Y sẽn tõe n kell n tall sũ-noog y kʋʋlmã wakat to-to

1-2. A Zeova tagsg yaa wãn ne sẽn kʋʋl-b n yaool n maand sɩd ne-a wã? (Yɩɩn-sõamyã 92:12-14; ges-y fotã me.)

DŨNIYÃ gill zugu, nebã tagsg sẽn yaa a soab ne kʋʋlmã yaa toor-toore. Tags-y n ges-y-yã: Y tẽra y manesem sẽn yɩ to-to, y sẽn yã zoob-peell y zugẽ wã pipi wã bɩ? Tõe tɩ y tak-a lame n võog tao-tao, y sẽn pa rat tɩ ned a to yã wã yĩnga. La y wa n bãngame tɩ pa y sẽn na n tat y zoob-peendã n võod la b pa na n le yi y zugẽ wã ye. Woto wilgdame tɩ neb wʋsg pa rat n kʋʋl ye.

² La tõnd Ba sẽn be saasẽ wã tagsg yaa wãn ne neb nins sẽn tũud-a n yaool n kʋʋlã? (Yel. 16:31) A rɩk-b lame n mak ne tɩɩs sẽn ning puudu. (Karm-y Yɩɩn-sõamyã 92:12-14.) Bõe yĩng t’a sẽn mak-b ne tɩɩsã zemse? Tɩɩs nins sẽn kaoosã wae n yaa neeba, bala b wae n tara vãad la puud wʋsgo. Wala makre, tɩɩg buud n be Zapõ n tõe n vɩɩmd n kaoos yʋʋm wʋsgo. Tɩ-kãens sʋkã, sẽn ya-b neeb n yɩɩdã taa yʋʋm tusr la zaka. Woto me, neb nins sẽn maand sɩd hal yʋʋm wʋsgã yaa neeba, sẽn yɩɩd fãa Wẽnnaam nifẽ. A Zeova geta b sẽn sɩd yaa neb nins buudã, pa b zoob-peendã ye. A nanda b zʋg-sõma wã. B tũ-a lame n kaoos yʋʋm wʋsgo, la b kell n maan sɩd ne-a noog la toog wakate.

3. Rɩk-y makr n wilg a Zeova sẽn kɩt tɩ neb sẽn kʋʋl tʋm tʋʋm-kãsems a raabã pidsg yĩnga.

³ Baa d sã n kʋʋndẽ, a Zeova ket n nand-d lame.a Sɩd me, a Zeova kɩtame tɩ neb sẽn kʋʋl tʋm tʋʋm-kãsems a raabã pidsg yĩnga. Wala makre, a Zeova sẽn wa n na n yeel t’a Saara na n lebga buud wʋsgo, la Mesi wã yaabã t’a zoe n kʋʋlame. (Sɩng. 17:15-19) A sẽn wa n na n tʋm a Moyiiz t’a tɩ yiis Israyɛll nebã Ezɩptã t’a yʋʋmã vẽsgame. (Yik. 7:6, 7) Sẽn paase, a Zeova sẽn wa n na n vẽneg tẽn-tʋmd a Zã t’a gʋls Biiblã sɛb a nu wã t’a kʋʋla wʋsgo.

4. Yel-bũn 15:15 wilgdame tɩ bõe n tõe n sõng sẽn kʋʋl-bã tɩ b tõog n mao ne b zu-loeesã? (Ges-y fotã me.)

⁴ Kʋʋlmã wata ne zu-loeese. Yaa rẽ yĩng la neb wʋsg sẽn mi n yetẽ tɩ kʋʋlmã pa nana wã. La a Zeova tõe n sõnga sẽn kʋʋl-bã tɩ b kell n tall sũ-noogo, baa ne zu-loeesã.b (Karm-y Yel-bũn 15:15.) Sõs-kãngã pʋgẽ, d na n yãa bũmb a wãn sẽn kʋʋl-bã sẽn tõe n maan n kell n tall sũ-noogo. D leb n na n yãa neb a taabã sẽn tõe n maan to-to n sõng b tigingã neb nins sẽn kʋʋlã. La d na n deng n bao n bãnga bũmb nins sẽn kɩt tɩ tõe n yɩ toog tɩ d kell n tall sũ-noogo, d sã n wa kʋʋndẽ wã.

