D sak bũmb ning Biiblã sẽn yet kʋyã wɛɛngẽ wã—Babg a 3 soaba Bĩng-yã!

Kiris-nebã sẽn maand bũmb nins b ned kũum sasa wã segd n waooga Wẽnnaam

1. a) Bõe yĩng tɩ neb nins sẽn pa tũud a Zeova wã maan b ned kʋʋr tɩ yaa kãsenga? b) Bõe la neb kẽer maand sẽn na yɩl tɩ neb wʋsg wa b ned kʋʋre?

¹ Neb nins sẽn pa mi sẽn ki-bã sẽn lebgd bũmb ningã tẽedame tɩ sẽn na yɩl n da beeg kiidã la a zakã rãmba, yaa tɩlae tɩ b maan kʋʋrã tɩ yɩ kãsenga. Neb nins sẽn pa tũud a Zeova wã tagsdame tɩ tara yõod tɩ b maan tɩ nebã bãng tɩ kiidã bɩ a zakã rãmb yaa nin-kãsemse, bɩ b tara arzɛka. (1 Zã 2:16) Woto kɩtame tɩ naoor wʋsgo, nebã wagsd taaba, n dat n maan kʋʋrã tɩ yɩɩg b taabã rẽnda. Sẽn na yɩl tɩ neb wʋsg wa kʋʋrã, b tabendeda sɛb zĩis toɛy-toɛya, n wilgd kʋʋrã sẽn na n yɩ to-to, la a sẽn na n yɩ zĩig ninga. Neb kẽer basdame tɩ kaoos semen dãmb bɩ kiisi, sẽn na yɩl n tigis ligd wʋsg n tõog n maan kʋʋrã tɩ yɩ kãsenga. B getame tɩ rẽ tara yõod wʋsgo, hal tɩ kɩt tɩ naong rãmbã meng sɩɩgd b mens sẽn na yɩl n maan kʋʋrã tɩ yɩ kãsenga, n noog b buudã neb la sakã rãmb sũyã.

2. a) Bõe n kɩt tɩ kiris-nebã sẽn mumd b kũum to-to wã pa wõnd neb a taabã? b) Sã n yaa ne Zã 17:16 ne Yelbũn 11:2 wã, bõe yĩng tɩ kiris-ned pa segd n maan yel-kãsems a ned kũum sasa?

² La a Zeova Kaset rãmbã miime tɩ sẽn ki-bã pa mi bũmbu, la tɩ b pa mi bũmb ning nebã sẽn maand b yĩng b kũum poorã me ye. Ned kũum sasa, kiris-neb hakɩkã pa maand yɛlã tɩ yɩ kãsems sẽn na yɩl tɩ nebã yã n pẽg ye. Tõnd sã n maand wa neb a taabã, rẽ yĩnga b na n yãame tɩ tõnd sẽn tẽed bũmb ninsã ne bãmb sẽn tẽedã yaa toor sɩda? (Zã 17:16) Rẽ yĩnga b pa na n tẽed tɩ tõnd me zoeta sẽn ki-bã sɩda? Sẽn mik tɩ yaa sẽn ki-bã zoees n kɩt tɩ nebã maand woto fãa wã, d segd n gũusa d mense, la d bãng tɩ tara yõod tɩ d ned kũum sasa, bɩ d ra maan yɛlã tɩ yɩ kãsems ye. (Yel. 11:2) Wãn to la d tõe n maan dẽ?

3. a) Bõe la neb kẽer maand sẽn na yɩl n paam ligd b ned kũum sasa? b) A Zeova Kaset rãmbã tagsg yaa wãn ne yel-kãnga?

³ Kʋʋrã depãens rãmbã: Zĩis kẽere, wala neb a taabã sẽn minim n maandẽ wã, saam-biisã me tigimda taab n ges b sẽn na n maan to-to n paam ligd n maan ned kʋʋre. B toonda tigims a taab lɛta n kot ligd kʋʋrã yĩnga. Kẽer me naagda taab n tigisd ligd kʋyã yĩnga, tɩ kʋʋr sã n wa beẽ bɩ b yãk n sõnge. Kʋʋrã sasa, b rɩgenda kogend taabl dãmb zutu, sẽn na yɩl tɩ nebã ningd ligdi. Ned bɩ sull sã n kɩs ligdi, b kõt-b-la resi, la b togsda b sẽn kõ ligd ningã nebã fãa sʋka. Sasa kãnga, b kõta neb nins sẽn wat n kõt ligdã rɩɩb la rãam, sẽn na yɩl tɩ neb a taabã me yã n wa kɩs ligdi. Wãn to la d segd n ges yel-kãnga? Kiris-neb hakɩkã pa segd n maan woto sẽn na yɩl n paam ligd b ned kũum sasa ye.

