A Zeova Kaset rãmbã tara noy b sẽn tũud pag bɩ rao roobã wɛɛngẽ bɩ?

A Zeova Kaset rãmbã miime tɩ sagls la noy nins sẽn be Biiblã pʋgẽ wã tõe n sõng-b lame tɩ b n yãk yam sẽn na n naf-ba, la noog a Zeova sũuri. (Ezayi 48:17, 18) Pa a Zeova Kaset rãmbã n lugl noy-kãense, la b tũud-b lame. Ad noy kẽer sẽn gomd roobã yelle.a

• Neb sẽn kẽ kãadem segd n zĩnda ne taab b yõor tɛka. (Matiye 19:6) A Zeova Kaset rãmb sã n wa rood taabã, yaa sẽn dat n ges b sã n tõe n kẽe kãadem ne taaba. B pa get rẽ wa reem bũmb ye.

• Yaa neb nins yʋʋm sẽn ta kãadem kõomã bal n segd n do taaba. B ned baa a ye pa segd n ket n “yaa yãag” ye. B segd n basame tɩ pag ne rao lagengã tʋlsem sẽn tar pãng wakat ningã looge.—1 Korẽnt rãmbã 7:36.

• Neb nins sẽn dood taabã segd n tara sor n tõe n kẽ kãadem. Neb kẽer kao b kãadmã tɩ zems ne laloa wã, tɩ Wẽnnaam nifẽ b pa tar sor n na n le kẽ kãadem ye. Bala Wẽnnaam Gomdã wilgame tɩ yaa yoob bal n kõt ned sor t’a tõe n kao a kãadem.—Matiye 19:9.

• B sagenda kiris-nebã tɩ b sã n dat n kẽ kãadem, segd n yɩɩ ne b tẽed-n-taag bala. (1 Korẽnt rãmbã 7:39) Sã n yaa ne a Zeova Kaset rãmbã, d tẽed-n-taag pa ned sẽn nong bũmb nins d sẽn tẽedã bal ye. Yaa a Zeova Kaset soab sẽn deeg lisgu, n moond koɛɛgã la a tũud Biiblã noyã. (2 Korẽnt rãmbã 6:14) Wẽnnaam sɩng n sagenda a nin-buiidã hal sẽn kaoos tɩ b sã n na n bao pag bɩ sɩda, segd n yɩɩ neb nins sẽn tũud-a wã sʋk bala. (Sɩngre 24:3; Malaki 2:11) Bãngdb wʋsg gũus n gesame tɩ sagl-kãngã ket n tara yõod rũndã-rũndã.b

• Kambã segd n saka b roagdbã. (Yel-bũnã 1:8; Kolos rãmbã 3:20) Biig sã n ket n be a roagdbã zakẽ, sak a roagdbã rat n yeelame t’a sak b yam-yãkr sẽn yaa a soab roobã wɛɛngẽ wã. Wala makre, roagdbã tõe n yãka yʋʋmd ning b bi-ribl bɩ b bi-pugl sẽn segd n paam n yaool n sɩng ned roobo, la bũmb nins b sẽn dat tɩ b kambã maan roobã sasa.

• Kiris-ned fãa n yãkd wakat ning a sẽn na n sɩng ned roobo, la a sẽn na n do ned ningã. La a segd n tũu noy nins Biiblã sẽn yet rẽ wɛɛngẽ wã. Rẽ zemsa ne Biiblã sẽn yeel tɩ “ned kam fãa na n tʋka a meng zɩɩbã.” (Galat-rãmbã 6:5) Baa ne rẽ, neb wʋsg sã n wa rat ned n kẽ kãadem, b baooda sagls kiris-neb tẽeb sẽn bɩ la sẽn dat b neer nengẽ, tɩ yaa yam tʋʋmde.—Yel-bũnã 1:5.

• Neb wʋsg sẽn dood taab maanda bũmb toor-toor sẽn yaa yel-wẽn-kãsemse. Wala makre, Biiblã sagenda tõnd tɩ d zoe yoobo. Yoob yaool n yaa neb sẽn pa kẽ kãadem ne taab sẽn n na n kẽed ne taaba. La pa rẽ bal ye. B sã n mogsd taab raoolem bɩ poglem, pa rẽ bɩ b salemd taab raoolem bɩ poglem, wall b gãe b to wã a se-nifẽ, b yoodame. (1 Korẽnt rãmbã 6:9-11) Neb a yiib sẽn dood taab sã n tar manesem sẽn nekd pag ne rao lagengã tʋlsem, yaa bũmb sẽn yaa “rẽgdo,” n pa noom Wẽnnaam ye. (Galat-rãmbã 5:19-21) Biiblã sagend-d lame tɩ d zãag d mens ne “gom-dẽgd” sẽn yaa goam sẽn nekd pag ne rao lagengã tʋlsmã.—Kolos rãmbã 3:8.

• Ninsaal sũur yaa zãmb soaba. (Zeremi 17:9) A tõe n belga ned t’a maan bũmb a sẽn mi tɩ yaa wẽnga. Neb sẽn dood taab segd n gũusame n da wa be zĩig tɩ yaa bãmb b yiib bala, sẽn na yɩl tɩ b sũyã ra wa kɩt tɩ b maan bũmb sẽn pa sõma ye. B tõe n yãka yam tɩ b sã n wa na n be ne taab bɩ yɩ neb sʋka, wall b yãk ned sẽn na n mi n be ne-ba. (Yel-bũnã 28:26) Kiris-neb nins sẽn dat n kẽ kãadmã miime tɩ f sã n dat n tũnug ne ẽntɛrnetã n bao neda, tõe n waa ne yelle. Sẽn yɩɩd fãa, sã n yaa ned f sẽn pa mi sõma.—Yɩɩn-sõamyã 26:4.