VẼNEGR A ZÃ SẼN PAAME

1 Woto yaa a Zeezi Kirist vẽnegr Wẽnnaam sẽn kõ-a,+ t’a wilg a yembsã+ bũmb nins sẽn segd n maan ka la bilfã. La a Zeezi tʋma a malɛk t’a tũnug ne bãn n wilg a yamb a Zã+ bõn-kãense, 2 t’a Zã kõ kaset Wẽnnaam gomdã wɛɛngẽ, la kaset ning a Zeezi Kirist sẽn kõ wã me wɛɛngẽ, rat n yeel tɩ bũmb nins fãa a Zã sẽn yã wã. 3 Sũ-noog soab la ned ning sẽn zẽkd a koɛɛg n karemd bãngr-gom-kãngã sẽn yetã. Sũ-noog rãmb me la neb nins sẽn kelgd la b tũud bũmb nins sẽn gʋls a pʋgẽ wã,+ bala wakat ning b sẽn yãkã kolgame.

4 Maam a Zã n gʋls seb-kãngã n tool tigims a yopoe wã+ sẽn be Aazi soolmẽ wã:

Bɩ bark* la laafɩ sẽn yit “Soab ning sẽn be, la sẽn da be, la sẽn watã”+ nengẽ, la vʋʋsem sõamyã a yopoe wã+ sẽn be a geerã taoorã nengẽ, 5 la a Zeezi Kirist nengẽ zĩnd ne yãmba. Yẽ* n yaa “Kaset soab ning sẽn maand sɩdã,”+ sẽn yɩ-a “pipi n vʋʋg n yi kũ-rãmb sʋkã,” la “tẽngã rĩm-dãmbã Naabã.”+

Bɩ soab ning sẽn nong tõnd+ la a fãag tõnd ne d yel-wẽnã a meng zɩɩmã maasem yĩnga,+ 6 la sẽn kɩt tɩ d lebg rĩm-dãmb+ la maan-kʋʋdb+ a Wẽnnaamã sẽn yaa a Ba me wã yĩngã paam ziir la pãng wakat fãa. Ãmiina.

7 Ges-y-yã! A zaoo sawatã n watẽ,+ la nebã fãa na n yã-a lame, baa neb nins sẽn kõs-a wã. La tẽngã buud toɛy-toɛyã fãa neb na n wilga b sũ-sãams a yĩnga.+ N-ye, sɩd na n yɩɩ woto. Ãmiina.

8 Wẽnnaam a Zeova* yeelame yaa: “Mam yaa Alfa la Omega,*+ Soab ning sẽn be, la sẽn da be, la sẽn wate, n yaa Sẽn-tõe-a-fãa wã.”+

9 Maam a Zã sẽn yaa yãmb saam-biiga, la sẽn naag yãmb n paamd namsgo,+ n na n naag yãmb n paam rĩungu,+ la sẽn naag yãmb n tõogd toog+ a Zeezi tũubã pʋgẽ wã,+ mam da bee ko-sʋk tẽng ning b sẽn boond tɩ Patmosã, mam sẽn da gomd Wẽnnaam yell la m kõt kaset a Zeezi zugã yĩnga. 10 Vʋʋsem sõngã kɩtame tɩ mam yã bũmb nins sẽn na n maan Zu-soabã daarã sasa. Mam wʋma koe-kãseng sẽn wõnd tãntãoog rãamd mam poorẽ wã 11 sẽn yete: “Gʋls bũmb nins fo sẽn ne wã seb-pindem zugu, n tool tigims a yopoe wã sẽn be Efɛɛz+ ne Ismirn+ la Pɛrgam+ ne Tiyatiir+ la Sard+ ne Filadɛlfi+ n paas Laodise+ wã.”

12 Mam wẽnemdame n na n ges ned ning sẽn da gomd ne maamã. Mam sẽn wẽnemdã, mam yãa sãnem fɩtl-dogends a yopoe.+ 13 Fɩtl-dogendsã sʋka, ned sẽn wõnd ninsaal biig+ n da be be, n yer fuug sẽn sig n ta a naoã, la sẽn sẽb sãnem sẽbdg a yãoogẽ wã. 14 Sẽn paase, a zugã ne a zoobdã ra yaa peels wa pe-kõbd sẽn yaa peelse, la wa sa-lamdo, t’a ninã yaa wa bug-witim.+ 15 A naoã ra yaa wa zũud halaal+ sẽn moog wʋng pʋgẽ, la a koɛɛgã rãamd ra wõnda koom sẽn zoet ne pãng bʋrgo. 16 A ra zãada ãds a yopoe a nug-rɩtgo,+ tɩ sʋ-wok sẽn tar noy a yiib sẽn dɩt sõma yit a noorẽ wã,+ t’a nengã yaa wa wĩntoogã, a sẽn wat n yãgd ne a pãng fãa wã.+ 17 Mam sẽn yã-a wã, mam lʋɩɩ a naoẽ wã wa ned sẽn ki.

La a tika maam ne a nug-rɩtgã n yeele: “Ra zoe rabeem ye. Maam n yaa Pipi soabã+ la Yaoolem soabã,+ 18 la sẽn vɩ-a wã.+ Mam da kiime,+ la gese! Mam vɩɩ wakat sẽn kõn sa yĩnga,+ n tar kũumã la Yaoogã* kʋɩlen-biisi.+ 19 Woto wã, bɩ f gʋls bũmb nins fo sẽn yã wã, bũmb nins sẽn be, la bũmb nins sẽn na n maan bõn-kãens loogr poorã. 20 Ad ãds a yopoe wã fo sẽn yã tɩ be mam nug-rɩtgã ne sãnem fɩtl-dogends a yopoe wã yel-soalgdg sẽn yaa sõngã: Ãds a yopoe wã makda tigims a yopoe wã malɛgsã, tɩ fɩtl-dogends a yopoe wã makd tigims a yopoe wã.+

2 “Gʋls Efɛɛz+ tigingã malɛkã+ n yeel yaa: Ad sẽn zãad-a ãds a yopoe wã a nug-rɩtgẽ, n kẽnd sãnem fɩtl-dogends a yopoe wã+ sʋkã sẽn yeele: 2 ‘Mam mii fo tʋʋm-tʋmdɩ wã ne f tʋʋm-toogã la f sẽn tõogd toogã, la m miime me tɩ fo pa nong nin-wẽnsã zĩigẽ, la tɩ fo maka neb nins sẽn yet tɩ b yaa tẽn-tʋmdb+ n yaool n pa tẽn-tʋmdbã, n bãng tɩ b yaa zirẽ-be-neba. 3 Fo tõogda toog me, la fo saka namsg wʋsg mam yʋʋrã yĩng+ n pa koms raood ye.+ 4 Baasgo, bũmb n be tɩ mam ningd foom taal a poorẽ: Yaa tɩ fo basa nonglem ning fo sẽn da tar sɩngrẽ wã.

5 “‘Woto wã, tẽeg zĩig ning fo sẽn yi n lʋɩ wã yelle, la f tek yam n kos sugri,+ n le tʋm tʋʋm nins fo sẽn da tʋmd sɩngrẽ wã. Sã n pa rẽ, mam na n waa fo nengẽ, n yiis f fɩtl-doagendgã+ a zĩigẽ, sã n pa mikame tɩ f teka yam n kos sugri.+ 6 La fo tara bũmb sẽn yaa sõma: Yaa tɩ fo kisa tʋʋm nins sẽn sakd-b a Nikola zãmsgã+ sẽn tʋmdã, sẽn yaa tʋʋm ma-me sẽn kisã. 7 Bɩ ned ning sẽn tar tʋb kelg bũmb nins vʋʋsem sõngã sẽn yet tigimsã:+ Ned ning sẽn na n tõoge,+ mam na n kõ-a-la sor t’a rɩ vɩɩm tɩɩgã biisi,+ tɩɩg ning sẽn be Wẽnnaam arzãnã pʋgẽ wã.’

8 “Gʋls Ismirn tigingã malɛkã n yeel yaa: Ad ‘Pipi soabã la Yaoolem soabã,’+ sẽn ki-a n lebg n vʋʋgã+ sẽn yeele: 9 ‘Mam mii fo toogã la f naongã (la fo yaool n yaa arzɛk soaba.)+ Mam mii neb nins sẽn yet tɩ b yaa Zʋɩf-rãmb n yaool n pa Zʋɩf-rãmb sɩd-sɩdã tʋyã. B yaa a Sʋɩtãan tigsg roogã neba.+ 10 Ra zoe namsg ning fo sẽn na n paam ka la bilfã ye.+ Ade! Sʋɩtãanã* na n ket n kẽesda yãmb neb kẽer bãens roog sẽn na yɩl tɩ y paam makr tɩ pidi. Yãmb na n paama toog rasem piiga. Wilg tɩ f yaa sɩd soab hal n tãag kũum, tɩ mam na n kõo foo vɩɩm maanfã.+ 11 Bɩ ned ning sẽn tar tʋb kelg+ bũmb nins vʋʋsem sõngã sẽn yet tigimsã: Ned ning sẽn na n tõoge,+ kũum a yiib-n-soabã+ pa na n tol n maan-a bũmb ye.’

12 “Gʋls Pɛrgam tigingã malɛkã n yeel yaa: Ad sẽn tar-a sʋ-wok sẽn tar noy a yiib sẽn dɩt sõma wã+ sẽn yeele: 13 ‘Mam mii fo yirã sẽn be zĩig ningã: Yaa a Sʋɩtãan geerã sẽn beẽ wã. La baa ne rẽ, fo kell n gãda mam yʋʋrã kãn-kãe.+ Fo pa kɩɩs tẽeb ning fo sẽn tar ne maamã,+ baa a Ãntipas wakatẽ wã. Yẽ yɩɩ mam kaset soab sẽn maan sɩda,+ b sẽn kʋ+ yãmb nifẽ, zĩig ning a Sʋɩtãan sẽn be wã.

14 “‘Baasgo, mam tara bũmb bilf n na n ning foom taal rẽ poorẽ: Yaa tɩ fo nengẽ, neb n sakd a Balaam+ zãmsgã, Balaam ning sẽn da zãms a Balak+ t’a ning bũmb sẽn kɩtd tɩ ned lak n lʋɩ Israyɛll nebã taoore, sẽn na yɩl tɩ b rɩ bũmb b sẽn kõ bõn-naands la b yo* wã.+ 15 Fo-me tara neb sẽn sakd a Nikola zãmsgã.+ 16 Woto wã, bɩ f tek yam n kos sugri. Sã n pa rẽ, mam na n waa fo nengẽ tao-tao, n tall mam noorã sʋ-wokã n zab ne-ba.+

17 “‘Bɩ ned ning sẽn tar tʋb kelg bũmb nins vʋʋsem sõngã sẽn yet tigimsã:+ Ned ning sẽn na n tõoge,+ mam na n yãka mann ning sẽn solgã n kõ a soaba.+ M na n kõ-a-la kug-peelle, tɩ yʋ-paall gʋls kug-kãng zugu, tɩ ned baa a ye pa mi yʋ-kãng n zʋʋg sẽn deeg-a wã ye.’

18 “Gʋls Tiyatiir+ tigingã malɛkã n yeel yaa: Ad Wẽnnaam Bi-riblã, soab ning nin sẽn yaa wa bug-witim,+ la nao sẽn yaa wa zũud halaalã+ sẽn yeele: 19 ‘Mam mii fo tʋʋmã, f nonglmã, f tẽebã, tʋʋm nins f sẽn tʋmd Wẽnnaam yĩngã, la f sẽn tõogd toogã. Mam miime tɩ fo yaoolem tʋʋmã yaa wʋsg n yɩɩd fo sẽn tʋm b rãmb sɩngrẽ wã.

20 “‘Baasgo, bũmb n be tɩ mam ningd foom taal a poorẽ: Yaa tɩ fo basa pag a Zezabɛll+ sẽn yet t’a yaa no-rɛɛs-poakã t’a zãmsd mam yembsã la a belgd-b sẽn na yɩl tɩ b yo,*+ la b rɩ bũmb b sẽn kõ bõn-naandse. 21 Mam kõ-a-la weer t’a tek yam n kos sugri, la a pa rat n tek yam n bas a yoobã* ye. 22 Ade! Ka la bilfu, mam na n gãneg-a-la ne bãaga, la m kɩt tɩ neb nins sẽn yood ne-a wã paam to-kãsenga, sã n pa mikame tɩ b teka yam n bas tʋʋm nins a sẽn belg-b tɩ b tʋmdẽ wã. 23 La mam na n kʋʋ a kambã ne bã-toaaga, hal tɩ tigimsã fãa bãng tɩ mam yaa soab ning sẽn feesd sũyã la tagsa nins sẽn zulmã.* Sẽn paase, mam na n keoo yãmb ned kam fãa wa sẽn zems a tʋʋma.+

24 “‘La m yeta yãmb a neb a taabã sẽn be Tiyatiirã, rat n yeel tɩ neb nins fãa sẽn pa sakd zãms-kãnga, neb nins sẽn pa bao n bãng bũmb nins b sẽn boond t’a “Sʋɩtãan yel-solgdsã”+ yaa: Mam pa paasd yãmb zɩɩb a to ye. 25 Yãmb we n gãd bũmb nins y sẽn tarã kãn-kãe n tãag m waoongo.+ 26 La ned ning sẽn na n tõog la sẽn na n tũ bũmb ning mam sẽn yeelã n tãag saabã, mam na n kõ-a-la tõog t’a soog buud toɛy-toɛyã,+ 27 tõog wa a soab ning mam sẽn deeg m Ba nengẽ wã. Nin-kãng na n kɩɩm-b-la ne kut rasaare,+ hal tɩ b wã n lebg peds wa tãnd laas sẽn wãad to-to wã. 28 Sẽn paase, mam na n kõ-a-la yibeoog ãdgã.+ 29 Bɩ ned ning sẽn tar tʋb kelg bũmb nins vʋʋsem sõngã sẽn yet tigimsã.’

