SAK 58
Kell-y n maan-y sɩd ne a Zeova
Kiris-neb hakɩɩkã pa tol n dat n bas tɩ baa fʋɩ, wall ned baa a ye kɩt tɩ b bas a Zeova tũub ye. Yaa vẽeneg tɩ yãmb me pa rat woto ye. Yãmb sẽn maand sɩd ne a Zeova wã tara yõod wʋsg a nifẽ. (Karm-y 1 Kibay 28:9.) Yel-bʋs n tõe n kɩt tɩ yɩ toog ne-y tɩ y kell n maan sɩd ne a Zeova, la bõe n tõe n sõng yãmba?
1. Wãn to la neb a taabã tõe n kɩt tɩ yɩ toog ne tõnd tɩ d maan sɩd ne a Zeova?
Neb n na n bao n kɩt tɩ d bas a Zeova tũubu. Ãnd dãmb n na n dat n maan woto? Neb sẽn bas a Zeova tũub n togsd yɛl sẽn pa sɩd a siglgã zugu, sẽn na yɩl n koms d tẽebã. Yaa bãmb la b sẽn boond tɩ sɩdã kɩɩsdbã. Sẽn paase, tũudum taoor dãmb kẽer yelgda kibay sẽn pa sɩd tõnd zugu, sẽn na yɩl n kɩt tɩ sẽn pa maand-b gũusgã bas a Zeova tũubu. D sã n sõsd ne neb a woto, n karemd b sɛbã bɩ bũmb nins b sẽn gʋls b sɩt wɛɛb rãmbã pʋgẽ wã, wall d get b video-rãmbã, tõe n waa ne yelle. A Zeezi yeela neb nins sẽn baood n na n koms b taabã raood tɩ b pa maan sɩd ne a Zeova wã wɛɛngẽ yaa: “Bɩ y bas-ba. B yaa taoor lʋɩtb sẽn yaa zoense. Zoang sã n tɛt zoanga, b yiibã fãa na n lʋɩɩ bokẽ.”—Matiye 15:14.
La ned d sẽn mi sã n yãk yam n pa rat n le yɩ a Zeova Kaset soab yẽ? Ned d sẽn mi sõma sã n maan woto, tõe n sãama sũuri. A soab tõe n dat n modga tõnd tɩ d yãk yẽ ne a Zeova sʋka. La d segd n kell n modga ne d sũur fãa n maan sɩd ne Wẽnnaam. (Matiye 10:37) D tũuda a Zeova sẽn yeel tɩ d ra maan tũud-n-taar ne neb a woto buudã.—Karm-y 1 Korẽnt rãmb 5:11.
2. Wãn to la d yam-yãkr tõe n wilg d sã n maanda sɩd ne a Zeova, bɩ d pa maand sɩd ne-a?
D sã n nong a Zeova, na n kɩtame tɩ d zãag d meng ne bũmb ning fãa sẽn tõe n kɩt tɩ d kẽes d toog ziri tũudmã yɛlẽ wã. D nug-tʋʋmdã, d sẽn naag sigls ninsã, pa rẽ bɩ d sẽn maand bũmb ninsã pa segd n tar loees ne ziri tũudmã ye. A Zeova keoogda tõnd yaa: “Mam neba, yi-y-yã a [Babilon-kãsengã] pʋgẽ.”—Vẽnegre 18:2, 4.
D BAO N BÃNG N PAASE
D ges y sẽn tõe n maan to-to n da wa bas tɩ ned baa a ye kɩt tɩ y pa le maan sɩd ne a Zeova ne y sũur fãa ye. Sẽn paase, d na n yãame tɩ y sã n yi Babilon-kãsengã pʋgẽ, wilgdame tɩ y maanda sɩd ne a Zeova.
3. Gũus-y y mens ne ziri karen-saam-dãmbã
D sã n wʋm goam sẽn pa sõma a Zeova siglgã zugu, d manesem segd n yɩɩ wãna? Karm-y Yel-bũn 14:15, tɩ rẽ poor bɩ y leok sokrã:
Bõe yĩng tɩ d segd n maan gũusgu, n da wa tẽ gomd ning fãa d sẽn wʋme?
Karm-y 2 Zã 10, tɩ rẽ poor bɩ y leok sogsgã:
D manesem segd n yɩɩ wãn ne sɩdã kɩɩsdbã?
Baa d pa sõsd ne sɩdã kɩɩsdba, bõe n tõe n yɩ sabab tɩ bũmb nins b sẽn zãmsd nebã ta tõndo?
