“Bɩ Y Tall Sik-m-meng Yam”
“Wẽnnaam kɩɩsda tɩtaam dãmba, la bãmb ningda sik-m-mens rãmba zut barka.”—1 PƖƐƐR 5:5.
1, 2. Tagsg manesem a yiib bʋs sẽn kɩɩsd taab n tar pãn-tusdg ninsaal manesmã zugu?
TAGSG manesem nins Wẽnnaam Gomdã sẽn wilgd tõndã sʋka, a yiib sẽn kɩɩsd taab n be. B yiibã fãa tara pãn-tusdg ninsaal manesmã zugu. B bilga a yembrã t’a yaa “sik-m-meng yam.” (1 Pɩɛɛr 5:5) Gom-biis võor sebr wilgda “sik-m-meng” võor n yetẽ tɩ yaa f sẽn na n tar “sik-m-meng f manesmẽ wã bɩ f tagsgẽ wã: sẽn pa tar wuk-m-menga.” Sik-m-meng yam ne sik-m-meng fãa yaa yembre, la Wẽnnaam nifẽ, a yaa zʋg sẽn yaa sõma wʋsgo.
2 Wuk-m-mengã yaa lebend ne rẽ. B wilga a võorã t’a yaa “pẽg-m-meng sẽn loog noore,” yɩ “nin-pa-nanda.” A yaa rat-m-yembre, n baood yĩngã laogo, n baood sẽn nafd yẽ mengã bala, la a baood nafa a taaba, baa b biisã sẽn yaa wẽns to-to neb a taabã zutu. Biiblã wilgda a biisã a yembr woto: “Ninsaal soo a to a wẽng yĩnga.” A gomda “ned ne a to wags-n-taarã faoolem” yelle, n yeel tɩ yaa “wa sebg rigbu,” bala f sã n ki, “bũmb pa be f sẽn tõe n zɩ n loog ne ye.” Wuk-m-meng a woto yaa wẽng wʋsg Wẽnnaam nifẽ.—Koɛɛg Soaba 4:4, NW; 5:15, NW; 8:9, NW.
Dũniyã yam ning sẽn piuug n yɩɩdã
3. Dũniyã yam ning sẽn piuug n yɩɩd yaa bʋgo?
3 Tagsg manesem a yiibã sʋka, bʋg n be dũniyã pʋgẽ n yɩɩd rũndã-rũndã? Dũniyã yam ning sẽn piuug n yɩɩdã yaa bʋgo? Sebr a ye (World Military and Social Expenditures 1996) yetame: “Yʋʋm kob-gĩnd a to ye pa zĩnd n zeng yʋʋm kob-gĩn 20 soabã ne . . . nen-kɛglem sẽn yaa wẽng wʋsg ye.” Wags-taabã politikã la laogã wɛɛngẽ wã, n paas tẽng pʋgẽ, tũudum bɩ buud wɛɛngẽ zabã kʋʋ sẽn yɩɩd neb milyõ 100 yʋʋm kob-gĩnd kãngã pʋgẽ. Rat-m-yembr manesmã sẽn pukd nebã yembr-yembr vɩɩm pʋgẽ wã me paasame. Chicago Tribune yeelame: “Nen-kɛglem b sẽn maand n pa tagsdẽ, kamb yõgb la b modgre, kãadem kaoobã, rã-tɩgrã, SƖDA wã, kom-bɩɩs sẽn kʋʋd b mensã, dorgã, sor zug bi-beerã, pagb yõgbã, tãmpĩib rogmã, pʋsã yiisgu, yoob yɛl wilgri, . . . ziri wã, zãmbgã, politikã wɛɛngẽ zãmbã . . . bee tood nins sẽn namsd nebã sʋka. B ye pa gomd sõma la wẽng yell wala vɩɩm manesem noy ye.” Woto, UN Chronicle keoogdame tɩ: “Zãmaan kãngã buud toɛ-toɛ tara wãabo.”
4, 5. Wãn-wãn la b bilg dũniyã yam tɩ zems kɛpɩ Biiblã bãngr-gomd pʋgẽ sẽn tɩ loe ne tõnd wakatã?
