Y tõe n kɩsa sɩd t’a Zeova na n bels-y lame

1. Togs-y Zʋɩf-rãmbã yɛl sẽn da yaa to-to b sẽn wa n be yembd Babilonnã.

MAMS-Y Zʋɩf-rãmbã yɛl sẽn da yaa to-to, b sẽn wa n be yembd Babilonnã. B yãa b sẽn sãam b ba-yirã, bãmb ne b yaab-rãmbã yel-wẽnã yĩnga, n tall-b n kẽng yembd tẽn-zẽnga. (2 Kib 36:15, 16, 20, 21) Yaa sɩd tɩ b sẽn wa n be Babilonnã, b ra tara lohorem bilf n tõe n maan bũmb kẽere. (Zer. 29:4-7) Baa ne rẽ vɩɩmã ra pa nana ne-b ye. Pa vɩɩm a woto la b ra rat ye. B tagsg ra yaa wãn ne rẽ? Ad b nin-yend sẽn yeele: “Tõnd zĩnda Babilon kʋɩlsã noore. Tõnd sẽn wa n tẽeg Siyõ yellã, d yãbame.” (Yɩɩn. 137:1) Zʋɩf-rãmbã sɩd ra rata belsgo. La ãnda nengẽ la b ra tõe n paam belsgo?

2-3. a) Bõe la a Zeova maan Zʋɩf-rãmb nins sẽn da be yembdã belsg yĩnga? b) Bõe yell la d na n gom sõs-kãngã pʋgẽ?

² A Zeova yaa “belsg fãa Wẽnnaam.” (2 Kor. 1:3) A sẽn yaa nonglmã yĩnga, a belsda neb nins fãa sẽn baood a zoodã ne yamleoogo. A Zeova ra miime tɩ Zʋɩf-rãmb kẽer ra na n saka kiblgu, n tek yam n kos sugr n lebg n wa a nengẽ. (Eza. 59:20) Rẽ n so tɩ yʋʋm koabg la zak nand tɩ b kẽng yembdã, a vẽneg no-rɛɛs a Ezayi t’a gʋls Ezayi sebrã. Bõe yĩnga? A Ezayi yeelame: “Yãmb Wẽnnaamã yeelame yaa: ‘Bels-y-yã, bels-y mam nin-buiidã.’” (Eza. 40:1) Sɩd me, a Zeova tũnuga ne Ezayi sebrã n kõ Zʋɩf-rãmbã sẽn da be yembdã belsg ning b sẽn da ratã.

³ Tõnd me mi n data belsg wa Zʋɩf-rãmbã sẽn da be yembdã. Sõs-kãngã pʋgẽ, d na n goma bũmb a tãab a Zeova sẽn maan n bels Zʋɩf-rãmbã sẽn da be yembdã yelle. 1) A pʋlmame t’a na n kõo sẽn tek-b yamã sugri, 2) a yeela a nin-buiidã tɩ b tõe n saaga manegre, la 3) a sõng-b lame tɩ b yɩɩrã booge. D leb n na n yãa a Zeova sẽn maand woto n belsd tõnd rũndã-rũndã to-to.

A ZEOVA KÕT-D-LA SUGRI

4. Wãn to la a Zeova wilg t’a yaa nimbãan-zoeta? (Ezayi 55:7)

⁴ A Zeova yaa “Ba sẽn tar nimbãan-zoeer wʋsgo.” (2 Kor. 1:3) A sẽn pʋlem t’a na n kõo Zʋɩf-rãmb nins sẽn tek yamã sugrã wilgdame t’a sɩd yaa nimbãan-zoeta. (Karm-y Ezayi 55:7.) A yeelame: “Mam nonglmã sẽn pa satã yĩnga, mam na n zoee fo nimbãanega.” (Eza. 54:8) Wãn to la a Zeova wilg a nimbãan-zoeerã? Baa Zʋɩf-rãmbã sẽn da segd n nams b tʋʋm-wẽnsã yĩngã, a Zeova pʋlmame tɩ b pa na n kell n pa Babilon wakat fãa yĩng ye. B yembdã ra na n talla tɛka. (Eza. 40:2) Yaa vẽeneg tɩ gom-kãensã kenga Zʋɩf-rãmb nins sẽn da tek yamã raood wʋsgo.

