana yãmb se-noadã mamsgo, la yõens+ nins sẽn sãamd tẽngã me mamsgo. La yãmb segd n waooga Israyɛll Wẽnnaamã, tɩ tõe t’a bas yãmb ne y wẽnnaamã la y soolmã fãa sɩbgre.+ 6 Bõe tɩ yãmb na n diglim y sũyã wa Ezɩpt nebã ne a Farawõ sẽn diglim b sũyã?+ Wẽnnaam sẽn sɩbg-b sõma wã,+ pa yɩ tɩlɛ tɩ b bas Israyɛll nebã tɩ b loog sɩda?+ 7 Masã, maan-y niis sarɛt-paalle, la y bao nag-yãans a yiib sẽn tar kamb sẽn ket n yẽsemdẽ, la b sẽn nan pa balg bũmbu. Rɩk-y sarɛtã n balg-ba, la y peeg b kambã n leb yiri. 8 Rɩk-y-yã a Zeova Koglgã n sagl sarɛtã pʋgẽ, la y rɩk teedã sẽn maan ne sãnemã yãmb sẽn dat n tool tɩ yɩ maoong y taalã yĩngã n ning koglg a to pʋgẽ n sagl n yɛgl-a.+ Kɩt-y tɩ b rɩk sore, 9 la y gũus n gese: B sã n dɩk Bɛt-semes+ sore, n tees koglgã sẽn yi soolem ningã, bɩ y bãng tɩ yaa Israyɛll Wẽnnaamã n kɩt tɩ to-kãsengã paam tõndo. La b sã n pa rɩk so-kãnga, tõnd na n bãngame tɩ ka yẽ n sɩbg tõnd ye. Yaa toog sẽn paam tõnd woto bala.”

10 Dẽ, Filisti nebã maana wa b sẽn yeel bãmbã. B rɩka nag-yãans a yiib sẽn tar kamb sẽn yẽsemd n balg sarɛtã, la b pag b kambã yiri. 11 Dẽ, b rɩka a Zeova Koglgã n sagl niis sarɛtã pʋgẽ, la b paas koglg ning sẽn tar sãnem yõensã ne sãnem se-noadã mamsgã. 12 La nag-yãansã rɩka Bɛt-semes sorã tɩrga, n muundẽ la b tutẽ, n pa bʋdgd goabg wall rɩtg ye. Filisti nanambsã pʋgl-b lame n tãag Bɛt-semes+ toadgã. 13 Bɛt-semes nebã ra bee tẽn-nabrẽ wã n kẽebd bɩle. B sẽn zẽk b nens n yã Koglgã, b kɩdma sũ-noogo. 14 Sarɛtã tɩ yalsa Bɛt-semes ned a Zozuwe pʋʋgẽ wã, kug-kẽeng sɛɛga. Dẽ, bãmb wesa sarɛtã raado, n kʋ niisã+ n maan maoong sẽn yõogd bugum n kõ a Zeova.

15 Levi buudã neb+ sika a Zeova Koglgã ne koglg ning sẽn tar teedã sẽn maan ne sãnemã n dogl kug-kẽengã zugu. Baraare, Bɛt-semes+ nebã maana maand sẽn yõogd bugum, la maand a taab n kõ a Zeova.

16 Filisti nanambs a nu wã sẽn yã rẽ wã, b lebg n leba Ekron baraare. 17 Ad sãnem se-noadã Filisti nebã sẽn maan n tool tɩ b kõ a Zeova tɩ yɩ maoong bãmb taalã yĩngã:+ A yembr yaa Asdood+ yĩnga, a yembr Gaaza yĩnga, a yembr Askelon yĩnga, a yembr Gat+ yĩnga, a yembr Ekron+ yĩnga. 18 Yõensã b sẽn maan ne sãnemã sõor zemsa tẽns nins fãa Filisti nanambsã sẽn so wã sõore, rat n yeel tɩ tẽns nins sẽn gũbg ne lalsã, ne tẽn-bõones nins sẽn be b soolmẽ wã fãa.

La kug-kẽeng ning zug b sẽn dogl a Zeova Koglgã yaa bõn-kãens kaset Bɛt-semes ned a Zozuwe pʋʋgã pʋgẽ hal n tãag rũndã. 19 La Wẽnnaam kʋʋ Bɛt-semes neba, bala b gesa a Zeova Koglgã. A kʋʋ neb tus-pis-nu la neb pis-yopoe. La nin-buiidã kẽe sũ-sãang pʋgẽ, bala a Zeova kʋʋ neb wʋsgo.+ 20 Dẽ, Bɛt-semes nebã sokame yaa: “Ãnd n na n tõog n yals a Zeova taoore, Wẽnnaam-kãngã sẽn yaa sõngã?+ La yɛ la tõnd na n tall Wẽnnaam Koglgã n kẽnge?”*+ 21 Dẽ, bãmb tʋma koe-taasdb Kiryat-yeyarim+ nebã nengẽ tɩ b tɩ yeel-b yaa: “Filisti nebã lebg n talla a Zeova Koglgã n wa. Wa n tall-y-yã-a n kẽng yãmb nengẽ.”+

7 Dẽ, Kiryat-yeyarim nebã wa n dɩka a Zeova Koglgã n kẽng a Abinadaab zakẽ+ wã kunkubrã zugu. Bãmb yãka a bi-ribl a Eleazaar t’a na n gũ a Zeova Koglgã.

2 B sẽn tall Koglgã n kẽng Kiryat-yeyarimmã tɛka, maana yʋʋm pisi tõr tɩ Israyɛll nebã fãa yaool na n sɩng a Zeova baoobo.+ 3 Dẽ, a Sãmwɛll yeela Israyɛll nebã fãa yaa: “Sã n yaa ne y sũur fãa la y rat n lebg n wa a Zeova nengẽ,+ bɩ y yiis wẽn-sãamsã+ ne a Astarte bõn-naandsã+ yãmb sʋka, la y kõ a Zeova y sũurã zãnga, n tũ yẽ a ye bala.+ Woto, a na n fãaga yãmb Filisti nebã nugẽ.”+ 4 Dẽ, Israyɛll nebã menesa Baal-dãmbã ne a Astarte bõn-naandsã bãmb sʋka, n tũ a Zeova bala.+

5 A Sãmwɛll yeelame: “Tigm-y Israyɛll nebã fãa Mizpa,+ tɩ mam na n pʋʋsa a Zeova yãmb yĩnga.”+ 6 Dẽ, bãmb tigma taab Mizpa, n toog koom n daag a Zeova taoore, la b loe noor baraare.+ Be, bãmb yeelame yaa: “Tõnd beega a Zeova.”+ A Sãmwɛll sɩnga Israyɛll nebã bʋʋb+ Mizpa.

7 Filisti nebã sẽn wʋm tɩ Israyɛll nebã tigma taab Mizpa wã, b nanambsã+ waame n na n zab ne Israyɛlle. Israyɛll nebã sẽn wʋm dẽ, Filisti nebã rabeem yõka bãmba. 8 Woto, Israyɛll nebã yeela a Sãmwɛll yaa: “Ket n yõkd a Zeova sɛɛg tõnd yĩnga,+ t’a fãag tõnd Filisti nebã nugẽ.” 9 Dẽ, a Sãmwɛll rɩka pe-bil sẽn ket n yẽsemdẽ n maan maoong sẽn yõogd bugum+ n kõ a Zeova. A kell n yõka a Zeova sɛɛg Israyɛll nebã yĩnga, t’a Zeova leok a kosgã.+ 10 A Sãmwɛll sẽn wa n maand maoong sẽn yõogd bugmã, Filisti nebã kolgame n na n zab ne Israyɛlle. Dẽ, a Zeova kɩtame tɩ saagã tãs+ baraar hal tɩ Filisti nebã yirbi,+ tɩ Israyɛll nebã tõog-ba.+ 11 Woto, Israyɛll nebã yii Mizpa n dig Filisti nebã n kʋ-ba, hal n tãag Bɛt-kaar nug-goabgã. 12 Dẽ, a Sãmwɛll rɩka kugr+ n vigl Mizpa ne Yesana sʋka, n pʋd a yʋʋr tɩ Eben-ezɛɛre.* Bala yẽ yeelame yaa: “Hal n tãag masã, a Zeova sõnga tõndo.”+ 13 Woto, Israyɛll nebã tõoga Filisti nebã, la bãmb pa le wa Israyɛll soolmẽ wã n zab ne-b ye.+ A Zeova kell n gɩdga Filisti nebã a Sãmwɛll yõor tɛka.+ 14 Sẽn paase, Filisti nebã lebsa Israyɛll tẽns nins b sẽn da reegã, sẽn sɩng ne Ekron n tãag Gate. La Israyɛll nebã lebs n deega b tẽnsã Filisti nebã nugẽ.

Bãan zĩnda Israyɛll ne Amoor nebã+ sʋk me.

15 A Sãmwɛll kell n bʋʋ Israyɛll a vɩɩmã tõre.+ 16 Yʋʋmd fãa, a ra gilgda Betɛlle,+ Gilgall+ la Mizpa.+ Yẽ bʋʋ Israyɛll nebã tẽn-kãens fãa pʋsẽ. 17 La a ra lebgd n kuiisa Rama,+ bala be la a zakã ra be. Yẽ ra bʋʋda Israyɛll be me. Yẽ mee tẽn-kugr be n kõ a Zeova.+

8 A Sãmwɛll sẽn wa n kʋʋlã, a yãka a kom-dibli wã tɩ b na n yɩ Israyɛll bʋ-kaoodba. 2 A bi-kãsengã yʋʋr la a Zowɛlle, tɩ yiib-n-soabã yʋʋr la a Abiya.+ B ra yaa bʋ-kaoodb Bɛɛr-seba. 3 La a Sãmwɛll kom-dibli wã pa rɩk a naoor ye. B ra maanda zãmb n dɩtẽ,+ n da reegd noor-madgre,+ la b kaood bʋʋdã kɛga.+

4 Israyɛll kãsem-dãmbã wa n tigma taab n kẽng a Sãmwɛll nengẽ Rama. 5 Bãmb tɩ yeela a Sãmwɛll yaa: “Ges-y-yã! Yãmb kʋʋlame, la y kom-dibli wã pa rɩk yãmb naoor ye. Masã, yãk-y rĩm n kõ tõndo, t’a kaood d bʋʋd wa buud a taabã.”+ 6 La bãmb sẽn yeel a Sãmwɛll t’a yãk rĩm n kõ-bã, a sũur pa yɩ noog ye.* Dẽ, a Sãmwɛll pʋʋsa a Zeova, 7 t’a Zeova yeel-a yaa: “Kelg bũmb ning fãa nin-buiidã sẽn yet foomã. Bala pa foom la b zãgs ye. Yaa maam la b zãgs tɩ m kõn le yɩ b rĩm ye.+ 8 Bãmb maanda bũmb ning b sẽn sɩng n maand mam sẽn yiis bãmb Ezɩptã tɛk n tãag rũndã wã. Bãmb basa maam naoor wʋsg+ n tũ wẽnnaam-dãmb a taaba,+ la yaa woto me la b sẽn maand ne foomã. 9 Dẽ wã, kelg-ba. La f segd n keoog-b-la hal sõma. Togs-b rĩmã sẽn na n soog-bã sẽn tar sor n na n maan bũmb ninga.”

10 Woto, a Sãmwɛll goma ne nin-buiidã sẽn da kot yẽ rĩmã, n taas-b a Zeova goamã fãa. 11 A yeel-b lame: “Ad rĩmã sẽn na n soog yãmbã sẽn tar sor n na n maan bũmb ninga:+ A na n dɩka yãmb kom-dibli wã+ n kɩt tɩ b get a saar-dãmbã*+ yelle, la a kɩt tɩ sãnda lebg a wed-rʋʋdba,+ tɩ kẽer be a saar-dãmbã taoor n zoetẽ. 12 A na n yãka kẽer tɩ b lebg neb tusr-tusr nanambse,+ neb pis-nu-nu nanambse.+ Kẽer na n kooda a pʋtã+ la b kẽebdẽ,+ tɩ sãnda maand a zab-teedo, la a saar-dãmbã teedo.+ 13 A na n kɩtame tɩ yãmb kom-pugli wã maand a ka-rãmba,* tɩ kẽer segendẽ, tɩ sãnda wẽed buri.+ 14 A na n deega yãmb pʋt nins sẽn yaa sõma wã, y viyn pʋtã la y oliiv pʋtã+ n kõ a tʋm-tʋmdbã. 15 A na n deega yãmb pʋtã kood ne y viyn pʋtã biis pʋɩɩr a ye pʋɩ piig zug n kõ na-yirã tʋm-tʋmdbã la a tʋm-tʋmdb a taabã. 16 Rĩmã na n deega yãmb tʋm-tʋmdbã la y tʋm-tʋmd-pogsã, y nag-nobdsã la y bõensã n kɩt tɩ b tʋmd a tʋʋma.+ 17 A na n deega yãmb rũm-bõonegã pʋɩɩr a ye pʋɩ piig zugu,+ la yãmb na n lebga a tʋm-tʋmdba. 18 Daar n wat tɩ yãmb na n kelem rĩmã yãmb sẽn yãkã yĩnga,+ la baraare, a Zeova pa na n leok yãmb ye.”

19 La nin-buiidã zãgsame n pa kelg a Sãmwɛll sẽn yeel-b bũmb ningã ye. Bãmb leokame yaa: “Rẽ pa pak ye! Tõnd we n paam dĩm sẽn na n soog tõndo. 20 Dẽ, tõnd me na n wõnega buud a taabã, tɩ d rĩmã kaood tõnd bʋʋdo, la a lʋɩt taoor n zabd ne d bɛɛbã.” 21 A Sãmwɛll sẽn kelg nin-buiidã goamã fãa n sɛ wã, a rɩkame n taas a Zeova. 22 A Zeova yeela a Sãmwɛll yaa: “Kelg-ba, n yãk rĩm sẽn na n dɩ naam b zugu.”+ Dẽ, a Sãmwɛll yeela Israyɛll rapã yaa: “Bɩ yãmb ned kam fãa leb a tẽngẽ.”

9 Bẽnzame buudã ned a ye n da be t’a yʋʋr boondẽ t’a Kis,+ n yaa a Abiyɛll biiga. A Abiyɛll yaa a Zeroor biiga, t’a Zeroor yaa a Bekorat biiga, t’a Bekorat yaa a Afiya biiga. A Kis ra yaa Bẽnzame buuda neda,+ n da yaa rakãag-kẽenga. 2 A ra tara bi-ribl t’a yʋʋrã la a Sayulli.+ A ra yaa bi-bɩɩg n yaa rasãnga. Rao ra pa be Israyɛll nebã sʋk t’a neerem ta-a ye. A woglem da yɩɩda nebã fãa.*

3 A Sayull ba a Kis bõens* n wa n meneme, t’a Kis yeel a biig a Sayull yaa: “M bõos tɩ f peeg tʋm-tʋmd a ye tɩ y kẽng n tɩ gẽes bõensã.” 4 Bãmb pɩʋʋga Efrayim soolmã zĩig ning sẽn yaa tãensã, n sãag n kẽng Salisa, n pa yã-b ye. B kẽnga Saalim soolmẽ wã, la bõensã ra pa be be ye. Bãmb saaga Bẽnzame buudã neb soolmã fãa n pa tol n yã-b ye.

5 Bãmb sẽn wa n ta Suf soolmẽ wã, a Sayull yeela a tʋm-tʋmdã sẽn da be ne-a wã yaa: “Wa tɩ d lebg n kuili, tɩ m baaba ra wa bas bõensã yell tagsg n maand yɩɩr tõnd yĩng ye.”+ 6 La tʋm-tʋmdã leokame yaa: “Ad Wẽnnaam rao a ye n be tẽn-kãngã pʋgẽ, tɩ nebã waoogd-a. A sẽn yet bũmb ning fãa pidsdame.+ Wa tɩ d kẽng be, tɩ tõe t’a wilg-d sor ning d sẽn segd n dɩke.” 7 Rẽ la a Sayull leok a tʋm-tʋmdã yaa: “Tõnd sã n kẽnge, bõe la d na n tɩ kõ raoã? Bur pa be tõnd kordẽ wã ye. Baa fʋɩ kae d sẽn tõe n zã n tɩ kõ Wẽnnaam raoã ye. Bõe la tõnd tara?” 8 La tʋm-tʋmdã leoka a Sayull yaa: “Gese! Mam tara wanzuri ligd-koɛɛng a yembre.* M na n dɩk-a lame n kõ Wẽnnaam raoã, t’a togs tõnd sor ning d sẽn tog n dɩke.” 9 (Pĩndã, Israyɛll soolmẽ wã, ned sã n da rat n tɩ sok Wẽnnaam bũmbu, a yetame: “Wa tɩ d kẽng gɛtã nengẽ.”+ Bala pĩndã, b ra boonda rũndã-rũndã no-rɛɛsdbã tɩ gɛtba.) 10 Dẽ, a Sayull yeela a tʋm-tʋmdã yaa: “Fo sẽn yeelã yaa sõma. Wa tɩ d kẽnge.” Woto, b kẽnga tẽng ning Wẽnnaam raoã sẽn da be wã.

11 Bãmb sẽn wa n dʋʋgd n dabd tẽngã pʋgẽ wã, b sega kom-pugli sẽn dabd n na n tɩ toog koom. La bãmb sok-b lame yaa: “Gɛtã+ bee ka bɩ?” 12 Tɩ kom-pugli wã leoke: “A bee ka. Ade! A bee taoorã. Kẽng-y tao-tao t’a waa ka rũndã, bala nebã maanda maoong+ zĩ-zãntgẽ* wã+ rũndã. 13 Yãmb sã n ta tẽngã pʋgẽ bala, y na n paam-a lame t’a nan pa kẽng zĩ-zãntgẽ* wã n na n tɩ rɩ ye. Nebã na n gũume hal t’a wa tɩ b yaool n dɩ. Bala yaa yẽ n ningd maoongã barka. Yaa a sã n maan dẽ n sa la neb nins b sẽn boolã tõe n dɩ. Woto wã, kẽng-y mas-masã tɩ y na n yã-a lame.” 14 Dẽ, b kẽnga tẽngã pʋgẽ. B sẽn wa n ta tẽngã pʋgã, b yãa a Sãmwɛll sẽn segd-ba, n na n tall-b n kẽng zĩ-zãntgẽ* wã.

15 A Sayull waoongã ket tɩ beoogo, a Zeova ra yeela a Sãmwɛll yaa: 16 “Beoog woto wẽnde, mam na n tʋma Bẽnzame buudã soolem+ rao a ye fo nengẽ. Fo segd n zae-a* lame t’a lebg Israyɛll nebã sẽn yaa mam nin-buiidã rĩma.+ La yẽ na n fãaga mam nebã Filisti nebã nugẽ. Bala mam yãa m nebã namsgã. B kɛlengã taa maam.”+ 17 A Sãmwɛll sẽn yã a Sayullã, a Zeova yeel-a lame yaa: “Ad rao ning yell mam sẽn da gom ne foo n yeel tɩ yẽ n na n soog m nebã.”+

18 A Sayull kolga a Sãmwɛll tẽngã rignoorẽ n yeel-a yaa: “Y kabre, gɛtã yir yaa yɛ?” 19 A Sãmwɛll leoka a Sayull yaa: “Yaa maam la gɛtã. Reng mam taoor zĩ-zãntgẽ* wã, tɩ fo na n naaga maam n dɩ rũndã.+ Beoog yibeoogo, m na n kõ-f-la sore. La m na n togs-f-la bũmb ning fãa fo sẽn dat n bãngã.* 20 Sã n yaa ne bõensã sẽn menem rab-tãtẽ wã,+ da maan yɩɩr tɩ b yã-b lame. Sẽn paase, bõn-sõma wã fãa sẽn be Israyɛllã yaa ãnd n so? Pa foom ne f ba wã zak rãmb fãa la?”+ 21 A Sayull sẽn wʋm dẽ, a leokame yaa: “Mam yaa Bẽnzame buudã sẽn yaa bilf n yɩɩd Israyɛll buudã fãa sʋkã+ neda. Sẽn paase, Bẽnzame buudã pʋgẽ, tõnd roogã rãmb n yaa bilf n yɩɩda. Dẽ wã, bõe yĩng tɩ yãmb gomd ne maam a woto?”

22 Dẽ, a Sãmwɛll peega a Sayull ne a tʋm-tʋmdã n tɩ kẽes rɩɩbã roogẽ, n zĩnig-b neb nins b sẽn boolã taoore. Yɩɩ na maan neb pis-tã. 23 A Sãmwɛll yeela rɩ-segendã yaa: “Rɩk nemd ning mam sẽn da kõ foom tɩ f bĩngã n wa ne.” 24 Rɩ-segendã tɩ tebga gerã ne bũmb ning sẽn da be a zugã n wa rɩgl a Sayull taoore. La a Sãmwɛll yeelame: “B sẽn da bĩng bũmb ningã la b sẽn dɩgl fo taoorã. Wãb tɩ b bĩng-a-la foo wakat kãngã yĩnga. Bala mam da yeel-b lame yaa: ‘Mam boola neb tɩ b wa.’” Dẽ, a Sayull naaga a Sãmwɛll n dɩ daar-n-kãnga. 25 Rẽ poore, b yii zĩ-zãntgẽ* wã+ n kẽng tẽngã pʋgẽ. La a Sãmwɛll ra ket n gomda ne a Sayull roogã zugu. 26 B yika tõd-beoogo, la zĩigã sẽn wa n yẽegdẽ, a Sãmwɛll boola a Sayull roogã zug n yeel-a yaa: “Segl f meng tɩ m kõ-f sor tɩ f looge.” Dẽ, a Sayull segla a menga, tɩ yẽ ne a Sãmwɛll yi yɩnga. 27 Bãmb sẽn wa n sigd n yit tẽngã, a Sãmwɛll yeela a Sayull yaa: “Yeel tʋm-tʋmdã+ t’a reng tõnd taoore. La fo pa ka tɩ m togs-f Wẽnnaam gomde.” Woto, tʋm-tʋmdã renga taoore.