4. a) Yaa ãnd dãmb n segd n ges depãens rãmbã yelle? (Ges-y vẽnegrã.*) b) Zakã rãmb sã n pa tar tõogo, ãnd dãmb n tõe n sõng-ba? (Ges-y vẽnegrã.#) d) D sã n deeg neb sẽn pa a Zeova Kaset rãmb ligdi, yel-bʋg n tõe n wa zĩndi, wãn to la d tõe n tũ Yelbũn 27:12 wã?

⁴ Kiris-ned zak rãmb segd n bãngame tɩ yaa bãmb n segd n ges b ned kũum sasa depãens rãmb yelle.a Bãmb sã n pa tar tõog n na n maan depãens rãmb nins sẽn yaa tɩlae wã, b buudã neb a taabã tõe n sõng-b lame.b (1 Tɩm. 5:3; od seb-neng 132, sull a 1) La b sã n ket n data sõngre, neb a taab bɩ tigingã tõe n sõng-b lame. (1 Zã 3:17, 18) La d segd n maana gũusgu. D sã n kos d zakã neb nins sẽn pa a Zeova Kaset rãmbã ligd d ned kũum yĩnga, b tõe n tagsame tɩ b tara sor n na n wilg b sẽn segd n maan yɛlã to-to. Woto tõe n waa ne zu-loeese, bala tõe n kɩtame tɩ yɛl Wẽnnaam sẽn kis zĩndi. La woto pa rat n yeel tɩ buudã neb sã n kõ ligd ne yamleoogo, kiris-nebã segd n zãgsame ye. D sã n mi tɩ d sã n deeg neb nins sẽn pa a Zeova Kaset rãmbã ligdi, b na n wa rat n kẽesa b toog yɛl kẽer pʋsẽ wall b rat n lʋɩ taoore, d segd n zãgsame.—Yel. 27:12.

5. a) Karm-y Efɛɛz rãmb 4:17-19 la Rom dãmb 12:2. Wãn to la verse kãensã tõe n sõng tõnd d ned kũum sasa? b) A Zezi mumbã yɩɩ wãna-wãna, la woto wilgda tõnd bõe? d) Karm-y Luk 14:28 la 2 Korẽnt dãmb 8:12. Sẽn na yɩl n da kos ligdi, bɩ n da peng n wa kẽes d mens sam pʋsẽ, bõe la d segd n maane?

⁵ Tõnd sẽn mi sẽn ki-bã sẽn lebgd bũmb ningã, d ned sã n ki, d segd n talla raood n da maan yɛl neb nins sẽn pa mi Biiblã noyã sẽn maandã ye. (Ef. 4:17-19) Baa ne d sẽn pa rat n maan yɛlã nana-nana tɩ yaa n loog noor tɩ wa sãam neb a taabã sũyã, d pa segd me n bas tɩ ninsaal zoees kɩt tɩ d maan wa neb nins sẽn pa mi Wẽnnaam noyã sẽn maandã ye. (Rom 12:2) D tẽeg t’a Zezi yɩɩ nin-kãseng sẽn pa tall to dũniyã zugu, la a mumbã sasa b pa maan yel-kãsems ye. (Zã 19:40-42) Ne neb nins sẽn tar “Kirist tagsgã” buudã, woto pa paoogr ye. (1 Kor. 2:15, 16) Woto yĩnga, tõnd sẽn yaa kiris-nebã, d ned sã n ki, sẽn na yɩl n da kos ligdi, bɩ n da peng n wa kẽes d mens sam pʋsẽ, yaa sõma tɩ d ra bao n maan yɛlã tɩ yɩ kãsems ye. D segd n maaname tɩ zems ne d tarem.—Luk 14:28; Ges-y 2 Korẽnt dãmb 8:12.