5. A Zeova nimbãan-zoeerã wɛɛngẽ, bõe yĩng tɩ d tõe n yeel tɩ d mii bũmb wʋsg n yɩɩd Zʋɩf-rãmb nins sẽn da be yembdã?

⁵ Wilgda tõnd bõe? A Zeova sakd n kõta a nin-buiidã sugr wʋsgo. Rũndã-rũndã, d tõe n kɩsa sɩd ne rẽ n yɩɩd Zʋɩf-rãmb nins sẽn da be yembdã. Bõe yĩnga? D mii a Zeova sẽn tikd bũmb ning n kõt d yel-wẽnã sugrã. Yʋʋm kobs a Ezayi sẽn togs bãngr-goamã poore, a Zeova tʋma a Bi-nongrã tẽngã zugu, t’a wa ki tɩ yɩ maoong yel-wẽn-maandb nins sẽn na n tek yamã fãa yĩnga. A Zeezi sẽn ki tɩ yɩ maoongã yĩnga, a Zeova tõe n ‘yẽesa d yel-wẽnã’ zãnga. (Tʋʋ. 3:19; Eza. 1:18; Efɛɛ. 1:7) Tõnd Wẽnnaam a Zeova sɩd yaa sug-kõata!

6. D sã n tagsd a Zeova nimbãan-zoeerã yelle, wãn to la nafd tõndo? (Ges-y fotã me.)

⁶ D sã n ningda d meng taal tɩ loog noore, a Zeova goam nins sẽn be Ezayi 55:7 wã tõe n bels-d lame. D sʋkã neb kẽer tõe n ket n ningda b meng taal yel-wẽn b sẽn maan pĩnd yĩnga, baa ne b sẽn tek yam n kos sugrã. Sẽn yɩɩd fãa, b yel-wẽnã sẽn wa ne zu-loees ninsã sã n ket n namsd-ba. La d sã n pelg d pʋg n togs d yel-wẽnã la d toeeme, d tõe n basa d yam t’a Zeova kõ-d-la sugri. Sẽn paase, a Zeova sã n kõ sugri, a yãkda yam n pa na n le tẽeg d yel-wẽnã yell ye. (Ges-y Zeremi 31:34.) A Zeova sã n pa le tagsd d pĩnd yel-wẽnã yelle, tõnd me pa segd n le tags b yell ye. Sẽn tar yõod ne a Zeova yaa bũmb nins d sẽn maand rũndã-rũndã wã, pa d pĩnd yel-wẽnã ye. (Eze. 33:14-16) Sẽn paase ka la bilfu, tõnd Ba sẽn yaa nimbãan-zoetã na n kɩtame tɩ d yel-wẽnã sẽn wa ne zu-loees ninsã sa wakat fãa yĩnga.

7. D sã n maana yel-wẽnd n solge, bõe n tõe n kɩt tɩ d sak n togs kãsem-dãmbã?

⁷ D sũur-kasetã sã n ningd-d-la taal d sẽn maan yel-wẽnd n solg yĩnga, bõe la d segd n maane? Sã n wa yaa woto, Biiblã sagend-d lame tɩ d kos kãsem-dãmbã sõngre. (Zak 5:14, 15) Yaa sɩd tɩ tõe n yɩɩ toog tɩ d pelg d pʋg n togs bũmb ning d sẽn maanã. La d segd n tẽegame t’a Zeova tũnugda ne nin-kãensã n sõngd tõndo, la tɩ b nong-d lame la b yaa nimbãan-zoɛtb wa a Zeova. D sã n tẽeg rẽ, la sã n mik tɩ d sɩd teka yam n kos sugri, d na n sak n tɩ goma ne-ba. Ad kibar sẽn wilgd a Zeova sẽn tũnugd ne kãsem-dãmbã n belsd-d to-to. Saam-biig yʋʋr sẽn boond t’a Artiira sũur-kasetã ra ningd-a-la taal wʋsgo. A yeelame: “Mam gesa yoob yɛl na maan yʋʋmde. La m sẽn kelg sõsg sẽn gom sũur-kasetã yell poore, m pelga m pʋg n togs m pagã la kãsem-dãmbã. Rẽ poore, m sũur-kasetã ra pa le ningd-m taal ye. La m sũurã ra ket n pa noom ne m menga, bũmb ning m sẽn maanã yĩnga. Kãsem-dãmbã tẽega maam t’a Zeova ket n datame tɩ m yɩ a zoa. A sẽn kibind tõndã yaa a sẽn nong-dã yĩnga. B sẽn gom ne maam ne bʋgsmã kẽ-m lame, la sõng-m tɩ m bãng t’a Zeova kõ-m-la sugri.” Rũndã-rũndã a Artiir yaa wakat fãa so-pakd la kãsem-sõangda. D sẽn mi tɩ d sã n tek yam, a Zeova kõt-d-la sugrã kengda raood wʋsgo.