10 A Sãmwɛll rɩka kaam ne tʋk n kɩrg a Sayull zugã,+ la a mok-a n yeele: “Hakɩɩka, a Zeova yãka* foom tɩ f na n yɩ a nin-buiidã*+ naaba.+ 2 Rũndã, fo sã n yi mam nengẽ, fo na n tɩ yãa rap a yiib sẽn be a Rasɛll yaoogã+ sɛɛg Zɛlza, Bẽnzame buudã soolmẽ wã. B na n yeela foom yaa: ‘B yãa bõensã fo sẽn da kẽng n na n tɩ bao wã. La masã, f baaba basa bõensã yell tagsg+ n maand yɩɩr yãmb yĩnga. A yetame yaa: “Mam na n maana a wãn n yã m biigã?”’ 3 Sãag n ta hal Taboor tɩ-bedrẽ wã tɩ f na n sega rap a tãab sẽn dabd Wẽnnaam nengẽ Betɛlle.+ A yembr tɛta bulli a tãabo, t’a to zãad bur a tãabo, tɩ b nin-yend zɩt divẽ ne yʋ-bedre. 4 Bãmb na n soka fo keelem, la b kõ foom bur a yiibu. Fo segd n deega burã b sẽn na n kõ foomã. 5 Rẽ poore, fo na n kẽnga Wẽnnaam kunkubrẽ wã, Filisti nebã tãb-biis sullã sikã sẽn beẽ wã. Fo sã n kẽ tẽngã pʋgẽ, fo na n sega no-rɛɛsdb sull sẽn yi zĩ-zãntgẽ* wã n watẽ, la neb n na n be b taoor n wẽed yʋʋm-teoog sẽn tar rissi, bembengo,* wɩɩg la pɛndga, tɩ b togsd bãngr-goama. 6 A Zeova vʋʋsmã na n kẽe foo+ tɩ f naag bãmb n togs bãngr-goama, la fo na n toeemame n lebg ned a to.+ 7 Bõn-kãensã fãa sã n wa pidsi, bɩ f maan f sẽn tõe fãa tɩ Wẽnnaam bee ne foom. 8 Rẽ poore, bɩ f reng maam Gilgall+ tɩ m na n babsa foo beenẽ n wa maan maand sẽn yõogd bugum ne zems-n-taar maando. Fo segd n gũu rasem a yopoe hal tɩ m wa. Rẽ, mam na n wilga foom f sẽn segd n maanega.”

9 A Sayull sẽn wẽnemd bal t’a na n loog n bas a Sãmwɛlle, Wẽnnaam sɩnga a sũurã toeengo, la bãn nins fãa a Sãmwɛll sẽn wilgã pidsa baraare. 10 Dẽ, b yii be n kẽng kunkubrẽ wã, la no-rɛɛsdb sull n seg a Sayulli. Zĩig pʋgẽ, Wẽnnaam vʋʋsem sõngã kẽ-a lame+ t’a naag-b n sɩng bãngr-goam togsgo.+ 11 Neb nins fãa sẽn da mi a Sayullã sẽn yã t’a naaga no-rɛɛsdbã n togsd bãngr-goamã, b soka taab yaa: “Yaa bõe n tar a Kis biigã? A Sayull me yaa no-rɛɛs la?” 12 Dẽ, beenẽ dao a yembr yeelame yaa: “B ba wã yaa ãnda?” La bõn-kãng lebga gomd nebã sẽn mi n yetẽ: “A Sayull me yaa no-rɛɛs la?”+

13 A Sayull sẽn togs bãngr-goamã n sa, a kẽnga zĩ-zãntgẽ* wã. 14 A Sayull ba wã ba-biig soka a Sayull ne a tʋm-tʋmdã yaa: “Yãmb da kẽnga yɛ?” T’a leok yaa: “Tõnd da kẽng n na n tɩ baoo bõensã+ la d pa yã-b ye. La d kẽnga a Sãmwɛll nengẽ.” 15 T’a Sayull ba wã ba-biig yeel yaa: “M bõos tɩ f togs-ma. Bõe la a Sãmwɛll yeel yãmba?” 16 T’a Sayull leoke: “A yeela tõnd tɩ b zoe n yãa bõensã.” La a Sayull pa togs-a a Sãmwɛll sẽn yeel bũmb ning naamã wɛɛngẽ wã ye.

17 A Sãmwɛll boola nin-buiidã n tigim b fãa a Zeova taoor Mizpa,+ 18 n yeel Israyɛll nebã yaa: “Ad a Zeova sẽn yaa Israyɛll Wẽnnaamã sẽn yeele: ‘Yaa maam n yiis Israyɛll nebã Ezɩpti, la m fãag yãmb Ezɩpt nebã nugẽ+ la soolem nins fãa sẽn da namsd yãmbã nusẽ. 19 La rũndã, yãmb daaga y Wẽnnaamã sẽn fãag yãmb ne y toogã la y namsgã fãa wã n base.+ Yãmb yeelame yaa: “Ayo, yãk-y rĩm sẽn na n soog tõnd n kõ-do.” Dẽ wã, yals-y-yã a Zeova taoor buud-buudu, la roog-roogo.’”*

20 Woto, a Sãmwɛll kɩtame tɩ Israyɛll buud toɛy-toɛyã fãa kolge.+ La b yãka Bẽnzame buudã.+ 21 La b kɩtame tɩ Bẽnzame buudã neb roog fãa kolge, la b yãka a Matri roogã neba. Sẽn na n baase, b yãka a Kis biig a Sayulli.+ La b sẽn kẽng n na n tɩ bao-a wã, b pa yã-a ye. 22 Dẽ, b soka a Zeova yaa:+ “Raoã nan pa wa ka la?” T’a Zeova leoke: “A solga teedã sʋka.” 23 B zoeeme n kẽng n tɩ tall-a n wa. A sẽn ta n yals nebã sʋkã, neb nins fãa sẽn be be wã woglem tekda a bãgdẽ wã.+ 24 A Sãmwɛll yeela nebã fãa yaa: “Yãmb yãa ned ning a Zeova sẽn yãkã bɩ?+ Nin-buiidã fãa sʋka, ned kae n yaa wa yẽ ye.” La nebã fãa sɩnga kaasg n yetẽ yaa: “Wẽnd na kaoos rĩmã!”

25 Dẽ, a Sãmwɛll goma rĩm fãa sẽn tar sor n na n maanã+ yell ne nin-buiidã, la a gʋls sebr zug n dɩgl a Zeova taoore. Rẽ poore, a Sãmwɛll kɩtame tɩ ned kam fãa kuil a yiri. 26 A Sayull me leba a yir Gibeya, la gãndaad nins a Zeova sẽn keng b pelsã yãag-a lame. 27 La rap sẽn ka võor n zĩnd be n yeel yaa: “Nin-kãngã yɩta wãn n fãag tõndo?”+ Bãmb sãbs-a lame n pa tall kũun n wa kõ-a ye.+ La a Sayull pa leok-b tɩ bũmb ye.*

11 Amon nebã rĩm a Nahaas+ wa n tilga a tãb-sik Zabɛs+ sẽn be Galaad soolmẽ wã n na n zab ne-a. Zabɛs rapã fãa yeela a Nahaas yaa: “Maan kaool ne tõnd tɩ d na n sak n lebga f tʋm-tʋmdba.” 2 La Amon nebã rĩm a Nahaas yeel-b lame yaa: “Mam na n sak n maana kaool ne yãmba, la yaa yãmb sã n sak bõn-kãngã: Yãmb segd n sakame tɩ b kɩdg yãmb ned kam fãa rɩtg nifri. Mam na n maana woto n ning Israyɛll fãa yãnde.” 3 Zabɛs kãsem-dãmbã yeel-a lame yaa: “Kõ tõnd rasem a yopoe, tɩ d tʋm koe-taasdb Israyɛll soolmã fãa pʋgẽ. Rẽ, d sã n pa paam ned sẽn na n fãag-do, d na sak yãmb daabã.” 4 Koe-taasdbã wa n taa a Sayull ba-yirã Gibeya,+ n togs nin-buiidã gom-kãensã, tɩ nebã fãa zẽk b koees n yãb ne b pãng fãa.

5 Wakat kãng t’a Sayull ra yii weoogẽ wã n wat ne niisi, n sok yaa: “Yaa bõe n tar nin-buiidã? Bõe yĩng tɩ b wiisdẽ?” B togs-a-la koɛɛg ning Zabɛs rapã sẽn wa ne wã. 6 A Sayull sẽn wʋm dẽ, Wẽnnaam vʋʋsem sõngã kẽ-a lame+ t’a sũur yiki. 7 Dẽ, a yãka lols a yiib n kʋ n beese, n kõ koe-taasdbã tɩ b tall n saag Israyɛll soolmã fãa pʋgẽ n yeel yaa: “Ned ning fãa sẽn pa na n pʋg a Sayull ne a Sãmwɛlle, bɩ a bãng tɩ b na n beesa a niisã woto!” La a Zeova rabeem kẽe nebã tɩ b fãa yi wa nin-yɛng n na n kẽng zabrã. 8 A Sayull sõda nebã Bezɛke, n mik tɩ Israyɛll nebã yaa tus-kobs-tã, tɩ Zida nebã sõor yaa tus-pis-tã. 9 Bãmb yeela koe-taasdbã sẽn wa wã yaa: “Ad yãmb sẽn segd n leb Zabɛs sẽn be Galaad soolmẽ wã n tɩ yeel nebã: ‘Beoogo, wĩndgã sã n wa zẽke, y na n paama fãagre.’” Dẽ, koe-taasdbã lebg n tɩ togsa Zabɛs nebã, la b sũy yɩɩ noog wʋsgo. 10 Woto, Zabɛs nebã yeela Amon nebã yaa: “Beoogo, tõnd na n saka yãmb daabã, tɩ y maan tõnd bũmb ning fãa y sẽn date.”+

11 Vẽkembeoogã, a Sayull pʋɩɩ nebã sul a tã, la bãmb kẽe Amon nebã+ tãb-sikẽ beoogã sẽn wa n kolg vẽegre,* n kʋ-b hal n tãag wĩnto-sʋka. Sẽn põs-bã zoe n sãeegame hal tɩ ned baa a ye pa tũ a to ye. 12 Dẽ, nebã yeela a Sãmwɛll yaa: “Yaa ãnd dãmb la sẽn da yet t’a Sayull pa tõe n yɩ tõnd rĩmã?+ Tall-y-b n wa tɩ d kʋ.” 13 La a Sayull yeelame yaa: “Rũndã, b pa na n kʋ ned baa a yembr ye.+ Bala a Zeova fãaga Israyɛll rũndã.”

14 Rẽ poor bilfu, a Sãmwɛll yeela nin-buiidã yaa: “Wa-y tɩ d kẽng Gilgall+ n tɩ maneg n moon naamã.”+ 15 Dẽ, nebã fãa kẽnga Gilgall n tɩ kõ a Sayull naamã a Zeova taoore. Bãmb maana zems-n-taar maand be, a Zeova taoore.+ A Sayull ne Israyɛll nebã fãa maana tig-kãsenga, n kɩdem sũ-noogo.+

12 Sẽn na n baase, a Sãmwɛll yeela Israyɛll nebã fãa yaa: “Ade! Mam maana bũmb nins fãa yãmb sẽn kos maamã. Mam yãka rĩm t’a na n soog yãmba.+ 2 Masã, ad rĩm ning sẽn na n lʋɩ yãmb taoorã.*+ Sã n yaa ne maam, mam lebga nin-kẽem tɩ m zug pelge. M kom-dibli wã me la sẽn be ne yãmbã.+ Mam lʋɩɩ yãmb taoor hal m yãadem tɛk n tãag rũndã.+ 3 Ad-ma! Kõ-y kaset a Zeova taoore, la rĩm ning a sẽn yãkã*+ taoore: Ãnd naaf wall ãnd bõang la m deeg-yã?+ Ãnd soab la m wẽg-yã, ãnda soab la m maan pãnga? Ãnda soab nengẽ la mam deeg noor-madgr n kao bʋʋd kɛgre?+ Togs-y maam tɩ m bao n lebs a soaba.”+ 4 La nebã leokame yaa: “Yãmb pa wẽg tõndo, y pa maan tõnd pãnga, wall y reeg bũmb ned nugẽ ye.” 5 Rẽ la a yeel-b yaa: “A Zeova yaa kaset maam ne yãmb sʋka, la ned ning a sẽn yãkã* me yaa kaseto, tɩ rũndã daarã yãmb pa yã bũmb n dõd maam ye.”* Tɩ b leok yaa: “A yaa kaseto.”

6 A Sãmwɛll yeela nin-buiidã yaa: “A Zeova, soab ning sẽn yãk a Moyiiz ne a Aarõ, la a tall yãmb yaab-rãmbã n yi Ezɩpt soolmẽ wã+ yaa kaseto. 7 Masã, yals-y tɩ mam bʋ ne yãmb a Zeova taoore, sẽn kẽed ne tɩrlem tʋʋm nins fãa a Zeova sẽn tʋm yãmb ne y yaab-rãmbã neer yĩngã.

8 “A Zakoob sẽn wa Ezɩptã tɛka,+ tɩ yãmb yaab-rãmbã sɩng a Zeova boolg n kot sõngrã,+ a Zeova tʋma a Moyiiz+ ne a Aarõ tɩ b lʋɩ yãmb yaab-rãmbã taoore, n yiis-b Ezɩpt n tall-b n wa zĩnig kaanẽ.+ 9 La b yĩma a Zeova sẽn yaa bãmb Wẽnnaamã yelle, tɩ yẽ me bas-b*+ a Sisera+ sẽn yaa Hazoor tãb-biisã naabã nugẽ, la Filisti nebã+ ne Mowaab rĩmã+ nugẽ, tɩ b zab ne-ba. 10 Sasa kanga, bãmb boola a Zeova n kos sõngr+ n yeele: ‘Tõnd beegame,+ bala tõnd basa a Zeova n tũ Baal-dãmba,+ la d pʋʋs a Astarte+ bõn-naandse. Masã, fãag-y tõnd d bɛɛbã nusẽ tɩ d tũ yãmba.’ 11 Woto, a Zeova tʋma a Zerubaalle,+ a Bedan* ne a Zɛfte+ la a Sãmwɛll+ n fãag yãmb y bɛɛbã sẽn gũbg yãmbã fãa nusẽ, sẽn na yɩl tɩ y zĩnd bãane.+ 12 Yãmb sẽn wa n yã Amon nebã rĩm a Nahaas+ sẽn wa n na n zab ne yãmbã, baa y Wẽnnaam a Zeova sẽn yaa yãmb Rĩmã,+ yãmb pẽdgame n yeel maam yaa: ‘Tõnd we n paam dĩm sẽn na n soog tõndo!’+ 13 Masã, ad rĩm ning yãmb sẽn da baoodã, a soab ning yãmb sẽn kosã. Ade! A Zeova yãka rĩm t’a na n soog yãmba.+ 14 Yãmb sã n zoe a Zeova,+ n tũ-a+ la y sak a sẽn yetã,+ n pa kɩɩs a Zeova noorã, tɩ yãmb ne rĩm ning sẽn so yãmbã fãa tũ Wẽnnaam a Zeova, y yɛlã na n yɩɩ sõma. 15 La yãmb sã n pa sak a Zeova sẽn yetã, n kɩɩs a Zeova noorã, a Zeova na n sɩbga yãmb ne y ba-rãmbã.+ 16 Masã, yals-y n ges-y bõn-kãseng ning a Zeova sẽn na n maan yãmb nifẽ. 17 Pa bɩle kẽebg wakat sɩda? Mam na n kosa a Zeova t’a tʋm sa-tãs la saaga. Woto, yãmb na n bãngame la y sak n deeg tɩ yãmb sẽn kos rĩmã, y maana bũmb sẽn yaa wẽng wʋsg a Zeova nifẽ.”+

18 Dẽ, a Sãmwɛll kosa a Zeova, la a Zeova tʋma sa-tãs la saag baraare, hal tɩ rabeem-kãseng yõk nebã fãa, a Zeova ne a Sãmwɛll yĩnga. 19 La nin-buiidã fãa yeela a Sãmwɛll yaa: “Pʋʋs-y-yã a Zeova sẽn yaa yãmb Wẽnnaamã y tʋm-tʋmdbã yĩnga,+ tɩ d ra ki ye. Bala tõnd sẽn kos rĩmã, d maana wẽng n paas d yel-wẽnã sõore.”

20 La a Sãmwɛll yeela nin-buiidã yaa: “Da zoe-y rabeem ye. Yãmb sɩd maana bõn-kãensã fãa sẽn yaa wẽng wʋsgã. La sẽn be bala, ra wẽnemd-y n bas-y-yã a Zeova tũub ye.+ Maan-y-yã a Zeova raabã ne y sũur fãa.+ 21 Ra wẽnemd-y n tũ-y wẽn-faadã+ sẽn pa tar yõodo,+ la sẽn pa tõe n fãag yãmbã ye. Bala bãmb ka võor ye. 22 A Zeova yʋ-kãsengã yĩnga,+ a pa na n bas a nin-buiidã ye.+ Bala yaa a Zeova meng n yãk yãmb tɩ y na n yɩ a nin-buiidu.+ 23 Sã n yaa ne maam, mam pa na n saag n pa le pʋʋs a Zeova n kõ yãmba, n beeg-a ye. La mam na n ket n wilgda yãmb sẽn segde, la sẽn yaa tɩrga. 24 Bũmb sẽn be bala, zoe-y-yã a Zeova,+ la y tũ-a ne pʋ-peelem* la ne y sũur fãa. Ra yĩm-y bõn-kãsems nins a sẽn maan n kõ yãmbã ye.+ 25 La yãmb sã n yãk yam n maan wẽnga, a na n menesa yãmb+ ne y rĩmã fãa.”+

13 A Sayull sẽn wa n deeg naamã+ t’a tara yʋʋm . . . ,* la a rɩɩ naam Israyɛll yʋʋm a yiibu. 2 A Sayull yãka Israyɛll rap tus a tãabo. Bãmb sʋkã neb tus a yiib n da be ne a Sayull Mikmaas la soolmã zĩig ning sẽn yaa tãensã sẽn be Betɛllã, tɩ bãmb tusr be ne a Zonatã+ Gibeya,+ Bẽnzame soolmẽ wã. A Sayull kɩtame tɩ neb nins sẽn ketã ned kam fãa lebg n kuil a yiri. 3 A Zonatã kʋʋ Filisti nebã+ tãb-biis sullã sẽn da be Geba+ wã tɩ Filisti nebã wʋme. La a Sayull kɩtame tɩ b peeb baorg+ soolmã fãa pʋgẽ n yeel yaa: “Bɩ Ebre-rãmbã kelge!” 4 Israyɛll nebã fãa wʋma koe-kãngã: “A Sayull kʋʋ Filisti nebã tãb-biis sulli, la Israyɛll nebã lebga wa bõn-põosg Filisti nebã nifẽ.” Dẽ, bãmb boola nin-buiidã fãa n tigim a Sayull nengẽ Gilgalle.+

5 Filisti nebã me tigma taab n na n zab ne Israyɛll nebã. B zabr saar-dãmbã* sõor da yaa tus-pis-tã, tɩ b wed-rʋʋdbã sõor da yaa tus a yoobe. B tãb-biisã sõor da yaa wʋsg wa bĩisrã sẽn be mogrã noorã.+ Bãmb tɩ tilga b tãb-sikã Mikmaase, Bɛt-avɛn+ yaanga. 6 Israyɛll nebã bãngame tɩ b bee yell pʋgẽ, bala bɛɛbã ra rɩdg-b lame tɩ b zoe n tɩ kẽ tãens bogdẽ,+ londẽ, pĩisẽ, bogd b sẽn tu rot pʋsẽ, la b tɩ soond bulsẽ. 7 Ebre-rãmbã neb kẽer meng rʋʋga Zʋrdẽ kʋɩlgã n kẽng Gaad la Galaad soolmẽ wã.+ La a Sayull ra keta Gilgalle, tɩ neb nins sẽn da tũud-a wã fãa rigd rabeem. 8 A Sayull gũume n tãag rasem a yopoe, wakat ning a Sãmwɛll sẽn da yãkã. La a Sãmwɛll pa wa Gilgalle, tɩ nin-buiidã ra sãeegd n basd a Sayulli. 9 A Sayull wa n baas n yeelame yaa: “Tall-y maoong sẽn yõogd bugmã ne zems-n-taar maandã rũms n wa kõ maam.” Dẽ, yẽ maana maoong sẽn yõogd bugmã.+

10 La yẽnda sẽn maan maoong sẽn yõogd bugmã n sa bal la a Sãmwɛll sẽn wa. A Sayull seg-a lame n pʋʋs-a. 11 Rẽ la a Sãmwɛll sok-a yaa: “Yaa bõe la fo sẽn maanã?” T’a Sayull leoke: “Mam yãame tɩ nin-buiidã sãeegdame n basd maam+ tɩ fo-me pa wa wakat ning f sẽn yãkã ye. Sẽn paase, Filisti nebã ra tigimda taab Mikmaase.+ 12 Dẽ, mam tagsame tɩ Filisti nebã na n wa zaba ne tõnd Gilgall tɩ mam yaool n nan pa kos a Zeova sõngr ye. Rẽ n so tɩ mam ges tɩ yaa tɩlɛ tɩ m maan maoong sẽn yõogd bugmã.”

13 La a Sãmwɛll yeela a Sayull yaa: “Fo maana yalemdo. Fo pa tũ noor ning fo Wẽnnaam a Zeova sẽn kõ foomã ye.+ Fo sã n da tũ noorã, a Zeova ra na n kɩtame tɩ fo rĩungã kaoos wakat fãa yĩng Israyɛlle. 14 La masã, fo rĩungã pa na n kaoos ye.+ A Zeova na n baoo ned a sũurã sẽn noom ne,+ la a Zeova na n kɩtame tɩ yẽ lebg a nin-buiidã taoor soaba.+ Bala fo pa sak n tũ a Zeova sẽn yeel foomã ye.”+

15 Woto, a Sãmwɛll yikame n yi Gilgall n kẽng Gibeya sẽn be Bẽnzame soolmẽ wã. A Sayull sõda nin-buiidã. Rap nins sẽn da ket n be ne-a wã sõor da zemsa kobs-yoobe.+ 16 A Sayull ne a biig a Zonatã n paas rap nins sẽn da be ne-bã ra bee Geba,+ Bẽnzame soolmẽ wã, tɩ Filisti nebã ra tilg b tãb-sikã Mikmaase.+ 17 Filisti nebã tãb-biis sul a tã n da yit b tãb-sikã zĩigẽ. A ye da teesda sor ning sẽn dabd Ofra, Suwall soolmẽ wã, 18 t’a to wã ra teesd Bɛt-horon+ sorã, tɩ tãab-n-soabã rɩkd sor ning sẽn dabd toadgã sẽn tees Zeboyim longã, we-raoogã sẽnese.

