SAK A 06
Sɩnga wãn tɩ bõn-vɩɩsã wa beẽ?
“Vɩɩm ko-bundum bee [Wẽnnaam] nengẽ.” (Yɩɩn-sõamyã 36:10) Yãmb tẽeda rẽ bɩ? Neb kẽer yetame tɩ Naand kae ye. Sã n mikame tɩ yaa woto, rẽnd ninsaalbã wa n bee woto bala. La sã n mikame tɩ yaa Wẽnnaam a Zeova n naan bõn-vɩɩsã, rat n yeelame t’a pa naan-b zaalem yĩng ye.a D na n gesa Biiblã pʋgẽ b sẽn bilgd vɩɩmã sẽn sɩng to-to wã, la bũmb ning sẽn kɩt tɩ d tõe n kɩs sɩd ne rẽ wã.
1. Sɩnga wãn tɩ saasã la tẽngã wa beẽ?
Biiblã pʋgẽ b yetame: “Sɩngr wẽndẽ, Wẽnnaam naana yĩngr la tẽnga.” (Sɩngre 1:1) Siãnsã bãngdb fãa la bal yetame tɩ saasã la tẽngã talla sɩngre. Wãn to la Wẽnnaam naan-ba? Wẽnnaam tũnuga ne a pãngã, rat n yeel t’a vʋʋsem sõngã, n naan bũmb fãa sẽn be saasẽ la tẽngã zugu. Wala makre, ãd-sula wã, ãdsã, la bũmb a taabã.—Sɩngre 1:2.
2. Bõe yĩng tɩ Wẽnnaam naan tẽngã?
A Zeova ‘pa naan tẽngã zaalem yĩng ye. A naan-a lame tɩ neb tõe n zĩnd a pʋgẽ.’ (Ezayi 45:18) A naana tẽngã sẽn na yɩl t’a zug zĩndg be yamleoogo, la a kɩt t’a tar bũmb nins fãa ninsaalbã sẽn dat sẽn na yɩl n vɩɩmd wakat sẽn kõn sa. (Karm-y Ezayi 40:28; 42:5.) Siãnsã bãngdb wilgame tɩ tẽngã yaa toor zalle. Yaa tẽngã zug bal la ninsaal tõe n vɩɩmde.
3. Bõe n kɩt tɩ ninsaalbã yaa toor ne rũmsã?
A Zeova sẽn maan tẽngã poore, a naana bõn-vɩɩs sẽn na yɩl tɩ b zĩnd a zugu. A reng n naana tɩɩse, mood la rũmsi. Rẽ poore, “Wẽnnaam naana ninsaalbã n wẽneg b menga.” (Karm-y Sɩngr 1:27.) Bõe n kɩt tɩ ninsaalbã yaa toor zalle? Wẽnnaam sẽn naan tõnd a meng wõnegã yĩnga, d tõe n dɩka a togs-n-taare. Wala makre, d tõe n talla nonglem, la d nong tɩrlem wa yẽ. Sẽn paase, a naana tõnd tɩ d tõe n zãms buud-gomde, n nong bõn-neeba, la d nong n kelgd yɩɩn-noodo. D leb n yaa toor ne rũmsã, bala tõnd tõe n waooga d Naandã.
D BAO N BÃNG N PAASE
D ges kaset sẽn wilgd tɩ Naand n be, la tɩ bũmb ning b sẽn yet Biiblã pʋgẽ naanegã wɛɛngẽ wã zemsame. D leb n na n bãnga zʋg-sõma nins ninsaalbã sẽn tarã sẽn sõngd tõnd tɩ d bãng Wẽnnaam zugu.
4. Bõn-vɩɩsã tara Naanda
Ninsaal sã n ges bõn-naandg n maan bũmbu, a taabã pẽgd-a lame. Woto wã, ãnda la b segd n pẽge, bũmb ning yẽ sẽn ges n maanã yĩnga? Ges-y VIDEO wã. Rẽ poor bɩ y leok sokrã.
Bõe la ninsaalbã ges n maan bũmb toor-toore?
Roog fãa yaa ned n me. La ãnda n naan bũmb nins sẽn be tẽngã zugã? Karm-y Ebre-rãmb 3:4, tɩ rẽ poor bɩ y leok sogsgã:
Bũmb nins sẽn be tẽngã zugã sẽn naan to-to wã wɛɛngẽ, bõe n noom yãmba?
Ned sã n tẽed tɩ bũmb nins sẽn be saasẽ la tẽngã zugã tara Naanda, a bee bʋʋm bɩ? Bõe yĩnga?
Yãmb miime bɩ?