A ZEOVA KƖTAME TƖ D SAAGD MANEGRE

8. a) Wãn to la a Zeova kɩt tɩ sẽn da be-b yembdã tẽed manegre? b) Sã n yaa ne Ezayi 40:29-31 wã, wãn to la Zʋɩf-rãmbã sẽn da tẽed manegrã naf-ba?

⁸ Tõe tɩ Zʋɩf-rãmbã ra tagsdame tɩ b pa na n tol n leb b ba-yirã ye. Nebã fãa ra miime tɩ Babilon nebã ra pa basd b yembs tɩ b kʋɩl ye. (Eza. 14:17) La a Zeova kɩtame t’a nin-buiidã ra tẽed manegre. A pʋlmame t’a na n yiisa a nin-buiidã yembdẽ wã, tɩ baa fʋɩ pa tõe n gɩdg-a t’a pa maan dẽ ye. (Eza. 44:26; 55:12) A Zeova nifẽ, Babilon nebã yaa wa wubsg sẽn gãneg balãns zugu. (Eza. 40:15) F sã n fʋʋs wubsgã bala, menemdame. Wãn to la Zʋɩf-rãmbã sẽn da tẽed manegrã naf-ba? Bels-b lame. La pa rẽ bal ye. A Ezayi yeelame yaa: “Neb nins sẽn teeg a Zeova wã na n le paama pãnga.” (Karm-y Ezayi 40:29-31.) B ra na n yɩɩ wa ‘pa-nand-tug sẽn lugd yĩngrã,’ bala b saagrã ra kõt-b-la pãnga.

9. Bõe yĩng tɩ sẽn da be-b yembdã ra tõe n kɩs sɩd t’a Zeova pʋlemsã na n pidsame?

⁹ A Zeova kɩtame me tɩ Zʋɩf-rãmbã tõe n bas b yam t’a na n pidsa a pʋlemsã. Bõe la a maan-yã? Tẽeg-y bãngr-goam nins sẽn zoe n pidsã yelle. B ra miime tɩ Asiiri sãama Israyɛll buud piigã rĩungã, n tall a nebã n kẽng yembd wa a Zeova sẽn da togsã. (Eza. 8:4) B yãa Babilon nebã sẽn sãam Zerizalɛm la b tall a nebã n kẽng yembdã. (Eza. 39:5-7) B yãa Babilon rĩmã sẽn kɩt tɩ b leo a Sedesiyaas ninã, n tall-a n keng yembd Babilonnã. (Zer. 39:7; Eze. 12:12, 13) A Zeova sẽn pʋlem bũmb ninsã fãa pidsame. (Eza. 42:9; 46:10) Yaa vẽeneg tɩ woto fãa kɩtame tɩ b kɩs sɩd t’a Zeova sẽn pʋlem tɩ b na n leba b ba-yirã me na n pidsame.

10. Bõe la d tõe n maan yaoolem wakatã tɩ sõng-d tɩ d ket n tẽed manegre?

¹⁰ Wilgda tõnd bõe? D sã n wa koms raoodo, d sẽn tẽed manegrã tõe n bels-d lame n kɩt tɩ d le paam pãnga. Rũndã-rũndã, yɛlã yaa kãn-kãe tɩ bɛɛb sẽn tar pãng wʋsg me zabd ne-do. La d pa segd n koms raood n bas ye. A Zeova pʋlma tõnd tɩ d na n vɩɩmda arzãnã pʋgẽ wakat sẽn kõn sa. Be, d na n paama laafɩ la bãan hakɩɩka. D segd n modgame tɩ d sẽn saagd n na n wa paam bũmb ningã kell n yɩ vẽeneg d yamẽ wã. Sã n pa rẽ, na n yɩɩ wa d sẽn be roog pʋgẽ, n lɩkd fenetrẽ n get zĩig sẽn yaa neer n pa ne sõma, fenetrã vɩtr sẽn yaa rẽgd yĩnga. Bõe la d tõe n maan tɩ saagrã yɩ vẽeneg d yamẽ tɩ yaa wa d “yẽesa vɩtrã”? D tõe n baooda sẽk n mamsd d vɩɩmã sẽn na n yɩ noog to-to dũni-paalgã pʋgẽ wã d yamẽ. D tõe n baoo sɛb sẽn gomd rẽ yell n karme, la d ges video-rãmb bɩ n kelg yɩɩl sẽn gomd rẽ yelle. Sẽn paase, d tõe n pʋʋsa a Zeova n gom pʋlems nins d sẽn yãgd tɩ pidsã yelle.

