Wẽnnaam Rĩungã yaa bõe?
Biiblã sẽn yete
Wẽnnaam Rĩungã yaa goosneema a Zeova sẽn lugli. Biiblã pʋgẽ, b boonda “Wẽnnaam Rĩungã” tɩ “saasẽ Rĩungã,” bala a bee saasẽ. (Mark 1:14, 15; Matiye 4:17) Wẽnnaam Rĩungã wõnda ninsaalbã goosneema-rãmbã bũmb kẽer wɛɛngẽ. La a yaa kãseng wʋsg n yɩɩd-ba.
A nanambsã. Wẽnnaam yãka a Zeezi t’a yaa a Rĩungã Rĩma, la a kõ-a tõog ninsaalbã sẽn pa tol n tõe n paame. (Matiye 28:18) A Zeezi tara tõ-kãng n maand sẽn yaa sõma bala. A wilga ne a tʋʋm-tʋmdɩ wã t’a yaa ned b sẽn tõe n teege, la t’a yaa Rĩm sẽn zoet nebã nimbãanega. (Matiye 4:23; Mark 1:40, 41; 6:31-34; Luk 7:11-17) Wẽnnaam kõo a Zeezi sor t’a yãk neb tẽns toɛy-toɛyã fãa pʋsẽ tɩ b na n tɩ naag-a saasẽ n “dɩɩ naam tẽngã zugu”—Vẽnegre 5:9, 10.
A naamã sẽn kaoosd to-to. Wẽnnaam Rĩungã pa wa ninsaalbã goosneema-rãmbã sẽn pa kaoosdã ye. A “pa na n tol n sãame” ye.—Dãniyɛll 2:44
A sẽn dɩt naamã neb nins zutã. Ned ning fãa sẽn maand Wẽnnaam daabã tõe n yɩ a Rĩungã poorẽ soaba, tɩ pa tũ ne a sẽn yitẽ wall a buud ye.—Tʋʋma 10:34, 35.
A Noyã. Wẽnnaam Rĩungã pa kõt noy sẽn gɩdgd wẽng maaneg bal ye. A sõngda a nin-buiidã me tɩ b tar yel-manesem sẽn yaa sõma. Wala makre, Biiblã yetame yaa: “‘Fo tog n nonga a Zeova sẽn yaa fo Wẽnnaamã ne f sũurã fãa, ne f sɩɩgã fãa, la ne f yamã fãa.’ Yãoã la noor ning sẽn yaa kãseng n yɩɩdã, la pipi soabã. Yiib-n-soabã wõnda yẽnda. A yetame: ‘Fo segd n nonga f to wa f menga.’” (Matiye 22:37-39) Wẽnnaam Rĩungã neb sẽn nong-a la b nong b taabã yĩnga, b pa baood b mens nafr bal ye. B baooda b taabã nafr me.
Rĩungã sẽn zãmsd a nin-buiidã to-to. Wẽnnaam Rĩungã pa kõt a nin-buiidã noy sẽn yaa sõma bal ye. A wilgd-b-la b sẽn tõe n tũ no-kãens to-to me.—Ezayi 48:17, 18.
Rĩungã sẽn dɩt naamã to-to. Wẽnnaam Rĩungã pa wẽgd a nin-buiidã a sẽn dat t’a nanambsã paam arzɛgs yĩng ye. A pʋd n na n pidsa Wẽnnaam raabã. Wala makre, a na n kɩtame tɩ neb nins sẽn nong Wẽnnaamã wa tõog n vɩɩmd wakat sẽn kõ sa, tẽngã sẽn na n lebg arzãna zugu.—Ezayi 35:1, 5, 6; Matiye 6:10; Vẽnegre 21:1-4.