Wẽnnaam tʋmda ne manesem “golems” bɩ?

“DEUS ESCREVE CERTO POR LINHAS TORTAS” (“WẼNNAAM GƲLSDA KƐPƖ N TŨNUGD NE RULS SẼN YAA GOALEM-GOALMA”) woto la Berzill yel-bũnd yeta. Woto wilgdame tɩ wakat fãa Wẽnnaam maanda sẽn yaa tɩrga, la wakat ninga a maand-a-la ne manesem golemse, sã n yaa ne ninsaal nif gesgo. Wala makre, ned sẽn be a piig la a yiib zug sã n ki, neb wʋsg yetame tɩ, ‘Yaa Wẽnnaam n bool-a saasẽ.’ Ned sã n yaa koamsa, bɩ yel-beed sã n paam-a, kẽer yetame tɩ ‘yaa Wẽnnaam daabo.’ Sẽn mik tɩ b ningda Wẽnnaam taal kũumã, bãasã a yɛl a taabã sẽn wat ne sũ-sãamsã yĩngã, goam a woto wilgdame tɩ Wẽnnaam ‘gʋlsda goalem-goalmã,’ t’a maanda yɛlã ne manesem ninsaal sẽn pa tõe n wʋm b võore.

Bõe yĩng tɩ neb wʋsg sẽn yaa tũudum neb tagsdẽ tɩ yaa Wẽnnaam n yaa sabab tɩ kũumã la yel-toodã beẽ? Yaa b sẽn pa wʋm Biiblã verse kẽer b sẽn yãk ka la ka võorã la sẽn nong n kɩt tɩ b tagsd woto wã. Bɩ d ges bãmb b wãn koɛɛg-koɛɛga.

● ”Ãnda n kɩt tɩ yẽ [ninsaal] lebg muka wala wʋnga, la ãnda n kõt yẽ nini wala kɩt t’a lebg zõanga? Ka mam sẽn yaa Zusoaba la?”—Yikri 4:11.

Woto rat n yeelame tɩ neb nins fãa sẽn namsd komslem buud toor-toor yĩngã yaa Wẽnnaam yell bɩ? Ayo. Woto yɩtẽ-la lebend ne Wẽnnaam nedemdã. Biiblã yeta tõndo: “Wẽnnaam sẽn naan fãa yaa sõama.” (1 Tɩmote 4:4) Ned sã n dog n yaa zoanga, muk bɩ wʋnga, pa Wẽnnaam yell ye. A sẽn tʋll bũmb ning bal ya a naanegã neere, bala a yaa “bark sõama fãa la kũun sõama fãa” Yẽgre.—Zak 1:17.

Ra yaa tõnd pipi roagdb a Ãdem ne a Hawa n tõdg Wẽnnaam ne b meng yam-yãkre, n kong b zems zãngã. Yaa rẽ n kɩt tɩ b ra pa leb n tõe n dog kamb sẽn zems zãngã. (Sɩngre 3:1-6, 16, 19; Zoob 14:4) B kambã sẽn kẽ kãadem n paam kambã, pa zems zãng woo pa zems zãnga, n sɩng pukr ninsaalbã nengẽ tɩ yĩngã zams be sʋka. Ba ne sẽn pa a Zeova n wa ne tood kãensã wã, a basame tɩ b zĩndi. Woto yĩnga, a ra tõe n goma yẽ mengã yell wala ned sẽn ‘kɩtd’ tɩ neb yɩ mugsi, wʋms la zoense.

● “Bũmb ninga sẽn golma ka tõe n tẽeg ye.”—Koɛɛg Soaba 1:15.

Yaa Wẽnnaam n maan yɛlã goalem bɩ? Vẽenega yaa ayo. Koɛɛg Soaba 7:29 yetame: “Wẽnnaam naana ninsaalba tɩrse, la neba baoome tɩ ges bũmb wʋsgo.” Biibl a to (Contemporary English Version) lebg n dɩka verse kãngã ne goam a taab woto: “Wẽnnaam sẽn da waa n naan tõndã tɩ d ra tara pʋ-peelem zãng fasɩ, la masã tõnd golma d tagsa wã.” Roap ne pagb wʋsg sẽn yɩɩd basa Wẽnnaam no-tɩrsã tũub n yãk ne yamleoog n tũ b mens gɛɛla, magb bɩ b soy b mens sãoong yĩnga.—1 Tɩmote 2:14.

Sẽn paase, wala tʋm-tʋmd a Poll sẽn wilgã, ãdem-biisã yel-wẽn yĩnga, “b ninga naanegã faoolem pʋgẽ.” (Rom dãmba 8:20, NW ) La ninsaal modgr “ka tõe n tẽeg” yel-kãngã ye. Yaa ne Wẽnnaam sẽn na n kẽes a toog bal la yɛl nins sẽn golmã la faoolmã fãa sẽn be tẽng zugã na n meneme.