BÕE YĨNG TƖ TÕE N YƖ TOOG TƖ D KELL N TALL SŨ-NOOG D SÃ N WA KƲƲNDẼ?

5. Bõe n tõe n kɩt tɩ neb kẽer sẽn kʋʋl koms raoodo?

⁵ Bõe n tõe n koms y raoodo? Tõe tɩ y sẽn pa le tõe n maan bũmb nins y sẽn da maand pĩndã komsda y raoodo. Tõe tɩ y tẽegda y sẽn wa n yaa bi-bɩɩg n tar keelmã yell tɩ sãamd y sũuri. (Koɛ. 7:10) Wala makre, saam-bi-poak yʋʋr sẽn boond t’a Ribi yeelame: “Fuug yeelgr lebga toog wʋsg ne-ma. Bala m yĩnsã fãa zabdame. Sẽn paase, m pa le tõe n maan yɛlã wa pĩndã ye. Bũmb maaneg sẽn yaa nana wala zẽk m karg n ning sosɛtã lebga toog ne-ma. Mam nusã zabdame, tɩ m pa tõe n maan bõn-tɩrg ye. Baa tʋʋm-bõonegã maaneg yaa toog wʋsgo.” A Harool sẽn da tʋmd Betɛllẽ wã me yeelame: “M sũur mi n sãamdame, bala m pa le tõe n maan bũmb nins m sẽn da minim n maandẽ tɩ kõt-m sũ-noogã ye. M sẽn wa n yaa bi-bɩɩgã m da tara keelem wʋsgo. M da nong n tãooda beezboll. Nebã ra wae n yetame yaa: ‘Lob-y-yã a Harool ballã. A tõe n sõng-d lame tɩ d tõoge.’ La masã, m pa tagsd tɩ m tõe n le lobga ball meng ye.”

6. a) Bõe n tõe n kɩt tɩ neb kẽer sẽn kʋʋl koms raoodo? b) Bõe n tõe n sõng ned sẽn kʋʋl t’a bãng a sã n segd n basa mobill wẽnebo? (Ges-y seb-kãngã sõsg ning gom-zug sẽn yaa: “M segd n basa mobill wẽneb bɩ?”)

⁶ Tõe tɩ y sẽn pa le tõe n maan bũmb kẽer y toorã sãamda y sũuri, sẽn yɩɩd fãa sã n yaa tɩlɛ tɩ ned wa zĩnd ne-y n sõngd-yã, pa rẽ bɩ yaa tɩlɛ tɩ y tɩ zĩnd ne y biiga. Tõe tɩ y pa le tõe n kẽng zĩig y toor wall y wẽn mobill bɩ n zomb montɛɛre, y laafɩ sẽn pa waoog wall y nin sẽn pa ne sõma yĩnga, tɩ komsd y raood wʋsgo. Sɩd sãamda sũuri! La yɩta sõma tɩ y tẽeg t’a Zeova la neb a taabã nand-d lame, baa d sã n pa tõe n ges d meng yelle, n zĩnd d ye wall d wẽn mobilli. Sẽn paase, d tõe n basa d yam t’a Zeova wʋmda yɛlã sẽn namsd tõndã võore. Sẽn tar yõod a nifẽ yaa bũmb ning sẽn be d sũurẽ wã. A miime tɩ d nonga yẽ la d tẽed-n-taasã, la tɩ d sũur yaa noog ne bũmb nins b sẽn maand n kõt-dã.—1 Sãm. 16:7.

