Wẽnnaam nonglmã paada wakat fãa

1-2. Kiris-ned sã n wa tar zu-loeese, a tagsg tõe n yɩɩ wãna?

MAMS-Y wa koom-koglg sẽn na n be mogrã sʋka, tɩ sob-kãseng wa yiki. Ko-pɛmã tara koom-koglgã n lengdẽ, n zẽkd-a la a sikdẽ. Ko-pɛmã tõe n talla koom-koglgã n looge, sã n pa ned n dɩk bũmb ning b sẽn tar n yalsd koom-koglgã n lob koomã pʋgẽ ye. Bõn-kãng tõe n kɩtame tɩ koom-koglgã yals zĩ-yɛng tɩ sobgã ra tõog n tall-a n loog ye.

² Y sã n wa maood ne zu-loees tɩ pa nana, y tõe n getame tɩ y yaa wa koom-koglg ning yell d sẽn gomã. Y tõe n getame tɩ y zu-loeesã tar-y lame n lengdẽ. Rũndã y tõe n kɩsa sɩd t’a Zeova nong-y lame la t’a teend-y lame. La beoogo, y tõe n sokda y meng a Zeova sã n nee y zu-loeesã sẽn namsd-y to-to wã. (Yɩɩn. 10:1; 13:1) Y zoa ning tõe n bels-y lame, tɩ kɩt tɩ yam gaand bãan wakat bilf yĩnga. (Yel. 17:17; 25:11) La pa yãt n kaoos tɩ sãmbsã le wa ye. Y tõe n sokda y meng a Zeova sã n pa raag-y n base. Bõe la y tõe n maan tɩ sõng-yã, tɩ yaa wa y rɩka bũmb sẽn b sẽn tar n yalsd koom-koglg n lob koomã pʋgẽ? Rat n yeel tɩ bõe la y tõe n maan tɩ sõng-y tɩ y kell n kɩs sɩd t’a Zeova nong-y lame, la t’a sõngd-y lame?

3. Gom-bil ning b sẽn lebg Yɩɩn-sõamyã 31:7; 136:1 wã tɩ “maan-neerã” võorã yaa bõe, la bõe yĩng tɩ d tõe n yeel tɩ yaa a Zeova n kõ mak-sõng sẽn ka to rẽ wɛɛngẽ? (Ges-y fot-rãmbã me.)

³ Bũmb a ye d sẽn tõe n maan tɩ sõngd zu-loees sasa yaa d sẽn na n tẽeg a Zeova nonglmã bɩ a maan-neerã yelle. (Karm-y Yɩɩn-sõamyã 31:7; 136:1.) Ebre wã gom-bil ning b sẽn lebg tɩ “maan-neerã” bilgda ned sẽn na n nong a to ne nonglem sẽn tar pãnga, n pa satẽ ye. A Zeova n kõ mak-sõng sẽn ka to nonglem-kãng wɛɛngẽ. Sɩd me, Biiblã yeelame t’a “pid ne maan-neere.” (Yik. 34:6, 7) A leb n goma a Zeova yell n yeel yaa: “Yãmb pida ne maan-neere, neb nins fãa sẽn boond yãmbã yĩnga.” (Yɩɩn. 86:5) Tags-y n ges-y rẽ sẽn dat n yɛɛlgã: A Zeova pa na n tol n bas neb nins sẽn maand sɩd ne-a wã a bada! Y sã n wa tar zu-loees n tẽeg t’a Zeova yaa maan-sɩd soaba, tõe n sõng-y-la wʋsgo.—Yɩɩn. 23:4.