6. a) Bõe yĩng tɩ b pa segd n moon ned kũum tigims a taabã pʋsẽ? b) Bõe yĩng tɩ b pa segd n bas koe-moonegã tigisg bɩ n viig tigissã ned kũum yĩnga? Karm-y Matɩe 6:33, 34, la y wilg d sẽn segd n tũ saglsã to-to.

⁶ D sẽn segd n maan yɛlã to-to: Ned sã n ki, kibarã yelgda tao-tao. Woto yĩnga, b pa segd n moon ned kũum tigims a taabã pʋsẽ, bɩ n tool lɛta tigims a taabã pʋsẽ rẽ yĩng ye. B pa segd me n viig tigissã ned kũum yĩng ye. D sã n lʋɩɩsd Wẽnnaam daabã taoore, na n sõng-d lame tɩ d tall tagsg sẽn zems kũumã wɛɛngẽ, la d ket n lʋɩɩsd Wẽnnaam Rĩungã yɛl taoor d vɩɩmã pʋgẽ.—Mat. 6:33, 34.

7. a) Bõe la b segd n maane, b sã n maand sõsg kiid yĩnga? b) Bõe la sõsdã pa segd n maan sõsgã sasa?

⁷ Tigingã kãsem dãmb sã n sake, b tõe n tɩ maana sõsg Rĩungã Roogẽ. Zakã rãmb sã n data, b tõe n maana sõsgã kiidã meng zakẽ wall zĩig a to. Kãsem soab ning kiidã neb sẽn yãk t’a na n maan sõsgã segd n tũnuga ne pãlã ning a Zeova siglgã sẽn kõ wã. Sõsgã segd n belsa nebã la keng b fãa raoodo. Sõsdã segd n goma bũmb ning sẽn be pãlã wã zugã yell bala, n da paas bũmb sẽn yaa ziri ye. Wala makre, a pa segd n kɩt tɩ nebã tẽ tɩ nedã kaalem tũu ne bẽdgo, bɩ b maan-a-la tɩɩm ye. Woto kɩɩsda Biiblã sẽn yet t’a Zeova kogenda a nin-buiidã. (Yel. 18:10) Sõsdã segd n gũusame me t’a sẽn na n yeel bũmb ning a sõsgã pʋgẽ bɩ a pʋʋsgã pʋgẽ wã ra kɩt tɩ nebã tags t’a gomda ne kiidã ye. (Koɛ. 9:5, 10) Kiris-ned hakɩk sã n ki tɩ b na n maan sõsg a yĩnga, sõsdã tõe n goma bũmb ning a sẽn maan a Zeova tʋʋmdã pʋgẽ wã yell koɛɛg-koɛɛga. (Heb. 6:12) La b pa segd n bas tɩ ned yik n pẽg kiidã sõsgã sɩngrẽ, a sasa bɩ a baasgẽ ye.

8. a) Saam-biis sãnda minim n maanda bõe, la bõe yĩng tɩ b segd n bas rẽ? b) D tõe n yeelame tɩ bõe wakat ning sõsgã sẽn segd n dɩkã, la pʋʋsgã wɛɛngẽ? d) Perzidã sã n na n zĩndame, bõe la a pa segd n maane?

⁸ Zĩis kẽere, saam-biisã minim n tigimda taab n dɩk lɛɛr dãmb wʋsg n yɩɩnd yɩɩl nins sẽn be tõnd yɩɩlã sebrã pʋgẽ wã n gũud sõsgã sɩngre. Baa ne b sẽn tõe n yɩɩl sõsgã sɩngrẽ la a baasgẽ wã, saam-biis sã n tigimd taab n dɩkd lɛɛr dãmb wʋsg n yɩɩndẽ, yaa kiris-neb ne yʋʋrã togs-n-taar la b rɩkda. Sõsgã segd n sɩnga lɛɛre, la a pa segd n yɩɩd minit 30 ye. Yaa b sã n dat la b sɩngd sõsgã ne pʋʋsgo. Pa tɩlae tɩ b yãk perzidã t’a gom sɩngrẽ wã la baasgẽ wã ye. La sã n mik tɩ perzidã na n zĩndame, a segd n goma koɛɛg-koɛɛga. A pa segd n lebs n dɩk gom nins sõsdã sẽn zoe n togsã, bɩ n yãk neb kẽer n pʋʋs bark ye. Yaoogẽ wã, nand tɩ b mum kũumã, zakã neb sã n data b tõe n goma koɛɛg-koɛɛga, la b pʋʋs n baase. D tẽegd-y lame tɩ ned sẽn pa a Zeova Kaset soab pa segd n lʋɩ taoor Rĩungã Roogẽ wã bɩ yaoogẽ wã n gom ye.—2 Kor. 6:14-18.