7. Ned sã n tagsdẽ tɩ tõe t’a pa na n yã dũni-kãngã saabã tɩ sãamd a sũuri, bõe n tõe n sõng-a?

⁷ Tõe tɩ y sũur sãamdame, bala y tagsdame tɩ y pa na n vɩɩmd n kaoos n yã dũni-kãngã saabã ye. Sã n yaa woto, bõe n tõe n sõng-yã? Tẽeg-y t’a Zeova maaga a yĩng n gũud n na n sãam dũni-kãngã. (Eza. 30:18) La a sẽn maand sũ-marã tara võore. A sũ-marã kõo neb milyõ-rãmb weer tɩ b tõe n bao n bãng-a n lebg a zo-rãmba. (2 Pɩy. 3:9) Woto wã y sã n wa koms raood bɩ y tẽeg t’a Zeova sũ-marã yĩnga, neb wʋsg tõe n bao n bãng-a lame, n paam fãagr nand tɩ saabã ta. Tõe tɩ b kẽer yɩ y zakã neba.

8. Ned sẽn kʋʋl sã n wa bẽedẽ wall a tar toogo, tõe n kɩtame t’a maan bõe?

⁸ Baa d yʋʋmã sẽn yaa a soaba, d sã n wa bẽedẽ d tõe n yeela gomd wall d maan bũmb n wa maand d bãngẽ. (Koɛ. 7:7; Zak 3:2) Wala makre, a Zoob sẽn da maand sɩdã sẽn wa n namsdẽ wã, a wa n ‘gomdame n pa tagsdẽ’ ye. (Zoob 6:1-3) Woto me, bãag wall tɩɩm tõe n kɩtame tɩ ned sẽn kʋʋl wa yeel gomde, pa rẽ bɩ a maan bũmb a sẽn da pa na n sak n maan ye. La yaa vẽeneg tɩ tõnd ned baa a ye pa na n tik a yʋʋm sẽn vẽsgde, wall a sẽn yaa bãad n maand neb a taabã sẽn pa segde, pa rẽ bɩ a rat tɩ b maand bũmb n kõt-a wakat fãa ye. Sẽn paase d sã n bãng tɩ d yeela ned bũmb sẽn pa segde, yɩta sõma tɩ d yɩ tao-tao n kos a soabã sugri.—Mat. 5:23, 24.

Y SẼN TÕE N MAAN TO-TO N KELL N TALL SŨ-NOOGO

9. Bõe yĩng tɩ y segd n sak neb a taabã sõngre? (Ges-y fot-rãmbã me.)

⁹ Sak-y neb a taabã sõngre. (Gal. 6:2) Sɩngrẽ wã, y tõe n getame tɩ yaa toogo. Saam-bi-poak a ye yʋʋr sẽn boond t’a Gretɛll yeelame: “Mi n yaa toog ne-m tɩ m kos neb a taabã sõngre, bala m pa rat n yɩ zɩɩb ye. Kaoosame tɩ m yaool n wa toeem yam, n sik m meng n sak n deeg tɩ m data sõngre.” Tẽeg-y tɩ y sã n sak tɩ neb a taabã sõng-yã, kõt-b-la sũ-noogo. (Tʋʋ. 20:35) Sẽn paase y na n yãame tɩ neb a taabã nong-y-la wʋsg n dat n sõng-yã, tɩ kõt-y sũ-noogo.

