Y sẽn tõe n paas y pʋʋsgã sõmblem to-to

1-2. a) Bõe n tõe n kɩt tɩ yɩ toog tɩ d pelg d pʋg n pʋʋs a Zeova? b) Bõe n kɩt tɩ d miẽ t’a Zeova maagda a yĩng n kelgd tõnd pʋʋsgã?

YÃMB mi n getame tɩ y sã n wa pʋʋsd a Zeova y togsda goam n yɩlemdẽ, wall tɩ y pa pelgd y pʋgã n togs bũmb ning sẽn sɩd be y sũurẽ wã bɩ? Sã n yaa woto, bãng-y tɩ y pa y yembr ye. D sẽn tar bũmb wʋsg n maandẽ wã yĩnga, d tõeeme n wa pʋʋsd koɛɛg-koɛɛg bala. D leb n tõe n getame tɩ yaa toog ne-d tɩ d pelg d pʋg n gom ne a Zeova, d sẽn tagsd tɩ d pa zems ne rẽ yĩnga.

² Biiblã wilgame tɩ sẽn tar yõod a Zeova nifẽ pa d sẽn na n bãngd n gomd d sã n wa pʋʋsdẽ ye. Yaa d sẽn na n gomd ne pʋ-peelem la sik-m-menga. A wʋmda “sik-m-mens rãmbã kosgo.” (Yɩɩn. 10:17) A maagda a yĩng n kelgd bũmb ning fãa tõnd sẽn yetã, bala tõnd yell pak-a-la wʋsgo.—Yɩɩn. 139:1-3.

3. Sogs-bʋs la d na n leok sõs-kãngã pʋgẽ?

³ Rẽ n so tɩ d tõe n sok d meng yaa: Bõe n kɩt tɩ d tõe n bas d yam n pʋʋs a Zeova? Bõe la d tõe n maan tɩ paas d pʋʋsgã sõmblem? D sã n bʋgsd pʋʋsg nins b sẽn gʋls Biiblã pʋgẽ wã zugu, wãn to la tõe n sõng-d tɩ d paas d pʋʋsgã sõmblem? La d sũur sã n wa sãam wʋsg hal tɩ d pa mi d sẽn na n togs a Zeova yɛlã sẽn namsd-d to-to wã, bõe la d tõe n maane? D na n bao sogs-kãensã leoore.

BAS-Y Y YAM N PƲƲS A ZEOVA

4. Bõe n tõe n sõng-d tɩ d bas d yam n pʋʋs a Zeova? (Yɩɩn-sõamyã 119:145)

⁴ D sã n tẽeg t’a Zeova yaa d zoa n dat d neere, d na n basda d yam n pʋʋsd-a, n wilgd-a bũmb ning sẽn be d sũurẽ wã. Yɩɩn-sõamyã 119 soabã gʋlsd ra ninga a yamẽ t’a Zeova yaa a zoa. La yɛlã ra pa nana ne-a ye. Zãmb dãmb n dõd-a. (Yɩɩn. 119:23, 69, 78) Sẽn paase, yẽ mengã mi n kongdame tɩ komsd a raoodo. (Yɩɩn. 119:5) Baa ne rẽ, a ra pelgda a pʋg n pʋʋsd a Zeova n pa yɛɛsdẽ ye.—Karm-y Yɩɩn-sõamyã 119:145.

5. Bõe yĩng tɩ d pa segd n bas tɩ tags-kɛg kɩt tɩ d pa pʋʋs a Zeova? Rɩk-y makre.

⁵ A Zeova sagenda baa sẽn maan-b yel-wẽn-kãsemsã tɩ b pʋʋs-a. (Eza. 55:6, 7) Rẽnd d pa segd n bas tɩ tags-kɛg kɩt tɩ d pa pʋʋs a Zeova ye. D rɩk makre. Sɩlg sofɛɛr miime t’a sã n wa rat sõngre, a tõe n goma ne sɩlg yirẽ tʋm-tʋmdbã. La a sã n wa meneme, pa rẽ bɩ a tudgame n maan bũmbu, a na n zoeta yãnd n pa rat n bool nin-kãens sɩda? A bada! Woto me, d sã n wa pa mi d sẽn maandga, wall d sã n maan yel-wẽnde, d tõe n basa d yam n pʋʋs a Zeova.—Yɩɩn. 119:25, 176.

Y SẼN TÕE N MAAN TO-TO N PAAS Y PƲƲSGÃ SÕMBLEM

6-7. D sã n bʋgsd a Zeova zʋg-sõma wã zugu, wãn to la tõe n sõng-d tɩ d paas d pʋʋsgã sõmblem? Rɩk-y makre. (Ges-y tẽngr notã me.)

