Kom-bɩɩse, Kɩɩs-y Dũniyã Vʋʋsem
“Masã pa dũniyã vʋʋsem la tõnd paamẽ ye, la yaa vʋʋsem ning sẽn yit Wẽnnaam nengẽ wã.”—1 KORẼNT DÃMBA 2:12, NW.
1, 2. a) Bõe welgr la d tõe n yã kom-bɩɩs nins sẽn be dũniyã pʋgẽ wã la kom-bɩɩs nins sẽn be a Zeova Kaset rãmbã tigims pʋsẽ wã sʋka? b) Zĩ-bʋg wɛɛngẽ la b tõe n sɩd pẽg kom-bɩɩs wʋsg sẽn yɩɩd sẽn yaa Kaset rãmba sõma-sõma?
“TÕND zãmaan-paalgã komsa raoodo, b bas-b lame, la b bee tõdgr pʋgẽ.” Yaa woto la Ostrali Sun-Herald zʋrnallã yeel-yã. A paasa woto: “Bʋ-kaoor vaees-n-gɛsg wilgdame tɩ [b sã n mak ne yʋʋmd ning sẽn da loogã] kom-bɩɩs nins b sẽn ning taal nin-kɛglem tʋʋm sẽn pa reem yellã yĩng paasa 22 koabg zugu . . . Kambã kʋʋda b mense, tɩ sẽn sɩng ne yʋʋmd 1965 wã, sõor kãng paasa naoor a tãabo . . . La zãmaan dãmbã manesem sẽn pa yembrã lebga wa bog-kẽeng kom-bɩɩsã sẽn lʋɩt a pʋgẽ. Bãmb sõor wʋsg sẽn paasd sɩngd n kẽeda dorge, rãam la halk-m-meng pʋgẽ tɩ b yĩmd b yelle.” Baasg zãnga, yel-kãngã pa tek tẽn-yɛng ye. Dũniyã gill zugu, roagdba, karen-saam dãmb la yam gãand bãan logtoɛɛmbã sũy sãamda ne kambã sẽn be yɛl nins pʋsẽ wã.
2 Ad sɩd yaa welgr kãseng meng n be rũndã-rũndã kom-bɩɩsã wʋsg sẽn yɩɩda, la kom-bɩɩs nins sẽn yaa sõma sẽn be a Zeova Kaset rãmbã tigims pʋsẽ wã sʋka! Pa tɩ bãmb zemsa zãng ye. Bãmb me maooda ne bũmbu, yaa “yãadem datem wẽnga.” (2 Tɩmote 2:22) La kom-bɩɩs kãensã wʋsg sẽn yɩɩd rɩka sard ne raood n na n maan sẽn yaa tɩrg la b ra sak tɩ dũniyã weoogr tõog-b ye. Kom-bɩɩse, tõnd pẽgda yãmb fãa, y sẽn tõogd zabrã ne a Sʋɩtãan ‘sɩlma fãa’ wã! (Efɛɛz rãmba 6:11) Wala tʋm-tʋmd a Zã d yetame: “Kom-bɩɩse, mam gʋlsda yãmba; tɩ bõe, yãmb tara pãnga la Wẽnnaam goama bee yãmb pʋsẽ la yãmb tõoga wẽng soaba.”—1 Zã 2:14.