10. Bõe yĩng tɩ y segd n wilgdẽ tɩ y sũur nooma ne b sẽn sõngd-yã? (Ges-y fotã me.)

¹⁰ Wilgd-y tɩ y sũur nooma ne b sẽn sõngd-yã. (Kolo. 3:15; 1 Tes. 5:18) Neb a taabã sã n mi n maan bũmb n sõng-do, d sũur noomame. La d tõe n yĩmame n pa pʋʋs-b bark ye. La d sã n pʋʋs-b bark tɩ d nengã be laado, na n kɩtame tɩ b neẽ tɩ d nand-b lame, la tɩ d sũur nooma ne b sẽn maand bũmb nins n kõt-dã. A Leya tʋmda Betɛllẽ wã, n get neb sẽn kʋʋl yelle. A yeelame: “Saam-bi-pogs nins yell m sẽn getã nin-yend n wae n pʋʋsd-m barka. A mi n gʋlsda rẽ seb-peds zutu. A pa gʋlsd goam wʋsg ye. La yaa gom-noodo. Mam nonga a seb-pedsã kareng wʋsgo. Mam sẽn ne t’a sũur nooma ne bũmb nins m sẽn maand n kõt-a wã noom-m-la wʋsgo.”

11. Bõe la y tõe n maan n sõng neb a taabã? (Ges-y fotã me.)

¹¹ Bao-y n sõng-y y taabã me. Y sã n tagsd neb a taabã yell la y sõngd-b wa y sẽn tõe tɛka, y pa na n tagsd y zu-loeesã yell wʋsg ye. D tõe n dɩka sẽn kʋʋl-bã n mak ne sɛb bĩngr dot sẽn pid ne sɛb sẽn kõt yam wʋsgo. La nebã sã n pa karemd seb-kãense, pa tõe n naf-b ye. Woto me, y sã n pa sõsd ne kom-bɩɩsã n wilgd-b bũmb nins y sẽn mi wã, y pa na n tõog n sõng-b tɩ b bãng bũmb toor-toor sẽn tõe n naf-b ye. Bao-y n bãng-y kom-bɩɩsã. Y tõe n sok-b-la sogsgo, la y maag y yĩng n kelg-ba. Rẽ poore y tõe n wilg-b-la a Zeova sẽn sõng-y to-to wã, la y wilg-b a Zeova noyã tũub sẽn kõt sũ-noogã võore. Yaa vẽeneg tɩ y sã n belsd kom-bɩɩsã la y kengd b raoodo, y sũur na n yɩɩ noogo.—Yɩɩn. 71:18.

12. Bõe la a Zeova pʋlem t’a na n maan kõo sẽn kʋʋl-bã? (Ezayi 46:4) (Ges-y fotã me.)

¹² Pʋʋs-y-yã a Zeova n kos pãnga. Yaa sɩd tɩ y mi n yaame, wall y koms raoodo. La a Zeova “pa yaade, la a pãngã pa boogd me ye.” (Eza. 40:28) Bõe la a Zeova maand ne a pãngã sẽn pa tar koakã? Bũmb a ye yaa t’a kõta neb nins sẽn kʋʋl n ket n maand sɩd ne-a wã pãnga. (Eza. 40:29-31) Sɩd me, a pʋlmame t’a na n sõng-b lame. (Karm-y Ezayi 46:4.) A Zeova pidsda a pʋlemsã wakat fãa me. (Zoz. 23:14; Eza. 55:10, 11) Y sã n pʋʋs a Zeova, a na n kõ-y-la sõngr ning y sẽn datã. Rẽ na n kɩtame tɩ y neẽ t’a nong-y lame, tɩ kɩt tɩ y sũ-noogã paase.

13. Sã n yaa ne 2 Korẽnt rãmb 4:16-18 wã, bõe yell la d segd n tagsdẽ? (Ges-y fotã me.)

¹³ Tẽeg-y tɩ y zu-loeesã yaa wakat bilf yĩnga. D sã n tar zu-loe-kɛgeng n miẽ t’a na n wa saame, yɩta nana tɩ d tõog toogo. Biiblã pʋlmame tɩ beoog sẽn wate nebã pa na n le kʋʋndẽ, b pa na n lʋɩt bãas me ye. (Zoob 33:25; Eza. 33:24) Rẽnd y tõe n maana sũ-noogo, bala y miime tɩ ka la bilfu, y na n paama keelem n yɩɩd pĩndã. (Karm-y 2 Korẽnt rãmb 4:16-18.) La bõe la neb a taabã tõe n maan n sõnge?

