D sak Biiblã sẽn yet bũmb ning kʋyã wɛɛngẽ wã—Babg a 2 Bĩng-yã

Kʋʋrã fuugu

1. Bõe n kɩt tɩ kʋʋrã fuug yaa toor ne fuug ning d sẽn yeelgd n kẽnd zĩis a taabã?

¹ Ned sã n ki, naoor wʋsgo nebã gũudame t’a zakã rãmba, a roagdbã, la a zo-rãmbã yeelg kʋʋr fuugu. Bãng-y tɩ kʋʋrã fuug pa tõnd raasenkam futã ye. Yaa fuug b sẽn yeelgd kʋʋr yĩng bala. B sẽn boond fu-kãngã to-to wã toeemdame, bala bee ne sẽn yaa buud ningã.

2. a) B ra maanda botã ne bõe, la b ra ningd-a-la sasa bʋgo? b) B ra ningda botã tẽeb ziri yĩng bɩ?

² Neb kẽer tagsdame tɩ botã pĩnd wẽndẽ nebã sẽn da yeelgdã ne kʋʋrã fuug b sẽn yeelgd Afirik zĩis sãnda rũndã-rũndã wã yaa yembre. Yaa sɩd tɩ b ra mi n dɩkda botã n sẽt fut tɩ kiid neb ningdẽ, la nebã ra yeelgda fu-kãens sasa a taab me. B ra wʋgda botã ne bʋʋs kõbdo, n da tar n maand kord la yond nins sẽn suiid ki wã. Pĩnd wẽndẽ wã, pe-kɩɩmbã ra yeelgda fut sẽn maan ne boto, bala b ligd ra pa toogo, la pa sãamd tao-tao me ye. Neb kẽer da yeelgda bot sẽn na yɩl n wilg tɩ b teka yam n kot sugri. (1 Rĩm 21:27; Zon. 3:6-8) A Daniɛll sẽgna bot n pʋʋs a Zeova ne a sũur fãa. (Dan. 9:3) Wẽnnaam no-rɛɛsdb sãnda ra nong n ningda boto, b sã n da rat n togs koɛɛg n keoog neba. (Ezai 20:2) Sẽn yaa a soab fãa, Wẽnnaam nin-buiidã zɩ n ning bot b sẽn tẽed tɩ sẽn ki-bã tara sɩɩg bɩ b bee zĩig a to yĩng ye. La yaa bõe n kɩt tɩ nebã ningd kʋʋr fut rũndã-rũndã?

3. a) Kʋʋrã fut nong n yaa kulɛɛr bʋse? b) Kʋyã fut sɩnga yɛɛnẽ? d) Fu-miuugã, fu-sablgã, fu-peellã bɩ fu-bʋla wã ningr võor yaa bõe?

³ Nebã yeelgda kʋʋr fuug sẽn na yɩl n wilg b sũ-sãamse. Fu-kãens kulɛɛr la b sẽn sẽ-b to-to wã tara võor pĩnd wẽndẽ tũudum wʋsg pʋsẽ. Tõe n wilgda kiidã sẽn da yaa ned ninga, la rogem wall zood ning sẽn be kiidã ne sẽn ning-b futã sʋka. Wala makre, zĩis kẽere, kiidã zakã rãmb ningda fu-miidu. B tẽedame tɩ rẽ yaa tɩlae, sẽn na yɩl tɩ kiidã ra tũnug ne rogmã sẽn be bãmb sʋkã n maan-b wẽng ye. Neb kẽer ningda fu-sabla. Zĩis wʋsgo, b tẽedame tɩ fu-sablã kogenda nebã ne zĩn-dãmb la kinkirsi. B leb n tẽedame tɩ rẽ yaa tɩlae, sẽn na yɩl tɩ kiidã ta a yaab rãmbẽ. Kẽer ningda fu-peelse, bɩ sẽn yaa bʋla, tɩ rẽ me tar võore. Ne neb wʋsgo, fu-peellã wilgdame tɩ kũumã pa tar pãng b zugu, la tɩ kiidã neb tʋllame tɩ kiidã tɩ vɩɩmd ne laafɩ a yaab rãmbẽ.

