A Zeova yaa Wẽnnaam d sẽn sɩd segd n bao n bãnge

YÃMB sẽn mi bũmb nins Wẽnnaam zugã sã n yaa bilf bala, rẽ yĩnga, bũmb sẽn tar yõod wʋsg pa paoog yãmb sɩda? Yaa vẽeneg tɩ n-ye. Bõe yĩnga? Bala wa neb milyõ-rãmb sẽn bãngã, y sã n baood n bãngd Wẽnnaam ning yell Biiblã sẽn gomdã, na n naf-y-la wʋsgo. Y vɩɩmã na n talla bark masã menga, la wakat fãa yĩnga.

Wẽnnaam a Zeova sẽn yaa soab ning sẽn vẽneg tɩ b gʋls Biiblã ratame tɩ d bao n bãng-a. Yɩɩn-gʋlsdã yeelame yaa: “Bɩ nebã bãng tɩ yãmb a soab ning yʋʋr sẽn yaa a Zeova wã, yãmb y ye tãa bal n yaa sẽn ka-a to dũniyã tɛk fãa.” A bãngame tɩ d sã n bao n bãng Wẽnnaam, yaa tõnd mengã nafr yĩnga. “Mam yaa a Zeova, fo Wẽnnaamã, soab ning sẽn zãmsd foom f meng nafr yĩnga.” D sã n bao n bãng Wẽnnaam a Zeova sẽn yaa Sẽn ka-a to wã, wãn to la nafd tõndo?—Yɩɩn-sõamyã 83:18; Ezayi 48:17.

Pipi bũmb yaa tɩ d paamdame t’a wilg tõnd sore, tɩ d tõe n mao ne d daar fãa zu-loeesã, n tẽed manegre, la d tar sũur pʋgẽ bãane. Sẽn tar yõod n yɩɩda, d sã n mi a Zeova sõma, sõngda tõnd tɩ d paam sogsg nins sẽn tar yõod nebã sẽn wae n sok b mens dũniyã gill zugã leoore, la kɩt tɩ me tɩ d tar yam-sõngo. Sogs-kãens la bʋse?

Yãmb vɩɩmã tara võor bɩ?

Baa ne ninsaalbã bãngrã sẽn paasd tɛknolozi wã wɛɛngẽ wã, rũndã-rũndã nebã ket n sokda b mens sogsg kẽere. ‘Bõe yĩng tɩ d be tẽngã zugu? Yɛ la d rabda? Vɩɩmã võor yaa bõe?’ Ned sã n pa paam sogs-kãensã leoore, a vɩɩmã pa na n tall võor ye. Rẽ yĩnga, neb wʋsg bee yel-kãngã pʋgẽ bɩ? B maana vaeesg Alemayn soolmẽ wã yʋʋmd 1990 wã baasgẽ tɩ wilg tɩ neb nins b sẽn sok sogsgã pʋɩ-sʋkã mi n tagsdame tɩ vɩɩmã pa tar võore, pa rẽ bɩ yaa wakat-wakat la b tagsd woto. Tõe tɩ yaa woto me yãmb sẽn vɩyẽ wã.

Ned sã n tagsd tɩ vɩɩmã pa tar võore, yaa toog ne nin-kãng soabã t’a tall bõn-daab sẽn yaa takɩ. Neb wʋsg sẽn tagsd woto wã, kɩtame tɩ b rɩk b sẽkã fãa n baood tʋʋm sẽn yaood sõma, pa rẽ bɩ arzɛgse. B sẽn tagsd tɩ vɩɩmã pa tar võorã tõe n waa zu-loɛɛg meng-menga. Tõe n kɩtame tɩ b pa rat n le vɩɩmd ye. Yell a woto buud paama pag a ye sẽn tar yʋʋm 31, n yaa pʋg-neere. Sebr a yembr pʋgẽ, (International Herald Tribune) b yeelame “t’a roagdbã ra yaa rakã-rãmba, neb yʋy sẽn yi la sẽn tar ziiri.” Baa ne a sẽn da vɩ naar pʋgẽ wã, a ra getame t’a yaa a yembre, la t’a vɩɩmã pa tar võor ye. A vela ti-biis n kʋ a menga. Tõe tɩ yãmb mii neb sẽn da tagsd tɩ b yaa b yembre, tɩ b yellã wa baas woto.