19 Sãe ra pa le be Israyɛll soolmẽ wã ye. Bala Filisti nebã ra pa rat tɩ Ebre-rãmbã kud sʋʋs la kãn ye. 20 Ra lebga tɩlɛ tɩ Israyɛll nebã kẽnd Filisti nebã nengẽ n toosd b wãgsã la b soensã, la b saasd b layã ne b goetã. 21 Bãmb da yaooda pĩm* a yembr b wãgsã ne b soensã toosg yĩnga, n paas b tʋʋm-teed nins sẽn tar yẽn a tãabo, ne b layã la b niisã bãn-sɩlemsã manegr yĩnga. 22 Zabrã daare, rap nins sẽn da be ne a Sayull la a Zonatã wã baa a ye ra pa zãad sʋʋg wall kãnd ye.+ Yaa a Sayull ne a biig a Zonatã bal n da tar zab-teedo.

23 Filisti nebã tãb-biisã sull a yembr da yiime n kẽng Mikmaas tãngã zĩ-longẽ wã.+

14 Daar a ye, a Sayull biig a Zonatã+ yeela a sõangdã sẽn da zãad a zab-teedã yaa: “Wa tɩ d pɩʋʋg n kẽng Filisti nebã sik-bilã sẽn beẽ wã.” La a ra pa togs a ba wã ye. 2 A Sayull ra tilga a tãb-sikã Gibeya+ toadgã sɛɛgẽ, gernaad tɩɩg ning sẽn be Migronnã tẽngre, tɩ neb nins sẽn da be ne-a wã sõor zems kobs-yoobe.+ 3 (Wakat kãng tɩ yaa a Ahiya n da yeelg efoodã.*+ A Ahiya ra yaa a Ikabood+ ba-biig a Ayituub+ biiga, t’a Ayituub yaa a Fineyaas+ biiga, t’a Fineyaas yaa a Zeova maan-kʋʋd a Eli+ sẽn da be Sɩlo+ wã biiga.) La nin-buiidã ra pa mi t’a Zonatã loogame ye. 4 Pĩis a yiib sẽn wõnd yẽnd n da be a Zonatã sẽn da rat n tũ zĩig ning n pɩʋʋg n kẽng Filisti nebã tãb-sikẽ wã goabg la rɩtgo. B boonda a yembr tɩ Bozɛɛz, n boond a to wã tɩ Sene. 5 Pĩig a yembr da lugame n be rɩtgo, n tees Mikmaase, t’a to wã be goabg n tees Geba.+

6 A Zonatã yeela sẽn da zãad-a yẽ zab-teedã yaa: “Wa tɩ d pɩʋʋg n kẽng nin-kãensã sẽn pa kẽ bãongã+ sik-bilẽ wã, tɩ tõe t’a Zeova sõng-do. Bala bũmb pa be n tõe n gɩdg a Zeova t’a pa tũnug ne neb bilf wall neb wʋsg n fãag a nebã ye.”+ 7 La sẽn zãad-a yẽ zab-teedã leokame yaa: “Fo sẽn dat n maan bũmb ning fãa bɩ f maane. Tees zĩig ning fãa fo sẽn date, tɩ fo sẽn na n kẽngẽ fãa, mam na n tũ-f lame.” 8 Dẽ, a Zonatã yeelame: “D na n pɩʋʋg n kẽnga nin-kãensã nengẽ, n tɩ maan tɩ b yã-do. 9 Bãmb sã n yeel tõnd tɩ d yals tɩ b wa, d na n yalsa d sẽn beẽ wã n pa kẽng b nengẽ ye. 10 La b sã n yeel tõnd tɩ d wa zab ne-ba, d na n kẽngame. Bala yaa bãnd sẽn wilgd t’a Zeova na n ning-b-la tõnd nugẽ.”+

11 Dẽ, bãmb b yiibã fãa likame tɩ Filisti nebã sẽn be b sik-bilẽ wã yã-ba, n yeele: “Ges-y-yã! Ebre-rãmbã yita bogd nins pʋsẽ b sẽn da solgã.”+ 12 Filisti nebã paa b tãb-sikẽ wã n yeel a Zonatã ne ned ning sẽn zãad a zab-teedã yaa: “Wa-y ka tɩ y na bãnge!”+ Zĩig pʋgẽ, a Zonatã yeela sẽn da zãad-a yẽ zab-teedã yaa: “Pʋg maam t’a Zeova na n ning-b-la Israyɛll nugẽ.”+ 13 A Zonatã tee ne a nao la a nus n dʋ, tɩ sẽn da zãad-a yẽ zab-teedã be a poorẽ. A Zonatã sɩnga Filisti nebã vargre, tɩ sẽn da zãad-a yẽ zab-tẽedã pʋgd n baasd-ba. 14 Pipi zab-kãngã pʋgẽ, a Zonatã ne sẽn da zãad-a yẽ zab-teedã kʋʋ sẽn ta neb 20, n pa zab n zãag zĩig meng ye.*

15 Dẽ, rabeem-kãseng yõka Filisti nebã b sikã zĩigẽ, ne tãb-biis nins sẽn da be pĩigẽ wã. Baa tãb-biis sul nins sẽn da yit n tɩ zabd ne Israyɛllã+ yɛɛsame. Tẽngã sɩnga rigimdgu, la Wẽnnaam kɩtame tɩ rabeem-kãseng yõk-ba. 16 A Sayull gũudbã sẽn da be ne-a Gibeya+ sẽn be Bẽnzame soolmẽ wã yãame tɩ bɛɛbã tãb-sikã fãa ra gudgdame.+

17 A Sayull yeela nebã yaa: “M bõos tɩ y sõd nebã n ges ãnd n pa be tõnd sʋka.” B sẽn sõdã, b mikame t’a Zonatã ne ned ning sẽn zãad a zab-teedã pa be ye. 18 A Sayull yeela a Ahiya+ yaa: “Tall Wẽnnaam koglgã n kolge!” (Bala Wẽnnaam koglgã ra bee ne Israyɛll nebã wakat kãnga.*) 19 A Sayull sẽn wa n gomd ne maan-kʋʋdã, gudgrã ra paamda pãng Filisti nebã tãb-sikã zĩigẽ n paasdẽ. Dẽ, a Sayull yeela maan-kʋʋdã yaa: “Bas fo sẽn maandã.”* 20 Woto, a Sayull ne neb nins fãa sẽn da be ne-a wã tigma taab n kẽng zabrã zĩigẽ, n tɩ mik tɩ Filisti nebã wẽneg n keeda taab ne b sʋʋsã, tɩ zũnd-zãndã ra yaa wʋsgo. 21 Sẽn paase, Ebre-rãmb nins sẽn da teel Filisti nebã, n da tũ-b n wa b sikã zĩigẽ wã lebg n wa naaga Israyɛll nebã sẽn be ne a Sayull la a Zonatã wã. 22 Israyɛll neb nins fãa sẽn da tɩ solg+ Efrayim soolmã zĩig ning sẽn yaa tãensã wʋmame tɩ Filisti nebã zoeeme, tɩ bãmb me naag n pʋgl-b n na n zabe. 23 A Zeova fãaga Israyɛll nebã baraare.+ La Israyɛll nebã zaba zabrã n tãag hal Bɛt-avɛn.+

24 Baraare, Israyɛll nebã ra namsda wʋsgo, bala a Sayull ra kãaba nin-buiidã fãa yĩng n yeel yaa: “Ned ning fãa sẽn na n lemb dɩɩb* tɩ zaabr nan pa ta, la tɩ mam nan pa rok m sũur ne m bɛɛbã, bɩ kãab-wẽng zĩnd a zugu!” Woto yĩnga, ned baa a ye pa tol n dɩ rɩɩb baraar ye.+

25 La nebã fãa kẽnga weoogã pʋgẽ n tɩ yã sɩɩd sẽn be tẽnga. 26 Nebã sẽn kẽng weoogẽ wã, b yãa sɩɩdã sẽn tosde, la ned baa a ye pa lemb-a ye. Bala b ra zoeta a Sayull kãabgã. 27 La a Zonatã ra pa wʋm a ba wã sẽn da kãab nebã fãa yĩngã ye.+ Dẽ, a tẽega a rasaarã a sẽn da zãadã n tõk sɩ-vakã n dɩ. A sẽn dɩ wã, a paama pãnga.* 28 La nin-buiidã nin-yend yeelame yaa: “F baaba kãaba nebã fãa yĩng n yeel tɩ ‘ned ning sẽn na n dɩ rɩɩb rũndã, bɩ kãab-wẽng zĩnd a zugu.’+ Yaa rẽ yĩng la yaamsã sẽn tar nebã.” 29 Dẽ, a Zonatã yeelame: “M baaba baoo yel-kãseng n kõ nebã. Ges-y mam sẽn paam pãng* m sẽn lemb sɩɩdã bilf balã. 30 B sã n da basẽ tɩ nebã rɩ+ bũmb nins b sẽn zɛ b bɛɛbã nengẽ wã, tõnd da kõn kʋ Filisti nebã wʋsg n yɩɩg woto sɩda?”

31 Baraare, b kell n kʋʋ Filisti nebã Mikmaas n tãag Ayalon,+ la yaamsã wʋma nebã. 32 La nebã sɩnga teedã zɛɛb ne yão-beedo. B yãka piis ne niis la nag-bi n kood-b tẽnga, n wãb nemdã ne zɩɩmã.+ 33 B wa n togsa a Sayull yaa: “Ges-y-yã! Nebã wãbda nemd ne zɩɩm n beegd a Zeova.”+ Rẽ la a Sayull yeel-b yaa: “Yãmb maana yel-wẽn-kãsenga. Bilm-y kug-bedr n wa kõ maam tao-tao.” 34 A Sayull yeelame: “Saag-y nin-buiidã sʋk n yeel-b tɩ b ned kam fãa tall a loalg wall a pesg n wa kodg ka, n yaool n wãbe. Da wãb-y nemd ne zɩɩm+ n beeg a Zeova ye.” Dẽ, bãmb ned kam fãa talla a loalg n wa kodg be yʋn-kãnga. 35 La a Sayull mee tẽn-kugr a Zeova yĩnga.+ Yɩɩ pipi la woto a sẽn me tẽn-kugr a Zeova yĩnga.

36 Rẽ poor bilfu, a Sayull yeelame: “Wa-y tɩ d pʋgl Filisti nebã yʋngã, n zɛ b teedã hal tɩ beoogã vẽege. D pa na n bas baa nin-yend t’a põs ye.” La nebã leokame yaa: “Maan-y yãmb sẽn date.” La maan-kʋʋdã yeelame yaa: “Wa-y tɩ d sok Wẽnnaam ka.”+ 37 La a Sayull soka Wẽnnaam yaa: “M pʋgl Filisti nebã bɩ?+ Yãmb na n ning-b-la Israyɛll nugẽ bɩ?” La Wẽnnaam pa leok-a baraar ye. 38 Rẽ la a Sayull yeel-yã: “Nin-buiidã taoor dãmb fãa, wa-y ka tɩ d bao n bãng ned ning sẽn maan yel-wẽnd rũndã wã. 39 Mam wẽenda ne a Zeova sẽn yaa Wẽnnaam ning sẽn vɩ wã, la sẽn fãag-a Israyɛllã tɩ baa yaa mam biig a Zonatã n maan yellã, a segd n kiime.” La nin-buiidã ned baa a ye pa leok-a ye. 40 A yeela Israyɛll nebã fãa yaa: “Yãmb na n yalsa toore, tɩ maam ne m biig a Zonatã me yals toore.” La nin-buiidã leoka a Sayull yaa: “Maan-y sẽn ta yãmb yam.”

41 A Sayull yeela a Zeova yaa: “Israyɛll Wẽnnaam, bɩ y leok ne Tumimmã!”*+ Dẽ, b yãka a Sayull ne a Zonatã tɩ taalã yi nin-buiidã zugu. 42 A Sayull yeelame: “Maan-y bãnde,+ n bãng sã n yaa maam bɩ m biig a Zonatã n tar taale.” La bãndã yãka a Zonatã. 43 A Sayull yeela a Zonatã yaa: “Togs maam. Yaa bõe la fo maan-yã?” La a Zonatã yeel-a lame yaa: “Yaa sɩɩd bilf bal la mam tõk ne rasaarã sẽn be m nugẽ wã n lembe.+ Ad maam! Kʋ-y-ma!”

44 T’a Sayull yeel yaa: “Zonatã, mam sã n pa kʋ foom bɩ Wẽnnaam sɩbg maam ne sɩbg-kãsenga.”+ 45 La nebã yeela a Sayull yaa: “B segd n kʋʋ a Zonatã sɩda? Ned ning sẽn kɩt tɩ Israyɛll tõog a bɛɛbã ne tõogr sẽn yaa kãsengã?+ Pa saagd ye! Tõnd wẽenda ne a Zeova sẽn vɩ wã, t’a zoobg meng pa na n lʋɩ tẽng ye. Bala yaa ne Wẽnnaam sõngr la a sẽn kɩt tɩ tõnd tõog zabrã rũndã wã.”+ Woto, nebã fãaga a Zonatã tɩ b pa kʋ-a ye.

46 Dẽ, a Sayull basa Filisti nebã rigbu, la Filisti nebã leba b soolmẽ.

47 A Sayull paasa a naamã pãng Israyɛlle. La a zaba ne a bɛɛbã zĩig fãa. A zaba ne Mowaab nebã,+ Amon nebã,+ Edom nebã,+ Zoba rĩm-dãmbã,+ la Filisti nebã.+ A sẽn kẽngẽ fãa, a tõogdame. 48 A zaba ne raood n tõog Amalɛk nebã,+ n fãag Israyɛll nebã, neb nins sẽn da fãad bãmbã nusẽ.

49 A Sayull kom-dibli wã ra yaa a Zonatã, a Isvi, ne a Malkisuwa.+ A talla kom-pugli a yiibu. Kãsmã yʋʋr la a Meraab,+ tɩ yaoã yʋʋr la a Mikall.+ 50 A Sayull pagã yʋʋr da boondame t’a Ayinowam, n yaa a Ahimaaz bi-pugla. A tãb-biisã naab ra yaa a Neer biig a Abneere,+ n yaa a Sayull ba wã ba-biiga. 51 A Kis+ n da yaa a Sayull ba, t’a Neer+ sẽn yaa a Abneer ba wã yaa a Abiyɛll biiga.

52 A Sayull naamã tɛka, a zaba zab-toos ne Filisti nebã.+ A sã n da yã rao sẽn tar pãng wall raoodo, a kẽesd-a-la a tãb-biisã sʋka.+

15 A Sãmwɛll yeela a Sayull yaa: “A Zeova ra tʋma maam tɩ m yãk* foom tɩ f lebg Israyɛll nebã sẽn yaa a nin-buiidã rĩma.+ Dẽ wã, kelg a Zeova koɛɛga.+ 2 Ad tãb-biis naab a Zeova sẽn yeele: ‘Mam na n doka m sũur ne Amalɛk nebã, bãmb sẽn zab ne Israyɛll nebã b sẽn da wa n yi Ezɩpt n watẽ wã yĩnga.+ 3 Masã, kẽng n tɩ zab ne Amalɛk nebã+ n sãam bãmb+ ne bũmb nins fãa b sẽn tarã zãnga. Fo pa segd n bas-b tɩ b põs ye.* Kʋ b fãa zãnga,+ rapã ne pagbã, kambã ne kom-peelsã, niisã ne piisã, la yʋgma wã ne bõensã fãa.’”+ 4 A Sayull boola sodaasã n tigim Telayim, n sõd-ba. Zida buudã sʋk yɩɩ sodaas tus-piiga, tɩ buud a taabã yɩ bãmb tus-kobs-yi sẽn kẽnd nao.+

5 A Sayull zãagame n ta Amalɛk tẽngã, n yãk sodaas tɩ b tɩ solg longẽ* wã n gũudẽ. 6 Dẽ, a Sayull yeela Kɛn nebã+ yaa: “Zoe-y n yi-y Amalɛk nebã sʋka, tɩ m da wa naag yãmb ne bãmb n menes ye.+ Bala yãmb maana Israyɛll nebã fãa neere,+ bãmb sẽn wa n yit Ezɩptã.” Woto, Kɛn nebã yii Amalɛk nebã sʋka. 7 Rẽ poore, a Sayull kʋʋ Amalɛk nebã+ sẽn sɩng Havila+ n tãag Suur+ sẽn pẽ Ezɩptã. 8 A yõka Amalɛk rĩm a Agaag+ vɩɩga, la a kʋ sẽn kell-bã fãa ne sʋʋga.+ 9 La a Sayull ne nin-buiidã basa a Agaag n pa kʋ ye.* Bãmb basa rũms nins sẽn yaa sõma n yɩɩdã me: Piisã, niisã, rũm-nobdsã, pe-raadã, la bũmb nins sẽn da yaa sõma wã.+ Bãmb da pa rat n sãam-b ye. La bũmb nins fãa sẽn da pa tar yõodã, la nebã sẽn da pa ratã, bãmb sãama bõn-kãense.

10 Dẽ, a Zeova goma ne a Sãmwɛll n yeele: 11 “Mam maanda m bãngẽ* m sẽn yãk a Sayull t’a lebg rĩmã. Bala yẽ basa maam n pa sak mam noorã ye.”+ A Sãmwɛll sũur sãama wʋsgo, hal t’a yãb ne a Zeova yʋngã tõre.+ 12 A Sãmwɛll sẽn yik yibeoog pĩnd n na n tɩ seg a Sayullã, b yeel-a lame yaa: “A Sayull kẽnga Karmelle,+ la yẽ lugla bũmb beenẽ a meng yĩnga.+ Dẽ, a lebgame n kẽng Gilgalle.” 13 A Sãmwɛll sẽn wa n ta a Sayull nengẽ wã, a Sayull yeel-a lame: “Bɩ a Zeova ning yãmb barka. Mam maana a Zeova sẽn yeelã fãa.” 14 La a Sãmwɛll leokame: “La bõe yĩng tɩ m wʋmd piis la niis sẽn yãbde?”+ 15 T’a Sayull leok yaa: “Nin-buiidã talla rẽ Amalɛk nebã nengẽ n wa, bala bãmb basa piis ne niis nins sẽn yaa sõma n yɩɩdã,* n na n kʋ maand yãmb Wẽnnaam a Zeova yĩnga. La tõnd sãama sẽn ketã fãa zãnga.” 16 La a Sãmwɛll yeela a Sayull yaa: “Bas goama! Kelg tɩ m togs-f bũmb ning a Zeova sẽn yeel maam yʋngẽ.”+ T’a Sayull leoke: “Gom-y-yã!”

17 A Sãmwɛll yeelame: “Pa fo sẽn wa n tagsdẽ tɩ f pa zem baa fʋɩyã+ la fo lebg Israyɛll buud toɛy-toɛyã zu-soaba, t’a Zeova yãk* foo tɩ fo lebg Israyɛll rĩm sɩda?+ 18 Kaoosg zugẽ, a Zeova wa n tʋma foom n yeele: ‘Kẽng n tɩ zab ne Amalɛk nebã sẽn yaa yel-wẽn-maandbã n kʋ-ba.+ Zab ne bãmb n menes-b zãnga.’+ 19 Bõe yĩng tɩ fo pa kelg a Zeova koɛɛgã? Bõe yĩng tɩ fo bir teedã n zɛ ne yão-beedo,+ n maan sẽn yaa wẽng a Zeova nifẽ?”