3 “Gʋls Sard tigingã malɛkã n yeel yaa: Ad sẽn tar-a Wẽnnaam vʋʋsem sõamyã a yopoe wã+ la ãds a yopoe wã+ sẽn yeele: ‘Mam mii fo tʋʋmã, n miẽ me tɩ b yetame tɩ fo vɩɩme, la fo yaool n yaa kɩɩnga.+ 2 Maan gũusgu.+ Paas bũmb nins sẽn ket la sẽn kolg kũumã pãnga, bala mam mikame tɩ fo tʋʋmã pa pid zãng mam Wẽnnaamã taoor ye. 3 Woto wã, bɩ f ket n tẽegd fo sẽn deeg koɛɛgã to-to la fo sẽn wʋm-a to-to wã yelle, la f kell n gãd-a kãn-kãe, la f tek yam n kos sugri.+ Sɩd-sɩda, fo sã n pa neke, mam na n waa wa wagdre,+ la fo pa na n tol n bãng wakat ning mam sẽn na n wa fo nengẽ wã ye.+

4 “‘Baasgo, fo tara neb a wãn* Sard sẽn pa rẽgem b futã ye.+ Nin-kãens na n naaga maam n kẽn ne fu-peelse,+ bala b zemsa ne rẽ. 5 Ned ning sẽn na n tõog+ na n yeelga fu-peels+ a woto, la mam pa na n yẽes a yʋʋrã vɩɩm sebrã pʋgẽ+ lae-lae. Mam na n yeela m Ba wã ne a malɛgsã taoor tɩ m mi-a lame.+ 6 Bɩ ned ning sẽn tar tʋb kelg bũmb nins vʋʋsem sõngã sẽn yet tigimsã.’

7 “Gʋls Filadɛlfi tigingã malɛkã n yeel yaa: Ad sẽn yaa-a sõngo,+ sẽn yaa-a sɩda,+ sẽn tar-a a Davɩɩd kʋɩlen-biigã,+ soab ning sẽn pakd tɩ ned baa a ye pa na n pagã, la sẽn pagd tɩ ned baa a ye pa pakdã sẽn yeele: 8 ‘Mam mii fo tʋʋmã. Ade! Mam paka kʋɩleng fo taoore,+ kʋɩleng ned baa a ye sẽn pa tõe n page. Mam miime tɩ fo pãngã yaa bilfu, la baa ne rẽ, fo kell n gãda mam gomdã. Fo maana sɩd ne maam.* 9 Gese! Mam na n kɩtame t’a Sʋɩtãan tigsg roogã neb sẽn yet tɩ b yaa Zʋɩf-rãmba, n yaool n pa Zʋɩf-rãmb+ n yagd ziri wã wa wõgemd fo naoẽ wã, la m kɩt me tɩ b bãng tɩ mam nonga foom. 10 Fo sẽn dɩk mam togs-n-taar toogã tõogr wɛɛngẽ wã yĩnga,+ ma-me na n kogla foom makrã wakate,+ makr ning sẽn segd n wa dũniyã gill zug n mak neb nins sẽn be dũniyã zugã. 11 Mam wata tao-tao.+ Kell n gãd bũmb ning fo sẽn tarã kãn-kãe sẽn na yɩl tɩ ned ra wa reeg fo maanfã ye.+

12 “‘Ned ning sẽn na n tõoge, mam na n kɩtame t’a lebg ra-luk mam Wẽnnaamã roogẽ, la a pa na n tol n yi be ye. Mam na n gʋlsa mam Wẽnnaamã yʋʋr a zugu,+ la m gʋls mam Wẽnnaamã galʋ-tẽngã sẽn yaa Zerizalɛm-paalgã+ sẽn yit mam Wẽnnaamã nengẽ saasẽ n sigdã yʋʋre, ne mam mengã yʋ-paallã a zugu.+ 13 Bɩ ned ning sẽn tar tʋb kelg bũmb nins vʋʋsem sõngã sẽn yet tigimsã.’

14 “Gʋls Laodise tigingã malɛkã n yeel yaa: Ad b sẽn boond a soab tɩ Ãmiina+ wã, sẽn yaa-a kaset soab sẽn maand sɩd la sẽn togsd sɩdã,+ n yaa Wẽnnaam pipi bõn-naandgã+ sẽn yeele: 15 ‘Mam mii fo tʋʋmã, n miẽ tɩ fo pa maasga, la f pa tʋʋlg me ye. Mam da nongẽ-la fo sẽn da na n yɩẽ maasg wall tʋʋlga. 16 La fo sẽn yaa zal-zal n pa tʋʋlg+ la f pa maasgã+ yĩnga, mam na n wʋka foom m noorẽ wã. 17 Fo yetame: “Mam yaa arzɛk soaba.+ M paama arzɛgs n pa le rat baa fʋɩ ye.” La fo pa mi tɩ f yaa sũ-sãang soaba, nimbãan-neda, naong soaba, zoang la ned sẽn yaa a zaal ye. 18 Mam sagenda foom tɩ f ra sãnem b sẽn yɩlg ne bugum mam nengẽ n lebg arzɛk soaba, la f ra fu-peels n da le yɩ f zaala, tɩ nebã yã foom f zaal tɩ yãnd yõk-f ye.+ Ra nin tɩɩm me n sõog f ninã+ sẽn na yɩl n yã.+

19 “‘Mam wilgda neb nins fãa mam sẽn nong wʋsgã b kongre, la m kibind-ba.+ Woto wã, tek yam n kos sugri,+ la f tũ Wẽnnaam ne yẽesem. 20 Ade! Mam yasa rignoorẽ wã n kogsdẽ. Ned sã n wʋm mam koɛɛgã n pak rignoorã, mam na n kẽe a roogẽ wã n naag-a n dɩ zaabr dɩɩbã, tɩ yẽ me naag maam n dɩ. 21 Ned ning sẽn na n tõoge,+ mam na n kõ-a-la sor t’a zĩnd ne maam m geerã zugu,+ wa ma-me sẽn tõoge, n zĩnd+ ne m Ba wã a geerã zugã. 22 Bɩ ned ning sẽn tar tʋb kelg bũmb nins vʋʋsem sõngã sẽn yet tigimsã.’”

4 Bõn-kãensã poore, mam gesame, la ade! Rignoor sẽn pak n da be saasẽ, la pipi koɛɛgã mam sẽn wʋm tɩ gomd ne maamã ra wõnda tãntãoog rãamde, n yetẽ: “Wa rʋ ka, tɩ m na n wilga foo bũmb nins sẽn segd n maanã.” 2 Bõn-kãensã poore, Wẽnnaam vʋʋsem sõngã siga mam zug zĩig pʋgẽ. Mam yãa geer sẽn be saasẽ, la m yã sẽn zao-a geerã zugã me.+ 3 Sẽn zao-a geerã yalẽ wã ra wõnda zasp kugr+ la sardoan kugri.* La saag-gomtɩʋʋg n da gũbg geerã t’a yalẽ wã wõnd emerood kugri.+

4 Gɛy pisi la a naas n da gũbg geerã. La mam yãa kãsem-dãmb pisi la a naas+ sẽn zao ge-kãens zut n yer fu-peelse, la b fõg sãnem maanf-rãmba. 5 Sa-yãgb+ ne koees la sa-tãs+ n da yit geerẽ wã, tɩ fɩtl-dãmb a yopoe sẽn wit bugum be geerã taoore. Fɩtl-kãens makda Wẽnnaam vʋʋsem sõamyã a yopoe wã.+ 6 Geerã taoore, bũmb sẽn wõnd mogr n da be be n pɩnda,+ n yaa wa kiristall kugri.

Geerã tẽn-sʋka, la sẽn karg n gũbg geerã, bõn-vɩɩs a naas+ n da be be, n tar nin wʋsg poorẽ la taoore. 7 Pipi bõn-vɩɩgã ra wõnda gɩgemde,+ tɩ bõn-vɩɩg a yiib-n-soabã wõnd lol-polle.+ Bõn-vɩɩg a tãab-n-soabã+ ra tara neng sẽn wõnd ninsaal nenga, tɩ bõn-vɩɩg a naas-n-soabã+ wõnd sɩlg sẽn yɩgda.+ 8 La bõn-vɩɩs a naasã a ye fãa ra tara pɩgs a yoobe. B ra tara nin wʋsg b pɩgsã zĩig fãa.+ B ra gomda wakat fãa, wĩndg la yʋng n yetẽ: “Sõngo, sõngo, Wẽnnaam a Zeova* yaa sõngo.+ Yẽ n yaa Sẽn-tõe-a-fãa wã, soab ning sẽn da be, la sẽn be, la sẽn watã.”+

9 Bõn-vɩɩsã sã n pẽg soab ning sẽn zao geerã zugã, soab ning sẽn vɩ wakat sẽn kõn sa yĩngã,+ n waoog-a la b pʋʋs-a bark fãa, 10 kãsem-dãmb pisi la a naasã+ wõgemdeda soab ning sẽn zao geerã taoore, n waoogd soab ning sẽn vɩ wakat sẽn kõn sa yĩngã, la b lobd b maanf-rãmbã geerã taoore, n yetẽ: 11 “Tõnd Wẽnnaam a Zeova,* yãmb n zems tɩ reeg ziir+ la waoogr+ la pãnga,+ bala yãmb n naan bũmb fãa,+ la yaa yãmb daabã yĩng la y naan-b tɩ b beẽ.”

5 Mam yãa seb-pindem sẽn be sẽn zao-a geerã+ nug-rɩtgã pʋgẽ. Seb-pindmã ra gʋlsa a nens a yiibã,* tɩ b sog-a sõma ne sogds a yopoe. 2 La mam yãa malɛk sẽn tar pãng wʋsgo, sẽn da zẽkd a koɛɛg n moond n sokdẽ yaa: “Ãnda n zems tɩ lak seb-pindmã, la a kao a sogdsã?” 3 La ned baa a ye ra pa be saasẽ wall tẽngã zug bɩ tẽngã tẽngr n tõe n lak seb-pindmã wall a ges a pʋgẽ wã ye. 4 Mam da yãbda wʋsgo, b sẽn pa yã ned baa a ye sẽn zems tɩ lak seb-pindmã wall tɩ ges a pʋgẽ wã yĩnga. 5 La kãsem-dãmbã nin-yend yeela maam yaa: “Da le yãb ye. Gese! Zida buudã Gɩgemdã+ sẽn yaa a Davɩɩd+ yẽgrã+ tõogame,+ hal n tõe n lak seb-pindmã la a sok a sogds a yopoe wã.”

6 Mam yãa pe-bil sẽn yas geerã tẽn-sʋka, la bõn-vɩɩs a naasã tẽn-sʋka, n paas kãsem-dãmbã tẽn-sʋka,+ pe-bil+ sẽn wõnd b ra kʋ-a lame.+ A ra tara yɩɩl a yopoe ne nin a yopoe, tɩ nin a yopoe wã makd Wẽnnaam vʋʋsem sõamyã a yopoe wã+ b sẽn tʋm dũniyã gill zugã. 7 A kolga zĩig pʋgẽ, n deeg seb-pindmã sẽn da be sẽn zao-a geerã+ nug-rɩtgã pʋgẽ wã. 8 Pe-bilã sẽn deeg seb-pindmã, bõn-vɩɩs a naasã ne kãsem-dãmb pisi la a naasã+ wõgemda a taoore. Kãsem-dãmb pisi la a naasã ned kam fãa ra zãada pɛndg ne sãnem laag sẽn pid ne wisdu. (Wisdã makda nin-sõamyã wã pʋʋsgã.)+ 9 B yɩɩnda yɩɩn-paall+ sẽn yete: “Yãmb n zems tɩ reeg seb-pindmã, la y sok a sogdsã. Bala b ra kʋʋ yãmba, la yãmb daa neb Wẽnnaam yĩng ne y zɩɩmã.+ Yaa neb sẽn yit buud toɛy-toɛy pʋsẽ, neb sẽn gomd buud-goam toɛy-toɛya, la neb sẽn yit tẽns toɛy-toɛy pʋsẽ.+ 10 Yãmb kɩtame tɩ b lebg rĩm-dãmb+ la maan-kʋʋdb Wẽnnaam yĩnga,+ la b segd n dɩɩ naam+ tẽngã zugu.”

11 Mam yãa malɛgs wʋsg sẽn karg n gũbg geerã ne bõn-vɩɩsã la kãsem-dãmbã, la m wʋm b koeesã me. B sõorã ra yaa tus-piig naoor tus-piiga, la tusa naoor tusa.+ 12 B ra zẽkda b koees n yetẽ: “Pe-bilã b sẽn da kʋ wã+ zemsame tɩ reeg tõogo, arzɛgse, yam, pãnga, waoogre, ziir la barka.”+

13 Mam wʋma bõn-naands buud fãa sẽn be saasẽ, tẽngã zugu, tẽngã tẽngr+ la mogrã zugu, bũmb nins fãa sẽn be b pʋsẽ wã sẽn yete: “Bɩ sẽn zao-a geerã+ ne Pe-bilã+ paam bark la waoogr+ ne ziir la pãng wakat sẽn kõn sa yĩnga.”+ 14 Bõn-vɩɩs a naasã ra yetame: “Ãmiina!” La kãsem-dãmbã wõgemdame n waoog Wẽnnaam.