⁶ D sã n pelgd d pʋg n pʋʋsd a Zeova, n togsd-a bũmb ning sẽn be d sũurẽ wã d zoodã pãng paasdame. Woto wã, bõe la d tõe n maan tɩ paas d pʋʋsgã sõmblem?

⁷ Bʋgsd-y-yã a Zeova zʋg-sõma wã zugu.a D sã n bʋgsd a Zeova sẽn yaa Wẽnnaam ning buudã zugu, lebgda nana tɩ d pelg d pʋg n togs-a sẽn be d sũurẽ wã. (Yɩɩn. 145:8, 9, 18) Saam-bi-poak a ye yʋʋr sẽn boond t’a Kiristin maana woto tɩ sõng-a. A ba wã ra yaa nen-kɛglem soaba. A yeelame: “M baaba sẽn da yaa nen-kɛglem soabã yĩnga, ra yaa toog ne maam tɩ m tẽ t’a Zeova yaa Ba sẽn nong-do, n pelg m pʋg n gom ne-a. M da tagsdame tɩ m sẽn mi n kongdẽ wã yĩnga, a Zeova na n wa raag-m lame n base.” Bõe la a maan tɩ sõng-a? A yeelame: “Mam bʋgsa a Zeova maan-neerã zug wʋsgo, tɩ kɩt tɩ m bas m yam t’a nong-m lame. Masã, m miime t’a na n kell n zĩnda ne-m wakat fãa. Baa m sã n lʋɩ, a na n kell n sõng-m-la ne nonglem. M sẽn mi woto wã kɩtame tɩ lebg nana tɩ m togs-a bũmb ning sẽn noom-a, la bũmb ning sẽn sãamd m sũurã.”

8-9. Nand tɩ y pʋʋse, y sã n deng n tags y sẽn na n yeel bũmb ningã zugu wãn to la na n naf-yã? Rɩk-y makre.

⁸ Reng-y n tags-y y sẽn na n yeelã zugu. Nand tɩ y pʋʋse, y tõe n soka y meng sogsg kẽere. Wala makre: ‘Zu-loe-bʋs la m tar rũndã-rũndã? Ned n maan-m bũmb tɩ m segd n kõ-a sugr bɩ? Bũmb n toeem m vɩɩmã pʋgẽ tɩ nan pa kaoose, tɩ kɩt tɩ m dat a Zeova sõngr bɩ?’ (2 Rĩm. 19:15-19) D tõe n tagsa a Zeezi sẽn zãms tõnd tɩ d pʋʋs to-to wã me zugu, n bao n bãng d sẽn tõe n pʋʋs a Zeova a yʋʋrã wɛɛngẽ, a Rĩungã la a raabã wɛɛngẽ.—Mat. 6:9, 10.

⁹ Saam-bi-poak yʋʋr sẽn boond t’a Aliska sẽn wa n bãng t’a sɩdã bẽeda kãnsɛɛr bãag sẽn na n tũ ne a yõorã, ra yaa toog ne-a t’a pʋʋse. A yeelame: “Mam sũurã ra sãama wʋsgo, hal tɩ m sã n sɩng pʋʋsg bɩ m pa tõe n tags sõma n bãng m sẽn na n yeel bũmb ningã ye.” Bõe la a maan tɩ sõng-a? A yeelame: “Nand tɩ m pʋʋse, m da rengd n tagsa m sẽn na n yeel bũmb ningã zugu, sẽn na yɩl tɩ ra wa yɩ mam mengã wall m sɩdã bãagã yell bal la m gomd ye. M sẽn da maand woto wã sõng-m lame tɩ m sã n da wa pʋʋsdẽ bɩ m yamã gãe bãane, tɩ m tõe n gom bũmb toor-toor yell me.”