4. a) B mi n ningda kʋʋrã fuug n tãag wakat bʋgo? b) Bõe yĩng tɩ neb kẽer toeemd kʋʋr futu?

⁴ Kʋʋrã loogr poore, b tõe n ninga kʋʋrã fuug daar a ye bɩ rasem a wãn wall kiis menga, pa rẽ bɩ yʋʋmd tõre, bɩ sẽn yɩɩd rẽ. La rẽ bee ne rogem wall zood ning sẽn be kiidã ne sẽn ning-a fuugã sʋka. Kʋʋrã sasa, ned fãa tõe n toeema a kʋʋr fuugu. B tõe n pidga fu-sablg n ning fu-miuugu, wall kulɛɛr a to. B maanda woto sẽn na yɩl n wilg tɩ rogem wall zood ning sẽn be b sʋkã na n kell n talla pãng wakat fãa. Wala makre, pʋg-kõor tõe n ninga fuug kulɛɛr ninga, sẽn na yɩl t’a sɩdã sẽn ki wã sɩɩg ra maan-a bũmb ye. A sã n wa tẽed tɩ yellã tara boogre, a yãkda fu-kãng n ning a to. A toeemda futã tɩ tãag sasa ning a sẽn tẽed tɩ kiidã sɩɩg pa na n maan-a bũmb ye. A wat n basa futã ningr fasɩ. Rẽ masã yell ye ka be yẽ ne a sɩdã sʋk ye.

5. a) Adinkra yaa bõe, la tags-kɛg bʋg la rẽ teenda? (Ges-y vẽnegrã sẽn be tẽngrã.) b) Sagls nins sẽn be Ezai 52:11 wilgda bõe adinkra rãmbã wɛɛngẽ? d) Bõe yĩng tɩ neb kẽer sẽn pa tũud a Zeova wã sũur tõe n yiki, ned sã n zãgs n pa ning kʋʋr fuug kʋʋrã sasa?

⁵ Zĩis kẽere, wakat ninga b ningda bãnd kʋʋrã fuug zugu.a Bãn-kãensã wʋsg ningr yaa b sẽn tẽed tɩ yaab rãmbã sɩɩs ket n tõe n maana sẽn vɩ-bã bũmbã. Rẽ n so tɩ d segd n lak d mens ne rẽnda. (Ezai 52:11) Yaa buudã kãsem dãmb n yãkd fuug ning b sẽn segd n ningã. La zakã rãmb fãa segd n ninga fu-kãngã. Neb nins sẽn pa tũud a Zeova wã getame tɩ fuugã ningr tara yõodo, tɩ ned sã n zãgs n pa ning bɩ b getẽ t’a beega kiidã, la t’a pa nand kiidã zakã rãmb ye. Tõnd sẽn bãng woto wã, wãn to la d segd n ges kʋyã futã ningr masã? D ges yɛl a tãab sẽn tõe n sõng tõnd rẽ wɛɛngẽ.

6. a) Karm-y 1 Tesalonik rãmb 4:13. Verse kãnga sõngda tõnd tɩ d bãng bõe kʋyã fut ningr wɛɛngẽ? b) Karm-y 2 Korẽnt dãmb 6:3. Kʋyã fut ningr wɛɛngẽ, sogs-bʋs la d segd n sok d mense?

⁶ Biiblã sẽn wilgd bũmb ninga: Pipi, a Zeova nin-buiidã pa baood n na n wilg nebã fãa nifẽ tɩ b sũur sãamame, n kaasdẽ wa neb nins sẽn ka tar saagrã sẽn nong n maandẽ wã ye. (1 Tes. 4:13) Yiib-n-soaba, d pa rat n maan bũmb sẽn na n wa “lub ned” ye. (2 Kor. 6:3) Rẽ wɛɛngẽ, d segd n soka d meng woto: ‘Mam sã n ning kʋʋr fuugu, neb a taabã na n tẽeme tɩ m basa Biiblã noy tũub bɩ? Rẽ na n tudga neb nins sẽn mi a Zeova Kaset rãmbã sẽn tẽed la b zãmsd nebã bũmb ning sẽn ki-bã wɛɛngẽ wã bɩ? Na n namsa mam tẽed-n-taasã sũur kaset bɩ? Mam sã n ning kʋʋr fuugu, na n sãama m tẽed-n-taas nins sẽn zãgs n pa ning tɩ b nams-b rẽ yĩngã sũy bɩ?’—Ges-y yʋʋmd 1998, sẽoog kiuug rasem 15 Gũusg Gasgã seb-neng 22-23; la yʋʋmd 1998 annuaire, seb-neng 203, sull a 1.

