A NEEMI SEBRE

1 Ad a Hakaliya biig a Neemi*+ goamã: Ra yaa yʋʋm pisi soabã Kislɛɛv* kiuugã. Rẽ tɩ mam bee na-yirã* sẽn be Suuzã.+ 2 Wakat kãnga, a Hanani+ sẽn yaa mam saam-biigã ne rap a taab yii Zida n wa. Mam sok-b-la Zʋɩf-rãmb nins sẽn kell yembsã+ sʋkã sẽn lebg n leb soolmẽ wã kibare, la Zerizalɛm yell me. 3 B leokame yaa: “Neb nins sẽn yi yembdã n lebg n wa be soolmẽ wã tara zu-loees wʋsgo, la b paamd paoogre.+ Zerizalɛm lalsã lʋɩɩme,+ t’a kʋɩlensã me rɩ bugum.”+

4 Mam sẽn wʋm gom-kãensa wã bala, mam zĩndame n sɩng yãbre, la m maan sũ-sãang rasem wʋsgo. Mam da loeta noore,+ la m pʋʋsd saasã Wẽnnaamã. 5 Mam yeelame: “Saasã Wẽnnaam a Zeova, yãmb yaa Wẽnnaam sẽn yaa kãsenga, tɩ nebã segd n zoe yãmb la b waoog-yã. Yãmb pidsda y kaoolã, la y maand neb nins sẽn nong yãmb la b tũud yãmb noyã neere.+ 6 M bõos tɩ y puk y nini, la y kɩll y tʋbr n kelg mam sẽn yaa yãmb tʋm-tʋmdã sẽn pʋʋsd yãmb rũndã wã. Wĩndg la yʋngo,+ mam pʋʋsda yãmb Israyɛll nebã sẽn yaa y tʋm-tʋmdbã yĩnga, la m vẽnegd yel-wẽnã Israyɛll nebã sẽn maan n beeg yãmbã n togsdẽ. Maam ne m ba wã roog fãa beegame.+ 7 Tõnd maana sẽn pa zems n beeg yãmba,+ d sẽn pa tũ yãmb noyã ne y tõodã y sẽn kõ y tʋm-tʋmd a Moyiizã.+

8 “M bõos tɩ y tẽeg goam nins y sẽn da yeel* y tʋm-tʋmd a Moyiizã. Yãmb da yeelame: ‘Yãmb sã n pa maan sɩd ne maam, mam na n sãeega yãmb buud toɛy-toɛyã sʋka.+ 9 La yãmb sã n lebg n wa mam nengẽ, n sak mam noyã la y tũ-ba, baa yãmb neb nins sẽn sãeegã sã n bee hal dũniyã tɛkẽ, mam na n tigma bãmb+ beenẽ n tall n wa zĩig ning mam sẽn yãk m yʋʋrã yĩngã.’+ 10 Bãmb yaa yãmb tʋm-tʋmdb la y nin-buiidu, y sẽn fãag ne y pãn-kãsengã, la ne y nugã sẽn tar pãngã.+ 11 Zeova, m bõos tɩ y kɩll y tʋbr n kelg y tʋm-tʋmdã pʋʋsgo, la y tʋm-tʋmdbã sẽn zoet yãmb* ne b sũy fãa wã pʋʋsgo. Rũndã, m bõos tɩ y kɩt tɩ y tʋm-tʋmdã sẽn datã tõoge, la y kɩt tɩ rĩmã zoe mam nimbãanega.”+

Wakat kãnga, mam da yaa rĩmã bõn-yũudl kɩta.+

2 Rĩm a Artazɛgzɛs+ naamã yʋʋm pisi soabã+ Nizã* kiuugã pʋgẽ, daar a ye, divẽ n da rɩg a taoore, tɩ mam pʋdg divẽ wã n kõ-a wa raasenkamã.+ La mam nengã ra zɩ n gãnem a taoor ye. 2 Rẽ la rĩmã sok maam yaa: “Bõe yĩng tɩ fo nengã gãnem woto tɩ f yaool n pa bẽedẽ? Yãoã pa bũmb a to n zʋʋg sũ-sãang ye.” Mam sẽn wʋm dẽ wã, rabeem wʋsg yõka maam.

3 Dẽ, mam yeela rĩmã yaa: “Wẽnd na kaoos rĩmã! Tẽng ning pʋgẽ b sẽn mum mam yaab-rãmbã sẽn lebg raboogo, t’a kʋɩlensã me rɩ bugmã,+ mam nengã na n yɩɩ wãn n da gãnme?” 4 Rĩmã soka maam yaa: “Yaa bõe la fo rat tɩ m maane?” Zĩig pʋgẽ, mam pʋʋsa saasã Wẽnnaamã.+ 5 La mam yeel-a lame yaa: “Sã n taa rĩmã yam, la sã n mik tɩ yãmb sũurã nooma ne mam sẽn yaa yãmb tʋm-tʋmdã, bɩ y tʋm maam Zida soolmẽ wã, tẽng ning pʋgẽ b sẽn mum mam yaab-rãmbã, tɩ m tɩ lebs n me-a.”+ 6 Rĩmã soka maam yaa: “Fo so-toakã na n kaoosa wakat a wãna, la wakat bʋg la f na n lebg n wa?” Rẽ tɩ na-pagã ra zĩi a sɛɛgẽ. Taa rĩmã yam t’a tʋm maam.+ Mam wilg-a-la wakat ning m sẽn na n lebg n wa wã.+

7 Dẽ, mam yeela rĩmã yaa: “Sã n taa rĩmã yam, bɩ a kɩt tɩ b gʋls sɛb n kõ maam, soolem ning sẽn be Kʋɩlgã*+ rʋʋndã guvɛrneer-dãmbã yĩnga, sẽn na yɩl tɩ m tõog n pasg ne laafɩ n ta Zida, 8 la b gʋls sebr Rĩmã tɩɩs gũud a Azaf yĩnga, sẽn na yɩl t’a kõ maam raad Tãn-soben-doogã+ sẽn be wẽnd-doogã* sɛɛgã yĩnga, ne tẽngã lals+ la roog ning pʋgẽ mam sẽn na n tɩ zĩndã yĩnga.” Rĩmã kõo maam bõn-kãense,+ bala mam Wẽnnaamã sẽn yaa sõmblem soabã ra bee ne maam.*+

9 Mam wa n taa soolem ning sẽn be Kʋɩlgã rʋʋndã guvɛrneer-dãmbã nengẽ, n kõ-b rĩmã sɛbã. Sẽn paase, rĩmã kɩtame tɩ tãb-biis nanambs ne wed-rʋʋdb tũ maam. 10 Horon ned a Sanbalat+ ne a Tobiya+ sẽn yaa Amon nebã+ nin-kãsengã* sẽn wʋm dẽ wã, b sũyã sãama wʋsgo, b sẽn yã tɩ ned n wa n na n maan Israyɛll nebã neerã yĩnga.

11 Mam wa n taa Zerizalɛm, n zĩnd be rasem a tãabo. 12 Mam yika ne yʋngo, maam ne rap a wãn bala. Rẽ tɩ mam da nan pa togs ned baa a ye bũmb ning mam Wẽnnaamã sẽn ning mam sũurẽ wã tɩ m maan Zerizalɛmmã ye. Rũng a to ra pa be ne tõnd n zʋʋg rũng ning mam sẽn da zao wã ye. 13 Ne yʋngã, mam tũu Longã rignoor+ n yi, n tɩ tũ Wag-bedrã bulgã noor n looge, n ta Tompɛglem dʋyã rignoore.*+ Mam gilg n gesa Zerizalɛm lalsã sẽn lʋɩ wã, ne a rignoyã sẽn dɩ bugmã.+ 14 Mam kẽngame n tɩ ta Bulgã rignoor+ ne Rĩmã bãkã, la vɩʋʋg ra pa be sẽn sek rũngã mam sẽn zao wã na tũ n loog ye. 15 Ne yʋngã, mam kell n sãagame n ta longã,*+ la m get lalgã. Rẽ poore, mam lebg n wa tũu Longã rignoor n kẽ tẽngã pʋgẽ, n kuili.

16 Kom-bɛɛmbã+ ra pa mi zĩig ning mam sẽn kẽngã, la bũmb ning mam sẽn da maandã ye. Bala mam da nan pa yeel Zʋɩf-rãmbã, maan-kʋʋdbã, nin-kãsemsã, kom-bɛɛmbã la tʋm-tʋmdb a taabã baa fʋɩ ye. 17 Mam wa n yeel-b lame yaa: “Yãmb nee zu-loɛɛg ning tõnd sẽn tarã. Zerizalɛm lebga raboogo, t’a kʋɩlensã me rɩ bugum. Wa-y tɩ d lebs n me Zerizalɛm lalsã, n yiis yãndã d zutu.” 18 Rẽ poore, mam wilg-b-la mam Wẽnnaamã sẽn yaa sõmblem soabã sẽn zĩnd ne maam to-to wã,+ la m togs-b goam nins rĩmã sẽn yeel maamã.+ Rẽ la b yeel yaa: “Bɩ d yik n me lalsã.” B kenga taab raood* tʋʋm-sõngã yĩnga.+

19 Horon ned a Sanbalat ne a Tobiya+ sẽn yaa Amon nebã+ nin-kãsengã, n paas a Gesɛm sẽn yaa Araabã+ sẽn wʋm dẽ wã, b sɩnga tõnd yaoolgo,+ la b paoogd tõnd n yetẽ: “Yaa bõe la yãmb sẽn maandã? Yãmb kɩɩsda rĩmã la?”+ 20 La mam leok-b lame yaa: “Yaa saasã Wẽnnaamã n yaa Soab ning sẽn na n kɩt tɩ tõnd tõog tʋʋmdã.+ Tõnd sẽn yaa yẽ tʋm-tʋmdbã na n yikame n me lalsã. La Zerizalɛm wɛɛngẽ, yãmb pa tar pʋɩɩre, noor wall bũmb y sẽn maan tɩ b na n tikd n tẽegd y yell ye.”+

3 Maan-kʋʋdb kãsem a Eliyasɩɩb+ ne a ba-biisã sẽn yaa maan-kʋʋdbã yikame n me Piisã rignoorã.+ B rɩk-a lame n kõ Wẽnnaam,*+ la b lugl a kʋɩlensã. B rɩka lalgã babg ning sẽn sɩng ne Piisã rignoorã n tãag Meya gasgã,+ la Meya gasgã tɛk n tãag Hananɛll gasgã+ n kõ Wẽnnaam. 2 Zeriko rapã+ ra bee bãmb taoor n metẽ, t’a Imri biig a Zakʋʋr me be Zeriko rapã taoor n metẽ.

3 A Hasena kom-dibli wã mee Zĩmã rignoorã.+ B lugla a raadã,+ a kʋɩlensã, a kʋɩlen-kuyã, la a sogdsã. 4 A Hakooz biig a Uuri biig a Meremot+ ra bee bãmb taoor n metẽ. A Mesezabɛll biig a Berekɩya biig a Mesulam+ ra bee yẽ taoor n metẽ, t’a Baana biig a Zadok me be yẽ taoor n metẽ. 5 Tekowa nebã+ ra bee a Baana biig a Zadok taoor n metẽ. La b nin-kãsemsã pa sak n na n sik b mens* n tʋm tɩ b yel-gɛtbã wilgd-b sor ye.

6 A Paseya biig a Zoyada ne a Besodiya biig a Mesulam manega Yi-kʋdã rignoorã.+ B lugla a raadã, a kʋɩlensã, a kʋɩlen-kuyã, la a sogdsã. 7 Gabawõ ned+ a Melatiya ne Meronot ned a Yadon ra bee bãmb taoor n metẽ. Bãmb yaa Gabawõ ne Mizpa+ rap sẽn sakd soolem ning sẽn be Kʋɩlgã*+ rʋʋndã guvɛrneere. 8 A Haraya biig a Uziyɛll sẽn da yaa yõakã ra bee bãmb taoor n metẽ. A Hananiya sẽn da maand ka-zɛɛdmã* ra bee yẽ taoor n metẽ. Sẽn paase, bãmb gãnega Zerizalɛm ne kug* hal n tãag Lal-taokã.+ 9 A Huur biig a Refaya sẽn yaa Zerizalɛm soolmã pʋɩ-sʋk a ye naabã ra bee bãmb taoor n metẽ. 10 A Harumaf biig a Yedaya lʋɩɩ yẽ taoor n me a mengã zak sɛɛga, t’a Hasabneya biig a Hatus ra be yẽ taoor n metẽ.