Yãmb tagsdame t’a Zeova tagsg na n yɩɩ wãna, y sã n kelg goam sẽn pa sõma a zugu, bɩ a siglgã zugu?
4. D kell n maan sɩd ne Wẽnnaam, d tẽed-n-taag sã n wa maan yel-wẽnde
D sã n bãng tɩ tigingã ned n maan yel-wẽn-kãsenga, bõe la d segd n maane? D ges saglg sẽn be tõog ning Wẽnnaam sẽn da kõ pĩnd wẽndẽ Israyɛll nebã pʋgẽ. Karm-y Maan-kʋʋr 5:1.
Wa vɛrse wã sẽn wilgã, d sã n wa bãng tɩ tigingã ned n maan yel-wẽn-kãsenga, d segd n togsa kãsem-dãmba bũmb ning tõnd sẽn mi wã. La nand tɩ d maan woto, yɩta sõma tɩ d sagl sẽn maan-a yel-wẽndã t’a kẽng a toor n tɩ yã kãsem-dãmbã, n vẽneg a yel-wẽndã n togse. A sã n pa tɩ togse, tõnd na n maana sɩd ne a Zeova, n tɩ togs kãsem-dãmbã bũmb ning d sẽn mi wã. Wãn to la manesem a woto wilgd tɩ d maanda sɩd ne . . .
Wẽnnaam a Zeova?
sẽn maan-a yel-wẽndã?
tigingã neb a taabã?
Y tẽed-n-taag sã n maood ne zu-loɛɛga, bɩ y sõng-a!
5. Zãag-y y meng ne Babillon-kãsengã
Karm-y Luk 4:8 la Vẽnegr 18:4, 5, tɩ rẽ poor bɩ y leok sogsgã:
B ket n sõta maam n naagd ziri tũudum neb bɩ?
Mam naaga siglg sẽn teend tũudum a to bɩ?
Mam nug-tʋʋmdã teenda ziri tũudmã baa yaa bilf bɩ?
Zĩ-bʋs wɛɛngẽ la yaa tɩlɛ tɩ m zãag m meng ne ziri tũudmã?
M sã n leok baa yaa sokr a ye tɩ n-ye, yel-bʋs la m segd n demse?
Sẽn yaa a soab fãa, yãk-y yam sẽn na n kɩt tɩ y sũur-kãsetã pa ning-y taale, la sẽn wilgd tɩ y maanda sɩd ne a Zeova.
B sã n kos yãmb tɩ y kõ ligd n teel tũudum tʋʋmd ninga, bõe la y na n maane?
NEB KẼER SẼN YETE: “Yaa tɩlɛ tɩ m bãng sɩdã kɩɩsdbã sẽn yet bũmb ning a Zeova Kaset rãmbã zugã, sẽn na yɩl n tõog n wilg tɩ b sẽn yetã pa sɩd ye.”
Woto yaa yam tʋʋmd bɩ? Bõe yĩnga?
KƲMSGO
Sẽn na yɩl n kell n maan sɩd ne a Zeova, yaa tɩlɛ tɩ d ra maan tũud-n-taar ne neb nins sẽn pa maand sɩd ne-a wã ye. Sẽn paase, d segd n zãaga d meng fasɩ ne ziri tũudmã.
Lebg-n-gese
Bõe yĩng tɩ d pa segd n ges sɩdã kɩɩsdb video-rãmba, n karem b sɛba, pa rẽ bɩ n kelg b goam?
D manesem segd n yɩɩ wãn ne neb nins sẽn pa le yaa a Zeova Kaset rãmbã?
Wãn to la d tõe n tũ a Zeova sẽn keoog tõnd tɩ d yi ziri tũudmã pʋgẽ wã?
BŨMB A TAABA
Y manesem segd n yɩɩ wãna, neb sã n yelgd kibay sẽn pa sɩd a Zeova Kaset rãmbã zugu?
“Yãmb sẽn wʋmã yaa sɩd bɩ?” (Yʋʋmd 2018 sa-sik kiuug Gũusg Gasgã)
Y maanda wãn n bãng sigls wall tʋʋm a taab sã n teenda Babilon-kãsengã, bɩ pa teend-a?
Bõe la bɛɛb kẽer maanda, n na n koms d tẽebã?
Shinto tũudmã prɛtr a yembr kibare. A yiime n bas ziri tũudmã.
“Biiblã toeemda neba” (Yʋʋmd 2011 sẽoog kiuug pipi daar Gũusg Gasgã)