20 La a Sayull yeela a Sãmwɛll yaa: “Mam yaool n saka a Zeova koɛɛgã. Mam maana bũmb ning a Zeova sẽn tʋm maam tɩ m tɩ maanã. Mam talla Amalɛk rĩm a Agaag n wa, la m sãam Amalɛk nebã.+ 21 La nin-buiidã yãka piis ne niis te-zɛɛdmã sẽn da segd ne sãoongã sʋka, bũmb nins sẽn yaa sõma n yɩɩdã, n na n maan maand Gilgall n kõ a Zeova sẽn yaa yãmb Wẽnnaamã.”+

22 Dẽ, a Sãmwɛll leokame: “Bõe n noom a Zeova n yɩɩda? Maand sẽn yõogd bugum ne maand a taabã+ bɩ, bɩ a Zeova koɛɛgã sakre? Gese! Sakr yɩɩda maoongo,+ la kelgr yɩɩda pe-raad kaam.+ 23 Bala wẽn-kɩɩsg+ yaa wẽng wa bagre,+ tɩ tɩtaam yaa wẽng wa tɩt maanego, la bõn-naands* pʋʋsgo. Fo sẽn zãgs n pa kelg a Zeova gomdã,+ yẽ me zãgsame tɩ f pa na n le yɩ rĩm ye.”+

24 Dẽ, a Sayull yeela a Sãmwɛll yaa: “Mam beegame, bala mam kɩɩsa a Zeova noorã ne yãmb goamã, m sẽn zoe nin-buiidã rabeem n kelg bãmb sẽn datã yĩnga. 25 Masã, mam kot-y lame tɩ y kõ-m sugr m beegrã yĩnga, la y lebg n yãag maam tɩ m tɩ wõgemd a Zeova taoore.”+ 26 La a Sãmwɛll yeela a Sayull yaa: “Mam pa na n lebg n yãag foo ye. Bala fo zãgsa a Zeova gomdã, t’a Zeova me zãgs tɩ f kõn le yɩ rĩm Israyɛll ye.”+ 27 A Sãmwɛll sẽn lebg n na n loogã, a Sayull gãda a kobr sẽn yaa bãg-vɩɩdã noore, la tõsgame. 28 T’a Sãmwɛll yeel-a yaa: “Wa fuugã sẽn tõsgã, rũndã, a Zeova me na n deega naamã fo nugẽ. Fo pa na n le yɩ Israyɛll rĩm ye. La yẽ na n kõ-a-la ned a to sẽn yaa sõma n yɩɩd foom.+ 29 Sẽn paase, Israyɛll Wẽnnaamã sẽn yaa kãsengã+ pa na n yag ziri+ wall a toeem yam ye.* Bala a pa wa ninsaal n toeemd yam ye.”*+

30 La a Sayull leokame: “Mam beegame. La mam kot-y lame tɩ y waoog maam m nin-buiidã kãsem-dãmbã taoore, la Israyɛll nebã taoore. Lebg-y n yãag-y maam tɩ m tɩ wõgemd yãmb Wẽnnaam a Zeova taoore.”+ 31 Dẽ, a Sãmwɛll lebgame n tũ a Sayull t’a tɩ wõgemd a Zeova taoore. 32 A Sãmwɛll yeelame: “Tall-y Amalɛk rĩm a Agaag n wa kõ-ma.” Dẽ, a Agaag kolga ne rabeem,* bala yẽ ra yeela a sũurẽ yaa: ‘Hakɩɩka, mam pa na n bãng kũum toog ye.’ 33 La a Sãmwɛll yeelame: “Wa fo sʋʋgã sẽn kɩt tɩ pagb kong b kambã, fo ma wã me na n konga biiga.” Dẽ, a Sãmwɛll kɛɛ a Agaag ne sʋʋg a Zeova taoor Gilgall hal t’a ki.+

34 Rẽ poore, a Sãmwɛll kẽnga Rama, la a Sayull kuila a ba-yirã Gibeya. 35 Hal n tãag a Sãmwɛll kũum, a pa le yã a Sayull ye. Bala a ra sidgda wʋsg a Sayull yĩnga.+ A Zeova maana a bãngẽ a sẽn kɩt t’a Sayull lebg Israyɛll rĩmã.+

16 A Zeova wa n yeela a Sãmwɛll yaa: “Fo na n sidga a Sayull yĩng hal tɩ ta dabʋre?+ Mam zãgsame t’a kõn le yɩ Israyɛll rĩm ye.+ Pids f yɩɩllã kaam+ n kẽng tɩ mam tʋmda foom Betlehɛm rao a Zese*+ nengẽ, bala mam yãka a bi-ribl a ye t’a na n lebg rĩma.”+ 2 La a Sãmwɛll leokame yaa: “Mam na n maana a wãn n kẽnge? A Sayull sã n wʋme, a na n kʋʋ maam.”+ T’a Zeova yeel-a yaa: “Tall nag-sadg n kẽng n tɩ yeel yaa: ‘Mam waame n na n maan maoong n kõ a Zeova.’ 3 Bool a Zese t’a wa maoongã zĩigẽ, tɩ mam na n wilga foom fo sẽn segd n maanega. Fo segd n zaee* ned ning mam sẽn na n wilg foomã.”+

4 A Sãmwɛll maana a Zeova sẽn yeel-a wã. A sẽn ta Betlehɛmmã,+ tẽngã kãsem-dãmb yi n seg-a lame n digd rabeem. Bãmb sok-a lame yaa: “Yaa noog tɩ y wat kaanẽ?” 5 T’a leoke: “Yaa noogo. M waame n na n maan maoong n kõ a Zeova. Yɩlg-y y mens n tũ maam tɩ d kẽng maoongã zĩigẽ.” La yẽ yɩlga a Zese ne a kom-dibli wã. Rẽ poore, a yeel-b lame tɩ b wa maoongã zĩigẽ. 6 Bãmb sẽn wa n watẽ wã, a Sãmwɛll yãa a Eliyaab+ n yeel a sũurẽ yaa: “Hakɩɩka, a Zeova sẽn yãk* a soabã la sẽn yas a taoorã.” 7 La a Zeova yeela a Sãmwɛll yaa: “Ra ges a yalẽ wã wall a woglmã ye.+ Bala mam pa yãk-a ye. Ninsaal sẽn get to-to wã yaa toor ne Wẽnnaam sẽn get to-to wã. Bala ninsaal geta nif sẽn ne, la a Zeova geta sẽn be sũurẽ.”+ 8 A Zese boola a Abinadaab+ t’a kolg a Sãmwɛll taoore, la a yeelame: “A Zeova pa yãk yãoã soabã me ye.” 9 A Zese kɩtame t’a Sama+ me kolge, la a Sãmwɛll yeelame: “A Zeova pa yãk yãoã soabã me ye.” 10 Woto, a Zese kɩtame t’a kom-dibli a yopoe kolg a Sãmwɛll taoore, la a yeela a Zese yaa: “A Zeova pa yãk bãmbã baa a yembr ye.”

11 Sẽn na n baase, a Sãmwɛll soka a Zese yaa: “Fo kom-dibli wã fãa la woto bɩ?” T’a leoke: “B yao-zʋʋgã+ n kete, la a kɩɩmda piisi.”+ Dẽ, a Sãmwɛll yeela a Zese yaa: “Tʋm tɩ b tɩ bool-a. Bala a sã n pa wa, tõnd pa na n zĩnd n dɩ ye.” 12 Dẽ, yẽ tʋmame tɩ b tɩ tall-a n wa. A ra yaa zẽega, t’a ninã ne a yalẽ wã fãa yaa neere.+ Dẽ, a Zeova yeelame: “Yik n sudg a zugã kaam, bala yaa yẽ la m yãk-yã!”+ 13 A Sãmwɛll rɩka yɩɩllã ne kaamã+ n pʋdg a zug a ba-biisã taoore. Baraar tɛka, a Zeova vʋʋsmã siga a Davɩɩd zugu, n kõ-a pãnga.+ La a Sãmwɛll wa n yikame n lebg n leb Rama.+

14 A Zeova vʋʋsmã yiime n bas a Sayulli,+ t’a Zeova bas tɩ tags-wẽns kẽ-a, n da kẽesd-a rabeem wʋsgo.+ 15 A Sayull tʋm-tʋmdbã yeel-a lame yaa: “Yãmb mengã neeme tɩ Wẽnnaam basame tɩ tags-wẽns kẽesd yãmb rabeem wʋsgo. 16 Rẽ wã, d zu-soaba, d bõos tɩ y kɩt tɩ y tʋm-tʋmdbã sẽn yas yãmb taoorã bao rao sẽn mi pɛndg wẽeb sõma,+ tɩ sẽn wa n yaa wakat ning fãa la Wẽnnaam bas tɩ tags-wẽns kẽ yãmba, bɩ a wẽ pɛndgã tɩ yols-yã.” 17 Woto, a Sayull yeela a tʋm-tʋmdbã yaa: “M kotame tɩ y bao rao sẽn mi pɛndg wẽeb sõma n tall-a n wa kõ-ma.”

18 A tʋm-tʋmd a yembr leokame yaa: “Ade! Mam yãa Betlehɛm rao a Zese bi-ribl a ye sẽn mi pɛndg wẽeb hal sõma. Sẽn paase, a tara raoodo, n yaa zabr gãndaoogo.+ A mii goam sõma, a yaa rasãnga,+ la a Zeova bee ne-a.”+ 19 A Sayull tʋma neb tɩ b tɩ yeel a Zese yaa: “Kɩt tɩ f biig a Davɩɩd sẽn kɩɩmd rũmsã wa mam nengẽ.”+ 20 Dẽ, a Zese baoo buri, waoog sẽn pid ne divẽ n paas bulla, n zɩlg bõang n yeel a Davɩɩd t’a tall n tɩ kõ a Sayulli. 21 Woto, a Davɩɩd kẽnga a Sayull nengẽ n tɩ lebg a tʋm-tʋmda.+ A Sayull wa n nong-a-la wʋsgo, n kɩt t’a bobd a zab-teedã. 22 A Sayull tʋmame tɩ b tɩ yeel a Zese yaa: “M kotame tɩ f bas t’a Davɩɩd lebg mam tʋm-tʋmda, bala mam sũur nooma ne-a.” 23 Wẽnnaam sã n da bas tɩ tags-wẽns kẽ a Sayull fãa, a Davɩɩd rɩkda a pɛndgã n wẽ t’a Sayull paam yolsg t’a yĩnsã sigi, tɩ tags-wẽnsã yi n bas-a.+

17 Filisti nebã+ tigma b tãb-biisã n na n kẽng zabre. Bãmb tigma taab Soko+ sẽn be Zida soolmẽ wã, n tilg b tãb-sikã Soko ne Azeka+ sʋka, Efɛɛz-damim+ soolmẽ wã. 2 La a Sayull ne Israyɛll nebã tigma taab n tilg b tãb-sikã Ela tẽn-nabrẽ wã,+ n tong taab ned fãa ne a zĩig n na n zab ne Filisti nebã. 3 Filisti nebã ra bee tãng a yembr zugu, tɩ Israyɛll nebã be tãng a to zugu, tɩ long ra be b sʋka.

4 Gãndaoog a yembr n yi Filisti nebã tãb-sigsã sʋka, t’a yʋʋr la a Golyate.+ A ra yaa Gat+ neda, t’a woglmã yaa kãntɩɩg a yoob la nug-yakemd a yembre.* 5 A ra fõgna zũud pugla, n yer zũud fuug*+ sẽn wõnd zĩnf pagdo. A fuugã zɩslmã ra yaa sɩkl tus a nu.* 6 A karsã ra luda ne zũudu, la a ra boba zũud kãn-dibg+ tɩ be a poorẽ wã. 7 A kãndã raoog taglem ra taa sʋnd koeer-bõanga,+ t’a kãndã noor sẽn maan ne kutã zɩslem ra yaa sɩkl kobs-yoobe.* Ned n da be a taoor n zãad a gãongã n kẽnda. 8 Yẽ yalsame n zẽk a koɛɛg n gom ne Israyɛll tãb-biisã+ n yeel-b yaa: “Yãmb yiime n tong taab ned fãa ne a zĩig n na n maan bõe? Mam pa Filisti ned tɩ yãmb yaa a Sayull tʋm-tʋmdb la? Yãk-y ned t’a wa tɩ d seg taaba. 9 A sã n tõog n zab ne maam n kʋ-ma, tõnd na n lebga yãmb tʋm-tʋmdba. La mam sã n tõog-a n kʋ-a, yãmb n na n lebg tõnd tʋm-tʋmdba.” 10 Filisti nedã leb n yeelame yaa: “Mam baooda Israyɛll tãb-biisã noor+ dũndã. Yãk-y ned t’a wa tɩ d zab taaba!”

11 A Sayull ne Israyɛll nebã fãa sẽn wʋm Filisti nedã goamã, b yɛɛsa wʋsg hal tɩ b pelens yɩke.

12 A Davɩɩd ra yaa a Zese biiga, la a Zese*+ ra bee Efrate,+ rat n yeel tɩ Zida soolmẽ Betlehɛmmã.+ A ra tara kom-dibli a nii,+ la a Sayull wakatẽ wã t’a ra zoe n kʋʋlame. 13 A Zese kom-kãsems a tãabã ra tũu a Sayull n kẽng zabrã.+ A kom-dibli a tãabã sẽn kẽng zabrã ra yaa a Eliyaab+ sẽn yaa a bi-kãsengã, sẽn pʋgd-a wã yaa a Abinadaabe,+ tɩ tãab-n-soabã la a Sama.+ 14 A Davɩɩd n da yaa yao-zʋʋga,+ la kom-kãsems a tãabã ra tũu a Sayulli.

15 A Davɩɩd ra kẽnd n tʋmda a Sayull nengẽ, la a lebgd n kuiis Betlehɛm n gũud a ba wã piisi.+ 16 Wakat kãnga, Filisti raoã ra yita yibeoog fãa ne zaabr fãa n kolgd Israyɛll nebã n yalsd n baood b noore. Yẽ maana woto rasem pis-naase.

17 A Zese wa n yeela a biig a Davɩɩd yaa: “M bõos tɩ f rɩk kood efa* a yembrã b sẽn sẽ wã, la bur piigã n kẽng sikã zĩigẽ tao-tao n tɩ kõ f kẽem-dãmbã. 18 Zã formaaz piig n tɩ kõ tãb-biis tusr-tusr naabã. Ges f kẽem-dãmbã sã n keemame, la f zã bũmb sẽn wilgd tɩ b bee laafɩ n wa.” 19 A Davɩɩd kẽem-dãmbã ne Israyɛll tãb-biisã fãa ra bee ne a Sayull Ela tẽn-nabrẽ wã+ n zabd ne Filisti nebã.+

20 Woto, a Davɩɩd yika yibeoog pĩnd n gũnug piisã ne neda, la a sak a ba a Zese tẽn-tʋʋmdã n sag teedã n looge. A sẽn ta tãb-sikã zĩigẽ wã, tãb-biisã ra yiime n kaasd zabr kaasgo. 21 Israyɛll tãb-biisã ne Filisti tãb-biisã yiime n tees taab n yasẽ. 22 Zĩig pʋgẽ, a Davɩɩd sika a teedã n gũnug ned ning sẽn da gũud teedã, la a wudg n kẽng zabrã zĩigẽ. A sẽn ta wã, a sɩnga a kẽem-dãmbã gãas sokre.+

23 A sẽn wa n gomdã, gãndaoog ning yʋʋr sẽn boond t’a Golyat+ n yaa Gat nedã yii Filisti nebã tãb-biisã sʋk n yalse. A goma goam nins a sẽn da minim n gomdã,+ la a Davɩɩd wʋmame. 24 Israyɛll nebã fãa sẽn yã raoã, b yɛɛsame+ n tar n leb poorẽ. 25 Israyɛll nebã ra yetame yaa: “Yãmb nee ra-kãngã sẽn watã bɩ? A watame n na n bao Israyɛll nebã noore.+ Rĩmã na n kõo ned ning sẽn na n kʋ-a wã arzɛgs wʋsgo. A na n dɩka a bi-puglã n kõ-a,+ la a kɩt t’a ba wã zak rãmb da le yao lampo Israyɛlle, la b ra le tʋm rĩmã tʋʋm ye.”

26 Dẽ, a Davɩɩd soka neb nins sẽn da yas a sɛɛgẽ wã yaa: “Bõe la b na n maan n kõ ned ning sẽn na n kʋ Filisti nin-kãngã n yiis yãndã Israyɛll nebã zugu? Filisti ra-kãngã sẽn pa kẽ bãongã yaa ãnda, n baood Wẽnnaam ning sẽn vɩ wã tãb-biis noore?”+ 27 Nebã lebs n togs-a-la gom-kãens n yeel-a yaa: “Woto la b na n maan n kõ ned ning sẽn na n kʋ-a wã.” 28 A Davɩɩd kẽem a Eliyaab+ sẽn wʋm a sẽn gomd ne nebã, a sũur puugame t’a yeel-a: “Fo waa ka n na n maan bõe? Fo gũnuga piisã sẽn pa waoogã ne ãnd we-raoogẽ wã?+ Mam mii fo tɩtaamã ne f yam-wẽngã. Yaa zabrã bal la fo wa n na n gese.” 29 T’a Davɩɩd leoke: “Mam maana bõe? Yaa sokr bal la m sok-yã!” 30 A Davɩɩd wẽnemdame n sok ned a to sok-yɛngã,+ la nebã leok-a-la wa pĩndã.+

31 Neb n wʋm a Davɩɩd goamã n tɩ togs a Sayulli. Woto, a Sayull tʋmame tɩ b tɩ tall-a n wa. 32 A Davɩɩd yeela a Sayull yaa: “Bɩ ned baa a yembr da koms raood Filisti nin-kãngã yĩng ye. Yãmb tʋm-tʋmdã na n kẽngame n tɩ zab ne-a.”+ 33 La a Sayull leoka a Davɩɩd yaa: “Fo pa tõe n tɩ zab ne Filisti ra-kãngã ye. Bala fo yaa biig bala,+ tɩ yẽ yaa sodaag* hal a yãadmẽ.” 34 T’a Davɩɩd yeel a Sayull yaa: “Yãmb tʋm-tʋmdã yaa pe-kɩɩm n gũud a ba wã piisã. La daar a yembre, gɩgemd+ n wa n yõk pesg piisã sʋk n looge, tɩ urs* me wa daar a to n yõk pesg n looge. 35 La mam diga b fãa n pãb-ba, n fãag piisã fãa b noorẽ. B sẽn yik n na n zab ne maamã, mam gãda b kõbdã n wẽ-b n lub n kʋ. 36 Yãmb tʋm-tʋmdã kʋʋ gɩgemdã ne ursã fãa, la Filisti ra-kãngã sẽn pa kẽ bãongã na n lebga wa bãmba, bala yẽ baoa Wẽnnaam ning sẽn vɩ wã tãb-biisã noore.”+ 37 A Davɩɩd paasame yaa: “A Zeova sẽn fãag maam gɩgemdã la ursã nao-yẽesẽ wã, a na n fãaga maam Filisti ra-kãngã nugẽ me.”+ T’a Sayull yeel a Davɩɩd yaa: “Kẽnge, la bɩ a Zeova zĩnd ne-fo!”

38 Dẽ, a Sayull rɩka a futã n yeelga a Davɩɩde, la a rɩk a zũud puglã n fõgn-a. Rẽ poore, a yeelg-a-la kut fuugã.* 39 A Davɩɩd rɩka a sʋʋgã n sẽb a sɛɛga, n mak n na n loog la a pa tõog ye. Bala a pa minim-b ye. A yeela a Sayull yaa: “Mam pa tõe n kẽn ne te-kãensã, mam sẽn pa minim-bã yĩnga.” Woto, a Davɩɩd yeesa zab-teedã. 40 A rɩka a rasaarã, la a wʋk kug-saal a nu kosoogẽ wã, n sagl-b a pe-kɩɩm korgẽ wã. A ra zãada a loaabgã+ a nugẽ, n sɩng Filisti raoã pẽnegre.

41 Filisti raoã ra kẽnd n kolgda a Davɩɩde, tɩ ned ning sẽn zãad a gãongã be a taoore. 42 Filisti nedã sẽn yã a Davɩɩdã, a ges-a lame n paoog-a. Bala a ra yaa zẽega, n yaa bi-neer bala.+ 43 Dẽ, Filisti nedã soka a Davɩɩd yaa: “Mam yaa baag la,+ tɩ fo wat mam nengẽ ne dasaba?” La Filisti nedã kãaba a Davɩɩd wẽng ne a wẽnnaam-dãmbã yʋya. 44 A yeela a Davɩɩd yaa: “Watẽ bala. Mam na n kʋʋ foo n kõ yĩngr bõn-yɩgdɩ wã la we-rũmsã.”

45 La a Davɩɩd leoka Filisti nedã yaa: “Fo wata ne sʋʋg la kãn+ a yiib n na n zab ne maam, la mam wata ne a Zeova sẽn yaa tãb-biis naabã yʋʋre,+ n na n zab ne foom. Yẽ n yaa Israyɛll tãb-biisã Wẽnnaam, soab ning fo sẽn paoogã.+ 46 Rũndã, a Zeova na n ninga foom mam nugẽ,+ la mam na n kʋʋ foo n fiuug f zugã. Rũndã, mam na n kʋʋ Filisti tãb-biisã n kõ yĩngr bõn-yɩgdɩ wã la tẽngã we-rũmsã. Woto, dũniyã nebã fãa na n bãngame tɩ Wẽnnaam n be Israyɛlle.+ 47 Neb nins fãa sẽn tigim ka wã na n bãngame tɩ pa ne sʋʋg bɩ kãnd la a Zeova fãagd ned ye.+ Bala zabrã yaa a Zeova zabre,+ la a na n ninga yãmb fãa tõnd nugẽ.”+

48 Dẽ, Filisti raoã le sɩnga kẽnd n kolgd a Davɩɩde, t’a Davɩɩd wudg tao-tao n tees Filisti tãb-biisã sẽn beẽ wã n na n seg-a. 49 A Davɩɩd tʋma a nug a korgẽ wã, n sak kugr n ning a loaabgẽ wã n lobge. Kugrã tɩ wẽe Filisti nedã rĩiri, n võd n kẽ. La yẽ lʋɩɩme t’a nengã fõgen tẽngã.+ 50 Woto, a Davɩɩd tõoga Filisti nedã ne loaabg la kugr bala. Yẽ kʋ-a lame, baa a sẽn da pa zãad sʋʋgã.+ 51 A Davɩɩd kell n zoeeme n tɩ yals Filisti nedã sɛɛgẽ, n wõog a sʋʋgã+ a wʋʋgẽ n fiuug a zugã, tɩ yɩ vẽeneg t’a kiime. Filisti tãb-biisã sẽn yã tɩ b gãndaoogã kiime wã, b zoeeme.+

52 Dẽ, Israyɛll ne Zida tãb-biisã sɩnga kaasgo. Bãmb riga Filisti nebã tẽn-nabrẽ wã+ zĩig fãa hal n ta Ekron+ tẽngã rignoyã. Filisti nebã kũ-rãmb da rɩga sẽn sɩng ne Saarayim+ sorã, n tãag Gat ne Ekronne. 53 Israyɛll nebã sẽn dig Filisti nebã ne b sũur fãa n lebg n wa wã, b zɛɛ b sikã.

54 Dẽ, a Davɩɩd talla Filisti nedã zug n kẽng Zerizalɛm. La yẽ bĩnga Filisti nedã zab-teedã a fu-roogẽ wã.+

55 A Sayull sẽn wa n yã a Davɩɩd sẽn dabd n na n tɩ zab ne Filisti nedã, a soka a Abneer+ sẽn yaa a tãb-biisã naabã yaa: “Bi-kãngã yaa ãnda biiga,+ Abneere?” T’a leok yaa: “N-na, mam wẽenda ne yãmb sẽn vɩ wã tɩ mam pa mi ye!” 56 Tɩ rĩmã yeel yaa: “Bao n bãng biigã sẽn yaa ned ning biiga.” 57 A Davɩɩd sẽn tɩ kʋ Filisti nedã n lebg n wa wã bala, a Abneer peeg-a lame n kẽng a Sayull taoore, t’a zãad Filisti nedã zugu.+ 58 A Sayull sok-a lame yaa: “Fo yaa ãnda biiga?” T’a Davɩɩd leoke: “Mam yaa yãmb tʋm-tʋmd a Zese+ sẽn yaa Betlehɛm nedã biiga.”+

18 A Davɩɩd sẽn gom ne a Sayull n sa wã, a Zonatã+ sũur tabenda a Davɩɩde. A sɩngame n nong a Davɩɩd wa a menga.*+ 2 Baraar tɛka, a Sayull kɩtame t’a Davɩɩd kell n pa ne-a, n pa le bas t’a leb a ba wã zakẽ ye.+ 3 La a Zonatã ne a Davɩɩd maana kaoola,+ bala a Zonatã ra nong-a-la wa a menga.*+ 4 A Zonatã yeega a kobr sẽn yaa bãg-vɩɩdã n kõ a Davɩɩde, la a rɩk a zabr fuugã, a sʋʋgã, a tãpã la a sẽbdgã n kõ-a. 5 A Davɩɩd sɩnga zab kẽngre, la zĩig ning fãa a Sayull sẽn tʋm-a, a ra paamda tõogre.*+ Dẽ, a Sayull kɩtame t’a lebg a tãb-biis naaba,+ la rẽ yɩɩ nin-buiidã fãa ne a Sayull tʋm-tʋmdbã noogo.