Y tõe n paama sõss la video-rãmb sẽn gomd bõn-kãng yell jw.org pʋgẽ, zĩig ning b sẽn gʋls tɩ “Wa n bee woto bal sɩda?” la “Neb kẽer sẽn tagsde, vɩɩmã sẽn sɩng to-to wã wɛɛngẽ.”
“Sɩd me, roog fãa yaa ned n me, la sẽn naan-a bũmb fãa wã yaa Wẽnnaam”
5. D tõe n tẽe b sẽn yeel naanegã wɛɛngẽ Biiblã pʋgẽ wã
Sɩngr sak a 1 wã pʋgẽ, b wilgda sẽn sɩng to-to tɩ tẽngã la bũmb nins sẽn be a zugã wa beẽ wã. D tõe n tẽe kiba-kãng bɩ, bɩ yaa soalma? Ges-y VIDEO wã, tɩ poor bɩ y leok sogsgã.
Biiblã pʋgẽ, b wilgame tɩ tẽngã ne bũmb nins sẽn be a zugã naanegã kaoosa rasem a yoobe, tɩ daar fãa yaa lɛɛr 24 bɩ?
Yãmb tagsdame tɩ b sẽn bilg naanegã sẽn yɩ to-to Biiblã pʋgẽ wã zemsame bɩ? Bõe yĩnga?
Karm-y Sɩngr 1:1, tɩ rẽ poor bɩ y leok sokrã:
Siãnsã bãngdb yeelame tɩ saasã ne tẽngã talla sɩngre. Y sã n mak b sẽn yeelã ne y sẽn karem Biiblã pʋgẽ mas-masã wã, y tõe n yeelame tɩ bõe?
Neb kẽer sokda b mens Wẽnnaam sã n pa naana bõn-vɩɩg a ye, t’a tall tedgr n wa lebg bõn-vɩɩs wʋsgo. Karm-y Sɩngr 1:21, 25, 27, tɩ rẽ poor bɩ y leok sogsgã:
Yãmb tagsdame tɩ Biiblã wilgdame tɩ Wẽnnaam naana bõn-vɩɩg a ye, n bas-a t’a tall tedgr n wa lebg zĩm, rũms la ninsaalb bɩ, bɩ a naana bũmb fãa ‘wa sẽn zems a buudu’?
6. Wẽnnaam bõn-naandsã sẽn be tẽngã zugã sʋka, ninsaal to kae ye
Tõnd yaa toor ne rũmsã a Zeova sẽn naanã. Karm-y Sɩngr 1:26, tɩ rẽ poor bɩ y leok sokrã:
Sẽn mik tɩ Wẽnnaam naana tõnd a meng wõnegã, tõnd sẽn tõe n tall nonglem la nimbãan-zoeerã wilgda tõnd bõe Wẽnnaam mengã zugu?
NEB KẼER SẼN YETE: “B sẽn bilgd naanegã sẽn yɩ to-to Biiblã pʋgẽ wã yaa soalma.”
Yãmb tagsg yaa wãn ne rẽ?
KƲMSGO
Yaa a Zeova n naan saasã la tẽngã, ne bõn-vɩɩsã fãa.
Lebg-n-gese
Biiblã pʋgẽ, bõe la b yet saasã ne tẽngã sẽn sɩng to-to wã wɛɛngẽ?
Yãmb tagsdame tɩ Wẽnnaam naana bõn-vɩɩg a ye, n bas-a t’a tall tedgr n wa lebg bõn-vɩɩs toor-toorã bɩ, bɩ a naana bõn-vɩɩsã fãa?
Bõe n kɩt tɩ ninsaalbã yaa toor zalle?
BŨMB A TAABA
Bũmb toor-toor sẽn wilgd tɩ Naand n be.
“Bõe la bõn-vɩɩsã sõngd tõnd tɩ d bãnge?” (Yʋʋmd 2006 bõn-bɩʋʋng kiuug Réveillez-vous! wã)
Rao sẽn maand to-to, n bilgd a bi-bilf Biiblã sẽn yet bũmb ning naanegã wɛɛngẽ wã.
Kẽer sẽn yet tɩ bũmb fãa wa n bee woto wã zemsa ne Biiblã goamã bɩ?
“Wẽnnaam tũnuga ne evolisiyõ wã n naan bõn-vɩɩs toor-toorã sẽn be wã bɩ?” (Bee jw.org)
Tẽn-vaeesdbã sẽn vaees n yã kõab ninsã, wall siãnsã bãngdb sẽn vaees n bãng bũmb ninsã wilgdame tɩ bõn-vɩɩsã tara Naand bɩ, bɩ wilgdame tɩ bõn-vɩɩsã wa n bee woto bala?
Sogsg a nu d sẽn segd n sok d menga, sẽn sɩng to-to tɩ bõn-vɩɩsã wa beẽ wã wɛɛngẽ (borsiiri)