4 Bõn-kãensã bee dũniyã gill zugu. Yaa wa Biiblã bãngr-gomd sẽn deng n togs tõnd wakatã yĩngã: “Yaoolem wakate tood na n zĩndame. Tɩ bõe, neba na n yɩɩ beed dãmba, ligd noangdba, wilg-m-mens rãmba, tɩtaam dãmba, Wẽnnaam tʋʋsdba, ba rãmba la ma rãmb kɩɩsdba, zɩ-beoog rãmba, nin-zaalse, neb sẽn ka tar ninbãan-zoeere la sũ-to-neba, tẽn-kãn neba, neb sẽn ka tar yõk-m-menga, pʋto rãmba, nin-sõamyã kigisdba, zãmb dãmba, neb sẽn ka gũusda, la wuk-m-mens rãmba.”—2 Tɩmote 3:1-4.
5 Woto yaa dũni kãngã yam sẽn piuug n yɩɩdã bilgr sẽn zems takɩ. Yaa maam nandã manesem sẽn yaa rat-m-yembr manesmã. Wags-taabã sẽn be tẽn-tẽnsã sʋkã pukda wags-taabã sẽn be nebã yembr yembr ne taabã sʋkã pʋgẽ. Wala makre, ɛspoor nins pʋsẽ b sẽn maand wags-taabã, ɛsportif rãmb wʋsg rat n lʋɩɩ taoore, baa b sẽn na n sãam neb a taabã sũy bɩ n pogl-b to-to fãa, b toog kae ye. B ningda rat-m-yembr yam kãng kambã yamẽ, la yam kãng kelld n bee b vɩɩmã nens wʋsg pʋsẽ b kãseng zugẽ. Rẽ wata ne “beem la mo-beedo la sũ-kĩiri la kisgri la no-koɛɛma la welgre.”—Galat dãmba 5:19-21.
6. Ãnd soab n wat ne rat-m-yembr yamã, la wãn-wãn la a Zeova tagsd yam kãngã buud wɛɛngẽ?
6 Biiblã wilgdame tɩ dũni kãngã rat-m-yembr yamã pukda “diaabl la Sʋɩtãana sẽn belgd dũniyã fãa wã” rat-m-yembr yam. Sẽn tɩ loe ne a Sʋɩtãan pãn-tusdgã nebã zut sẽn vɩ yaoolem wakat kãensa wã wɛɛngẽ, Biiblã reng n togsame: “Toog bee ne neb nins sẽn be dũniyã zugu . . . Tɩ bõe, Sʋɩtãana sigame n wa yãmb nengẽ, la a sũ-puugra yaa kãsenga a sẽn bãng t’a wakat yaa bilfa yĩnga.” (Wilgri 12:9-12) Woto, yẽ ne a zĩn dãmbã sẽn ya a lagem-n-taasã paasa b modgrã sẽn na yɩl n ning rat-m-yembrã ãdem-biisã yamẽ. La a Zeova tagsg yaa wãn-wãn ne manesem kãngã? Ad a Gomdã sẽn yete: “Zusoaba ka nong tɩta ned ye.”—Yelbũna 16:5.
A Zeova bee ne sik-m-mens rãmbã
7. Wãn-wãn la a Zeova get sik-m-mens rãmbã, la bõe la a zãmsd-ba?
7 Sẽn yaa lebende, a Zeova ningda neb nins sẽn tar sik-m-meng yamã barka. Rĩm a Davɩɩd yɩɩl n pẽga a Zeova n yeel woto: “Yãmb fãagda sik-m-mens rãmba, la y sikda tɩtaam dãmba ne b nin-getɩ.” (2 Sãmwɛll 22:1, 28) Yaa woto n kɩt tɩ Wẽnnaam Gomdã sagendẽ: “Tẽnga sik-m-mens rãmba fãa . . . bao-y Zusoaba. La y bao tɩrlem ne sik-m-menga tɩ daar ninga, b na n lilla yãmb Zusoaba sũ-puugra raare.” (Sofoni 2:3) Neb nins sẽn baood a Zeova ne sik-m-mengã paamda a zãmsg sẽn na yɩl n bɩɩs yam sẽn yaa toor zãng fasɩ ne dũni kãngã rẽndã. “A na n zãmsa a sorã sik-m-mens rãmbã.” (Yɩɩl Sõamyã 25:9, NW; Ezai 54:13) So-kãng yaa nonglmã sore. A tika sẽn yaa tɩrg maaneg sẽn zems ne Wẽnnaam noyã. Sã n yaa ne Biiblã, nonglem kãngã sẽn tik noy zutã “ka pẽgd a meng ye, la a ka wukd a meng ye . . . a ka baood a meng sõngr bal ye.” (1 Korẽnt dãmba 13:1-8) A leb n pukda sik-m-meng yamã pʋgẽ.