6 A Davɩɩd ne neb a taabã sã n da tɩ kʋ Filisti nebã n lebgdẽ, Israyɛll tẽnsã fãa pagb ra yitame n yɩɩndẽ+ la b saood n na n seg Rĩm a Sayulli. B ra wẽeda bembend*+ la kʋla, n kɩdemd sũ-noogo. 7 Pagbã sẽn da kɩdemdã ra yɩɩndame n yetẽ yaa:

8 A Sayull sũurã puuga wʋsgo,+ bala yɩɩllã pa yɩ-a noog ye. Yẽ yeelame yaa: “B yeelame t’a Davɩɩd kʋʋ neb tus-piiga, n yaool n yeel tɩ mam kʋʋ neb tusri. Kella naamã bal tɩ b reeg n kõ-a!”+ 9 Baraar tɛka, a Sayull ra gũusda a meng ne a Davɩɩde.

10 Vẽkembeoogã, Wẽnnaam basame tɩ tags-wẽns kẽ a Sayulli,+ t’a ra zʋbsd wa gãeeng* a roogẽ wã, t’a Davɩɩd ra wẽed pɛndg+ wa a sẽn da minim n maandẽ wã. A Sayull da zãada kãnd a nugẽ,+ 11 la a tãoo a Davɩɩd ne kãndã+ naoor a yiibu, n yet a sũurẽ yaa: ‘Mam na n kaa a Davɩɩd ne lalgã!’ La a Davɩɩd kuugame n zoe n põse. 12 Rẽ kɩtame t’a Sayull ra zoet a Davɩɩde, bala a Zeova ra bee ne-a,+ n yaool n loog n bas yẽ a Sayulli.+ 13 Dẽ, a Sayull kɩtame t’a Davɩɩd pa le tʋmd yẽ taoor ye. A yãk-a lame t’a lebg tãb-biis tusr naaba, n da lʋɩt tãb-biisã taoor tɩ b kẽnd zabre.+ 14 A Davɩɩd ra ket n paamda tõogr*+ a sẽn maandã fãa pʋgẽ, la a Zeova ra bee ne-a.+ 15 La a Sayull sẽn yã t’a Davɩɩd paamda tõogr wʋsgã, a maneg n zoe-a lame. 16 Israyɛll ne Zida nebã fãa ra nonga a Davɩɩde, bala a ra lʋɩta bãmb taoor tɩ b kẽnd n zabdẽ.

17 A Sayull wa n yeela a Davɩɩd yaa: “Ad mam bi-pugl-kãseng a Meraabe.+ Mam na n dɩk-a lame n kõ foom tɩ f maan f paga.+ La fo segd n ket n tʋmda mam tʋʋmã ne raoodo, la f zabd a Zeova zabã.”+ A Sayull ra yeta a sũurẽ yaa: ‘Mam pa na n kʋ-a m toor ye. M na n basame tɩ Filisti nebã kʋ-a.’+ 18 Rẽ la a Davɩɩd yeel a Sayull yaa: “Mam yaa ãnda, la mam buudã ne m ba wã zak rãmb yaa ãnd rãmba, tɩ m na n lebg rĩmã rɛɛmba?”+ 19 La wakat ning b sẽn da segd n dɩk a Sayull bi-pugl a Meraab n kõ a Davɩɩdã sẽn ta wã, mikame tɩ b ra zoe n dɩk-a lame n kõ Mehola ned a Adriyɛll+ t’a maan a paga.

20 La a Sayull bi-pugl a Mikall+ ra nonga a Davɩɩde. B tɩ togsa a Sayulli, la rẽ yɩ-a-la noogo. 21 Dẽ, a Sayull yeelame yaa: “M na n dɩka a Mikall n kõ-a n bẽd-a, tɩ Filisti nebã paam n kʋ-a.”+ Woto, a Sayull le yeela a Davɩɩd yaa: “Fo na n lebga mam rɛɛmb rũndã.” 22 Sẽn paase, a Sayull yeela a tʋm-tʋmdbã yaa: “Soos-y n gom-y ne a Davɩɩd n yeel-a yaa: ‘Gese! Rĩmã sũur nooma ne foom. Sẽn paase, a tʋm-tʋmdbã fãa me sũur nooma ne foom. Woto wã, sak n yɩ rĩmã rɛɛmba.’” 23 A Sayull tʋm-tʋmdbã sẽn togs a Davɩɩd gom-kãensa wã, a leokame yaa: “Yãmb tagsdame tɩ yɩl n yɩ rĩmã rɛɛmb yaa nana la? Mam yaa naong soaba, n leb n pa baa fʋɩ ye.”+ 24 Dẽ, a Sayull tʋm-tʋmdbã tɩ togs-a-la a Davɩɩd sẽn yeelã.

25 A Sayull sẽn wʋm dẽ wã, a yeelame yaa: “Ad yãmb sẽn tog n yeel a Davɩɩde: ‘Rĩmã pa rat bũmb a to a rɛɛmbã nugẽ,+ n zʋʋg Filisti neb yo-gãnd+ koabga, t’a paam n dok a sũur ne a bɛɛbã.’” A Sayull yeela woto, bala a ra ratame t’a Davɩɩd ki Filisti nebã nugẽ. 26 Woto, a Sayull tʋm-tʋmdbã tɩ togsa a Davɩɩd gom-kãensã, la a sũur yɩɩ noog a sẽn na n lebg rĩmã rɛɛmbã yĩnga.+ La nand tɩ wakat ning b sẽn yãkã ta, 27 a Davɩɩd ne a nebã kẽngame n tɩ kʋ Filisti rap kobs-yi n yãgs b yo-gãndã, n wa kõ rĩmã zãnga, n na n lebg a rɛɛmba. Woto, a Sayull rɩka a bi-pugl a Mikall n kõ-a t’a maan a paga.+ 28 A Sayull yãame t’a Zeova bee ne a Davɩɩde,+ la t’a biig a Mikall nong-a lame.+ 29 Woto kɩtame t’a Sayull maneg n zoet a Davɩɩde, n lebg a Davɩɩd bɛ a yõor tɛka.+

30 Filisti nanambsã ra yit n kẽnda zabre, la naoor wʋsgo, b sã n da kẽnge, a Davɩɩd tõogd-b lame* n yɩɩg a Sayull tʋm-tʋmdbã fãa,+ hal t’a yʋʋrã yi wʋsgo.+

19 A Sayull wa n togsa a biig a Zonatã ne a tʋm-tʋmdbã fãa t’a rat n kʋʋ a Davɩɩde.+ 2 A Zonatã sẽn da nong a Davɩɩd wʋsgã yĩnga,+ a yeel-a lame yaa: “M ba a Sayull rat n kʋʋ foo. M kotame tɩ f gũus neer beoog yibeoogo, n bao zĩig n solge. 3 Mam na n yiime n yals m ba wã sɛɛgẽ, pʋʋg ning fo sẽn na n solgẽ wã n gom ne-a fo yelle. La m sã n wʋm bũmbu, m na n togs-f lame.”+

4 Dẽ, a Zonatã pẽga a Davɩɩd+ a ba a Sayull taoore, n yeele: “Rĩmã pa segd n maan a tʋm-tʋmd a Davɩɩd wẽng ye. Bala a pa beeg yãmb ye. Sẽn paase, a sẽn maanã fãa nafa yãmba. 5 A gẽnega a yõor n kʋ Filisti nedã,+ t’a Zeova kɩt tɩ Israyɛll nebã fãa paam tõogr sẽn yaa kãsenga. Yãmb yãa rẽ, la y sũur yɩɩ noog wʋsgo. Woto wã, bõe yĩng tɩ y na n kʋ a Davɩɩd n daag bʋʋm soab zɩɩm zaalem n maan yel-wẽnde?”+ 6 A Sayull reega a Zonatã goamã n wẽen n yeele: “Mam wẽenda ne a Zeova sẽn vɩ wã tɩ m pa na n kʋ-a ye.” 7 Rẽ poore, a Zonatã boola a Davɩɩd n togs-a gom-kãensã fãa, la a tall-a n leb a Sayull nengẽ t’a tɩ tʋmd a tʋʋmã wa pĩndã.+

8 Zabrã wa n le yikame, t’a Davɩɩd yi n tɩ zab ne Filisti nebã n kʋ bãmb wʋsgo. La Filisti nebã zoee a Davɩɩd taoore.

9 La a Zeova basame tɩ tags-wẽnsã le kẽ a Sayulli.+ Rẽ t’a ra zĩi a roogẽ wã n zãad a kãndã, t’a Davɩɩd wẽed pɛndga.+ 10 A Sayull tãoa a Davɩɩd ne a kãndã, n mak n na n kaa-a ne lalgã, la a Davɩɩd kuugame tɩ kãndã tɩ sel lalgã. Baraar yʋngo, a Davɩɩd zoeeme n põse. 11 A Sayull tʋma neb a Davɩɩd zakẽ wã tɩ b tɩ gũ, tɩ beoogã sã n vẽeg bɩ b kʋ-a.+ La a Davɩɩd pag a Mikall yeel-a lame yaa: “Fo sã n pa zoe n põs yʋn-kãngã, beoogo, fo yaa kɩɩnga.” 12 Zĩig pʋgẽ, a Mikall sõnga a Davɩɩd t’a tũ fenetrẽ wã n sig n zoe n põse. 13 A Mikall rɩka bõn-naandg* n gãneg gãagã zugu, n dɩk fuug sẽn yaa võy-võy sẽn maan ne bʋ-kõbd n dɩgl zĩig ning a Davɩɩd sẽn kogend a zugã, n pil ne fu-goabga.

14 A Sayull tʋmame tɩ b tɩ tall a Davɩɩd n wa, la a pagã yeelame t’a Davɩɩd pa keem ye. 15 A Sayull lebs n tʋma neb tɩ b tɩ ges a Davɩɩde, n yeel-ba: “Tall-y-yã-a ne a gãagã n wa tɩ d kʋ-a.”+ 16 A sẽn tʋm b rãmbã sẽn kẽ a Davɩɩd roogẽ wã, b yãame tɩ bõn-naandg* n be gãagã zugu, tɩ fuug sẽn yaa võy-võy sẽn maan ne bʋ-kõbd be zĩig ning a Davɩɩd sẽn kogend a zugã. 17 A Sayull soka a Mikall yaa: “Yaa bõe tɩ fo belg maam woto n bas m bɛ+ wã t’a zoe n põse?” T’a Mikall leok yaa: “A yeela maam tɩ m bas-a t’a loog tɩ sã n pa rẽ, a na n kʋ-m lame!”

18 Woto, a Davɩɩd zoeeme n põse, n kẽng a Sãmwɛll nengẽ Rama.+ A togs-a-la bũmb nins fãa a Sayull sẽn maanã. Dẽ, yẽ ne a Sãmwɛll kẽnga Nayot+ n tɩ zĩnd be. 19 Neb n wa n togs a Sayull yaa: “A Davɩɩd bee Nayote, Rama soolmẽ wã.” 20 Zĩig pʋgẽ, a Sayull tʋma neb tɩ b tɩ yõk a Davɩɩde. La a sẽn tʋm b rãmbã kẽngame n tɩ yã no-rɛɛsdb sẽn kʋʋl sẽn togsd bãngr-goama, t’a Sãmwɛll yaa b taoor soaba. Woto, Wẽnnaam vʋʋsmã siga bãmb zutu, tɩ bãmb me yik n maand wa no-rɛɛsdbã.

21 B sẽn togs a Sayull yellã, zĩig pʋgẽ, a tʋma neb a taaba. La bãmb me sẽn ta wã, b yikame n maand wa no-rɛɛsdba. Woto, a Sayull leb n tʋma neb a taaba, naoor a tãab-n-soaba. Bãmb me sẽn ta, b maana wa no-rɛɛsdbã. 22 Sẽn na n baase, a Sayull mengã kẽnga Rama. La a sẽn ta bul-kãsengã sẽn be Seku wã, a sokame yaa: “A Sãmwɛll ne a Davɩɩd bee yɛ?” Tɩ b leok yaa: “B bee Nayote,+ Rama soolmẽ wã.” 23 A sẽn yi n dɩk sor n dabd Nayot sẽn be Rama soolmẽ wã, Wẽnnaam vʋʋsmã siga a zugu, t’a ra kẽnd la a maand wa no-rɛɛsa, hal n ta Nayot sẽn be Rama wã. 24 Sẽn paase, a yeega a futã, la yẽ me maana wa no-rɛɛsa, a Sãmwɛll taoore. A gãanda be a beelle, wĩndgã ne yʋngã tõre. Rẽ n so tɩ nebã ra yetẽ yaa: “A Sayull me lebga no-rɛɛs la?”+

20 Woto, a Davɩɩd zoeeme n yi Nayot sẽn be Rama soolmẽ wã. La a kẽnga a Zonatã nengẽ n tɩ yeel-a yaa: “Bõe la mam maan-yã?+ Mam kongrã yaa bõe? La yaa bõe la mam maan n beeg f ba wã t’a rat n yãk mam yõorã?”* 2 T’a Zonatã leok yaa: “Pa saagd ye!+ Fo pa na n ki ye. Kelge! Mam ba wã pa maand baa fʋɩ n pa togs maam ye. Yaa yel-bil tɩ yaa yel-kãsenga. Bõe yĩng t’a na n solg maam bõn-kãnga? Woto pa tõe ye.” 3 La a Davɩɩd wẽename n yeele: “Sãmbg kae tɩ fo ba wã miime tɩ fo nonga maam,+ la a na n yeelame: ‘Bɩ y ra maan t’a Zonatã bãnge, t’a sũur da wa sãam ye.’ Mam wẽenda ne a Zeova sẽn vɩ wã, la m wẽenda ne fo sẽn vɩ wã tɩ yaa nao-yakemd bal n welgd maam ne kũum!”+

4 Dẽ, a Zonatã yeela a Davɩɩd yaa: “Fo sẽn na n yeel maam bũmb ning fãa, mam na n maaname.” 5 A Davɩɩd yeela a Zonatã yaa: “Beoog yaa ki-paalga,+ la sãmbg kae tɩ b ratame tɩ m zĩnd ne rĩmã n dɩ. Bas-m tɩ m looge, tɩ m na n tɩ solga weoogẽ wã n tãag ra-yɩt zaabre. 6 Fo ba wã sã n sok mam yell bɩ f yeel yaa: ‘A Davɩɩd kosa maam sor n na n kẽng Betlehɛm+ sẽn yaa a ba-yirã tao-tao, bala bãmb zakã neb fãa yʋʋmd-yʋʋmd maoong la b maand be.’+ 7 A sã n yeel tɩ yaa sõma, dẽnd a na n basa fo tʋm-tʋmdã laafɩ. La a sũurã sã n yiki, bɩ f bãng bal t’a rat n maana maam wẽnga. 8 Bɩ f maan sɩd ne f tʋm-tʋmdã,+ bala fo maana kaool ne maam a Zeova taoore.+ La mam sã n tara taale,+ bɩ fo mengã kʋ maam, la f ra tall maam n kẽng f ba wã nengẽ ye.”

9 La a Zonatã leokame yaa: “Ra pʋd n saag n tags woto ye! Mam sã n bãng tɩ m ba wã rat n maana foo wẽnga, hakɩɩka, mam na n togsa foom.”+ 10 Rẽ la a Davɩɩd sok a Zonatã yaa: “Fo ba wã sã n leok foo ne gom-kãse, ãnda n na n wa togs maam?” 11 A Zonatã yeela a Davɩɩd yaa: “Wa tɩ d kẽng weoogẽ wã.” Woto, bãmb b yiibã fãa yiime n kẽng weoogẽ wã. 12 La a Zonatã yeela a Davɩɩd yaa: “Bɩ Israyɛll Wẽnnaam a Zeova yɩ kaset tɩ mam na n feesa m ba wã beoog wakat kãngã, pa rẽ bɩ ra-yɩta. A sã n wilg t’a sũur nooma ne a Davɩɩde, m na n tʋmame tɩ b wa togs foo. 13 La m ba wã sã n dat n maan foo wẽng tɩ mam pa kɩt tɩ fo bãng la m bas-f tɩ f loog ne laafɩ, bɩ a Zeova sɩbg maam ne sɩbg-kãsenga. Bɩ a Zeova zĩnd ne foo+ wa a sẽn zĩnd ne m ba wã.+ 14 Mam vɩɩmã tõre, la hal baa mam kũum poore, bɩ f nong maam ne a Zeova nonglmã buudu.+ 15 Ra tol n bas m zakã rãmb neer maanego,+ baa a Zeova sã n wa menes f bɛɛbã fãa tẽngã zugu.” 16 Dẽ, a Zonatã maana kaool ne a Davɩɩd roogã rãmb n yeele: “A Zeova na n kɩtame t’a Davɩɩd bɛɛbã fãa paam sɩbgre.” 17 A Zonatã kɩtame t’a Davɩɩd le wẽen b zoodã yĩnga, bala a Zonatã ra nonga a Davɩɩd wa a menga.*+

18 Dẽ, a Zonatã yeela a Davɩɩd yaa: “Beoog yaa ki-paalga,+ la nebã na n soka fo yelle, bala fo zaoogã na n yɩɩ vɩʋʋgo. 19 La ra-yɩta, b na n maneg n soka fo yelle. Woto wã, bɩ f kẽng n tɩ solg zĩig ning fo sẽn solg nindaarẽ wã, kugrã sɛɛgẽ ka. 20 Mam na n tãoo pɛɛm a tãab kugrã kɩrenga, tɩ yaa wa m tãooda bũmbu. 21 Mam na n tʋma m tʋm-tʋmdã n yeele: ‘Kẽng n tɩ rɩgs pɛɛmã n wa.’ Mam sã n yeel-a: ‘Gese! Pɛɛmã bee fo sɛɛgẽ, rɩgs-b n wa,’ rat n yeelame tɩ f tõe n waame. Bala mam wẽenda ne a Zeova sẽn vɩ wã tɩ woto rat n yeelame tɩ yell kae, la tɩ bũmb pa na n maan-f ye. 22 La mam sã n yeel m tʋm-tʋmdã yaa: ‘Gese! Pɛɛmã bee hal taoore,’ bɩ f looge. Bala yaa a Zeova n dat tɩ f looge. 23 La sã n yaa ne kaoolã tõnd sẽn maan ne taabã,+ bɩ a Zeova yɩ kaset wakat sẽn ka sɛt yĩnga.”+

24 Dẽ, a Davɩɩd tɩ solga weoogẽ wã. Ki-paalgã sẽn ta wã, rĩmã zĩnda a zaoogẽ wã n na n dɩ.+ 25 Rĩm a Sayull ra zĩi a zaoogẽ lalgã sɛɛgẽ wa raasenkamã. A Zonatã ra zĩ n teesa rĩmã, t’a Abneer+ ra zĩ a Sayull sɛɛgẽ. La a Davɩɩd zĩigã ra yaa vɩʋʋgo. 26 A Sayull pa yeel bũmb baraar ye. Bala a yeela a sũurẽ yaa: ‘Tõe tɩ bũmb n maan n kɩt t’a Davɩɩd pa yɩlemd ye.+ Segd n yaa woto. A pa yɩlemd ye.’ 27 La ki-paalgã vẽkembeoogã, rat n yeel tɩ rasem a yiib-n-soabã daare, a Davɩɩd zĩigã ra ket n yaa vɩʋʋgo. Dẽ, a Sayull soka a biig a Zonatã yaa: “Bõe yĩng t’a Zese*+ bi-riblã pa wa rɩ zaamẽ la rũndã?” 28 T’a Zonatã leok yaa: “A Davɩɩd kosa maam ne pẽdgr n na n kẽng Betlehɛmme.+ 29 A yeelame: ‘M bõos tɩ f kõ-m sor tɩ m looge, bala mam zakã rãmb maanda maoong beenẽ, tɩ m kẽem meng bool maam. Mam sã n taa fo yam, bɩ f bas tɩ m soos n kẽng n tɩ ges m ba-biisã.’ Yaa rẽ la a sẽn pa wa n na n dɩ ne rĩmã.” 30 Dẽ, a Sayull sũurã puuga ne a Zonatã, t’a yeel-a yaa: “Foo, pʋg-tõatg biiga! Fo tẽedame tɩ mam pa mi tɩ fo bee a Zese bi-riblã poorẽ la? Fo ningda f meng yãnde, la f ningd f ma yãnde. 31 A Zese biigã sã n ket n vɩ tẽngã zugu, foo ne f naamã pa na n kaoos ye.+ Woto wã, bɩ f tʋm ned t’a tɩ tall-a n wa, bala a segda ne kũum.”+

32 La a Zonatã leoka a ba a Sayull yaa: “Bõe yĩng tɩ b segd n kʋ-a?+ Bõe la a maan-yã?” 33 Rẽ la a Sayull tão a Zonatã ne a kãndã n na n kʋ-a.+ Woto, a Zonatã bãngame t’a ba wã rata ne a sũur fãa n kʋ a Davɩɩde.+ 34 Zĩig pʋgẽ, a Zonatã yika rɩɩbã zĩigẽ ne sũ-puugri, n pa rɩ baa fʋɩ ki-paalgã rasem a yiib-n-soabã daar ye. Bala a sũur da sãama a Davɩɩd poorẽ,+ la a ba wã sẽn ning-a yãndã yĩnga.