9. Ned sã n ki tɩ d na n tɩ kelg sõsga, d segd n talla manesem bʋgo?

⁹ D tall manesem sõngo: Ned sã n ki tɩ b na n maan diskuur tɩ d na n tɩ kelge, d manesem segd n yɩɩ wãn-wãna? D sũyã sẽn sãamã, d rata belsg sẽn yit Wẽnnaam Gomdã pʋgẽ. Rẽ n so tɩ ned ning fãa sẽn wat n na n kelg diskuurã segd n tẽeg n zãa Biibl n wa. D sã n naagd sõsdã n karemd verse rãmbã, na n kenga d tẽebã. D sẽn tẽed tɩ sẽn ki-bã na n vʋʋgame, la tɩ “kũum ka na n le zĩnd” abada wã pãng na n paasame. (Wil. 21:4) D leb n tõe n belsa kiidã neb la neb a taabã. D sã n maan woto, d na n belsa neb a tãabã la d mense, bala d na n tagsda wakat ning kũum sẽn pa na n zĩnd abada wã yelle.—Ezai 25:8.

10. a) Wãn to la neb nins sẽn pa mi Wẽnnaam noyã wilgd b sũ-sãang ned kũum sasa? b) Neb kũum sasa, sẽn mi-b Wẽnnaam noyã maanda bõe, la bõe yĩnga? Karm-y 1 Tesalonik rãmb 4:13 la y wilg d sẽn tõe n tũ rẽ to-to.

¹⁰ Neb wʋsg tagsdame tɩ yaa b sẽn na n yãbd wʋsg la b wilgd tɩ b nonga kiidã, la tɩ b waoogd-a lame. Rẽ kɩtame tɩ kiidã zakẽ, sõsgã zĩigẽ, bɩ yaoogẽ wã, neb kẽer kaasd wʋsgo, n lʋɩt tẽng n tẽbd la b gomd ne kũumã wala a ket n vɩɩme. Sãnda me gãta kũumã bɩ n lʋɩt a zugu, la b makd n na n kẽ yaoogẽ wã tɩ b naag-b n mum. Baa ned kũum sẽn yaa sũ-sãams sasa wã, Wẽnnaam nin-buiidã pa wilgd b sũ-sãangã tɩ loog noor ye. Bala tõnd mii sẽn ki-bã sẽn lebgd bũmb ninga. B pa mi bũmb ye. D kɩsa sɩd me tɩ b na n wa vʋʋgame. (Zã 5:28, 29) Wẽnnaam sẽn kãab woto wã belsda tõndo, la kɩtame tɩ d pa maand ‘sũ-sãoong wa neb nins sẽn ka tẽebã ye.’—1 Tes. 4:13.

Mumbã poore

11. a) Mumbã poore, wãn to la d tõe n wilg tɩ d nonga kiidã zak rãmba? b) Bõe la d pa segd n bao tɩ kiidã zak rãmb maan n kõ-do, la rẽ wɛɛngẽ wãn to la d tõe n tũ Tʋʋm 20:35 wã sẽn yetã?

¹¹ Kũumã mumb poore, yel-maandɩ buud fãa tog n saame. B pa segd n maan bũmb a to kiidã yĩng ye. Mumbã poore, neb kẽer tõe n dat n tɩ belsa kiidã zak rãmba. Sasa kãnga d tõe n tagsa ninsaal vɩɩm sẽn yaa koɛɛgã zug sõma, la d tẽeg tɩ “ned kũum daar n são a rogem daare.” (Koɛ. 7:1) Yaa sõma tɩ neb nins sẽn na n tɩ bels kiidã zak rãmbã ra tɩ baood tɩ b kõ-b rɩɩbo, rãam bɩ zĩig sẽn na gãand ye. Bala woto paasda b zɩɩbo. A Zeova Kaset rãmbã miime tɩ “kũun bee bark n yɩɩd reegre.” (Tʋʋ. 20:35) Woto yĩnga, yaa sõma tɩ d tags bũmb ning tõnd sẽn na n kõ zakã rãmb tɩ sõng-b la bels-bã yelle, la d ra bao tɩ bãmb kõ-d rɩɩbo, rãam bɩ b maan reem tõnd yĩng ye. D sã n maan woto sẽn na yɩl n da paas zakã rãmb zɩɩbo, d wilgdame tɩ d nong-b lame, la tɩ b yell pak-d lame.—Gal. 6:2.