6 Mam yãa Pe-bilã+ sẽn sok sogds a yopoe wã pipi soabã,+ la m wʋma bõn-vɩɩs a naasã a ye+ sẽn tãs ne koɛɛg sẽn yaa wa sa-tãs n yeele: “Wa!” 2 Mam yãa wed-mo-pɛɛlga,+ la sẽn zao-a a zugã ra tara tãpo. B kõ-a-la maanfo,+ la a yiime n yaa tõaagda, n na n baas a tõogrã.+

3 Pe-bilã sẽn sok soagdg a yiib-n-soabã, mam wʋma bõn-vɩɩg a yiib-n-soabã+ sẽn yeele: “Wa!” 4 Wed-moaag a to n yi n yaa miuug wa bugum, la b kõo sẽn zao-a a zugã noor t’a yiis laafɩ tẽngã zugu, sẽn na yɩl tɩ nebã kʋ taaba. B kõ-a-la sʋ-bedr+ me.

5 Pe-bilã sẽn sok soagdg a tãab-n-soabã,+ mam wʋma bõn-vɩɩg a tãab-n-soabã+ sẽn yeele: “Wa!” Mam yãa wed-mo-sablga, la sẽn da zao-a a zugã ra zãada makdg a nugẽ. 6 Mam wʋma bũmb sẽn wõnd koɛɛg sẽn gom bõn-vɩɩs a naasã sʋk n yeele: “Bɩle kɩlo* yaa deniye* a ye,+ tɩ orz* kɩlo a tãab yaa deniye a ye. La ra maan oliiv kaamã ne divẽ wã bũmb ye.”+

7 Pe-bilã sẽn sok soagdg a naas-n-soabã, mam wʋma bõn-vɩɩg a naas-n-soabã+ sẽn yeele: “Wa!” 8 Mam yãa wed-mo-kẽeg-kẽega, la sẽn da zao-a a zugã yʋʋr boondame tɩ Kũum. Yaoogã* ra pʋgd-a-la pẽdem-pẽdem. B kõ-b-la tõog tɩ b soog dũniyã babg a ye babs a naas sʋka, sẽn na yɩl tɩ b tũnug ne sʋ-woko, kom,+ bã-toos la tẽngã we-rũmsã n kʋ nebã.+

9 Pe-bilã sẽn sok soagdg a nu soabã, mam yãa neb nins b sẽn da kʋ Wẽnnaam goamã yĩnga, la kaset ning b sẽn kõ wã yĩngã+ sɩɩs*+ sẽn be tẽn-kugrã+ tẽngre. 10 B zẽka b koees n sok yaa: “Zu-soab sẽn ka to sẽn yaa sõng la sɩda,+ na n kaoosa wakat a wãn tɩ yãmb yaool n kao neb nins sẽn be dũniyã zugã bʋʋdo, la y rok y sũur tõnd zɩɩmã yĩnga?”+ 11 La b kõo b ned kam fãa kasaab-pɛɛlga,+ la b yeel-b tɩ b vʋʋs bilf n paase, hal tɩ b yem-taasã ne b saam-biisã b sẽn segd n kʋ wa bãmb ka la bilfã sõor pidi.+

12 Mam yãa Pe-bilã sẽn sok soagdg a yoob-n-soabã, la tẽn-digimd-kãseng n zĩndi. Wĩntoogã lebga sablg wa bot sẽn wʋg ne rũms kõbdo,* tɩ kiuugã tõr lebg wa zɩɩm.+ 13 Ãdsã sẽn be saasẽ wã lʋɩɩ tẽngã zugu, wa sob-kãseng sẽn miim kankang t’a kankam-kãsã sʋʋge. 14 Sa-gãongã pilame n loog wa seb-pindem b sẽn pindi.+ La b yiisa tãng fãa la ko-sʋk tẽng fãa a zĩigẽ.+ 15 Rẽ poore, dũniyã rĩm-dãmbã, nanambsã, soda-nanambsã, rakãag-rãmbã, pãens rãmbã, yembsã la sẽn pa-b yembsã solga tãens bogdẽ, la tãensã kug-bɛdã sʋka.+ 16 B ra yeta tãensã ne kug-bɛdã yaa: “Lʋɩ-y tõnd zut+ n solg tõnd ne sẽn zao-a geerã,+ la ne Pe-bilã+ sũ-puugrã. 17 Bala sẽn zao-a geerã ne Pe-bilã sũ-puugrã daar sẽn yaa ra-kãsengã taame,+ la ãnda n tõe n yals bõn-kãng taoore?”+

7 Rẽ poore, mam yãa malɛgs a naas sẽn yas tẽngã kɩrems a naasẽ wã, n gãd tẽngã sobd a naasã kãn-kãe sẽn na yɩl tɩ sobg baa a ye ra fug tẽngã zugu, bɩ mogrã zug wall tɩɩg baa a ye zug ye. 2 La mam yãa malɛk a to sẽn yi wĩndgã sẽn pukdẽ wã* n dʋʋd yĩngri, n zãad Wẽnnaam ning sẽn vɩ wã bãndã ningdga. A zẽka a koɛɛg n gom ne malɛgs a naasã b sẽn kõ noor tɩ b sãam tẽngã ne mogrã 3 n yeele: “Ra maan-y tẽngã wall mogrã bɩ tɩɩsã wẽnga, hal tɩ d ning tõnd Wẽnnaamã yembsã rĩy+ bãnd n sa.”+

4 La mam wʋma neb nins b sẽn ning bãndã sõore. Yaa neb tus-koabg la tus pis-naas la a naas+ sẽn yit Israyɛll buud toɛy-toɛyã sʋka:+

9 Rẽ poore, mam yãa kʋʋn-kãseng ned baa a ye sẽn pa tõe n sõd n sa, sẽn yit tẽnsã fãa pʋsẽ, buud toɛy-toɛyã fãa pʋsẽ,+ la sẽn gomd buud-goamã fãa tɩ b yas geerã taoor la Pe-bilã taoor ne kasaab-peelse,+ n zãad koms vãad b nusẽ wã.+ 10 La b ra zẽkda b koees n gomd ne pãng n yetẽ: “Fãagrã yita tõnd Wẽnnaamã sẽn zao geerã zugã nengẽ,+ la Pe-bilã nengẽ.”+

11 Malɛgsã fãa ra yasame n gũbg geerã ne kãsem-dãmbã+ la bõn-vɩɩs a naasã. B lʋɩɩ geerã taoor n fõgen b nens tẽng n waoog Wẽnnaam 12 n yeele: “Ãmiina! Bɩ tõnd Wẽnnaamã paam pẽgr ne ziiri, yam la bark pʋʋsgo, waoogr ne tõog la pãng wakat sẽn kõn sa yĩnga.+ Ãmiina.”

13 Rẽ la kãsem-dãmbã nin-yend sok maam yaa: “Nin-kãensã sẽn yer kasaab-peelsã+ yaa ãnda rãmba, la b yita yɛɛnẽ?” 14 Dẽ, mam leok-a-la zĩig pʋgẽ n yeele: “M zu-soaba, yaa yãmb n mi.” T’a yeel maam yaa: “Nin-kãensã yaa neb nins sẽn põs to-kãsengã sasa wã,+ la b pegsa b kasaabsã Pe-bilã zɩɩmã pʋgẽ+ n kɩt tɩ b lebg peelse. 15 Rẽ n so tɩ b yas Wẽnnaam geerã taoor n tũud-a ne b sũy fãa wĩndg la yʋng a roogã pʋgẽ. Sẽn zao-a geerã+ na n tẽega a fu-roogã n lud-ba.+ 16 Kom pa na n tol n le yõk-ba, la ko-yũud me pa na n le yõk-b a bada. Wĩntoogã pa na n le wẽ-ba, la tʋʋlg baa bilf me pa na n le yõog-b ye.+ 17 Bala Pe-bilã+ sẽn be geerã tẽn-sʋkã na n kɩɩma bãmba.+ A na n talla bãmb n kẽng vɩɩm ko-bunds zĩisẽ.+ La Wẽnnaam na n yẽesa nintãm fãa bãmb ninẽ wã.”+

8 Pe-bilã+ sẽn wa n sok soagdg a yopoe-n-soabã,+ saasẽ yɩɩ sɩddd na maan lɛɛr pʋɩ-sʋka. 2 La mam yãa malɛgs a yopoe+ wã sẽn yas Wẽnnaam taoorã, la b kõ-b-la tãntãad a yopoe.

3 Malɛk a to sẽn zãad wisd laag* sẽn maan ne sãnem n wa n yals tẽn-kugrã+ sɛɛga. B kõ-a-la wisd wʋsg+ sẽn na yɩl t’a naag nin-sõamyã wã fãa pʋʋsgã, n yõog wisdã sãnem tẽn-kugrã+ sẽn da be geerã taoorã zugu. 4 Wisdã bug-zõos yii malɛkã nugẽ n naag nin-sõamyã wã pʋʋsgã+ n zẽk yĩngr Wẽnnaam taoore. 5 La zĩig pʋgẽ, malɛkã rɩka wisd laagã n yãk bugmã sẽn be tẽn-kugrã zugã n pids-a n lob tẽngã zugu. Sa-tãs ne koees la sa-yãgb+ n paas tẽn-digimdg n zĩndi. 6 La malɛgs a yopoe wã sẽn zãad tãntãad a yopoe wã+ segla b mens n na n peebe.

7 Pipi soabã peeba a tãntãoogã. Sapɩlem ne bugum sẽn kalem ne zɩɩm n zĩndi, la b lob-b-la tẽngã zugu.+ Tẽngã babg a ye babs a tãab sʋk rɩɩ bugum, la tɩɩg a ye tɩɩs a tãab fãa sʋk rɩɩ bugum, tɩ mo-maasã fãa rɩ bugum.+

8 Malɛk a yiib-n-soabã peeba a tãntãoogã. Bũmb sẽn wõnd tãn-kẽeng sẽn dɩt bugum la b lob mogrã pʋgẽ.+ Mogrã babg a ye babs a tãab sʋk lebga zɩɩm,+ 9 la bõn-vɩɩs* nins sẽn be mogrã pʋgẽ wã a ye bãmb b tãab fãa sʋk kiime,+ tɩ koom-koglg a ye koom-kogend a tãab fãa sʋk sãame.

10 Malɛk a tãab-n-soabã peeba a tãntãoogã. Ãd-kẽeng sẽn dɩt bugum wa bug-vɩleng n yi saasẽ n lʋɩ. A lʋɩɩ kʋɩlg a ye pʋgẽ kʋɩls a tãab fãa sʋka, la ko-bundsã pʋsẽ.+ 11 Ãdgã yʋʋr boondame tɩ Absẽnte.* Koomã babg a ye babs a tãab fãa sʋk lebga toog liga. La koomã yɩɩ sabab tɩ neb wʋsg ki, a sẽn lebg toogã yĩnga.+

12 Malɛk a naas-n-soabã peeba a tãntãoogã. Wĩntoogã babg a ye babs a tãab sʋka, la kiuugã babg a ye babs a tãab sʋka, n paas ãdg a ye ãds a tãab fãa sʋk lebga sablga,+ sẽn na yɩl tɩ wĩndgã ra paam vẽenem a babg a ye babs a tãab sʋka, tɩ yʋngã me yɩ woto.

13 Mam yãa sɩlg sẽn yɩgd sa-gãnã tẽn-sʋka, la m wʋma a sẽn zẽk a koɛɛg n yeele: “Toogo, toogo, toog+ bee sẽn vɩ-b tẽngã zugã zutu, tãntãad a taabã malɛgs a tãabã sẽn na n peeb ka la bilf tɩ b rãamdã yi wã yĩnga!”+

9 Malɛk a nu soabã peeba a tãntãoogã.+ Mam yãa ãdg sẽn yi saasẽ n lʋɩ tẽngã zugu. B kõ-a-la bog-zulungã kʋɩlen-biigã.+ 2 A paka bog-zulungã, tɩ bug-zõos yi a pʋgẽ n zẽk wa wʋng sẽn yaa bedr bug-zõose. Bokã bug-zõosã kɩtame tɩ wĩntoogã lebg sablga,+ tɩ pemsmã me lebg sablga. 3 Sʋy n yi bug-zõosẽ wã n sig tẽngã zugu.+ B kõ-b-la tõog sẽn yaa wa tõog ning namsã sẽn be tẽngã zugã sẽn tarã. 4 B yeel-b lame tɩ b ra maan mo-maasã sẽn be tẽngã zugã wall tɩɩg baa a yembr bũmbu, sã n pa neb nins sẽn pa tar Wẽnnaam bãndã b rĩyẽ wã bala.+

5 B pa kõ sʋyã sor tɩ b kʋ nebã ye. B ra segd n nams-b-la kiis a nu. La nebã namsgã ra yaa wa nang+ sẽn tão ned t’a namsd to-to wã. 6 Wakat kãnga, nebã na n baoo kũum, la b pa na n tol n yã-a ye. B na n tʋlga kũum, la kũumã na n zoe n zãaga ne-ba.