3. Gom-biig ning sẽn yaa “vʋʋsmã” tõe n dat n yeelame tɩ bõe?
3 Baasg zãnga, y sã n dat n ket n tõogd zabrã ne wẽng soabã, y segdame n mao sõma-sõma n kɩɩs Biiblã sẽn boond bũmb ning tɩ “dũniyã vʋʋsmã.” (1 Korẽnt dãmba 2:12, NW ) Sã n yaa ne bãngr sebr a yembr sẽn tɩ loe ne Gerɛk buud-gomdã, “vʋʋsem” tõe n dat n yeelame tɩ “tagsg bɩ pãn-tusdg ning sẽn pit la a so ned sɩɩgã.” Wala makre, y sã n ges tɩ ned tara zʋg-wẽnse, y tõe n yeelame t’a tara “vʋʋsem” wẽnga. Yãmb “vʋʋsmã,” sẽn yaa y tagsgã, bɩ y sẽn nong n tagsd n lebd zĩig ningã tara pãn-tusdg yãmb sẽn yãkd n na n maan yɛl ninsã zutu. A tara pãn-tusdg y tʋʋmã la y goamã zutu. Bũmb sẽn be yaa tɩ nebã yembr-yembr la nebã sul tõe n puka “vʋʋsem.” Tʋm-tʋmd a Poll gʋlsa kiris-neb sull woto: “Bɩ Soaal a Zezi Kirist sõmblmã d sẽn pa segd ne wã zĩnd ne vʋʋsem ning y sẽn tarã.” (Fɩlemo 25, NW ) Rẽ, yaa vʋʋsem bʋg meng la dũni kãngã sẽn pukdã? Sẽn mik tɩ “dũniyã fãa bee wẽng soaba nugẽ” wã, a Sʋɩtãan Munaafɩɩka kɩtame tɩ dũniyã vʋʋsem pa tõe n yɩ sõma ye, bɩ bõe?—1 Zã 5:19.
D bãng dũniyã vʋʋsem
4, 5. a) Vʋʋsem bʋg n da tall pãn-tusdg Efɛɛz neb nins sẽn da be kiris-neb tigingã pʋgẽ, nand tɩ b lebg kiris-nebã zutu? b) Ãnd la “pemsmã zu-sobend naabã,” la “pemsmã” yaa bõe?
4 A Poll gʋlsame: “Sẽn paase, yaa yãmb la Wẽnnaam kɩt tɩ y lebg vɩɩse, baa ne yãmb sẽn da ki y kongrã la y yel-wẽna pʋsẽ wã, yãmb sẽn da kẽnd b pʋsẽ pĩndã tɩ zems ne dũni kãngã yɛl siglgã, tɩ zems ne pemsmã zu-sobend naabã, vʋʋsem ning sẽn tʋmd kɩɩsgã komdibli pʋsẽ wã. N-ye, bãmb sʋkã, pĩnda tõnd fãa talla manesem sẽn zems ne tõnd yĩngã tʋlsem wẽnse, n maand bũmb nins nemsã la tagsa wã sẽn datã, la wa sẽn zems ne rẽ, tõnd ra yaa sũ-yikr kamb wa neb a taabã.”—Efɛɛz rãmba 2:1-3, NW.
5 Sẽn deng tɩ b bãng kiris-nedemdã sore, kiris-neb nins sẽn be Efɛɛzã ra tũuda “pemsmã zu-sobend naabã,” a Sʋɩtãan Munaafɩɩk n pa miẽ ye. ‘Pemsem’ kãng pa zĩig sɩd-sɩd a Sʋɩtãan la a zĩn dãmbã sẽn beẽ ye. A Poll sẽn da wa n gʋlsd gom-kãensa wã t’a Sʋɩtãan Munaafɩɩk la a zĩn dãmbã ra ket n tõe n kẽnga yĩngri. (Mak-y ne Zoob 1:6; Wilgri 12:7-12.) Gom-biig ning sẽn yaa “pemsmã” rat n yeelame tɩ vʋʋsem, bɩ tagsg manesem sẽn so a Sʋɩtãan dũniyã. (Mak-y ne Wilgri 16:17-21.) Wala pemsmã sẽn gũbg tõndã, vʋʋsem kãng bee zĩig fãa.
6. “Pemsmã zu-sobend” yaa bõe, la wãn-wãn la a pukd kom-bɩɩs wʋsg zutu?