NEB A TAABÃ SẼN TÕE N SÕNG SẼN KƲƲL-BÃ TO-TO

14. Bõe yĩng tɩ tar yõod tɩ d kẽnd n kaagd sẽn kʋʋl-bã la d boond-b ne telefõnne?

¹⁴ Kẽnd-y n kaagd-y y tẽed-n-taas nins sẽn kʋʋlã, la y boond-b ne telefõn me. (Ebre. 13:16) Sẽn kʋʋl-bã kẽer mi n yaa b yembre, tɩ sãamd b sũuri. Saam-biig a ye yʋʋr sẽn boond t’a Karl sẽn pa tõe n yi a zakẽ wã yeelame: “M bee roogã pʋg wakat fãa. Sɩd yaa yam-yiisgu. Wakat ninga m getame tɩ m yaa wa bõn-yẽ-kʋdr b sẽn yõk n page. Sãamda m sũur wʋsgo.” D sã n tɩ kaag d tẽed-n-taag sẽn kʋʋle, d wilgd-a lame t’a tara yõodo, la tɩ d nong-a lame. Tõe tɩ d fãa tẽra wakat d sẽn da mag n na n bool d tigingã ned sẽn kʋʋl wall n tɩ kaag-a, n pa tõog ye. D fãa tara tʋʋm wʋsg d sẽn segd n tʋme. Woto wã, bõe n tõe n sõng-d tɩ d maand “bũmb nins sẽn tar yõod n yɩɩdã,” wala makre, n kẽngd n kaagd sẽn kʋʋl-bã? (Fili. 1:10) Y tõe n gʋlsa y tigingã neb nins sẽn kʋʋlã yʋy la ray nins y sẽn magd n na n bool-b wall y tɩ kaag-bã, sẽn na yɩl n da yĩm ye. Y leb n tõe n yãka wakat ning y sẽn na n tɩ kaag-bã takɩ, n da yeel tɩ y sã n wa tõog bal ye.

15. Bõe la kom-bɩɩsã ne sẽn kʋʋl-bã tõe n naag taab n maane?

¹⁵ Y sã n yaa bi-bɩɩga, tõe tɩ y sokda y meng bõe yell la y na n gom ne ned sẽn kʋʋle, wall bõe la y tõe n naag taab n maane. La ra maan-y yɩɩr dẽ wɛɛngẽ ye. Bao-y b zood bala. (Yel. 17:17) Sõsd-y ne-b nand tɩ tigissã sɩnge, la tigissã poore. Y tõe n kos-b lame tɩ b wilg-y Biiblã vɛrse sẽn noom-ba, pa rẽ bɩ b togs-y bũmb b sẽn maan b yãadmẽ wã tɩ maand laado. Y tõe n bool-b lame me tɩ b wa naag-y n ges JW teledifiziyõ wã. Y leb n tõe n maana bũmb takɩ n sõng-ba. Wala makre, y tõe n sõng-b lame n maan b portaabl-dãmbã bɩ b tablɛt-rãmbã miizazʋʋre, pa rẽ bɩ y telesarz seb-paalã n kõ-ba. Saam-bi-poak yʋʋr sẽn boond t’a Karoll yeelame: “Bool-y sẽn kʋʋl-bã tɩ b mi n wa naag-y n maan bũmb kẽer sẽn noom-yã. Baa m sẽn kʋʋlã, m ket n dat n nooga m yõore. Mam nonga maam ne m zo-rãmb sẽn na n tũ taab n tɩ ra teedo, n dɩ, la d tɩ ges zĩ-neeba.” Saam-bi-poak yʋʋr sẽn boond t’a Mayiira yeelame: “Mam zo-rãmbã sʋka a ye n tar yʋʋm pis-wɛ. A yɩɩda maam ne yʋʋm pis-nu la a yopoe. La m wae n yĩmda rẽ yelle. Bala d sõsda ne taab n laadẽ, la d naagd taab n get filim-dãmba. D nin-yɛng sã n wa tar zu-loɛɛga, a kota a to wã saglse.”

