Yʋʋmd 2023 tʋʋlgã tolg n yɩɩ wʋsg dũniyã gill zugu—Bõe la Biiblã yet rẽ wɛɛngẽ?

Dũniyã gill zugu, tʋʋlgã la yel-beed a taabã a sẽn wat ne wã yɩɩ wʋsgo. D ra nan zɩ n yã a buud ye. Ad kibay a wãna:

• “Yʋʋm 174 la woto b sẽn sɩng zĩigã sã n yaa tʋʋlg bɩ waood gʋlsg sɛb zutu. La d ra nan zɩ n yã sigr kiuug sẽn yɩ tʋʋlg wa sigr ki-kãngã ye.”—Agence américaine d’observation océanique et atmosphérique [NOAA], Etazĩni sull ning sẽn get leebgã yelle, yʋʋmd 2023 sẽoog kiuugã rasem 13.

• “Itali, Ɛspayn, Fãrens, Alemayn la Poloyn tẽnsẽ wã tʋʋlgã lebga wʋsgo, hal tɩ b ra tagsd tɩ zĩigã na n wɩng n taa degre 48 Sicill la Sardayn ko-sʋk tẽnsẽ wã. Zĩigã ra zɩ n wɩng woto Erop ye.”—Agence spatiale européenne, yʋʋmd 2023 sẽoog kiuugã rasem 13.

• “Tẽngã sẽn tar wɩngrã, saagã na n niida wʋsg n yɩɩd pĩndã, tɩ rẽ na n wa ne sa-kãsems n sãam teed wʋsg n yɩɩd pĩndã.”—Yaa a Stefan Uhlenbrook sẽn yaa tʋʋmd taoor soabã (directeur de l’hydrologie, de l’eau et de la cryosphère à l’Organisation météorologique mondiale) n yeele, yʋʋmd 2023 sẽoog kiuugã rasem 17.

Kibay nins sẽn gomd tʋʋlgã yellã sẽn lebg wʋsgã kɩtame tɩ y maand yɩɩr bɩ? D ges bũmb ning Biiblã sẽn yet yel-kãngã wɛɛngẽ.

Tʋʋlgã sẽn lebg wʋsgã pidsda Biiblã bãngr-goam bɩ?

N-ye. Tẽngã sẽn wɩngd zĩig fãa wã la yel-beed a taabã sẽn wõnd a woto wã naaga bũmb nins Biiblã sẽn da pĩnd n togs tɩ na n zĩnda tõnd wakatã. Wala makre, a Zeezi ra pĩnd n togsame tɩ tõnd na n yãa “bũmb toor-toor sẽn kẽesd rabeem.” (Luk 21:11) Zĩigã sẽn tar wɩngr zĩig fãa wã kɩtame tɩ neb wʋsg yɛɛsdẽ tɩ ninsaalbã na n sãama tẽngã.

Tẽngã na n sãamame tɩ d pa le tõe n vɩɩmd a zug bɩ?

Ayo. Wẽnnaam naana tẽngã sẽn na yɩl tɩ ninsaalbã vɩɩmd a zug wakat fãa yĩnga. A pa na n bas tɩ ninsaalbã sãam-a ye. (Yɩɩn-sõamyã 115:16; Koɛɛg soaba 1:4) A pʋd n pʋlmame t’a na n “sãama neb nins sẽn sãamd tẽngã.”—Vẽnegre 11:18.

Biiblã wilgdame tɩ Wẽnnaam tõe n kogla tẽngã tɩ sabab-wẽng ra paam-a, la t’a na n maana woto.

• “[Wẽnnaam] kɩtdame tɩ sob-kãsengã yõke, tɩ mogrã ko-pɛmã pa sɩddd.” (Yɩɩn-sõamyã 107:29) Wẽnnaam tara tõog koma, sobgã la tẽngã bũmb a taabã zugu. A tõe n kɩtame tɩ tẽn-gãongã rẽgeng la a sãoongã pa le nams nebã ye.

• “Yãmb geta tẽngã yelle, n kɩtdẽ t’a womd biis zembal la a tar noosem wʋsgo.” (Yɩɩn-sõamyã 65:9) Wẽnnaam na n ninga tẽngã bark t’a lebg arzãna.

Y sã n dat n bãng Biiblã sẽn pʋlem tɩ tẽngã na n lebga arzãna n paase, bɩ y karem sõsg ning gom-zug sẽn yaa: “Qui sauvera la terre?”