Tʋʋlgã sẽn paasd wʋsg dũniyã gill zugã: Bõe la Biiblã yet rẽ wɛɛngẽ?

Yʋʋmd 2022 sẽoog kiuugã pʋgẽ, b wilgame tɩ tʋʋlgã paasa wʋsg dũniyã zĩis toor-toore:

• “Ki-kãngã pʋgẽ, naoor a yiib-n-soab la woto Sɩn goosneema wã taoor dãmb sẽn keoog galʋ-tẽns pis-yopoe neb tɩ b gũus tɩ tʋʋlgã na n yɩɩ wʋsgo.”—Yʋʋmd 2022, sẽoog kiuug rasem 25, CNN Wire Service.

• “Tʋʋlgã sẽn yaa wʋsg Erop tõrã kɩtame tɩ wetã rɩt bugum tẽns wʋsg pʋsẽ.”—Yʋʋmd 2022, sẽoog kiuug rasem 17, The Guardian.

• “Hatã daare, tʋʋlgã paasa Etazĩni tẽns wʋsg pʋsẽ. Yaa yaang sẽnesã, goabg sẽnesã babs kẽer ne Midwɛsã tẽnse.”—Yʋʋmd 2022, sẽoog kiuug rasem 24, The New York Times.

Bõn-kãensã fãa wilgda bõe? Wilgdame tɩ bõn-vɩɩsã pa na n le wa tõe n vɩɩmd tẽngã zug bɩ? Bõe la Biiblã yet rẽ wɛɛngẽ?

Tʋʋlgã sẽn paasdã pidsda bũmb Biiblã sẽn pĩnd n togs bɩ?

N-ye. Tʋʋlgã sẽn paasdã zemsa ne bũmb Biiblã sẽn pĩnd n togs tõnd wakatã wɛɛngẽ. Wala makre, a Zeezi yeelame tɩ tõnd na n yãa “bũmb toor-toor sẽn kẽesd rabeem.” (Luk 21:11) Tʋʋlgã sẽn paasd zĩig zãngã kẽesda neb wʋsg rabeem, bala b yɛɛsda ninsaalbã na wa n sãam tẽngã tɩ d pa le tõe n vɩɩmd a zug ye.

Tẽngã na n wa sãamame tɩ d pa le tõe n vɩɩmd a zug bɩ?

Ayo. Wẽnnaam naana tẽngã sẽn na yɩl tɩ ninsaalbã vɩɩmd a zug wakat fãa yĩnga. (Yɩɩn-sõamyã 115:16; Koɛɛg soaba 1:4) A pa na n bas ninsaalbã tɩ b sãam tẽngã ye. A pʋlmame t’a na n “sãama neb nins sẽn sãamd tẽngã.”—Vẽnegre 11:18.

Ad bãngr-goam a yiib sẽn wilgd bũmb a taab Wẽnnaam sẽn pʋlme:

• “We-raoogã ne tẽng ning sẽn kʋɩ wã na n maana sũ-noogo. Zĩ-koɛɛngã na n kɩdma ne sũ-noog n ning puud wa sõse.” (Ezayi 35:1) Wẽnnaam pa na n bas tɩ tẽngã tõr lebg we-rasempʋɩɩg tɩ ned pa tõe n vɩɩmd a zug ye. A na n manega a zĩis nins b sẽn sãamã.

• “Yãmb geta tẽn-gãongã yelle, n kõt-a koom wʋsgo, yãmb kõt-a-la arzegs tɩ seke.” (Yɩɩn-sõamyã 65:10) Wẽnnaam na n kɩtame tɩ tẽngã lebg arzãna.

Y sã n dat n bãng zĩigã sẽn wɩngdã sẽn pidsd gomd Biiblã sẽn pĩnd n togs to-to, bɩ y karem sõsg ning gom-zug sẽn yaa: “Les changements climatiques et notre avenir : qu’en dit la Bible ?”

Y sã n dat n bãng Biiblã sẽn pʋlem tɩ tẽngã na n lebga arzãnã n paase, bɩ y karem sõsg ning gom-zug sẽn yaa: “Qui sauvera la terre ?”