8, 9. a) Nonglem sẽn tik noy zutã sɩngr yaa wãn-wãna? b) Maan togs-n-taar ne nonglem la sik-m-meng ning a Zezi sẽn tallã yõod taa zĩ-bʋgo?
8 A Poll ne yʋʋm kob-yendẽ kiris-neb a taab zãmsa nonglem kãngã buudu, a Zezi zãmsgã maasem yĩnga. La a Zezi zãmsa nonglem kãng a Ba a Zeova nengẽ, Biiblã sẽn yet a soab wɛɛngẽ tɩ: “Wẽnnaam yaa nonglem.” (1 Zã 4:8) A Zezi bãngame tɩ Wẽnnaam da ratame t’a tũ nonglmã noor a vɩɩmã pʋgẽ, la a maana woto. (Zã 6:38) Yaa woto yĩng n kɩt t’a ra tar ninbãan-zoeer ne b sẽn da namsd-b rãmbã, naong rãmbã la yel-wẽn-maandbã. (Matɩe 9:36) A yeel-b lame: “Bɩ y wa mam nengẽ yãmb fãa sẽn yɛ la sẽn tʋkd zɩɩb sẽn yaa zɩsgo, la mam na kõ yãmb vʋʋsgo. Bɩ y rɩk mam nao wã n zãms bũmb nins mam sẽn na n wilg yãmbã. Tɩ bõe, mam yaa sũ-mar soaba la m yaa nin-naana la (m tara sik-m-meng sũuri, NW ).”—Matɩe 11:28, 29.
9 A Zezi wilga a karen-biisã tɩ tara yõod tɩ b rɩk togs-n-taar ne a nonglmã la a sik-m-mengã a sẽn wa n yeel-b tɩ: “Yãmb sã n nong taaba, neba fãa na n bãngame tɩ yãmb yaa mam karen-biisi.” (Zã 13:35) B ra na n welga toor ne dũni kãngã sẽn tar rat-m-yembrã. Yaa rẽ yĩng la a Zezi sẽn da tõe n yeel a karen-biisã wɛɛngẽ woto wã: ‘Bãmb ka dũniyã rẽnd ye.’ (Zã 17:14) Ayo, b pa maand togs-n-taar ne a Sʋɩtãan dũniyã sẽn tar wuk-m-meng la rat-m-yembrã ye. Walla tɩ yɩ woto, b rɩkda togs-n-taar ne nonglem la sik-m-meng ning a Zezi sẽn tallã.
10. Bõe la a Zeova maand ne sik-m-mens rãmbã tõnd wakatã?
10 Wẽnnaam Gomdã reng n togsame tɩ yaoolem day kãensã pʋsẽ, b ra na n tigma neb wʋsg ninsaalb lagem-n-taar a yembr pʋgẽ dũniyã gill zug nonglmã la sik-m-mengã maasem yĩnga. Woto, yaa dũni sẽn tar fõrb n kẽed wuk-m-meng pʋgẽ, la a Zeova sõgen dãmbã maand sẽn yaa lebend ne rẽ, n wilgd sik-m-meng yam. Nin-kãensã yetame: “Wa-y tɩ d kẽng Zusoaba tãng zugu [a sɩd balengã sẽn zẽkã] . . . tɩ b zãms tõnd bãmb soɛya, tɩ d tũ bãmb so-bugsi.” (Ezai 2:2, 3) Yaa a Zeova Kaset rãmbã n yaa nin-kãensã sẽn be dũniyã gill ninsaalb lagem-n-taar a yembr pʋgẽ n kẽnd Wẽnnaam soɛya zutã. ‘Kʋʋng kãseng sõor sẽn tar paasg ned sẽn ka tõe n sõd n sɛ sẽn yi soolem fãa, la buud fãa, la neb sẽn gomd goam toɛ-toɛya fãa’ n be a Zeova Kaset rãmbã sʋka. (Wilgri 7:9) Kʋʋng kãseng kãngã tara neb milyõ rãmb masã. Yaa wãn-wãn la a Zeova zãmsd-b tɩ b lebgd sik-m-mens rãmba?