6 La “pemsmã zu-sobend” yaa bõe? Vẽenega, rẽ tɩ loee ne pãn-tusdg sẽn yaa kãseng ning ‘pemsem’ kãng sẽn tar nebã zutã. A Poll yeelame tɩ vʋʋsem kãng “tʋmd[a] kɩɩsgã komdibli pʋsẽ.” Woto, dũniyã vʋʋsem wata ne kɩɩsg la tõdgr vʋʋsem, la f taabã weoogr yaa manesem a yembr zu-sobend kãngã sẽn tʋmde. A Zeova Kaset soab sẽn yaa bipugl yeela woto: “F sã n be lekolle, wakat fãa neba fãa tusd-f lame tɩ f yɩ tõat buudu. Kambã waoogd-f lame n yɩɩda, f sã n maan bũmb sẽn wõnd tõdgr tʋʋmde.”
Dũniyã vʋʋsem pukri
7-9. a) Sõdg-y manesem a wãn dũniyã vʋʋsem sẽn pukdẽ kom-bɩɩsã sʋk rũndã-rũndã. b) Yãmb yãa bõn-kãensã y sẽn beẽ wã bɩ?
7 Dũniyã vʋʋsem pukr kẽer kom-bɩɩsã sʋk rũndã-rũndã la bʋse? Yaa pʋ-likã la tõdgrã. Zʋrnall a yembr vaeesg yetame tɩ etidiã rãmb sẽn yɩɩd 70 koabg zug n yeel tɩ b ra maana zãmb b kolɛɛsã kareng wakat n paam põe rãmba. Paoogr goama, yaalg goam la gom-dẽgdã me bee zĩig fãa. Yaa sɩd tɩ ne neb kẽere, wõnda vugri, a Zoob la tʋm-tʋmd a Poll tũnuga ne yaalg goam sẽn na yɩl n wilg sũ-sãoong sẽn zemse. (Zoob 12:2; 2 Korẽnt dãmba 12:13) Baasg zãnga, yaalg goam sẽn pukd toom sẽn yit kom-bɩɩs wʋsg noyẽ wã nong n yaa yembr ne gom-wẽnse.
8 Maan-tɩ-loog reemã wɛɛngẽ wã me yaa dũniyã vʋʋsem pukri. Kom-bɩɩs boat de nui rãmba la sao tɩ beoog vẽegã,a la yõ-noogr wʋsg buud a taabã yaa bũmb sẽn wɛ kom-bɩɩsã sʋka. Maan tɩ loog futã ningr la mengã manegr wɛɛngẽ wã me yaa bũmb sẽn be zĩig fãa. Kom-bɩɩsã sẽn ningd fut modɛll sẽn yaa yonglg tɩ loog bɩ b tar manesem sẽn ka neer wala yĩngã zĩis kẽer võy poobo, kɩtame tɩ kom-bɩɩs wʋsg tar dũniyã tõdgr vʋʋsem rũndã-rũndã. (Mak-y ne Rom dãmba 6:16.) Maan yɩɩr ne laogã yaa dũniyã vʋʋsem pukr a to. Sã n yaa ne zʋrnall sẽn get wubrã yelle, “sẽn baood-b raagã tũnugda ne manesem wʋsg sẽn tar pãng n na n nek kambã ratem tɩ b tʋlg te-koosdmã wʋsgo.” Etazĩni, kom-bɩɩsã ne b wa yet tɩ b na n paama b bakã tɩ b zoe n gesa piblisite kɩbay 360 000 televiziõ wã pʋgẽ. Y taabã tõe n pẽdg-y lame me tɩ y ra-ba. Ad yʋʋm 14 bipugl sẽn yeele: “Wakat fãa ned fãa sʋkd-f-la woto: ‘Fo pilovɛɛrã, f vɛstã bɩ f ginnã yaa mark bʋgo?’ ”
