BIIBLÃ VƐRSE-RÃMB B SẼN BILG A VÕORE
Ezayi 42:8: “Mam yaa Zusoaba”
“Mam yaa a Zeova. Mam yʋʋrã la woto. Mam pa na n dɩk m ziirã n kõ ned a to, wall m dɩk m pẽgrã n kõ bõn-naands b sẽn pees ye.”—Ezayi 42:8, Dũni-paalgã lebgre.
“Mam yaa Zusoaba, yaa mam yʋʋr la woto. Mam ka na n dɩk m waoogrã n kõ ned a to ye. Mam ka na n dɩk m ziirã n kõ bõn-naandg ye.”—Ezayi 42:8, Wẽnnaam Sebre, 1983.
Ezayi 42:8 goamã võore
Wẽnnaam togsa tõnd a yʋ-peellã, la a yeel t’a pa rat tɩ d rɩk a pẽgrã n kõ bõn-naands b sẽn pees ye.
Yaa Wẽnnaam n kõ a meng yʋ-kãnga. B boonda yʋ-kãng ne Moorã tɩ Zeova.a (Yikri 3:14, 15) Baa Wẽnnaam yʋ-peellã sẽn be kãab-kʋdgã pʋgẽ sẽn kolg naoor tus a yopoe wã, Biibl-dãmb wʋsg pʋgẽ, b lebga Wẽnnaam yʋ-peellã tɩ “Soaala,” bɩ “Zusoaba.” Wala makre, Yɩɩn-sõamyã 110:1 wã pʋgẽ. Yaa bãngr-gomd sẽn gomd a Zeova ne a Zeezi yelle. Wẽnnaam Sebre ning b sẽn yiis yʋʋmd 1983 pʋgẽ, b yeta Tʋʋm 2:34-36 pʋgẽ yaa: “Zusoaba yeela mam Zusoaba yaa: ‘Zĩnd mam dɩtgo tɩ m maan f bɛɛba tɩ yɩ f nao roagendga.’” Dũni-paalgã lebgr pʋgẽ, b ninga Wẽnnaam yʋ-peellã a sẽn sedg n zĩnd zĩig ningã, sẽn na yɩl n sõng karemdbã tɩ b bãng Zusoab fãa sẽn n yaa soaba. B yeta be yaa: “A Zeova yeela mam Zu-soabã yaa: ‘Zĩnd mam nug-rɩtgo, n tãag m sẽn na n dɩgl f bɛɛbã wa nao-roagendg fo naoã yĩnga.’”
Biibl-mitb wʋsg tagsdame tɩ Wẽnnaam yʋʋrã võor yaa: “A kɩtdame tɩ.” Yaa Wẽnnaam sɩd-sɩdã a ye bal n tõe n yɩ a sẽn dat a soaba, bɩ n kɩt t’a bõn-naandsã lebg a sẽn dat a soab a raabã pidsg yĩnga.
A Zeova sẽn yaa d Naandã la Wẽnnaam sɩd-sɩdã yĩnga, yaa yẽ a ye bal la d segd n tũ ne d sũur fãa. Ned bɩ bũmb baa a ye pa zems ne d waoogre, bõn-naandsã la bũmb a taabã nebã sẽn waoogdã sẽn naage.—Yikri 20:2-6; 34:14; 1 Zã 5:21.
B sẽn yeel bũmb ning n yaool n na n togs Ezayi 42:8 goamã
Ezayi sak 42 sɩngrẽ a Zeova ra pĩnd n togsa “soab ning yẽ sẽn yãkã” sẽn na n wa tʋm tʋʋmd ningã. Wẽnnaam yeelame tɩ soab ning sẽn t’a yẽ yamã “na n waa ne tɩrlem buud toɛy-toɛyã sʋka.” (Ezayi 42:1) Sẽn zems ne pʋlen-kãnga, Wẽnnaam yeelame yaa: “Masã mam togsda bõn-paalse. Nand tɩ b sɩnge, mam wilgd-b-la yãmba.” (Ezayi 42:9) Bãngr-gomd ning sẽn gomd ‘soab ning Wẽnnaam sẽn yãkã’ yellã paama pidsg yʋʋm kobs poore, Mesi wã bɩ Kiristã sẽn wa n sɩng koɛɛgã mooneg tẽngã zugã.—Matiye 3:16, 17; 12:15-21.
a Ne Ebre buud-gomdã, Wẽnnaam yʋʋrã yaa gʋls-biis a naase, tɩ b nong n gʋlsd-a ne farend tɩ YHWH. Farendã Biibl kẽer pʋsẽ b lebga yʋʋrã tɩ “Yahweh,” bɩ “Yahvé.” Y sã n dat n bãng n paas rẽ wɛɛngẽ bɩ ges Gʋls-sõamyã Dũni-paalgã lebgr pʋgẽ Vẽnegre A4, “Wẽnnaam yʋʋrã sẽn be Biiblã babg ning b sẽn da gʋls ne Ebre wã pʋgẽ.”