D zãms sik-m-meng yam tallgo
11, 12. Wãn-wãn la Wẽnnaam sõgen dãmbã pukd sik-m-meng yam?
11 Wẽnnaam vʋʋsmã sẽn tʋmd a nin-sakdbã zutã kɩtdame tɩ b zãmsd n tõogd dũniyã yam wẽnga, la b wilg tɩ b tara Wẽnnaam vʋʋsmã biisi. Rẽ pukda ne zʋg-sõma kãensã: “Nonglom la sũ-noogo la laafɩ la sũ-mare la maan-neere la sũ-maasem la tẽebo la sũ-bʋgsem la yõk-m-menga.” (Galat dãmba 5:22, 23) Sẽn na yɩl n sõng Wẽnnaam sõgen dãmbã tɩ b bɩɩs zʋg-sõma kãensã, b sagend-b lame tɩ b ra yɩ “rat-m-yembr dãmba, n talld wags-taab yam ne taaba, n maand sũ-kiir ne taab” ye. (Galat dãmba 5:26, NW ) Woto me, tʋm-tʋmd a Poll yeelame: “Mam yeta ned kam fãa sẽn be yãmb sʋka t’a ra tags tɩ yẽ yaa sõama n yɩɩd sẽn zems ye. La bɩ yẽ tags ne gũus-m-meng wa sẽn zems[e].”—Rom dãmba 12:3.
12 Wẽnnaam Gomdã yeta kiris-nebã tɩ b ra maan “bũmb ba a yembre ne zabre wala wilg-m-meng ye, la bɩ ned kam fãa tẽ ne sik-m-meng yam tɩ neba fãa [Wẽnnaam sõgen dãmbã] yɩɩda yẽnda. Bɩ yãmb ned kam fãa da ges a meng yell bal ye, bɩ y ges taab yell me.” (Filip rãmba 2:3, 4) “Bɩ ned kam fãa ra bao a meng sõngr bal ye, la bɩ ned kam fãa bao a taab sõngr me.” (1 Korẽnt dãmba 10:24) N-yẽe, ‘nonglem kengda’ neb a taabã ne goam la tʋʋm sẽn pa pukd rat-m-yembre. (1 Korẽnt dãmba 8:1, NW ) A wata ne lagem-n-tʋme, pa wags-n-taar ye. Maam nand yamã pa tar a zĩig a Zeova sõgen dãmbã sʋk ye.
13. Bõe yĩng tɩ d segd n zãms sik-m-meng yam, la wãn-wãn la ned tõe n zãms-a?
13 Baasg zãnga, pa-zems-zãngã d sẽn dog ne wã kɩtame tɩ d pa rog ne sik-m-meng yam ye. (Yɩɩl Sõamyã 51:7) Rẽnda d zãms zʋg-sõng kãngã. La rẽ tõe n yɩɩ toog ne neb nins sẽn pa paam zãmsg a Zeova soayã pʋsẽ hal b yãadem wakate, n yaool n sak a zãmsgã kaoosg zugẽ wã. B zoe n tara zʋg sẽn yẽbg dũni kʋdr kãngã manesem zutu. Woto b segdame n zãms n “bas zʋg kʋdgã sẽn maand tɩ zems ne [b] pĩnd tʋʋm manesmã,” la b “yeelg zʋg paalgã b sẽn naan tɩ zems ne Wẽnnaam daabã tɩrlem la kɩs-sɩd hakɩk pʋgẽ wã.” (Efɛɛz rãmba 4:22, 24, NW ) Ne Wẽnnaam sõngre, pʋ-peelem dãmbã tõe n maana bũmb ning a sẽn baood tɩ b maanã: ‘Bɩ y paas ninbãan-zoeer wʋsgo la neerlem ne sik-m-meng (yam, NW ) la sũ-bʋgsem ne sũ-mare.’—Kolos rãmba 3:12.