12. a) Bõe la neb nins sẽn pa mi Biiblã sẽn yetã maand ned mumb poore? b) Bõe yĩng la b sẽn maand reemã?

¹² D pa segd n maan reem mumbã poor ye: Neb nins sẽn pa mi Biiblã sẽn yet bũmb ningã nong n maanda yɛl a taab mumbã poore. Kiidã neba, a yagse, la neb a taab tigimda taab n maand reem, n dɩtẽ, n yũud la b ning mizik n yãng bʋrgã wall b pãbd gãngãad tɩ nebã saoodẽ. Ne neb wʋsgo, yaa rẽ la “kʋʋrã meng-menga.” Sasa kãngã, nebã nong n dɩtame tɩ loogdẽ, n yũud n suuda, n saood sao-yoodo, la b tʋmd tʋʋm-dẽgdo. Nebã sã n wʋm mizikã, baa b pa mi kiidã bɩ a nebã, b kaoogd n wata reemã zĩigẽ. Neb kẽer tagsdame tɩ reemã kɩtdame tɩ b yĩmb b ned kũum sẽn wat ne sũ-sãang ningã. La kiris-neb hakɩkã segd n bãngame tɩ nebã tẽedame tɩ kiidã tara sɩɩga, la tɩ b sã n maan woto, kõt-a-la sor t’a kẽng a yaab rãmbẽ.

13. a) D sã n mak Yikri 32:1-6 ne reem nins b sẽn maan ned mumb poorã, d tõe n yeelame tɩ bõe? b) Karm-y Koɛɛg Soab 3:1, 4. Bõe yĩng tɩ Wẽnnaam nin-buiidã pa segd n maan reem kãensã buudu? d) Sã n yaa ne Zã 17:16, la 1 Korẽnt dãmb 10:7, bõe yĩng tɩ kiris-neb hakɩkã pa segd n maan reem kãensã buud bɩ n kẽnge?

¹³ Ne neb wʋsgo, woto fãa yaa b rog-n-miki. La d pa segd n yet tɩ sẽn yaa rog-n-mikã yĩnga, d tara sor n na n maan bũmb Wẽnnaam sẽn kis ye. Wala makre, Israɛll nebã rog-n-mik pʋgẽ, yɩɩl la saoog ra beeme. La b sẽn wa n tũnug ne yɩɩlã la saoogã n maan bũmb sẽn sãamd a Zeova yʋʋrã, sãama zood ning b sẽn tar ne a Zeova wã. (Yik. 32:1-6) Yaa woto me rũndã-rũndã. Reemã b sẽn maand ned mumb poorã pa tat Wẽnnaam yam ye. Ned kũum sasa pa reem sasa ye. (Koɛ. 3:1, 4) Biiblã sẽn yet bũmb ningã yaa sɩda. A yetame tɩ “sũ-sãoong n são laado. Tɩ bõe, nen-gãneng manegda sũuri.” (Koɛ. 7:3) Sẽn mik tɩ reem nins b sẽn maand ned mumb poorã nong n naaga ne tʋʋm-dẽgd la tẽeb ziri wã yĩnga, kiris-neb hakɩkã pa segd n maan woto, bɩ n kẽng reem a woto buud meng ye. D sã n lak d mens ne yel-kãensã, d wilgdame tɩ d “ka dũniyã rẽnda,” tɩ d waoogda Wẽnnaam, la tɩ d pa rat n nams d taabã sũur kaset ye.—Zã 17:16; 1 Kor. 10:7.

14. a) Bõe la nebã nong n maand ned mumb poore, la sasa bʋg la b maand rẽ? b) Bõe n kɩt tɩ nebã maand reem kãensã?

