Sak-y n deeg-y t’a Zeova nonga yãmba

1. Bõe n kɩt tɩ y rɩk y meng n kõ a Zeova? (Ges-y fotã me.)

YÃMB tẽra wakat ning y sẽn dɩk y meng n kõ a Zeova wã bɩ? Yãmb yãka yam n maan woto, y sẽn bãng-a la y nong-a wã yĩnga. Yãmb pʋlm-a lame tɩ y na n lʋɩɩsa a raabã taoore, la tɩ y na n kell n nong-a-la ne y sũurã fãa, ne y sɩɩgã fãa, ne y yamã fãa, la ne y pãngã fãa. (Mark 12:30) Rẽ tɛka, y sẽn nong-a to-to wã tara paasgo. Woto wã, ned sã n sok yãmb yaa: “Yãmb kɩsa sɩd tɩ y nonga a Zeova bɩ?” Y na n leokame tɩ bõe? Zĩig pʋgẽ, y na n leokame yaa: “Mam nong-a lame n yɩɩd ned buud fãa, la bũmb buud fãa!”

2-3. A Zeova ratame tɩ d kɩs sɩd ne bõe, la bõe yell la d na n gom sõs-kãngã pʋgẽ? (Zeremi 31:3)

² La ned sã n sok yãmb yaa: “Yãmb kɩsa sɩd t’a Zeova nonga yãmb bɩ?” Y na n leokame tɩ bõe? Y na n maanda sãmbs n pa rat n leoke, y sẽn tagsd tɩ y pa zems ne a Zeova nonglmã yĩng bɩ? Saam-bi-poak a ye roagdb sẽn nams-a a yãadmẽ yeelame: “Mam miime tɩ m nonga a Zeova. M pa sãmbd ne rẽ ye. La m sẽn wae n maand sãmbs bũmb ning wɛɛngẽ, yaa a Zeova sã n nonga maam.” Woto wã, y maanda wãn n bãng a Zeova sã n sɩd nonga yãmba?

³ A Zeova ratame tɩ y bas y yam t’a nong-y lame. (Karm-y Zeremi 31:3.) Sɩd-sɩda, a taka yãmb n pẽneg a menga. Sẽn paase, yãmb sẽn wa n dɩk y meng n kõ-a n deeg lisgã, y paama bũmb sẽn tar yõod wʋsgo. Y paamame t’a nong-yã, n maand-y neere. Rat n yeel t’a nong-y-la wʋsgo, ne nonglem sẽn ka sate. Nonglem-kãng kɩtame t’a get yãmb ne neb nins fãa sẽn maand sɩd ne-a wã wa neb “sẽn yaa toor zalle.” (Mal. 3:17) A Zeova ratame tɩ y kɩs sɩd t’a nonga yãmba, wa tẽn-tʋmd a Poll sẽn da kɩs sɩd t’a nong-a lame wã. A Poll ra kɩsa sɩd t’a Zeova nong-a lame, hal n yeel yaa: “Mam kɩsa sɩd tɩ kũum, vɩɩm, malɛgse, pãn-soaadba, bũmb sẽn be, bũmb sẽn wate, pãens rãmba, zãntlem, zulum, bɩ bõn-naandg a to pa na n tõog n welg tõnd ne Wẽnnaam nonglmã” ye. (Rom. 8:38, 39) Sõs-kãngã pʋgẽ, d na n yãa d sẽn segd n maneg n kɩs sɩd t’a Zeova nonga tõndã võore, la d sẽn tõe n maan to-to tɩ yɩ woto.