7. a) Karm-y Yelbũn 27:11, la Kolos rãmb 1:9, 10. Sagl-bʋs n be verse kãensã pʋsẽ, la b wilgda bõe kʋʋrã fut wɛɛngẽ? b) Sã n yaa ne 1 Korẽnt dãmb 10:21, 22, kʋʋrã fuug ningr tõe n sãama zood ning d sẽn tar ne a Zeova wã bɩ? Bõe yĩnga?

⁷ Noy nins fãa d sẽn segd n gesã sʋka, sẽn tar yõod n yɩɩdã yaa d ra maan bũmb sẽn na n sãam a Zeova sũur abada. (Yel. 27:11; Kol. 1:9, 10) D sã n wa bãng kʋʋrã fuug ningr sẽn makd bũmb ninga, la tɩ nebã tika rẽ n tẽed tɩ sẽn ki-bã mii bũmbu, d segd gũusame n da maan rẽ tɩ wa sãam zood ning tõnd sẽn tar ne a Zeova wã ye. Tõnd “ka tõe n dɩ [a Zeova] rẽnd la zĩn dãmbã rẽnd ye.”—1 Kor. 10:21, 22.

8. Baa d sã n pa mi kʋʋrã fuug sẽn makd bũmb ningã, bõe n tõe n sõng tõnd tɩ d bãng bũmb ning sẽn kɩt tɩ kiris-nebã pa segd n ning kʋʋr fuugu? (Ges-y sagls nins sẽn be sull a 6 ne a 7 pʋgẽ wã.)

⁸ Vẽenega, neb kẽer tõeeme n pa mi kʋʋrã fuug võor ye. B leb n pa tõe n wilg bũmb ning sẽn kɩt tɩ b tagsdẽ tɩ yaa kiidã yĩng bal la b ningd fu-kãngã ye. Neb wʋsg sẽn ningd fu-kãensã n pa mi a võorã pa kõt tõnd bʋʋm tɩ d me ning-a ye. D sã n maag d yĩng n bʋgs sagl-kãensã zutu, na n sõng-d lame tɩ d bãng bũmb ning sẽn kɩt tɩ d pa segd n ning kʋʋr fuug sẽn na yɩl tɩ nebã bãng tɩ tõnd bee sũ-sãams pʋgẽ wa neb a taabã sẽn nong n maandẽ wã ye.

9. Fu-bʋg buud la kiris-nebã tõe n ning kʋʋr sasa n pa sãam b taabã sũyã?

⁹ Tõnd sẽn tõe n ning fut ninsi: Fu-bʋg buud la d tõe n ning kʋʋr sasa? Sẽn na maan yʋʋm wʋsgo, tʋm-tʋmd sẽn tũud sɩd la sẽn tar yamã goma fut nins d sẽn tõe n ning kʋʋr sasa wã yelle.b B sagl-d lame tɩ d tags sõma futã yãkr wɛɛngẽ, n ges d futã sʋk bal n yãk fuug sẽn yaa sõma la yɩlemde. Sẽn yaa fuug ning fãa la d yãk n na n ningi, d sẽn mi bũmb ning sẽn ki-bã wɛɛngẽ wã na n sõng-d lame tɩ d wilg ned kũum sasa tɩ d waoogda nebã, baa ne d sẽn pa ning kʋʋr fuugã.

Kʋʋrã seglgo

10. Wãn to la sagls nins sẽn be Efɛɛz rãmb 5:7-11, la 1 Korẽnt dãmb 10:32 tõe n sõng tõnd tɩ d bãng d sẽn segd n maan ned kũum sasa?

