Sɩngr goamã

D sẽn tõe n tũ Biiblã sagls to-to sebrã na n sõng-d lame tɩ d yãt Biiblã vɛrse-rãmba, saglse, la kibay nana-nana, tɩ sõng-d tɩ d tõog n mao ne daar fãa zu-loeesã. Sẽn paase, na n sõng-d lame tɩ d paam vɛrse-rãmb sẽn zemse, n keng d taabã raood la sõng-b tɩ b bãng n yãk yam sẽn waoogd a Zeova. Yãk-y gom-zug ning y sẽn datã. Gom-zug fãa wɛgsg zĩigẽ, sogsg n be be. B kʋmsa Biiblã kibay me tɩ na n sõng-yã. (Ges-y zĩ-gũbrã: “Y sẽn tõe n tall sebrã n tʋm to-to.”) Y na n yãa vɛrse-rãmb la sagls sẽn na n sõng-y la bels-yã. Y leb n na n paama Biiblã sagls y sẽn tõe n tik n sõng y taabã la y keng b raoodo.

Y sẽn tõe n tall sebrã n tʋm to-to

Y sã n dat gom-zugu, y tõe n kẽnga zĩig ning b sẽn sõdg gom-zutã fãa wã, pa rẽ bɩ y kẽng zĩig ning b sẽn tigim gom-zutã bugs toor-toorã. B weela D sẽn tõe n tũ Biiblã sagls to-to sebrã gom-zutã bugs a yopoe: Daar fãa vɩɩmã, D sẽn sɩd yaa ned ning buudã, Tigingã, Tõnd ne a Zeova zoodã, Tʋʋm-tʋmdɩ, Zak rãmba, la Zu-loeese. Y sẽn dat gom-zug ningã na n bee buk a ye sʋka. Y sã n pa kɩs sɩd tɩ buk ning zĩigẽ, y na n yãa gom-zug ning y sẽn datã, bɩ y kẽng zĩig ning b sẽn sõdg gom-zutã fãa wã n gẽes y sẽn datã. Gom-zug fãa wɛgsg zĩigẽ, y na n yãa goam b sẽn gʋls tagd-tagdo. Kẽer yaa sokre, tɩ sãnda pa sokr ye. Y sã n wa karemd vɛrse nins sẽn yaa tagd-tagdã, bɩ y maag y yĩng n bʋgs b zugu, n ges b sẽn teend goamã sẽn be yĩngrã to-to, pa rẽ bɩ b sẽn leokd sokrã to-to. Zĩis kẽere, b wilga gom-zut a taab y sẽn tõe n ges n paam kibay nins y sẽn datã tao-tao. “Ges-y” wã zĩis sãnda yaa vɛrse-rãmba. Vɛrse-kãens goamã tara loees ne gom-zug ning y sẽn yãkã. Zĩis wʋsgo, y na n yãa zĩig b sẽn gʋls tɩ “Biiblã kibay sẽn tõe n sõng-yã.” Zĩ-kãensã, b gʋlsa goam a wãn bal sẽn bilgd vɛrse-rãmbã b sẽn sõdgã sẽn gomd bũmb ning yell n tɩ yɩɩda. Y sã n wa karemd vɛrse-rãmbã bɩ y bʋgs gom-kãens zugu.

Gom-zug fãa wɛgsg zĩigẽ, b pa sõdg vɛrse-rãmb nins fãa sẽn tar loees ne gom-zugã ye. La y tõe n tika bũmb nins sẽn be sebrã pʋgẽ wã n maan vaeesg n paase. (Yel. 2:1-6) Sẽn na yɩl n maan vaeesgo, bɩ y ges La Bible. Traduction du monde nouveau, not-rãmb la referãens-rãmbã zĩigẽ. Y sã n dat n wʋm Biiblã vɛrse ning võor n paase, pa rẽ bɩ y sẽn tõe n tũ a saglgã to-to bɩ y ges Vaeesg sebre, a Zeova Kaset rãmbã yĩnga, wall Index des publications des Témoins de Jéhovah. Tʋʋm-te-kãensã na n sõng-y lame tɩ y bãng sɛb nins d sẽn yiis tɩ gomd Biiblã vɛrse-kãng yelle. Seb-paal kẽer y sẽn na n yã na n sõng-y lame tɩ y bãng d sẽn wʋmd bũmb kẽer võor to-to masã wã.

Bɩ D sẽn tõe n tũ Biiblã sagls to-to sebrã sõng-y tɩ y paam yam la bãngre, la y tõog n wʋm bũmb nins sẽn be Gʋls-sõamyã pʋgẽ wã võor sõma. Y sã n tar seb-kãngã n tʋmdẽ, y na n maneg n kɩsa sɩd tɩ “Wẽnnaam gomdã vɩɩme, la a tara pãnga.”—Ebre. 4:12.