Sõngre, pagb nins b sẽn namsdã yĩnga
“DŨNIYÃ gill zugu, b namsda pagb la pʋg-sadb milyõ-rãmba. Ned n namsd yãmb me bɩ? Sõs-kãngã wilgdame tɩ yãmb yell paka Wẽnnaam, la a wilgd bũmb ning a sẽn na n maan tɩ pagbã namsgã sa.”
Yaa woto la sõsg ning gom-zug sẽn yaa: “La sécurité des femmes : Ce qu’en dit la Bible” sẽn be jw.org pʋgẽ wã sɩngda. Sõsgã baasgẽ, liyẽ n be be tɩ y tõe n telesarz sõsgã ne PDF n ẽmpirim n põde, tɩ lebg seb-vãoog sẽn tar seb-nens a naase. Etazĩni saam-bi-poak yʋʋr sẽn boond t’a Stacy yeelame: “Mam ẽmpirma sɛb a wãn tɩ maam ne saam-bi-poak a to tall n kẽng zĩig sẽn be tõnd tigingã koe-mooneg zĩigẽ, tɩ pagb nins b sẽn namsdã zoet n wat be sẽn na yɩl n paam koglgo.”
Pag a ye sẽn tʋmd zĩ-kãng yeelame tɩ b kõ-a sɛb a taab t’a pʋɩ pagb nins sẽn be be wã. Rẽ kɩtame tɩ saam-bi-pogsã kõ seb-vãoogã bãmb pis-naas n paase, la jw.org kart-rãmb bãmb pis-tã. Saam-bi-pogsã sẽn wa n lebg n wa zĩ-kãnga, zĩigã taoor soab yeelame t’a ratame tɩ b wilg pagb nins sẽn be be wã d sẽn zãmsd nebã Biiblã to-to.
A Stacy ne saam-bi-pogs a yiib kẽnga zĩig a to pagbã sẽn zoet n kẽngdẽ sẽn na yɩl n paam koglgo. Sẽn be-b be wã reega seb-vãad a nu, la b kos tɩ b wa ne a taab n paase. Pag a ye sẽn tʋmd zĩ-kãng yeelame: “Seb-kãngã na n sõnga pagb nins sẽn be ka wã wʋsgo. Yaa sebr sẽn zems ne tõndo.” Saam-bi-pogsã sẽn le wa n kẽng be, pagb nins sẽn be be wã tigma taab tɩ b wilg-b d sẽn zãmsd nebã Biiblã to-to wã. Pagb a yiib n yeel tɩ b rat n wa kelga wɩkɛnnã tigsg Rĩungã roogẽ.
A Stacy yeelame: “D sẽn yã tɩ neb wʋsg sũur nooma ne sõs-kãnga wã noom-d-la wʋsgo. F sã n ẽmpirim sõsgã n põde, f tõe n tũnuga ne-a n taas pagb nins b sẽn namsã Rĩungã koɛɛgã nana-nana. D sũur yɩɩ noog ne b manesem sẽn yɩ to-to wã, tɩ d gũud n na n ges a Zeova sẽn na n ning d modgrã bark to-to.”