7 Sʋyã yalẽ wã ra yaa wa wed-moos b sẽn segl zabr yĩnga.+ Bũmb sẽn wõnd sãnem maanf-rãmb n da be b zutẽ wã, tɩ b nensã wõnd ninsaalb nense. 8 La b zoobdã ra wõnda pagb zoobdo, tɩ b yẽnã wõnd gɩgma yẽna.+ 9 B ra tara gãn-tigs sẽn wõnd kut gãn-tigsi. B pɩgsã rãamd ra wõnda wed-moos saar-dãmb* b sẽn balg wed-moos tɩ b zoet n dabd zabr dãamde.+ 10 Sẽn paase, b ra tara zʋy ne zʋ-gõos wa namse, la yaa b zʋyẽ wã la tõog ning b sẽn tar n na n nams nebã kiis a nu wã be.+ 11 Rĩm n be b taoore: Yaa bog-zulungã malɛkã.+ A yʋʋrã ne Ebre yaa Abadõ,* la sã n yaa ne Gɛrke, yaa Apolyõ.*

12 Pipi toogã loogame. Ade! Tood+ a yiib me n wat bõn-kãensã loogr poore.

13 Malɛk a yoob-n-soabã+ peeba a tãntãoogã.+ Mam wʋma koɛɛg sẽn yi sãnem tẽn-kugrã+ sẽn be Wẽnnaam taoorã yɩɩlẽ, 14 n yeel malɛk a yoob-n-soabã sẽn tar tãntãoogã yaa: “Lok malɛgs a naasã b sẽn sẽb kʋɩl-kãsengã b sẽn boond tɩ Efratã noorã.”+ 15 La b loka malɛgs a naasã b sẽn da segl wakatã la daarã ne kiuugã la yʋʋmdã yĩngã, sẽn na yɩl tɩ b kʋ nin-yend neb a tãab fãa sʋka.

16 Tãb-biisã sẽn yaa wed-rʋʋdbã ra yaa tus-pisi naoor tus-piiga.* Mam wʋma b sõorã. 17 La ad mam sẽn yã wed-moosã ne sẽn zao-b b zutã vẽnegrã pʋgẽ wã sẽn yaa to-to: B ra tara kut fut* sẽn yaa miid wa bugum, la kẽeg haoo,* n paas kõodr wa kidbri. La wed-moosã zutã ra yaa wa gɩgma zutu,+ tɩ bugum ne bug-zõos la kidbr yit b noyẽ wã. 18 To-kãensã b tãabã sẽn yaa bugmã, bug-zõosã la kidbrã sẽn yit b noyẽ wã kʋʋ nin-yend neb a tãab fãa sʋka. 19 Bala wed-moosã tõogã bee b noyẽ wã la b zʋyẽ wã, bala b zʋyã wõnda wiis n tar zutu, la yaa ne bãmb la b maand nebã wẽnga.

20 La neb nins sẽn ket tɩ to-kãensã pa kʋ wã pa tek yam n bas tʋʋm nins b nusã sẽn tʋmdã ye. B pa bas zĩn-dãmbã waoogre, la bõn-naandsã sẽn maan ne sãnem la wanzuri la zũud ne kug la raado, sẽn yaa bõn-naands sẽn pa tõe n yã wall n wʋm bɩ n kẽnã waoogr ye.+ 21 Sẽn paase, b pa tek yam n bas b nin-kʋʋrã, b zĩn-dãmbã yɛl maanegã, b yoobã* la b wagdmã ye.

10 Mam yãa malɛk a to sẽn tar pãng sẽn yi saasẽ n sigda, n da yer* sawadgo, tɩ saag-gomtɩʋʋg be a zugẽ wã. A nengã ra yaa wa wĩntoogã,+ t’a naoã* yaa wa ra-lugs n wõnd bugum. 2 La seb-pindem sẽn yaa kɩdg b sẽn lak n da be a nugẽ wã. A tilga a rɩtg naoorã mogrã zugu, la a tilg a goabg naoorã tẽngã zugu. 3 A zẽka a koɛɛgã n kelem wa gɩgemd sẽn kelemd to-to wã.+ La a sẽn kelmã, sa-tãs a yopoe wã koees+ gomame.

4 La sa-tãs a yopoe wã sẽn gomã, mam da rat n gʋlsame, la mam wʋma koɛɛg sẽn pa saasẽ+ n yeele: “Solg* bũmb nins sa-tãs a yopoe wã sẽn togsã la f ra gʋls-b ye.” 5 Malɛk ning mam sẽn da yã t’a yas mogrã ne tẽngã zugã zẽka a rɩtg nugã n tees saasẽ, 6 n wẽen ne sẽn vɩ-a wakat sẽn kõn sa yĩngã,+ sẽn naan-a saagã ne bũmb nins sẽn be a pʋgẽ wã, tẽngã ne bũmb nins sẽn be a pʋgẽ wã, la mogrã ne bũmb nins sẽn be a pʋgẽ wã,+ n yeele: “B pa na n le bas tɩ kaoos ye. 7 La wakat ning malɛk a yopoe-n-soabã+ sẽn wat n segl n sa n na n peeb a tãntãoogã,+ rẽ tɩ b kɩtame tɩ yel-soalgdgã sẽn yaa sõngã+ Wẽnnaam sẽn togs a yembsã sẽn yaa no-rɛɛsdbã+ tɩ yaa koe-noogã pidsi.”

8 Mam wʋma koɛɛgã sẽn pa saasẽ+ n le gom ne maam n yeele: “Kẽng n tɩ reeg seb-pindem ning sẽn lak n be malɛkã sẽn yas mogrã ne tẽngã zugã nugẽ wã.”+ 9 Mam kẽnga malɛkã nengẽ n tɩ yeel-a t’a kõ maam seb-pindmã sẽn yaa kɩdgã, t’a yeel maam yaa: “Reeg-a n wãbe.+ A na n kɩtame tɩ fo pʋgã lebg toog liga, la fo noorẽ wã, a na n yɩɩ noog wa sɩɩdo.” 10 Mam deega seb-pindmã sẽn yaa kɩdgã malɛkã nugẽ n wãbe.+ Mam noorẽ wã, a ra yaa noog wa sɩɩdo,+ la mam sẽn wãb-a n sa wã, mam pʋgã lebga toog liga. 11 La b yeela maam yaa: “Fo segd n le togsa bãngr-goam buud toɛy-toɛy neb zutu, tẽnse, neb sẽn gomd buud-goam toɛy-toɛya, la rĩm-dãmb wʋsg zutu.”

11 B kõo maam tãnwĩig sẽn wõnd rasaare,*+ la b yeel maam yaa: “Yik n mak Wẽnnaam doogã ne tẽn-kugrã n paas sẽn waoogd-b Wẽnnaam be wã. 2 La sã n yaa ne samandã sẽn be wẽnd-doogã yɩngã, bas-a la f ra mak-a ye. Bala b rɩk-a lame n kõ buud toɛy-toɛyã, la b na n taba tẽn-sõngã+ ne b nao kiis pis-naas la a yiibu.+ 3 Mam na n kɩtame tɩ m kaset rãmb a yiibã yeelg bot n togs bãngr-goam rasem tusr la kobs-yi la pis-yoobe.” 4 Oliiv tɩɩs a yiibã+ ne fɩtl-dogends a yiibã makda nin-kãense.+ B yasa tẽngã Zu-soabã taoore.+

5 Ned sã n dat n maan-b wẽnga, bugum n yit b noyẽ wã n dɩ b bɛɛbã. Ned sã n dat n maan-b wẽng fãa, yaa woto la b segd n kʋ-a. 6 B tara tõog n tõe n pag sa-gãongã*+ sẽn na yɩl tɩ saag ra ni+ wakat ning b sẽn togsd b bãngr-goamã ye. B tara tõog koomã zug me n tõe n kɩt t’a lebg zɩɩm,+ la b tõe n kɩt tɩ toog buud fãa wa tẽngã zug wakat ning fãa b sẽn date.

7 B sã n wa kõ b kasetã n sa, we-rũng ning sẽn yit bog-zulungẽ wã na n yika zabr ne-ba, la a na n tõog-b lame n kʋ-ba.+ 8 B kũ-rãmbã na n dɩga tẽn-kãsengã so-kẽengã zugu. Sodom ne Ezɩpt makda tẽn-kãnga. Leb n yaa be la b kʋ b Zu-soabã ra-luk zugu. 9 La neb sẽn yaa buud toɛy-toɛy neba, sẽn gomd buud-goam toɛy-toɛy la sẽn yit tẽns toɛy-toɛy pʋsẽ na n gesa b kũ-rãmbã rasem a tãab la pʋɩ-sʋka,+ la b pa na n kõ sor tɩ b mum b kũ-rãmbã ye. 10 Neb nins sẽn be tẽngã zugã na n maana sũ-noog b yĩng la b kɩdme. B na n toola taab kũuni, bala no-rɛɛs-kãens a yiibã namsa neb nins sẽn be tẽngã zugã.

11 Rasem a tãab la pʋɩ-sʋkã loogr poore, vɩɩm vʋʋsem sẽn yi Wẽnnaam nengẽ wa n kẽ-b lame,+ la b yikame n yals b naoã zut tɩ rabeem-kãseng yõk neb nins sẽn yã bãmbã. 12 B wʋma koe-kãseng sẽn pa saasẽ n yeel-b yaa: “Wa n dʋ-y ka.” B zẽkame n dʋ saasẽ sawadg pʋgẽ, la b bɛɛbã yã-b lame.* 13 Wakat kãnga, tẽn-digimd-kãseng n zĩndi, la galʋ-tẽngã babg a ye babs piig sʋk lʋɩɩme, la neb tus a yopoe la tẽn-digimdgã kʋ-yã, tɩ rabeem yõk neb nins sẽn kellã tɩ b pẽg saasẽ Wẽnnaamã.

14 Toog a yiib-n-soabã+ loogame. Ade! Toog a tãab-n-soabã wata tao-tao.

15 Malɛk a yopoe-n-soabã peeba a tãntãoogã.+ Koe-kãsems n zĩnd saasẽ n yeele: “Dũniyã rĩungã lebga tõnd Zu-soabã+ ne a Kiristã+ Rĩungu, la a* na n yɩɩ rĩm n dɩ naam wakat sẽn kõn sa yĩnga.”+

16 Kãsem-dãmb pisi la a naasã+ sẽn da zao gɛy zut Wẽnnaam taoorã lʋɩɩme, n fõgen b nens tẽng n waoog Wẽnnaam 17 n yeele: “Wẽnnaam a Zeova* sẽn yaa Sẽn-tõe-a-fãa wã, soab ning sẽn be+ la sẽn da be wã, tõnd pʋʋsda yãmb barka, bala yãmb rɩka y pãn-kãsengã n sɩng naam dɩɩbo.+ 18 La buud toɛy-toɛyã neb sũy yikame, la yãmb sũ-puugrã waame. Wakat ning yãmb sẽn yãkã taame tɩ y na n kao sẽn ki-bã bʋʋdo, la y keo+ y yembsã sẽn yaa no-rɛɛsdbã+ ne nin-sõamyã wã la neb nins sẽn zoet yãmb yʋʋrã, b nin-kãsems la b nin-bõonego, la y sãam neb nins sẽn sãamd tẽngã.”+

19 Wẽnnaam doogã sẽn be saasẽ wã pakame, la mam yãa kaoolã koglg Wẽnnaam doogã pʋgẽ.+ Sa-yãgb ne koees la sa-tãs ne tẽn-digimdg la sapɩlem-bɛd n zĩndi.

12 Rẽ poore, mam yãa bãnd sẽn yaa kãseng saasẽ: Yaa pag+ sẽn yer wĩntoogã, tɩ kiuugã be a naoã tẽngre. Maanf sẽn maan ne ãds piig la a yiib n da be a zugẽ wã. 2 A ra tʋtame. La sẽn mik t’a rogmã kolgame wã, a ra yãbdame, rogmã toog sẽn namsd-a wã yĩnga.

3 Mam yãa bãnd a to saasẽ: Yaa wag-bedr+ sẽn yaa miuug wa bugum, n tar zut a yopoe ne yɩɩl piiga, tɩ maanf-bõones* a yopoe be a zutẽ wã. 4 A zʋʋrã tɛta ãdsã+ sẽn be saasẽ wã a yembr bãmb b tãab fãa sʋka. A lob-b-la tẽngã zugu.+ Wag-bedrã ra yasa pagã+ sẽn kolg rogmã taoore, sẽn na yɩl t’a sã n wa rog bɩ a vel a biigã.

5 Pagã roga bi-ribla,+ rao sẽn na n kɩɩm buud toɛy-toɛyã neb ne kut rasaare.+ La b rɩka a biigã tao-tao n kẽng Wẽnnaam nengẽ, a geerẽ wã. 6 Pagã zoeeme n kẽng we-raoogẽ wã. A tara zĩig be sẽn yaa Wẽnnaam n segl tɩ yaa be la b na n dɩlg-a rasem tusr la kobs-yi la pis-yoobe.+

7 La zabr n yik saasẽ: A Mikayɛll*+ ne a malɛgsã zaba ne wag-bedrã, tɩ wag-bedrã ne a malɛgsã me zabe, 8 la b pa tõog ye. B pa le yã zĩig saasẽ bãmb yĩng me ye. 9 Rẽ n so tɩ b lob wag-bedrã+ tẽngã zugu. Yẽ n yaa wag-kʋdrã+ b sẽn boond tɩ Munaafɩɩk+ la Sʋɩtãanã,+ soab ning sẽn kẽesd dũniyã fãa moogã.+ B lob-a-la tẽngã zugu,+ la b naaga a malɛgsã me n lobe. 10 Mam wʋma koe-kãseng saasẽ sẽn yeele:

“Masã, fãagrã+ la pãngã ne tõnd Wẽnnaamã Rĩungã+ n paas a Kiristã naamã waame, bala b loba tõnd ba-biisã rõatã tẽngã zugu. Yẽ n yaa soab ning sẽn dõt bãmb wĩndg la yʋng tõnd Wẽnnaamã taoorã!+ 11 B tõog-a-la+ ne Pe-bilã zɩɩmã+ maasem, la ne koɛɛg ning b sẽn kõ kasetã+ maasem. La baa kũum taoore, b pa ges tɩ b vɩɩmã*+ tara yõod ye. 12 Woto yĩnga, saasã la yãmb a sẽn be-b be wã, kɩdm-y sũ-noogo! Toog bee tẽngã la mogrã zugu,+ bala Sʋɩtãanã* sig n waa yãmb nengẽ, t’a sũ-puugrã yaa kãsenga, a sẽn mi t’a wakatã keta bilfã yĩnga.”+