TẼEG-Y T’A ZEOVA NONGLMÃ NAAGA BIIBLÃ ZÃMS-NANA WÃ SƲKA

4. Biiblã zãms-nana wã kẽer la bʋse, la bõe yĩng tɩ ned pa tõe n kɩt tɩ d ra tẽ bõn-kãens nana-nana?

⁴ Bũmb a to d sẽn tõe n maan tɩ sõng-d zu-loees sasa, yaa d sẽn na n tẽeg t’a Zeova nonglmã naaga Biiblã zãms-nana wã sʋka. B sã n gomd Biiblã zãms-nana yelle, bõe n wat y yamẽ? Tõe tɩ y tagsda bũmb nins y sẽn zãms Wẽnnaam Gomdã n bãng sɩngrẽ wã yelle. Wala makre y bãngame tɩ Wẽnnaam yʋʋr la a Zeova, t’a Zeezi n yaa Wẽnnaam Bi-ribl-yendã, tɩ sẽn ki-bã pa mi baa fʋɩ, la tɩ tẽngã na n wa lebga arzãn tɩ ninsaalb vɩɩmd a zug wakat sẽn kõn sa. (Yɩɩn. 83:18; Koɛ. 9:5; Zã 3:16; Vẽn. 21:3, 4) Y sẽn bãng bõn-kãensa poore, yaa toog tɩ ned tõog tɩ y tẽ tɩ pa sɩd ye. Bõe yĩnga? Bala y bãngame tɩ tika kaset sẽn yaa vẽeneg zugu. Masã, d bao n bãng tẽeg t’a Zeova nonglmã naaga Biiblã zãms-nana wã sẽn tõe n sõng-y to-to tɩ y kɩs sɩd t’a Zeova mii y zu-loeesã sẽn namsd-y to-to wã, la t’a nong-y lame.

5. Bilg-y ned sẽn maand to-to n bas bũmb a sẽn da tẽed tɩ yaa ziri.

⁵ Y sẽn wa n sɩng Biiblã zãmsgã, bõe n sõng-y tɩ y bas bũmb nins y sẽn da tẽed tɩ yaa ziri wã? Sãmbg sẽn kae, y maka bũmb nins b sẽn da zãms-y y pĩnd tũudmẽ wã ne bũmb ning Biiblã sẽn yetã. D rɩk makr ne yãmb sã n da tẽed t’a Zeezi n yaa Wẽnnaam Sẽn-tõe-a-fãa wã. La yãmb sẽn wa n zãmsd Biiblã, y soka y meng yaa: ‘Sɩd yaa sɩd bɩ?’ Y sẽn maag y yĩng n ges Biiblã sẽn yetã, sõng-y lame tɩ y bãng tɩ pa woto ye. Rẽ poore, y basa ziri wã, n tẽed Gʋls-sõamyã sẽn sɩd yetã. A yetame t’a Zeezi n yaa “b sẽn deng n naan a soab bõn-naandsã fãa sʋkã,” “Wẽnnaam Bi-ribl-yendã.” (Kolo. 1:15; Zã 3:18) Yaa sɩd tɩ zãmsg nins sẽn yaa ziri wã tõe n “vigla kãn-kãe,” tɩ yɩl n bas-b yaa toogo. (2 Kor. 10:4, 5) La y sã n wa tõog n bas-ba, y pa lebd n tẽ bũmb nins b sẽn da zãms-y tɩ yaa ziri wã ye.—Fili. 3:13.

6. Bõe yĩng tɩ y tõe n kɩs sɩd t’a Zeova “maan-neerã paada wakat fãa”?

⁶ Y tõe n maana woto me ne bũmb nins Biiblã sẽn yet a Zeova nonglmã wɛɛngẽ wã. Y sã n wa tar zu-loeese, n wa sãmbd a Zeova sã n nong-y lame bɩ y sok y meng yaa: ‘Mam tagsgã zemsame sɩda?’ Mak-y rẽ ne goam nins sẽn be Yɩɩn-sõamyã 136:1 sẽn yaa vɛrse ning zug sõs-kãngã sẽn tikã. Ebre wã gom-bil ning b sẽn lebg vɛrse-kãng pʋgẽ tɩ “maan-neerã” bilgda nonglem sẽn naag ne maan-sɩda. La bõe yĩng t’a Zeova vẽneg Yɩɩn-gʋlsdã t’a gom a nonglmã yell woto? La bõe yĩng tɩ b gom rẽ yell naoor pis-yi la a yoob yɩɩn-kãng pʋgẽ? Yaa tɩ Biiblã wilgdame t’a Zeova nonga a nin-buiidã, tɩ rẽ yaa zãms-nana, wa zãms-nana a taabã y sẽn sak n deeg nana-nana wã. Y sã n wa tagsdẽ t’a Zeova getame tɩ y ka võore, wall t’a pa nong yãmba, bãng-y tɩ y tẽeda ziri. Zãgs-y ziri a woto, wa y sẽn zãgs zãmsg a taabã sẽn pa sɩdã ne y sũur fãa wã.