35 Beoog sẽn vẽege, a Zonatã kẽnga weoogẽ wã, zĩig ning yẽ ne a Davɩɩd sẽn da segd n seg taabã. La tʋm-tʋmd sẽn yaa bi-bɩɩg n tũ-a.+ 36 A yeela a tʋm-tʋmdã yaa: “M bõos tɩ f zoe n tɩ rɩgs pɛɛmã m sẽn na n tão wã.” Tʋm-tʋmdã zoeeme, t’a Zonatã tão peemd n zʋʋg-a. 37 Tʋm-tʋmdã sẽn ta zĩig ning peemdã sẽn lʋɩ wã, a Zonatã zẽka a koɛɛg n yeel-a yaa: “Peemdã bee hal taoorã.” 38 A Zonatã zẽka a koɛɛg n yeel tʋm-tʋmdã yaa: “Wɩnge! Kẽng tao-tao! Ra kaoos ye!” Dẽ, a Zonatã tʋm-tʋmdã tɩ rɩgsa pɛɛmã n lebg n wa a zu-soabã nengẽ. 39 Tʋm-tʋmdã pa wʋm yellã võor ye. A Zonatã ne a Davɩɩd bal n da wʋmd a võore. 40 A Zonatã rɩka a zab-teedã n kõ a tʋm-tʋmdã n yeel-a: “Tall n kẽng tẽngã pʋgẽ.”

41 Tʋm-tʋmdã sẽn looge, a Davɩɩd yika zĩig sẽn pa zãr ne a Zonatã sẽn beẽ wã, nug-goabg sẽnesã n wa. A lʋɩɩme n fõgen a neng tẽnga, n wõgemd naoor a tãabo. Yẽ ne a Zonatã moka taaba, tɩ b ned kam fãa yãbe. La a Davɩɩd n yãb n yɩɩge. 42 A Zonatã yeela a Davɩɩd yaa: “Kẽng ne laafɩ, bala tõnd d yiibã wẽena+ ne a Zeova yʋʋre, n yeele: ‘Bɩ a Zeova zĩnd maam ne foo sʋka, la fo yagensã ne mam yagensã sʋk wakat fãa.’”+

Dẽ, a Davɩɩd yikame n looge, t’a Zonatã leb tẽngã pʋgẽ.

21 A Davɩɩd wa n kẽnga Noobe,+ maan-kʋʋd a Ahimelɛk nengẽ. La a Ahimelɛk yiime n seg a Davɩɩd la a rigda. Yẽ soka a Davɩɩd yaa: “Bõe yĩng tɩ fo yaa f ye tɩ ned pa yãag-fo?”+ 2 A Davɩɩd leoka maan-kʋʋd a Ahimelɛk yaa: “Rĩmã tʋma maam tɩ m tɩ maan bũmbu, la a yeele: ‘Ra sak tɩ ned baa a ye bãng mam sẽn tʋm foo tɩ f tɩ maan bũmb ningã, la noy nins m sẽn kõ foomã ye.’ Maam ne m kom-bɩɩsã zemsa taab n yãk zĩig n na n seg taaba. 3 Masã, y sã n tara bur a nu bɩ y kõ-ma, wall rɩɩb ning fãa y sẽn tare.” 4 Maan-kʋʋdã leoka a Davɩɩd yaa: “Bur-zaalg pa be ye. Yaa bur sẽn yaa sõng+ bal n be ka. La f kom-bɩɩsã we n zãaga b mens ne pagba?”*+ 5 A Davɩɩd leoka maan-kʋʋdã yaa: “Yaa vẽeneg tɩ tõnd zãaga d mens ne pagba, wa d sẽn minim n maand zabr kẽnd wakatã.+ Kom-bɩɩsã sã n yaa yɩlem baa tʋʋm-zaalg yĩnga, rũndã tʋʋmdã sẽn yaa sõngã la b maneg n yaa yɩlma!” 6 Woto, maan-kʋʋdã kõ-a-la burã sẽn yaa sõngã,+ bala bur a to ra kae n zʋʋg bur b sẽn kõ Wẽnnaamã ye. B ra yiisa bur-kãng a Zeova taoor n ledg-a ne bur-paall baraare.

7 A Sayull tʋm-tʋmd n da be be raar-n-kãnga, a sẽn da segd n pa a Zeova taoor tɩlɛ wã yĩnga. A yʋʋrã la a Doɛɛge,+ n yaa Edom neda,+ la a Sayull pe-kɩɩmbã naaba.

8 A Davɩɩd soka a Ahimelɛk yaa: “Yãmb tara kãnd bɩ sʋʋg ka bɩ? Mam pa tõog n yals n dɩk m sʋʋgã wall m zab-teedã ye. Bala rĩmã tʋʋmdã ra yaa yãgb yelle.” 9 Tɩ maan-kʋʋdã leoke: “Filisti ned a Golyat+ fo sẽn kʋ Ela+ tẽn-nabrẽ wã sʋʋg n be ka. A vila ne fuug n dɩg efoodã*+ poorẽ. F sã n dat-a lame bɩ f rɩke, bala sʋʋg a to pa be ye.” T’a Davɩɩd yeele: “Sʋ-kãngã to kae ye. Rɩk-y-yã-a n kõ-ma.”

12 A Davɩɩd tagsa gom-kãensã zug neere. La Gat rĩm a Akis rabeem kẽ-a-la wʋsgo.+ 13 Woto, a maana wa a zugã lebgame,+ la wa a yaa gãeeng bãmb taoore. Yẽ ra gʋnda tẽngã rignoyã, la a bas t’a kolkoodã yʋʋnd a toɛɛngã zugu. 14 A Akis wa n yeela a tʋm-tʋmdbã yaa: “Yãmb pa ne tɩ ra-kãngã yaa gãeeng sɩda? Yaa bõe tɩ yãmb tar-a n wat mam nengẽ? 15 Yaa gãeems n paoog maam bɩ, tɩ yãmb wat ne yãoã ka t’a na n tʋm a gãeen-tʋʋmã mam taoore? Nin-kãngã pa kẽed mam zakẽ ye.”

22 Woto, a Davɩɩd yii be+ n zoe n tɩ solg Adulam+ tãngã bokẽ. A ba-biisã ne a ba wã zakã rãmb fãa sẽn wʋm dẽ, b babs-a-la beenẽ. 2 La neb nins fãa sẽn da tar zu-loeese, b rãmb nins sẽn da tar samã la sũ-pa-noaang rãmbã tũu a Davɩɩde, la yẽ lebga b naaba. Ra yaa na maan rap kobs-naas n da be ne-a.

3 A Davɩɩd yii be n kẽng Mizpe, Mowaab soolmẽ wã n yeel Mowaab+ rĩmã yaa: “M bõos tɩ y bas tɩ m ba wã ne m ma wã pa ne yãmba, hal tɩ m wa bãng Wẽnnaam sẽn na n maan bũmb ning n kõ-ma.” 4 Woto, a Davɩɩd bas-b-la ne Mowaab rĩmã, la bãmb paa ne-a wakat ning fãa a Davɩɩd sẽn da be zĩ-soalgdgẽ wã.+

5 Kaoosg zugẽ, no-rɛɛs a Gaad+ yeela a Davɩɩd yaa: “Ra pa zĩ-soalgdgẽ wã ye. Yi be n kẽng Zida+ soolmẽ wã.” Dẽ, a Davɩɩd yii be n kẽng Herɛt weoogẽ wã.

6 A Sayull wa n wʋmame tɩ b yãa a Davɩɩd ne a nebã. A Sayull ra zĩi Gibeya,+ tamaris tɩɩgã sẽn be zĩ-zãntgẽ wã tẽngre, t’a kãndã be a nugẽ. A tʋm-tʋmdbã fãa ra gũbg-a lame n yasẽ. 7 Dẽ, a Sayull yeela a tʋm-tʋmdbã sẽn da gũbg-a n yasẽ wã yaa: “Kelg-y-yã, yãmb a Bẽnzame buudã nebã. Rẽ yĩnga a Zese*+ biigã me na n kõo yãmb fãa pʋt ne viyn pʋt sɩda? A na n yãka yãmb fãa tɩ y lebg neb tusr-tusr nanambse, la neb koabg-koabg nanambs sɩda?+ 8 Yãmb fãa zãmba maam! Ned baa a ye pa togs maam tɩ m biigã maana kaool ne a Zese biigã ye!+ Yãmb ned baa a ye pa zoe mam nimbãaneg n togs maam tɩ mam bi-roakã pirsa m tʋm-tʋmd t’a solg n dat n maan maam wẽnga, wa sẽn yaa to-to masã wã ye.”

9 Edom ned a Doɛɛg+ sẽn yaa a Sayull tʋm-tʋmdbã taoor soabã da yasa be. A yeela a Sayull yaa:+ “Mam yãa a Zese biigã sẽn wa Noob a Ayituub+ biig a Ahimelɛk nengẽ. 10 A soka a Zeova a Davɩɩd sẽn tog n maane, la a kõ-a rɩɩbo. A kõ-a-la Filisti ned a Golyat+ sʋʋgã menga.” 11 Zĩig pʋgẽ, rĩmã tʋma neb tɩ b tɩ tall a Ayituub biig a Ahimelɛk sẽn yaa maan-kʋʋdã, ne a ba wã roogã maan-kʋʋdbã fãa sẽn be Noobã n wa. Woto, bãmb fãa waa rĩmã nengẽ.

12 A Sayull yeelame: “A Ayituub biiga, kelge!” T’a leoke: “M kelgdame, m zu-soaba.” 13 A Sayull sok-a lame yaa: “Bõe yĩng tɩ foo ne a Zese biigã zãmb maam? Bõe yĩng tɩ fo kõ-a bur ne sʋʋga, la f sok Wẽnnaam a sẽn tog n maane? A yik n kɩɩsda maam n solg n dat n maan maam wẽnga, wa sẽn yaa to-to masã wã.” 14 T’a Ahimelɛk leok rĩmã yaa: “Yãmb tʋm-tʋmdbã fãa sʋka, ãnd n yaa sɩd soab wa a Davɩɩde?+ Yẽ yaa rĩmã rɛɛmba,+ n yaa yãmb gũudbã naaba, tɩ yãmb zakã rãmb fãa waoogd-a.+ 15 Rẽ yĩnga yaa pipi la woto mam sẽn sok Wẽnnaam a yĩng sɩda?+ Mam kõn saag n maan yãmb sẽn yetã ye! Bɩ rĩmã ra ning maam ne m ba wã zakã rãmb fãa taal ye. Bala yãmb tʋm-tʋmdã ra pa mi baa fʋɩ yel-kãngã wɛɛngẽ ye.”+

16 La rĩmã yeelame yaa: “Hakɩɩka, fo na n kiime+ Ahimelɛke. Foo ne f ba wã zakã rãmb fãa na n kiime.”+ 17 Rẽ poore, rĩmã yeela gũudbã* sẽn da gũbg-a n yasẽ wã yaa: “Wẽnemd-y n kʋ-y-yã a Zeova maan-kʋʋdbã, bala b bee a Davɩɩd poorẽ! Bãmb da miime t’a Davɩɩd ra zoetame n na n põsg maam, la b pa togs maam ye!” La rĩmã tʋm-tʋmdbã ra pa rat n sak n kʋ a Zeova maan-kʋʋdbã ye. 18 Dẽ, rĩmã yeela a Doɛɛg+ yaa: “Wẽnemd n kʋ maan-kʋʋdbã! Tao-tao bala, Edom ned+ a Doɛɛg kẽngame n kʋ maan-kʋʋdbã a toore. Baraare, yẽ kʋʋ maan-kʋʋdb* pis-nii la a nu.+ 19 Sẽn paase, a kʋʋ Noob+ sẽn yaa maan-kʋʋdbã tẽngã neb ne sʋʋga. Yẽ kʋʋ rapã ne pagbã, kambã ne kom-peelsã, niisã, bõensã la piisã fãa ne sʋʋga.

20 La a Ayituub biig a Ahimelɛk biig a yembr n paam n põse. A yʋʋr la a Abiyataare.+ Yẽ zoeeme n kẽng a Davɩɩd nengẽ. 21 A yeela a Davɩɩd yaa: “A Sayull kʋʋ a Zeova maan-kʋʋdbã.” 22 T’a Davɩɩd yeel a Abiyataar yaa: “Mam da mii vẽeneg tɩ Edom ned a Doɛɛg sẽn da be be baraarã,+ a na n tɩ togsa a Sayulli. Mam tara taal fo ba wã zakã rãmb fãa kũumã pʋgẽ. 23 Pa ne maam. Ra yɛɛs ye. Bala ned sã n dat n yãk fo yõorã, yaa mam yõorã la a rat n yãke. Mam na n kogla foom.”+

23 B wa n yeela a Davɩɩd yaa: “Filisti nebã zabda ne Keyila,+ n zɛɛd koodã zɛɛsẽ wã.” 2 Dẽ, a Davɩɩd soka a Zeova yaa:+ “M segd n kẽng n tɩ zaba ne Filisti nebã bɩ?” T’a Zeova yeel a Davɩɩd yaa: “Kẽng n tɩ zab ne Filisti nebã n fãag Keyila.” 3 La a Davɩɩd nebã yeel-a lame yaa: “Gese! Tõnd bee Zida+ ka, la rabeem tara tõndo. Tõnd sã n kẽng Keyila n na n tɩ zab ne Filisti nebã, na n yɩɩ wãna?”+ 4 Woto, a Davɩɩd leb n soka a Zeova+ n na n bãng a sẽn tog n maane. T’a Zeova leok-a yaa: “Yik n kẽng Keyila, bala m na n ninga Filisti nebã fo nugẽ.”+ 5 Dẽ, a Davɩɩd ne a nebã kẽnga Keyila n tɩ zab ne Filisti nebã. A kʋʋ bãmb wʋsgo, n dees b rũmsã la a fãag Keyila+ nebã.

6 A Ahimelɛk biig a Abiyataar+ sẽn wa n na n zoe n kẽng a Davɩɩd nengẽ Keyila wã, a zãa efoode.* 7 B tɩ togsa a Sayull t’a Davɩɩd kẽnga Keyila. Dẽ, a Sayull yeelame yaa: “Wẽnnaam ning-a-la mam nugẽ,*+ bala yẽ tɩ kẽe tẽng sẽn tar kʋɩlens ne sogdse, n bẽd a menga.” 8 Woto, a Sayull boola a tãb-biisã fãa sẽn na yɩl tɩ b kẽng Keyila n tɩ gũbg a Davɩɩd ne a nebã. 9 A Davɩɩd sẽn bãng t’a Sayull magd n na n wa zaba ne-a wã, a yeela maan-kʋʋd a Abiyataar yaa: “Wa ne efoodã ka.”+ 10 A Davɩɩd yeelame yaa: “Israyɛll Wẽnnaam a Zeova! Mam sẽn yaa yãmb tʋm-tʋmdã wʋmame t’a Sayull rat n wa zaba ne Keyila, n sãam tẽngã mam yĩnga.+ 11 Keyila tẽngã taoor dãmbã* na n ninga maam yẽ nugẽ bɩ? A Sayull na n sɩd waa Keyila wa yãmb tʋm-tʋmdã sẽn wʋmã bɩ? Israyɛll Wẽnnaam a Zeova, m bõos tɩ y leok-ma.” T’a Zeova leok yaa: “A na n waame.” 12 A Davɩɩd sokame yaa: “Keyila tẽngã taoor dãmbã na n ninga maam ne m nebã a Sayull nugẽ bɩ?” T’a Zeova leoke: “B na n ninga yãmb a nugẽ.”

13 Woto, a Davɩɩd ne a nebã yika tao-tao n yi Keyila n kẽng zĩig ning fãa b sẽn da tõe n kẽnge. Ra yaa na maan rap kobs-yoobe.+ A Sayull sẽn wʋm t’a Davɩɩd zoe n yii Keyila wã, a pa pʋg-a ye. 14 A Davɩɩd paa we-raoogẽ wã, zĩis nins kẽngr sẽn pa nana wã, Zɩf+ we-raoogã zĩig ning sẽn yaa tãensã. A Sayull da baooda a Davɩɩd wakat fãa,+ la a Zeova pa ning-a yẽ nugẽ ye. 15 A Davɩɩd sẽn wa n be Horɛse, Zɩf we-raoogẽ wã, a ra miime* t’a Sayull baood-a lame n na n kʋ.

16 A Sayull biig a Zonatã kẽnga Horɛs a Davɩɩd nengẽ, n tɩ keng a raood t’a maneg n kɩs a Zeova sɩda.+ 17 A yeel-a lame yaa: “Ra zoe rabeem ye. Bala m ba a Sayull pa na n paam foo ye. Fo na n lebga Israyɛll rĩm+ tɩ mam yɩ fo pʋgdga. M ba a Sayull mengã mii rẽ.”+ 18 Dẽ, bãmb b yiibã maana kaool+ a Zeova taoore. A Davɩɩd paa Horɛse, t’a Zonatã lebg n kuil a yiri.

19 Zɩf nebã kẽnga a Sayull nengẽ Gibeya,+ n tɩ yeel-a yaa: “A Davɩɩd solga zĩig sẽn pẽ tõndo.+ Yaa zĩis nins kẽngr sẽn pa nana wã, sẽn be Horɛse,+ Hakɩla kunkubrã+ sẽn be Zesimon* nug-goabgã.+ 20 N-na! Sẽn yaa wakat ning fãa la y rat bɩ y wa tɩ d na n ning-a-la yãmb nugẽ.”+ 21 Rẽ la a Sayull yeel-yã: “Bɩ a Zeova ning yãmb barka, bala yãmb zoee mam nimbãanega. 22 M kotame tɩ y kẽng n tɩ bao n bãng a sẽn be zĩig ningã takɩ, la ned ning sẽn yã-a wã, n wa togs-ma. Bala b yeela maam t’a tara sɩlem wʋsgo. 23 Maag-y y yĩng n bãng a zĩ-solgdsã n wa togs-m vẽenega. Dẽ, mam na n tũu yãmba, la a sã n bee tẽngẽ wã, mam na n gẽes-a-la Zida buudã neb fãa* sʋka.”

24 Woto, bãmb loogame n deng a Sayull Zɩfe.+ Rẽ t’a Davɩɩd ne a nebã ra bee Mawon+ we-raoogẽ wã, Araba wã+ sẽn be Zesimon nug-goabgã. 25 A Sayull waa ne a nebã n na n gẽes a Davɩɩde.+ B sẽn togs a Davɩɩdã, zĩig pʋgẽ, a tɩ solga pĩigẽ,+ Mawon we-raoogẽ wã n pa be. A Sayull sẽn wʋm dẽ, a pʋgla a Davɩɩd Mawon we-raoogẽ wã. 26 A Sayull ra bee tãngã kɩreng a yembrẽ, t’a Davɩɩd ne a nebã be tãngã kɩreng a to wã. A Davɩɩd ra nangda a na zoe n põsg+ a Sayulli, la a Sayull ne a nebã ra tara a Davɩɩd ne a nebã kolgre, n dat n yõg-ba.+ 27 La koe-taasd n wa n yeel a Sayull yaa: “Wa-y tao-tao tɩ Filisti nebã zabda ne tẽngã!” 28 Woto, a Sayull basa a Davɩɩd rigbu,+ n kẽng n na n tɩ zab ne Filisti nebã. Rẽ n so tɩ b boond zĩ-kãng tɩ Welgr pĩiga.

29 Dẽ, a Davɩɩd yii be n dɩk sor n kẽng Ɛn-gedi+ zĩis nins kẽngr sẽn pa nana wã, n tɩ pa be.

24 A Sayull sẽn tɩ rig Filisti nebã n lebg n wa wã bala, b yeel-a lame yaa: “Ad a Davɩɩd bee Ɛn-gedi+ we-raoogẽ wã!”

2 Dẽ, a Sayull yãka rap tus a tãab Israyɛll nin-buiidã fãa sʋk tɩ b yãag-a tɩ b na n tɩ gẽes a Davɩɩd ne a nebã pĩisẽ wã, we-bʋʋsã sẽn beẽ wã. 3 A Sayull wa n taa piis yãg sẽn maan ne kug n be sorã noore. Bok n da be beenẽ, t’a kẽ n na n maan we-kɛɛnga,* la a Davɩɩd ne a nebã ra bee bokã yaang n zĩẽ.+ 4 A Davɩɩd nebã yeel-a lame yaa: “Rũndã, a Zeova yeta foo yaa: ‘Gese! Mam ninga fo bɛ wã f nugẽ.+ Fo tõe n maan-a-la bũmb ning fãa f sẽn date.’” Dẽ, a Davɩɩd yikame n soos n wõrg a Sayull kobr sẽn yaa bãg-vɩɩdã noore. 5 La rẽ poore, a Davɩɩd sũurã kiuusame,+ a sẽn wõrg a Sayull kobrã noorã yĩnga. 6 A Davɩɩd yeela a nebã yaa: “A Zeova yĩnga, mam pa na n saag n maan m zu-soabã, a Zeova sẽn yãkã* bõn-kãng ye. Mam pa na n maan-a wẽnga, bala yaa a Zeova n yãk-a.”+ 7 A Davɩɩd sẽn yeel woto wã, a gɩdga a nebã tɩ b pa maan a Sayull wẽng ye. La a Sayull yik n yii bokẽ wã, n dɩk a sor n teesdẽ.

8 Dẽ, a Davɩɩd me yii bokã pʋgẽ n zẽk a koɛɛg n yeel a Sayull yaa: “M zu-soab la m dĩma!”+ A Sayull sẽn wẽnemde, a Davɩɩd sulgame n wõgemd n fõgen a neng tẽnga. 9 A Davɩɩd yeela a Sayull yaa: “Bõe yĩng tɩ yãmb kelgd neb nins sẽn yet tɩ mam dat n maana yãmb wẽngã goamã?+ 10 Rũndã daarã, yãmb mengã yãame t’a Zeova ninga yãmb mam nugẽ bokã pʋgẽ. Ned n yeel maam tɩ m kʋ yãmba.+ La mam zoee yãmb nimbãaneg n yeele: ‘Mam pa na n maan m zu-soabã wẽnga, bala a Zeova n yãk-a.’*+ 11 M ba, ges-y yãmb kobrã sẽn yaa bãg-vɩɩdã noor sẽn be mam nugẽ. Mam sẽn wa n wõrgd yãmb kobrã noorã, mam da tõe n kʋʋ yãmba, la m pa kʋ-y ye. Yãmb meng neeme la y bãngame tɩ m pa rat n maan yãmb wẽnga, wall m lebg tõtr ye. M leb n pa beeg yãmba,+ tɩ yãmb yaool n digd maam n dat n yãk m yõorã.*+ 12 Bɩ a Zeova bʋ maam ne yãmb sʋka,+ la bɩ a Zeova rok mam sũur ne yãmb n kõ-ma.+ La mam yẽ nug kõn sɩɩs yãmb ye.+ 13 Wa pĩnd wẽndẽ yel-bũndã sẽn yeelã: ‘Wẽng yita nin-wẽns nengẽ.’ Mam yẽ nug kõn sɩɩs yãmb ye. 14 Israyɛll rĩmã yiime n na n dig maam bɩ? Mam yaa ãnda? Mam yaa wa ba-kɩɩnga, la wa ãbg bal wɛ.+ 15 Bɩ a Zeova yɩ bʋ-kaooda. Bɩ a bʋ maam ne yãmb sʋka. Yẽ n na n ges yellã n sõng maam+ la a kao bʋʋdã n fãag maam yãmb nugẽ.”