D SẼN SEGD N KƖS SƖD T’A ZEOVA NONG-D LAME WÃ VÕORE

4. Bõe la a Sʋɩtãan dat tɩ d tẽ, la wãn to la d tõe n kɩɩs-a?

⁴ D sã n kɩs sɩd t’a Zeova nong-d lame, na n sõng-d-la a Sʋɩtãan “sɩlem-tʋʋm” a ye taoore. (Efɛɛ. 6:11) A Sʋɩtãan maanda a sẽn tõe fãa sẽn na yɩl tɩ d bas a Zeova tũubu. A sɩlem-tʋʋmd a ye sẽn yaa wẽng n yɩɩd yaa a sẽn dat tɩ d tẽ t’a Zeova pa nong-dã. Ra tol-y n yĩm-y t’a na n tũnuga ne sebg buud fãa a sẽn paam ye. A wae n makda tõnd d sẽn wat n ka pãngã. Wala makre, d sã n wa koms raood yɛl sẽn maan pĩnd tɩ ket n namsd-d yĩnga, d sẽn maood ne zu-loees rũndã-rũndã yĩnga, wall d sẽn maand yɩɩr sẽn wat beoogã wɛɛngẽ yĩnga. (Yel. 24:10) A Sʋɩtãan yaa wa bõn-yẽeg sẽn wae n yõgd rũms nins sẽn ka pãngã. D sã n wa koms raoodo, a tũnugda ne rẽ n dat tɩ d bas a Zeova tũubu. La d sã n kell n kɩs sɩd t’a Zeova nonga tõndo, d na n tõog n kɩɩsa a Sʋɩtãana, t’a pa tõog n belg-d ne a sɩlem toor-toorã ye.—1 Pɩy. 5:8, 9; Zak 4:7.

5. Bõe yĩng tɩ tar yõod tɩ d kɩs sɩd t’a Zeova nong-d-la wʋsgo?

⁵ D sã n kɩs sɩd t’a Zeova nong-d lame, tõe n kɩtame tɩ d maneg n kolg-a n paase. Bõe n kɩt tɩ d tõe n yeel woto? A Zeova naana tõnd tɩ d rat neb n nongẽ, tɩ bãmb me nong tõndo. Ned sã n wilgdẽ t’a nonga tõndo, kɩtdame tɩ tõnd me nong-a. Rẽnd d sã n neẽ t’a Zeova nonga tõnd wʋsgo, d sẽn nong-a to-to wã pãng na n paasdame. (1 Zã 4:19) D sẽn nong-a to-to wã me sã n paasdẽ, yẽ me na n maneg n nong-d lame. Biiblã yeela vẽeneg yaa: “Bɩ y kolg Wẽnnaam, tɩ yẽ me na n kolga yãmba.” (Zak 4:8) Woto wã, bõe la d tõe n maan n maneg n kɩs sɩd t’a Zeova nong-d lame?

BÕE N TÕE N SÕNG-D TƖ D KƖS SƖD T’A ZEOVA NONG-D LAME?

6. Sẽn na yɩl n kɩs sɩd t’a Zeova nong-d lame, bõe la d tõe n pʋʋs n kose?

⁶ Pʋʋsd-y-yã a Zeova n kotẽ t’a sõng-y tɩ y bãng bũmb ning sẽn kɩt t’a nong-yã. (Luk 18:1; Rom. 12:12) Kos-y-yã a Zeova t’a sõng-y tɩ y ges y mengã wa a sẽn get-y to-to wã. Sã n yaa tɩlɛ bɩ y pʋʋs-a rẽ wɛɛngẽ naoor wʋsg daar fãa. Yaa sɩd tɩ y sũurã sã n ningd-y taale, yɩl n bas y yam t’a Zeova nong-y lame pa nana ye. La tẽeg-y t’a Zeova yɩɩda yãmb sũurã. (1 Zã 3:19, 20) A mii yãmb n yɩɩd yãmb mengã. A nee zʋg-sõma nins y sẽn tarã, baa b rãmb nins y sẽn pa mi tɩ y tarame wã. (1 Sãm. 16:7; 2 Kib 6:30) Woto wã, “togs-y-yã-a bũmb nins sẽn be y sũurẽ wã,” la y kos-a t’a sõng-y tɩ y sak n deeg t’a nong-y lame. (Yɩɩn. 62:8) Y pʋʋsgã poore, yɩta sõma tɩ y tũ sagls nins sẽn be sul nins sẽn pʋgdã pʋgẽ wã.