14. Wãn-wãn la a Zezi gom n wilg tɩ bao n zẽk f meng pa sõma?
14 A Zezi karen-biisã ra segd n zãmsa rẽ. B sẽn da wa n lebg a karen-biisã tɩ b ra yaa kãsemba, n da tar dũniyã wags-n-taar yam. Bãmb sʋkã neb a yiib ma sẽn wa n kos naam a komdibli wã yĩngã, a Zezi yeelame: “Soolem toɛ-toɛya nanams maanda bãmb [nin-buiidã] pãnga, la tɩ nin-kãsems soo bãmba. A kõn yɩ woto yãmb sʋk ye. La ned ninga fãa sẽn dat n yɩ yãmb nin-kãsenga, bɩ a yɩ yãmb sõangda. La ned ninga fãa sẽn dat n yɩ yãmb kãsma bɩ yẽ yɩ yãmb yamba. Yaa woto yĩng la Ninsaal Biiga [a Zezi] wa-yã. Bãmb ka wa tɩ neb sõng bãmb ye, b waame n na n sõng nebã, la b kõ b vɩɩm tɩ yao neb wʋsg yĩnga.” (Matɩe 20:20-28) A Zezi sẽn wa n yeel a karen-biisã tɩ b ra tũnug ne naam yʋy n zẽk b mensã a paasame: “Yãmb fãa yaa ba-biisi.”—Matɩe 23:8.
15. Manesem bʋg la neb nins sẽn baood yel-gɛt tʋʋmdã segd n talle?
15 A Zezi karen-biig hakɩk yaa sõgena, n-yẽe, a yaa yamb a kiris-nin-taasã taoore. (Galat dãmba 5:13, NW ) Sẽn yɩɩd fãa, yaa woto ne neb nins sẽn dat n zems ne yel-gɛt tʋʋmd paoong tigengã pʋgẽ wã. B pa segd abada n maan wags-n-taar n bao taoor bɩ naam ye. B pa segd n ‘soog neb nins sẽn yaa Wẽnnaam rogem-pʋɩɩrã ne pãng ye, la b segd n yɩɩ mak-sõma n kõ bãmba.’ (1 Pɩɛɛr 5:3, NW ) Sɩda, rao sã n tar rat-m-yembr yam, yaa bũmb sẽn wilgd t’a pa zems ne a yɩ yel-gɛt ye. Ned a woto na n yɩɩ yell ne tigengã. Yaa sɩd tɩ zemsame tɩ ned ‘bao n paam yel-gɛt tʋʋmde,’ la rẽ ya a sẽn tʋll n sõgen kiris-neb a taabã yĩnga. Tʋʋm-kãnga pa taoor-sobend bɩ naam zĩig ye, bala neb nins sẽn tar yel-gɛtb tʋʋmdã segd n zĩnda tigengã neb nins sẽn tar sik-m-meng yam n yɩɩdã sʋka.—1 Tɩmote 3:1, 6, NW.
16. Bõe yĩng tɩ b puk a Diotrɛf bãong Wẽnnaam Gomdẽ wã?
16 Tʋm-tʋmd a Zã gomda ned sẽn da tall tags-kɛgr woto yell n yeele: “Mam gʋlsa koɛɛg bilfu n tʋm a Zezi tẽedbã, la a Diotrɛf sẽn nong n yɩ bãmb taoor soaba ka reegd tõnd (ne waoogr, NW ) ye.” Ra-kãngã talla paoogr manesem ne neb a taabã, sẽn na yɩl n lʋɩɩs a meng taoore. Sẽn yaa lebende, Wẽnnaam vʋʋsmã tusa a Zã t’a puk a Diotrɛf bãong n gʋls rẽ Biiblã pʋgẽ, a maam nand manesmã yĩnga.—3 Zã 9, 10.