10. Bõe yĩng tɩ y segd n modg n pʋʋsd n wogendẽ? (Ges-y fot-rãmbã me.)

¹⁰ Pʋʋsd-y n wogend-y-yã. Yaa sɩd tɩ baa d sã n pʋʋsd koɛɛg-koɛɛga, tõe n paasa tõnd ne a Zeova zoodã pãnga. La d sã n pʋʋsd n wogendẽ, yɩta nana tɩ d togs a Zeova bũmb ning sẽn be d sũurẽ wã fãa.b A Eli sẽn yaa a Aliska sɩdã yeelame: “Mam modgd n pʋʋsda a Zeova naoor wʋsg daar fãa. La m neeme tɩ m sã n pʋʋsd a Zeova n wogendẽ, maam ne yẽ zoodã pãng manegd n paasdame. A Zeova pa yãgd tɩ m pʋʋs n sa tao-tao ye. Rẽ n so tɩ ma-me pa yãgd n na n pʋʋs n baas ye.” Ad saglg y sẽn tõe n tũ: Bao-y wakat la zĩig sẽn na n sõngd-y tɩ y pʋʋsdẽ tɩ bũmb ra tiisd-yã, tɩ sã n tõe bɩ y pʋʋsdẽ tɩ yita, la y minim n pʋʋsd n wogendẽ.

BƲGSD-Y PƲƲSG NINS B SẼN GƲLS BIIBLÃ PƲGẼ WÃ ZUGU

11. Y sã n bʋgsd pʋʋsg nins b sẽn gʋls Biiblã pʋgẽ wã zugu, wãn to la na n naf-yã? (Ges-y zĩ-gũbrã me: “Y tagsda wa bãmb bɩ?”)

¹¹ Pĩnd wẽndẽ wã, neb n pelg b pʋs n pʋʋs a Zeova la b yɩɩl n pẽg-a tɩ b gʋls rẽ Biiblã pʋgẽ. Y sã n bʋgsd rẽ zugu, na n sõng-y lame. Y sã n bʋgs wẽn-tũudb sẽn pelg b pʋs to-to n togs a Zeova bũmb ning sẽn be b sũurẽ wã zugu, tõe n sõngame tɩ yãmb me pelgd y pʋg n pʋʋsd a Zeova. Leb n tõe n sõng-y lame tɩ y bãng goam kẽer y sẽn tõe n togs a Zeova y sã n wa pʋʋsdẽ. Sẽn paase, y tõe n yãa goam kẽer neb sẽn togs a Zeova, tɩ wõnd bũmb ning sẽn be yãmb sũurẽ wã.

12. D sã n wa karemd pʋʋsg b sẽn gʋls Biiblã pʋgẽ, sogs-bʋs la d tõe n sok d menga?

¹² Y sã n wa karemd pʋʋsg b sẽn gʋls Biiblã pʋgẽ bɩ y sok y meng yaa: ‘Yaa ãnda n pʋʋs woto, la a yɛlã ra yaa wãn to wakat kãnga? Mam tagsda wa a sẽn yeel bũmb ningã bɩ? Yam-bʋg la m tõe n dɩk a pʋʋsgã pʋgẽ?’ Tõe n yɩɩ tɩlɛ tɩ y maan vaeesg n yaool n paam sogs-kãensã leoore. La y modgrã pa na n yɩ zaalem ye. Bɩ d gom pʋʋsg a wãn yelle.

13. Yam-bʋg la d tõe n dɩk a Ann nengẽ pʋʋsgã wɛɛngẽ? (1 Sãmwɛll 1:10, 11) (Ges-y fotã me.)

¹³ Karm-y 1 Sãmwɛll 1:10, 11. A Ann sẽn wa n pʋʋsd woto wã t’a tara zu-loe-kãsems a yiibu. A ra yaa kiri, t’a pʋg-to wã me ra namsd-a. (1 Sãm. 1:4-7) Y sã n tara zu-loɛɛg sẽn tõt saabo, yam-bʋg la y tõe n dɩk a Ann pʋʋsgã pʋgẽ? A pʋʋsame n wogle, n togs Wẽnnaam yellã sẽn namsd-a to-to wã t’a yam gãand bãane. (1 Sãm. 1:12, 18) Tõnd me sã n “lob [d] zɩɩbã a Zeova zugu,” rat n yeel tɩ d sã n togs-a d zu-loeesã la rẽ sẽn namsd tõnd to-to wã, d tõe n paama yolsgo.—Yɩɩn. 55:22.

14. a) Bõe la a Ann kibarã wilgd tõndo? b) D sã n bʋgsd Biiblã goam zugu, wãn to la tõe n paas d pʋʋsgã sõmblem? (Ges-y tẽngr notã.)

¹⁴ A Ann biig a Sãmwɛll rogmã yʋʋm a wãn poore, a tall-a lame n kẽng maan-kʋʋdb kãsem a Eli nengẽ. (1 Sãm. 1:24-28) So-kãng me, a pelga a pʋg n pʋʋs a Zeova, n yeel t’a kɩsa sɩd t’a kogenda neb nins sẽn maand sɩd ne-a wã la a get b yelle.c (1 Sãm. 2:1, 8, 9) Tõe t’a Ann ra ket n tara zu-loeese, la yaa a Zeova sẽn ning-a bark to-to wã yell la a ra tagsd n yɩɩda. Rẽ wilgda tõnd bõe? D sã n tagsd a Zeova sẽn sõngd tõnd to-to d zu-loeesã pʋgẽ wã yelle, yɩta nana tɩ d tõog toogo.

