Bõe la m segd n maan n lebg a Zeova Kaset soaba?
A Zeezi wilga bũmb ning ned sẽn dat n lebg a Zeova Kaset soab sẽn segd n maane, tɩ be Matiye 28:19, 20 pʋgẽ. Vɛrse-kãens wilgda bũmb kẽer a soabã sẽn segd n maane. Wala makre, a segd n gomda a Zeova yelle, la a kõt kaset a yʋʋrã yĩnga.
Pipi: Bao n bãng Biiblã sẽn yet bũmb ningã. A Zeezi yeela a karen-biisã tɩ b “sõng buud toɛy-toɛyã fãa neb tɩ b yɩ yẽ karen-biisi, . . . n zãms-ba.” (Matiye 28:19, 20) Gom-bil ning b sẽn lebg tɩ “karen-biigã” võorã meng-meng yaa “ned sẽn zãmsd bũmbu.” Biiblã, la sẽn yɩɩd fãa a Zeezi Kirist zãmsgã sẽn be a pʋgẽ wã tõe n sõng-y lame tɩ y vɩɩmã tall barka, tɩ y paam sũ-noog me. (2 Tɩmote 3:16, 17) D rata ne d sũur fãa n zãms-y Biiblã, n sõng-y tɩ y bãng a sẽn yet bũmb ningã.—Matiye 10:7, 8; 1 Tesalonik rãmbã 2:13.
Yiibu: Tũ bũmb nins f sẽn zãmsdã. A Zeezi yeelame me tɩ neb nins sẽn zãmsd Biiblã segdame n “tũ bũmb nins fãa [yẽ] sẽn yeelã.” (Matiye 28:20) Rat n yeelame tɩ Biiblã zãmsgã pa f sẽn na n dɩkd rẽ ne zug tɩ paad f yamẽ wã bal ye. F segdame me n toeemd f tagsa wã la f tʋʋm-tʋmdɩ wã. (Tʋʋma 10:42; Efɛɛz rãmbã 4:22-29; Ebre-rãmbã 10:24, 25) Neb nins sẽn tũud a Zeezi sẽn yeelã wat n yãka yam n dɩk b vɩɩmã n kõ Wẽnnaam a Zeova, n lebg a Zeezi karen-biisi.—Matiye 16:24.
Tãabo: Reeg lisgu. (Matiye 28:19) Biiblã pʋgẽ, b maka lisgã reegr ne kũum b sẽn mumi. (Ges-y Rom dãmb 6:2-4.) Yaa wa f sẽn na n ki n vʋʋg ne yĩn-paalle. F lisgã sasa, f wilgda zamã wã taoor tɩ f zãmsa Biiblã, n tũud bũmb nins f sẽn zãmsã, la tɩ f kota Wẽnnaam t’a kõ-f sũur-kaset sẽn yaa yɩlemde.—Ebre-rãmbã 9:14; 1 Pɩyɛɛr 3:21
Bõe n wilgd tɩ m segl n saame n na n deeg lisgu?
Gom ne tigingã kãsem-dãmbã. B na n sõsa ne foo, n bao n bãng f sã n mii lisgã sẽn dat n yɛɛlga. B na n gesa f sã n tũuda bũmb nins f sẽn zãmsã, la f sã n yãka yam n dɩk f meng n kõ a Zeova.—Tʋʋma 20:28; 1 Pɩyɛɛr 5:1-3
A Zeova Kaset rãmbã kamb me segd n tũu bõn-kãensã bɩ?
N-ye. D tũuda Biiblã sẽn yetã, n wubd d kambã “a Zeova kiblgã la a saglsã pʋsẽ.” (Efɛɛz rãmbã 6:4) La b sã n wa bɩtẽ, bãmb n segd n yãk yam n zãms Biiblã la b sak n tũ a sẽn yetã, n yaool n tõog n deeg lisgu. (Rom dãmbã 12:2) Sɩd me, ned kam fãa n yãkd a sã n na n tũu Wẽnnaam.—Rom dãmbã 14:12; Galat-rãmbã 6:5.