Pag ne rao sẽn vɩ ne taab n yaool n pa kẽ kãadem: Bõe la Biiblã yet rẽ wɛɛngẽ?

Biiblã sẽn yete

Biiblã yetame tɩ Wẽnnaam daabã yaa tɩ ninsaalbã ‘lak b mens ne yoobo.’ (1 Tesalonik rãmbã 4:3) Biiblã pʋgẽ, gom-bil ning sẽn yaa “yoobã” tõe n bilgda ned sẽn kẽed ne ned sẽn pa a pag bɩ a sɩda, rap sẽn gãe rapa, pagb sẽn gãe pagba, wall pag ne rao sẽn kẽed ne taab n yaool n pa kẽ kãadem.

• Bõe yĩng tɩ Wẽnnaam rat tɩ pag ne rao sẽn dat n vɩɩmd ne taab reng n kẽ kãadem?

• Yãmb tagsg yaa wãn ne pag ne rao sẽn vɩ ne taab n na n ges b sã n tõe n zĩnda ne taaba, n yaool n kẽ kãadem?

• Bõe la pag ne a sɩd tõe n maan tɩ b kãadmã tall barka?

Bõe yĩng tɩ Wẽnnaam rat tɩ pag ne rao sẽn dat n vɩɩmd ne taab reng n kẽ kãadem?

• Yaa Wẽnnaam n lugl kãadem. Yɩɩ a sẽn wa n naan a Awa n tall-a n wa a Ãdem nengẽ t’a maan a pagã. (Sɩngre 2:22-24) A ra pa rat tɩ pag ne rao vɩ ne taaba, n yaool n pa kẽ kãadem ye.

• Wẽnnaam n mi sẽn yaa sõma ne ninsaalbã n yɩɩda. Wẽnnaam datame tɩ pag ne rao sã n kẽ kãadem, bɩ b zĩnd ne taab b yõor tɛka. Rẽ na n naf-b lame la kogl zakã ned fãa. Ad makre: Ned sã n maan teoog n ning kartõ pʋg tɩ sẽn da-a wã segd n tɩ maneg teoogã n sog taaba, a wilgda b sẽn tõe n maan dẽ to-to. Noy nins Wẽnnaam sẽn kõt tõndã me wilgda d sẽn tõe n maan to-to tɩ sũ-noog zĩnd d zakã pʋgẽ. Wẽnnaam noyã la a saglsã nafda sẽn tũud-bã wakat fãa.—Ezayi 48:17, 18.

  

• Pag ne rao sã n kẽed ne taab n yaool n pa kẽ kãadem, tõe n waa ne zu-loeese. Wala makre, pagã tõe n dɩka pʋg tɩ pa tũ ne a raabo, tõe n waa ne taoor bãase, la sũ-sãamse.

• Wẽnnaam kõo pagbã ne rapã tõog tɩ b tõe n kẽ ne taab n dog kamba. Wẽnnaam nifẽ, vɩɩmã yaa bũmb sẽn tar yõod wʋsgo. Pag ne rao sẽn tõe n kẽ ne taab n dog kambã me yaa kũun sẽn tar yõod wʋsgo. Wẽnnaam ratame tɩ d wilg tɩ d nanda kũun-kãnga, n tũud bũmb nins a sẽn yeel kãadmã wɛɛngẽ wã.—Ebre-rãmbã 13:4.

Yãmb tagsg yaa wãn ne pag ne rao sẽn vɩ ne taab n na n ges b sã n tõe n zĩnda ne taaba, n yaool n kẽ kãadem?

Sẽn na yɩl tɩ pag ne rao kãadem tall barka, pa tɩlɛ tɩ b yãk wakat n na n zĩnd ne taab n gese, n pa reng n pʋlem tɩ b na n zĩnda ne taab b yõor tɛk ye. B sã n dat b zĩid-n-taarã yɩ noogo, yaa b sẽn na n dat ne b sũur fãa n zĩnd ne taab b yõor tɛka, la b modgd n welgd b zu-loeesã.a Kãadmã sõngdame tɩ pag ne rao rat ne b sũur fãa n zĩnd ne taab b yõor tɛka.—Matiye 19:6.

Bõe la pag ne a sɩd tõe n maan tɩ b kãadmã tall barka?

Kãadem sẽn zems zãng ka be ye. La pagã ne a sɩdã sã n tũud Biiblã saglsã, b na n tõogame tɩ b kãadmã tall barka. Ad sagls a wãna:

• Lʋɩɩsd-y y pagã wall y sɩdã raab taoore.—1 Korẽnt rãmbã 7:3-5; Filip rãmbã 2:3, 4.

• Nong-y taab la y waoogd taaba.—Efɛɛz rãmbã 5:25, 33.

• Gũusd-y ne y goamã.—Yel-bũnã 12:18.

• Maand-y sũ-mar la y kõt taab sugri.—Kolos rãmbã 3:13, 14.