11 A Harim+ biig a Malkiya ne a Pahat-mowaab+ biig a Hasuub mee lalgã babg a to,* n paas Wʋmsã gasgã.+ 12 A Aloyɛs biig a Salum sẽn yaa Zerizalɛm soolmã pʋɩ-sʋk a ye naabã ne a kom-pugli wã ra bee bãmb taoor n metẽ.

13 A Hanun ne Zanowa+ nebã manega Longã rignoore.+ B me-a lame, n lugl a kʋɩlensã, a kʋɩlen-kuyã la a sogdsã. B mee lalgã kãntɩɩg tusri,* hal n ta Tompɛglem dʋyã rignoore.+ 14 A Rekaab biig a Malkiya sẽn yaa Bɛt-akerɛm+ soolmã naabã manega Tompɛglem dʋyã rignoore. A me-a lame, n lugl a kʋɩlensã, a kʋɩlen-kuyã la a sogdsã.

15 A Koloze biig a Salun sẽn yaa Mizpa+ soolmã naabã manega Bulgã rignoorã.+ A me-a lame, la a me a bɛoongã, n lugl a kʋɩlensã, a kʋɩlen-kuyã la a sogdsã. A manega Bãkã kosoogã+ sẽn pẽ Rĩmã zẽedã zĩigẽ+ wã lalga, n tãag rʋʋdg+ ning sẽn yit a Davɩɩd tẽngẽ wã+ n sigdã.

16 Sẽn pʋgde, a Azbuk biig a Neemi sẽn yaa Bɛt-sʋʋr+ soolmã pʋɩ-sʋk a ye naabã meeme, n sɩng ne a Davɩɩd Yaad zĩisã+ n tãag bãk+ ning b sẽn da tukã, la hal n tãag Pãens rãmbã roogo.

17 Sẽn pʋgde, Levi buudã neb meeme: A Bani biig a Rehum meeme, t’a Hasabiya sẽn yaa Keyila+ soolmã pʋɩ-sʋk a ye naabã ra be yẽ taoor n met a soolmã yʋʋr yĩnga. 18 Levi buudã neb a taabã ra bee a Hasabiya taoor n metẽ. A Henadaad biig a Bavayi sẽn yaa Keyila soolmã pʋɩ-sʋk a ye naabã n da lʋɩt b taoore.

19 A Yesuwa+ biig a Ezɛɛr sẽn yaa Mizpa naabã lʋɩɩ bãmb taoore, n maneg lalgã babg a to sẽn tees zab-teedã bĩngr zĩigã sẽn be zĩig ning b sẽn me n paas lalgã pãngã.+

20 A Zabayi+ biig a Baruk lʋɩɩ yẽ taoor n tʋm ne yẽesem, n maneg lalgã babg a to, sẽn sɩng ne zĩig ning b sẽn me n paas lalgã pãngã n tãag maan-kʋʋdb kãsem a Eliyasɩɩb+ zakã rignoore.

21 A Hakooz biig a Uuri biig a Meremot+ lʋɩɩ yẽ taoor n maneg lalgã babg a to, sẽn sɩng ne a Eliyasɩɩb zakã rignoor n tãag a Eliyasɩɩb zakã baasgẽ.

22 Maan-kʋʋdb nins sẽn yaa Zʋrdẽ+ kʋɩlgã soolmã rapã ra bee yẽ taoor n metẽ. 23 A Bẽnzame ne a Hasuub lʋɩɩ bãmb taoor n me b mengã zak sɛɛga. A Ananiya biig a Maaseya biig a Azariya lʋɩɩ bãmb taoor n me a mengã zak sɛɛga. 24 A Henadaad biig a Binuwi lʋɩɩ bãmb taoor n me lalgã babg a to, sẽn sɩng ne a Azariya zakã n tãag zĩig ning b sẽn me n paas lalgã pãngã,+ la hal n tãag lalgã gõdrã zĩigẽ.

25 A Uzayi biig a Palall lʋɩɩ yẽ taoor n me zĩig ning b sẽn paas lalgã pãngã taoore, ne gasgã sẽn me n tong Rĩmã zakã,*+ gasg ning sẽn yaa wok n yɩɩd n be Gũudbã samandẽ wã.+ A Paros+ biig a Pedaya ra bee yẽ taoor n metẽ.

26 Wẽnd-doogã tʋm-tʋmdb*+ nins sẽn da be Ofɛllã+ meeme n tãag Koomã rignoor+ sẽn be yaangã ne gasg ning sẽn be lalgã zugã.

27 Tekowa nebã+ lʋɩɩ bãmb taoor n me lalgã babg a to, sẽn sɩng ne gas-kẽeng ning sẽn be lalgã zugã n tãag Ofɛll lalgã.

28 Maan-kʋʋdbã sɩnga Wed-moosã rignoorã+ tɛka, tɩ ned kam fãa maneg lalgã babg ning sẽn tees a zakã.

29 A Imeer biig a Zadok+ ra bee bãmb taoor n met a mengã zak sɛɛga.

A Sekaniya biig a Semaya sẽn yaa Yaang rignoorã+ gũudã ra bee yẽ taoor n metẽ.

30 A Selemiya biig a Hananiya ne a Hanun sẽn yaa a Salaf bi-ribl a yoob-n-soab lʋɩɩ yẽ taoor n me lalgã babg a to.

A Berekɩya biig a Mesulam+ lʋɩɩ bãmb taoor n me a meng roogã sɛɛga.

31 A Malkiya sẽn yaa yõgsã sull nedã lʋɩɩ yẽ taoor n me hal n ta wẽnd-doogã tʋm-tʋmdbã*+ ne lɛɛbdbã roogã sẽn be Gesgã rignoorã taoorã, la a me n ta yĩngr doogã sẽn be gõdrẽ wã.

32 Yɩɩ yõgsã ne lɛɛbdbã n me yĩngr doogã sẽn be gõdrẽ wã ne Piisã rignoorã+ sʋka.

4 A Sanbalat+ sẽn wʋm tɩ tõnd lebs n meta lalgã, a sũurã puugame. Sẽn paase, a sũurã sãama wʋsgo, t’a ra yaand Zʋɩf-rãmbã. 2 A yaasa a tũud-n-taasã ne Samari tãb-biisã taoor n sok yaa: “Yaa bõe la Zʋɩf-rãmbã sẽn ka võorã maanda? B na n maana bõn-kãng b toor bɩ? B na n kʋʋ maand bɩ? B na n saa tʋʋmdã daar-n-yɛng bɩ? B na n tõog n talla kugã bugmã sẽn dɩ tɩ be sagdã* pʋgẽ wã n me sɩda?”+

3 Amon ned+ a Tobiya+ sẽn da yas a sɛɛgẽ wã yeelame: “Baa waag* sã n dʋ kugã lalgã b sẽn metã zugu, lalgã na n siigame.”

4 Tõnd Wẽnnaam, kelg-y b sẽn paoogd tõndã,+ la y kɩt tɩ b tʋyã lebg n sig b mensã zutu.+ Kɩt-y tɩ b yõg-b n kẽng yembd weoog wa te-zɛɛdem. 5 Bɩ y ra lud b taalã, la bɩ b yel-wẽndã ra yẽes yãmb taoor ye.+ Bala b tʋʋ metbã.

6 Dẽ, tõnd kell n mee lalgã, tɩ lalgã fãa wa sog taaba. Tõnd mee lalgã n tãag a zãntlmã pʋɩ-sʋka. Nin-buiidã kell n tʋma ne b sũur fãa.

7 La a Sanbalate, a Tobiya,+ Araab-rãmbã,+ Amon nebã, la Asdood nebã+ sẽn wʋm tɩ Zerizalɛm lalsã manegr kẽngda taoore, la tɩ d yẽta võyã, b sũyã puuga wʋsgo. 8 B seda taab n na n wa zab ne Zerizalɛm, n wa ne rãmbgo. 9 La tõnd pʋʋsa tõnd Wẽnnaamã, la d yals gũudb wĩndg la yʋng sẽn na yɩl tɩ b kogend tõnd d bɛɛbã yĩnga.

10 Baa ne rẽ, Zida neb n da yete: “Tʋm-tʋmdbã* pãng saame, tɩ sagdã* me yaa wʋsgo. Tõnd pa na n tol n tõog n me lalgã n sa ye.”

11 Tõnd bɛɛbã me ra yetame: “Bãmb ne b na n bãng wall b yã tõndo, tɩ tõnd kẽe b sʋka, n kʋ b fãa tɩ b tʋʋmdã yalse.”

12 Zʋɩf-rãmb nins zags sẽn pẽ bãmbã sã n wa fãa, b yeta tõnd n yɩlemdẽ* yaa: “B na n tũu zĩig fãa n wa zab ne tõndo.”

13 Dẽ, mam kɩtame tɩ rap ra yas lalgã poore, zĩis nins sẽn yaa long n yɩɩdã, rat n yeel tɩ zĩis nins sẽn pa tar koglgã. Mam da kɩtdame tɩ b yas roog-roogo, n zãad b sʋʋse, b kãna, la b tãbdo. 14 Mam sẽn wa n yã tɩ b yɛɛsdame wã, mam yika tao-tao n yeel nin-kãsemsã,+ kom-bɛɛmbã la neb a taabã yaa: “Ra zoe-y rabeem nin-kãensã yĩng ye.+ Tẽeg-y-yã a Zeova sẽn yaa kãsenga, tɩ nebã segd n zoe-a la b waoog-a+ wã yelle, la y zab y saam-biisã yĩnga, y kom-dibli wã la y kom-pugli wã n paas y pagbã la y zagsã yĩnga.”

15 Tõnd bɛɛbã sẽn wʋm tɩ tõnd bãnga b sẽn maand bũmb ningã, la tɩ Wẽnnaam kɩtame tɩ b magbã pa yãk nengã poore, tõnd fãa lebs n sɩnga lalgã meebo. 16 Daar-n-kãng tɛka, mam nebã pʋɩ-sʋk ra tʋmdame,+ tɩ pʋɩ-sʋkã zãad kãna, gãnd la tãbdo, la b yer kut futu.* Nanambsã+ teela Zida nebã fãa 17 sẽn da met lalgã. Neb nins sẽn da zɩt zɩɩbã ra tʋmda ne nug a ye, la b zãad zab-teoog ne nug a to wã. 18 Neb nins sẽn da metã ned kam fãa ra sẽba sʋʋg a sɛɛgẽ la a metẽ, tɩ ned ning sẽn peebd baorgã+ yas mam sɛɛgẽ.

19 Mam yeela nin-kãsemsã, kom-bɛɛmbã la neb a taabã yaa: “Tʋʋmdã yaa wʋsgo, tɩ lalgã me yaa woko. Tõnd sãeega lalgã zug n zãr ne tãaba. 20 Yãmb sã n wʋm baorgã rãamde, bɩ y tigim taab zĩig ning tõnd sẽn be wã. Tõnd Wẽnnaamã na n zab n sõnga tõndo.”+

21 Woto, tõnd kell n tʋmame, tɩ pʋɩ-sʋkã zãad kãna, sẽn sɩng ne zĩigã yẽegr n tãag ãdsã pukri. 22 Wakat kãnga, mam yeela nin-buiidã yaa: “Bɩ rapã ned kam fãa ne a tʋm-tʋmd gãand Zerizalɛm. B na n gũuda tõnd yʋngo, la b tʋmd wĩndga.” 23 Maam ne m saam-biisã la m tʋm-tʋmdbã,+ ne gũudbã sẽn da pʋgd maamã baa a ye pa tol n yees a fut ye. Tõnd ned kam fãa ra zãada a zab-teoog ne a nug-rɩtgo.

5 La nin-buiidã ne b pagbã ra yẽgemda wʋsg b saam-biisã sẽn yaa Zʋɩf-rãmbã poorẽ.+ 2 Kẽer da yetame yaa: “Tõnd ne d kom-dibli wã la d kom-pugli wã yaa wʋsgo. Yaa tɩlɛ tɩ d paam kood n dɩ n da wa ki ye.” 3 Sãnda ra yetame: “Tõnd dɩkda d pʋtã, d viyn pʋtã ne d zagsã n gãnegd n deegd kood komã sasa.” 4 Neb a taab ra yetame yaa: “Tõnd gãnega d pʋtã ne d viyn pʋtã n peng ligd n yao rĩmã fadgã.*+ 5 Tõnd ne d saam-biisã yaa bũmb a yembre,* tɩ d kambã yaa wa bãmb kamba. Baasgo, d segd n kẽesa d kom-dibli wã ne d kom-pugli wã yembdo, tɩ d kom-pugli kẽer zoe n yaa yembse.+ La tõnd ka pãng n tõe n gɩdg rẽ ye. Bala tõnd pʋtã ne d viyn pʋtã yaa neb a taab n so.”