7. Biiblã vɛrse-bʋs n wilgd t’a Zeova nonga tõndo?

⁷ Goam a taab n be Biiblã pʋgẽ n wilgdẽ t’a Zeova nonga a nin-buiidã. Wala makre a Zeezi yeela a karen-biisã yaa: “Yãmb yõod yɩɩda yirs wʋsgo.” (Mat. 10:31) A Zeova meng yeela a nin-buiidã ned kam fãa yaa: “Mam na n kõo foo pãnga. N-ye, mam na n sõnga foom, mam na n gãda foo kãn-kãe ne m nug-rɩtgã sẽn wat ne tɩrlmã.” (Eza. 41:10) Yaa goam sẽn yaa vẽenega. A Zeezi pa yeel tɩ ‘tõe tɩ y tara yõod wʋsg’ ye. A Zeova me pa yeel tɩ ‘tõe tɩ m na n sõng-f lame’ ye. A Zeezi yeelame yaa: “Yãmb yõod yɩɩda,” t’a Zeova yeel yaa: “Mam na n sõnga foom.” Zu-loees sã n wa kɩt tɩ y sãmbd a Zeova sã n nong-y lame, vɛrse-kãens goamã pa na n kɩt tɩ y neẽ t’a nong-y lame bal ye. B tõe n kɩtame tɩ y kɩs sɩd t’a nong-y lame. Yaa goam sẽn yaa sɩda. Y sã n pʋʋs a Zeova la y bʋgs b zugu, tõe n kɩtame tɩ y tẽ goam nins sẽn be 1 Zã 4:16 pʋgẽ wã. Be b yeelame yaa: “Tõnd bãngame tɩ Wẽnnaam nonga tõndo, n kɩs sɩd ne rẽ.”a

8. Y sã n mi n sãmbd ne a Zeova sã n nong-y lame, bõe la y tõe n maane?

⁸ La y sã n mi n ket n sãmbd ne a Zeova sã n nong-y lame, bõe la y tõe n maane? Mak-y yãmb sẽn tagsd to-to wã ne bũmb ning y sẽn mi a Zeova zugã. D pa tõe n teeg d tagsa wã wa d sẽn tõe n teeg sɩdã ye. La Biiblã sẽn yet bũmb ning a Zeova nonglmã wɛɛngẽ wã yaa sɩda. D sã n pa tẽed t’a Zeova nonga tõndo, yaa wa d sẽn yet tɩ Biiblã sẽn yet tɩ Wẽnnaam yaa nonglmã pa sɩd ye.—1 Zã 4:8.

BƲGS-Y-Yà A ZEOVA SẼN “NONG YÃMB WƲSGÔ ZUGU

9-10. A Zeezi sẽn wa n na n yeel tɩ “Ba wã meng nonga yãmb wʋsgã” tɩ yaa bõe yell la a ra gomda? (Zã 16:26, 27) (Ges-y fotã me.)

⁹ D sã n bʋgs a Zeezi sẽn yeel a karen-biisã bũmb ning a Zeova nonglmã wɛɛngẽ wã zugu, tõe n sõng-d lame tɩ d bãng bũmb wʋsgo. A yeel-b lame yaa: “Ba wã meng nonga yãmb wʋsgo.” (Karm-y Zã 16:26, 27.) A Zeezi pa yeel gom-kãensã n na n noog a karen-biisã sũur bal ye. Sɩd me, d sã n ges a sẽn yeel bũmb ning n yaool n togs gom-kãensa wã, d bãngdame t’a ra pa belsd a karen-biisã ye. A ra gomda pʋʋsg yelle.