9 Hal Biiblã gʋlsg wakate, mizik sẽn pa sõma wã yɩɩ bũmb a Sʋɩtãan sẽn tũnug ne n tus nebã tɩ b tall manesem dẽgdo. (Mak-y ne Yikri 32:17-19; Yɩɩl Sõamyã 69:13; Ezai 23:16.) Rẽnd pa lingri, tɩ mizikã sẽn nekd pag ne rao lageng ratem, pa gũus meng bɩ b gomd a yell vẽenega, n tɩ loe ne yɩɩl goama, gom-dẽgd la yɩɩl sẽn pukd maan-tɩ-loog sẽn wat ne zuglem-zuglem saoogã yaa bũmb sẽn wɛ ye. La dũni kãngã vʋʋsem sẽn yaa rẽgdã pukr a to yaa yoobã. (1 Korẽnt dãmba 6:9-11) Zʋrnall a yembr (The New York Times) yetame: “Ne kom-bɩɩs wʋsgo, yaa wa yoobã yaa bũmb b sẽn dengd n maan tɩ b taabã yaool n sak-ba . . . Kolɛɛs karen-bi-bɛdã sʋka, sẽn yɩɩd neb a yiib tãab zug maana pag ne rao lagengo.” Zʋrnall a yembr (The Wall Street Journal) sõdga kaset sẽn wilgd tɩ kamb sẽn zems yʋʋm a 8 n digd yʋʋm 12 “maanda pag ne rao lageng n paasdẽ.” Karen-biis sagend sẽn dɩk retrɛt yeela woto sẽn pa kaoose: “D sɩngame n yãt kompugli kẽer sẽn be cm sẽn dɩkd pʋse.”b
Zãgs-y dũniyã vʋʋsem
10. Wãn-wãn la kom-bɩɩs kẽer sẽn be kiris-neb zagsẽ sak dũniyã vʋʋsem?
10 Kom-bɩɩs kẽer sẽn yaa kiris-neb saka dũniyã vʋʋsem tɩ yaa wẽng wʋsgo. Zapõ bipugl a yembr yeela woto: “M da tara manesem sẽn be rasãnd m roagdbã la kiris-nin-taasã taoore. La m da solg n tʋmda wẽng me.” Bipugl sẽn yit Kenya yeela woto: “Wakat n zĩnd tɩ m da solgd n maand wẽnga. Tɩ seg kom-bɩɩs a taab n deema, mizik rokã la tall zo-wẽnsã ra bee rẽ sʋka. M da miimi tɩ yaa wẽngã, la m modga m meng n da tags rẽ zugu, n tẽed tɩ wakat n da na n wa tɩ m base. La m pa bas ye. La wa n yɩɩ wẽng n paase.” Bi-bɩɩg a to sẽn yit Alemayn yeelame: “Fãa sɩnga ne m sẽn da tar zo-wẽnsã. Rẽ m sɩnga sɩgaar yũubu. M da ratame tɩ zab m roagdbã, la ra yaa m meng la m maanda.”
11. Wãn-wãn la a Kalɛɛb tõog n pa sak n maan wa kʋʋngã, tẽn-gũusdb piigã sẽn wa n wa ne kɩba-wẽnsã?
11 Ne rẽ fãa, d tõe n kɩɩsame, n-ye, n zãgs dũniyã vʋʋsem. Ges-y a Kalɛɛb makrã pĩnd wẽndẽ wã. Tẽn-gũusdb piigã sẽn yaa ka-bark rãmbã sẽn wa ne kɩba-wẽngã Kãabg Tẽngã wɛɛngẽ wã, yẽ ne a Zozue pa sak tɩ b kẽes-b rabeem tɩ b maan wa kʋʋngã ye. B togsa woto ne raoodo: “Tẽng ninga tõnd sẽn tɩ gesa yaa sõama wʋsgo. Zusoaba sã n nong tõndo, b na n talla tõnd tɩ d kẽng tẽng ninga sẽn tar bĩisim ne sɩɩd wʋsga pʋgẽ.” (Sõdbo 14:7, 8) Yaa bõe n kɩt t’a Kalɛɛb yals kãn-kãe weoogr kãnga taoore? A Zeova yeelame t’a Kalɛɛb “tara vʋʋsem toore.”—Sõdbo 14:24, NW.