● “Bɩ f tags Wẽnnaam sẽn maand bũmb ninga yelle. Tɩ bõe, ãnda n tõe n tẽeg bũmb ninga bãmb sẽn gõdã?”—Koɛɛg Soaba 7:13.

Sẽn dat n yeel tɩ rĩm a Salomo sʋkame: ‘Ãdem-biisã sʋka, ãnd n tõe n dems zams la pa zems zãng nins Wẽnnaam sẽn bas tɩ beẽ wã?’ Ned ba a yembr pa tõe ye, bala pa zaalem yĩng la a Zeova Wẽnnaam sẽn bas tɩ bõn-kãensã beẽ wã ye.

Yaa woto yĩng la a Salomo sẽn sagl woto wã: “Bɩ f maan sũ-noog zu-noog raare. La toog raare, bɩ f tagse; yaa Wẽnnaam n maan bũmb b yiiba fãa, sẽn na yɩlga tɩ ninsaal da bãng bũmb ninga sẽn be poorẽ n watẽ wã ye.” (Koɛɛg Soaba 7:14) Ned segd n talla naneb ne daar ning yɛlã sẽn yɩ sõma ne-a n wilg a nanebã n maan neere. A segd n gesame tɩ noog raar yaa kũun sẽn yit Wẽnnaam nengẽ. La yel-beed sã n wa daarã pʋgẽ masã? Ned na maan neer n “tagse,” sẽn dat n yeel t’a sak n deege, tɩ Wẽnnaam basame tɩ yel-beedã zĩndi. Bõe yĩng t’a maan woto? A Salomo yetame: “Sẽn na yɩlga tɩ ninsaal da bãng bũmb ninga sẽn be poorẽ n watẽ wã ye.” Woto rat n yeelame tɩ bõe?

Wẽnnaam sẽn basd tɩ d paamd noog la toogã tẽegda tõnd tɩ d pa tõe n togs beoog-daar sẽn na n yɩ a soab ye. Yel-beed tõe n waa nin-tɩrsã la nin-wẽnsã zut n pa bak ye. Rẽ segd n kɩtame tɩ d bãng tɩ tara yõod tɩ d ra teeg d mense, la d teeg Wẽnnaam, n tẽegdẽ tɩ “Wẽnnaam yaa nonglem.” (1 Zã 4:8) Baa d sã n pa wʋmd yɛl kẽer võor masã, d tõe n kɩsa sɩd tɩ bũmba fãa sã n wa pidsi, Wẽnnaam sẽn bas tɩ yɛl nins zĩndã na n talla yõod ne neb nins fãa yɛlã sẽn pakã.

A sẽn bas bũmb ning fãa tɩ beẽ pa na n tol n baas ne toog sẽn-kõn-sa nin-tɩrsã yĩng ye. Tʋm-tʋmd a Pɛɛr wilga woto vẽenega, a sẽn da wa n gomd namsgã sẽn wat a tẽed-n-taasã zut yẽ wakatẽ wã wɛɛngẽ wã: “Yãmb sã n nams wakat bilfu, Wẽnnaam sẽn so barka fãa sẽn bool yãmb tɩ y paam pʋɩɩr ne bãmb naam sẽn-ka-sɛta a Zezi Kirist maasem yĩnga na n wa kɩtame tɩ yãmb zems zãnga, n kɩ yẽga, la b paas yãmb pãnga la b kõ yãmb sũ-keelem.”—1 Pɩɛɛr 5:10.

Wẽnnaam yãka wakat n na n dems yɛlã

A Zeova kõta tõnd pãng tɩ d tõog toog ne masã yɛlã. A kãabame me t’a na n maana “bũmb fãa paalse.” (Wilgri 21:5) N-yẽe, a yãka raab tɩ ka la bilfu, a Rĩungã na n lebs n wa ne laafɩ n kõ neb nins fãa sẽn namsd ne komslmã la a ges kũumã vʋʋgr yelle. Goosneem kãng na n sãama ned ning soy sẽn sɩd golmã: a Sʋɩtãan Munaafɩɩka. (Zã 5:28, 29; Rom dãmba 16:20; 1 Korẽnt dãmba 15:26; 2 Pɩɛɛr 3:13) Ad na n yɩɩ bark tɛkẽ n kõ Wẽn-zoɛtbã fãa sẽn be tẽngã zugã, wakat ning Wẽnnaam sẽn yãk n na n dems yɛlã sã n wa!

[Picture Credit Line on page 30]

Job Hearing of His Ruin/The Doré Bible Illustrations/Dover Publications