13 La wag-bedrã sẽn yã tɩ b lob-a-la tẽngã zugã,+ a namsa pag+ ning sẽn dog bi-riblã. 14 La b kõo pagã pa-nand-tugr+ pɩgs a yiibã sẽn na yɩl t’a yɩk n kẽng a zĩigẽ wã, we-raoogẽ wã. Yaa be la b na n dɩlg-a wakat a yembre, wakat a yiibu, la wakat pʋɩ-sʋka,*+ zĩig sẽn zãr ne waafã.+

15 Waafã wʋka koom a noorẽ wã tɩ yaa wa kʋɩlg pagã poorẽ, sẽn na yɩl tɩ kʋɩlgã rɩ-a. 16 La tẽngã sõnga pagã. A yaaga a noorã n vel kʋɩlgã wag-bedrã sẽn wʋk a noorẽ wã. 17 Rẽ n so tɩ wag-bedrã sũur puug wʋsg ne pagã, t’a loog n tɩ yik zabr ne pagã kamb nins sẽn ketã,+ sẽn yaa neb nins sẽn sakd Wẽnnaam noyã, la sẽn tar tʋʋmd sẽn yaa kõ kaset a Zeezi wɛɛngẽ wã.+

13 La a* yalsa mogrã bĩisrã zugu.

Mam yãa we-rũng+ sẽn yit mogrã pʋgẽ,+ n tar yɩɩl piig la zut a yopoe, tɩ maanf-bõones* piig be a yɩɩlẽ wã. Yʋy sẽn yaa wẽn-tʋʋsg yʋy n da be a zutẽ wã. 2 We-rũng ning mam sẽn yã wã ra wõnda ãbga, la a naoã ra wõnda urs* nao, t’a noorã wõnd gɩgemd noore. Wag-bedrã+ kõo we-rũngã a pãngã ne a geerã n paas tõog sẽn yaa kãsenga.+

3 Mam yãame tɩ we-rũngã zug a yembr yaa wa pogla wʋsgo, la baa a sẽn pogl hal n kolg kũumã, sãmpogrã maagame.+ Rẽ linga nebã fãa sẽn be tẽngã zugã tɩ b pʋg we-rũngã. 4 B waooga wag-bedrã, a sẽn kõ we-rũngã tõog sẽn yaa kãsengã yĩnga. B ra waoogda we-rũngã n yetẽ: “Ãnda n yaa wa we-rũngã, la ãnda n tõe n zab ne-a?” 5 B kõo we-rũngã noor sẽn gomd gom-bɛd la wẽn-tʋʋsg goama, la b kõ-a tõog sẽn na yɩl t’a tʋm kiis pis-naas la a yiibu.+ 6 A yaaga a noorã n gom n paoog+ Wẽnnaam la a paoog a yʋʋrã ne zĩig ning a sẽn be wã, la baa sẽn be-b saasẽ wã.+ 7 B kõ-a-la sor t’a yik zabr ne nin-sõamyã wã n tõog-ba.+ B kõ-a-la tõog me t’a soog buud toɛy-toɛyã fãa neb la neb sẽn gomd buud-goam toɛy-toɛy la sẽn yit tẽns toɛy-toɛy pʋsẽ. 8 La neb nins fãa sẽn be tẽngã zugã na n waooga we-rũngã. Hal dũniyã yẽbgr wakate, nin-kãens baa a ye yʋʋr pa gʋls Pe-bilã b sẽn da kʋ wã+ vɩɩm seb-pindmã+ pʋgẽ ye.

9 Ned sã n tar tʋb bɩ a kelge.+ 10 Ned sã n tog n kẽng yembdo, a na n kẽnga yembdo. Ned sã n kʋʋd a taab ne sʋʋga,* b segd n kʋ-a-la ne sʋʋga.+ Woto baoodame tɩ nin-sõamyã+ wã tõog toog+ la b tall tẽebo.+

11 Rẽ poore, mam yãa we-rũng a to sẽn pukd tẽngã zugu. A ra tara yɩɩl a yiib sẽn wõnd pe-bil yɩɩla, la a sɩngame n gomd wa wag-bedre.+ 12 We-rũn-kãng rɩta pipi we-rũngã+ naamã fãa a nifẽ. La a kɩtdame tɩ tẽngã la a nebã fãa waoogd pipi we-rũngã, we-rũng ning sẽn da pogl n kolg kũum tɩ sãmpogrã maagã.+ 13 A maanda bãn-kãsemse, hal n kɩtdẽ tɩ bugum yit yĩngr n sigd tẽngã zug ninsaalbã nifẽ.

14 A kẽesda neb nins sẽn be tẽngã zugã moogo, bãn nins b sẽn kõ-a sor t’a maand we-rũngã nifẽ wã yĩnga, n yet neb nins sẽn be tẽngã zugã tɩ b maan bõn-naandg+ n wõneg we-rũng ning sẽn da paam sʋʋg sãmpogr n baas n põsã.+ 15 La b kõ-a-la sor t’a kõ we-rũngã bõn-naandgã vɩɩm vʋʋsem, sẽn na yɩl tɩ we-rũngã bõn-naandgã tõe n gome, la a kɩt tɩ b kʋ neb nins fãa sẽn zãgsd tɩ b kõn waoog we-rũngã.

16 A modgda nebã fãa, nin-kãsems la nin-bõonego, rakãag-rãmb la naong rãmba, yembs la neb sẽn pa yembse, sẽn na yɩl tɩ b ning nin-kãens rɩtg nugã wall b rĩirã bãnde,+ 17 tɩ ned baa a ye ra tõog n da wall a koos bũmbu, sã n pa ned sẽn tar bãndã, rat n yeel tɩ we-rũngã yʋʋrã+ wall a yʋʋrã nimero wã ye.+ 18 Ad bũmb sẽn baood yam: Bɩ ned ning yam sẽn vẽen geel n bãng we-rũngã nimero wã, bala yaa ninsaal nimero, la a nimero wã yaa kobs-yoob la pis-yoob la a yoobe.+

14 Rẽ poore, mam yãa Pe-bilã+ sẽn yas Siyõ tãngã+ zugu, tɩ neb tus-koabg la tus pis-naas la a naas+ sẽn tar a yʋʋrã ne a Ba wã yʋʋr+ tɩ gʋls b rĩyẽ wã be ne-a. 2 Mam wʋma rãamd sẽn yit saasẽ n yaa wa koom sẽn zoet ne pãng bʋrgo, la wa saag sẽn tãs ne pãng bʋrgo. Rãamdã mam sẽn wʋmã ra yaa wa yɩɩn-yɩɩndb sẽn yɩɩnd la b wẽed b pendse. 3 La b yɩɩnda yɩɩll sẽn yaa wa yɩɩn-paall+ geerã taoore, ne bõn-vɩɩs a naasã+ la kãsem-dãmbã+ taoore. Ned baa a ye ra pa tõe n bãng yɩɩllã sõma, sã n pa neb tus-koabg la tus pis-naas la a naasã+ b sẽn da tẽngã zugã. 4 Nin-kãens yaa neb sẽn pa rẽgem b mens ne pagb ye. Sɩd me, b pa mi pagb ye.+ Yaa bãmb la neb nins sẽn pʋgd Pe-bilã zĩig ning fãa a sẽn dabdẽ wã.+ B ra-b-la+ ninsaalbã sʋk tɩ b yaa dẽenem biis+ Wẽnnaam la Pe-bilã yĩnga. 5 B pa yã zirẽ-be-goam baa bilf b noyẽ wã ye. B pa tar zang ye.+

6 Mam yãa malɛk a to sẽn yɩgd sa-gãnã tẽn-sʋka.* La a ra tara koe-noog sẽn ka sɛt n na n togs neb nins sẽn be tẽngã zugã, neb sẽn yit buud fãa pʋsẽ, sẽn gomd buud-goam toɛy-toɛya, la sẽn yit tẽns toɛy-toɛy pʋsẽ.+ 7 A ra zẽkda a koɛɛg n yetẽ: “Zoe-y Wẽnnaam la y pẽg-a, bala wakat taame t’a na n kao bʋʋdã.+ Woto wã, bɩ y waoog sẽn naan-a saagã ne tẽngã la mogrã+ ne ko-bundsã.”

8 Malɛk a to, malɛk a yiib-n-soab n pʋgl n yeele: “A lʋɩɩme! Babilon-kãsengã+ lʋɩɩme.+ Yaa yẽ n kɩt tɩ buud toɛy-toɛyã fãa yũ a yoobã* ratem* divẽ wã!”+

9 Malɛk a to, malɛk a tãab-n-soab n pʋgl bãmba, n zẽk a koɛɛg n yeele: “Ned sã n waoog we-rũngã+ ne a bõn-naandgã la a reeg a bãndã a rĩirẽ wã wall a nugẽ wã,+ 10 a na n yũu Wẽnnaam sũ-puugrã divẽ b sẽn pʋdg a sũ-puugrã wũmblẽ+ n pa pul bũmbã. Sẽn paase, b na n nams-a-la ne bugum la kidbr+ malɛg-sõamyã wã nifẽ la Pe-bilã nifẽ. 11 La bugum ning sẽn namsd-bã bug-zõosã na n kell n duka wakat sẽn kõn sa yĩnga.+ Wĩndg la yʋngo, neb nins sẽn waoog we-rũngã ne a bõn-naandgã, la sẽn deeg a yʋʋrã bãndã+ pa na n paam vʋʋsg ye. 12 Woto baoodame tɩ nin-sõamyã wã+ sẽn yaa neb nins sẽn tũud Wẽnnaam noyã, la sẽn gãd tẽeb+ ning b sẽn tar ne a Zeezi kãn-kãe wã tõog toogo.”

13 La mam wʋma koɛɛg sẽn pa saasẽ n yeele: “Gʋlse: Sũ-noog rãmb la neb nins sẽn kiid Zu-soabã+ pʋgẽ masã tɛkã. Vʋʋsem sõngã yetame yaa: N-ye! Bɩ b vʋʋs ne b tʋʋmã, bala bũmb nins b sẽn maanã pʋgd-b lame.”

14 Rẽ poore, mam yãa sawad-pɛɛlga, la ned sẽn wõnd ninsaal biig+ n da zao sawadgã, n fõg sãnem maanf a zugẽ wã la a zãad goeoog sẽn dɩt a nugẽ.

15 Malɛk a to n yi wẽnd-doogẽ wã n zẽk a koɛɛg n gomd ne sẽn zao-a sawadgã n yetẽ: “Rɩk f goeoogã n wʋre, bala kẽebgã wakat taame, bala tẽngã bõn-koaadlã bɩɩ sõma.”+ 16 La sẽn zao-a sawadgã rɩka a goeoogã n ning tẽngã zugu, tɩ b wʋr tẽngã bõn-koaadlã.

17 Malɛk a to n yi wẽnd-doog ning sẽn be saasẽ wã pʋgẽ, la yẽ me ra zãada goeoog sẽn dɩte.

18 Malɛk a to n yi tẽn-kugrẽ wã, la a ra tara tõog bugmã zugu. A zẽka a koɛɛg n gom ne sẽn zãad-a goeoog sẽn dɩtã n yeele: “Rɩk f goeoogã sẽn dɩtã n wʋr tẽngã viyn wã bi-gĩnã, bala a biisã moogame.”+ 19 Malɛkã rɩka a goeoogã n ning tẽngã zug n wʋr tẽngã viyn wã. A lob-b-la Wẽnnaam sũ-puugrã vẽ wẽkr bok-kãsengã pʋgẽ.+ 20 B taba vẽ wẽkr bokã galʋ-tẽngã kɩrenga, la zɩɩm n yi vẽ wẽkr bokã pʋgẽ n zoe na maan kɩlo kobs-tã* t’a zulmã tat wed-moosã salba wã.

15 La mam yãa bãnd a to saasẽ, bãnd sẽn yaa kãseng la sẽn sek rabeem: Yaa malɛgs a yopoe+ sẽn zãad tood a yopoe. To-kãens n yaa yaoolem toodã, bala yaa ne bãmb maasem la Wẽnnaam sũ-puugrã na n sa.+

2 Mam yãa bũmb sẽn wõnd mogr sẽn yaa wa vɛɛr+ n kalem ne bugum, tɩ neb nins sẽn tõog+ we-rũngã ne a bõn-naandgã+ la a yʋʋrã nimero+ wã ra yas mogrã sẽn yaa wa vɛɛrã sɛɛga, n zãad Wẽnnaam pendse. 3 B ra yɩɩnda a Moyiiz sẽn yaa Wẽnnaam yambã yɩɩllã+ ne Pe-bilã+ yɩɩllã n yetẽ:

“Wẽnnaam a Zeova* sẽn yaa Sẽn-tõe-a-fãa+ wã, yãmb tʋʋmã yaa kãsemse, n sek rabeem.+ Wakat sẽn kõn sa Rĩma,+ yãmb tʋʋmã yaa tɩrs la sɩda.+ 4 Zeova,* sɩd-sɩda, ãnda n pa na n zoe yãmb la a waoog yãmb yʋʋrã? Bala yãmb y yembr bal n yaa sɩd soaba!+ Buud toɛy-toɛyã fãa neb na n waa yãmb taoor n waoog yãmba,+ b sẽn bãng tɩ yãmb kaooda bʋʋd ne tɩrlmã yĩnga.”

