Yãmb tõe n yɩɩ a Zeova zoa

A Zeova ratame tɩ y bãng-a sõma. Bõe yĩnga? A miime tɩ y sã n baood n bãngd a sẽn yaa Wẽnnaam ning buudã, la y baood n bãngd a a noyã la a raabã me, y na n dat n yɩɩ a zoa. Yãmb sɩd tõe n yɩɩ Wẽnnaam zoa bɩ? (Karm-y Yel-bũn 3:32.) Bõe la y tõe n maan n lebg a zoa? Biiblã pʋgẽ, b leokda sogs-kãensã, la b wilgdẽ me tɩ d sã n paam n lebg a Zeova zoa, rẽ n tar yõod n yɩɩd zood buud fãa.

1. Bõe la a Zeova yet yãmb tɩ y maane?

“Bɩ y kolg Wẽnnaam, la bãmb me na kolg yãmba.” (Zak 4:8) Woto rat n yeelame tɩ bõe? A Zeova yeta yãmb tɩ y bao a zoodo. Neb kẽer tõe n getame tɩ yaa toog tɩ b tẽ tɩ b tõe n yɩɩ Wẽnnaam zoa, bala b pa tõe n yã-a ye. La Biiblã sẽn yaa a Zeova Gomdã pʋgẽ, a wilga bũmb ning fãa d sẽn segd n bãng a sẽn yaa Wẽnnaam ning buudã wɛɛngẽ, sẽn na yɩl tɩ d tõog n paam a zoodo. D sã n karemd Wẽnnaam goamã sẽn be Biiblã pʋgẽ wã, tõnd ne a Zeova zoodã pãng paasdame, baa d sẽn zɩ n yã-a wã.

2. Bõe yĩng tɩ y sã n paam a Zeova zood bɩ tar yõod n yɩɩd zood buudã fãa?

Ned kae n nong yãmb n ta a Zeova ye. A ratame tɩ y paam sũ-noogo. A leb n datame tɩ y sã n wa rat sõngre, bɩ y pʋʋs-a n kose. Y tõe n “sika y yɩɩrã fãa n bas ne bãmba, bala bãmb geta yãmb yelle.” (1 Pɩyɛɛr 5:7) A Zeova teenda a zo-rãmbã, n belsd-b la a kelgd-b wakat fãa.​—Karm-y Yɩɩn-sõamyã 94:18, 19.

3. Bõe la a Zeova rat tɩ d maan n tõog n yɩ a zoa?

A Zeova nonga ninsaalbã fãa, la a ‘zoodã yaa neb nins sẽn zoet yẽ wã yĩnga.’ (Yɩɩn-sõamyã 25:14, Wẽnnaam Sebre, 1983) A Zeova ratame t’a zo-rãmbã modgd n maand bũmb nins a sẽn get tɩ yaa sõma wã, la b zãagd b mens ne bũmb nins sẽn yaa wẽng a nifẽ wã. Neb kẽer tõe n tagsdame tɩ b pa na n tõog n maan bũmb nins fãa a Zeova sẽn dat tɩ b maanã, la b zãag b mens ne bũmb nins fãa sẽn yaa wẽng ye. La a Zeova yaa wʋmda. A sũur nooma ne ned ning fãa sẽn sɩd nong-a, la a maand a sẽn tõe fãa n na n ta a yam.​—Yɩɩn-sõamyã 147:11; Tʋʋma 10:34, 35.

D BAO N BÃNG N PAASE

4. A Abrahaam ra yaa a Zeova zoa

A Abrahaam kibarã sẽn be Biiblã pʋgẽ wã tõe n sõnga tõnd tɩ d bãng yɩ Wẽnnaam zoa sẽn dat n yɛɛlga. B ra boonda a Abrahaam t’a Abram me. Karm-y Sɩngr 12:1-4 sẽn gomd a Abrahaam yellã. Rẽ poor bɩ y leok sogsgã:

• Bõe la a Zeova yeel a Abrahaam t’a maane?

• Bõe la a Zeova pʋlm-a?

• Bõe la a Abrahaam maan-yã?

5. A Zeova sẽn dat t’a zo-rãmbã maane

D mi n datame tɩ d zo-rãmbã maan bũmb kẽere.

• Bõe la yãmb dat tɩ y zo-rãmbã maan n kõ-yã?

Karm-y 1 Zã 5:3, tɩ rẽ poor bɩ y leok sokrã:

• Bõe la a Zeova rat t’a zo-rãmbã maane?

Sẽn na yɩl n sak a Zeova, tõe tɩ d segd n toeema d yel-manesmã la d zʋgã. Karm-y Ezayi 48:17, 18, tɩ rẽ poor bɩ y leok sokrã:

• Bõe yĩng t’a Zeova rat t’a zo-rãmbã toeem bũmb kẽere?

6. A Zeova sẽn sõngd a zo-rãmbã to-to

VIDEO: M pa tõe n togs a Zeova sẽn maan n kõ maamã n sa ye (3:20)

• Bõe la a Zeova maan n sõng pagã sẽn be video wã pʋgẽ wã, t’a tõog n mao ne a tags-kɛgã?

Karm-y Ezayi 41:10, 13, tɩ rẽ poor bɩ y leok sogsgã:

• Bõe la a Zeova pʋlem t’a na n maan n kõo a zo-rãmbã fãa?

• Yãmb tagsdame t’a Zeova yaa zo-sõng bɩ? Bõe yĩnga?

7. Sẽn na yɩl n yɩ a Zeova zoa, d segd n gomda ne-a la d kelgd-a

Zo-rãmb sã n sõsd ne taaba, b zoodã pãng paasdame. Karm-y Yɩɩn-sõamyã 86:6, 11, tɩ rẽ poor bɩ y leok sogsgã:

• Wãn to la d tõe n gom ne a Zeova?

• Wãn to la a Zeova gomd ne tõndo?

KƲMSGO

A Zeova ratame tɩ yãmb yɩ a zoa. A na n sõnga yãmb tɩ y kolg-a.

Lebg-n-gese

• Wãn to la a Zeova sõngd a zo-rãmbã?

• Bõe yĩng t’a Zeova rat t’a zo-rãmbã toeem bũmb kẽere?

• Yãmb tagsdame tɩ yaa toog wʋsg tɩ y yɩ a Zeova zoa bɩ? Bõe yĩnga?

BŨMB A TAABA

Y sã n lebg a Zeova zoa, wãn to la na n naf yãmba?

“A Zeova yaa Wẽnnaam d sẽn sɩd segd n bao n bãnge” (Yʋʋmd 2003 wao-fugd kiuug rasem 15 Gũusg Gasgã)

D sẽn tõe n maan to-to n lebg Wẽnnaam zoa.

“M maanda wãn n lebg Wẽnnaam zoa” (Les jeunes s’interrogent. Réponses pratiques [Volume 2], sak 35)

Bõe n kɩt tɩ pag a yembr tagsdẽ t’a sẽn lebg a Zeova zoa wã fãag-a lame?

“M da pa rat n ki ye!” (Yʋʋmd 2017 Gũusg Gasgã N^o a 1 )

Kom-bɩɩs sẽn togsd b tagsg sẽn yaa a soab a Zeova zugu.

F sã n yaa Wẽnnaam zoa, nafd-f-la wãn to? (1:46)