6 Mam sẽn wʋm b yẽgengã la gom-kãensa wã, mam sũurã puuga wʋsgo. 7 Mam tagsa bõn-kãensã yell m sũurã pʋgẽ. Mam ninga nin-kãsemsã la kom-bɛɛmbã taale, la m yeel-b yaa: “Yãmb ned kam fãa pengda a saam-biig n dogend yõodo.”+

Sẽn paase, mam kɩtame tɩ b na n maan tigis-kãseng bãmb yĩnga. 8 Mam yeel-b lame yaa: “Tõnd maana d sẽn tõe fãa, n lebs n da Zʋɩf-rãmbã sẽn yaa tõnd saam-biis b sẽn da koos ne bu-zẽmsã. La masã, yãmb na n koosa y saam-biisã,+ tɩ yɩ tɩlɛ tɩ d le tɩ ra-b bɩ?” B sẽn wʋm dẽ wã, b paa sɩɩ, n pa tar b sẽn na n yɛɛlg ye. 9 Mam yeel-b lame yaa: “Yãmb sẽn maandã pa sõma ye. Rẽ yĩnga, yãmb pa segd n zoe tõnd Wẽnnaamã,+ sẽn na yɩl tɩ bu-zẽmsã sẽn yaa tõnd bɛɛbã ra yã bũmb n dõd tõnd sɩda? 10 Sẽn paase, maam ne m saam-biisã la m tʋm-tʋmdbã pengd-b-la ligd la kood n pa rogend yõod ye. Y kabre, ra le peng-y-b bũmb n dogl yõod ye.+ 11 Rũndã bala, m bõos tɩ y lebs-b b pʋtã,+ b viyn pʋtã, b oliiv tɩɩsã, b zagsã, n paas yõodã y sẽn dogl ligdã zugã, koodã, divẽ-paalgã, la kaamã zugã y sẽn deeg b nengẽ wã.”

12 Rẽ n so tɩ b yeel yaa: “Tõnd na n lebs-b-la bõn-kãensã, n pa reeg baa fʋɩ b nengẽ ye. Tõnd na n maana wa yãmb sẽn yeelã bal kɛpɩ.” Dẽ, mam boola maan-kʋʋdbã, n kɩt tɩ nin-kãensã wẽen tɩ b na n pidsa b sẽn pʋlmã. 13 Mam fugsa m futã me la m yeele: “Ned ning fãa sẽn pa na n pids pʋlen-kãngã, bɩ Wẽnnaam fugs a soabã woto. Wẽnnaam na n deega a zakã ne a paoongã n bas-a nug-zaala.” Rẽ la nin-buiidã fãa yeel yaa: “Ãmiina!”* B pẽga a Zeova, tɩ nin-buiidã me maan b sẽn pʋlmã.

14 Sẽn paase, rĩm a Artazɛgzɛs+ sẽn yãk maam tɩ m lebg Zida soolmã guvɛrneerã tɛka,+ sẽn sɩng a naamã yʋʋm pisi soabã+ n tãag yʋʋm pis-tã la a yiib-n-soabã,+ rat n yeel tɩ yʋʋm piig la a yiib pʋgẽ, maam ne m saam-biisã baa a ye pa rɩ rɩɩb ning guvɛrneer sẽn segd ne wã ye.+ 15 La guvɛrneer-dãmb nins sẽn deng maamã ra weoogda nin-buiidã. B ra reegda wanzuri sɩkl* pis-naas b nengẽ daar fãa, rɩɩbã* la divẽ wã yĩnga. Rẽ me, b tʋm-tʋmdbã ra namsda nin-buiidã. La mam pa maan woto,+ mam sẽn zoet Wẽnnaamã yĩnga.+

16 Sẽn paase, mam kẽesa m toog lalgã meeb pʋgẽ. Mam tʋm-tʋmdbã fãa me ra tigimda taab n tʋmdẽ, la d pa ra pʋʋg meng ye.+ 17 Zʋɩf-rãmb la kom-bɛɛmb koabg la pis-nu n da naagd maam n dɩtẽ, n paas neb nins sẽn da yit bu-zẽmsã tẽns pʋsẽ n wat n kaagd tõndã. 18 Daar fãa, mam kɩtdame tɩ b kʋ loalga, pe-nobds a yoob la bõn-yɩgdɩ n segl tɩ d rɩ. La rasem piig fãa, mam kɩtdame tɩ b wa ne divẽ buud toor-toor hal wʋsgo. Baa ne rẽ fãa, mam pa kos tɩ b kõ maam rɩɩb ning guvɛrneer sẽn segd ne wã ye. Bala tʋʋmdã ra zoe n namsda nin-buiidã wʋsgo. 19 Mam Wẽnnaam, tẽeg-y mam yelle, n ning-m barka, bũmb ning fãa mam sẽn maan n sõng nin-buiidã yĩnga.+

6 B sẽn yeel a Sanbalat ne a Tobiya+ la Araab a Gesɛm+ n paas tõnd bɛɛb a taabã tɩ mam lebs n mee lalgã,+ la tɩ võor pa le be lalgẽ wã, (la wakat kãng tɩ mam nan pa lugl rignoyã kʋɩlensã ye.)+ 2 tao-tao bala, a Sanbalat ne a Gesɛm tʋmame tɩ b yeel maam yaa: “Wa tɩ d yãk wakat n seg taab Ono+ tẽn-nabrã tẽn-bõonesẽ wã.” La b ra magdame n na n maan maam wẽnga. 3 Dẽ, mam tʋma koe-taasdb tɩ b tɩ yeel-b yaa: “Mam tʋmda tʋʋm-kãsenga, n pa tõe n sig ye. Bõe yĩng tɩ mam na n bas n wa yãmb nengẽ, tɩ tʋʋmdã yalse?” 4 B tʋma naoor a naas tɩ b wa togs maam gom-yɛngã. La wakat fãa, mam leokd-b-la wa m sẽn da yeelã.

5 Rẽ poore, a Sanbalat tʋma a tʋm-tʋmdã t’a wa togs maam gom-kãng naoor a nu soaba, la a paas sebr b sẽn gʋls n pa pag ye. 6 Ad b sẽn yeel sebrã pʋgẽ: “Bu-zẽmsã sʋka, mam wʋmdame tɩ b gomda, t’a Gesɛm+ me gomd n yetẽ tɩ foo ne Zʋɩf-rãmbã magd n na n tõdga rĩmã.+ Yaa rẽ yĩng la yãmb sẽn met lalgã. B yetame me tɩ foo n na n lebg b rĩma. 7 Sẽn paase, fo yãka no-rɛɛsdb tɩ b gilgd Zerizalɛm n moond fo wɛɛngẽ n yetẽ: ‘Rĩm n be Zida!’ Masã, bõn-kãensã na n taa rĩmã. Woto wã, bɩ f wa tɩ d seg taab n yẽs rẽ wɛɛngẽ.”

8 La mam tʋmame tɩ b yeel-a yaa: “Bũmb ning fãa fo sẽn yetã baa a ye zɩ n zĩnd ye. Yaa fo mengã n mams rẽ f sũurẽ wã.” 9 Bala b fãa ra rat n kẽesa tõnd rabeem, n yetẽ: “B na n komsa raoodo, n bas tʋʋmdã.”+ Masã, mam Wẽnnaam, mam pʋʋsdame n kotẽ tɩ y kõ-m daoodo.+

10 Rẽ poore, mam kẽnga a Mehetabɛll biig a Delaya biig a Semaya zakẽ wã. Wakat kãng t’a paga a meng roogẽ. A yeelame: “Wa-y tɩ d kẽng Wẽnnaam doogẽ wã. Bɩ d yãk wakat n seg taab wẽnd-doogã pʋgẽ, n pag a kʋɩlensã. Bala b watame n na n kʋ yãmba. B watame n na n kʋ yãmb ne yʋngo.” 11 La mam leokame yaa: “Rao wa maam segd n zoeeme sɩda? Ned wa maam tõe n kẽe wẽnd-doogẽ wã n pa ki sɩda?+ Mam pa na n kẽ a pʋgẽ ye!” 12 Dẽ, mam bãngame tɩ pa Wẽnnaam n tʋm no-rɛɛs-kãngã, la tɩ yaa a Tobiya ne a Sanbalat+ n kõ-a ligd sẽn na yɩl t’a belg maam. 13 B kõ-a-la ligd sẽn na yɩl t’a kẽes maam dabeem n kɩt tɩ m maan yel-wẽnde, tɩ b paam bũmb n tik n sãam mam yʋʋrã, la b ning-m taale.

14 Mam Wẽnnaam, tẽeg-y-yã a Tobiya+ ne a Sanbalat la bũmb nins b sẽn maanã yelle, la y tẽeg no-rɛɛs-poak a Nowadiya ne no-rɛɛsdb a taabã sẽn da makd wakat fãa n na n kẽes-m dabeemã yelle.

15 Woto, b mee lalgã n sa Elull* kiuugã rasem pisi la a nu soabã, rat n yeel tɩ rasem pis-nu la a yiib pʋgẽ.

16 Tõnd bɛɛbã fãa sẽn wʋm dẽ wã, tɩ tẽn-yagsã fãa nebã me yã rẽ wã, yãnd yõk-b-la wʋsgo.+ B bãngame tɩ yaa ne tõnd Wẽnnaamã sõngr la tʋʋm-kãngã tʋm-yã. 17 Wakat kãnga, Zida nin-kãsemsã+ ra gʋlsda sɛb wʋsg n toond a Tobiya, tɩ yẽ me leokd-ba. 18 Zida neb wʋsg wẽename tɩ b na n zĩnda a poorẽ, bala a ra yaa a Aara+ biig a Sekaniya rɛɛmba, t’a bi-ribl a Yehohanan me kẽ kãadem ne a Berekɩya biig a Mesulam+ bi-puglã. 19 Sẽn paase, b ra wat n pẽgda a Tobiya mam taoor wakat fãa, la b kẽnd n togsd-a mam goamã. Rẽ n so t’a Tobiya ra gʋlsd sɛb n toond maam n dat n kẽes-m dabeem.+

7 B sẽn me lalgã n sa wã bala,+ mam lugla kʋɩlensã+ la m kɩt tɩ rigno-gũudbã,+ yɩɩn-yɩɩndbã,+ la Levi buudã nebã+ sɩng b tʋʋmde. 2 Rẽ poore, mam yãka m ba-biig a Hanani+ t’a ges Zerizalɛm yelle. Yɩɩ yẽ ne a Hananiya sẽn yaa Tãn-soben-doogã+ naabã. Bala a Hananiya ra yaa ned b sẽn tõe n kɩs sɩd wʋsgo, la ned sẽn zoet Wẽnnaam+ n yɩɩd neb wʋsgo. 3 Dẽ, mam yeel-b lame: “Zerizalɛm rignoyã pa segd n pags tɩ wĩnto-sʋk* pa ta ye. B sã n wa gũud rignoyã, b segd n paga kʋɩlensã la b soge. Yãk-y Zerizalɛm neb tɩ b yɩ gũudba. Sãnda na n yasa zĩig ning b sẽn wilg-bã, tɩ kẽer yas b zagsã noyã.” 4 Tẽngã ra yaa yaleng la bedre, tɩ nebã sõor da paoodẽ.+ Sẽn paase, b ra pa lebs n me rotã ye.

5 La mam Wẽnnaamã ninga mam yamẽ tɩ m tigim nin-kãsemsã ne kom-bɛɛmbã la nin-buiidã, n gʋls b yʋyã wa sẽn zems b buudu.+ Dẽ, mam yãa sebr ning pʋgẽ b sẽn gʋls neb nins sẽn wa pipi wã yʋy wa sẽn zems b buudã. Mam yãame tɩ b gʋls a pʋgẽ yaa:

6 Ad soolmã neb nins sẽn yi yembdã, neb nins Babilon rĩm a Nebukadnezaar+ sẽn da kẽes yembdo,+ tɩ b ned kam fãa wa leb a tẽngẽ,+ Zerizalɛm ne Zida wã. 7 Yaa neb nins sẽn tũ a Zorobabɛlle,+ a Yesuwa,+ a Neemi, a Azariya, a Raamiya, a Nahamani, a Mardose, a Bilsanne, a Misperɛte, a Bigvayi, a Nehum, la a Baana n wa wã.