Yãmb zoe n wʋma nebã sẽn yet tɩ siãnsã tõe n sõnga tõnd tɩ d paam sogsg nins d sẽn sokd d mens vɩɩmã wɛɛngẽ wã leoor bɩ? Alemayn sebr a ye (Die Woche) b sẽn yiisd semen fãa pʋgẽ, b yeelame yaa: “Baa siãnsã sẽn yetã sã n yaa sɩda, a pa tõe n sõng nebã sõma b tẽebã wɛɛngẽ ye. Wõnda evolisiyõ wã zãmsgã yaa zãms-kʋdre. Sẽn paase, baa zãmsg ning b sẽn boond tɩ physique quantique sẽn tar toeengã pa tõe n sõng ninsaalbã tɩ b yamã gãand bãan ye.” Bũmb nins siãnsã bãngdb sẽn vaees n yã wã sõnga wʋsg tɩ d tõog n bãng bõn-vɩɩs buud toor-toorã vɩɩmã sẽn yaa to-to, sebgã, koomã la bũmb a taab sẽn sõngd tɩ vɩɩmã ket n beẽ. La b pa tõe n sõng tõnd tɩ d bãng d sẽn be tẽngã zugã võore, la d sẽn dabdẽ wã ye. D sã n teega siãnsã bala, d pa na n tõog n paam sogsg nins d sẽn sokd d mens vɩɩmã wɛɛngẽ wã leoor ye. Zʋrnall a ye pʋgẽ, (Süddeutsche Zeitung) b yeelame yaa: “Yaa tɩlɛ tɩ d paam tɩ b wilg-d sore.”

Yaa d Naandã a ye bal n tõe n wilg-d sor tɩ zemse. Sẽn mik tɩ yaa yẽ n naan ninsaalbã tɩ b be tẽngã zugã, a segd n mii b sẽn be be wã võore. Biiblã wilgdame t’a Zeova naana ninsaalbã sẽn na yɩl tɩ b rog kamb n pid tẽngã, la b ges a yelle. Bãmb n segd n ges bũmb nins fãa sẽn be tẽngã zugã yelle. Ninsaalbã segd n dɩka a Zeova togs-n-taar b sẽn maandã fãa pʋgẽ, n bɩɩs zʋg-sõma buud toor-toore. Wala makre, tɩrlem, yam, la nonglem. D sã n bãng a Zeova sẽn naan tõndã võore, d bãngda d sẽn be tẽngã zugã võore.—Sɩngre 1:26-28.

Bõe la y tõe n maane?

‘Bõe yĩng tɩ d be tẽngã zugu? Yɛ la d rabda? Vɩɩmã tara võor yaa bõe?’ Sã n mikame tɩ y ket n nan pa paam sogs-kãensã leoore, bõe la y segd n maane? Biiblã yeta yãmb tɩ y bao n bãng a Zeova sõma. Sɩd me a Zeezi yeelame yaa: “Ad vɩɩm sẽn ka sɛtã sore: B segd n bãnga foom f ye bal sẽn yaa Wẽnnaam sɩd-sɩdã, la a Zeezi Kirist fo sẽn tʋm a soabã.” D sagend-y lame me tɩ y modg n bɩɩs zʋg-sõma buud toor-toore, sẽn yɩɩd fãa nonglmã, la y modg n yãk yam n naag Wẽnnaam Rĩungã poorẽ dãmbã. Rẽ na n sõng-y lame tɩ y vɩɩmã tall võore, la y tẽ tɩ beoog na n yɩɩ neere. Y na n paama sogsg nins y sẽn sokd y mensã leoore.—Zã 17:3; Koɛɛg soaba 12:13.