15. No-rɛɛs a Zeremi sẽn pʋʋs a Zeova to-to wã wilgda tõnd bõe? (Zeremi 12:1)

¹⁵ Karm-y Zeremi 12:1. Wakat n zĩnd tɩ no-rɛɛs a Zeremi sũurã ra sãamd wʋsgo, a sẽn da ne tɩ nin-wẽnsã yɛl yãkda nengã yĩnga. Israyɛll neb kẽer manesem sẽn da yaa to-to ne-a wã me ra komsda a raoodo. (Zer. 20:7, 8) Tõnd me tõe n wa tagsda wa yẽ, bala d nee neb sẽn yaa nin-wẽns tɩ b yɛlã yaool n yaa sõma, tɩ neb a taab me yaand tõndo. Baa a Zeremi sẽn yeel a Zeova t’a sũur sãamda ne bõn-kãensa wã, a pa tol n yeel t’a Zeova maanda bũmb sẽn pa tɩrg ye. La a sẽn wa n yã a Zeova sẽn sɩbg a nin-buiidã sẽn yaa tõatbã to-to wã, segd n kɩtame t’a maneg n kɩs sɩd ne Wẽnnaam tɩrlmã. (Zer. 32:19) Tõnd me tõe n pelga d pʋg n pʋʋs a Zeova n wilg-a yel-kɛgã sẽn namsd tõnd to-to wã, la d wilg tɩ d kɩsa sɩd tɩ wakat ning a sẽn yãkã sã n ta, a na n kɩtame tɩ yel-kɛgã sẽn namsd tõnd rũndã-rũndã wã sa.

16. Yam-bʋg la d tõe n dɩk Levi buudã ned a ye yɩɩll pʋgẽ? (Yɩɩn-sõamyã 42:1-4) (Ges-y fot-rãmbã me.)

¹⁶ Karm-y Yɩɩn-sõamyã 42:1-4. Yaa Levi buudã ned b sẽn da tall n kẽng yembdo, t’a pa tõe n naag a tẽed-n-taasã n waoog Wẽnnaam n gʋls yɩɩn-kãngã. Yɩɩllã a sẽn gʋlsã wilgda a tagsg sẽn da yaa a soaba. Bãag wall bũmb a to sã n kɩt tɩ d pa tõe n yi d zakẽ wã, pa rẽ bɩ b sã n yõk-d n pag d tũudmã yĩnga, d tõe n wa talla a tagsa wã buudu. Wakat ninga d sũur tõe n yaa noogo, tɩ wakat ning bɩ d sũur sãam wʋsgo. La sẽn wa n yaa a soab fãa yɩta sõma tɩ d pʋʋs a Zeova n gom rẽ yelle. Rẽ tõe n sõng-d lame tɩ d bãng d tagsa wã sẽn yaa woto wã võore, la sõng-d tɩ d ra yĩm bũmb ning sẽn sɩd tar yõod n yɩɩdã yell ye. Wala makre, Levi buudã nedã wa n bãngame t’a na n le paama segb buud toor-toor n pẽg a Zeova. (Yɩɩn. 42:5) Sẽn paase, a tagsa a Zeova sẽn da get a yell to-to wã yelle. (Yɩɩn. 42:8) D sã n pelgd d pʋg n pʋʋsd Wẽnnaam, tõe n sõng-d lame tɩ d wʋm d tagsa wã sẽn yaa woto wã võore, tɩ d yam gãand bãane, la sõng-d tɩ d tõog toogo.

17. a) Yam-bʋg la d tõe n dɩk no-rɛɛs a Zonas pʋʋsgã pʋgẽ? (Zonas 2:1, 2) b) D sã n wa tar zu-loeese, bõe yĩng tɩ yaa sõma tɩ d tẽeg Yɩɩn-sõamyã goam kẽere? (Ges-y tẽngr notã.)