Ad Israyɛll rap nins fãa sẽn tũ n wa wã sõore:+ 8 A Paros yagensã yɩɩ neb tus a yi la koabg la pis-yopoe la a yiibu. 9 A Sefatiya yagensã yɩɩ neb kobs-tã la pis-yopoe la a yiibu. 10 A Aara+ yagensã yɩɩ neb kobs-yoob la pis-nu la a yiibu. 11 A Pahat-mowaab+ yagensã sẽn yaa a Yesuwa ne a Zowaab+ yagensã yɩɩ neb tus a yi la kobs-nii la piig la a nii. 12 A Elam+ yagensã yɩɩ neb tusr la kobs-yi la pis-nu la a naase. 13 A Zatu yagensã yɩɩ neb kobs-nii la pis-naas la a nu. 14 A Zakayi yagensã yɩɩ neb kobs-yopoe la pis-yoobe. 15 A Binuwi yagensã yɩɩ neb kobs-yoob la pis-naas la a nii. 16 A Bebayi yagensã yɩɩ neb kobs-yoob la pisi la a nii. 17 A Azgaad yagensã yɩɩ neb tus a yi la kobs-tã la pisi la a yiibu. 18 A Adonikam yagensã yɩɩ neb kobs-yoob la pis-yoob la a yopoe. 19 A Bigvayi yagensã yɩɩ neb tus a yi la pis-yoob la a yopoe. 20 A Adin yagensã yɩɩ neb kobs-yoob la pis-nu la a nu. 21 A Atɛɛr yagensã sẽn yaa a Ezekɩyaas yagensã yɩɩ neb pis-wɛ la a nii. 22 A Hasum yagensã yɩɩ neb kobs-tã la pisi la a nii. 23 A Bezayi yagensã yɩɩ neb kobs-tã la pisi la a naase. 24 A Harif yagensã yɩɩ neb koabg la piig la a yiibu. 25 Gabawõ+ rapã yɩɩ pis-wɛ la a nu. 26 Betlehɛm ne Netofa rapã yɩɩ koabg la pis-nii la a nii. 27 Anatot+ rapã yɩɩ koabg la pisi la a nii. 28 Bɛt-azmavɛt rapã yɩɩ pis-naas la a yiibu. 29 Kiryat-yeyarim+ ne Kefira la Beerot+ rapã yɩɩ kobs-yopoe la pis-naas la a tãabo. 30 Rama ne Geba+ rapã yɩɩ kobs-yoob la pisi la a ye. 31 Mikmaas+ rapã yɩɩ koabg la pisi la a yiibu. 32 Betɛll+ ne Ayi+ rapã yɩɩ koabg la pisi la a tãabo. 33 Nebo a to wã rapã yɩɩ pis-nu la a yiibu. 34 Elam a to wã yagensã yɩɩ neb tusr la kobs-yi la pis-nu la a naase. 35 A Harim yagensã yɩɩ neb kobs-tã la pisi. 36 Zeriko rapã yɩɩ kobs-tã la pis-naas la a nu. 37 Lood ne Hadiid la Ono+ rapã yɩɩ kobs-yopoe la pisi la a ye. 38 Sena rapã yɩɩ tus a tãab la kobs-wɛ la pis-tã.

39 Ad maan-kʋʋdbã+ sõore: A Yedaya yagensã sẽn yaa a Yesuwa yagensã yɩɩ neb kobs-wɛ la pis-yopoe la a tãabo. 40 A Imeer yagensã yɩɩ neb tusr la pis-nu la a yiibu. 41 A Pasʋʋr+ yagensã yɩɩ neb tusr la kobs-yi la pis-naas la a yopoe. 42 A Harim+ yagensã yɩɩ neb tusr la piig la a yopoe.

43 Ad Levi buudã neb+ sõore: A Yesuwa yagensã sẽn yaa a Kadmiyɛll+ ne a Hodva yagensã yɩɩ neb pis-yopoe la a naase. 44 Ad yɩɩn-yɩɩndbã+ sõore: A Azaf+ yagensã yɩɩ neb koabg la pis-naas la a nii. 45 Ad rigno-gũudbã+ yagens sõore: A Salum yagensã, a Atɛɛr yagensã, a Talmo yagensã, a Akuub+ yagensã, a Hatita yagensã, la a Sobayi yagensã. B fãa yɩɩ neb koabg la pis-tã la a nii.

46 Ad wẽnd-doogã tʋm-tʋmdbã:*+ A Ziya yagensã, a Hasufa yagensã, a Tabawot yagensã, 47 a Keroos yagensã, a Siya yagensã, a Padõ yagensã, 48 a Lebana yagensã, a Hagaba yagensã, a Salmayi yagensã, 49 a Hanan yagensã, a Gidɛll yagensã, a Gahaar yagensã, 50 a Rehaya yagensã, a Rezĩn yagensã, a Nekoda yagensã, 51 a Gaazam yagensã, a Uuza yagensã, a Paseya yagensã, 52 a Besayi yagensã, a Mewunim yagensã, a Nefusesim yagensã, 53 a Bakbuk yagensã, a Hakufa yagensã, a Harhʋʋr yagensã, 54 a Baazlit yagensã, a Mehida yagensã, a Harsa yagensã, 55 a Barkos yagensã, a Sisera yagensã, a Tema yagensã, 56 a Neziya yagensã, ne a Hatifa yagensã.

57 Ad a Salomo tʋm-tʋmdbã yagensã:+ A Sotayi yagensã, a Soferɛt yagensã, a Perida yagensã, 58 a Yaala yagensã, a Darkon yagensã, a Gidɛll yagensã, 59 a Sefatiya yagensã, a Hatill yagensã, a Pokerɛt-hazebayim yagensã, ne a Amo yagensã. 60 Wẽnd-doogã tʋm-tʋmdbã*+ ne a Salomo tʋm-tʋmdbã yagensã fãa sõor yɩɩ neb kobs-tã la pis-wɛ la a yiibu.

61 Ad neb nins fãa sẽn yi Tɛll-mela, Tɛll-harsa, Keruubi, Adõn ne Imeere, la sẽn pa tõog n vaees n bãng b buudã rot la b sẽn yitẽ, n bãng b sã n yaa Israyɛll nebã:+ 62 Yaa a Delaya yagensã, a Tobiya yagensã ne a Nekoda yagensã. B fãa yɩɩ neb kobs-yoob la pis-naas la a yiibu. 63 Maan-kʋʋdbã sʋka, yɩɩ a Habaya yagensã, a Hakooz+ yagensã, ne a Barzɩlayi yagensã. Yaa Barzɩlayi ning sẽn kẽ kãadem ne Galaad rao a Barzɩlayi+ bi-pugl a ye wã, tɩ b ra boond-a ne a rɛɛmbã yʋʋrã. 64 Nin-kãensã gẽesa b sõadgã sɛbã n na n paam kaset sẽn wilgd b sẽn yaa buud ning nebã, la b pa tõog n yã ye. Rẽ n so tɩ b pa kõ-b sor tɩ b na n naag n tʋmd maan-kʋʋrã tʋʋmd ye.*+ 65 Guvɛrneerã*+ yeel-b lame tɩ b pa segd n dɩ bũmb nins sẽn yaa sõamyã wʋsgã,+ sã n pa b wa n paama maan-kʋʋd sẽn na n tũnug ne Urimmã ne Tumimmã+ n sok Wẽnnaam.

66 Nebã fãa sõor yɩɩ tus-pis-naas la a yiibu, la kobs-tã la pis-yoobe,+ 67 yem-daadã la yem-pogsã+ sẽn da yaa neb tus a yopoe la kobs-tã la pis-tã la a yopoe wã sẽn pa naage. B leb n da tara pagb la rap kobs-yi la pis-naas la a nu sẽn yaa yɩɩn-yɩɩndba.+ 68 B wed-moosã sõor da yaa kobs-yopoe la pis-tã la a yoobe, tɩ b bõn-weesã* yaa kobs-yi la pis-naas la a nu. 69 B yʋgma wã sõor da yaa kobs-naas la pis-tã la a nu, tɩ b bõensã yaa tus a yoob la kobs-yopoe la pisi.

70 Buudã rot taoor dãmb kẽer kõo kũun tʋʋmdã yĩnga.+ Guvɛrneerã* kõo sãnem darkem* tusri, la-bõones pis-nu, n paas maan-kʋʋdb kasaabs+ kobs-nu la pis-tã tɩ b bĩng laogã bĩngr zĩigẽ. 71 Buudã rot taoor dãmb sãnda kõo sãnem darkem tus-pisi, la wanzuri min* tus a yi la kobs-yi tʋʋmdã yĩnga.* 72 Neb a taabã kõo sãnem darkem tus-pisi, wanzuri min tus a yi, la maan-kʋʋdb kasaabs pis-yoob la a yopoe.

73 Maan-kʋʋdbã, Levi buudã nebã, rigno-gũudbã, yɩɩn-yɩɩndbã,+ nin-buiidã kẽere, n paas wẽnd-doogã tʋm-tʋmdbã* la Israyɛll neb a taabã fãa* tɩ zĩnda b tẽnsẽ wã.+ Kiuug a yopoe-n-soabã sẽn wa n na n ta wã,+ tɩ Israyɛll nebã bee b tẽnsẽ wã.+

8 Rẽ poore, nin-buiidã fãa tigma taab yam a yembr zãma wã zĩig ning sẽn tees Koomã rignoorã.+ B yeela seb-gʋlsd a Ɛsdras+ t’a tall a Moyiiz Tõogã+ sebr n wa. Yaa Tõog ning a Zeova sẽn yeel Israyɛll nebã tɩ b tũ wã.+ 2 Dẽ, maan-kʋʋd a Ɛsdras talla Tõogã n wa nebã sẽn tigmã taoore.+ Yaa rapa, pagba, la neb nins fãa sẽn tõe n kelg gomd n wʋm a võorã. Yɩɩ kiuug a yopoe-n-soabã pipi daare.+ 3 A yaasa zãma wã zĩig ning sẽn tees Koomã rignoorã n zẽk a koɛɛg n karem Tõogã+ rapã taoore, pagbã, la neb nins fãa sẽn tõe n wʋm gomd võorã taoore, sẽn sɩng sõorã pukr n tãag wĩnto-sʋka. Nin-buiidã maaga b yĩng n kelg+ Tõogã sebrã karengo. 4 Seb-gʋlsd a Ɛsdras ra yasa ra-pɛgdã b sẽn ka karengã yĩngã zugu, t’a Matitiya, a Sema, a Anaya, a Uuri, a Hilkiya ne a Maaseya ra yas a rɩtgo, t’a Pedaya, a Misayɛlle, a Malkiya,+ a Hasum, a Hasbadana, a Zakari, ne a Mesulam yas a goabga.

5 A Ɛsdras laka sebrã nin-buiidã fãa nifẽ, bala a sẽn da yas zĩig ningã yaa zãntlg n yɩɩd nin-buiidã. A sẽn lak sebrã, nin-buiidã fãa yikame n yalse. 6 Dẽ, a Ɛsdras pẽga Wẽnnaam a Zeova sẽn yaa kãsengã, tɩ nin-buiidã fãa zẽk b nus n yeele: “Ãmiina!* Ãmiina!”+ Rẽ poore, b sulgame n wõgemd a Zeova taoor n fõgen b nens tẽnga. 7 A Yesuwa, a Bani, a Serebiya,+ a Yaminni, a Akuubi, a Sabtayi, a Hodiya, a Maaseya, a Kelita, a Azariya, a Zozabaade,+ a Hanan ne a Pelaya sẽn yaa Levi buudã nebã ra bilgda nin-buiidã Tõogã võore.+ Rẽ tɩ nin-buiidã ket n yasame. 8 B kell n zẽka b koees n karem sebrã, rat n yeel tɩ Wẽnnaam Tõogã pʋgẽ, n da bilgd a võorã sõma la b kɩtdẽ tɩ b sẽn karemdã võor lebgd vẽenega. Woto, b sõnga nin-buiidã tɩ b wʋm bũmb ning b sẽn karmã võore.+

9 A Neemi sẽn da yaa guvɛrneer* wakat kãnga, a Ɛsdras+ sẽn yaa maan-kʋʋd la seb-gʋlsdã ne Levi buudã nebã sẽn da zãmsd nin-buiidã yeela nebã fãa yaa: “Rũndã daarã yaa sõng yãmb Wẽnnaam a Zeova yĩnga.+ Ra maan-y sũ-sãang wall y yãb ye.” Bala nin-buiidã ra kelgda Tõogã goamã, la b yãbda. 10 A yeel-b lame yaa: “Kẽng-y n tɩ bao-y rɩ-nood n dɩ, la y yũ bõn-yũudɩ sẽn yaa noodo, la y yãk rɩɩb+ n kõ neb nins sẽn pa segl bũmbã. Bala rũndã daarã yaa sõng tõnd Zu-soabã yĩnga. Ra maan-y sũ-sãanga, bala sũ-noog ning a Zeova sẽn kõtã yaa yãmb pãnga.”* 11 Levi buudã neb ra belsda nin-buiidã, n yetẽ: “Sĩnd-y-yã! Bala rũndã daarã yaa sõngo. Ra maan-y sũ-sãang ye.” 12 Dẽ, nin-buiidã fãa loogame n tɩ rɩ la b yũ, la b yãk rɩɩbã n kõ neb a taaba, la b kɩdem sũ-noog wʋsgo,+ bala b wʋma goam nins b sẽn togs-bã võore.+

13 Rasem a yiib-n-soabã, buudã rot taoor dãmbã, maan-kʋʋdbã la Levi buudã neb tigma taab seb-gʋlsd a Ɛsdras nengẽ, sẽn na yɩl n wʋm Tõogã goam võor n paase. 14 Dẽ, b yãame tɩ b gʋlsa Tõogã a Zeova sẽn tũnug ne a Moyiiz n kõ wã pʋgẽ tɩ Israyɛll nebã segd n zĩnda zãn tẽngre, kiuug a yopoe-n-soabã tigr sasa,+ 15 la tɩ b segd n moona+ b tẽnsã fãa pʋsẽ la Zerizalɛm pʋgẽ, n yeel yaa: “Kẽng-y soolmã zĩis nins sẽn yaa tãensã n tɩ bao oliiv tɩɩs vãado, pẽ tɩɩs vãado, mirt tɩɩs vãado, la koms vãado, la tɩɩs a taab vãad n wa ti zãna, wa sẽn zems b sẽn gʋlsã.”