Y sã n paam sogs-kãensã sẽn tar yõodã leoore, wãn to la rẽ na n naf yãmba? A Hans kibarã tõe n sõnga tõnd tɩ d bãng rẽ.a Yʋʋm a wãn sẽn looge, a Hans ra tẽeda zond-yaar tɩ Wẽnnaam beeme. La a tẽebã ra pa nafd-a ye. A ra nonga dorgã yũubu, yoobo, tʋʋm-beedo, la a ra zao montɛ-bɛda. A yeelame “t’a vɩɩmã ra pa tar võore, a ra pa tar sũ-noog me ye.” A Hans sẽn wa n tar yʋʋm 25, a yãka yam n na n maag a yĩng n karemd Biiblã, n bao n bãng Wẽnnaam sõma. A sẽn da baood n bãngd a Zeova n paasdẽ wã, n bãng tɩ vɩɩmã tara võorã, a toeema a sẽn da vɩ to-to, n deeg lisg n lebg a Zeova Kaset soaba. Yʋʋm 10 la woto a sẽn yaa so-pakda. A pelga a pʋg n yeel yaa: “F sã n tũud a Zeova, rẽ la sõma n tɩ yɩɩda. Bũmb kae t’a yõodã ta rẽ ye. M sẽn bãng a Zeova wã sõng-m lame tɩ m vɩɩmã tar võore.”

Yaa sɩd tɩ pa vɩɩmã sẽn tar võorã bal yell n pak neb wʋsg ye. Dũniyã yɛlã sẽn tar kengrã, sokr a to la neb wʋsg sokd b mense.

Bõe yĩng tɩ yel-beedã paamd tõndo?

Yel-beed sã n paam neba, b mi n sokda b mens yaa: Bõe yĩng tɩ yel-beed paam tõndo? D sã n paam sok-kãngã leoore, na n sõng-d lame tɩ d paam belsgo, yel-beed sã n wa paam-do. D sã n pa paam sokrã leoore, d na n ket n namsdame, hal n wa lebg sũ-to-neda. Yɩɩ woto ne pag a ye yʋʋr sẽn boond t’a Bruni.

A Bruni yeelam yaa: “Yʋʋm a wãn la woto, mam bi-pɛɛlgã sẽn maan kaalem. Mam sẽn da tẽed Wẽnnaamã yĩnga, m tɩ yãa Katolik tũudmã prɛtr a yembr n na n paam belsgo. A yeela maam tɩ Wẽnnaam talla m biig a Suzann n kẽng saasẽ, la tɩ masã a lebga malɛka. M biigã kaalmã kɩtame tɩ m yirbi. Rẽ sẽn yãk a toogo, m da kisa Wẽnnaam, bala m da tẽedame tɩ yaa yẽ n wa n tall-a n kẽng saasẽ.” A Bruni namsa woto n kaoos yʋʋm wʋsgo. A paasame yaa: “Rẽ poore, a Zeova Kaset soab n tũnug ne Biiblã sõng maam tɩ m bãng tɩ m pa segd n kisg Wẽnnaam ye. Pa a Zeova n wa n tall a Suzann n kẽng saasẽ, a pa lebg malɛk me ye. A sẽn da bẽedã yaa tõnd sẽn yaa neb sẽn pa zems zãngã yĩnga. A Suzann gõeeme n gũud wakat ning a Zeova sẽn na n wa vʋʋg-a wã. M bãngame me t’a Zeova naana ninsaalbã n dat tɩ b vɩɩmd wakat sẽn kõn sa arzãnã pʋgẽ tẽngã zugu, la tɩ rẽ na n pidsa ka la bilfu. Mam sẽn wa n bãng a Zeova sẽn yaa Wẽnnaam ningã, maam ne yẽ zoodã pãng paasame, m toogã me sɩnga boogre.”—Yɩɩn-sõamyã 37:29; Tʋʋma 24:15; Rom dãmbã 5:12.