16 A Davɩɩd sẽn gom woto n sa, a Sayull yeelame: “M biig a Davɩɩde, yaa fo koɛɛg la m sẽn wʋmdã bɩ?”+ Dẽ, a Sayull zẽka a koɛɛg n yãbe. 17 A yeela a Davɩɩd yaa: “Fo yaa tɩrg n yɩɩd maam. Bala fo maana maam neere, tɩ mam dol foo wẽnga.+ 18 Rũndã, a Zeova sẽn ning maam fo nugẽ tɩ fo pa kʋ maamã, fo wilgame tɩ f sɩd rata m neere.+ 19 Bala ãnd n na n paam a bɛ n bas-a t’a loog n pa maan-a wẽnga? A Zeova na n dola foo neer+ ning fo sẽn maan maam rũndã wã yĩnga. 20 Masã, kelge. Mam miime tɩ fo na n lebga rĩma,+ la tɩ Israyɛll rĩungã na n kaoosa fo nugẽ. 21 La bɩ f wẽen ne a Zeova+ tɩ mam kũum poore, fo pa na n menes mam yagensã la f kɩt tɩ mam yʋʋr menem m ba wã roog neb sʋk ye.”+ 22 Woto, a Davɩɩd wẽena a Sayull taoore. La a Sayull lebg n kuilame+ t’a Davɩɩd ne a nebã kẽng zĩ-soalgdgẽ wã.+

25 A Sãmwɛll+ wa n kiime, tɩ Israyɛll nebã fãa tigim taab n yãb-a la b mum-a a yirã Rama.+ Dẽ, a Davɩɩd yikame n kẽng Paran we-raoogẽ wã.

2 Rao a ye n da be Mawon+ t’a rũmsã be Karmelle.*+ A ra yaa rakãag-kẽenga, n da tar piis tus a tãabo, la bʋʋs tusri. Yẽ ra wõrsda a piisã Karmelle. 3 Raoã yʋʋr la a Naballe,+ t’a pagã yʋʋr la a Abigayɩlle.+ Pagã ra yaa neere, n tar yam. A sɩdã ra yaa Kalɛɛb buudã neda,+ n yaa nin-toaag la tʋʋm-yood soaba.+ 4 A Davɩɩd zĩnda we-raoogẽ wã n wʋm t’a Naball wõrsda a piisi. 5 Woto, a Davɩɩd tʋma kom-bɩɩs piig a Naball nengẽ, n yeel-ba: “Kẽng-y Karmelle, la yãmb sã n ta a Naball nengẽ bɩ y sok a keelem mam yʋʋr yĩnga. 6 Rẽ poore, bɩ y yeele: ‘Wẽnd na kaoos yãmba, la bɩ yãmb ne y zakã rãmba, la bũmb nins fãa y sẽn so wã zĩnd laafɩ. 7 Mam wʋmame tɩ yãmb wõrsda y piisi. Yãmb rũm-kɩɩmbã sẽn wa n be ne tõndã, tõnd pa maan-b wẽng ye.+ Wakat ning fãa b sẽn zĩnd Karmellã, b bũmb baa a ye pa menem ye. 8 Sok-y y kom-bɩɩsã tɩ b na togs-yã. Bɩ y reeg m nebã neere, bala yaa sũ-noog wakat* la tõnd wa-yã. M bõos tɩ y kõ y tʋm-tʋmdbã ne y biig a Davɩɩd bũmb ning y sẽn tare.’”+

9 Woto, a Davɩɩd nebã kẽngame n tɩ togs a Naball a Davɩɩd koeesã fãa. Bãmb sẽn gom n sa, 10 a Naball leok-b lame yaa: “A Davɩɩd la ãnda, la a Zese* biigã la ãnda? Tʋm-tʋmdb sẽn zoet n basd b zu-soben-dãmb rũndã-rũndã sõor waooga.+ 11 Mam na rɩk m burã ne m koomã la m nemdã m sẽn bees n na n kõ m pe-wõrsdbã, n kõ neb m sẽn pa mi b sẽn yitẽ?”

12 A Davɩɩd nebã lebg n leba a nengẽ n tɩ togs-a a Naball goamã fãa. 13 Zĩig pʋgẽ, a Davɩɩd yeela a nebã yaa: “Bɩ ned kam fãa sẽbg a sʋʋga!”+ Dẽ, bãmb fãa sẽba b sʋʋse, t’a Davɩɩd me sẽbg a sʋʋga. Yɩɩ na maan rap kobs-naas n tũ a Davɩɩde, tɩ bãmb kobs-yi pa n gũ teedã.

14 Wakat kãnga, tʋm-tʋmd a ye n tɩ yeel a Naball pag a Abigayɩll yaa: “A Davɩɩd tʋma neb tɩ b yi we-raoogẽ wã n wa sok tõnd zu-soabã keelem, la a tʋ-b lame n kãas-b raado.+ 15 Nin-kãensã maana tõnd neer wʋsgo. Bãmb pa tol n maan tõnd wẽng ye. Wakat ning fãa tõnd sẽn zĩnd weoogẽ wã ne bãmbã, d bũmb baa a ye pa menem ye.+ 16 Bãmb da yaa wa lalg sẽn gũbg tõnd n kogend tõnd wĩntoog la yʋngo, wakat ning fãa tõnd sẽn zĩnd ne bãmb n da kɩɩmd rũmsã. 17 Masã, bɩ y ges y sẽn na n maanega, bala yaa vẽeneg tɩ bõn-kãngã na n waa ne yel-beed tõnd zu-soabã ne a zakã rãmb fãa zugu.+ La a yaool n yaa ned sẽn ka võore,+ tɩ ned pa tõe n gom ne-a ye.”

18 Woto, a Abigayɩll+ yika tao-tao n dɩk bur kobs-yi, ne divẽ rʋg-bɛd a yiibu, piis a nu b sẽn manege, kood b sẽn sẽ seya* a nu, viyn biis b sẽn kʋɩɩs n gil bãmb koabga, la kankam-gil kobs-yi, n dɩk fãa n zɩlg bõense.+ 19 Yẽ yeela a tʋm-tʋmdbã yaa: “Reng-y-m taoore, tɩ m na n pʋgla yãmba.” La a pa yeel a sɩd a Naball tɩ bũmb ye.

20 Yẽ zomba bõang n dɩk sore. Tãngã ra lill-a lame t’a Davɩɩd ne a nebã ra kẽnd n segd-a, tɩ b wa yek taaba. 21 A Davɩɩd ra yetame yaa: “Mam sẽn gũ bũmb nins fãa nin-kãngã sẽn so wã we-raoogẽ wã yaa zaalem yĩnga. A bũmb baa a ye pa menem ye.+ La baa ne rẽ, a lebsda maam wẽnga, neer yĩnga.+ 22 Bɩ Wẽnnaam sɩbg a Davɩɩd bɛɛbã* ne sɩbg-kãsenga, mam sã n bas rao t’a põs a zakẽ wã ka ne beoogã vẽegre.”

23 A Abigayɩll sẽn yã a Davɩɩdã, a siga bõangã zug tao-tao, n wõgemd n fõgen a neng tẽng a Davɩɩd taoore. 24 A wõgemda a Davɩɩd naoẽ wã n yeele: “M zu-soaba, bɩ taalã zĩnd mam zugu. Bas-y tɩ y tʋm-tʋmd-poakã gom ne-yã, la bɩ y kelg yãmb tʋm-tʋmd-poakã goamã. 25 M kota m zu-soabã t’a ra rɩk ka-bark soab a Naball*+ manesmã n ning a sũurẽ ye. Bala a yaa wa a yʋʋrã bala: Ned sẽn ka yam. La y tʋm-tʋmd-poakã ra pa yã kom-bɩɩs nins m zu-soabã sẽn tʋmã ye. 26 Masã, m zu-soaba, m wẽenda ne a Zeova sẽn vɩ wã, la mam wẽenda ne yãmb sẽn vɩ wã tɩ yaa a Zeova n gɩdg yãmb+ tɩ y pa paam zɩɩm raagr taale,+ la y pa rok y sũur* y toor ye. Bɩ m zu-soabã bɛɛbã ne neb nins sẽn dat n maan-a wẽngã lebg wa a Naballe. 27 Masã, m zu-soaba, reeg-y kũunã+ yãmb tʋm-tʋmd-poakã sẽn tall n wa wã, n kõ kom-bɩɩsã sẽn tũud yãmbã.+ 28 M bõos tɩ y maan y tʋm-tʋmd-poakã sugr a beegrã yĩnga. Bala yaa vẽeneg t’a Zeova na n kɩtame tɩ m zu-soabã roogã kaoose,+ yãmb sẽn zabd a Zeova zabã yĩnga,+ la b sẽn pa yã wẽng buud baa a ye yãmb nengẽ y vɩɩmã tõrã yĩnga.+ 29 Ned sã n yik n digd m zu-soabã n dat n yãk a yõorã,* yãmb Wẽnnaam a Zeova na n kogla yãmb vɩɩmã* wa ned sẽn kogl bõn-sõma a sẽn vil n ning korg pʋgẽ to-to wã. La a na n loba yãmb bɛɛbã vɩɩm* wa ned sẽn lobd kugr ne loaabg to-to wã. 30 La a Zeova sã n wa pids bõn-sõma nins fãa a sẽn pʋlem m zu-soabã, la a yãk yãmb tɩ y lebg Israyɛll rĩma,+ 31 yãmb pa na n maan y bãngẽ bɩ y sãam y sũuri, y sẽn pa raag zɩɩm zaalem yĩnga, la y sẽn pa rok y sũur* y toorã me yĩnga.+ A Zeova sã n wa maan m zu-soabã neere, bɩ y tẽeg y tʋm-tʋmd-poakã yelle.”

32 Rẽ la a Davɩɩd yeel a Abigayɩll yaa: “Bɩ Israyɛll Wẽnnaam a Zeova paam pẽgre, a sẽn tʋm foo tɩ f seg maam rũndã wã! 33 La bɩ Wẽnnaam ning-f bark f yam-sõngã yĩnga! Bɩ f paam barka, bala fo gɩdga maam rũndã tɩ m pa paam zɩɩm raagr taale,+ la m pa rok m sũur* m toor ye. 34 Mam wẽenda ne a Zeova sẽn vɩ wã, la sẽn yaa Israyɛll Wẽnnaamã, soab ning sẽn gɩdg maam tɩ m pa maan foo wẽngã,+ tɩ fo sã n da pa waẽ tao-tao n seg maam,+ ka ne beoog yibeoog tɩ rao ra pa na n ketẽ a Naball zakẽ wã ye.”+ 35 Woto, a Davɩɩd reega bũmb nins a Abigayɩll sẽn tall n wa wã la a yeel-a yaa: “Lebg n kuil ne laafɩ tɩ m kelga f koɛɛgã, la mam na n maana bũmb ning f sẽn kosã.”

36 A Abigayɩll lebg n leba a Naball nengẽ, n tɩ mik t’a maand tigr a zakẽ wã wa rĩm tigri. A Naball sũurã ra noomame, la a ra yũu rãamã n tɩge. A Abigayɩll pa yeel-a tɩ bũmbu, hal tɩ beoogã vẽege. 37 Beoogã sẽn vẽeg t’a Naball rãamã yi, a pagã togs-a-la bũmba fãa. A Naball sũurã lebga wa ned sẽn ki sũuri, t’a lebg wa kugr n pa tõe n yẽrg ye. 38 Na maan rasem piig poore, a Zeova wẽe a Naball t’a ki.

39 A Davɩɩd sẽn wʋm t’a Naball kiime wã, a yeelame: “Bɩ a Zeova paam pẽgre, a Naball sẽn paoog maam+ tɩ yẽ sõng maamã yĩnga,+ la a sẽn gɩdg a tʋm-tʋmdã t’a pa maan wẽngã yĩnga.+ A Zeova kɩtame t’a Naball wẽnemã leb-a!” Rẽ poore, a Davɩɩd tʋmame tɩ b tɩ yeel a Abigayɩll t’a rat-a lame n maan a paga. 40 Woto, a Davɩɩd tʋm-tʋmdbã kẽnga a Abigayɩll nengẽ Karmelle, n tɩ yeel-a yaa: “A Davɩɩd tʋma tõnd tɩ d wa peeg foo n wa t’a maan a paga.” 41 Zĩig pʋgẽ, a Abigayɩll yikame n wõgemd n fõgen a neng tẽng n yeele: “Mam yaa yãmb yem-poak sẽn na n waasd m zu-soabã tʋm-tʋmdbã naoã.”+ 42 Dẽ, a Abigayɩll+ yika tao-tao n zomb a bõanga, t’a tʋm-tʋmd-pogs a nu be a poorẽ n pʋgd-a. Yẽ tũu a Davɩɩd nebã n tɩ lebg a paga.

43 A Davɩɩd ra zoe n kẽe kãadem ne Zizreyɛll+ pag a Ayinowam,+ la yẽ ne a Abigayɩll lebga a Davɩɩd pagba.+

44 La a Sayull da rɩka a bi-pugl a Mikall+ sẽn da yaa a Davɩɩd pagã, n kõ a Palti+ sẽn yaa Galim ned a Layis biigã.

26 Zɩf+ nebã wa n kẽnga a Sayull nengẽ Gibeya+ n tɩ yeel-a yaa: “A Davɩɩd tɩ solga Hakɩla kunkubrẽ wã, Zesimon*+ neng taoore.” 2 Woto, a Sayull yika ne rap tus a tãab a sẽn yãk Israyɛll nebã sʋka, tɩ b na n kẽng Zɩf we-raoogẽ wã n tɩ gẽes a Davɩɩde.+ 3 A Sayull tilga a tãb-sikã Hakɩla kunkubrẽ wã Zesimon neng taoore, sorã noore. Rẽ t’a Davɩɩd ra bee we-raoogẽ wã, la a wʋmame t’a Sayull waa be n na n bao-a. 4 A Davɩɩd tʋma neb tɩ b tɩ soos n ges a Sayull sã n sɩd waa be. 5 A Davɩɩd wa n kẽnga zĩig ning a Sayull sẽn tilg a tãb-sikã, n bãng zĩig ning a Sayull ne a Neer biig a Abneer+ sẽn yaa a tãb-biisã naabã sẽn gãeyã. A Sayull da gõee tãb-sikã sʋka, tɩ tãb-biisã karg n gũbg-a. 6 A Davɩɩd soka Hɛt ned+ a Ahimelɛk ne a Seruya+ biig a Abisayi+ sẽn yaa a Zowaab ba-biigã yaa: “Ãnd n na n tũ maam tɩ d kẽng a Sayull tãb-sikẽ wã?” T’a Abisayi leoke: “Mam na n tũu yãmba.” 7 A Davɩɩd ne a Abisayi soos n kẽnga tãb-biisã sẽn beẽ wã ne yʋngo, n tɩ mik a Sayull sẽn gõe tãb-sikã sʋka, t’a kãndã sel tẽng n be a zugẽ wã. A Abneer ne tãb-biisã ra gũbga a Sayull n gõe.

8 A Abisayi yeela a Davɩɩd yaa: “Rũndã, Wẽnnaam ninga yãmb bɛ wã y nugẽ.+ M bõos tɩ y bas tɩ m dɩdg-a ne tẽngã n kõs-a ne m kãndã vugr bala. M pa na n maan naoor a yiib ye.” 9 La a Davɩɩd yeela a Abisayi yaa: “Da maan-a bũmb ye. Bala ãnd n tõe n maan ned ning a Zeova sẽn yãkã*+ wẽng n pa paam taale?”+ 10 A Davɩɩd paasame: “Mam wẽenda ne a Zeova sẽn vɩ wã tɩ yaa a Zeova meng n na n kʋ-a,+ pa rẽ bɩ a na n kii wa ned buud fãa,+ wall a kẽng zabr tɩ b tɩ kʋ-a.+ 11 A Zeova yĩnga, mam pa na n saag n maan ned ning a Zeova sẽn yãkã wẽng ye.+ Wa tɩ d rɩk kãndã sẽn dɩg a zugẽ wã ne lɩngã n looge.” 12 Dẽ, a Davɩɩd rɩka kãndã ne lɩngã sẽn da be a Sayull zugẽ wã tɩ b looge. Ned baa a ye pa yã-b ye.+ Ned pa bãng bũmbu, wall a neke, bala b fãa ra gõeeme, a Zeova sẽn kɩt tɩ b ra gõe tamm wã yĩnga. 13 A Davɩɩd pɩʋʋgame n kẽng kɩreng a to wã. Yẽ tɩ yalsa tãngã zug yɩɩga, n zãag wʋsg ne a Sayull sẽn beẽ wã.

14 A Davɩɩd zẽka a koɛɛg n gom ne tãb-biisã la ne a Neer biig a Abneer+ n yeele: “Leok-m wɛ Abneere!” T’a Abneer leok yaa: “Fo yaa ãnd n zẽkd f koɛɛg n tiisd rĩmã?” 15 T’a Davɩɩd yeel a Abneer yaa: “Fo pa rao la? Fo to bee Israyɛll sɩda? Bõe yĩng tɩ fo pa gũ f zu-soab la f rĩmã? Bala sodaag n wa be n da rat n kʋ fo zu-soab la f rĩmã.+ 16 Fo sẽn maanã ka neer ye. M wẽenda ne a Zeova sẽn vɩ wã tɩ fo segda ne kũum. Bala fo pa gũ f zu-soabã a Zeova sẽn yãkã* ye.+ Gẽes n gese! Rĩmã kãndã ne a lɩngã+ sẽn da rɩg a zugẽ wã bee yɛ?”

17 A Sayull bãnga a Davɩɩd koɛɛgã n yeele: “M biig a Davɩɩde, yaa fo koɛɛg la m sẽn wʋmdã bɩ?”+ T’a Davɩɩd leoke: “N-ye, m zu-soab la m dĩma, yaa mam koɛɛga.” 18 A paasame yaa: “Bõe yĩng tɩ m zu-soabã rigd a tʋm-tʋmdã?+ Bõe la mam maan-yã, la m taalã yaa bõe?+ 19 M zu-soab la m dĩma, m bõos tɩ y kelg y tʋm-tʋmdã koɛɛga: Sã n yaa a Zeova n kɩt tɩ yãmb zabd ne maam, bɩ a reeg m kood biis kũunã. La sã n yaa neb n pirsd yãmba,+ bɩ kãab-wẽng zĩnd bãmb zug a Zeova taoore. Bala b riga maam n kɩt tɩ m pa le tõe n naag a Zeova nin-buiidã* ye.+ Yaa wa b sẽn yeel maam tɩ m kẽng n tɩ tũ bu-zẽms wẽnnaam-dãmba. 20 Bɩ m zɩɩmã da raag zĩig a to tɩ pa a Zeova sẽn beẽ wã ye. Bala Israyɛll rĩmã yiime n na n gẽes ãbg+ wa a sẽn baood koadeng tãensẽ.”

21 Rẽ la a Sayull yeel-yã: “Mam kongame.+ M biig a Davɩɩde, lebg n wa tɩ m pa na n le maan-f bũmb ye. Bala rũndã fo gesame tɩ mam vɩɩmã* tara yõod wʋsgo.+ Mam maana yalemdo, la m tudga wʋsgo.” 22 A Davɩɩd leokame: “Ad rĩmã kãndã! Tʋm-y bi-bɩɩg t’a wa reege. 23 Yaa a Zeova n na n keo ned kam fãa a tɩrlem+ la a pʋ-peelem. Bala rũndã a Zeova ninga yãmb mam nugẽ, la mam pa sak n na n maan ned ning a Zeova sẽn yãkã* wẽng ye.+ 24 Ges-y-yã! Rũndã, mam gesame tɩ yãmb vɩɩmã* tara yõod wʋsgo. Bɩ m vɩɩmã* me tall yõod wʋsg a Zeova nifẽ, la bɩ a fãag maam toog buud fãa pʋgẽ.”+ 25 A Sayull yeela a Davɩɩd yaa: “M biig a Davɩɩde, Wẽnd na ning-f barka. Hakɩɩka, fo na n tʋma tʋʋm-kãsemse, la fo na n paama tõogre.”+ A Davɩɩd dɩka sor n looge, t’a Sayull lebg n kuili.+

27 La a Davɩɩd yeela a sũurẽ yaa: “A Sayull na n kʋʋ maam daar a ye. Sẽn são ne maam yaa m sẽn na n zoe+ n kẽng Filisti soolmẽ wã. Dẽ, a Sayull pa na n le gẽes maam Israyɛll soolmã fãa pʋgẽ,+ la m na n paam n põsg-a lame.” 2 Woto, a Davɩɩd yika ne rap kobs-yoobã+ sẽn da tũud-a wã n kẽng a Mawok biig a Akis+ sẽn yaa Gat rĩmã nengẽ. 3 A Davɩɩd ne a rapã n paas b zagsã rãmb tɩ zĩnda ne a Akis Gat soolmẽ wã. A Davɩɩd pagb a yiibã ra bee ne-a. Yaa Zizreyɛll pag a Ayinowam+ ne a Abigayɩll+ sẽn yaa Karmell rao a Naball pʋg-kõorã. 4 B sẽn tɩ togs a Sayull t’a Davɩɩd zoe n kẽnga Gatã, a basa a gẽesgo.+

5 Dẽ, a Davɩɩd yeela a Akis yaa: “Y sũur sã n nooma ne maam bɩ y kõ-m zĩig y tẽn-kɩremsã sʋk tɩ m zĩndi. Y tʋm-tʋmdã pa segd n naag yãmb n zĩnd na-tẽngã pʋgẽ ye.” 6 Baraare, a Akis kõo yẽ Ziklaage.+ Rẽ n so tɩ hal n tãag rũndã, Ziklaag yaa Zida rĩm-dãmbã soolem.

