Bõe yĩng tɩ Wẽnnaam pa kelgd pʋʋsg kẽere?

Biiblã sẽn yete

Pʋʋsg kẽer n be tɩ Wẽnnaam pa leokdẽ ye. Bɩ d ges bũmb a yiib sẽn tõe n kɩt tɩ Wẽnnaam pa kelg ned pʋʋsgo.

1. Pʋʋsgã sã n pa zems ne Wẽnnaam daabã

Wẽnnaam pa leokd kosg sẽn kɩɩsd a raabã wall a noyã sẽn be Biiblã pʋgẽ wã ye. (1 Zã 5:14) Wala makre, Biiblã yetame tɩ d pa segd n yɩ rat-tɩ-loog rãmb ye. Reem n bao ligd wata ne rat-tɩ-looge. (1 Korẽnt-rãmbã 6:9, 10) Rẽnd yãmb sã n pʋʋsdẽ n dat n dɩ lotori, Wẽnnaam pa na n leok ye. Wẽnnaam pa tʋʋm-biig tɩ y tõe n yeel t’a maan bũmb ning fãa y sẽn dat ye. Sɩd-sɩda, y sũur segd n yɩɩ noog ne sẽn yaa woto wã. Sã n da pa woto, y segd n yɛɛsa neb a taabã sẽn tõe n kos Wẽnnaam t’a maan bũmb ningã.—Zak 4:3.

2. Sẽn pʋʋsd-a wã sã n kɩɩsda Wẽnnaam

Wẽnnaam pa kelgd neb nins sẽn yãk yam n sãamd a sũur ne b manesmã pʋʋsg ye. Wala makre, Wẽnnaam ra yeela neb nins sẽn yet tɩ b tũud-a lame n yaool n kɩɩsd-a wã yaa: “Baa ne yãmb sẽn pʋʋsd n yɩlemdẽ wã, mam ka kelgd ye. Yãmb nusã pida ne zɩɩm.” (Ezayi 1:15) La b sã n da toeem b yel-manesmã la b maneg b yellã ne Wẽnnaam, a ra na n kelga b pʋʋsgã.—Ezayi 1:18.