16 Dẽ, nebã yiime n tɩ bao vãadã n wa ti zãna. Ned kam fãa tii a roog zug la a samandẽ. Sẽn paase, b tii zãn Wẽnnaam doogã samanã pʋsẽ,+ Koomã rignoorã+ zãma wã zĩigẽ, la Efrayim rignoorã+ zãma wã zĩigẽ. 17 Woto, neb nins fãa sẽn yi yembd n wa wã tii zãn n zĩnd b tẽngre, bala hal a Nun biig a Zozuwe wakatã+ n tãag baraare, Israyɛll nebã pa maan zãn tigr a woto ye. Rẽ kɩtame tɩ b paam sũ-noog wʋsgo.+ 18 Daar fãa, b ra karemda Wẽnnaam Tõogã sebre,+ sẽn sɩng pipi daarã n tãag yaoolem daarã. B maana tigrã rasem a yopoe, la b maan tigsg sẽn yaa zall rasem a nii-n-soabã, wa Tõogã sẽn wilgã.+

9 Ki-kãng rasem pisi la a naas-n-soabã, Israyɛll nebã tigma taaba. B loee noore, la b sẽgen boto, n yug b zutã tom.+ 2 Neb nins sẽn yaa a Israyɛll yagens halaalã welga b mens ne sãambã fãa,+ la b yals n vẽneg b yel-wẽnã la b yaab-rãmbã kongrã n togse.+ 3 Rẽ poore, b yalsa b zĩisẽ wã n zẽk b koees n karem b Wẽnnaam a Zeova Tõogã+ sebr lɛɛr a tãabo, la b wõgemd b Wẽnnaam a Zeova taoor n vẽneg b yel-wẽnã n togs lɛɛr a tãab me.

4 A Yesuwa, a Bani, a Kadmiyɛlle, a Sebaniya, a Buni, a Serebiya,+ a Bani la a Kenani yalsa Levi buudã nebã ra-pɛgdã b sẽn ka wã+ zug n zẽk b koees wʋsg n pʋʋs b Wẽnnaam a Zeova. 5 A Yesuwa, a Kadmiyɛlle, a Bani, a Hasabneya, a Serebiya, a Hodiya, a Sebaniya la a Petaya sẽn yaa Levi buudã nebã yeelame yaa: “Yik-y n pẽg-y yãmb Wẽnnaam a Zeova wakat fãa yĩnga.*+ Tõnd Wẽnnaam, bɩ b pẽg yãmb yʋʋrã sẽn tar ziirã. Y yʋʋrã zẽkame n yɩɩd bark la pẽgr buud fãa.

6 “Yãmb y yembr n yaa a Zeova.+ Yãmb n naan saasã. Yãmb n naan saasẽ saagã ne b tãb-biisã fãa, n paas tẽngã ne bũmb nins fãa sẽn be a zugã, la mogrã ne bũmb nins fãa sẽn be a pʋgẽ wã. Yãmb n kɩtd tɩ b fãa ket n vɩ. Saasẽ tãb-biisã wõgemdeda yãmb taoore. 7 Yãmb yaa a Zeova sẽn yaa Wẽnnaam sɩd-sɩdã, soab ning sẽn yãk a Abram+ la sẽn kɩt t’a yi Ʋʋr+ sẽn yaa Kalde nebã tẽngã, n pʋd-a t’a Abrahaamã.+ 8 Yãmb yãame t’a maanda sɩd ne yãmb ne a sũur fãa.+ Rẽ n so tɩ yãmb maan kaool ne-a, n yeel tɩ y na n kõ-a-la Kanaã nebã soolem, Hɛt nebã, Amoor nebã, Perɛɛz nebã, Zebuus nebã la Girgas nebã soolem, t’a kõ a yagensã.+ Yãmb pidsa y pʋlemsã, bala yãmb yaa tɩrga.

9 “Yãmb yãa tõnd yaab-rãmbã sẽn da namsd to-to Ezɩptã,+ la y wʋm b kelemsã Mog-miuugẽ wã. 10 Yãmb maana bãn la yel-soalem n sɩbg a Farawõ ne a tʋm-tʋmdbã la a tẽngã nebã fãa,+ bala yãmb bãngame tɩ b ra namsda yãmb nin-buiidã ne wuk-m-menga.+ Yãmb kɩtame tɩ y yʋʋrã yi hal n tãag rũndã.+ 11 Yãmb welga mogrã bãmb taoore, sẽn na yɩl tɩ b pasg mogrã sʋka, tẽn-koɛɛng zugu.+ La yãmb loba neb nins sẽn da zoet n pʋgd-bã ko-zulumsã pʋgẽ, wa kugr b sẽn lob koom sẽn gudg pʋgẽ.+ 12 Wĩndga, yãmb da wilgd-b-la sor ne sawadg maasem, la y wilgd-b sor yʋng ne bugum maasem, sẽn na yɩl n vẽneg sor ning zug b sẽn segd n kẽnã.+ 13 Yãmb siga Sinayi tãngã+ zugu, n pa saasẽ+ n gom ne-ba, n kõ-b noy sẽn yaa tɩrse, tõod sẽn yaa sɩda,* la sagls sẽn yaa sõma.+ 14 Yãmb wilga bãmb yãmb Vʋʋsg daarã+ sẽn yaa sõngã, la y tũnug ne y tʋm-tʋmd a Moyiiz n kõ-b noy la tõodo. 15 Kom sẽn wa n tar-ba,+ yãmb kõ-b-la rɩɩb sẽn yit saasẽ. Ko-yũud sẽn wa n tar-ba,+ yãmb kɩtame tɩ koom yi kug-bedrã pʋgẽ. Yãmb yeel-b lame tɩ b kẽ soolem ning yãmb sẽn da wẽen* tɩ y na n kõ-b lame wã pʋgẽ, n soog-a.

16 “La tõnd yaab-rãmbã wuka b mense,+ n diglim b sũy*+ n pa tũ yãmb noyã ye. 17 Bãmb zãgsame n pa tũ ye.+ B pa tẽeg tʋʋm-kãsemsã yãmb sẽn tʋm b sʋkã ye. B riglma b sũyã* n yãk taoor soab n na n lebg n leb b yembdẽ wã Ezɩpt soolmẽ wã.+ La yãmb yaa Wẽnnaam sẽn kõt sugr wʋsgo, sẽn yaa sõmblem soaba, nimbãan-zoɛta, sũur sẽn pa yikd tao-tao, la sẽn pid ne maan-neere.+ Yãmb pa raag-b n bas ye.+ 18 B wa n yõga bõn-naandg* sẽn yaa nag-bil n yetẽ: ‘Ad yãmb Wẽnnaamã, soab ning sẽn yiis yãmb Ezɩpt soolmẽ wã.’+ B paooga yãmb wʋsgo. 19 La baa ne rẽ, yãmb nimbãan-zoeerã sẽn yaa wʋsgã yĩnga, yãmb pa raag-b n bas we-raoogẽ wã ye.+ Sawadgã kell n paa b zugẽ wã wĩndg n wilgd-b sore, tɩ bugmã me pa b zugẽ wã yʋng n vẽnegd sor ning zug b sẽn segd n kẽnã.+ 20 Yãmb kõ-b-la y vʋʋsmã sẽn yaa sõngã sẽn na yɩl tɩ b yɩ yam dãmba.+ Yãmb pa mong-b yãmb mannã ye.+ Ko-yũud sẽn wa n tar-ba, yãmb kõ-b-la koom.+ 21 Yʋʋm pis-naas pʋgẽ, yãmb kõo bãmb rɩɩb we-raoogẽ wã.+ Bũmb pa paoog-b ye. B futã pa ki,+ tɩ b naoã me pa mod ye.

22 “Yãmb kõo bãmb soolem toɛy-toɛy ne buud toɛy-toɛya. Yãmb pʋɩ-b lame n kõ-ba,+ sẽn na yɩl tɩ b soog a Siyon+ soolmã, rat n yeel tɩ Hɛsbon+ rĩmã soolmã, n paas Basan rĩm a Oog+ soolmã. 23 Yãmb kɩtame tɩ b kambã lebg wʋsg wa ãdsã sẽn be saasẽ wã,+ la y tall-b n tɩ kẽes soolem ning yãmb sẽn da yeel b yaab-rãmbã tɩ b segd n kẽeme n soogã pʋgẽ.+ 24 Dẽ, b kambã kẽ n sooga soolmã.+ Yãmb kɩtame tɩ b tõog Kanaã nebã+ sẽn da be soolmẽ wã, la y ning Kanaã nebã ne b rĩm-dãmbã la soolmã nin-buiidã bãmb nusẽ, tɩ b maan-b b sẽn date. 25 B reesa tẽns sẽn gũbg lalse,+ pʋt sẽn sakd koodo,+ la b soog rot sẽn pid ne bõn-sõma buud fãa, buls b sẽn zoe n tu, viyn pʋto, oliiv tɩɩse,+ la tɩ-womds a taaba. B rɩɩme n tɩge, n nobe, la b maan sũ-noog yãmb sõmblmã sẽn yaa wʋsgã yĩnga.

26 “Baasgo, b lebga kɩɩsdba, n tõdg yãmba,+ la b raag yãmb Tõogã n base.* B kʋʋ yãmb no-rɛɛsdbã sẽn da keoogd bãmb sẽn na yɩl tɩ b lebs n sak yãmbã. B paooga yãmb wʋsgo.+ 27 Rẽ n so tɩ yãmb ning-b b bɛɛbã nusẽ,+ tɩ b nams-ba.+ La b namsgã pʋgẽ, b ra kelemdame n boond yãmba, tɩ yãmb be saasẽ n wʋmdẽ. Yãmb nimbãan-zoeerã sẽn yaa wʋsgã yĩnga, yãmb da tʋmda fãagdba, tɩ b yiisd-b b bɛɛbã nusẽ.+

28 “La b sã n paam lohorem bala, b le maanda sẽn yaa wẽng yãmb nifẽ,+ tɩ yãmb bas-b b bɛɛbã nusẽ yɛsa, tɩ b soog-b ne pãnga.*+ Rẽ poore, b le kelemdame n kos yãmb sõngre,+ tɩ yãmb pa saasẽ n wʋme, n fãag-b naoor wʋsgo, yãmb nimbãan-zoeerã sẽn yaa wʋsgã yĩnga.+ 29 Baa yãmb sẽn da keoogd-b sẽn na yɩl tɩ b lebs n sak yãmb Tõogã, b wuka b mens n zãgs tɩ b kõn kelg y goamã ye.+ B kɩɩsa yãmb noyã n beeg yãmba. Yaool n yaa ne yãmb noyã la ned na n vɩɩmde, a sã n sak-ba.+ La bãmb riglma b sũyã n bas yãmba, n zãgs tɩ b kõn kelg yãmb ye. 30 Yãmb maana sũ-mar ne-b+ yʋʋm wʋsgo, n da kõt y no-rɛɛsdbã y vʋʋsmã, n tũnugd ne bãmb n keoogd-ba. La b zãgsame tɩ b kõn kelg ye. Yãmb wa n baas n ning-b-la soolem toɛy-toɛyã neb nusẽ.+ 31 La yãmb nimbãan-zoeerã sẽn yaa wʋsgã yĩnga, yãmb pa sãam-b zãnga,+ wall y raag-b n bas ye. Bala yãmb yaa sõmblem soaba,* la Wẽnnaam sẽn yaa nimbãan-zoɛta.+