¹⁴ Kʋyã maan n yɩlmã: Mumbã poore, neb kẽer maanda b sẽn boond tɩ “kʋʋr a yiib-n-soaba.” Sãnda maanda kʋʋr yʋʋmd fãa sẽn na yɩl n tẽeg kiidã yelle, la b waoog-a. Sasa kãngã, b nong n kõta nebã rɩɩbo, rãam, n pãbd gãngãad bɩ n ningd mizik tɩ nebã saoodẽ. B leb n lobda ligd sasa kãngã. Nebã sẽn maand rẽ sasa ninsã pa yembr ye. La nong n yaa rasem a yopoe, a wae, pis-naase, pis-nii bɩ sẽn yɩɩd woto a soabã mumb poore. Neb wʋsg tagsdame tɩ kʋʋr a yiib-n-soabã la yɛl nins b sẽn maand sasa kãngã wã tara yõod wʋsgo, bala rẽ yaa tɩlae sẽn na yɩl tɩ kiidã sɩɩg ta a yaab rãmbẽ.

15. a) Bõe yĩng tɩ neb kẽer maand kʋʋr n yɩlemdẽ? b) La sok-bʋg la d segd n sok d mense?

¹⁵ Nebã tõe n tagsdame tɩ b sã n lebg n maan kʋʋrã semen a wãn bɩ kiis a wãn mumbã poore, na n kɩtame tɩ b paam n le bels kiidã neba. B tõeeme me n tagsd tɩ rẽ kɩtdame tɩ neb nins sẽn pa tõog n wa pipi kʋʋrã paam n wa pʋʋs kiidã neb wẽnd na maneg a reng taoore. Neb kẽer lebgd n maanda woto sẽn na yɩl n pʋʋs neb nins fãa sẽn sõng tɩ b maan pipi kʋʋrã barka. Rẽ yĩnga d tõe n yeelame tɩ baa ziri tũudmã yɛl sã n pa naage, kiris-ned sã n tigim a zak rãmb la a bool tigingã neb tɩ b lagem taab n maan woto zemsame bɩ?

16. a) Baa ne sẽn pa wẽng tɩ d tɩ kaag kiidã nebã, bõe la kiris-neb hakɩkã pa segd n maane? b) Sã n yaa ne 1 Korẽnt dãmb 10:32, 2 Korẽnt dãmb 6:17 la Yɩɩl Sõamyã 97:10, bõe yĩng tɩ d pa segd n maand kʋy n yɩlemdẽ, la bõe yĩng tɩ d pa segd n kẽnge?

¹⁶ Mumbã poore, zakã neb kẽer tõe n tigma taab sẽn na yɩl n ges depãens nins b sẽn maan kʋʋrã sasa wã, la b ges kiidã sɛb manesg yelle. Sẽn paase, mumbã poore, neb kẽer tõe n datame n kõ kiidã neb teedo, la b tik Biiblã zug n bels-ba. La woto maaneg pa baood tɩ b tigim tigingã neb fãa ye. Ned fãa tõe n kẽnga a sẽn dat sasa. La kiid neb sã n leb n tigim tigingã neba, b zak rãmb la b zo-rãmb kaoosg poore, neb a taabã na n tagsame tɩ bõe? Woto na n kɩtame tɩ neb a taabã tags t’a Zeova Kaset rãmbã tara b toor kʋʋr buud n maand n yɩlemdẽ. D sã n maan woto, tõe n tudga neb nins sẽn mi a Zeova Kaset rãmbã sẽn tẽed la b zãmsd nebã bũmb ning sẽn ki-bã wɛɛngẽ wã. (1 Kor. 10:32) Sẽn mik tɩ yaa nebã sẽn tẽed tɩ ninsaal tara sɩɩg sẽn paa kiidã yĩng la b sẽn maand kʋyã n yɩlemdẽ wã, Wẽnnaam nin-buiidã segd n laka b mens ne bõn-kãensã buud fãa. (2 Kor. 6:17) D sã n sɩd maan woto, d wilgdame tɩ d ‘kisa sẽn yaa wẽnga,’ la tɩ d nonga sẽn yaa yɩlemd la tɩrga. (Yɩɩl 97:10; Rom 12:9) Bɩ tõnd ned kam fãa tũ noy nins b sẽn wilg kʋyã wɛɛngẽ wã ne d sũy fãa, tɩ kiris-ned sã n maan kaalem bɩ d ra maan yel-kãsems a mumbã sasa, la yɛl Wẽnnaam sẽn kis ye.

[Tengr not rãmbã]