¹⁰ Sẽn deng rẽ a Zeezi yeela a karen-biisã tɩ b segd n pʋʋsa yẽ yʋʋr yĩnga, la pa yẽ mengã ye. (Zã 16:23, 24) Rẽ bãngr ra tara yõod wʋsg ne-ba. A Zeezi vʋʋgrã poore, a karen-biisã tõe n wa rat n pʋʋsa a Zeezi mengã. Sɩd me, a ra yaa b zoa. B ra tõe n tagsame t’a sẽn nong-bã na n kɩtame t’a reeg b pʋʋsgã n taas a Ba wã. La a Zeezi wilg-b lame tɩ b pa segd n tags a woto ye. Bõe yĩng tɩ d yet woto? Bala a yeel-b lame yaa: “Ba wã meng nonga yãmb wʋsgo.” Rẽ naaga Biiblã sẽn yet bũmb ning pʋʋsgã wɛɛngẽ wã. Tags-y n ges-y rẽ sẽn dat n yɛɛlg ne yãmba. Y sẽn zãms Biiblã, y bãnga a Zeezi n nong-a. (Zã 14:21) La yãmb me tõe n basa y yam n pʋʋs Wẽnnaam wa a Zeezi karen-biisã, n kɩs sɩd tɩ “Ba wã meng nonga yãmb wʋsgo.” Y sã n wa pʋʋsd a Zeova fãa, y wilgdame tɩ y kɩsa sɩd ne rẽ.—1 Zã 5:14.

BÃNG-Y SÃMBSÃ SẼN YITẼ

11. D sã n wa sãmbd a Zeova sã n nong-d lame, bõe yĩng tɩ noom a Sʋɩtãana?

¹¹ Bõe n tõe n kɩt tɩ d wa sãmbd ne a Zeova sã n nong-d lame? Tõe tɩ y na n yeelame tɩ sãmbsã yita a Sʋɩtãan nengẽ. Sɩd me, yaa woto wakat ninga. Sʋɩtãanã baooda tõnd n na n “wãbe,” t’a sã n paam tɩ d sãmbd a Zeova sã n nong-d lame bɩ a sũur na n yɩ noogo. (1 Pɩy. 5:8) A Zeova nonglmã kɩtame t’a tʋm a Zeezi t’a wa ki tɩ yɩ maoongo, t’a Sʋɩtãan pa rat tɩ d tags tɩ d zemsa ne rɩ a Zeezi maoongã yõod ye. (Ebre. 2:9) La d sã n sãmbd ne a Zeova sã n nonga tõndo, nooma ãnda? A Sʋɩtãana. Ãnda n dat tɩ zu-loeesã kɩt tɩ d koms raood n bas a Zeova tũubu? A Sʋɩtãana. A ratame tɩ d tags t’a Zeova pa nong tõnd ye. La pa woto ye. Sɩd-sɩda, yaa yẽ la a Zeova pa nonge. La a sẽn yaa “sɩlem-tʋʋm” soabã yĩnga, a maanda a sẽn tõe fãa n dat tɩ d tẽ tɩ yaa tõnd la a Zeova ning taal n pa nongẽ ye. (Efɛɛ. 6:11) D sã n bãng a Sʋɩtãan sẽn yaa d bɛ wã sẽn dat bũmb ningã, na n sõng-d lame tɩ d maneg n ‘kɩɩs-a.’—Zak 4:7.

12-13. Wãn to la d sẽn yaa yel-wẽn-maandbã tõe n kɩt tɩ d sãmbd ne a Zeova sã n nonga tõndo?

¹² Bũmb a to me n tõe n wa kɩt tɩ d sãmbd a Zeova sã n nong-d lame. Bõn-kãng yaa bõe? Yaa yel-wẽndã d sẽn dogd ne wã. (Yɩɩn. 51:5; Rom. 5:12) Yel-wẽndã kɩtame tɩ ninsaalbã zãag ne b Naandã. A sãamda d tagsa wã la d laafɩ wã me.