7-8. Bõe la b yeel Yɩɩn-sõamyã sebrã pʋgẽ tɩ kɩt tɩ d tõe n bas d yam t’a Zeova nong-d lame?

⁷ Tẽ-y bũmb nins a Zeova sẽn yetã. A kõo Biiblã gʋlsdb a vʋʋsem sõngã. Rẽnd d tõe n kɩsa sɩd ne bũmb nins b sẽn yeel a zugã. Wala makre, a Davɩɩd yɩɩll a ye pʋgẽ, a bilga a Zeova sẽn get tõnd yell to-to wã ne goam sẽn be yamleoogo, n yeele: “A Zeova pẽe sũ-sãams rãmbã. A fãagda neb nins raood sẽn komsã.” (Yɩɩn. 34:18) Y sã n wa koms raood wʋsgo, y tõe n tagsdame tɩ ned ka be n mi y zu-loɛɛgã sẽn namsd-y to-to wã ye. La a Zeova pʋlmame tɩ sã n wa yaa woto a pẽe yãmba, bala a miime tɩ y rata a sõngr n yɩɩda. A Davɩɩd yɩɩll a to pʋgẽ a yeelame yaa: “Kok-y mam nintãmã n sui y ko-waoogẽ wã.” (Yɩɩn. 56:8) Y sã n wa namsdẽ, a Zeova neeme. Y yell pak-a lame, tɩ y sẽn namsdã pa noom-a baa bilf ye. Yaa wa a sẽn kokd y nintãmã n bĩngdẽ tɩ b tar yõod a nifẽ, wa koom sẽn be so-toagd ko-waoog pʋgẽ sẽn tar yõod wʋsg ne-a wã. Yɩɩn-sõamyã 139:3 yetame: “Yãmb [a Zeova] mii mam soayã fãa sõma.” A Zeova mii bũmb nins fãa y sẽn maandã, la yaa bũmb nins y sẽn maand tɩ yaa sõma wã la a get n yɩɩda. (Ebre. 6:10) Bõe yĩnga? Bala a sũur nooma ne modgr buud fãa y sẽn maand sẽn na yɩl n noog a sũuri.a

⁸ A Zeova sẽn kɩt tɩ b gʋls goam sẽn kengd raood woto a Gomdã pʋgẽ wã, yaa wa a sẽn yet-y yaa: “Mam datame tɩ f bãng tɩ m nong-f-la wʋsgo, la tɩ f yell pak-m lame.” La tẽeg-y d sẽn yã tɩ loogã. A Sʋɩtãan datame tɩ y tẽ t’a Zeova pa nong-y ye. Woto wã, y sã n wa sãmbd ne a Zeova sã n nong-y lame bɩ y sok y meng yaa: ‘Ãnda la m na n tẽ? M na n tẽe a Sʋɩtãan sẽn yaa “ziri wã ba” wã bɩ, bɩ m na n tẽe a Zeova sẽn yaa “sɩdã Wẽnnaamã”?’—Zã 8:44; Yɩɩn. 31:5.