11. Bõe n sõngd saam-bi-poak a ye sẽn bẽed bã-kɛgeng t’a paamd pãnga?

¹¹ D ges saam-bi-poak a ye yʋʋr sẽn boond t’a Zayɛll sẽn tẽed manegrã sẽn bels-a la keng a raood to-to. A bẽeda bã-kɛgenga. Ad a sẽn yeele: “M sã n wa getẽ tɩ yɛlã rat n loog-m lame, m pelgda m pʋg n pʋʋs a Zeova n togs-a sẽn be m sũurẽ, n kɩs sɩd t’a mii yɛlã sẽn namsd-m to-to wã. M sã n mi n maan woto, a Zeova leokda m pʋʋsgã n kõ-m ‘pãng ning sẽn yɩɩd ninsaal rẽndã.’” (2 Kor. 4:7) Sẽn paase, a Zayɛll mamsda a sẽn be dũni-paalgã pʋgẽ, zĩig ning “ned baa a ye [sẽn] pa na n yeel t’a ka laafɩ” wã. (Eza. 33:24) Tõnd me sã n pelg d pʋg n togs a Zeova bũmb ning sẽn be d sũurẽ wã la d tagsd manegrã sẽn watã yelle, d tõe n paama raood n mao ne zu-loeesã.

12. Bõe n kɩt tɩ d tõe n kɩs sɩd t’a Zeova pʋlemsã na n pidsame? (Ges-y fotã me.)

¹² A Zeova tũnuga ne bũmb wʋsg n kɩt tɩ d tõe n bas d yam t’a pʋlemsã na n pidsame, wa a sẽn maan to-to ne Zʋɩf-rãmb nins sẽn da be yembdã. Tags-y bãngr-goam nins d sẽn ne tɩ pidsd rũndã-rũndã wã yelle. Wala makre, d nee dũni gill pãn-soaad sẽn be rũndã-rũndã t’a ‘zĩis kẽer tar pãnga, t’a zĩis sãnda pa tar pãng ye.’ (Dãn. 2:42, 43) D wʋmda ‘tẽn-digimdg sẽn be zĩig-zĩig kibay’ me, la d moond koɛɛgã “buud toɛy-toɛyã” neba. (Mat. 24:7, 14) D sẽn ne bãngr-gom-kãensã la a taab sẽn pidsdã, kɩtame tɩ d maneg n kɩs sɩd tɩ bõn-sõma nins a Zeova sẽn pʋlmã na n pidsame.

A ZEOVA SÕNGDA TÕND TƖ D YƖƖRÃ BOOGDẼ

13. a) Zʋɩf-rãmbã yembdã baasg sã n wa kolgdẽ, zu-loe-bʋs la b ra na n paame? b) Sã n yaa ne Ezayi 41:10-13, bõe la a Zeova maan n bels Zʋɩf-rãmb nins sẽn da be yembdã?

¹³ Baa ne a Zeova sẽn da pʋlem Zʋɩf-rãmb nins sẽn da be yembdã bõn-sõma wã, a ra miime tɩ wakat ning b sẽn na n paam lohormã sã n wa kolgdẽ, yɛlã ra pa na n yɩ nana ne-b ye. A Zeova pĩnd n togsame tɩ na-toaag n na n zab ne buud nins sẽn karg n gũbg Babilonnã, la t’a na n zaba ne Babilon me. (Eza. 41:2-5) Zʋɩf-rãmbã segd n yɛɛsame bɩ? Yʋʋm wʋsg sẽn deng rẽ, a Zeova kenga a nin-buiidã ned kam fãa raood n yeel yaa: “Ra zoe rabeem ye. Bala mam bee ne foo. Ra maan yɩɩr ye. Bala mam yaa fo Wẽnnaam.” (Karm-y Ezayi 41:10-13.) A sẽn yeel tɩ ‘mam yaa fo Wẽnnaamã’ rat n yeelame tɩ bõe? Ra pa sẽn na n tẽeg Zʋɩf-rãmbã tɩ yaa yẽ la b segd n waoog ye. B ra sɩng n mii rẽ. Yaa sẽn na n tẽeg-b t’a ket n bee ne-ba, n na n sõng-ba.—Yɩɩn. 118:6.