Manesem sẽn zemsã
17. Wãn-wãn la a Pɩɛɛre, a Poll la a Barnabas wilg sik-m-meng yam?
17 Mak-sõma wʋsg n be Biiblã pʋgẽ sẽn tɩ loe ne manesem tɩrg la sik-m-meng yam tallgo. A Pɩɛɛr sẽn wa n kẽ a Korney roogẽ wã, ra-kãng “sega [a Pɩɛɛr] n lʋɩ a taoore n wõgemde.” La a Pɩɛɛr pa sak t’a waoog-a tɩ loog noor ye. “A Pɩɛɛr zẽka yẽnda n yeele: ‘Yik yĩngri, mam me yaa ninsaal bala.’ ” (Tʋʋma 10:25, 26) A Poll ne a Barnabas sẽn da wa n be Listrã, a Poll sãooga rao sẽn dog ne wobendo. Rẽ kɩtame tɩ kʋʋngã yeel tɩ tʋm-tʋmdb kãensã ra yaa wẽnnaam dãmba. Baasg zãnga, a Poll ne a Barnabas “kẽesa b fut n wudg n kẽ kʋʋnga sʋk n kelem n yeele: ‘Daopa, yaa bõe tɩ yãmb maand woto? Tõnd me yaa ninsaalb (ne zams, NW ) wa yãmb bala.’ ” (Tʋʋma 14:8-15) Kiris-nin-kãensã sẽn tar sik-m-mengã ra pa sak ziir sẽn yit ninsaalb nengẽ ye.
18. Ne sik-m-menga, yaa bõe la malɛk sẽn tar pãng yeel a Zã?
18 Tʋm-tʋmd a Zã sẽn da wa n paam ‘a Zezi Kirist wilgrã,’ ra yaa ne malɛk tũnugri. (Wilgri 1:1) Malɛk pãngã yĩng kɩtame tɩ d wʋmd bũmb ning sẽn kɩt t’a Zã yɛɛsã võore, bala malɛk a yembr da kʋʋ Asiri neb 185 000 yʋʋn-yɛnga. (2 Rĩm dãmba 19:35) A Zã yetame: “Mam sẽn wʋm la m yã wã, mam wõgemda malɛk ninga sẽn wilg maam bõn-kãensa taoore n na n waoog yẽnda. La yẽ yeela maam yaa: ‘Da maan woto ye. Mam yaa fo tʋmd-n-taaga la fo ba-biis . . . tʋmd-n-taaga . . . Waoog Wẽnnaam.’ ” (Wilgri 22:8, 9) Ad malɛg-kãngã sẽn tar pãngã sɩd wilga sik-m-meng yam tɛkẽ!
19, 20. Mak-y Rom soda-nanambsã zẽk-m-menga b tõogrã yĩngã, ne a Zezi sik-m-meng yamã n gese.
19 A Zezi ra yaa mak-sõng ning sẽn be rasãnd n yɩɩd sã n yaa ne sik-m-meng yamã wilgr wɛɛngẽ. A ra yaa Wẽnnaam Biribl yend a sẽn naanã, Wẽnnaam yĩngr Rĩungã beoog-daar Rĩma. A sẽn wilg a nin-buiidã n yeel tɩ yaa yẽ la woto wã, a pa maan wala Rom soda-nanambsã sẽn yaa tõogdbã sẽn da maand Rom naamã rɩɩb wakatã ye. Ra yaa gesr kãseng la b ra maand b yĩnga: neb wʋsg n da yãagd-ba, tɩ b rɩkd-b ne saar dãmb b sẽn nags ne sãnem la wob-yẽna, tɩ wed-mo-peels bɩ wobdo, bõn-yẽes bɩ ãbs meng n tat-ba. Yãagdba sʋka, reem-dɛɛmdb n da yɩɩnd tõogr yɩɩla, ne zirs sẽn pid ne zabr te-zaeedem la zir-yalems sẽn dɩk neb sẽn bilgd zabr yɛl n da be be. Rĩm dãmba, na-kombs la soda-nanambs ne b zags b sẽn yõg tɩ yaa yembse, b sẽn da nong n piit zaal sẽn na yɩl n ning b yãnd n da be be me. Yel-kãens ra pukda wuk-m-meng la zẽk-m-menga.