9. Bõe la a Zeova pʋlem neb nins sẽn nong-a wã? (Yikri 20:5, 6)

⁹ Bʋgsd-y-yã a Zeova tagsg sẽn yaa a soab ne neb nins sẽn nong-a wã zugu. Tẽeg-y-yã a Zeova sẽn yeel a Moyiiz ne Israyɛll nebã bũmb ningã. (Karm-y Yikr 20:5, 6.) A Zeova pʋlmame t’a na n ket n nonga neb nins sẽn nong-a wã, n maand-b neere. A sẽn yaa sɩd soabã yĩnga, d tõe n basa d yam t’a pa na n tol n sak tɩ ned nong-a t’a pa nong-a ye. (Nee. 1:5) Woto wã, y sã n wa sãmbd a Zeova sã n sɩd nonga yãmba, bɩ y sok y meng yaa: ‘Mam nonga a Zeova bɩ?’ Rẽ poor bɩ y tẽege. Y sã n nong a Zeova la y maand y sẽn tõe fãa sẽn na yɩl n noog a sũuri, y tõe n basa y yam t’a nong-y-la ne a sũur fãa. (Dãn. 9:4; 1 Kor. 8:3) Woto rat n yeelame tɩ y sã n kɩsa sɩd tɩ y nonga a Zeova, y pa segd n sãmbd ne a sã n nong-y lame ye. Y tõe n basa y yam t’a nong-y lame, la t’a pa na n tol n daag-y n bas ye.

10-11. Bõe la a Zeova rat tɩ y tẽeg a Zeezi sẽn ki tɩ yɩ maoongã wɛɛngẽ? (Galat-rãmbã 2:20)

¹⁰ Bʋgsd-y-yã a Zeezi sẽn ki tɩ yɩ maoongã zugu. A Zeova sẽn tʋm a Zeezi Kirist t’a wa ki tõnd yĩngã n yaa kũun ning sẽn yaa kãseng n yɩɩd a sẽn kõ ninsaalbã. (Zã 3:16) La a Zeova tʋma a Biigã t’a wa ki yãmb me yĩng bɩ? N-ye! D gom tẽn-tʋmd a Poll yelle. Tẽeg-y tɩ nand t’a lebg kiris-neda, a tʋma tʋʋm-wẽnse. La baa a sẽn lebg kiris-nedã poore, a ra segd n kell n maoo ne a pãn-komsmã. (Rom. 7:24, 25; 1 Tɩm. 1:12-14) Baa ne rẽ, a ra getame t’a Zeezi sẽn ki tɩ yɩ maoongã yaa kũun a Zeova sẽn kõ yẽ mengã. (Karm-y Galat-rãmb 2:20.) Tẽeg-y tɩ yaa a Zeova n vẽneg a Poll t’a gʋls gom-kãense. Sẽn paase, bũmb nins fãa b sẽn gʋls Biiblã pʋgẽ wã yaa tõnd zãmsg yĩnga. (Rom. 15:4) A Poll goamã wilgda a Zeova sẽn dat tɩ yãmb ges a Zeezi maoongã to-to. A ratame tɩ y kɩs sɩd t’a Zeezi maoongã yaa kũun b sẽn kõ yãmb mengã. Y sã n get a Zeezi maoongã woto, y na n maneg n kɩsa sɩd t’a Zeova nonga yãmba.

¹¹ A Zeova sẽn tʋm a Zeezi tẽngã zug t’a ki tõnd yĩngã kɩtame tɩ d pʋʋsd-a bark wʋsgo. La bũmb a to me n kɩt t’a Zeezi wa tẽngã zugu. A waame n na n sõng nebã tɩ b bãng sɩdã Wẽnnaam zugu. (Zã 18:37) Wala makre, a Zeezi wilga nebã t’a Zeova nonga a kambã wʋsgo.

A ZEEZI WILGAME T’A ZEOVA NONG-D-LA WƲSGO

12. Bõe n kɩt tɩ d tõe n tẽ bũmb nins a Zeezi sẽn yeel a Zeova zugã?

¹² A Zeezi sẽn wa n be tẽngã zugã, a sõnga nebã ne yamleoog tɩ b bãng a Zeova sẽn yaa Wẽnnaam ning buudã. (Luk 10:22) D tõe n tẽe bũmb nins fãa a Zeezi sẽn yeel a Zeova zugã. Bõe yĩnga? Bala a Zeezi zĩnda saasẽ ne a Zeova yʋʋm kõn bãng n sõd nand t’a wa tẽngã zugu. (Kolo. 1:15) A yãa bũmb toor-toor sẽn wilgd t’a Ba wã nong-a-la wʋsgo, la t’a nonga malɛgs la ninsaalb nins sẽn maand sɩd ne-a wã ne a sũur fãa. Wãn to la a Zeezi sõng neb a taabã sẽn na yɩl tɩ b kɩs sɩd tɩ Wẽnnaam nong-b lame?

