Rĩungã Koe-moondb Togsdame
Kaset rãmbã kẽngda zãma wã taoor Fãrense
YƲƲMD 1999, yʋʋm-vẽkr kiuug rasem 29, arzũmã yibeoogo, hali n tɩ ta wɩkɛnnã, a Zeova Kaset rãmbã sẽn be Fãrensã pʋɩɩ seb-vãad milyõ 12 soyã zut la zak ne zaka. A gom-zugã yaa: Fãrens neba, b belgd-y lame! Bõe yĩng tɩ b pʋɩ seb-vã-kãngã wʋsgo?
B maana bool-n-sʋk zʋrnalist rãmbã taoor arzũm kãng yibeoogã Paari n wilg bũmb ning sẽn kɩt tɩ b pʋɩt seb-vã-kãngã wʋsgã. Kaset soab sẽn gom a taaba yʋʋr yĩng wilga woto: “Tõnd sẽn dat bũmb ning rũndã yaa d kɩt tɩ b bãng tõnd sẽn sɩd yaa neb ninsi, la d kɩt tɩ b sẽn gõ n kãnegd tõnd zĩig fãa wã sa. Tõnd sakda wɩdga, la d ye pa rat n kelg ziri-n-beed la goam sẽn sãamd d yʋʋr ye.”
Baa ne a Zeova Kaset rãmbã sẽn yaa kiris-neb tũudum tãab-n-soab sẽn yɩɩd ne sõor Fãrens tẽngã, Kaset rãmb kamb wʋsg la b tʋ-yã, la b namsd lekoll dãmbẽ wã. Kãsemb tʋʋm n sãame bɩ b bao n na n yɛɛs-b-la b tũudmã yĩnga. Yaa bũmb tẽeb sẽn yaa toogo, la bãng-y tɩ tũudum yamleoog kũun nins b sẽn paamdã menga b yeel-b lame tɩ b yao lampo 60 koabg zugu. Wãn-wãn la seb-vãadã pʋɩɩb wʋsgã maan bak-n-kisg kãngã taoore?
Seb-vãoogã togsda woto: “A Zeova Kaset rãmb 250 000 la b tũud-n-taasã sẽn be Fãrensã YIKAME N YET TƖ B PA SAK pʋ-lik manesem ning b sẽn tall ne b tũudmã sẽn yaa kiris-neb tũudmã sẽn be hal yʋʋmd 1900, b sẽn dɩk n lagem ne tũudum wil sẽn yaa wẽns yʋʋmd 1995 tɛkã ye. . . . B YIKAME N YET TƖ B PA SAK wakat fãa namsg ning b sẽn wat ne b zutã ye.” Kãnegr nins b sẽn kãneg Kaset rãmbã Fãrensã, la manesem kɛg nins yʋ-sãamdbã sẽn tũnug ne n yelg kɩbay sẽn pa sõma wã, b puka rẽ fãa. Seb-vãoogã baas n yetame: “Rũndã-rũndã, sẽn yɩɩd a Zeova Kaset rãmb milyõ a yiib la b zo-rãmb n be Erope. B sakda tẽns nins pʋsẽ b sẽn yaa tẽng-n-biisã goosneem dãmb noyã, ne b sẽn teend Evãnzillã noyã. Fãrens neba, ad yɛla yaa woto. Tõnd segdame n wilg yɛlã wa b sẽn sɩd yaa to-to wã!”
Manesem sẽn yɩ sõma la tao-tao
Seb-vãad milyõ rãmb la b kõ pipi daarã. Paari pʋgẽ wã bala, midi wã ne a yet a taame, sẽn yɩɩd Kaset rãmb 7000 n da bas sẽn yɩɩd seb-vãad milyõ a 1,3 nebã nusẽ. Yã Kaset rãmb wʋsg woto sẽn kõt seb-vãad soyã zut sɩd ra yaa pipi ne nebã. Kɩba-kõtbã, tẽngã la galʋ-tẽngã zʋrno rãmb la televiziõ wã sẽn paas talla manesem sẽn yaa sõma ne seb-vãad pʋɩɩb wʋsgã. Zʋrnall ning sẽn yaa Le Progrès de Lyon togsame: “Sard kãngã b sẽn dɩkã . . . pukda mo-yõsr sẽn zĩnd gom-biig zugu. Yʋʋm piig sẽn loogã pʋgẽ, gom-biig ning sẽn yaa ‘secte’ (tũudum willã) . . . võor lebga goalenga, yelle, la wẽnga. . . . A Zeova Kaset rãmbã pa yelle, n tõe n dãmb zãmaanã ye.”
Neb nins sẽn mi a Zeova Kaset rãmbã nanda b sẽn tar laafɩ la b sẽn tar waoogr wʋsg ne zu-sobendã sẽn luglã. Woto, soyã zutu, neb wʋsg wilga b naneb la b teelg ne Kaset rãmb tus pi-gĩnã sẽn kẽes b mens seb-vãadã pʋɩɩb wʋsg pʋgẽ wã. Pa kaoos la b reeg telefon boaala, fags rãmb la lɛta neb sẽn tool n wilg b bark pʋʋsg ne seb-vãoogã ye. Sẽn yɩɩd fãa, pʋ-peelem dãmbã paama zu-noog n kelg yɛlã Kaset rãmbã wɛɛngẽ, n bãng tɩ pa wala ziri la yalem goama b sẽn da togs b zutã ye. Sẽn paase, neb nins tẽeb b sẽn da sãbgã tõog n wilga b tagsg ne bũmb ning b sẽn gãd la b nongẽ wã.