20 Ges-y tɩ woto yaa toor fasɩ ne makr ning a Zezi mengã sẽn kõ wã. A ra saka ne sik-m-meng n na n pids bãngr-gomd ning b sẽn da reng n togs woto yẽ wɛɛngẽ wã, sẽn yet tɩ: “Gese, yãmb dĩma wata y nengẽ. Bãmb yaa tɩrga, bãmb yaa tõogr soaba. Bãmb zomba bõn-bil . . . ne sik-m-meng n watẽ.” A zomba bõang ne sik-m-menga, la pa saar rũms sẽn be rasãnd la ziir sẽn da tat ye. (Zakari 9:9; Matɩe 21:4, 5) Ad sik-m-mens rãmbã sũy sɩd nooma wʋsg b sẽn paam t’a Zeova na n yãk a Zezi t’a yɩ tẽngã gill Rĩm dũni paalgã pʋgẽ wã, ned sẽn sɩd tar sik-m-meng yam, nonglem, ninbãan-zoeer la a yaa sugr-kõatã!—Ezai 9:5, 6; Filip rãmba 2:5-8.
21. Bõe la sik-m-meng yamã pa wilgdi?
21 A Zezi, a Pɩɛɛre, a Poll la roap ne pagb a taab sẽn yɩ neb sẽn tall tẽeb Biiblã gʋlsg wakatã sẽn da tar sik-m-meng yamã kɩtdame tɩ d ra ning d yamẽ wã tɩ sik-m-meng yaa pãn-komslem ye. Sẽn yaa lebend ne rẽ, sik-m-mengã wilgdame tɩ f yaa raoa, bala nin-kãensa ra yaa neb sẽn tall raood la yẽesem. B tõoga toog mak-toos pʋsẽ, ne raood la sũ-keelem sẽn yaa kãsenga. (Hebre dãmba, sak 11) Rũndã-rũndã me, a Zeova sõgen dãmbã sã n tar sik-m-meng yam, b tara nin-kãensã pãngã buudu, bala Wẽnnaam teenda sik-m-mens rãmbã ne a vʋʋsem sõngã sẽn tar pãngã. Yaa woto yĩng la b sẽn sagend tõnd woto wã: “Bɩ yãmb fãa sak taab ne sik-m-menga; tɩ bõe, ‘Wẽnnaam kɩɩsda tɩtaam dãmba, la bãmb ningda sik-m-mens rãmba zut barka.’ Dẽ yĩnga, bɩ y sik yãmb mens Wẽnnaam sẽn yaa pãng soaba taoore, tɩ wakat sã n ta bãmb na zẽk yãmba.”—1 Pɩɛɛr 5:5, 6; 2 Korẽnt dãmba 4:7.
22. Bõe zug la d na n sõs sõsg ning sẽn pʋgdã pʋgẽ?
22 Sik-m-meng yamã tara neng a to sẽn yaa sõma Wẽnnaam sõgen dãmbã sẽn segd n bɩɩse. Ya a soab ning sẽn sõngd wʋsg tɩ d bɩɩs nonglem la lagem-n-tʋm yam tigimsã pʋsẽ wã. Sɩda, a yaa bõn-kãseng sẽn sõngd n wat ne sik-m-meng yamã. D na n sõsa rẽ zug sõsg ning sẽn pʋgdã pʋgẽ.
Lebg-n-gese
◻ Bilg-y dũni kãngã yam ning sẽn piuug n yɩɩdã.
◻ Wãn-wãn la a Zeova ningd neb nins sẽn tar sik-m-meng yamã barka?
◻ Bõe yĩng tɩ d segd n zãms sik-m-meng yamã?
◻ Neb kẽer bʋs n yaa mak-sõma sẽn tɩ loe ne sik-m-meng yamã wilgr tɩ b gom b yell Biiblã pʋgẽ?
[Caption on page 25]
Malɛkã yeela a Zã: “Da maan woto ye. Mam yaa fo tʋmd-n-taaga”