13. Bõe la a Zeezi rat tɩ d bãng a Zeova zugu?

¹³ A Zeezi ratame tɩ d bãng a Zeova tagsg sẽn yaa a soab ne tõndã sõma. Evãnzill-dãmbã pʋgẽ, yaa naoor koabg la pis-yoob la zak la a Zeezi bool a Zeova tɩ “Ba.” Sẽn paase a sã n da sõsd ne a karen-biisã, a ra wae n boonda a Zeova tɩ “yãmb Ba,” wall “yãmb Ba sẽn be saasẽ.” (Mat. 6:8, 26) Nand t’a Zeezi wa tẽngã zugu, neb nins sẽn da tũud a Zeova wã ra wae n boond-a-la ne naam-yʋy wala ‘Sẽn-tõe-a-fãa wã,’ ‘Sẽn ka-a to wã,’ la ‘Naand sẽn yaa kãsenga.’ La a Zeezi ra wae n boonda a Zeova tɩ “Ba.” Woto wilgdame t’a Zeova ratame tɩ neb nins sẽn tũud-a wã nong-a wa biig sẽn nong a ba sẽn get a yell sõma to-to wã. Vẽenega, a Zeezi ratame tɩ d get a Zeova wa yẽ sẽn get-a to-to wã, rat n yeel tɩ wa Ba sẽn nong a kamb ne a sũur fãa. Bɩ d rɩk makr a yiibu, n bao n bãng a Zeezi sẽn da boond a Zeova tɩ “Ba” wã sẽn wilgd tõnd bũmb ninga.

14. Bõe la a Zeezi yeel n wilg tɩ tõnd ned kam fãa tara yõod wʋsg d Ba sẽn be saasẽ wã nifẽ? (Matiye 10:29-31) (Ges-y fotã me.)

¹⁴ Pipi, d ges a Zeezi goam nins sẽn be Matiye 10:29-31 wã. (Karm-y-yã.) Yirs yaa liuuli sẽn yaa kɩdse. B pa nong a Zeova, b pa waoogd-a me ye. Baa ne rẽ, tõnd Ba wã mii yirg fãa sẽn beẽ, hal tɩ baa a ye pa lʋɩt tẽng t’a pa bãng ye. Woto pa wilgd t’a Zeova nanda neb nins sẽn tũud-a ne b sũy fãa b sẽn nong-a wã yĩnga, la a get b yell n yɩɩd sɩda? A Zeezi yeelame me tɩ tõnd Ba wã mii tõnd ned kam fãa “zug zoobd” sõore. A Zeova sẽn mi tõnd sõma woto wã kɩtame tɩ d tõe n bas d yam t’a geta d yelle. Vẽenega, a Zeezi ratame tɩ d bãng tɩ tõnd ned kam fãa tara yõod wʋsg d Ba sẽn be saasẽ wã nifẽ.