¹⁰ Kiris-ned kũum sasa, b segd n manegã kũumã tɩ zems ne laloa wã ne logtoeembã sẽn wilgd bũmb ninsã, la tall waoogr me. Sẽn na yɩl n maan kʋʋrã tɩ zems la kɩt tɩ nebã bãng Biiblã sẽn wilgd bũmb nins sẽn ki-bã wɛɛngẽ wã, d pa na n sak tɩ b maan bũmb Biiblã sẽn gɩdg ye. (Ef. 5:7-11) Bũmb nins sẽn maand kʋʋrã sasa wã pa segd n koms d tẽed-n-taasã raood ye. (1 Kor. 10:32) Kiris-ned kũum sasa, wãn to la d tõe n tũ sagl-kãensã?

11. a) B sã n na n gʋlsa sebr n gom kiidã yelle, bõe la b pa segd n bas tɩ sẽn pa tũud-b a Zeova wã maane? b) Gom-bʋs la kiris-neb hakɩkã pa segd n yetẽ, la bõe yĩnga?

¹¹ Kũumã pẽgre: Nina tõe n gʋlsa bũmb bilf kiidã sẽn maan a vɩɩmã pʋgẽ wã sebr zugu. B segd n maana gũusg ne bũmb ning sẽn be sebrã pʋgẽ wã. Wala makre, ned roagdb bɩ a zo-rãmb sẽn pa tũud a Zeova tõe n datame n paas goam sẽn pẽgd kũumã tɩ yaa wa b gomda ne-a. B tõe n tũnugda ne goam sẽn wilgd tɩ Wẽnnaam boola kiidã saasẽ, bɩ t’a rebd n na n tɩ vɩɩmda zĩig a to. Wala makre, b nong n yetame tɩ “Wẽnd na maag tẽng a yĩnga,” bɩ “Wẽnd na maneg a reng taoore.” Ne neb wʋsgo, yaa yaoolem gomd sẽn wilgd tɩ b waoogda kiidã. La tõnd miime tɩ kiidã pa tõe n bãng goam nins sẽn be sebrã pʋgẽ wã abada. Sẽn yaa yell n yɩɩdã, tõnd sã n maand woto, wilgdame tɩ d tẽedame tɩ sẽn ki-bã tara sɩɩs sẽn pa kiidi. Rẽ n so tɩ kiris-neb hakɩkã segd n lak b mens ne rẽ.—Ezai 52:11.

12. a) Wala Biiblã sẽn wilgdã, yaa ãnd n tar sor n na n wilg b sẽn segd n maan kʋʋrã to-to, la bõe la neb wʋsg tagsd yel-kãngã zugu? b) Sã n yaa ne 2 Korẽnt dãmb 6:14-17, bõe yĩng tɩ pa zems tɩ d bas tɩ d buudã neb wall neb a taab sẽn pa tũud a Zeova wilg tõnd bũmb nins d sẽn segd n maan d ned kũum sasa?

¹² Yãa ãnd n segd n lʋɩ taoore? Zĩis kẽere, roagdb nins sẽn pa tũud a Zeova wã tagsdame tɩ yaa buudã n tar sor n na n yãk sasa ning b sẽn segd n maan kʋʋrã, la b sẽn segd n maan-a to-to. La wala Biiblã sẽn wilgdã, sã n yaa ne kiris-nebã, yaa sɩdã bɩ pagã n tar sor n na n yãk yɛl kẽer b sẽn segd n maane, bãmb ne b kambã nafr yĩnga. Roagdbã, buudã neba, la baa tigingã neb meng segd n tũu Biiblã no-kãngã. (Mat. 19:5, 6) Yaa woto me b nedã mumb wɛɛngẽ. (Sɩng. 23:19; 35:29) Sẽn na yɩl n da “lagem ne neb nins sẽn ka tẽebã” n maan sẽn pa zemse, kiris-ned segd n kɩtame tɩ nebã bãng vẽeneg tɩ bũmb nins b sẽn segd n maan kʋʋrã wɛɛngẽ wã fãa na n zemsa ne Biiblã noyã. (2 Kor. 6:14-17) Bõe n tõe n sõng-d tɩ d maan dẽ?

13. a) Bõe yĩng tɩ tar yõod tɩ d gʋls bũmb ning d sẽn dat tɩ b maan d kũum poorã n bĩngi? b) Bõe la b segd n maan tɩ sebrã tall yõodo, la bõe la d tõe n gʋls sebrã pʋgẽ?

