SOGSG KOM-BƖƖSÃ SẼN SOKDE
Bõe la mam fu-yerdɩ wã wilgd mam zugu?
Bõe yĩng tɩ f fu-yerdɩ wã yell segd n pak foom? Bala f fu-yerdɩ wã wilgda f sẽn yaa ned ning buudã. Bõe la fo fu-yerdɩ wã wilgd fo zugu?
Bẽds a tãab fu-yerdɩ wã wɛɛngẽ, la f sẽn tõe n maan to-to n da lʋɩ b pʋsẽ
Pipi bẽdga: Get piblisite-rãmbã n yãkd f fu-yerdɩ wã.
Bi-bɩɩg a ye yʋʋr sẽn boond t’a Theresa yeelame yaa: “Sasa ninga, m yamã kẽeda fuugu, m sẽn yã piblisite-rãmb wʋsg a zug yĩnga. F sã n yãt neb wʋsg sẽn yer fuug ning buud tɩ rẽ be f yamẽ wã, yaa toog tɩ f ra maan wa bãmb ye.”
Pa kom-pugli wã bal n tũud piblisite-rãmbã sẽn wilgdã ye. Sebr a yembr (The Everything Guide to Raising Adolescent Boys) pʋgẽ, b yeelame yaa: “Kom-dibli wã me tũuda neb wʋsg sẽn manegd b mens to-to wã. Hal b yãadmẽ wã menga, b yãta piblisite-rãmb b sẽn maan b yĩnga.”
F sẽn tõe n maan tɩ yaa sõma n yɩɩda: Biiblã yetame yaa: “Ned sẽn pa tar minim tẽeda gomd buud fãa, la gũus-m-meng soab tagsda a sẽn na n maan bũmb ningã zug neere.” (Yel-bũnã 14:15) Tũ vɛrse wã saglgã, n tagsd bũmb nins f sẽn yãt piblisite-rãmbã pʋsẽ wã zug neere. Wala makre, fo sã n yã fut b sẽn wilgd piblisite-rãmb pʋsẽ tɩ ned sã n yeelg bɩ wilgd a yĩngã zĩis kẽere, bɩ f sok f meng yaa:
‘M sã n yeelg fuug a woto buudu, ãnda la nafda?’
‘M sã n yeelg fuugã, nebã na n tagsame tɩ mam yaa nin-bʋg buudu?’
‘Fuugã zemsa ne mam sẽn yaa ned ning buudã, la m sẽn tẽed bũmb ninsã sɩda?’
Saglg fu-yerdɩ wã wɛɛngẽ: Semen pʋgẽ, maag f yĩng n ges fu-yerdɩ wã la bũmb a taabã piblisite-rãmbã. B sagenda nebã tɩ b yɩ nin-bʋs buudu? Rẽ yĩnga, b sẽn wilgd bũmb ninsã pa kɩtd tɩ f tagsdẽ tɩ yaa tɩlɛ tɩ f yeelgd fut buud takɩ sɩda? Bi-bɩɩg a ye yʋʋr sẽn boond t’a Karen yeelame yaa: “B pẽdgda nebã wʋsg n dat tɩ b sẽn manegd b mens to-to wã la b sẽn yer fut ninsã zems kɛpɩ, la b wilgd b yĩngã tɩ “pa tar zang” ye. Sẽn maandb piblisite-rãmbã sẽn mi rẽ wã, yaa kom-bɩɩsã la b tõe n paam nana-nana.”
Bẽdg a yiib-n-soaba: Yeelg fut nins buud neb wʋsg sẽn yerã, n wõneg f taabã.
Bi-bɩɩg a ye yʋʋr sẽn boond t’a Manuel yeelame yaa: “Neb wʋsg sã n nong n yer fuug ning buudu, nebã fãa wat n yera fu-kãng buudã. Fo sã n pa maan woto, nebã na n get-f-la kɛgr-kɛgre.” Bi-bɩɩg a ye yʋʋr sẽn boond t’a Anna sak n deegame t’a Manuel sẽn yeelã yaa sɩda. A yeelame: “Pa f sẽn na n yer fuug buud nebã wʋsg sẽn yerã la yellã ye. Yaa f sẽn na n baood n wõneg f taabã.”
F sẽn tõe n maan tɩ yaa sõma n yɩɩda: Biiblã yetame yaa: ‘Ra le bas-y tɩ dũni-kãngã neb kɩt tɩ y yɩ wa bãmb ye.’ (Rom dãmbã 12:2) Sẽn zems ne saglg ning b sẽn kõ vɛrse wã pʋgẽ wã, ges f fu-yerdɩ wã la f sok f meng yaa:
‘Mam fu-yerdɩ wã yãkr wɛɛngẽ, bõe ne bõe yell la m rengd n tagsdẽ?’
