Karemdbã sogsgo
‘Tagsg’ ning a Zeova sẽn na n ning buud toɛy-toɛyã sũyẽ ka la bilfã yaa bõe?
Vẽnegr 17:16, 17 wã goma to-kãsengã sɩngr yelle, n yeel yaa: “Yɩɩl piigã fo sẽn yã wã ne we-rũngã na n wa kisga pʋg-yoodrã, n dees a sẽn tarã fãa n bas-a a zaala. B na n wãba a nemdã la b yõog-a bugum t’a rɩ zãnga. Bala Wẽnnaam ninga b sũyẽ wã tɩ b pids yẽ raabã, rat n yeel tɩ b pids bãmb mensã tags-yɛngã n dɩk b naamã n kõ we-rũngã.” Tõnd sɛbã pʋsẽ, b ra yetame tɩ ‘tagsg’ ning a Zeova sẽn na n ning buud toɛy-toɛyã sũyẽ wã yaa tɩ b sãam ziri tũudmã.
La d segd n demsa d sẽn da yet bũmb ningã. Tagsg ning a Zeova sẽn na n ning buud toɛy-toɛyã sũyẽ wã yaa tɩ b “rɩk b naamã n kõ we-rũngã.” Sẽn na yɩl n bãng rẽ sẽn na n yɩ to-to wã, d na n baoo sogsg a wãn leoore.
Ãnd dãmb yell la b gomd bãngr-gomdã pʋgẽ? Pipi, yaa “pʋg-yoodrã” b sẽn boond me tɩ “Babilon-kãsengã.” A makda ziri tũudum toor-toorã sẽn naag taaba. Yiibu, yaa “we-rũng sẽn yaa miuugã.” A makda siglg ning b sẽn lugl yʋʋmd 1919 n dat tɩ laafɩ zĩnd tẽngã zugã. B ra boond-a lame tɩ Sosiete dɛ nasiõ. La rũndã-rũndã yaa Nasiõzĩni wã. (Vẽn. 17:3-5) Sẽn na n baase yaa “yɩɩl piigã.” B makda goosneema-rãmb nins fãa sẽn teend we-rũngã.
Wãn to la pʋg-yoodrã ne we-rũng sẽn yaa miuugã tʋmd ne taaba? Pʋg-yoodrã “zaoo” we-rũng sẽn yaa miuugã zugu, tɩ wilgdẽ t’a teend-a lame, la t’a ratame t’a tũ yẽ raabã.
Bõe n na n paam pʋg-yoodrã? We-rũngã ne yɩɩl piigã sẽn teend-a wã “na n wa kisga pʋg-yoodrã.” Rẽ na n kɩtame tɩ b zae a paoongã fãa, la b kɩt tɩ nebã fãa bãng a wẽnemã. Rẽ poore b na n sãam-a-la zãnga, tɩ zems ne a Zeova sẽn kao a bʋʋdã to-to wã. (Vẽn. 17:1; 18:8) Rẽ n na n yɩ ziri tũudmã siglsã fãa saabo. La nand tɩ wakat kãng ta, a Zeova na n kɩtame tɩ buud toɛy-toɛyã maan bũmb b sẽn zɩ n maane, ninsaalbã sẽn sɩng naam dɩɩb tɛka.
Bõe la a Zeova na n kɩt tɩ buud toɛy-toɛyã maane? A na n ninga ‘a tagsgã’ yɩɩl piigã sũyẽ wã, sẽn yaa tɩ “b rɩk b pãngã la b tõogã n kõ we-rũngã sẽn yaa miuugã” sẽn makd Nasiõzĩni wã. (Vẽn. 17:13) Woto rat n yeelame tɩ pa ninsaalbã goosneema-rãmbã n na n yãk yam b toor n dɩk b pãngã la b tõogã n kõ we-rũngã ye. Bãngr-gomdã wilgdame tɩ yaa Wẽnnaam meng a toor n na n kɩt tɩ b maan woto. (Yel. 21:1; ges-y Ezayi 44:28.) B na n maana rẽ bilf-bilf bɩ? Ayo! Na n yɩɩ bũmb sẽn na n maan zĩig pʋgẽ. Rẽ poore, we-rũngã sẽn paam pãngã na n sãama ziri tũudmã siglsã tɩ zems ne a Zeova sẽn kao b bʋʋd to-to wã, n menes-b wakat fãa yĩnga.
Woto wã, bõe la d gũud tɩ maan ka la bilfu? D pa segd n tags tɩ d na n wa wʋmda kibay sẽn wilgd tɩ goosneema-rãmbã teenda Nasiõzĩni wã n paasdẽ ye. La ad d sẽn tõe n gũ bũmb ninga: A Zeova na n kɩtame tɩ goosneema-rãmbã rɩk b pãngã n kõ we-rũngã zĩig pʋgẽ, hal tɩ ling nebã. Rẽ sã n wa maane, d na n bãngame tɩ pa na n le kaoos la to-kãsengã sɩng ye. La nananda, bɩ “d kell n gũ la d modg tɩ d yamã ket n vẽenẽ,” bala yɛlã na n toeema ka la bilfu!—1 Tes. 5:6.