Seglgã kɩtdame tɩ lebg-n-tɩ-gesã womd biisi
1. Koɛɛgã mooneg sẽn sɩng pipi kiris-nebã wakatẽ wã ra na n taa zĩ-bʋgo?
1 A Zezi zãmsa a karen-biisã sõma, sẽn na yɩl tɩ b tõog n moon ‘Rĩungã koe-noogã’ sõma. (Mat. 4:23; 9:35) Yɩɩ Palɛstin la a maan dẽ. La nand t’a rʋ saasẽ, a wilga kiris-nebã tɩ b na n moona koɛɛgã zĩig fãa ‘n maan buud fãa neb tɩ b yɩ yẽ karen-biisi.’—Mat. 28:19, 20.
2. Karen-biisã maaneg baoodame tɩ d maan bõe me?
2 Tʋʋm-kãngã baoodame tɩ d lebgd n tʋgd n get neb nins sẽn sak n kelg Wẽnnaam Rĩungã koe-noog la b wilg tɩ b rat n bãng n paasame wã, n zãms-b tɩ b sak bũmb nins fãa Kiristã sẽn wilgã. D sã n dat n tõogd n maand rẽ, d segd n segla d mens sõma.
3. Bõe la d tõe n maan n paam n lebg n tɩ ges ned d sẽn da moone?
3 D reng n segl d mense: Koe-moondb kẽer modgdame n baas b sõsgã ne sokre, la b yeel b kɛlgdã tɩ b na n wa sõsa rẽ zug nindaare. B yãame tɩ lebg-n-tɩ-gesã sasa, b sã n tik sõsg sẽn be Biiblã yetame sebrã pʋgẽ zug n sõse, sõngd-b lame tɩ b tõogd n sɩngd Biiblã zãmsg ne nebã zĩig pʋgẽ.
4. Bõe yĩng tɩ d pa segd n gũ seb-paalã n yaool n lebg n tɩ ges neb d sẽn da moone?
4 D sẽn paamd sɛbã vugr kiuug fãa wã pa rat n yeel tɩ d segd n gũu seb-paalã n yaool n tɩ ges neb d sẽn da moon ye. D tõe n sõsa sebr ning a soabã sẽn zoe n tarẽ wã zugu, sẽn na yɩl n sõng-a t’a rat n bãng n paase.
5. Bõe yĩng tɩ d segd n bãng d sẽn na n tɩ maan bũmb ning takɩ?
5 D bãng d sẽn na n maan bũmb ning takɩ: Nand tɩ d lebg n tɩ ges neda, d segd n dɩka sẽk bilf n ges d not rãmbã n bãng bũmb ning d sẽn dat n maanã. Wala makre, d tõe n sõsa sebr d sẽn da kãab-a zugu. Pa rẽ bɩ d kãab-a sebr sẽn gomd bũmb ning d sẽn da sõs yelle. D sã n da sok-a-la sokr n yaool n looge, d segd n bãngame tɩ d sẽn debd a nengẽ wã yaa sẽn na yɩl n leok sok-kãng me. D segd n laka Biiblã n karem verse sẽn teend bũmb ning d sẽn wilgd-a wã, t’a wʋm a võor sõma.
6. Bõe yĩng tɩ d lebgd n tʋgd n get neb nins d sẽn da moonã?
6 D rat n zãmsa nebã Biiblã: D sẽn dat bũmb ning yaa d sɩng Biiblã zãmsg ne nebã. Saam-biig a yembr n da moon rao a ye, n lebg n kẽng n na n tɩ bao n zãms-a Biiblã t’a zãgse. Sãam-biigã lebg n kẽnga ne seb-paala, n yeel woto: “Tõnd bee ka rũndã n wilgd nebã sokr a ye leoor sẽn be Biiblã pʋgẽ.” Raoã sẽn leokã, saam-biigã karma verse a ye Biiblã pʋgẽ. Rẽ poore, a yiisa sebr b sẽn tũnugd n zãmsd nebã Biiblã, n karem sull sẽn wɛgsd verse ning a sẽn karmã. La woto kɩtame tɩ raoã sak n zãmsd Biiblã.
7. Wãn to la yãmb sẽn segl sõma sõng-y tɩ y tõog n sɩng Biiblã zãmsg ne neda?
7 Rɩk sẽk n segl n yaool n lebg n tɩ ges nebã baooda modgr wʋsgo. La d sã n maan woto, d sũ-noogã na n paasame, la d na n tõog n sõnga neb nins sẽn nong sɩdã tɩ b rɩk vɩɩm sẽn pa satã sore.—Tʋʋ. 13:48.