5 Rẽ poore, mam yãa kaset fu-roogã+ wẽnd-doogã sẽn pak saasẽ,+ 6 tɩ malɛgs a yopoe wã sẽn zãad tood a yopoe+ wã yi wẽnd-doogẽ wã, n yer lẽ gĩs fut sẽn yaa yɩlem n pɩnda, la b sẽb sãnem sẽbds b yãadẽ wã. 7 Bõn-vɩɩs a naasã a ye kõo malɛgs a yopoe wã sãnem laas a yopoe, sẽn pid ne Wẽnnaam sẽn vɩ wakat sẽn kõn sa yĩngã sũ-puugrã.+ 8 La wẽnd-doogã pida ne bug-zõos Wẽnnaam ziirã+ ne a pãngã yĩnga, tɩ ned baa a ye pa tõe n kẽ wẽnd-doogã pʋgẽ, sã n pa malɛgs a yopoe wã tood a yopoe+ wã n sa.

16 La mam wʋma koe-kãseng sẽn yi wẽnd-doogẽ wã+ n yeel malɛgs a yopoe wã yaa: “Kẽng-y n tɩ kiig-y Wẽnnaam sũ-puugrã sẽn be laas a yopoe wã pʋsẽ wã tẽngã zugu.”+

2 Pipi malɛkã yiime n tɩ kiig bũmb ning sẽn be a laagẽ wã tẽngã zugu.+ La nod-toaag sẽn pa tõe n maag+ n nams neb nins fãa sẽn da tar we-rũngã bãndã,+ la sẽn da waoogd a bõn-naandgã.+

3 Malɛk a yiib-n-soabã kiiga bũmb ning sẽn be a laagẽ wã mogrã pʋgẽ.+ La mogrã lebga zɩɩm+ wa ned sẽn ki zɩɩm. Bõn-vɩɩg* buud fãa kiime, rat n yeel tɩ bũmb nins sẽn be mogrã pʋgẽ wã.+

4 Malɛk a tãab-n-soabã kiiga bũmb ning sẽn be a laagẽ wã kʋɩlsã pʋsẽ, la ko-bundsã pʋsẽ+ tɩ b lebg zɩɩm.+ 5 Mam wʋma koomã malɛk sẽn yeele: “Yãmb a Soab ning sẽn be la sẽn da be,+ sẽn yaa Sɩd soaba,+ yãmb sẽn kao bʋʋdã woto wã yĩnga, y yaa tɩrga,+ 6 bala b raaga nin-sõamyã la no-rɛɛsdb zɩɩm,+ tɩ yãmb kõ-b zɩɩm tɩ b yũ.+ B segda ne rẽ.”+ 7 La mam wʋma tẽn-kugrã sẽn yeele: “N-ye, Wẽnnaam a Zeova* sẽn yaa Sẽn-tõe-a-fãa wã,+ yãmb bʋʋdã kaoob yaa sɩda, la tɩrga.”+

8 Malɛk a naas-n-soabã kiiga bũmb ning sẽn be a laagẽ wã wĩntoogã zugu,+ la b kõo wĩntoogã tõog t’a yõog nebã ne bugum. 9 Tʋʋl-kãsengã yõoga nebã, la b paooga Wẽnnaam yʋʋrã, soab ning sẽn tar noor to-kãensã zutã. B pa tek yam n kos sugr n pẽg-a ye.

10 Malɛk a nu soabã kiiga bũmb ning sẽn be a laagẽ wã we-rũngã geerã zugu, t’a rĩungã lebg lik bida.+ Nebã sɩngame n dũmd b zɩlma wã b toogã yĩnga, 11 la b tʋʋ saasẽ Wẽnnaamã b toodã la b noadã yĩnga. B pa tek yam n bas b tʋʋmã ye.

12 Malɛk a yoob-n-soabã kiiga bũmb ning sẽn be a laagẽ wã kʋɩl-kãseng ning b sẽn boond tɩ Efratã+ pʋgẽ, t’a koomã kʋɩ+ sẽn na yɩl n segl sorã n kõ rĩm-dãmb+ nins sẽn yit wĩntoogã sẽn pukdẽ wã.*

13 Mam yãa gom-dẽgd a tãab sẽn wõnd lomse, tɩ b yit wag-bedrã+ noorẽ, we-rũngã noorẽ la zirẽ-be-no-rɛɛsã noorẽ. 14 Sɩd-sɩda, b yaa goam zĩn-dãmb sẽn vẽnege, la b maanda bãna.+ B yiime n dabd dũniyã gill rĩm-dãmbã nengẽ, n na n tigm-b Wẽnnaam Sẽn-tõe-a-fãa wã+ ra-kãsengã zabrã+ yĩnga.

15 “Ade! Mam wata wa wagdre.+ Sũ-noog soab la ned ning sẽn pa na n gũsi,+ la sẽn na n kell n tall a zugẽ fut n da wa kẽn a zaala, tɩ nebã yã a yãndã ye.”+

16 B tigma rĩm-dãmbã zĩig b sẽn boond ne Ebre tɩ Armagedõ.*+

17 Malɛk a yopoe-n-soabã kiiga bũmb ning sẽn be a laagẽ wã pemsmẽ wã. Rẽ poore, mam wʋma koe-kãseng sẽn yi wẽnd-doogẽ wã,+ geerẽ wã n yeele: “Maaname n sa!” 18 La sa-yãgb ne koees la sa-tãs n zĩndi, n paas tẽn-digimdg sẽn yaa kãsenga, hal t’a buud zɩ n zĩnd b sẽn naan ninsaalbã tẽngã zugã tɛk ye.+ Tẽn-digimdgã sɩd yɩɩ kãseng wʋsgo. 19 Tẽn-kãsengã+ welga zĩis a tãabo, la buud toɛy-toɛyã tẽnsã lʋɩɩme. B tẽega Babilon-kãsengã+ yell Wẽnnaam taoore, n na n kõ-a Wẽnnaam sũ-pu-kãsengã divẽ wã t’a yũ.+ 20 Sẽn paase, ko-sʋk tẽng buud fãa bõrame, tɩ tãensã me meneme.+ 21 Rẽ poore, sapɩlem-kãsems n yi saasẽ n dʋʋg nebã zutu,+ tɩ sapɩlemd fãa zɩslem zems talã* a yembre. Nebã tʋʋ Wẽnnaam sapɩlmã toogã yĩnga,+ bala sapɩlmã waa ne sãoong wʋsgo.

17 Malɛgs a yopoe wã sẽn da zãad laas a yopoe+ wã a ye wa n yeela maam yaa: “Wa tɩ m na n wilga foom pʋg-yood-kãseng ning sẽn zao koom sẽn yaa wʋsgã bʋ-kaoorã sẽn na n yɩ to-to.+ 2 Yaa pʋg-yoodr ning tẽngã rĩm-dãmbã sẽn yo* ne,+ tɩ tẽngã nebã yũ a yoobã* divẽ tɩ b nensã yilimdẽ wã.”+

3 Malɛkã rɩka maam ne vʋʋsem sõngã pãng n kẽng we-raoogẽ. La mam yãa pag sẽn zao we-rũng sẽn yaa miuugu, tɩ wẽn-tʋʋsg yʋy be a yĩngã zĩig fãa. We-rũngã ra tara zut a yopoe ne yɩɩl piiga. 4 Pagã ra yera fu-miuug-miuug+ la fu-moomde, n nags a mengã ne sãnem la kug sẽn yaa neeba, la ne kĩndi.+ A ra zãada sãnem la-bil sẽn pid ne bõn-wẽns la a yoobã* bõn-dẽgdo. 5 A rĩirẽ wã, yʋʋr n da gʋls be n yaa yel-soalgdga: “Babilon-kãsengã, yoaadbã ne tẽngã bõn-wẽnsã ma.”+ 6 Mam yãame tɩ pagã ra yũu nin-sõamyã wã zɩɩm ne a Zeezi kaset rãmbã zɩɩm t’a nengã yilimdẽ.+

Mam sẽn yã-a wã, linga maam wʋsgo. 7 Dẽ, malɛkã yeela maam yaa: “Bõe yĩng tɩ bõn-kãngã ling foo? Mam na n wilga foom pagã yel-soalgdgã võore,+ ne we-rũng ning sẽn zɩt-a wã sẽn tar zut a yopoe ne yɩɩl piigã yel-soalgdgã võore:+ 8 We-rũngã fo sẽn yã wã ra beeme, la a pa le be ye. A na n yii bog-zulungẽ+ wã ka la bilfu, la yaa sẽn na n kẽng sãoong zĩigẽ. Tẽngã nebã sã n wa yã we-rũngã sẽn da be la sẽn pa le be, la sẽn na n le zĩndã, na n ling-b lame. Yaa neb nins yʋy sẽn pa gʋls vɩɩm seb-pindmã+ pʋgẽ hal dũniyã yẽbgr wakatã.

9 “Ad bũmb sẽn baood tɩ ned tall yam n yaool n wʋm a võore: Zut a yopoe wã+ makda tãens a yopoe nins zut pagã sẽn zao wã. 10 La rĩm-dãmb a yopoe n be: Bãmb b nu n lʋɩ, t’a ye beẽ, t’a to wã nan pa wa ye. La a sã n wa wa, a segd n paa wakat bilfu. 11 We-rũng ning sẽn da be la sẽn pa le be wã+ yaa rĩm a nii-n-soaba, la a yita rĩm-dãmb a yopoe wã pʋgẽ. A rabda sãoong zĩigẽ.

12 “Yɩɩl piigã fo sẽn yã wã makda rĩm-dãmb piig sẽn nan pa reeg naam ye. La b na n wa reega tõog n yɩ rĩm-dãmb n dɩ naam ne we-rũngã lɛɛr a yembre. 13 Rĩm-dãmb-kãens tara tags-yɛnga. Rẽ n so tɩ b rɩk b pãngã la b tõogã n kõ we-rũngã. 14 B na n zaba ne Pe-bilã,+ la Pe-bilã sẽn yaa zu-soben-dãmb Zu-soab la rĩm-dãmb Rĩmã+ yĩnga, a na n tõog-b lame.+ Sẽn paase, neb nins sẽn be ne-a wã sẽn yaa neb b sẽn bool la b sẽn yãke, la neb sẽn maand sɩdã me na n tõog-b lame.”+

15 Malɛkã yeela maam yaa: “Koomã sẽn yaa wʋsgã fo sẽn yã tɩ pʋg-yoodrã zao a zugã makda buud toɛy-toɛya, neb kʋʋngo, tẽns toɛy-toɛy neb la neb sẽn gomd buud-goam toɛy-toɛya.+ 16 Yɩɩl piigã+ fo sẽn yã wã ne we-rũngã+ na n wa kisga pʋg-yoodrã,+ n dees a sẽn tarã fãa n bas-a a zaala. B na n wãba a nemdã la b yõog-a bugum t’a rɩ zãnga.+ 17 Bala Wẽnnaam ninga b sũyẽ wã tɩ b pids yẽ raabã,+ rat n yeel tɩ b pids bãmb mensã tags-yɛngã n dɩk b naamã n kõ we-rũngã+ hal tɩ Wẽnnaam goamã wa pidsi. 18 La pagã+ fo sẽn yã wã makda tẽn-kãseng ning sẽn dɩt naam tẽngã rĩm-dãmbã zutã.”

18 Rẽ poore, mam yãa malɛk a to sẽn tar tõ-kãseng sẽn yi saasẽ n sigda, tɩ tẽngã lebg vẽenem a ziirã yĩnga. 2 La a zẽka a koɛɛg n gom ne pãng n yeele: “A lʋɩɩme! Babilon-kãsengã lʋɩɩme!+ A lebga zĩn-dãmb zĩiga, la zĩig vʋʋs-rẽgd buud fãa ne bõn-yɩgdɩ buud fãa sẽn yaa rẽgd la b sẽn kis sẽn wat n soondedẽ!+ 3 Bala a yoobã* ratem* divẽ wã kɩtame tɩ buud toɛy-toɛyã neb nens yilimdẽ.+ Tẽngã rĩm-dãmbã yoo ne-a,+ tɩ tẽngã toandbã lebg arzɛk rãmba, a sẽn vɩ naar vɩɩm n pa zoet yãndã yĩnga.”

4 Mam wʋma koɛɛg a to sẽn pa saasẽ n yeele: “Mam neba,+ yi-y-yã a pʋgẽ, y sã n pa rat n naag-a a yel-wẽnã pʋgẽ, la y sã n pa rat n paam a toodã.+ 5 Bala a yel-wẽnã zamame n ta saasẽ,+ tɩ Wẽnnaam tẽeg a tʋʋm-wẽnsã yelle.+ 6 Rol-y-yã-a wa sẽn zems a sẽn maan neb a taabã.+ Rol-y-yã-a bũmb nins a sẽn maanã naoor a yiibu.+ Rɩk-y la-bil+ ning a sẽn da tar n pund divẽ wã n pul divẽ naoor a yiib n kõ-a.+ 7 A sẽn waoog a meng to-to la a sẽn vɩɩmd naar vɩɩm n pa zoe yãnd to-to wã, bɩ y kɩt t’a paam namsg la sũ-sãang a woto. Bala a ra yeta wakat fãa a sũurẽ yaa: ‘Mam zĩi wa na-poaka, n pa pʋg-kõor me ye. Mam pa na n paam sũ-sãang a bada.’+ 8 Yaa rẽ n kɩt t’a toodã na n wa daar-n-yɛnga: Yaa kũum ne sũ-sãang la kom. Sẽn paase, b na n yõog-a-la bugum t’a rɩ zãnga,+ bala Wẽnnaam a Zeova* sẽn yaa soab ning sẽn kao a bʋʋdã tara pãnga.+

9 “La tẽngã rĩm-dãmbã sẽn yo* ne-a la b naag-a n vɩɩmd naar vɩɩm n pa zoe yãndã sã n wa yã bugmã sẽn dɩt-a wã bug-zõosã, b na n yãbame la b wilg b sũ-sãang a yĩnga. 10 B na n yasa yɩɩg b sẽn yɛɛsd a toogã yĩnga, n yetẽ: ‘Kayto, kayto, foom a Babilon sẽn yaa tẽn-kãseng+ la sẽn tar pãngã, fo sɩbgrã waa lɛɛr a yembr pʋgẽ!’