16. Bõe yĩng tɩ yaa sõma tɩ d yãagd sẽn kʋʋl-bã logtor yiri?

¹⁶ B sã n wa segd n kẽng logtor yir bɩ y yãag-ba. Y tõe n dɩk-b lame n kẽng logtor yir la y pa ne-ba, sẽn na yɩl n bãng logtoɛɛmbã sã n geta b yell sõma, la b sõngd-b ne sõngr ning b sẽn datã. (Eza. 1:17) Y tõe n maaga y yĩng n kelg logtorã sẽn yet-a bũmb ningã, n wa tõog n sõng-a. Saam-bi-poak sẽn kʋʋl t’a yʋʋr boondẽ t’a Rut yeelame: “Naoor wʋsgo, m sã n kẽng logtor yir m yembre, logtoɛɛmbã pa kelgd-m sõma ye. Logtor ning mi n yeela maam yaa: ‘Yãmb baa fʋɩ pa zabd ye. Y maanda wa y yaa bãad bala.’ La ned sã n yãag maam, logtoɛɛmbã geta m yell sõma n yɩɩda. M pʋʋsda m tẽed-n-taas nins sẽn baood sẽk n yãagd maam logtor yirã barka.”

17. Bõe la y tõe n naag sẽn kʋʋl-bã n maan koɛɛgã mooneg wɛɛngẽ?

¹⁷ Naagd-y sẽn kʋʋl-bã n moond koɛɛga. B kẽer pa tar pãng n na n yi n moon koɛɛgã zak-zak ye. La y tõe n bool-b lame tɩ y naag taab n moon koɛɛgã ne perzãntoaare. Y tõe n zãa goeel sẽn na yɩl tɩ b tõog n zĩnd perzãntoaarã sɛɛga. Y leb n tõe n boola ned sẽn kʋʋl t’a wa naag-y tɩ y zãms ned Biiblã. Y tõe n talla y Biibl karem-biigã meng tɩ y kẽng sẽn kʋʋl-a wã zakẽ n tɩ zãms Biiblã. Kãsem-dãmbã tõe n gesame tɩ sã n tõe bɩ b maand koe-moonegã yiib tigissã ned sẽn kʋʋl zakẽ, t’a tõogd n naagd n moond koɛɛgã nana-nana. A Zeova sã n neẽ tɩ d maanda d sẽn tõe fãa n na n wilg sẽn kʋʋl-bã tɩ d nong-b lame la d nand-ba, noom-a lame.—Yel. 3:27; Rom. 12:10.

18. Bõe yell la d na n gom zãmsgã sõsg ning sẽn pʋgdã pʋgẽ?

¹⁸ Sõs-kãngã tẽeg-d lame t’a Zeova nonga sẽn kʋʋl-bã, la a nand-ba. Tigingã neb a taabã me nong-b lame la b nand-ba. Kʋʋlmã pa nana ye. La ne a Zeova sõngre, y tõe n kell n talla sũ-noogo. (Yɩɩn. 37:25) Y sẽn mi tɩ ka la bilfu, y na n paama sũ-noog n yɩɩd pĩndã pa kengd y raood sɩda? La d tẽed-n-taas kẽer tara zu-loɛɛg sẽn yaa toore. B tara b zakã ned sẽn kʋʋle, biig wall zoa sẽn yaa bãad n segd n ges a yelle. Bõe la b tõe n maan n kell n tall sũ-noogo? D na n leoka sok-kãngã zãmsgã sõsg ning sẽn pʋgdã pʋgẽ.