¹³ Kɩt-y tɩ b bãng y sẽn datã vẽeneg: Ned sã n deng n gʋls sebr n wilg bũmb ning a sẽn dat tɩ b wa maan a kũum poore, na n yɩɩ nana ne buudã neb tɩ b sake, bala nebã nong n sakd n tũuda kiid sẽn dat tɩ b maan bũmb ningã. (Sɩng. 50:5) A soabã pag bɩ a sɩd la a zakã neb sẽn yaa rap la b yaa a Zeova Kaset rãmb sẽn sak n deeg t’a sẽn datã zemsame sã n maan kaset la b sĩyn sebrã, wat n yɩɩ nana tɩ b tõog n tũ a raabã. B tõeeme meng n pa naag seb-kãngã ne sebr ning a sẽn gʋls n wilgd b sẽn segd n pʋɩ a paoongã to-to a kũum poorã ye. Neb nins sẽn tar yam la sẽn tagsd beoog yellã miime tɩ b pa segd n gũ b kʋʋlem wakat bɩ b sẽn wat n gãe n wõosd n dat n ki, n yaool n wilg b raabã ye. (Koɛ. 9:11) Sebrã pʋgẽ, b tõe n wilga b sẽn segd n maan kʋʋrã to-to, zĩig la sasa ning b sẽn segd n maan dẽ, la ned ning sẽn tar sor n na n lʋɩ rẽ fãa taoore. La yaa d sẽn ket n vɩ sasa la d segd n maan woto fãa.

14. a) Bõe yĩng tɩ yaa toog ne neb kẽer tɩ b reng n gʋls b sẽn dat tɩ b maan bũmb nins b kũum poorã? b) Karm-y Filip rãmb 2:4, la Efɛɛz rãmb 5:28, 33. Verse kãensã segd n kɩtame tɩ d ges yel-kãngã wãn to?

¹⁴ Sãnda tõe n getame tɩ yaa toog ne-b tɩ b reng n gʋls b sẽn dat tɩ b maan bũmb nins b kũum poorã. La d sã n maan woto, wilgdame tɩ d bɩɩ tẽebã wɛɛngẽ, la tɩ d nonga neb a taabã. Neb nins sẽn mi Biiblã sẽn yetã miime tɩ pa b sẽn na n deng n gʋls sebrã n na n kɩt tɩ b ki tao-tao wall b vɩɩmd n kaoos ye. Yaa sɩd tɩ d sã n gʋls sebr sẽn wilgd vẽeneg tɩ d buudã neb sẽn pa a Zeova Kaset rãmb pa segd n kẽes b toog kʋʋrã pʋgẽ, tõe n wa yika b sũuri. La yaa sõma tɩ d reng n wilg yɛlã vẽeneg d sẽn ket n vɩ sasa, la d ra bas tɩ buudã neb sũur wa yik rẽ yĩng tɩ b modg n maan yɛl tõnd sẽn pa rat la Biiblã sẽn gɩdg ye. (Fil. 2:4) D sã n deng n maan woto, wilgda vẽeneg tɩ d nonga d taabã la tɩ b yell pak-d lame.—Ef. 5:28, 33.

15. a) Yaa bõe la b sẽn boond tɩ “rasem a yopoe tigisgã,” la bõe yĩng tɩ d segd n lak d mens ne rẽ? b) Buudã neb sã n wa rat n soog kʋʋrã yɛl kẽere, wãn to la d tõe n tũ 2 Korẽnt dãmb 6:14 sẽn yetã?

