Sak 80

Pe-yãgã la Pekɩɩmã

A ZEZI waa Zerizalɛm Rɩk-n-kõ bɩ Hanuka kibsã yĩnga. Rẽ yaa kibs b sẽn maand n tẽegd a Zeova roogã b sẽn lebs n dɩk n kõ wã. Sẽn zems yʋʋm 200 sẽn looge, sẽn yaa yʋʋmd 168 soab sẽn deng Kirist zãmaana, a Antiokos a naas soab a Epifan zab n deega Zerizalɛm, n dẽgem wẽnd-doogã ne a tẽn-kugrã. La yʋʋm a tãab loogr poore, b lebs n zab n deega Zerizalɛm, n lebs n dɩk wẽnd-doogã n kõ Wẽnnaam. Rẽ tɛka, yʋʋmd fãa b maanda lebs-n-dɩk-n-kõ kibsa.

Kibs-kãngã yaa Kislɛɛv rasem 25 la b maand-a. Sã n yaa ne rũndã-rũndã wakat sõdbã, Kislɛɛv yaa Zʋɩf rãmbã kiuug ning sẽn zems ne sɩpaolg kiuugã baasg la yʋʋm-sar kiuugã sɩngre. Woto, sẽn yɩɩd rasem koabg bilf bal n da ket tɩ yʋʋmd 33 Pak ning b sẽn ka tõe n yĩma ta. La zĩigã sẽn da maasã yĩngã, tʋm-tʋmd a Zã boola wakat kãng tɩ “waood wẽnde.”

Masã, a Zezi rɩka makr n gom pe-yãg a tãabo, la yẽ meng sẽn yaa Pekɩɩm Sõngã yelle. Pipi pe-yãgr ning yell a sẽn gomã tɩ loee ne a Moiiz Tõogã kaoole. Tõogã ra yaa koak buudu, sẽn welgd Zʋɩf rãmbã ne buud a taabã sẽn da ka be kaool pʋgẽ ne Wẽnnaamã. Tõogã ra kogenda Zʋɩf rãmbã ne bu-kãens tʋʋm wẽnsã. A Zezi wilgame: “Mam yeta yãmb sɩd-sɩda tɩ ned ninga sẽn gãngd zĩig a to n ka kẽed yãgr noore, yẽ soab yaa wagdre la fãada. La ned ninga sẽn kẽed yãgr noore, yẽ yaa piis pe-kɩɩmã.”

Neb a taab waame n yet tɩ bãmb la Mesi wã bɩ Kiristã, la sɩd-sɩda b ra ka pe-kɩɩm ning yell a Zezi sẽn gom woto wã ye: “Gũuda pakdame n kõ yẽnda, la piisa wʋmda yẽ koɛɛga. La yẽ boonda a meng piis ne b yʋya, la bãmb pʋgda yẽ n yita. . . . B na n zoe n basa sãana, tɩ bõe, bãmb ka mi sãamb koees ye.”

Pipi yãgrã ‘gũud’ yɩɩ Lisd a Zã. A Zã sẽn da yaa gũudã, a “pakame n kõ” a Zezi, a sẽn wilg-a neb nins b sẽn bool makr wɛɛngẽ tɩ piisã, t’a Zezi ra na n tall n tɩ wãbnã. Pe-kãens a Zezi sẽn boond ne b yʋy la a wãbend-bã, a kẽes-b-la yãgr a to pʋgẽ. A Zezi wilgame: “Mam yeta yãmb sɩd-sɩda tɩ mam yaa yãgr noore,” sẽn dat n yeel tɩ yãg-paalg noore. A Zezi sẽn wa n lugl kaool paalgã ne a karen-biisã, la a zĩnd saasẽ n pʋdg vʋʋsem sõngã b zut Pãntekotã sẽn pʋgl rẽ wakatã, a kẽes-b-la yãg-paalg kãngã pʋgẽ.