32 “La masã, tõnd Wẽnnaam, yãmb yaa Wẽnnaam sẽn yaa kãsenga, n tar pãng tɩ nebã segd n zoe-y la b waoog-yã. Yãmb pidsda y kaoolã, la y wilgd nonglem.+ Ra ges-y tɩ toog ning sẽn paam tõnd hal sẽn sɩng Asiiri+ rĩm-dãmbã wakat n tãag rũndã wã pa zem bũmb ye. Toogã paama tõndo, d rĩm-dãmbã, d nanambsã,+ d maan-kʋʋdbã,+ d no-rɛɛsdbã,+ la d yaab-rãmbã, rat n yeel tɩ yãmb nin-buiidã fãa. 33 Bũmb ning fãa sẽn paam tõndã pʋgẽ, yãmb wilgame tɩ y yaa tɩrga, bala yãmb maana sɩd ne tõndo. Yaa tõnd n maan sẽn yaa wẽnga.+ 34 La sã n yaa ne tõnd rĩm-dãmbã, d nanambsã, d maan-kʋʋdbã la d yaab-rãmbã, b pa sak yãmb Tõogã, wall b tũ yãmb noyã ne y saglsã yãmb sẽn tũnug ne n keoog bãmbã ye. 35 Baa b sẽn wa n be b soolmã pʋgẽ n paamd bõn-sõma wʋsgã y sẽn da kõt-bã, la b be soolem sẽn yaa yaleng la sẽn sakd kood pʋgẽ wã, b pa tũ yãmb ye.+ B pa bas b tʋʋm-wẽnsã ye. 36 La ade! Rũndã tõnd yaa yembse.+ Tõnd bee soolem ning yãmb sẽn kõ tõnd yaab-rãmbã tɩ b rɩ a biisã ne a bõn-sõma wã pʋgẽ, n yaa yembse. 37 Soolmã rɩɩbã sẽn yaa wʋsgã lebga rĩm-dãmb nins yãmb sẽn kɩt tɩ b so tõnd d yel-wẽnã yĩngã+ rẽnda. B soo tõnd* ne d rũmsã n maand b sẽn date, tɩ tõnd be sũ-sãan-kãseng pʋgẽ.

38 “Woto fãa yĩnga, tõnd dɩka sard ne d sũur fãa,+ n gʋls d sẽn dɩk sard ningã n na n bĩngi. Tõnd nanambsã, Levi buudã nebã, la d maan-kʋʋdbã+ ninga b bãnd sebrã zugu.”

10 Ad neb nins sẽn ning b bãnd sebrã zug n na n wilg tɩ b sakame wã:+

9 Levi buudã neb sʋka, yaa a Azaniya biig a Yesuwa, a Binuwi sẽn yaa a Henadaad biig a ye wã, a Kadmiyɛll+ 10 ne b ba-biis a Sebaniya, a Hodiya, a Kelita, a Pelaya, a Hananne, 11 a Mise, a Rewoobe, a Hasabiya, 12 a Zakʋʋre, a Serebiya,+ a Sebaniya, 13 a Hodiya, a Bani la a Beninu.

14 Nin-buiidã taoor dãmbã sʋka, yaa a Parose, a Pahat-mowaabe,+ a Elam, a Zatu, a Bani, 15 a Buni, a Azgaade, a Bebayi, 16 a Adoniza, a Bigvayi, a Adinni, 17 a Atɛɛre, a Ezekɩyaase, a Azʋʋre, 18 a Hodiya, a Hasum, a Bezayi, 19 a Harife, a Anatote, a Nebayi, 20 a Magpiyaase, a Mesulam, a Hezɩɩre, 21 a Mesezabɛlle, a Zadoke, a Yaduwa, 22 a Pelatiya, a Hananne, a Anaya, 23 a Ooze, a Hananiya, a Hasuube, 24 a Aloyɛse, a Pila, a Sobɛke, 25 a Rehum, a Hasabna, a Maaseya, 26 a Ahiya, a Hananne, a Ananne, 27 a Maluki, a Harim la a Baana.

28 Nin-buiidã sẽn ketã, rat n yeel tɩ maan-kʋʋdbã, Levi buudã nebã, rigno-gũudbã, yɩɩn-yɩɩndbã, wẽnd-doogã tʋm-tʋmdbã,* neb nins fãa sẽn lak b mens ne soolem toɛy-toɛyã nebã n na n tũ Wẽnnaam Tõogã,+ n paas b pagbã, b kom-dibli wã la b kom-pugli wã, rat n yeel tɩ neb nins fãa sẽn tar yam n tõe n wʋm gomd võorã* 29 naaga b saam-biisã sẽn yaa b nin-kãsemsã n wẽen tɩ b na n tũu Wẽnnaam Tõogã, Tõog ning b sẽn tũnug ne a Moyiiz sẽn yaa Wẽnnaam tʋm-tʋmdã n kõ wã, la tɩ b na n maaga b yĩng n tũ a Zeova sẽn yaa d Zu-soabã noyã, la a tõodã fãa: 30 “Tõnd pa na n dɩgs d kom-pugli wã n kõ soolmã neba, la d pa na n peeg b kom-pugli wã n kõ d kom-dibli wã me ye.+

31 “Soolmã neb sã n wa ne b teed la kood buud fãa n na n koos Vʋʋsg daare, wall daar a to sẽn yaa sõngo, tõnd pa na n da baa fʋɩ b nengẽ ye.+ Sẽn paase, yʋʋm a yopoe-n-soabã,+ tõnd na n basa d pʋtã tɩ b vʋʋse. D na n basa sam nins b sẽn nan pa yao wã taal me.+

32 “Sẽn paase, tõnd yãka yam tɩ tõnd ned kam fãa na n wata ne sɩkl* pʋɩɩr a yembr pʋɩ a tãab zug yʋʋmd fãa tõnd Wẽnnaamã roogã tʋʋmdã yĩnga:+ 33 Yaa sẽn na n maand bur b sẽn dogend taab zutã,*+ wakat fãa kood biis kũunã,+ Vʋʋsg rayã maoong sẽn yõogd bugmã,+ ki-paalã,+ tigã,+ bõn-sõamyã wã, yel-wẽnd maandã+ b sẽn tar n maand paasg* Israyɛll nebã yĩnga, la sẽn na n tʋm tõnd Wẽnnaamã roogã tʋʋmã fãa.

34 “Tõnd maana bãnd raadã b sẽn segd n wat ne tõnd Wẽnnaamã roogẽ wã wɛɛngẽ, sẽn na yɩl n bãng yʋʋmd fãa, wakat ning maan-kʋʋdbã, Levi buudã nebã la nin-buiidã sẽn segd n wat ne raadã wa sẽn zems tõnd buudã roto. Raadã yaa sẽn na n yõogd tõnd Wẽnnaam a Zeova tẽn-kugrã zug wa sẽn zems b sẽn gʋls Tõogã pʋgẽ wã.+ 35 Yʋʋmd fãa me, tõnd na n wata ne d pʋtã dẽenem biisã, la tɩ-woamdg buud fãa dẽenem biis a Zeova roogẽ wã,+ 36 la d wat ne d kom-dẽems nins sẽn yaa rapã ne d rũmsã kom-dẽemsã,+ rat n yeel tɩ d rũm-bɛdã la d rũm-bõonegã kom-dẽemsã, wa sẽn zems b sẽn gʋls Tõogã pʋgẽ wã. Tõnd na n tall-b lame n wa tõnd Wẽnnaamã roogẽ, n kõ maan-kʋʋdbã sẽn tʋmd tõnd Wẽnnaamã roogẽ wã.+ 37 Sẽn paase, tõnd na n tallda d dẽenem koodã biis d sẽn pãrã,+ d kũunã, tɩɩg buud fãa biisi,+ divẽ-paalg la kaam,+ n wat n kõt maan-kʋʋdbã tɩ b bĩngd tõnd Wẽnnaamã roogã teed bĩngr zĩisẽ.*+ D na n kõta Levi buudã neb+ d pʋtã kood piig-pʋɩɩre, bala yaa Levi buudã neb n deegd tẽns nins fãa sẽn be zĩis nins d sẽn koodã piig-pʋɩɩrã.

38 “Maan-kʋʋd a yembre, rat n yeel t’a Aarõ yageng n segd n zĩnd ne Levi buudã nebã, wakat ning b sẽn na n deeg pʋɩɩr a ye pʋɩ piig zugã. Levi buudã neb segd n yãka piig-pʋɩɩrã b sẽn deegã piig-pʋɩɩr n kõ tõnd Wẽnnaamã roog yĩnga,+ sẽn na yɩl tɩ b bĩng teedã bĩngr rotẽ.* 39 Bala yaa teedã bĩngr zĩisẽ* la Israyɛll nebã ne Levi buudã neb segd n wat ne koodã, divẽ-paalgã la kaamã.+ Yaa be la Wẽnnaam doogã teed be-yã, n paas maan-kʋʋdbã sẽn tʋmd be wã, rigno-gũudbã la yɩɩn-yɩɩndbã. Tõnd pa na n deem ne d Wẽnnaamã roog ye.”+

11 Nin-buiidã nanambsã ra bee Zerizalɛm.+ La neb a taabã maana bãnd+ sẽn na yɩl n kɩt tɩ ned a ye neb piig zug wa zĩnd Zerizalɛm sẽn yaa tẽn-sõngã, tɩ neb a wɛ wã sẽn ketã zĩnd tẽns a taabã pʋsẽ. 2 Sẽn paase, nin-buiidã ninga neb nins fãa sẽn sak ne yamleoog n na n zĩnd Zerizalɛmmã barka.

3 Ad soolmã taoor dãmb sẽn da be Zerizalɛmmã: (Israyɛll neb a taabã, maan-kʋʋdbã, Levi buudã nebã, wẽnd-doogã tʋm-tʋmdbã,*+ ne a Salomo tʋm-tʋmdbã+ yagensã ra bee Zida tẽns a taabã pʋsẽ, tɩ ned kam fãa be a zĩigẽ, a tẽngẽ wã.+

4 Zida ne Bẽnzame buudã neb kẽer me ra bee Zerizalɛm.) Zida buudã sʋka, yaa a Ataya sẽn yaa a Ozɩyas biigã, t’a Ozɩyas yaa a Zakari biiga, t’a Zakari yaa a Amariya biiga, t’a Amariya yaa a Sefatiya biiga, t’a Sefatiya yaa a Mahalalɛll biiga, t’a Mahalalɛll yaa a Perɛɛz+ yagenga, 5 ne a Maaseya sẽn yaa a Baruk biigã, t’a Baruk yaa a Koloze biiga, t’a Koloze yaa a Hazaya biiga, t’a Hazaya yaa a Adaya biiga, t’a Adaya yaa a Zoyariib biiga, t’a Zoyariib yaa a Zakari biiga, t’a Zakari yaa a Sela yagengã. 6 A Perɛɛz yagensã fãa sẽn da be Zerizalɛmmã ra yaa rap kobs-naas la pis-yoob la a nii sẽn yaa gãndaado.

7 Ad Bẽnzame buudã neba: A Salu+ sẽn yaa a Mesulam biigã, t’a Mesulam yaa a Zowɛɛd biiga, t’a Zowɛɛd yaa a Pedaya biiga, t’a Pedaya yaa a Kolaya biiga, t’a Kolaya yaa a Maaseya biiga, t’a Maaseya yaa a Itiyɛll biiga, t’a Itiyɛll yaa a Yesaya biigã. 8 Sẽn pʋgd yẽ yaa a Gabayi ne a Salayi. B sõorã yaa kobs-wɛ la pisi la a nii. 9 A Zowɛll sẽn yaa a Zikri biigã n da yaa b naaba, t’a Zida biig a Hasenuwa yaa a na-pʋgdga, tɩ b get tẽngã yelle.

10 Maan-kʋʋdbã sʋk yaa a Yedaya sẽn yaa a Zoyariib biigã, a Yakinne,+ 11 a Seraya sẽn yaa a Hilkiya biigã, t’a Hilkiya yaa a Mesulam biiga, t’a Mesulam yaa a Zadok biiga, t’a Zadok yaa a Merayot biiga, t’a Merayot yaa a Ayituub+ biiga, sẽn yaa Wẽnnaam doogã taoor soab a ye wã, 12 n paas b ba-biisã sẽn tʋm wẽnd-doogã tʋʋmã. B sõorã yaa kobs-nii la pisi la a yiibu, ne a Adaya sẽn yaa a Zerowam biigã, t’a Zerowam yaa a Pelaliya biiga, t’a Pelaliya yaa a Amzi biiga, t’a Amzi yaa a Zakari biiga, t’a Zakari yaa a Pasʋʋr+ biiga, t’a Pasʋʋr yaa a Malkiya biigã, 13 ne b ba-biisã sẽn yaa buudã rot taoor dãmbã. B sõorã yaa kobs-yi la pis-naas la a yiibu. N paas a Amasayi sẽn yaa a Azareyɛll biigã, t’a Azareyɛll yaa a Azayi biiga, t’a Azayi yaa a Mesilemot biiga, t’a Mesilemot yaa a Imeer biigã, 14 ne b ba-biisã sẽn yaa rap sẽn tar pãng la raoodã. B sõorã yaa koabg la pisi la a nii, ne b naab a Zabdiyɛll sẽn yaa nin-kãsemsã buud nedã.