14. Bõe me la a Zeova maan sẽn na yɩl tɩ Zʋɩf-rãmb nins sẽn da be yembdã yɩɩrã booge?

¹⁴ A Zeova leb n tẽega Zʋɩf-rãmb nins sẽn da be yembdã t’a pãngã la a bãngrã ka koaka, tɩ boog b yɩɩrã. A yeel-b lame tɩ b zẽk b nens n ges ãdsã sẽn be saasẽ wã. A yeel-b lame tɩ yẽ sẽn naan ãdsã sẽn yãk a toogo, a mii ãdg fãa yʋʋr menga. (Eza. 40:25-28) A Zeova sã n mii ãdg fãa yʋʋre, yaa vẽeneg t’a mii neb nins fãa sẽn tũud-a wã yʋy. Sẽn paase, a sã n tara pãng n tõe n naan ãdsã, yaa vẽeneg t’a tara pãng n tõe n sõng neb nins sẽn tũud-a wã. Sɩd-sɩda, Zʋɩf-rãmb nins sẽn da be yembdã ra pa tar bʋʋm n na n yɛɛs wall b maan yɩɩr ye.

15. Wãn to la Wẽnnaam sõng Zʋɩf-rãmb nins sẽn da be yembdã tɩ b bãng bũmb ning b sẽn da segd n maanã?

¹⁵ A Zeova leb n wilga a nin-buiidã bũmb ning b sẽn segd n maan yɛl nins sẽn da watã sasa. Ezayi sebrã sak a to pʋgẽ, Wẽnnaam yeela a nin-buiidã yaa: “Kẽ-y y ro-pʋsẽ wã, n pag kʋɩlensã. Solg-y wakat bilfu, hal tɩ sũ-puugrã looge.” (Eza. 26:20) Rĩm a Sirus sẽn wa n na n zab n deeg Babilonnã, tõe tɩ Zʋɩf-rãmbã tũu sagl-kãngã. Kʋdemdã yel-mit a ye sẽn zĩnd pĩnd wẽndẽ wã yeelame t’a Sirus sẽn wa n na n zab n deeg Babilonnã, “a yeela [a sodaasã] tɩ b kʋ ned ning fãa b sẽn na n yã yɩnga.” Mams-y n ges-y rabeem ning sẽn yõk neb nins sẽn da be Babilon wakat kãnga. La tõe tɩ Zʋɩf-rãmbã põsame, b sẽn tũ sagls nins a Zeova sẽn kõ-bã yĩnga.

16. Bõe yĩng tɩ bũmb ning sẽn na n maan to-kãsengã sasa wã pa kẽesd-d rabeem? (Ges-y fotã me.)

¹⁶ Wilgda tõnd bõe? Ka la bilfu, to-kãseng ning buud sẽn zɩ n zĩndã na n sɩngame. A sã n wa sɩnge, rabeem na n yõka dũniyã nebã, tɩ b pa mi b sẽn maandg ye. La pa na n yɩ woto ne a Zeova nin-buiidã ye. D miime t’a Zeova yaa tõnd Wẽnnaam. D na n zẽka d zutu, bala d miime tɩ d “fãagrã kolgdame.” (Luk 21:28) Baa buud toɛy-toɛy sẽn lagem taabã sã n wa yik zabr ne tõndo, d na n kell n teega a Zeova. A Zeova na n kɩtame tɩ malɛgsã kogl tõndo, la a kõ-d noy sẽn na n fãag d yõyã. A na n maana wãn tɩ no-kãens ta tõndo? D na n pa mi ye. La tõe tɩ na n yɩɩ ne tigimsã maasem. Tõe tɩ tigimsã n na n yɩ “ro-pʋs” nins d sẽn na n kẽ n paam koglgã. Bõe la d tõe n maan n segl d mens yɛl nins sẽn watã yĩnga? D segd n baooda d tẽed-n-taasã zĩiga, n sakd noy nins a Zeova siglgã sẽn kõt-dã ne yamleoogo, la d kɩs sɩd t’a Zeova wilgda a siglgã sore.—Ebre. 10:24, 25; 13:17.

17. Bõe la y segd n maan n paam t’a Zeova bels-yã?

¹⁷ Baa yɛlã sẽn da pa nana ne Zʋɩf-rãmb nins sẽn da be yembd Babilonnã, a Zeova kɩtame tɩ b paam belsg ning b sẽn da ratã. A na n maana woto me ne tõndo. Woto wã, baa yɛlã sẽn wa n yaa a soab beoog sẽn wate, bɩ y kell n bao belsg a Zeova nengẽ. Kɩs-y sɩd t’a nimbãan-zoeerã yaa kãsenga. Kɩt-y tɩ y sẽn saagd n na n wa paam bũmb ningã yɩ vẽeneg y yamẽ. Tẽeg-y t’a Zeova sẽn yaa y Wẽnnaamã yĩnga, y pa tar bʋʋm n na n yɛɛs ye.