M segd n basa mobill wẽneb bɩ?

MAMS-Y wa ned sẽn kʋʋl sẽn na n sɩng n wẽnd mobill hal sẽn kaoose. A nonga rẽ, bala a tõe n kẽnga zĩig ning fãa a sẽn date. La a zakã rãmb ne a zo-rãmbã maanda yɩɩre, n tagsdẽ t’a pa segd n le wẽn mobill ye. A pa wʋmd b sẽn tagsd woto wã võor ye.

Yaa woto yãmb me nengẽ bɩ? Sã n yaa woto, bõe n tõe n sõng-y tɩ y bãng y sã n segd n basa mobill wẽnebo?

Tẽns kẽer pʋsẽ, b yãka yʋʋm sõor tɩ ned sã n ta rẽ n ket n dat n wẽnd mobill bɩ a segd n kẽng logtor yiri, tɩ logtor ges a sã n tõe n kell n maana woto. Kiris-neb nins sẽn vɩ tẽn-kãens pʋsẽ wã sakda noy nins tẽngã taoor dãmb sẽn gãnegã. (Rom. 13:1) La baa sã n pa woto tẽng ning pʋgẽ y sẽn be wã, sagls n be n tõe n sõng-y tɩ y bãng y sã n tõe n ket n wẽnda mobill tɩ yell kae ye.

BAO-Y N BÃNG-Y Y SÃ N SEGD N BASA MOBILL WẼNEBO

Etazĩni siglg a ye sẽn get sẽn kʋʋl-bã yell wilgame tɩ y tõe n soka y meng sogsg kẽere. Wala makre:

Yaa toog ne-m tɩ m bãng pano-rãmbã sẽn be soayã noorã sẽn wilgd bũmb ninsã, wall m pa ne sõma yʋng bɩ?
Lebgda toog ne-m tɩ m wẽnemd n ges mobillã nen-getsã bɩ?
M sã n yã bũmb sorã zugu, m tõogd n yɩɩ tao-tao n yõg fẽrʋ bɩ?
M kẽnda maasg-maasg wʋsgo, n sãamd neb a taabã kẽn bɩ?
Rasem a noorã m naan n maana agsɩdã naoor wʋsgo, pa rẽ bɩ m mobillã tara bãna, m sẽn fão teed yĩng bɩ?
Polɩɩs n zoe n yõk maam, m sẽn wẽnd to-to wã sẽn pa sõma yĩng bɩ?
Mam zoe n wẽnda mobill n wa suus bɩ?
Mam venda tɩt sẽn tõe n kɩt tɩ m pa wẽn mobill sõma bɩ?
M zakã rãmb wall m zo-rãmbã yetame tɩ b maanda yɩɩre, mam sẽn wẽnd mobillã to-to wã wɛɛngẽ bɩ?

Y sã n leok sogs-kãensã a ye bɩ a yiib tɩ n-yẽe, tõe tɩ y segd n toeema bũmb kẽere. Wala makre, y tõe n yãka yam n pa na n wẽnd n zãagd zĩiga, sẽn yɩɩd fãa yʋngo. Gũusd-y wakat fãa n get y sã n wẽnda sõma. Y tõe n kosa y zakã ned wall y zoa t’a togs-y a tagsg sẽn yaa a soab ne y sẽn wẽnd to-to wã. Y tõeeme me n bao wẽnebã karen-saamb t’a wilg-y y sẽn tõe n wẽn mobill sõma to-to n paase. La y sã n leoka sogsg nins sẽn be yĩngrã wʋsg tɩ n-yẽe, tõe tɩ yɩta sõma tɩ y ra le wẽn mobill ye.a

TŨ-Y BIIBLÃ SAGLSÃ

Tõe n yɩɩ toog tɩ y sak n deeg tɩ y pa le wẽnd mobill sõma wa pĩndã ye. Sẽn paase, y sã n tags tɩ y segd n wa basa mobill wẽnebo, tõe n sãamda y sũuri. Woto wã, Biiblã sagl-bʋs n tõe n sõng-y tɩ y tags sõma, n bãng n yãk yam? D gom bãmb b yiib yelle.