Yel-beed buud toor-toor n paamd neb milyõ-rãmba. Wala makre, tõnd mensã zu-loeese, zaba, kom, bɩ sabab-wẽnse. A Bruni sẽn bãng Biiblã pʋgẽ tɩ pa a Zeova n wat ne yel-beedã, t’a pa naan ãdem-biisã n dat tɩ b namsã, la t’a na n kɩtame tɩ wẽnemã sa ka la bilfã bels-a lame. Wẽnemã sẽn tar paasgã yaa kaset tɩ tõnd vɩɩ dũni-kãngã “yaoolem wakatã” sasa. Toeen-kãseng ning tõnd sẽn gũudã kolgame.—2 Tɩmote 3:1-5; Matiye 24:7, 8.

Baood-y n bãngd-y Wẽnnaam

A Hans ne a Bruni ra pa mi Wẽnnaam sõma ye. B ra tẽeda Wẽnnaam zond-yaare. B sẽn bao sẽk n bao n bãng a Zeova sõma wã, b modgrã pa yɩ zaalem ye. B paama sogsg nins sẽn tar yõod n tɩ yɩɩdã leoore. Rẽ sõng-b lame tɩ b tar sũur pʋgẽ bãane, la b tẽed manegre. Yɩɩ woto me ne a Zeova Kaset rãmb milyõ-rãmbã.

Sẽn na yɩl n bãng a Zeova sõma, d segd n deng n maaga d yĩng n karem Biiblã. Biiblã sõngda tõnd tɩ d bãng a sẽn yaa Wẽnnaam ninga, la a sẽn dat tɩ d maane. Yɩɩ woto la neb kẽer maan pipi kiris-nebã wakatẽ. A Luk sẽn yɩ kʋdemd yɛl-mit la logtorã yeelame tɩ Zʋɩf-rãmb nins sẽn da be Beere, Gɛrs soolmẽ wã tigingã neb “reega goamã [a Poll ne a Sɩlaas sẽn taas-bã] ne b sũy fãa, n da maagd b yĩns n vaeesd Gʋls-sõamyã daar fãa n dat n bãng gom-kãens sã n yaa sɩda.”—Tʋʋma 17:10, 11.

Pipi kiris-nebã ra tigimda taab n maand tigissã. (Tʋʋma 2:41, 42, 46; 1 Korẽnt rãmbã 1:1, 2; Galat-rãmbã 1:1, 2; 2 Tesalonik rãmbã 1:1) Yaa woto me rũndã-rũndã. A Zeova Kaset rãmbã tigimda taab n maand tigissã. B maanda tigis-kãense, sẽn na yɩl n sõng ned kam fãa tɩ yẽ ne a Zeova zoodã pãng paase, t’a tũud a Zeova ne sũ-noogo. D sã n tigimd ne a Zeova Kaset rãmb nins sẽn be tõnd babgẽ wã, na n naf-d lame. Ninsaalbã sẽn dɩkd Wẽnnaam ning b sẽn tũudã togs-n-taarã yĩnga, a Zeova Kaset rãmbã me rɩkda a Zeova togs-n-taare, n bɩɩsd zʋg-sõma buud toor-toore. Dẽnd d sã n naagd a Zeova Kaset rãmbã n maand tigissã, sõng-d lame tɩ d bãngd a Zeova sõma n paasdẽ.—Ebre-rãmbã 10:24, 25.