‘Ne maam, tara yõod wʋsg tɩ m yeelg fuug yʋʋr sẽn yi bɩ?’
‘Mam baoodame tɩ neb a taabã pẽg maam m fu-yerdɩ wã yĩng bɩ?’
Saglg fu-yerdɩ wã wɛɛngẽ: Fu-yerdɩ wã wɛɛngẽ, neb wʋsg tagsda bũmb a yiib bal yelle. B getame tɩ f segd n yãka f sã n na n yeelgda fut nins buud neb wʋsg sẽn yerã (tɩ kɩt tɩ nebã getẽ tɩ fo-me naagame), wall f sã n na n basame n pa yeelgd fut nins buud neb wʋsg sẽn yerã (tɩ kɩt tɩ nebã pa baood f zĩigã ye.) La wall tɩ tags bõn-kãens yellã, yɩta sõma tɩ f tags bũmb a tãab-n-soab yelle: Modg n kɩs f meng sɩda, tɩ neb a taabã sẽn tagsd bũmb ning fo zugã ra pak-f tɩ loog noor ye. F sũur sã n noom ne f menga, f pa na n maand f sẽn tõe fãa n na n wõneg f taabã ye.
Bẽdg a tãab-n-soaba: Tags tɩ f sã n yer fut sẽn wilgd f yĩngã zĩis kẽer n yaa sõma n yɩɩda.
Bi-pugl a ye yʋʋr sẽn boond t’a Jennifer yeelame yaa: “Togs sɩdã, sasa ninga m datame n yeelg fuug sẽn wilgd m yĩngã zĩis kẽere. Wala makre, fuug sẽn yaa koɛɛg bɩ sẽn sẽbd m yĩngã wʋsgo.”
F sẽn tõe n maan tɩ yaa sõma n yɩɩda: Biiblã yetame yaa: “Bɩ y nagmã ra yɩ bũmb nins nin sẽn ne . . ye. La bɩ y neermã yɩ bũmb ning sẽn be sũurẽ wã.” (1 Pɩyɛɛr 3:3, 4) Sẽn zems ne saglg ning b sẽn kõ vɛrse wã pʋgẽ wã, tags bũmb ning sẽn kɩtd tɩ nebã nong b taabã yelle: Yaa b neermã bɩ, bɩ yaa b zʋg-sõma wã.
Saglg fu-yerdɩ wã wɛɛngẽ: Bũmb ning sẽn tõe n paas f neermã n tɩ yɩɩd yaa sik-m-mengã. Yaa sɩd tɩ pa zʋg-sõng sẽn wae rũndã-rũndã ye. La d rɩk makr sẽn sõngd tɩ f tagse:
Fo zoe n sõssa ne ned sẽn gomd wʋsgo, la sẽn gomd yẽ mengã yell bal bɩ? Sẽn yaa yellã meng yaa tɩ tõe t’a soabã pa mi t’a manesmã kɩtdame tɩ nebã pa nong a zĩigẽ ye!
Fu-yerdɩ wã yaa wa f no-goamã. Tõe n kɩtame tɩ wõnd yaa fo mengã yell bal n pak-fo, hal tɩ neb a taabã pa nong f zĩigẽ ye
Fo sã n yer fut sẽn pa sõma, f legbda wa ned a woto buudu. Fo sẽn yer fut ninsã tõe n kɩtame tɩ nebã yamẽ, yaa wa fo sẽn yet-b yaa: ‘Ges-y maam.’ Leb n tõe n kɩtame tɩ b tagsdẽ tɩ fo pa kɩs f meng sɩda, wall tɩ yaa fo mengã yell bal n pak-fo, pa rẽ bɩ a yiibã fãa. Tõe n kɩtame me tɩ yaa wa fo maanda f sẽn tõe fãa sẽn na yɩl tɩ ned buud fãa nong-fo, baa neb nins sẽn pa tar yam-sõngã.
Wall tɩ f maand bũmb f sẽn pa koosd piblisite , modg n yɩ sik-m-meng soaba. Bi-bɩɩg a ye yʋʋr sẽn boond t’a Monica yeelame yaa: “Yeelgd fut ne sik-m-mengã pa rat n yeel tɩ f yeelgd fut sẽn na n kɩt tɩ f wõnd f yaab-poak ye. Rat n yeelame bal tɩ f waoogda f mengã la neb a taabã.”