15 Levi buudã neb sʋka, yaa a Semaya+ sẽn yaa a Hasuub biigã, t’a Hasuub yaa a Aazrikam biiga, t’a Aazrikam yaa a Hasabiya biiga, t’a Hasabiya yaa a Buni biigã, 16 ne a Sabtayi+ la a Zozabaad+ sẽn naag Levi buudã taoor dãmbã. Yaa bãmb n da get Wẽnnaam doogã yɩng tʋʋmã yelle. 17 Sẽn paase, yaa a Mataniya+ sẽn yaa a Mise biigã, t’a Mise yaa a Zabdi biiga, t’a Zabdi yaa a Azaf+ biigã. Yaa yẽ n da lʋɩt taoor yɩɩlã sasa, la a lʋɩt taoor tɩ b pẽgd Wẽnnaam pʋʋsgã sasa.+ N paas a Bakbukiya sẽn yaa a ba-biisã sõangdã, la a Abda sẽn yaa a Samuwa biigã, t’a Samuwa yaa a Galall biiga, t’a Galall yaa a Yedutun+ biigã. 18 Levi buudã neb nins fãa sẽn da be tẽn-sõngẽ wã sõor yaa kobs-yi la pis-nii la a naase.

19 Rigno-gũudbã ra yaa a Akuub ne a Talmon+ n paas b ba-biisã. B sõorã yaa koabg la pis-yopoe la a yiibu.

20 Israyɛll nebã ne maan-kʋʋdbã la Levi buudã neb nins sẽn ketã ra bee Zida tẽns a taabã pʋsẽ, tɩ ned fãa be zĩig ning sẽn yaa a rogem-pʋɩɩrã pʋgẽ. 21 Wẽnd-doogã tʋm-tʋmdb*+ ra bee Ofɛlle,+ t’a Ziya ne a Gispa yaa b taoor dãmba.

22 Levi buudã neb nins sẽn be Zerizalɛmmã taoor soab ra yaa a Uuzi sẽn yaa a Bani biigã, t’a Bani yaa a Hasabiya biiga, t’a Hasabiya yaa a Mataniya+ biiga, t’a Mataniya yaa a Mise biigã. Yẽ yaa a Azaf yagenga. A Azaf yagensã yaa yɩɩn-yɩɩndba. Yaa yẽ n da get Wẽnnaam doogã tʋʋm yelle. 23 Bala rĩmã ra yiisa noor yɩɩn-yɩɩndbã wɛɛngẽ,+ tɩ b segd n kõt-b yaood daar fãa wa sẽn zems sẽn yaa tɩlɛ ne-bã. 24 Sẽn paase, a Petaya ra yaa rĩmã sagenda,* nin-buiidã yell buud fãa wɛɛngẽ. A Petaya yaa a Mesezabɛll biiga, t’a Mesezabɛll yaa a Zeera yagenga, t’a Zeera yaa a Zida biiga.

25 Sã n yaa ne tẽn-bõonesã la b pʋtã wɛɛngẽ, Zida neb kẽer ra bee Kiryat-arba+ ne tẽns nins a sẽn so wã* pʋsẽ, Dibon ne tẽns nins a sẽn so wã, Yekabzeyɛll+ ne a tẽn-bõonesã, 26 Yesuwa, Molaada,+ Bɛt-pelɛte,+ 27 Hazaar-suwalle,+ Bɛɛr-seba ne tẽns nins a sẽn so wã,* 28 Ziklaage,+ Mekona ne tẽns nins a sẽn so wã,* 29 Ɛn-rimonne,+ Zora+ la Yarmute, 30 Zanowa,+ Adulam ne a tẽn-bõonesã, Lakiis+ ne a pʋtã, la Azeka+ ne tẽns nins a sẽn so wã* pʋsẽ. B zĩnda sẽn sɩng Bɛɛr-seba n tãag Hinom longã.+

31 Bẽnzame buudã neb ra bee Geba,+ Mikmaase, Ayi, Betɛll+ ne tẽns nins a sẽn so wã,* 32 Anatote,+ Noobe,+ Ananiya, 33 Hazoore, Rama,+ Gitayim, 34 Hadiide, Zeboyim, Nebalate, 35 Loode, la Ono+ sẽn yaa tʋʋm-mitbã longã. 36 Sẽn paase, Levi buudã sul kẽer neb sẽn da be Zida soolmẽ wã tɩ zĩnda Bẽnzame buudã soolmẽ.

12 Ad maan-kʋʋdbã la Levi buudã neb nins sẽn tũ a Seyatiyɛll+ biig a Zorobabɛll+ ne a Yesuwa+ n kẽng Zerizalɛmmã: Yaa a Seraya, a Zeremi, a Ɛsdrase, 2 a Amariya, a Maluk ne a Hatuse, 3 a Sekaniya, a Rehum, a Meremote, 4 a Ido, a Ginetoyi, a Abiya, 5 a Miyaminni, a Maadiya, a Bilga, 6 a Semaya, a Zoyariibe, a Yedaya, 7 a Salu, a Amoke, a Hilkiya ne a Yedaya. A Yesuwa wakatẽ wã, bãmb n da yaa maan-kʋʋdbã ne b ba-biisã taoor dãmba.

8 Levi buudã neb ra yaa a Yesuwa, a Binuwi, a Kadmiyɛlle,+ a Serebiya, a Zida ne a Mataniya.+ A Mataniya ne a ba-biisã n da lʋɩt taoor bark pʋʋsg yɩɩlã sasa. 9 Gũubã wakate,* a Bakbukiya ne a Uni sẽn yaa b ba-biisã ra yasame n tees-ba. 10 A Yesuwa roga a Zoyakim, t’a Zoyakim rog a Eliyasɩɩbe,+ t’a Eliyasɩɩb rog a Zoyada,+ 11 t’a Zoyada rog a Zonatã, t’a Zonatã rog a Yaduwa.

12 Ad maan-kʋʋdb nins sẽn da yaa buudã rot taoor dãmb a Zoyakim wakatẽ wã: A Seraya+ roogã taoor soab yaa a Meraya. A Zeremi roogã taoor soab yaa a Hananiya. 13 A Ɛsdras+ roogã taoor soab yaa a Mesulam. A Amariya roogã taoor soab yaa a Yehohananne. 14 A Maluki roogã taoor soab yaa a Zonatã. A Sebaniya roogã taoor soab yaa a Zozɛfe. 15 A Harim+ roogã taoor soab yaa a Adna. A Merayot roogã taoor soab yaa a Hɛlkayi. 16 A Ido roogã taoor soab yaa a Zakari. A Gineton roogã taoor soab yaa a Mesulam. 17 A Abiya+ roogã taoor soab yaa a Zikri. A Miniyamin roogã taoor soab yaa a . . .* A Moadiya roogã taoor soab yaa a Piltayi. 18 A Bilga+ roogã taoor soab yaa a Samuwa. A Semaya roogã taoor soab yaa a Yehonatanne. 19 A Zoyariib roogã taoor soab yaa a Matenayi. A Yedaya+ roogã taoor soab yaa a Uuzi. 20 A Salayi roogã taoor soab yaa a Kalayi. A Amok roogã taoor soab yaa a Ebɛɛre. 21 A Hilkiya roogã taoor soab yaa a Hasabiya. A Yedaya roogã taoor soab yaa a Netanɛlle.

22 B gʋlsa Levi buudã rot taoor dãmbã yʋy a Eliyasɩɩb wakatẽ wã, a Zoyada, a Zohanan ne a Yaduwa+ wakatẽ wã, n tãag Pɛrs ned a Daryuus naamẽ wã. B maana woto me ne maan-kʋʋdbã.

23 B gʋlsa Levi buudã rot taoor dãmb yʋy kibayã sebrã pʋgẽ, n tãag a Eliyasɩɩb biig a Zohanan wakatẽ wã. 24 Levi buudã neb taoor dãmb ra yaa a Hasabiya, a Serebiya, ne a Kadmiyɛll+ biig a Yesuwa.+ B ba-biisã ra yasame n tees-ba, n yɩɩnd n pẽgd Wẽnnaam, la b pʋʋsd bark wa sẽn zems noy nins Wẽnnaam dao a Davɩɩd+ sẽn kõ wã, rat n yeel tɩ gũudb sull fãa ra yasame n tees a to. 25 A Mataniya,+ a Bakbukiya, a Abdiyaase, a Mesulam, a Talmon la a Akuub+ ra yaa rigno-gũudba,+ n yas n gũud teedã bĩngr zĩis nins sẽn pẽ wẽnd-doogã rignoyã. 26 B tʋma b tʋʋmdã a Zozadak biig a Yesuwa+ biig a Zoyakim wakatẽ wã, n paas a Neemi sẽn yaa guvɛrneerã, la a Ɛsdras+ sẽn yaa maan-kʋʋd la seb-gʋlsdã wakatẽ.

27 B sẽn wa n na n maan tigr Zerizalɛm lalsã sẽn me n sa wã yĩngã, b gẽesa Levi buudã neb n tɩ tall-b zĩis nins fãa b sẽn da be wã, n kẽng Zerizalɛm sẽn na yɩl tɩ b maan sũ-noog lalsã sẽn me n sa wã yĩnga, n yɩɩl bark pʋʋsg yɩɩl+ ne waase, yʋʋm-teed sẽn tar riss la pendse. 28 Yɩɩn-yɩɩndb nins sẽn paam zãmsg sõma wã* tigma taaba. B yii Zʋrdẽ kʋɩlgã soolmẽ wã, Zerizalɛm tẽn-kɩremsã, Netofa nebã+ tẽn-bõonesã pʋsẽ, 29 Bɛt-gilgalle,+ la Geba+ ne Azmavɛt+ pʋtẽ wã, bala yɩɩn-yɩɩndbã ra tii b yiyã Zerizalɛm tẽn-kɩremsẽ wã. 30 Maan-kʋʋdbã ne Levi buudã neb yɩlga b mense,+ la b yɩlg nin-buiidã, rignoyã+ la lalgã.+

31 Rẽ poore, mam talla Zida nanambsã n dʋ lalgã zugu. Sẽn paase, mam yãka neb sul a yiib sẽn na n yɩɩnd bark pʋʋsg yɩɩla, tɩ neb sull pʋgd sull fãa. Sull a ye wã ra kẽnda lalgã zugu, rɩtg sẽnes n teesd Tompɛglem dʋyã rignoorã.+ 32 A Osaya ne Zida nanambsã pʋɩ-sʋk ra pʋgd-b lame, 33 n paas a Azariya, a Ɛsdrase, a Mesulam, 34 a Zida, a Bẽnzame, a Semaya, la a Zeremi. 35 Maan-kʋʋdbã kom-dibli kẽer ra bee ne-ba, n zãad tãntãado.+ Yaa a Zakari sẽn yaa a Zonatã biigã, t’a Zonatã yaa a Semaya biiga, t’a Semaya yaa a Mataniya biiga, t’a Mataniya yaa a Mikaya biiga, t’a Mikaya yaa a Zakʋʋr biiga, t’a Zakʋʋr yaa a Azaf+ biigã, 36 n paas a ba-biisã. Yaa a Semaya, a Azareyɛlle, a Milalayi, a Gilalayi, a Maayi, a Netanɛlle, a Zida, la a Hanani. B ra zãada Wẽnnaam dao a Davɩɩd yʋʋm-teedã.+ Seb-gʋlsd a Ɛsdras+ n da kẽnd b taoore. 37 B sẽn wa n ta Bulgã rignoorã,+ b teesa tɩrg n tũ lalgã zĩig ning sẽn dʋʋdã sẽn be a Davɩɩd zakã zugẽ wã, n tɩ rʋ a Davɩɩd tẽngã rʋʋdgã,+ n kẽng Koomã rignoorẽ+ sẽn be yaangã.