D wilg “vʋʋsem toore”
12. Bõe yĩng tɩ tar yõod tɩ d wilg “vʋʋsem toor” d goamã pʋgẽ?
12 Rũndã-rũndã, rẽnda f tall raood la pãng n wilg “vʋʋsem toore,” bɩ tagsg manesem sẽn yaa toor ne dũniyã rẽnda. Manesem a yembr y sẽn tõe n tũnug n maan woto yaa y sẽn na n lak y meng ne yaalg la paoogr goama. Bũmb sẽn nekd ratem yaa tɩ farend gomd ning sẽn yaa “sarcasme” b sẽn lebg ne moor tɩ “yaalg goamã” yita Gerɛk gom-biigẽ sẽn dat n yeel vẽeneg-vẽeneg tɩ “rũm wa baaga.” (Mak-y ne Galat dãmba 5:15, NW.) Wala baag yẽnã sẽn tõe n yãgs kõbr nemdã, “kʋʋsem” sẽn yaa yaalg tõe n yãka neb a taabã burkĩndlem. La Kolos rãmba 3:8 sagend-y lame tɩ “y bas bõn-kãens fãa sẽn yaa sũ-puugri, kisgri, pʋtoogo, kãnegre, la gom-dẽgd sẽn yit yãmb noeyã pʋsẽ” wã. Tɩ Yelbũna 10:19 yetẽ: “Ned sã n gomd wʋsgo, a ka tõe n ka kong ye. Ned sã n gũusd ne a goama a tara yam.” Ned sã n tʋʋs yãmba, bɩ y tall yõk-m-meng n ‘wẽnemd y yɛgdg a to wã,’ tõe tɩ y na n maaga y yĩng n gom ne a soabã ne bãan la laafɩ yãmb ne yẽ sʋk bala.—Matɩe 5:39; Yelbũna 15:1.
13. Wãn-wãn la kom-bɩɩsã tõe n wilg kɩls tɩ zems laogã wɛɛngẽ?
13 Manesem a to d sẽn na n tũnug n wilg “vʋʋsem toor” yaa d sẽn na n tall kɩls tɩ zems laogã wɛɛngẽ. Yaa sɩda, d sã n dat bõn-neeba yaa bũmb sẽn zemse. A Zezi Kirist mengã ra tara baa yaa fu-yɛng sẽn yaa sõma wʋsgo. (Zã 19:23, 24) Baasg zãnga, teedã paoong sã n wa lebg gĩi tɩ loog tɩ y kot y roagdbã wakat fãa tɩ b ra bõn-yood b sẽn sɩd pa tõe n paam n kõ-yã, bɩ y sã n dat bal n dɩk y kom-bɩ-taasã togs-n-taare, rẽnd dũniyã vʋʋsem tara zu-sobend yãmb zug n yɩɩd y sẽn tagsdã. Biiblã yetame: “Bũmb nins fãa sẽn be dũniyã n yaa yĩng ratem wẽnga la nin datem wẽnga ne tɩtaama ka yit tõnd Ba nengẽ ye. Bãmb yaa dũniyã rẽnda.” N-yẽe, ra sak-y dũniyã sẽn nong laogã vʋʋsem zu-sobend ye! Zãms-y n sek y mens ne y sẽn tarã.—1 Zã 2:16; 1 Tɩmote 6:8-10.
14. a) A Ezai wakatã, wãn-wãn la Wẽnnaam nin-buiidã wilg kɩls tɩ zems kaalem ne reemã? b) Yel-bʋs la kom-bɩɩs sãnda sẽn yaa kiris-neb yã kom-bɩɩs boat de nuit rãmbã la gãeem saoogẽ wã?
