Zãmsg 10
Yɛl Wẽnnaam sẽn kisi
Y tagsg segd n yɩɩ wãn ne bũmb nins Wẽnnaam sẽn yeel tɩ yaa wẽngã? (1)
Bõe la d pa segd n maan ne d raoolmã bɩ ne d poglmã? (2)
Kiris-ned tagsg segd n yɩɩ wãn ne ziri yagbo? (3) ne ligdã reem toɛy-toɛyã? (3) ne wagdem (3) ne nen-kɛglem tʋʋma? (4) ne tɩtã? (5) la ne rã-tɩgre? (6)
Wãn to la ned tõe n bas minim wẽnse? (7)
1. Wẽnnaam sõgen dãmbã nonga neere. La b togame me n kisg wẽnga. (Yɩɩl Sõamyã 97:10) Woto rat n yeelame tɩ b zãag b mens ne yel-manesem nins Wẽnnaam sẽn kisã. Yel-manesem kãens sãnda la bʋse?
2. Yoobo: Pag ne rao sẽn lagemd taab n yaool n pa kẽ kãadem, kãadem pʋgẽ yoobo, ned sẽn lagemd ne rũnga, ned sẽn kẽed ne a roagda, rap ne rap bɩ pagb ne pagb sẽn gãe taaba, woto fãa yaa yel-wẽn-kãsems Wẽnnaam nifẽ. (Maankʋʋre 18:6; Rom dãmba 1:26, 27; 1 Korẽnt dãmba 6:9, 10) Pag ne rao sã n pa kẽ kãadem n yaool n vɩ ne taaba, b segd n welga taaba, pa rẽ bɩ b kẽ kãadem tɩ zems ne laloa wã.—Hebre dãmba 13:4.
3. Ziri yagbo, ligd reem la wagdem: Wẽnnaam a Zeova pa tõe n yag ziri ye. (Tɩt 1:2) Neb nins me sẽn dat n ta a yamã pa segd n yag ziri ye. (Yelbũna 6:16-19; Kolos rãmba 3:9, 10) Rat wʋsg yam n be ligd reem buud fãa pʋgẽ. Rẽ n so tɩ kiris-nebã pa kẽesd b mens ligd reem baa a ye pʋgẽ ye. Wala makre, lotori, wed-moos zoeese, la tɛn-tɛɛga. (Efɛɛz rãmba 5:3-5) Sẽn paase kiris-nebã pa zuud ye. B pa raad bũmb b sẽn mi tɩ b zuume ye. B leb n pa rɩkd bũmb b sẽn pa kõ-b sor tɩ b rɩk ye.—Yikri 20:15; Efɛɛz rãmba 4:28.
4. Sũ-yikr la nen-kɛglem: Sũ-yikr sẽn ka koak tõe n kɩtame tɩ ned tʋm nen-kɛglem tʋʋmã. (Sɩngre 4:5-8) Nen-kɛglem soab pa tõe n yɩ Wẽnnaam zoa ye. (Yɩɩl Sõamyã 11:5; Yelbũna 22:24, 25) D pa segd n dok d sũuri, bɩ n maan wẽng n lebs ye.—Yelbũna 24:29; Rom dãmba 12:17-21.
5. Maan f to tɩɩm, la tɩtã rɩɩbo: Neb kẽer tũnugda ne zĩn-dãmb tõog n baood n na n sãoog bãase. Neb a taab me maanda b bɛɛb tɩɩm n dat tɩ b lʋɩ bãag wall b ki menga. Yaa a Sʋɩtãan n be tʋʋm-kãensã poorẽ. Rẽ n so tɩ kiris-nebã pa segd n maan bõn-kãensã baa a yembr ye. (Tõodo 18:9-13) Ned sã n maan tõnd tɩɩm, yaa zood ning tõnd sẽn tar ne a Zeova wã n tõe n kogl-d n yɩɩda.—Yelbũna 18:10.
6. Rã-tɩgre: Pa wẽng tɩ d yũ divẽ, bɩɛɛre, bɩ rãam buud a to bilf ye. (Yɩɩl Sõamyã 104:15; 1 Tɩmote 5:23) La yaa rãamã yũub wʋsg la rã-tɩgrã n yaa wẽng Wẽnnaam nifẽ. (1 Korẽnt dãmba 5:11-13; 1 Tɩmote 3:8) Rãam yũ tɩ loog tõe n kõo ned bãase, la wã a zaka. A tõe n kɩtame me t’a lʋɩ kʋɩɩbg pʋgẽ nana-nana.—Yelbũna 23:20, 21, 29-35.
7. Neb nins sẽn maand bũmb nins Wẽnnaam sẽn yet tɩ pa sõma wã ‘ka na n paam Wẽnnaam soolmã ye.’ (Galat dãmba 5:19-21) Yãmb sã n sɩd nong Wẽnnaam la y rat n ta a yam, y tõe n basa tʋʋm kãensã. (1 Zã 5:3) Modg-y n kisg-y bũmb ning Wẽnnaam sẽn yeel tɩ yaa wẽngã. (Rom dãmba 12:9) Tũud-y neb nins yel-manesem sẽn tat Wẽnnaam yamã. (Yelbũna 13:20) Y sã n tũud kiris-neb tẽeb sẽn bɩ, tõe n sõng-y-la wʋsgo. (Zak 5:14) Sẽn yɩɩd fãa teeg-y Wẽnnaam, n pʋʋsd-a n kot-a sõngre.—Filip rãmba 4:6, 7, 13, Sebr Sõngo.
[Foto rãmba, seb-neng 20, 21]
Wẽnnaam kisa rã-tɩgre, wagdem, ligd reem la nen-kɛglem tʋʋmã