Rẽ poore a Zezi togsa a tʋʋmdã sẽn ya a soaba, n yeele: “Mam yaa yãgr noore. Ned sã n kẽ no-kãnga, a na paam fãagre. La yẽ n kẽedẽ la a yit n paamd dɩɩbo. . . . La mam waame tɩ piisa paam vɩɩm, la b paam hal wʋsgo. . . . Mam yaa Pekɩɩm sõngo. Mam mii mam piisi, la bãmb mii maam. A wa m Ba sẽn mi maam, mam me mii m Ba woto. La mam kõta m vɩɩm m piisa yĩnga.”

Sẽn pa kaoos pʋgẽ, a Zezi ra belsa a karen-biisã ne gom-kãensã: “[Bãg-bila], ra zoe-y rabeem ye, tɩ bõe, yãmb Ba sũur yaa noog tɩ b kõt yãmb b [Rĩungã].” Bãg-bil kãngã neb sõor wa n yɩɩ neb 144 000. Yaa bãmb n kẽed yãg-paalg kãngã bɩ pe-yãgr a yiib soabã pʋgẽ. La a Zezi leb n yeelame: “Mam tara piis a taab sẽn nan ka be yãg-kãnga pʋgẽ ye. Yaa tɩlae tɩ mam wa ne bãmba. Bãmb na n wʋma mam koɛɛga. La a na yɩ yãgr a yembr la pe-kɩɩm a yembre.”

Sẽn mik tɩ ‘piis a taabã’ ka be “yãg kãnga pʋgẽ” wã, b tog n bee yãgr a to, bɩ a tãab-n-soab pʋgẽ. Yaoolem yãg-kãensã a yiibã ka tar saag-yɛng ye. “Bãg-bilã” neb sẽn be yãgr a yembrã pʋgẽ wã na n dɩɩ naam saasẽ ne Kiristã. La ‘piis a taaba’ sẽn be yãgr a to wã pʋgẽ wã na n vɩɩmda Arzãna pʋgẽ tẽng zugu. La baa b sẽn be yãg a yiib pʋsẽ wã, piisã ka maand sũ-kiiri, b leb n ka tagsd tɩ b maanda welsg b sʋk me ye. Bala wa a Zezi sẽn yeelã, b ‘yaa yãgr a yembre, pe-kɩɩm a yembr’ sẽn gũuda.

A Zezi Kirist sẽn yaa Pekɩɩm Sõngã saka ne yamleoog n kõ a vɩɩmã yãg a yiibã piis yĩnga. A yeela woto: “Yaa mam meng n kõt-a. Mam tara noor tɩ kõ, la m tara noor tɩ leb n deeg-a. Mam deega tõ-kãng m Ba nengẽ.” A sẽn gom woto wã, welgr n zĩnd Zʋɩf rãmbã sʋka.

Kʋʋngã sʋka neb wʋsg n yeele: “Zĩni n tar bãmba. Bãmb yaa gãeenga. Yaa bõe tɩ yãmb kelgd bãmba?” La neb a taab ra yetame: “Gom-kãens ka zĩn sẽn tar a soab goam ye.” Tõeeme tɩ neb a taab ra tagsda a Zezi sẽn sãoog rao sẽn dog ne zondã kiis a wãn sẽn da loogã yelle. Rẽ n so tɩ nin-kãens paas woto: “Zĩn tõe n puka zõens nin la?” Zã 10:1-22; 9:1-7; Luk 12:32; Wilgri 14:1, 3; 21:3, 4; Yɩɩl Sõamyã 37:29.

▪ Rɩk-n-kõ wã kibs yaa bõe, la wakat bʋg la b maand-a?

▪ Bõe n da yaa pipi yãgrã, la ãnda n da ya a gũuda?

▪ Wãn to la gũudã pak n kõ Pekɩɩmã, la b talla piisã n kẽes bõe pʋgẽ rẽ poore?

▪ Pekɩɩm Sõngã yãg a yiib neb yaa ãnda rãmba, la b lebgda bãg a wãna?