14 Tall reemã a zĩigẽ wã me tara yõodo. No-rɛɛs a Ezai togsame: “Toog bee ne neb nins zut sẽn yikd yibeoog pĩnd n baood dãam sẽn yilimd nengã, la sẽn yũud zaabre n kaoosdẽ hal t’a yilimd b nensã. Pends ne ruudsi la sɩlsags ne wɩɩse la rãam bee bãmb kibsa zĩisẽ, la b ka nand Zusoaba tʋʋma ye. Bãmb ka yãt bũmb nins Zusoaba nus sẽn maanda ye.” (Ezai 5:11, 12) Zu-bʋko, kom-bɩɩs kẽer sẽn yaa kiris-neb kẽesa b mens reem-wẽns a woto pʋsẽ. B sẽn kos kiris-neb sẽn yaa kom-bɩɩs sull tɩ b bilg bũmb ning sẽn maand kom-bɩɩsã boat de nui rãmbẽ wã, saam-bi-poak a yembr yeelame: “Wakat fãa yaa zab bala. Mam mengã wa n zĩnda a pʋgẽ.” Saam-biig a to sak n deegame: “Nebã yũud n suudame. B maanda wa yalemba! Tɩ dorg rãmb beẽ. Bõn-wẽns wʋsg n maande. F sã n kẽng be n tẽed tɩ pa na n mad-fo f belgda f menga.” Rẽnd yaa wa sẽn zems la Biiblã gomd kibs wẽnsã bɩ “gãeem saoogã” yell n yetẽ tɩ b yaa “yĩnga ratem” neng a yembre.—Galat dãmba 5:19-21, Byinton; Rom dãmba 13:13.
15. Tags-bʋg sẽn kɩls tɩ zems la Biiblã kõt reemã zugu?
15 Y sã n lak y mens ne reem sẽn yaa wẽnga, pa rat n yeel tɩ y ye pa tõe n paam sũ-noog vɩɩmã pʋgẽ ye. Tõnd balemda “sũ-noog Wẽnnaam” sẽn dat tɩ y vɩɩmd ne sũ-noog y bi-bɩɩlmã wakate! (1 Tɩmote 1:11, NW; Koɛɛg Soaba 11:9) La Biiblã keoogda woto: “Ned sã n nong sũ-noogo [“reem,” Lamsa] a na n yɩɩ naong soaba.” (Yelbũna 21:17) Yãmb sã n maan tɩ reemã yɩ bũmb ning sẽn tar yõod n yɩɩd yãmb vɩɩmã pʋgẽ wã, y na n zĩnda tẽeb kom pʋgẽ. Woto yĩnga, tũ-y Biiblã noy y reemã yãkr pʋgẽ. Manesem wʋsg n be y sẽn tõe n noog y sũur tɩ y keng-y tẽebã wɛɛngẽ la ra sãam-y ye.c—Koɛɛg Soaba 11:10.
16. Wãn-wãn la kom-bɩɩs nins sẽn yaa kiris-nebã wilgd tɩ b yaa toore?
16 Y sã n tar maan-tɩ-zems y fu-yerdɩ wã la y mengã manegr pʋgẽ, n zãgsd dũniyã mood dãmba, rẽ na n kɩtame tɩ y yɩ toor me. (Rom dãmba 12:2; 1 Tɩmote 2:9) Woto yĩng bɩ y tũus mizik nins y sẽn na n kelgã ne gũusgu. (Filip rãmba 4:8, 9) Bipugl a yembr sẽn yaa kiris-ned yeela woto: “Mam tara mizik m sẽn mi tɩ m segd n lobame, la a nooma wʋsgo!” Bi-bɩɩg a to me sak n deega woto: “Sã n yaa ne maam, mizikã yaa bẽdgo, bala mam nong-a lame. Mam sã n yã bũmb sẽn pa sõma be, bɩ mam roagdbã sã n yeel maam tɩ m gũusi, rẽnda m sɩd modg m yamã n tõog m sũurã, bala mam nonga mizik kãngã sõma-sõma.” Kom-bɩɩse, bɩ y ra “zɩ Sʋɩtãana sɩlem ye”! (2 Korẽnt dãmba 2:11) A tũnugda ne mizikã n maan a sẽn na maaneg fãa n gõdg kom-bɩɩs nins sẽn yaa kiris-nebã tɩ b bas a Zeova! Sõss n puk Gũusg Gasgã sɛbẽ sẽn gomd rap, hɛvi metal la mizik rok altɛrnatiiv yelle.d Baasg zãnga, Sosiete Wats Tawa sɛbã pa tõe n gom mizik paalg buud fãa sẽn puk yell ye. Woto yĩnga, y segd n tʋma ne “tagsgã tõog” la “yam-welgrã,” y sã n wa yãkd miziki.—Yelbũna 2:11, NW.