Rẽ yĩnga, yɩl n bao n bãng Wẽnnaam baooda modgr wʋsg bɩ? Yaa vẽeneg tɩ n-ye. La yaa vẽeneg tɩ d segd n maana modgr wʋsg bũmb a taab wɛɛngẽ me. Bɩ bõe? Tags-y n ges-y ned sẽn maand ɛspoor sẽn segd n modg to-to, sẽn na yɩl n wɩsg a yĩngã. Wala makre, a Jean-Claude Killy sẽn yit Fãrense, la sẽn maand ɛspoor buud galaasã zug naagame n maan b sẽn boond a soab tɩ ze olẽmpikã, n paam keoor ning b sẽn kõt sẽn yɩ-a pipi wã. A yeelame tɩ sẽn na yɩl n naag n maan ɛspoor kãngã, ad d sẽn segd n maane: “Seglgã sɩngda yʋʋm piig sẽn deng wags taabã daare, la f tagsd rẽ yell daar fãa. . . . Yʋʋmdã rasem 365 wã fãa pʋgẽ, f segd n segla f yamã la f yĩngã.” Sẽk ning fãa d sẽn na n kẽes seglgã pʋgẽ, la modgr ning fãa d sẽn na n maanã, yaa sẽn na yɩl bal n naag n maan wags taab sẽn kaoosd minit piig bala. D sã n baood n bãngd a Zeova, d na n paama keoor sõmblem sẽn yɩɩd rẽ hal zĩig sẽn zãre, la sẽn na n kaoos wakat sẽn kõn sa.

Tõnd ne a Zeova zoodã pãng na n paasdame

Tõnd sʋkã, ãnd n dat tɩ bũmb sẽn tar yõod a vɩɩmã pʋgẽ põsg-a? Ned baa a ye. Yãmb sã n tagsdame tɩ y vɩɩmã pa tar võore, pa rẽ bɩ y ratame n bãng yel-beedã sẽn paamd tõndã võore, bɩ y yãk yam n bao n bãng a Zeova, Wẽnnaam ning yell Biiblã sẽn gomdã. Y sã n baood n bãngd-a, y vɩɩmã na n lebga sõma n paase, la rẽ na n kaoosa wakat fãa yĩnga.

Rẽ yĩnga, sasa n na n wa zĩnd tɩ pa le ya tɩlɛ tɩ d ket n baood n bãngd a Zeova bɩ? Neb nins sẽn tũud a Zeova na maan yʋʋm wʋsgã ket n maanda sũ-noogo, bũmb nins b sẽn zoe n mi a Zeova zugã, la bõn-paalã b sẽn ket n bãngd a zugã wɛɛngẽ me. D sẽn bãngd bũmb nins a Zeova zugã kõt-d-la sũ-noogo, la sõngdẽ tɩ tõnd ne yẽ zoodã pãng paasdẽ. Bɩ d kell n tall tẽn-tʋmd a Poll tagsa wã buudu. A ra yeelame yaa: “Ad Wẽnnaam sɩd yaa kõata! Ad a yamã la a bãngrã waooga! Ned pa tõe n wʋm a bʋ-kaoor toor-toorã võore, la ned pa tõe n bãng a soayã ye! Bala ‘ãnda n tõog n bãng a Zeova tagsgo, wall ãnda n lebg a sagenda?’ ”—Rom dãmbã 11:33, 34.

[Tẽngr note]

[Seb-neng]

Rũndã-rũndã nebã ket n sokda b mens sogsg kẽere:

‘Bõe yĩng tɩ d be tẽngã zugu? Yɛ la d rabda? Vɩɩmã võor yaa bõe?’

[Seb-neng]

“Mam sẽn wa n bãng a Zeova sẽn yaa Wẽnnaam ningã, maam ne yẽ zoodã pãng paasame,,”

[Seb-neng]

“F sã n tũud a Zeova, rẽ la sõma n tɩ yɩɩda. Bũmb kae t’a yõodã ta rẽ ye. M sẽn bãng a Zeova wã sõng-m lame tɩ m vɩɩmã tar võore.”