38 Sull a to wã sẽn yɩɩnd bark pʋʋsg yɩɩlã teesa goabga. Maam ne nin-buiidã pʋɩ-sʋk pʋgl-b lame tɩ d kẽn lalgã zugu, n loog Wʋmsã gasgã+ zugẽ n tãag Lal-taokã,+ 39 la Efrayim+ rignoorã zugẽ n tãag Yi-kʋdã rignoorã.+ D kell n kẽng n taa Zĩmã rignoorã,+ Hananɛll gasgã,+ Meya gasgã, la Piisã rignoorã.+ Yɩɩn-yɩɩndbã tɩ yalsa Gũudbã rignoorẽ wã.

40 Sẽn na n baase, yɩɩn-yɩɩndbã sul a yiibã sẽn yɩɩnd bark pʋʋsg yɩɩlã tɩ yalsa Wẽnnaam doogã taoore, tɩ ma-me yals ne kom-bɛɛmbã pʋɩ-sʋk sẽn be ne maamã, 41 n paas maan-kʋʋdb a Eliyakim, a Maaseya, a Miniyaminni, a Mikaya, a Eliyohenayi, a Zakari la a Hananiya, n zãad tãntãado, 42 ne a Maaseya, a Semaya, a Eleazaare, a Uuzi, a Yehohananne, a Malkiya, a Elam ne a Ezɛɛre. A Izraya lʋɩɩ yɩɩn-yɩɩndbã taoore, tɩ b zẽk b koees n yɩɩle.

43 Baraare, b maana maand wʋsgo, la b kɩdem sũ-noogo.+ Bala Wẽnnaam kɩtame tɩ b paam sũ-no-kãsenga. Pagbã ne kambã me kɩdma sũ-noogo,+ hal tɩ b ra tõe n pa yɩɩg n wʋm Zerizalɛm nebã kɩdengã rãamde.+

44 Baraare, b yãka rap tɩ b na n get rot nins pʋsẽ b sẽn bĩngd kũunã,+ dẽenem biisã+ ne piig-pʋɩɩrã+ yelle. Ro-kãens pʋsẽ, b ra ningda tẽngã pʋtã koodã pʋɩɩr ning Tõogã sẽn wilg tɩ b segd n kõo maan-kʋʋdbã la Levi buudã nebã,+ bala sũ-noog ra bee Zida soolmẽ wã, maan-kʋʋdbã la Levi buudã neb sẽn da tʋmd b tʋʋmdã yĩnga. 45 B sɩnga b Wẽnnaamã tʋʋm yell gesgo, la b yɩlgd nin-buiidã wa yɩɩn-yɩɩndbã ne rigno-gũudbã sẽn yɩlg b mense, wa sẽn zems noy nins a Davɩɩd ne a biig a Salomo sẽn kõ wã. 46 Hal pĩndã, a Davɩɩd ne a Azaf wakatẽ wã, yɩɩn-yɩɩndbã ra tara taoor dãmba, pẽgrã yɩɩl la Wẽnnaam bark pʋʋsgã yɩɩl yĩnga.+ 47 Sẽn paase, a Zorobabɛll+ ne a Neemi wakatẽ wã, Israyɛll nebã ra kõta yɩɩn-yɩɩndbã+ ne rigno-gũudbã+ pʋɩɩr wa sẽn zems bũmb nins sẽn yaa tɩlɛ ne-b daar fãa wã. B ra kõta Levi buudã neb me pʋɩɩre,+ tɩ Levi buudã neb ra yãkd pʋɩɩr n kõt a Aarõ yagensã.

13 Wakat kãnga, b karma a Moyiiz sebrã tɩ nin-buiidã kelge.+ B yãa b sẽn gʋls tɩ Amon ned wall Mowaab ned+ pa segd n kẽ Wẽnnaam nin-buiidã sʋka,+ 2 bala b pa seg Israyɛll nebã ne rɩɩb la koom ye. B pʋd n kõo a Balaam ligd sẽn na yɩl t’a kãab-b wẽnga.+ La tõnd Wẽnnaamã toeema a kãab-wẽngã tɩ lebg barka.+ 3 Israyɛll nebã sẽn wʋm Tõogã goamã bala, b sɩngame n lakd b mens ne neb nins fãa sẽn yaa bu-zẽmsã.+

4 Sẽn deng rẽ tɩ maan-kʋʋd ning sẽn da get tõnd Wẽnnaamã roogã teed bĩngr zĩis* yellã+ yaa a Eliyasɩɩb+ sẽn yaa a Tobiya+ rɛɛmbã. 5 A kõo a Tobiya teedã bĩngr zĩ-yaleng* a ye. Yaa zĩig ning b sẽn da bĩngd kood biis kũunã, wisd sẽn yaa pɛɛlgã, wẽnd-doogã tʋʋmã teedã, koodã ne divẽ-paalgã la kaamã+ pʋɩɩr a ye pʋɩ piig zugã b sẽn segd n kõ Levi buudã neba,+ yɩɩn-yɩɩndbã la rigno-gũudbã, n paas kũun nins b sẽn kõt maan-kʋʋdbã yĩngã.+

6 Wakat kãng fãa tɩ mam da pa be Zerizalɛm ye. Bala Babilon rĩm a Artazɛgzɛs+ naamã yʋʋm pis-tã la a yiib-n-soabã,+ mam leba rĩmã nengẽ. La mam wa n kosa rĩmã sor n na n leb Zerizalɛm. 7 Dẽ, mam taa Zerizalɛm n yã bõn-wẽng ning a Eliyasɩɩb+ sẽn maanã. A kõo a Tobiya+ teed bĩngr zĩig Wẽnnaam doogã samandẽ. 8 Bõn-kãng sãama mam sũurã wʋsgo, tɩ mam yiis a Tobiya teedã fãa sẽn da be teedã bĩngr zĩigẽ* wã n lobe. 9 Rẽ poore, mam kõo noor tɩ b yɩlg teedã bĩngr zĩisã.* Mam lebs n ninga Wẽnnaam doogã+ teedã, kood biis kũunã ne wisd sẽn yaa pɛɛlgã b pʋsẽ.+

10 Mam mikame me tɩ b pa le kõt Levi buudã neb b pʋɩɩrã,+ hal tɩ Levi buudã neb ne yɩɩn-yɩɩndbã sẽn da tʋmdã bas tʋʋmdã, tɩ ned kam fãa kẽng a pʋʋgẽ.+ 11 Dẽ, mam zaba kom-bɛɛmbã,+ la m sok-b yaa: “Bõe yĩng tɩ yãmb bas tɩ b reemd ne Wẽnnaam doogã?”+ Rẽ poore, mam tigma Levi buudã nebã n kɩt tɩ b lebs n sɩng b tʋʋmã. 12 Zida nebã fãa talla koodã ne divẽ-paalgã la kaamã pʋɩɩr a ye pʋɩ piig zug+ n wa teedã bĩngr zĩisẽ.+ 13 Rẽ poore, mam kɩtame tɩ maan-kʋʋd a Selemiya, seb-gʋlsd a Zadok la a Pedaya sẽn yaa Levi buudã nedã ges teedã bĩngr zĩis yelle, t’a Mataniya biig a Zakʋʋr biig a Hanan ra yaa b sõangda, bala nin-kãens ra yaa neb b sẽn tõe n teege. Bãmb n da segd n pʋɩt kũunã tɩ tat b ba-biisã.

14 Mam Wẽnnaam, tẽeg-y mam yell+ yãoã yĩnga. Ra yĩm-y tʋʋm-sõma nins mam sẽn tʋm yãmb roogã yĩnga, la a tʋʋmã* yĩngã ye.+

15 Wakat kãnga, mam yãa neb sẽn be Zida n tabd viyn biis Vʋʋsg daarã.+ Kẽer da wʋkda kood n tigsdẽ la b zɩlgd bõens koodo, la b wat ne divẽ, viyn biisi, kankama, la zɩɩb buud fãa Zerizalɛm Vʋʋsg daarã.+ Dẽ, mam keoog-b lame tɩ b ra le koos teed daar-n-kãng ye.* 16 Tɩɩr neb nins sẽn da be tẽngã pʋgẽ wã ra wata ne zĩm la koosem buud toor-toore, n koosd ne Zida la Zerizalɛm nebã Vʋʋsg daarã.+ 17 Dẽ, mam zaba Zida nin-kãsemsã, la m yeel-b yaa: “Bõe yĩng tɩ yãmb maand bõn-wẽng a woto, hal n kɩɩsd Vʋʋsg daarã noore? 18 Pa woto la yãmb yaab-rãmbã maan-yã, tɩ tõnd Wẽnnaamã kɩt tɩ yel-be-kãngã fãa wa tõnd zutu, la tẽn-kãngã zug sɩda? Masã, yãmb kɩɩsda Vʋʋsg daarã noore,+ n na n kɩt tɩ Wẽnnaam sũur maneg n puug ne Israyɛll nebã.”

19 Rẽ n so tɩ mam kõ noor tɩ nand tɩ zĩigã sobge, rat n yeel tɩ nand tɩ Vʋʋsg daarã sɩnge, b segd n paga Zerizalɛm kʋɩlensã. Mam yeelame me tɩ sã n pa Vʋʋsg daarã n looge, b pa segd n pak kʋɩlensã ye. Sẽn paase, mam kɩtame tɩ mam mengã tʋm-tʋmdb yaas rignoyẽ wã sẽn na yɩl tɩ ned ra tall zɩɩb n kẽ tẽngã pʋgẽ Vʋʋsg daarã ye. 20 Dẽ, lɛɛbdbã ne neb nins sẽn koosd teed buud toor-toorã gãanda Zerizalɛm yɩngã, vugr bɩ naoor a yiibu. 21 Mam sõog-b-la nug n yeele: “Bõe yĩng tɩ yãmb gãe lalgã sɛɛg ka yʋngã? Yãmb sã n le maan a buudu, mam na n diga yãmb ne pãnga.” Rẽ tɛka, b pa le wa Vʋʋsg daar ye.

22 Mam yeela Levi buudã neb tɩ b segd n yɩlgda b mens wakat fãa n wat n gũud rignoyã sẽn na yɩl tɩ Vʋʋsg daarã kell n yɩ sõngo.+ Mam Wẽnnaam, tẽeg-y mam yell n ning-m bark bõn-kãngã yĩng me, la y zoe mam nimbãanega, yãmb maan-neerã sẽn yaa wʋsgã yĩnga.+

23 Wakat kãnga, mam mikame tɩ Zʋɩf-rãmb n kẽ kãadem ne Asdood+ kom-pugli, Amon la Mowaab+ kom-pugli.+ 24 B kambã pʋɩ-sʋk ra gomda Asdood nebã buud-gomdã wall buud a taab goama, la b baa a ye ra pa wʋmd Zʋɩf-rãmbã buud-gomdã ye. 25 Dẽ, mam zab-b lame la m kãab-b wẽnga. Mam pãba rap kẽere,+ la m gʋs b zoobdã, n yeel-b yaa: “Wẽen-y ne Wẽnnaam tɩ yãmb pa na n dɩk y kom-pugli wã n kõ b kom-dibli wã, la tɩ y pa na n deeg b kom-pugli wã n kõ y kom-dibli wã, wall n maan y mens pagb ye.+ 26 Pa bãmb n kɩt tɩ Israyɛll rĩm a Salomo beegã sɩda? Buud ka tɛkã sʋka, rĩm da ka be sẽn yaa wa yẽ ye.+ Sẽn paase, a Wẽnnaamã ra nong-a lame,+ hal n kɩt t’a lebg Israyɛll tõrã rĩma. La bu-zẽmsã pagb kɩtame tɩ baa yẽ meng beege.+ 27 Rẽ yĩnga, yãmb sẽn pa maan sɩd ne tõnd Wẽnnaamã, n kẽ kãadem ne bu-zẽms pagb+ n maan wẽng woto wã pa yel-wẽn-kãseng sɩda?”

28 Maan-kʋʋdb kãsem a Eliyasɩɩb+ biig a Zoyada+ biig a ye n da kẽ kãadem ne Horon ned a Sanbalat+ bi-pugla. Dẽ, mam dig-a lame t’a zãag ne maam.

29 Mam Wẽnnaam, tẽeg-y b yelle, bala b rẽgma maan-kʋʋrã ne kaool ning y sẽn maan ne maan-kʋʋdbã+ la Levi buudã nebã.+

30 Mam yɩlg-b-la ne bu-zẽmsã rẽgdã, la m kõ maan-kʋʋdbã ne Levi buudã tʋʋma, sẽn na yɩl tɩ ned kam fãa le tʋm a tʋʋmde.+ 31 Sẽn paase, mam lugla noy raadã+ b sẽn segd n wat ne pʋgdg-pʋgdgã wɛɛngẽ, la dẽenem kood biisã wɛɛngẽ.

Mam Wẽnnaam, tẽeg-y mam yelle, n ning-m barka.+