Yãmb Sogsgã Leoore

◼ Bõe takɩ la d tõe n maan n sõng so-pakdbã?

Yʋʋmd 2009 wã pʋgẽ, dũniyã gill zugu, wakat fãa so-pakdbã la zall so-pakdbã sõor da kolga 800 000. B rɩka b sẽkã, b pãngã, la b tarmã n sõng n moon Rĩungã koe-noogã zĩig fãa. (Yel. 3:9) A Zeova sũur tog n yɩɩ noog wʋsg ne b modgrã. Wãn to la tõnd me tõe n dɩk a Zeova togs-n-taare, n sõng n paas b sũ-noogã, tɩ b kell n modg ne b tʋʋmdã?

Sãmbg sẽn ka be, d no-goamã tõe n kenga b raood tɩ b kell n modg ne so-pakrã. (Yel. 25:11) D tõeeme me n sigl d sẽkã n tõog n moond koɛɛgã ne-b semen fãa. D sã n na n moon ne so-pakdb kẽere, d tõe n kɩtame tɩ b bas b weefã, tɩ tõnd rɩk-ba. D sã n na n zomb bãmb rẽndã, d tõe n sõng-b-la ne esãens ligdi. (1 Kor. 13:5; Fil. 2:4) D tõeeme me n mi n boond so-pakdbã tɩ b wat n dɩt tõnd zakẽ wã.—1 Pɩɛ. 4:8, 9.

Biiblã kõta neb nins sẽn dengd n baood Rĩungã bas-m-yam t’a Zeova na n kõ-b-la bũmb nins sẽn yaa tɩlae ne-bã. (Yɩɩl 37:25; Mat. 6:33) A mi n tũnugda ne d saam-biisã sẽn be dũniyã gill zugã me n sõngd-ba. (1 Zã 3:16-18) La yaa vẽeneg tɩ so-pakdbã pa tẽed tɩ yaa saam-biisã n segd n ges bãmb depãens rãmbã yell ye. Rẽ n so tɩ b sã n wa be raab pʋgẽ bɩ b tõe n pa togs ned ye. La baasgo, d sã n gũusd n getẽ, d na n bãnga d sẽn tõe n maan bũmb ning vẽeneg n sõng so-pakdb nins sẽn modgd wʋsgã.—2 Kor. 8:14, 15.

Pipi kiris-nebã wakate, a Febe ra yaa pag sẽn tar yẽesem koɛɛgã mooneg pʋgẽ Sãnkre tigingã pʋgẽ. A sẽn wa n kẽng Rom, a Poll sagla Rom saam-biisã tɩ b ‘reeg-a tõnd Zusoabã maasem yĩng wa sẽn zems Wẽnnaam neba, la b sõng-a ne bũmb nins fãa a sẽn dat b sõngrã.’ (Rom 16:1, 2) Tõnd me tõe n sõnga d tigingã pʋgẽ wakat fãa so-pakdb la zall so-pakdbã sẽn moond koe-noogã n pa basdẽ wã.—Tʋʋ. 5:42.