7 Yɩɩ yʋʋmd la kiis a naas la a Davɩɩd sẽn zĩnd Filisti soolmã tẽn-kɩrengẽ wã.+ 8 A Davɩɩd ne a nebã ra kẽnd n zabda ne Gesʋʋr nebã,+ Girzi nebã, la Amalɛk nebã,+ bala b ra bee soolem ning sẽn sɩng ne Telam n zãag n ta Suur+ ne Ezɩpt toadgã. 9 A Davɩɩd sã n da tɩ zab ne soolmã neba, a kʋʋda pagbã la rapã fãa.+ La a wʋk piisã, niisã, bõensã la yʋgma wã ne futu, n leb a Akis nengẽ. 10 Dẽ, a Akis ra sokdame yaa: “Yãmb kẽng n tɩ zaba yɛ rũndã?” La a Davɩɩd ra leokdame tɩ bãmb kẽng n tɩ zaba ne Zida soolmã nug-goabgã,*+ wall a yeel tɩ ne Yerameyɛll nebã+ soolmã nug-goabga, pa rẽ bɩ a yeel tɩ yaa ne Kɛn nebã+ soolmã nug-goabga. 11 A Davɩɩd ra pa basd rao wall pag t’a põse, sẽn na yɩl tɩ b ra wa tall-b n kẽng Gat ye. Yẽ ra yetame yaa: “Yaa sẽn na yɩl tɩ b ra wa gom tõnd yell n yeel t’a Davɩɩd maana woto wall woto ye.” (A Davɩɩd sẽn zĩnd Filisti tẽn-kɩrengẽ wã, yaa woto la a ra maand wakat fãa.) 12 A Akis ra tẽeda a Davɩɩd n yet a sũurẽ yaa: ‘Yaa vẽeneg t’a lebga wa bõn-põosg Israyɛll nebã sẽn yaa a nin-buiidã nifẽ. Woto wã, a na n kell n yɩɩ mam tʋm-tʋmda.’

28 Wakat kãnga, Filisti nebã tigma b tãb-biisã n na n tɩ zab ne Israyɛll nebã.+ Dẽ, a Akis yeela a Davɩɩd yaa: “Fo mengã miime tɩ foo ne f nebã segd n tũu maam n kẽng zabrã.”+ 2 T’a Davɩɩd yeele: “Yãmb mii y tʋm-tʋmdã sẽn na n maanã vẽenega.” La a Akis leokame yaa: “Rẽ n so tɩ mam na n yãk foo tɩ f gũ maam wakat fãa.”*+

3 A Sãmwɛll ra kiime, tɩ Israyɛll nebã fãa yãb-a la b mum-a a yirã Rama.+ A Sayull ra kɩtame tɩ b menes neb nins sẽn gomd ne kɩɩmse, la bag-bʋgdbã tẽngã pʋgẽ.+

4 Filisti nebã tigma taab n kẽng Sunem+ n tɩ tilg b sikã. Dẽ, a Sayull tigma Israyɛll nebã fãa tɩ b tɩ tilg b sik Gilbowa.+ 5 A Sayull sẽn yã Filisti nebã sikã, a yɛɛsame hal t’a sũurã ra kiuusd wʋsgo.+ 6 A Sayull ra sokda a Zeova n na n bãng a sẽn segd n maane,+ la a Zeova zɩ n leok-a ne zãmsdo, wall ne Urim*+ pa rẽ bɩ ne no-rɛɛsdbã maasem ye. 7 A Sayull wa n baas n yeela a tʋm-tʋmdbã yaa: “Bao-y pag sẽn gomd ne kɩɩmse,+ tɩ m kẽng a nengẽ n tɩ gese.” T’a tʋm-tʋmdbã leoke: “Pag a ye n be Ɛn-door+ n gomd ne kɩɩmse.”

8 Woto, a Sayull yeesa a futã n yeelg fut a taab sẽn na yɩl tɩ ned ra bãng-a ye. Yẽ ne a rap a yiib kẽnga pagã nengẽ ne yʋngo. A yeela pagã yaa: “M bõos tɩ f gom ne kɩɩmsã+ n bool ned ning mam sẽn na n wilg foomã.” 9 La pagã leok-a lame yaa: “Fo mii bũmb ning a Sayull sẽn maanã vẽenega. A kɩtame tɩ b menes neb nins sẽn gomd ne kɩɩmsã, la bag-bʋgdbã tẽngã pʋgẽ.+ Bõe yĩng masã tɩ fo rat n bẽd maam* n kɩt tɩ b kʋ maam?”+ 10 Dẽ, a Sayull wẽena ne a Zeova n yeele: “Mam wẽenda ne a Zeova sẽn vɩ wã tɩ fo pa na n paam taal yel-kãngã pʋgẽ ye!” 11 Tɩ pagã sok yaa: “M bool ãnda n kõ-fo?” T’a Sayull leoke: “Bool a Sãmwɛll n kõ-ma.” 12 Pagã sẽn yã a “Sãmwɛllã,”*+ a zẽka a koɛɛg n kelem a pãng tɛk n yeel a Sayull yaa: “Bõe yĩng tɩ fo belg maam? Fo yaa a Sayulli!” 13 La rĩmã yeel-a lame yaa: “Da maan rabeem ye. Bõe la fo ne?” Tɩ pagã leok a Sayull yaa: “Mam nee ned sẽn yaa wa wẽnde, n puk tẽngã n yita.” 14 Zĩig pʋgẽ, a Sayull soka pagã yaa: “A yaa wãn-wãna?” Tɩ pagã leoke: “A yaa nin-kẽema, n yer kobr sẽn yaa bãg-vɩɩdo.”+ Rẽ masã la a Sayull bãng tɩ yaa a “Sãmwɛlle.” Yẽ wõgemdame n fõgen a neng tẽnga.

15 Dẽ, a “Sãmwɛll” soka a Sayull yaa: “Bõe yĩng tɩ fo kɩt tɩ b bool maam n tiis-ma?” T’a Sayull leoke: “Yaa yell n pak maam. Filisti nebã zabda ne maam, tɩ Wẽnnaam me loog n bas maam n pa le leokd maam ne no-rɛɛsdbã wall zãmsd maasem ye.+ Rẽ n so tɩ m boond-y n dat tɩ y togs-m m sẽn segd n maanega.”+

16 La a “Sãmwɛll” yeelame: “Bõe tɩ fo sokd maam n dat n bãng fo sẽn segd n maanega, t’a Zeova yaool n loog n bas foo n lebg f bɛ?+ 17 A Zeova na n pidsa bũmb nins a sẽn kɩt tɩ mam togsã: A Zeova na n deega rĩungã fo nugẽ n kõ ned a to, a Davɩɩde.+ 18 Yaa fo sẽn pa kelg a Zeova koɛɛgã, la fo sẽn pa menes Amalɛk nebã+ sẽn puug a sũurã yĩng la a Zeova sẽn maand foo woto rũndã wã. 19 Sẽn paase, a Zeova na n ninga foo ne Israyɛll nebã Filisti nebã+ nugẽ. Beoogo,+ foo ne f kom-dibli wã+ na n bʋʋga maam. A Zeova na n ninga Israyɛll tãb-biisã me Filisti nebã nugẽ.”+

20 Zĩig pʋgẽ, a Sayull lʋɩɩme n tẽeg n gãe tẽnga. Rabeem wʋsg yõka yẽ, a “Sãmwɛll” goamã yĩnga. A pãngã fãa ra saame, bala yẽ ra pa rɩ bũmb daarã ne yʋngã tõr ye. 21 Pagã sẽn pẽneg a Sayull n yã t’a yɛɛsa wʋsgã, a yeel-a lame yaa: “Yãmb tʋm-tʋmdã saka yãmb noorã. Mam gẽnega m yõor+ n maan bũmb ning yãmb sẽn yeel maam tɩ m maanã. 22 Masã, m bõos tɩ y kelg m sẽn na n yeelã. Bas-y tɩ m kõ-y bur tɩ y wãb n paam pãng n dɩk y sore.” 23 La rĩmã zãgsame, n yeele: “Mam pa na n dɩ ye.” La tʋm-tʋmdbã ne pagã kell n pẽdg-a lame, hal t’a wa sak n kelg-ba. Yẽ yika tẽngã n zĩnd gãagã zugu. 24 Pagã ra tara nag-bi-noabdg a zakẽ wã. Tao-tao bala, yẽ kʋʋ nag-bilã,* n yãk zom n nag n maan bur sẽn pa ning rabɩlle. 25 Yẽ rɩk n kõo a Sayull ne a tʋm-tʋmdbã tɩ b wãbe. Rẽ poore, b yika ne yʋngã n kuili.+

29 Filisti nebã+ tigma b tãb-biisã fãa Afɛke, tɩ Israyɛll nebã tɩ tilg b sikã Zizreyɛll+ ko-bundgã sɛɛgẽ. 2 Filisti nebã nanambsã ra kɩtdame tɩ b tãb-biisã pɩʋʋgd bãmb taoor koabg-koabg la tusr-tusri. La a Davɩɩd ne a nebã ra bee a Akis+ poorẽ n pʋgd-a. 3 Filisti nebã nanambsã sokame yaa: “Ebre nin-kãensã maanda bõe ka?” T’a Akis leok-ba: “Yaa Israyɛll rĩm a Sayull tʋm-tʋmd a Davɩɩde. A sẽn be ne maam yɩɩda yʋʋmd masã.+ A sẽn zoe n wa mam nengẽ wã tɛk n tãag rũndã, m pa tol n yã a sẽn maan bũmb sẽn yaa wẽng ye.” 4 La Filisti nebã nanambsã sũy yika ne a Akis tɩ b yeel-a yaa: “Kɩt t’a lebge.+ A leb zĩig ning fo sẽn kõ-a wã. A ra tũ tõnd n kẽng zabrẽ wã n wa tɩ wẽneg n zab ne tõnd ye.+ Bala bõe la a tõe n maan t’a zu-soabã sũur yɩ noog ne-a n yɩɩg a sẽn na n fiuus tõnd nebã zut n kõ-a? 5 Pa Davɩɩd-kãng yĩng la b sẽn da yɩɩnd la b saood n yetẽ:

6 Rẽ la a Akis+ bool a Davɩɩd n yeel yaa: “Mam wẽenda ne a Zeova sẽn vɩ wã tɩ fo yaa nin-tɩrga, la m sũur nooma fo sẽn dat n tũ m tãb-biisã n kẽng zabrã.+ Bala fo sẽn wa mam nengẽ wã tɛk n tãag rũndã,+ fo zɩ n maan bũmb sẽn yaa wẽng ye. La nanambsã pa kɩs foo sɩd ye.+ 7 Dẽ wã, lebg n kuil ne bãane, la f ra maan bũmb sẽn na n sãam Filisti nanambsã sũur ye.” 8 La a Davɩɩd soka a Akis yaa: “Bõe yĩnga? Bõe la mam maan-yã? Mam sẽn wa yãmb nengẽ wã tɛk n tãag rũndã, bõe la mam maan n beeg yãmba? M zu-soab la m dĩma, bõe yĩng tɩ mam pa segd n tũ yãmb n tɩ zab ne y bɛɛbã?” 9 A Akis leoka a Davɩɩd yaa: “Ne maam, fo yaa nin-sõng wa Wẽnnaam malɛka.+ La Filisti nebã nanambsã yeela maam tɩ m da bas tɩ fo tũ tõnd n kẽng zabrã ye. 10 Woto wã, yik yibeoog pĩnd ne f nebã tɩ y looge. Yik-y tɩ zĩigã sã n yẽeg bal bɩ y looge.”

11 Woto, a Davɩɩd ne a nebã yika yibeoog pĩnd n leb Filisti soolmẽ wã. La Filisti nebã loogame n kẽng Zizreyɛlle.+

30 A Davɩɩd ne a nebã sẽn ta Ziklaag+ rasem a tãab-n-soabã daare, b mikame tɩ Amalɛk nebã+ wa n zaba ne nug-goabg* sẽnesã nebã la ne Ziklaage, n yõog tẽngã bugum. 2 B talla pagbã+ la neb nins fãa sẽn da be tẽngã pʋgẽ wã n looge, kambã ne kãsembã fãa. Bãmb pa kʋ ned ye. B talla b fãa n looge. 3 A Davɩɩd ne a nebã sẽn ta tẽngẽ wã, b mikame tɩ b yõog-a-la bugum n tall b pagbã, b kom-dibli wã la b kom-pugli wã n looge. 4 Dẽ, a Davɩɩd ne a nebã zẽka b koees n yãb hal tɩ b pãngã sa. 5 B talla a Davɩɩd pagb a yiibã me n looge: Yaa Zizreyɛll pag a Ayinowamme, ne a Abigayɩll sẽn yaa Karmell rao a Naball pʋg-kõorã.+ 6 Yellã ra paka a Davɩɩd wʋsgo, bala a rapã ra gomdame tɩ b na n lob-a-la kug n kʋ, b sẽn tall bãmb kom-dibli wã la b kom-pugli wã n loog tɩ sũ-toog ra tar-b wʋsgã yĩnga. La a Davɩɩd teega a Wẽnnaam a Zeova n paam pãnga.+

7 A Davɩɩd yeela a Ahimelɛk biig a Abiyataar+ sẽn yaa maan-kʋʋdã yaa: “M bõos tɩ f wa ne efoodã* ka.”+ Dẽ, a Abiyataar talla efoodã n kẽng a Davɩɩd nengẽ. 8 A Davɩɩd soka a Zeova yaa:+ “M segd n pʋgla fãadbã bɩ? Mam na n paam-b lame bɩ?” Tɩ Wẽnnaam leoke: “Pʋgl-ba. Bala fo na n paam-b lame n fãag b sẽn tall b rãmb n loogã.”+

9 Zĩig pʋgẽ, a Davɩɩd ne neb kobs-yoobã+ sẽn da be ne-a wã yikame n bob n kẽng hal Besoor kosoogẽ wã, la neb kẽer paa be. 10 A Davɩɩd ne neb kobs-naas n kell n sãag taoore, la neb kobs-yi wã sẽn da yɛ wʋsg n pa tõog n pasgã paa Besoor kosoogẽ wã.+

11 Bãmb yãa Ezɩpt ned weoogẽ wã n tall-a n wa a Davɩɩd nengẽ. Bãmb kõ-a-la rɩɩb t’a rɩ, la koom t’a yũ, 12 la b wesg kankam-gilg n kõ-a, la b kõ-a viyn biis b sẽn kʋɩɩs n gil a yi. A sẽn dɩ n sa wã, a paama pãnga. Bala yẽ ra pa rɩ rɩɩb wall a yũ koom hal rasem a tãabo, wĩndg la yʋngo. 13 A Davɩɩd sok-a lame yaa: “Fo yaa ãnd neda, la yɛ la f yita?” T’a leoke: “Mam yaa Ezɩpt neda, n yaa Amalɛk rao yamba. Mam zu-soabã loogame n bas maam, mam sẽn lʋɩ bãag rasem a tãab masã wã yĩngã. 14 Tõnd tɩ zaba ne Kerɛt nebã+ soolmã nug-goabga,* la Zida soolmã ne Kalɛɛb+ soolmã nug-goabga,* la d yõog Ziklaag bugum.” 15 Rẽ la a Davɩɩd sok-a yaa: “Fo tõe n yãaga maam n kẽng fãadbã nengẽ bɩ?” T’a leok yaa: “Yãmb sã n wẽen ne Wẽnnaam tɩ y pa na n kʋ maam, la tɩ y pa na n ning maam m zu-soabã nugẽ, mam na n talla yãmb n kẽng b nengẽ.”

16 Woto, yẽ tall-b lame n kẽng zĩig ning fãadbã sẽn da sãeeg n pid tẽngã n dɩtẽ, n yũud la b kɩdemd sũ-noog b sẽn paam n zɛ teed wʋsg Filisti soolmẽ wã, la Zida soolmẽ wã yĩnga. 17 A Davɩɩd sɩng-b-la kʋʋb yibeoog pĩnd n tãag zaabre. Ned baa a ye pa põse,+ sã n pa neb kobs-naasã sẽn zomb yʋgma n zoe wã. 18 A Davɩɩd lebs n deega bũmb nins fãa Amalɛk nebã sẽn da tall n loogã,+ la a fãag a pagb a yiibã. 19 Bãmb bũmb baa a ye pa pa ye. Bõn-bõoneg la bõn-kãsemsã fãa. Bãmb lebs n deega b kom-dibli wã ne b kom-pugli wã la te-zɛɛdmã.+ A Davɩɩd lebs n deega bũmb nins fãa b sẽn da tall n loogã. 20 Dẽ, a Davɩɩd wʋka piisã fãa la niisã fãa t’a nebã tall-b n lʋɩɩs bãmb rũmsã taoore. Bãmb yeelame yaa: “A Davɩɩd te-zɛɛdmã la woto.”

21 A Davɩɩd babsa neb kobs-yi wã sẽn da pa Besoor kosoogẽ wã+ n pa tũ-a, b sẽn da yɛ wʋsgã yĩngã. Bãmb me yiime n na n seg a Davɩɩde. A Davɩɩd sẽn kolg-bã, a pʋʋs-b lame n sok b keelem. 22 La neb nins sẽn da tũ a Davɩɩd n kẽngã kẽer sẽn da yaa nin-wẽns la neb sẽn ka barkã yeelame yaa: “Bãmb sẽn pa tũ tõnd n kẽngã, d pa na n kõ-b baa fʋɩ teedã tõnd sẽn zɛ wã sʋk ye. B ned kam fãa peeg a pag ne a kamb bal n looge.” 23 La a Davɩɩd yeelame yaa: “M saam-biisi, yãmb pa segd n maan woto ne bũmb ning a Zeova sẽn kõ tõndã ye. Yẽ kogla tõnd la a ning neb nins sẽn wa n fã tõndã d nugẽ.+ 24 Ãnd n na n kõ yãmb bʋʋm yel-kãngã pʋgẽ? Ned ning sẽn kẽng zabrã pʋɩɩre, ne ned ning sẽn pa n gũ teedã pʋɩɩr na n yɩɩ a yembre.+ Nebã fãa na n paama pʋɩ-yɛnga.”+ 25 La baraar tɛk n tãag rũndã, a Davɩɩd sẽn yeelã lebga noor la tõog Israyɛlle.

26 A Davɩɩd sẽn lebg n leb Ziklaagã, a yãka te-zɛɛdmã n tʋm tɩ b tɩ kõ Zida kãsem-dãmbã sẽn yaa a zo-rãmbã, n yeele: “Ad kũun mam sẽn yãk a Zeova bɛɛbã te-zɛɛdmã sʋk n na n kõ-yã.” 27 A tʋmame me tɩ b tɩ kõ sẽn be-b Betɛllã,+ Ramot sẽn be Negɛɛb soolmẽ wã,* Yatɩɩrã,+ 28 Arowɛɛrã, Sifmotã, Ɛstemowa+ wã, 29 Rakall soolmẽ wã, Yerameyɛll nebã+ tẽnsẽ wã, Kɛn nebã+ tẽnsẽ wã, 30 Horma+ soolmẽ wã, Boor-asan soolmẽ wã, Atak soolmẽ wã, 31 Ebrõ+ soolmẽ wã, la sẽn be-b zĩis nins fãa a Davɩɩd ne a nebã sẽn da kẽngdã.

31 Filisti nebã ra zabda ne Israyɛll nebã,+ la bãmb da zoeta Filisti nebã taoore. Filisti nebã kʋʋ Israyɛll neb wʋsg Gilbowa tãngã zugu.+ 2 Filisti nebã ra rɩdgda a Sayull ne a kom-dibli wã. Bãmb paam n kʋʋ a Zonatã,+ a Abinadaab ne a Malkisuwa sẽn yaa a Sayull kom-dibli wã.+ 3 Zabrã ra lebga toog ne a Sayulli, tɩ tãb-tãoodbã paam-a n tão n pogl wʋsgo.+ 4 Woto, a Sayull yeela ned ning sẽn da zãad a zab-teedã yaa: “Wõog f sʋʋgã n kõs maam n kʋ tɩ nin-kãensã sẽn pa kẽ bãongã+ ra wa paam maam n nams wʋsg la b kʋ-m ye.” La sẽn zãad-a a zab-teedã zãgsame, bala rabeem n da tar-a wʋsgo. Dẽ, a Sayull wõoga a sʋʋgã n tilg n bas a meng n lʋɩ a zugu.+ 5 Ned ning sẽn da zãad a Sayull zab-teedã sẽn yã t’a Sayull kiime wã,+ yẽ me wõoga a sʋʋgã n kõs a meng n naag-a n ki. 6 Yɩɩ woto la a Sayull ne a kom-dibli a tãabã n paas ned ning sẽn da zãad a zab-teedã la a rapã fãa naag taab n ki baraare.+ 7 Israyɛll neb nins sẽn da be tẽn-nabrẽ wã la Zʋrdẽ soolmẽ wã sẽn bãng tɩ Israyɛll tãb-biisã zoeeme, la t’a Sayull ne a kom-dibli wã kiime wã, bãmb me zoeeme n bas tẽnsã.+ Filisti nebã wa n kẽe tẽn-kãens n soog-ba.

8 Vẽkembeoogã, Filisti nebã sẽn kẽng n na n tɩ zɛ sẽn ki-bã teedã, b yãa a Sayull ne a kom-dibli a tã wã sẽn ki n dɩg Gilbowa tãngã zugu.+ 9 Bãmb fiuuga a zugã la b wʋk a zab-teedã. Rẽ poore, b tʋma neb tɩ b saag Filisti soolmã n taas koɛɛgã+ b bõn-naandsã+ rotẽ la nin-buiidã sʋka. 10 Bãmb dɩka a zab-teedã n bĩng b wẽn-poak a Astarte roogẽ wã, la b yagl a kũumã Bɛt-san+ lalgã zugu. 11 Zabɛs-galaad+ nebã sẽn wʋm Filisti nebã sẽn maan a Sayull bũmb ninsã, 12 b gãndaadã fãa yikame n kẽn yʋng tõre, n tɩ yags a Sayull ne a kom-dibli wã kũumã Bɛt-san lalgẽ wã, n leb Zabɛs n tɩ yõog-b beenẽ. 13 Rẽ poore, b wʋka b kõabã+ n tɩ mum Zabɛs+ tamariis tɩɩgã tẽngre, la b loe noor dasem a yopoe.