B yɩɩ wẽn-sakdb sẽn kõ tõnd mak-sõngo
1 Yaa yʋʋmd 1937 wã pʋgẽ la zall so-pakrã tʋʋmd sɩng-yã. Yʋʋm-kãnga, siglã kosa rap la pagb sẽn da mi koɛɛgã mooneg sõma tɩ b sak n na n tɩ moon zĩig ning fãa b sẽn na n tʋm-ba. Sẽn sɩng ne rẽ n tãag masã, zall so-pakdbã ket n yaa wẽn-sakdb sẽn kõt tõnd mak-sõngo, tɩ d segd n dɩk b togs-n-taare.—Heb. 6:12.
2 Yaa bãmb n lʋɩ taoore: Sɩngrẽ wã, zall so-pakdbã ra gilgda ne fõnograf rãmb n moond zak-zaka. B sã n lebg n tɩ na n kaag b sẽn da sõs ne neb nins Biiblã zugã, b ra tara sõss b sẽn dɩk disk rãmb zutu, n da ningdẽ tɩ b kelgdẽ. Yaa galʋ-tẽn-bɛd nins pʋsẽ tigims sẽn da zoe n beẽ wã la b ra maand woto. Kaoosg zugẽ, b tʋma zall so-pakdb zĩis nins Rĩungã koe-moondb raab sẽn da yaẽ wʋsgã. B ra tʋgd n kaagda neb nins sẽn tʋll n bãng koɛɛgã n paasã, n zãmsd Biiblã ne-ba. B sẽn modg ne b sũy fãa n maan dẽ wã, kɩtame tɩ b tõog n lugl tigims paalse. Leb n yaa b sẽn moon koɛɛgã ne yẽesem woto wã me n kɩt tɩ siglgã paam fɩɩgr ning d sẽn ne rũndã-rũndã wã. (Ezai 60:22) Zall so-pakdbã ket n sõngda wʋsg n kɩtdẽ tɩ koe-noogã tat “dũniyã fãa.”—Kol. 1:23.
3 Segdame tɩ d rɩk b togs-n-taare: Zall so-pakdb kẽer sɩng n bee so-pakrã pʋgẽ hal yʋʋm wʋsg masã. Yʋʋm kãens fãa pʋgẽ, wẽn-sakdb kãensã fãa, b rap la b pagb sega yɛl toɛy-toɛy tɩ keng b tẽebã. (1 Pɩɛ. 1:6, 7) B sak n monga b mens naar buud toor-toor n kẽng zĩis nins b sẽn da rat koe-moondba. Rũndã-rũndã, b wʋsg kʋʋlame tɩ b laafɩ wã booge, bãmb kẽer me tara zu-loees a taaba. (2 Kor. 4:16, 17) La ne rẽ fãa, b tʋʋmã ‘ket n womda biis b kʋʋlmã wakate.’ (Yɩɩl 92:15) B teega a Zeova n paamd a barkã.—Yɩɩl 34:9; Yel. 10:22.
4 Hakɩka, zall so-pakdbã segda ne pẽgr wʋsgo. Y sã n tara zall so-pakdb y tigingã pʋgẽ bɩ y pẽnegd-ba, n paam n dɩ b minimã nafa. Wilg-y-b tɩ y nand-b-la wʋsg b sẽn yaa Rĩungã koe-moondb hal daar zãrã yĩnga. B modgrã na n kenga y raoodo. Neb nins fãa sẽn dɩkd zall so-pakdbã sẽn yaa wẽn-sakdbã togs-n-taarã na n paama a Zeova barkã, bala a “nonga sɩd dãmba.”—Yel. 12:22.