15. A Zeezi sẽn yeel bũmb ning Zã 6:44 sõngda yãmb tɩ y bãng bõe y Ba sẽn be saasẽ wã zugu?

¹⁵ D gom vɛrse a to yelle. Be me a Zeezi goma a Zeova yell n bool-a tɩ “Ba.” (Karm-y Zã 6:44.) Yãmb Ba sẽn be saasẽ wã taka yãmba, n sõng-y tɩ y bãng sɩdã. Bõe yĩnga? Bala a yãame tɩ y tara yam ning sẽn zems ne vɩɩm sẽn ka sɛtã. (Tʋʋ. 13:48) Tõe t’a Zeezi sẽn wa n togsd goam nins sẽn be Zã 6:44 t’a ra tagsda a Zeova goam nins sẽn be Zeremi 31:3 pʋgẽ wã yelle. Be, a Zeova yeela a nin-buiidã yaa: “Yaa nonglem-kãng yĩng la mam sẽn maan yãmb neere, n tak yãmb n pẽneg m mengã [bɩ, yaa rẽ yĩng la mam sẽn kell n maan yãmb neerã].” (Zer. 31:3; notã; ges-y Ooze 11:4.) Tags-y n ges-y rẽ sẽn dat n yɛɛlgã. Wakat fãa, tõnd Ba sẽn be saasẽ wã sẽn yaa nonglmã geta zʋg-sõma nins y sẽn tarã, baa b rãmb nins y sẽn pa mi tɩ y tarame wã.

16. a) Bõe la a Zeezi wilg tõndo, la bõe n kɩt tɩ d segd n tẽ rẽ? b) Bõe la y tõe n maan tɩ sõng-y tɩ y kɩs sɩd t’a Zeova n yaa Ba ning sẽn yaa sõma n yɩɩdã? (Ges-y zĩ-gũbrã: “Ba ning sẽn yaa sõma n yɩɩdã.”)

¹⁶ A Zeezi sẽn yeel t’a Zeova yaa tõnd Ba wã, yaa wa a sẽn yeel yaa: “A Zeova pa mam Ba bal ye. A yaa yãmb me Ba. Bas-y y yam t’a nonga yãmba, n get y ned kam fãa yell sõma.” Woto wã, y sã n wa sãmbd ne a Zeova sã n nong-y lame bɩ y sok y meng yaa: ‘Mam pa segd n tẽ Biigã sẽn yaa soab ning sẽn mi Ba wã n yɩɩdã, la sẽn togsd sɩd wakat fãa wã sɩda?’—1 Pɩy. 2:22.

MAAN-Y Y SẼN TÕE FÃA N KELL N KƖS SƖD T’A ZEOVA NONG-Y LAME

17. Bõe yĩng tɩ d segd n maan d sẽn tõe fãa n kell n kɩs sɩd t’a Zeova nong-d lame?

¹⁷ D segd n maana d sẽn tõe fãa n kell n kɩs sɩd t’a Zeova nong-d lame. Tẽeg-y t’a Sʋɩtãan sẽn yaa d bɛ sẽn yaa sɩlem soabã maanda a sẽn tõe fãa n dat tɩ d bas a Zeova tũubu. Sẽn na yɩl tɩ d koms raoodo, a na n ket n modgdame n dat tɩ d ra le kɩs sɩd tɩ Wẽnnaam nong-d lame ye. D pa segd n bas t’a Sʋɩtãan tõog-d ye!—Zoob 27:5.

18. Bõe la y tõe n maan n maneg n kɩs sɩd t’a Zeova nong-y lame?

¹⁸ Sõs-kãngã wilga y sẽn tõe n maan to-to n kɩs sɩd t’a Zeova nong-y lame. Y tõe n pʋʋs-a lame n kos t’a sõng-y tɩ y yã zʋg-sõma nins a sẽn ne y nengẽ wã. Bʋgsd-y Biiblã vɛrse-rãmb sẽn wilgd a Zeova sẽn nong-d to-to wã zugu. Tẽeg-y t’a Zeova nonga neb nins sẽn nong-a wã wakat fãa. Ra tol-y n yĩm-y t’a sẽn kɩt t’a Biigã wa ki tɩ yɩ maoongã yaa yãmb yĩng ye. Tẽ-y-yã a Zeezi sẽn yeel t’a Zeova yaa yãmb Ba sẽn be saasẽ wã. Woto, ned sã n sok-y yaa: “Yãmb kɩsa sɩd t’a Zeova nonga yãmb bɩ?” Y na n basa y yam n leok yaa: “N-ye. M kɩsa sɩda! M maanda m sẽn tõe fãa daar fãa, n na n wilg tɩ m nong-a lame.”