11 “Sẽn paase, tẽngã toandbã yãbda ne sũ-sãang a yĩnga, bala ned ka le be sẽn na n da b koosmã fãa, 12 rat n yeel tɩ sãnem, wanzuri, kug-neeba, kĩndi, lẽ gĩs-bãanese, fu-miid-miidu, sowa, fu-moaama, bũmb toor-toor sẽn maan ne raad sẽn tar yũ-noogo, teed toor-toor sẽn maan ne wob-yẽna, ne ra-neeba, ne zũudu, ne kut la ne marbre, 13 n paas sinamon la amom ne wisd la kaam sẽn tar yũ-noogo, la wisd sẽn yaa pɛɛlg ne divẽ la oliiv kaam, zom-bãanega, bɩle, niisi, piisi, wed-moose, wed-moos saar-dãmba,* yembs la ninsaalb vɩɩm.* 14 Bõn-sõma nins fo* sẽn da nongã loog n basa foom. Bõn-noodã fãa ne bõn-neebã menem n basa foom tɩ b pa na n le yã-b a bada.

15 “Toandb nins sẽn koos bõn-kãensã n paam arzɛgs wʋsg galʋ-tẽngã pʋgẽ wã na n yasa yɩɩga, b sẽn yɛɛsd a toogã yĩnga. B na n yãbda ne sũ-sãanga, 16 n yetẽ: ‘Kayto! Kayto! Tẽn-kãsengã sẽn da yer lẽ gĩs-bãanes futu, fu-miid-miid la fu-moaama, la sẽn da nags a meng wʋsg ne sãnem fan-teedo, ne kug-neeb la ne kĩndi wã.+ 17 Lɛɛr a yembr pʋgẽ, arzɛgs wʋsg a woto fãa sãamame!’

“La koom-koglg yel-gɛt fãa ne ned buud fãa sẽn tolemd mogrã zugu, n paas koom-kogend pʋsẽ tʋm-tʋmdbã ne neb nins fãa sẽn baood b noor dɩɩb mogrẽ wã ra yasa yɩɩg 18 n yãbda, la b get tẽngã sẽn dɩt bugmã bug-zõosã n yetẽ: ‘Tẽn-bʋg n yaa wa tẽn-kãsengã?’ 19 B ra lobda tom b zutẽ wã la b kelemdẽ, n yãbd ne sũ-sãang la b yetẽ: ‘Kayto! Kayto! Tẽn-kãsengã, tẽng ning pʋgẽ neb nins fãa sẽn tar koom-kogend mogrã zugã sẽn lebg arzɛk rãmb a paoongã maasem yĩngã, b sãam-a-la lɛɛr a ye pʋgẽ!’+

20 “Yãmb a sẽn be-b saasẽ wã,+ n paas yãmb a nin-sõamyã wã+ ne tẽn-tʋmdbã la no-rɛɛsdbã, kɩdm-y sũ-noog bũmb ning sẽn paam-a wã yĩnga, bala yaa yãmb yĩng la Wẽnnaam kao a bʋʋdã!”+

21 Malɛk sẽn tar pãng n zẽk kugr sẽn wõnd neer kug-bedr n lob mogrã pʋgẽ n yeele: “Yaa woto la b na n lob Babilon sẽn yaa tẽn-kãsengã ne pãnga. La b pa na n le yã-a a bada.+ 22 B kõn tol n le wʋm yɩɩn-yɩɩndb sẽn yɩɩnd la b wẽed pends rãamde, ne yʋʋmb rãamde, la wɩ-pɛɛbdb ne sẽn pɛɛbd-b tãntãadã rãamd fo pʋgẽ ye. Sẽn paase, b pa na n le yã tʋʋm-mit sẽn koosd la a raad bũmb fo pʋgẽ, la b pa na n le wʋm neer kugr dãamd fo pʋgẽ a bada. 23 Fɩtl vẽenem pa na n tol n le yãg fo pʋgẽ a bada. B pa na n le wʋm pʋg-paal sɩd wall pʋg-paal koɛɛg fo pʋgẽ a bada. Bala fo toandbã ra yaa tẽngã nin-kãsemse, la fo kẽesa buud toɛy-toɛyã fãa neb moog ne fo zĩn-dãmb yɛlã maanego.+ 24 Sɩd me, yaa tẽn-kãng pʋgẽ la b yã no-rɛɛsdb ne nin-sõamyã+ n paas neb nins fãa b sẽn kʋ tẽngã zugã zɩɩm.”+

19 Rẽ poore, mam wʋma koe-kãseng sẽn wõnd kʋʋn-kãseng koɛɛg saasẽ sẽn yeele: “Pẽg-y-yã a Zah!*+ Fãagrã ne ziirã la pãngã yaa tõnd Wẽnnaamã n so, 2 a bʋʋdã kaoob sẽn yaa sɩd la tɩrgã yĩnga.+ Bala a sɩbga pʋg-yood-kãsengã sẽn da sãamd tẽngã ne a yoobã,* la a rok a sũur a yembsã zɩɩmã pʋg-yood-kãsengã sẽn daag ne a nusã yĩnga.”+ 3 Zĩig pʋgẽ, koɛɛgã yeela naoor a yiib-n-soab yaa: “Pẽg-y-yã a Zah!*+ Pʋg-yoodrã bug-zõosã na n kell n dukame n dʋ yĩngr wakat sẽn kõn sa yĩnga.”+

4 La kãsem-dãmb pisi la a naasã+ ne bõn-vɩɩs a naasã+ wõgemdame n waoog Wẽnnaam sẽn zao geerã zugã n yeele: “Ãmiina! Pẽg-y-yã a Zah!”*+

5 Sẽn paase, koɛɛg n pa geerẽ wã n yeel yaa: “Yãmb fãa sẽn yaa tõnd Wẽnnaamã yembs+ sẽn zoet-a wã, y nin-bõoneg la y nin-kãsemse,+ pẽg-y-yã-a.”

6 Mam wʋma koɛɛg sẽn wõnd kʋʋn-kãseng koɛɛga, n wõnd koom sẽn zoet ne pãng bʋrgo, la sẽn wõnd saag sẽn tãsd ne pãng bʋrg sẽn yeele: “Pẽg-y-yã a Zah,*+ bala tõnd Wẽnnaam a Zeova* sẽn yaa Sẽn-tõe-a-fãa wã+ sɩnga naam dɩɩbo!+ 7 Bɩ d maan sũ-noog n kɩdem wʋsg la d pẽg-a, bala Pe-bilã yi-kãadmã daar taame, t’a pagã segl a meng n sa. 8 B kõ-a-la sor t’a yeelg lẽ gĩs-bãanes fuug sẽn pɩnda, la sẽn yaa yɩlemde. Bala lẽ gĩs-bãanesã makda nin-sõamyã wã tʋʋm-sõma wã.”+

9 La malɛkã yeela maam yaa: “Gʋlse: Sũ-noog rãmb la neb nins b sẽn bool Pe-bilã yi-kãadmã zaabr dɩɩbẽ wã.”+ A le yeela maam yaa: “Gom-kãensã yaa Wẽnnaam goam meng-menga.” 10 Rẽ la mam wõgemd a taoor n na n waoog-a. La a yeela maam yaa: “Gũusi! Ra maan woto ye!+ Mam yaa fo yem-taag bala, la fo saam-biisã sẽn tar tʋʋmd ning sẽn yaa kõ kaset a Zeezi wɛɛngẽ wã+ yem-taaga. Waoog Wẽnnaam!+ Bala kõ kaset a Zeezi wɛɛngẽ wã n yaa bãngr-gomd yẽgre.”+

11 Mam yãa saasã sẽn pak tɩ wed-mo-pɛɛlg+ be be. La sẽn da zao-a a zugã yʋʋr boondame tɩ Sɩd soaba,+ la Sɩda.+ A kaooda bʋʋd la a zabd zabr ne tɩrlem.+ 12 A ninã yaa wa bug-witim,+ tɩ maanf-bõones* wʋsg be a zugẽ wã. A tara yʋʋr sẽn gʋls tɩ ned baa a ye pa mi, tɩ sã n pa yẽ mengã bala. 13 A ra yera fuug sẽn mad* zɩɩm. B boond-a lame tɩ Wẽnnaam Gomdã.+ 14 Sẽn paase, saasẽ tãb-biisã ra zaoo wed-mo-peels n pʋgd-a, n yer lẽ gĩs-bãanes fu-peels sẽn yaa yɩlma. 15 Sʋ-wok+ sẽn dɩt sõma n yit a noorẽ wã, t’a na n tall n sãam buud toɛy-toɛyã. A na n kɩɩm-b-la ne kut rasaare.+ A tabda Wẽnnaam Sẽn-tõe-a-fãa wã sũ-pu-kãsengã vẽ wẽkr bokã me.+ 16 Yʋʋr n gʋls a fuugẽ wã, a gerã zugu: Rĩm-dãmb Rĩma, la zu-soben-dãmb Zu-soaba.+

17 Sẽn paase, mam yãa malɛk sẽn yas wĩntoogã pʋgẽ, n zẽk a koɛɛg n gom ne pãng n yeel bõn-yɩgdɩ wã fãa sẽn yɩgd sa-gãnã tẽn-sʋkã* yaa: “Wa-y ka. Tigm-y taab Wẽnnaam zaabr dɩ-kãsengẽ wã,+ 18 n dɩ rĩm-dãmb la soda-nanambs nemdo, pãens rãmba,+ wed-moos ne neb nins sẽn zao b zutã nemdo,+ la y rɩ nebã fãa nemdo, yembs ne sẽn pa-b yembse, nin-bõoneg la nin-kãsems nemdo.”

19 Mam yãa we-rũngã ne tẽngã rĩm-dãmbã la b tãb-biisã sẽn tigim taab n na n zab ne sẽn zao-a wed-moaagã, la ne a tãb-biisã.+ 20 La b yõka we-rũngã ne zirẽ-be-no-rɛɛsã. Yaa zirẽ-be-no-rɛɛs+ ning sẽn da maand bãn we-rũngã taoor n menes neb nins sẽn deeg we-rũngã bãndã,+ la neb nins sẽn waoogd a bõn-naandgã.+ B loba b yiibã fãa vɩɩs mogrã sẽn dɩt bugum ne kidbrã pʋgẽ.+ 21 B kʋʋ sẽn ket-bã ne sʋ-wok ning sẽn yi sẽn zao-a wed-moaagã zugã noorẽ wã.+ La bõn-yɩgdɩ wã fãa rɩɩ b nemdã n tɩge.+

20 Mam yãa malɛk sẽn yi saasẽ n sigda, n zãad bog-zulungã kʋɩlen-biig+ ne bãn-kãseng a nugẽ. 2 A yõka wag-bedrã+ sẽn yaa wag-kʋdrã,+ soab ning sẽn yaa Munaafɩɩk+ la Sʋɩtãanã,+ n sẽb-a yʋʋm tusr yĩnga. 3 A lob-a-la bog-zulungã+ pʋgẽ n page, la a sog bog-zulungã noore, sẽn na yɩl t’a ra le belg buud toɛy-toɛyã hal tɩ yʋʋm tusrã looge. Rẽ poore, b segd n bas-a-la wakat bilf yĩnga.+

4 Mam yãa gɛya, la b kõo neb nins sẽn zao b zutã tõog tɩ b kao bʋʋdo. Mam yãa neb nins b sẽn kʋ* b sẽn kõ kaset a Zeezi zugã yĩngã, la b sẽn da gomd Wẽnnaam yellã yĩngã sɩɩse,* n paas neb nins sẽn pa waoog we-rũngã wall a bõn-naandgã, la sẽn pa reeg a bãndã b rĩyẽ wã la b nusẽ+ wã sɩɩse.* B vʋʋgame n naag Kiristã+ n dɩ naam yʋʋm tusri. 5 Yãoã n yaa pipi kũum vʋʋgrã.+ (Kũ-rãmb a taabã+ pa vʋʋge, hal tɩ yʋʋm tusrã looge.) 6 Neb nins fãa sẽn paam pipi kũum vʋʋgrã+ yaa sũ-noog rãmb la nin-sõamyã. Kũum a yiib-n-soabã+ pa tar nin-kãens tʋʋmd ye.+ B na n yɩɩ Wẽnnaam ne Kiristã maan-kʋʋdba,+ la b yɩ rĩm-dãmb n naag Kiristã n dɩ naam yʋʋm tusrã sasa.+

7 La yʋʋm tusrã sã n wa sa bala, b na n yiisa a Sʋɩtãan a bog-zulungẽ wã. 8 A na n kẽnga tẽngã kɩrems a naasã pʋsẽ n tɩ belg buud toɛy-toɛyã, rat n yeel tɩ Goog la Magooge, sẽn na yɩl n tigm-b zabrã yĩnga. Nin-kãens sõorã yaa wa mogrã bĩisrã. 9 B sãeega dũniyã gill fãa, la b gũbg nin-sõamyã wã sik-zĩigã ne galʋ-tẽng ning Wẽnnaam sẽn nongã. La bugum n yi saasẽ n sig n dɩ-ba.+ 10 La b loba Sʋɩtãanã* sẽn da belgd-bã bugum la kidbr mogrã pʋgẽ, zĩig ning we-rũngã+ ne zirẽ-be-no-rɛɛsã sẽn da zoe n be wã.+ B na n nams-b-la* wĩndg la yʋngo, wakat sẽn kõn sa yĩnga.