Sak-y n deeg-y tɩ bũmb kẽer la y pa le tõe n maane. (Yel. 11:2) Y sã n kʋʋndẽ, y ninã, y tʋbã la y gĩinã pãng boogdame, tɩ y pa le tõe n maan bũmb kẽer tao-tao me ye. Wala makre, neb wʋsg sã n kʋʋndẽ b wat n pa le maand bũmb kẽer n wɩsgd b yĩnga, bala b miime tɩ b tõe n pogla nana-nana, b sẽn kʋʋlã yĩnga. Yaa woto me ne mobill wẽnebo. Ned sẽn sak n deeg tɩ pa bũmb fãa la a tõe n maan wat n yãka yam n bas mobill wẽnebo, a sẽn mi tɩ tõe n waa ne yellã yĩnga. (Yel. 22:3) Sẽn paase, neb a taab sã n yeel ned a woto tɩ b maanda yɩɩr a sẽn wẽnd mobillã to-to wã wɛɛngẽ, a kelgdame.—Ges-y 2 Sãmwɛll 21:15-17.

D pa rat n tall zɩɩm taal ye. (Tõo. 22:8) Ned sã n kẽ mobill n pa wẽnd sõma, a tõe n pogla ned wall a kʋ a menga. Ned sẽn pa le tõe n wẽn mobill sõma sã n ket n wẽndẽ, a ningda a mengã la neb a taabã vɩɩm yell pʋgẽ. A sã n fão ned t’a ki, a soabã zɩɩmã taal tõe n zĩnda a zugu.

Ra tags-y tɩ y sã n bas mobill wẽnebo, neb a taabã pa na n le waoogd-y ye. A Zeova nonga yãmba. Y sã n wilgdẽ tɩ y miime tɩ pa bũmb fãa la y tõe n maane, tɩ y yaa sik-m-meng soaba, la tɩ y tagsda neb a taabã yelle, noom-a lame. A pʋlmame me t’a na n teend-y lame, la a belsd-yã. (Eza. 46:4) A pa na n tol n daag-y n bas ye. Woto wã, kos-y-yã-a t’a sõng-y tɩ y tags sõma, n tõog n tik Biiblã saglsã n bãng y sã n segd n basa mobill wẽnebo.

Neb a taabã sẽn tõe n sõng-y to-to

Naoor wʋsgo, yaa ned sẽn kʋʋl zak rãmb n mi a sã n wẽnda mobill sõma n yɩɩda. Tõe me tɩ y yaa a zoa, n wʋmd neb a taab sẽn yet tɩ b maanda yɩɩr a sẽn wẽnd mobillã to-to wã wɛɛngẽ. Kelg-y b sẽn yetã sõma. Y tõe n kos-a lame t’a rɩk-y tɩ y kẽng zĩiga, n paam n ges a sẽn wẽnd to-to wã. Y sã n mik t’a pa maand bũmb kẽer sõma bɩ y gom rẽ yelle. Y sã n wa gomd ne-a bɩ y ning y meng a zĩigẽ. Gom-y ne bʋgsem, la ne pʋ-peelem me. Ra ges-y-yã a yʋʋmã ye. Ges-y-yã a sẽn wẽnd to-to wã. Ra yeel-y-yã-a yaa: “Fo pa le tõe n wẽn mobill sõma ye.” Y tõe n yeelame: “Fo sã n wa wẽnd mobilli, m yam pa gãe bãan ye.” Tẽeg-y-yã-a Biiblã sagls a yiib nins yell d sẽn gom sõs-kãngã pʋgẽ wã, la y yeel-a tɩ y kɩsa sɩd t’a nonga sagl-kãense, la t’a rat n tũu Biiblã sẽn yetã.

Sã n wa yaa tɩlɛ tɩ ned sẽn kʋʋl bas mobill wẽnebo, d fãa segd n yɩɩ wʋmdba. A tõe n getame t’a pa le so a meng n tõe n kẽng zĩig ning fãa a sẽn dat ye. Bõe la y tõe n maan n sõng-a? Maan-y y sẽn tõe fãa n sõng-a ne bʋgsem. (Yel. 17:17) Yeel-y-yã-a t’a sã n wa rat n kẽng zĩiga y na n wa rɩk-a lame, bala tõe n yɩɩ toog ne-a t’a kos sõngre. Y tõe n maana na-kẽndr n wat n dɩkd-a n kẽnd zĩis kẽere. Wala makre, tigissã la koe-moonego. A sã n wa rat n tɩ ra teedo, pa rẽ bɩ n kẽng logtor yir me, y tõe n tɩ rɩk-a lame. Yeel-y-yã-a t’a bas a yam tɩ y maanda rẽ ne yamleoogo, la tɩ y sã n be ne-a noom-y lame.—Rom. 1:11, 12.

a Y sã n dat kibay n paas bɩ y karem yʋʋmd 2002 sa-sik kiuug rasem 22 Réveillez-vous ! wã sõsg ning gom-zug sẽn yaa: “Circulation routière : êtes-vous en sécurité ?”