¹⁵ D sẽn segd n tall manesem ning ne buudã neb sẽn pa a Zeova Kaset rãmbã: Zĩis kẽere, ned kũum poor bilfu, nebã nong n tigimda taab n na n deng n ges b sẽn na n sigl a kʋʋrã to-to. Kẽer boonda rẽ tɩ “rasem a yopoe tigisga.” B maanda rẽ sẽn na yɩl n lob ligd kʋʋrã yĩnga, n ges b sẽn na bels kiidã neb to-to, la b bao n bãng b sẽn na n maan kʋʋrã to-to la zĩig ninga. D gũus n gesame tɩ tigis-kãensã sasa, yaa nana tɩ buudã neb sẽn pa a Zeova Kaset rãmbã wa reeg yɛlã n yãmbe. Wala d sẽn zoe n yã wã, Biiblã wilgda vẽeneg tɩ d pa segd n bas tɩ neb sẽn pa tũud a Zeova get kʋʋrã yɛl kẽer yelle, tɩ tigingã neb me get a taab yell ye. (2 Kor. 6:14) Woto yĩnga, kiidã sã n yaa ned sẽn tũ a Zeova ne a sũur fãa, pa segd tɩ b bas tɩ buudã neb sẽn pa a Zeova Kaset rãmb maan “kʋʋr yel-gɛtb sull” tɩ yaa bãmb n na n wilgd b sẽn segd n maan kʋʋrã to-to ye. Leb n pa tɩlae tɩ tigingã neb sẽn pa kiidã zak rãmb kẽes b toog tigiss nins fãa sẽn dengd kũumã mumbã, bɩ yɛl nins b sẽn na n maan kʋʋrã sasa wã pʋgẽ ye. La a Zeova Kaset soab ned sã n maan kaalem, yɩta sõma t’a bao sagls kãsem dãmbã nengẽ, sẽn na yɩl n bãng yɛl nins b sẽn segd n maan kʋʋrã sasa tɩ zems ne Biiblã noyã kɛpɩ.

16. a) Bõe la d segd n kɩt tɩ buudã neb sẽn pa tũud a Zeova wã bãng vẽenega? b) Buudã neb sã n modg n dat n maan bũmb Biiblã sẽn gɩdge, bõe la d segd n maane? d) Ned sã n gʋls a sẽn dat tɩ b maan bũmb ning a kũum poore, a yõodã la bʋgo?

¹⁶ Kiris-ned zak rãmb segd n maaga b yĩng n wilg segls nins b sẽn zoe n maan kʋʋrã yĩnga. La pa tɩlae tɩ d welg zakã neb sẽn pa a Zeova Kaset rãmbã n base, b sã n sɩd rat n tũ d sẽn datã ye. La bõe la d segd n maane, zakã neb a taab sã n wa rat n maan yɛl Biiblã sẽn gɩdge? Wakat kãnga, d segd n talla raood n yals kãn-kãe la d maag n yĩng n wilg-b Biiblã sẽn baood tɩ kiris-nebã maan bũmb ningã. La yaa vẽeneg tɩ ned sã n deng n gʋls sebr n wilg a sẽn dat tɩ b maan bũmb ning a kũum poore, kɩtdame tɩ no-koɛɛm bɩ tak-tɩ-m-tak ra wa zĩnd ye.

17. a) Neb nins sẽn pa a Zeova Kaset rãmbã sã n wa rat n soog kʋʋrã, bõe la d segd n maane? b) B sã n sɩd wa soog kʋʋrã, bõe la d tõe n maane? d) Karm-y 2 Korẽnt dãmb 4:7. Baa neb sẽn pa tũud a Zeova sã n deeg kʋʋrã n sooge, bõe n belsd tõndo?

¹⁷ D sã n maan woto fãa tɩ zakã rãmb ket n dat n maan yɛl sẽn pa segd ne pãnga, tõnd sẽn yaa kiris-nebã, d segd n laka d mens fasɩ la d bas-ba. Sã n sɩd wa yɩ woto, d tõe n tɩ maana sõsg Rĩungã Roogẽ wall zĩig a to n tik Biiblã zug n bels neb nins sũy sẽn sɩd sãamã. (Rom 15:4; Yɩɩl 119:50) Baa b pa wa ne kũumã beenẽ, bũmb nins b sẽn na n maanã segd n zemsame la waoog Wẽnnaam. (Tõo. 34:5, 6, 8) Yaa sɩd tɩ neb nins sẽn pa tũud a Zeova wã tõe n maana bũmb tɩ paas d sũ-sãamsã la d yɩɩrã. La d sẽn mi tɩ Wẽnnaam sẽn kõt neb nins sẽn tũud-a ne b sũy fãa wã “pãng kãsengã” nee d sẽn modgd n dat n tũ a noyã, belsd-d lame.—2 Kor. 4:7.

[Tẽngr not rãmbã]