11 Mam yãa geer sẽn yaa kãseng la pɛɛlga, ne soab ning sẽn zao a zugã.+ Tẽngã ne saasã zoe n looga a taoore,+ la b pa yã zĩig b yĩng ye. 12 La mam yãa kũ-rãmbã, b nin-kãsems la b nin-bõoneg tɩ b yas geerã taoore, la b laka seb-pindsi. B laka seb-pindem a to. Yẽ soabã n yaa vɩɩm seb-pindmã.+ B tika bũmb nins sẽn gʋls seb-pindsã pʋsẽ wã n kao kũ-rãmbã bʋʋd wa sẽn zems b tʋʋma.+ 13 Mogrã basa kũ-rãmb nins sẽn be a pʋgẽ wã tɩ b yi, tɩ kũumã ne Yaoogã* bas kũ-rãmb nins sẽn be b pʋsẽ wã tɩ b yi, la b kaoo b ned kam fãa bʋʋd wa sẽn zems a tʋʋma.+ 14 B loba kũumã ne Yaoogã* bugum mogrã+ pʋgẽ. Bugum mogrã+ makda kũum a yiib-n-soabã.+ 15 Sẽn paase, ned ning fãa yʋʋr sẽn pa gʋls vɩɩm sebrã+ pʋgẽ, b lob-a-la bugum mogrẽ wã.+

21 La mam yãa sa-paalg la tẽn-paalga.+ Bala pĩnd saasã ne pĩnd tẽngã loogame,+ tɩ mogrã+ me pa le beẽ ye. 2 Mam yãa tẽn-sõngã me sẽn yaa Zerizalɛm-paalgã sẽn yit Wẽnnaam nengẽ saasẽ n sigda,+ n segl a meng wa pʋg-paal sẽn nags a meng a sɩd yĩnga.+ 3 Mam wʋma koe-kãseng sẽn pa geerẽ wã n yeele: “Ges-y-yã! Wẽnnaam fu-roogã bee ne ninsaalbã. A na n paa ne bãmba, tɩ b yɩ a neba. Yẽ mengã na n zĩnda ne bãmba.+ 4 Wẽnnaam na n yẽesa nintãm fãa ninsaalbã ninẽ,+ la kũum pa na n le zĩndi,+ sũ-sãanga, yãbr wall toog pa na n le zĩnd ye.+ Bũmb nins sẽn da be pĩndã loogame.”

5 Sẽn zao-a geerã+ yeelame: “Ade! Mam maanda bũmbã fãa paalse.”+ A paasame: “Gʋlse, bala gom-kãensã yaa sɩda, n yaa goam b sẽn tõe n tẽ.” 6 A le yeela maam yaa: “Gom-kãensã pidsame! Mam yaa Alfa la Omega,* rat n yeel tɩ sɩngrã la baasgã.+ Ned ning fãa ko-yũud sẽn tare, mam na n kõ-a-la koom sẽn yit vɩɩm ko-bundgẽ wã zaalem.*+ 7 Ned ning sẽn na n tõog na n paama bõn-kãensã tɩ yɩ a pʋɩɩre. Mam na n yɩɩ a Wẽnnaam, tɩ yẽ yɩ mam biiga. 8 La sã n yaa ne rabɛɛmbã, neb nins sẽn pa tar tẽebã,+ sẽn yaa-b rẽgd la b tʋmd tʋʋm-dẽgdã, nin-kʋʋdbã,+ yoaadbã,*+ sẽn maand-b zĩn-dãmb yɛlã, bõn-naands pʋʋsdbã, zirẽ-be-rãmbã fãa,+ b pʋɩɩrã na n yɩɩ mogr sẽn dɩt bugum ne kidbrã pʋgẽ.+ Rẽ makda kũum a yiib-n-soabã.”+

9 Malɛgs a yopoe wã sẽn da zãad laas a yopoe wã sẽn da pid ne yaoolem tood a yopoe+ wã a ye waame, n yeel maam yaa: “Wa tɩ m na n wilga foom pʋg-paalã sẽn yaa Pe-bilã pagã.”+ 10 Dẽ, a rɩka maam ne vʋʋsem sõngã pãng n kẽng tãn-kãseng sẽn yaa lug-lug zugu, n wilg maam Zerizalɛm sẽn yaa tẽn-sõngã sẽn yit Wẽnnaam nengẽ saasẽ n sigda,+ 11 la a tar Wẽnnaam ziirã.+ A ra pɩnda wa kugr sẽn yaa neer wʋsgo, n yaa wa zasp kugr sẽn yaa yɩlll wa vɛɛre.+ 12 A ra tara lal-kãseng sẽn yaa zãonglg ne rignoy piig la a yiibu, tɩ malɛgs piig la a yiib yas rignoyẽ wã, tɩ Israyɛll buud piig la a yiibã yʋy gʋls rignoyẽ wã. 13 Rignoy a tãab n da be yaanga, t’a tãab be rɩtgo. Rignoy a tãab n da be goabga, t’a tãab be nin-taoore.+ 14 Tẽngã lalg me ra tara yẽbgr kug piig la a yiibu, tɩ Pe-bilã tẽn-tʋmdb piig la a yiibã yʋy piig la a yiibã+ gʋls b zutu.

15 La sẽn da gomd-a ne maamã ra zãada sãnem rasaar* sẽn yaa makdga, n na n mak tẽngã ne a rignoyã la a lalgã.+ 16 Tẽngã ra tara kɩrems a naase, t’a woglmã ne a yalmã zem taaba. Malɛkã rɩka rasaarã n mak tẽngã n mik tɩ yaa na maan kɩlo tus a yiib la kobs-yi la pisi.* Tẽngã woglmã ne a yalmã la a zãntlmã zema taaba. 17 A maka a lalgã me n mik tɩ yaa kãntɩɩs koabg la pis-naas la a naase,* sẽn zems ninsaal sẽn makd to-to wã, sẽn yaa malɛk me sẽn makd to-to wã. 18 Lalgã mee ne zasp kugri,+ tɩ tẽngã yaa sãnem halaal n yaa yɩlll wa vɛɛre. 19 Tẽngã yẽbgrã nagsa ne kug-neeb buud fãa: Pipi yẽbgrã yaa ne zaspe, tɩ yiib-n-soabã yaa ne safɩɩre. Tãab-n-soabã yaa ne kalsedoanne, naas-n-soabã yaa ne emeroode, 20 nu soabã yaa ne sardonigsi, yoob-n-soabã yaa ne sardoanne, yopoe-n-soabã yaa ne kirzoliti, nii-n-soabã yaa ne berilli, wɛ soabã yaa ne topaaze, piig soabã yaa ne kirzopraaze, piig la a ye soabã yaa ne yasẽnte, tɩ piig la a yiib-n-soabã yaa ne ametisti. 21 Sẽn paase, rignoy piig la a yiibã ra yaa kĩndi piig la a yiibu, tɩ rignoor fãa maan ne kĩndf a yembre. Tẽngã so-kãsengã ra yaa sãnem halaal n wõnd vɛɛr sẽn yaa yɩlll.

22 Mam pa yã wẽnd-doog tẽngã pʋgẽ, bala Wẽnnaam a Zeova* sẽn yaa Sẽn-tõe-a-fãa wã+ n yaa a wẽnd-doogo. Pe-bilã me yaa a wẽnd-doogo. 23 Tẽngã ra pa baood wĩntoog bɩ kiuug sẽn na n vẽneg-a, bala Wẽnnaam ziirã kõt-a-la vẽenem,+ tɩ Pe-bilã yaa a fɩtla.+ 24 Buud toɛy-toɛyã na n kẽna a vẽenemã maasem yĩnga,+ la tẽngã rĩm-dãmbã na n waa ne b ziirã a pʋgẽ. 25 A rignoyã pa na n tol n pag wĩndga, bala yʋng pa na n zĩnd be ye.+ 26 La b na n waa ne buud toɛy-toɛyã ziirã la b waoogrã a pʋgẽ.+ 27 La bũmb ning fãa sẽn yaa rẽgdo, n paas ned ning fãa sẽn tʋmd tʋʋm-dẽgd la sẽn belgd a taab pa na n tol n kẽ a pʋgẽ ye.+ Yaa neb nins yʋy sẽn gʋls Pe-bilã vɩɩm seb-pindmã pʋgẽ wã bal n na n kẽ be.+

22 A wilga maam vɩɩm koom kʋɩlg+ sẽn yaa yɩɩlll wa vɛɛre, n yit Wẽnnaam ne Pe-bilã+ geerẽ wã 2 n zoet tẽngã so-kãsengã tẽn-sʋka. La vɩɩm tɩɩs n be kʋɩlgã kɩrems a yiibã fãa n womd b biisã naoor piig la a yiibu, rat n yeel tɩ b womda b biisã kiuug fãa. La tɩɩsã vãadã ra yaa buud toɛy-toɛyã neb bãas tɩɩm.+

3 Kãab-wẽng baa a ye pa na n le zĩnd ye. La Wẽnnaam ne Pe-bilã geerã+ na n zĩnda tẽngã pʋgẽ. Wẽnnaam yembsã na n tʋma a tʋʋmã ne b sũy fãa. 4 B na n yãa Wẽnnaam nengã,+ la a yʋʋrã na n gʋlsa b rĩyẽ wã.+ 5 Yʋng me pa na n le zĩnd ye.+ B pa na n dat fɩtl vẽenem wall wĩntoogã vẽenem, bala Wẽnnaam a Zeova* na n kɩtame tɩ vẽenem bui-ba.+ B na n yɩɩ rĩm-dãmb n dɩ naam wakat sẽn kõn sa yĩnga.+

6 Malɛkã yeela maam yaa: “Gom-kãensã yaa sɩda, n yaa goam b sẽn tõe n tẽ.+ A Zeova* sẽn yaa Wẽnnaam ning sẽn vẽneg no-rɛɛsdbã+ tɩ b gomã tʋma a malɛkã t’a wilg a yembsã bũmb nins sẽn segd n zĩnd ka la bilfã. 7 Gese! Mam wata tao-tao.+ Sũ-noog soab la ned ning sẽn sakd seb-pindem-kãngã bãngr-gomdã sẽn yetã.”+

8 Be neere. Maam a Zã n yaa ned ning sẽn da wʋmd la a yãt bõn-kãensa wã. Mam sẽn wʋm la m yã bãmbã poore, mam wõgemda malɛk ning sẽn da wilgd maam bõn-kãensa wã taoor n na n waoog-a. 9 La a yeela maam yaa: “Gũusi! Ra maan woto ye! Mam yaa fo yem-taag bala, la fo saam-biisã sẽn yaa no-rɛɛsdbã ne neb nins sẽn sakd seb-pindem-kãngã goamã yem-taaga. Waoog Wẽnnaam.”+

10 A le yeela maam yaa: “Ra solg* seb-pindem-kãngã bãngr-gomdã sẽn yetã ye. Bala wakat ning b sẽn yãkã kolgame. 11 Bɩ tʋʋm-wẽns-maand kell n tʋm tʋʋm-wẽnse, la bɩ tʋʋm-dẽgd soab kell n pa a rẽgdẽ wã. Bɩ nin-tɩrg kell n pa tɩrlmã pʋgẽ, la bɩ ned sẽn yaa sõng kell n pa sõmblmã pʋgẽ.

12 “‘Gese! Mam wata tao-tao, la keoor ning mam sẽn kõtã bee ne maam, tɩ m na n keo ned kam fãa wa sẽn zems a tʋʋma.+ 13 Mam yaa Alfa la Omega,*+ pipi soabã la yaoolem soabã, sɩngrã la baasgã. 14 Sũ-noog rãmb la neb nins sẽn pegsd b kasaabs+ sẽn na yɩl tɩ b kõ-b sor tɩ b tɩ rɩ vɩɩm tɩɩsã biisi,+ la sẽn na yɩl n paam n tũ tẽngã rignoyẽ wã n kẽ wã.+ 15 Baasã* ne neb nins sẽn maand zĩn-dãmb yɛlã, yoaadbã,* nin-kʋʋdbã, bõn-naands pʋʋsdbã, n paas ned ning fãa sẽn nong ziri la sẽn yagd ziri wã+ bee yɩnga.’

16 “‘Maam a Zeezi tʋma m malɛkã t’a wa kõ yãmb bõn-kãensã kaset tigimsã yĩnga. Maam n yaa a Davɩɩd yẽgrã la a yagengã,+ n paas yibeoog ãdg ning sẽn pɩndã.’”+

17 La vʋʋsem sõngã ne pʋg-paalã+ yeta wakat fãa yaa: “Wa!” Bɩ ned ning fãa sẽn wʋmd yeele: “Wa!” Bɩ ko-yũud sẽn tar a soab fãa wa.+ Bɩ ned ning fãa sẽn dat reeg vɩɩm koom zaalem.+

18 “Mam yeta ned ning fãa sẽn wʋmd seb-pindem-kãngã bãngr-gomdã sẽn yetã yaa: Ned sã n paas bũmb bõn-kãens pʋsẽ,+ Wẽnnaam na n kɩtame tɩ tood nins b sẽn bilg sebrã pʋgẽ wã paam-a.+ 19 La ned sã n yãk bũmb seb-pindmã bãngr-gomdã sẽn yetã pʋgẽ, Wẽnnaam na n yãka a pʋɩɩrã vɩɩm tɩɩsã+ la tẽn-sõngã+ pʋsẽ, sẽn yaa bũmb nins b sẽn bilg seb-pindem-kãngã pʋgẽ wã.

20 “Soab ning sẽn kõt bõn-kãensã kasetã yetame: ‘N-ye! Mam wata tao-tao.’”+

“Ãmiina! Zu-soab a Zeezi, wa-y-yã.”

21 Bɩ Zu-soab a Zeezi barkã* zĩnd ne nin-sõamyã wã.