17. a) Porneia yaa bõe, la bõe tʋʋm n be a pʋgẽ? b) Wẽnnaam daabã yaa bõe, sã n yaa ne vɩɩm manesmã yɛl wɛɛngẽ?
17 Sẽn na n baase, y segd n talla y mengã yɩlemd vɩɩm manesmã wɛɛngẽ. Biiblã sagenda woto: “Bɩ y zoe yoobo.” (1 Korẽnt dãmba 6:18) Gerɛk sɩngr gom-biig ning b sẽn lebg ne yoob sẽn yaa porneia wã tɩ loee ne poglmã bɩ raoolmã rɩk-n-tʋm fãa sẽn pa zems sẽn maand tɩ pa kãadem pʋgẽ ye. Raoolmã bɩ poglmã mogsg bɩ b saleng bee rẽ sʋka. Kom-bɩɩs kẽer sẽn yaa kiris-neb talla manesem kãngã, n tagsdẽ tɩ b ra pa maand yoob ye. Baasg zãnga, Wẽnnaam Gomdã yeta woto vẽenega: “Wẽnnaam sẽn data yaa tɩ yãmb dɩk yãmb mens n kõ bãmba; la y ra maan yoob ye. Bɩ yãmb ned kam fãa bãng n tall a yĩng ne pʋ-peelem la waoogre.”—1 Tesalonik rãmba 4:3, 4.
18. a) Wãn-wãn la bi-bɩɩg tõe n maan tɩ dũniyã vʋʋsem da bẽeg-a? b) Bõe yell la d na n gom sõsg ning sẽn pʋgdã pʋgẽ?
18 N-yẽe, ne a Zeova sõngre, dũniyã vʋʋsem tõeeme n pa bẽeg-y ye! (1 Pɩɛɛr 5:10) Baasg zãnga, naoor wʋsgo, a Sʋɩtãan solgda a bẽd-kʋʋdsã, la wakat ninga rɩlla f tall yam-welgr hakɩk n tõog n bãng tɩ yaa yelle. Tõnd sõsg ning sẽn pʋgdã yaa sẽn na yɩl n sõng kom-bɩɩsã tɩ b bɩɩs b yam-welgrã tõodo.
[Footnotes]
a Soaare dãnsãnt rãmbã nong n kaoosda yʋngã tõre. Y sã n dat n bãng n paas bɩ y ges “Les jeunes s’interrogent: . . . Les raves: un amusement sans danger?” sẽn be yʋʋmd 1997, yʋʋm-sar kiuug rasem 22 Réveillez-vous! wã pʋgẽ.
b Kompugli sẽn zems yʋʋm 11.
c Y sã n dat sagls bɩ y ges Les Jeunes s’interrogent: réponses pratiques sebrã seb-vã-neng 296-303.
d Ges-y yʋʋmd 1993 Gũusg Gasgã (farende), tʋʋl-nif kiuug rasem 15.
Lebg-n-ges sʋgsgo
◻ “Dũniyã vʋʋsem” yaa bõe, la wãn-wãn la a tar “zu-sobend” nebã zutu?
◻ Dũniyã vʋʋsem pukr kẽer kom-bɩɩsã sʋk rũndã-rũndã yaa wãn to-to?
◻ Wãn-wãn la kom-bɩɩs nins sẽn yaa kiris-nebã tõe n wilg “vʋʋsem toor” sã n yaa ne goamã la reemã wɛɛngẽ?
◻ Wãn-wãn la kom-bɩɩs sẽn yaa kiris-nebã wilgd “vʋʋsem toor” sã n yaa ne vɩɩm manesmã la mizikã wɛɛngẽ?
[Picture on page 15]
Kom-bɩɩs wʋsg wilgda ne b tʋʋmã tɩ b bee dŨniyã vʋʋsem “zu-sobend” pʋgẽ
[Picture on page 16]
Yãk-y y mizikã ne gũusgu
[Picture on page 17]
Rɩlla f tall raood n kɩɩs dũniyã vʋʋsem