¹⁷ Karm-y Zonas 2:1, 2. Yɩɩ no-rɛɛs a Zonas sẽn wa n be zĩnfã pʋgẽ wã la a pʋʋs n yeel woto. Baa a Zonas sẽn da kɩɩs Wẽnnaam noorã, a ra kɩsa sɩd t’a na n kelga a pʋʋsgã. A Zonas sẽn wa n pʋʋsdẽ wã, a lebs n togsa goam wʋsg sẽn be Yɩɩn-sõamyã sebrã pʋgẽ.d Yaa vẽeneg t’a ra mii Yɩɩn-sõamyã sõma. A sẽn bʋgs b goamã zugã kɩtame t’a bas a yam t’a Zeova na n sõng-a lame. Woto me, d sã n modg n dɩk Biiblã vɛrse-rãmb kẽer goam ne zugu, d sã n wa tar zu-loees n pʋʋsd a Zeova, d tõe n tẽega b yell tɩ keng d raoodo.

KET-Y N PƲƲSD-Y-YÃ A ZEOVA

18-19. Sã n wa yaa toog ne-d tɩ d togs a Zeova bũmb ning sẽn be d sũurẽ wã, Rom dãmb 8:26, 27 goamã tõe n kɩtame tɩ d bas d yam ne bõe? Rɩk-y makre.

¹⁸ Karm-y Rom dãmb 8:26, 27. Wakat ninga yɛlã mi n loog-d lame, hal tɩ d pa mi d sẽn na n togs a Zeova b sẽn namsd tõnd to-to wã ye. La baa sã n wa yaa woto, d tõe n paama sõngre. Yɛl a woto sasa, Wẽnnaam vʋʋsem sõngã “kota” tõnd yĩnga. Wãn to? A Zeova tũnuga ne a vʋʋsem sõngã n kɩt tɩ b gʋls pʋʋsg wʋsg a Gomdã pʋgẽ. D sã n wa pa tõe n togs a Zeova bũmb ning sẽn be d sũurẽ wã vẽenega, a tõe n gesa pʋʋs-kãens goam kẽer wa yaa tõnd n togse, n leoke.

¹⁹ Risi saam-bi-poak yʋʋr sẽn boond t’a Yelena tẽega rẽ yell tɩ sõng-a. B yõk-a lame n pag bãens roogo, a sẽn pʋʋsd la a karemd Biiblã yĩnga. Yellã ra namsda a Yelena wʋsgo, hal tɩ pʋʋsgã lebg toog ne-a. A yeelame: “Mam tẽegame tɩ yɛlã sã n wa loog-m hal tɩ m pa mi m sẽn na n pʋʋs n gom to-to, a Zeova na n gesa bũmb ning pĩnd wẽndẽ wẽn-tũudbã sẽn pʋʋs n kosã . . . wa yaa maam n kose. . . . Rẽ bels-m-la wʋsg wakat kãng sẽn pa yɩ nana wã.”

20. Bõe la d tõe n maan n segl d meng n yaool n pʋʋse?

²⁰ Yɛlã sã n mi n loog-do, d tõe n sɩnga pʋʋsg n wa bas n tagsd bũmb a to yelle. Bõe la d tõe n maan tɩ sõng-do? D tõe n kelga Yɩɩn-sõamyã sebrã b sẽn karem tɩ b rɩkã n yaool n sɩng pʋʋsgo. D leb n tõe n baoo sebr n gʋls zu-loeesã sẽn namsd-d to-to wã, wa rĩm a Davɩɩd sẽn maanã. (Yɩɩn. 18, 34, 142; sɩngr goamã.) La noy takɩ ka be d sẽn segd n tũ n segl d meng n yaool n pʋʋs ye. (Yɩɩn. 141:2) Maan-y bũmb ning sẽn na n sõng-y n tɩ yɩɩdã.

21. Bõe yĩng tɩ d tõe n pelg d pʋg n pʋʋse?

²¹ D sẽn mi t’a Zeova mii sẽn be d sũurẽ wã nand meng tɩ d togs gomdã pa kengd d raood sɩda? (Yɩɩn. 139:4) La d sã n togsd-a sẽn be d sũurẽ wã, la d gomd goam sẽn wilgd tɩ d kɩs-a-la sɩd t’a kelgdẽ, noom-a lame. Woto wã, bas-y y yam n pʋʋs y Ba sẽn be saasẽ wã. Y tõe n lebs n togsa pʋʋsg nins b sẽn gʋls Biiblã pʋgẽ wã goama. Pelgd-y y pʋg n pʋʋsdẽ. Togsd-y-yã a Zeova bũmb nins sẽn noom-yã, la bũmb nins sẽn sãamd y sũurã me. A Zeova sẽn yaa y Zoa hakɩɩkã yĩnga, a na n zĩnda ne-y wakat fãa.