Sakrã fãaga b yõyã

A ZEZI KIRIST reng n keooga nebã tɩ Zʋɩf rãmbã tũudum sẽn da tɩ loe ne Zerizalɛm wẽnd-doogã na n taa a tɛka. A pa togs wakat takɩ ning rẽ sẽn da segd n wa wã ye. La a bilga yɛl sẽn da segd n wa baas ne sãoong kãnga. A sagla a karen-biisã tɩ b gũus sẽn na yɩl n wa tõog n zoe n yi yellã zĩigẽ.

A Zezi ra reng n togsa woto: “Yãmb sã n wa yã tɩ sodaas wʋsg gũbg Zerizalɛm, dẽ, bɩ y bãng t’a sãoong kolgame.” A leb n paasame: “Yãmb sã n yã sãoong bõn-wẽnga sẽn yas zĩ-sõnga pʋgẽ . . . wakat kãnga neb nins sẽn be Zide, bɩ b zoe n kẽng tãens zutu.” A Zezi sagla a karen-biisã tɩ b ra leb be n bao n fãag b laogã ye. B sã n da rat n põse, zoeesã ra yaa yãgb bũmbu.—Luk 21:20, 21; Matɩe 24:15, 16.

Sẽn na yɩl n gɩdg tẽng-n-biisã tõdgr sẽn da kaoosã, a Sɛstius Gallus talla Rom tãb-biisã n wa zab ne Zerizalɛm yʋʋmd 66. A kẽe galʋ-tẽngã pʋgẽ menga, n karg n gũbg wẽnd-doogã. Galʋ-tẽngã ra gudgdame. Neb nins sẽn da kell n gũusã ra tõe n yãame tɩ yel-beedã ra kolga wʋsgo. La b ra tõe n zoeeme bɩ? A Sɛstius Gallus lebg n looga ne a sodaasã tɩ nebã pa wʋm rẽ võor ye. Zʋɩf rãmb nins sẽn yaa tõtbã pʋgl n dig-b lame. Ra yaa sasa kãng la b ra segd n zoe n yi Zerizalɛm la Zide soolmã fãa!

Vẽk-n-yʋʋmdã, a Vɛspasiẽ ne a biribl a Tɩtus lebg n talla Rom tãb-biisã n wa. Zabrã ra piuuga tẽngã tõre. Yʋʋmd 70 wã sɩngrẽ, Rom dãmbã wẽe gũbr ne ra-sɩlems n gilg Zerizalɛm. Sor ye kae n na n zoe n põs ye. (Luk 19:43, 44) Tẽng-n-biisã sul wẽneg n kʋʋ taaba. Yaa Rom dãmbã n kʋ nin-buiidã sẽn kellã, la b tall kẽer n kẽng yembdo. B sãama galʋ-tẽngã ne wẽnd-doogã zãnga. Sã n yaa ne yʋʋm pipi kob-gĩndẽ pĩnd wẽndẽ yel-mit a Zozɛfo, yaa sẽn yɩɩd Zʋɩf rãmb milyõ n nams n ki. B pa tõog n lebs n me wẽnd-doogã yas abada.

Kiris-neb sã n da kell n paa Zerizalɛm yʋʋmd 70 wã, rẽnd b kiime, wall b lebga yembs wa neb a taab nins sẽn da pa be wã. La pĩnd wẽndẽ yel-mitbã wilgame tɩ kiris-nebã kelga keoogr ning Wẽnnaam sẽn da taas-b n yeel-b tɩ b zoe n yi Zerizalɛm la Zide n kẽng Zʋrdẽ kʋɩlgã yaang tãensẽ wã. Kẽer tɩ zĩnda Pela, sẽn be Peere babgẽ wã. B zoe n basa Zide n pa leb be ye. B sẽn sak a Zezi keoogrã yĩnga, b tõog n põsame.

Yãmb sakda keoogr nins sẽn zems ne bas-yardã bɩ?

Neb wʋsg sẽn wʋm keoogr wʋsg sẽn pa pidsã yĩnga, b pa le tẽed keoogr buud fãa ye. La keoogr sakr yaool n tõe n fãaga y yõorã.

Sin tẽngã, yʋʋmd 1975, b keooga nebã tɩ tẽngã na n digimdame. Tẽngã taoor dãmb tik n yikame, tɩ nin-buiidã tũ b saglsã, tɩ b tõog n fãag neb tusa vɩɩm.

Yʋʋmd 1991, tʋʋl-nif kiuugu, Filipin tẽn-bõoneg neb sẽn da be tãng ning b sẽn boond tɩ Pinatubo sɛɛgẽ wã wilgame tɩ walem la tompɛglem n da yit tãngã zugu. Filipin tãng pusgr la tẽn-digimdsã siglg a yembr mitbã gesa yellã kiis a yiib pʋgẽ, n yaool n keoog nebã tɩ yellã ra kolga wʋsgo. Tao-tao tɩ b talla neb sẽn zems 35 000 n yiis zĩigẽ wã. Sigr kiuug rasem 15 wã yibeoogo, tãngã pusgame n bas bok yalem la a zulum sẽn zem kɩlometr a nii, tɩ tʋrs n kuil yĩngrã n yaool n na n sʋʋg tẽngã. Keoogrã sakr kɩtame tɩ neb tusa põse.

Biiblã keoogda nebã tɩ zãmaan kangã saab kolgdame. Masã tõnd vɩɩ yaoolem dayã pʋsẽ. Saabã sẽn kolgdã yãmb ket n gũusdame bɩ? Yãmb maanda bũmb n na n yi yellã zĩigẽ bɩ? Ne yãgbo, yãmb keoogda neb a taabã me tɩ b maan woto bɩ?

[Foto, seb-neng 20]

Keoogrã sakr kɩtame tɩ neb tusa põse, Pinatubo tãngã sẽn pusg n furs tompɛglmã

[Foto, seb-neng 21]

Kiris-neb nins sẽn sak a Zezi keoogrã põsame, b sẽn wa n sãam Zerizalɛm yʋʋmd 70 wã