¹³ Yel-wẽndã namsda tõndo. A mi n kɩtame tɩ d ningd d meng taale, la d maand yɩɩre. Mi n kɩtame tɩ d yam pa gãe bãane, tɩ yãnd tar-d me. D sã n maan yel-wẽnde, tõe n yɩɩ woto. La d sẽn mi tɩ d yaa koangdbã me tõe n kɩtame tɩ d tall tagsa a woto buudu. A Zeova ra pa naan ninsaal t’a yɩ woto ye. (Rom. 8:20, 21) Mobill pine sã n sigi, a pa tõe n kẽn sõma wa a pine wã sã n da pa sig ye. Woto me, tõnd sẽn pa zems zãngã, d pa tõe n yɩ wa Wẽnnaam sẽn naan tõnd tɩ d yɩ to-to wã ye. Rẽnd pa lingr la d sẽn mi n sãmbd ne a Zeova sã n nong-d lame wã ye. Sã n wa yaa woto, d segd n tẽegame t’a Zeova n yaa ‘Wẽnnaam sẽn yaa kãsenga, tɩ nebã segd n zoe-a la b waoog-a,’ la t’a ‘pidsda a kaoolã, la a maand neb nins sẽn nong-a la b tũud a noyã neere.’—Nee. 1:5.

14. D sã n bʋgsd a Zeezi sẽn ki tɩ yɩ maoongã zugu, wãn to la na n sõng-d tɩ d ra wa sãmbd ne a Zeova sã n nong-d lame? (Rom dãmbã 5:8) (Ges-y zĩ-gũbrã me: “Gũus-y ne ‘yel-wẽndã pãng sẽn yaa belgrã.’”)

¹⁴ Yaa sɩd tɩ d tõe n mi n tagsdame tɩ d pa zems ne a Zeova nonglmã tɩ sãamd d sũuri. Sɩd-sɩda, d pa zems ne a Zeova nonglmã ye. Rẽ n kɩt t’a nonglmã ka to wã. Bũmb kae d sẽn tõe n maan n zems ne a Zeova nonglmã ye. La a Zeezi sẽn ki tɩ yɩ maoongã luta d yel-wẽnã. Yaa a Zeova nonglmã n kɩt t’a tʋm a Zeezi t’a wa ki tɩ yɩ maoongo. (1 Zã 4:10) Tẽeg-y me t’a Zeezi waame n na n fãag yel-wẽn-maandba, a pa wa neb sẽn zems zãng yĩng ye. (Karm-y Rom dãmb 5:8.) Tõnd ned baa a ye pa tõe n maan bũmb fãa tɩ zems kɛpɩ ye. A Zeova pa yeel tɩ d maan woto ye. D sã n tẽeg tɩ tõnd sẽn yaa yel-wẽn-maandbã tõe n wa kɩtame tɩ d sãmbd ne a Zeova sã n nonga tõndo, d na n maneg n maoome tɩ rẽ ra wa kẽes tags-kɛg d sũurẽ wã ye.—Rom. 7:24, 25.

YÃK-Y YAM N KELL N MAAN SƖDA

15-16. D sã n kell n maan sɩd ne a Zeova, d tõe n basa d yam ne bõe, la bõe yĩnga? (2 Sãmwɛll 22:26)

¹⁵ A Zeova ratame tɩ d bãng n yãk yam. A sagend-d lame tɩ d ‘gãd yẽ kãn-kãe.’ (Tõo. 30:19, 20) D sã n maan woto, d tõe n basa d yam t’a na n kell n maana sɩd ne-do. (Karm-y 2 Sãmwɛll 22:26.) D sã n kell n maan sɩd ne a Zeova, d tõe n basa d yam tɩ sẽn wa n yaa zu-loɛɛg ning fãa la d tara, a na n sõng-d lame.

¹⁶ Sõs-kãngã tẽeg-d lame tɩ sẽn wa n yaa zu-loɛɛg ning fãa la d tara, d tõe n kell n maana sɩd ne a Zeova. D miime t’a Zeova nong-d lame, n na n kell n teel-do. Yaa woto la Biiblã yeta. D sã n wa sãmbd ne a Zeova sã n sɩd nong-d lame, d tõe n basa tõnd tagsa wã, la d bʋgs bũmb ning d sẽn mi a Zeova nonglmã wɛɛngẽ wã zugu. Bɩ d kell n kɩs sɩd ne Biiblã sẽn yeel t’a Zeova nonglmã bɩ a maan-neerã paada wakat fãa wã.