“Bɩ y segle”
1 A bãngr-gom-kãseng ning sẽn tɩ loe ne zãmaan kãngã baasgã pʋgẽ, a Zezi keooga a karen-biisã tɩ b ra bas tɩ dũniyã vɩɩm zu-loees pak-b tɩ loog nug ye. (Mat. 24:36-39; Luk 21:34, 35) Sẽn mik tɩ to-kãsengã tõe n waa wakat buud fãa wã, tara yõod wʋsg tɩ d tũ a Zezi sagl-kãngã: “Bɩ y segle tɩ Ninsaal Biiga wata wakat ninga yãmb sẽn ka tẽeda.” (Mat. 24:44) Bõe n tõe n sõng tõnd zĩ-kãngã wɛɛngẽ?
2 D sẽn na n mao ne yɩɩrã la yel-tiisdmã to-to: Tẽebã wɛɛngẽ bẽdg a yembr d sẽn segd n gũus d mens ne yaa bas tɩ ‘vɩɩm kãnga yɛla pak-dã.’ (Luk 21:34) Tẽns kẽer pʋsẽ, naongã, tʋʋma kaalem, la vɩɩmã sẽn lebg toog wʋsgã kɩtame tɩ paam n kõ noorã meng lebg goama. Tẽns a taab pʋsẽ, laog wʋsg paoongã yaa bũmb sẽn wɛ. Laogã yell sã n sɩng n pakd tõnd tɩ loog wʋsgo, pa gũusi d tõe n wa yĩma Rĩungã yɛla. (Mat. 6:19-24, 31-33) Kiris-neb tigissã sõngda tõnd tɩ d tikd d yamã yel-kãens zutu. Yãmb modgdame n wat tigissã fãa bɩ?—Heb. 10:24, 25.
3 Dũni kãngã pida ne reem wʋsg sẽn tõe n sãam tõnd sẽkã sẽn tar yõod wʋsgã nana-nana. Ordinatɛɛr tõe n yɩɩ bẽdg ne neda, sã n mik t’a soaba rɩkda sẽk sẽn loog noor n tʋmd ne ẽntɛrnetã, n karemdẽ la a gʋlsd kɩbay b sẽn toond ne ẽntɛrnetã maasem, bɩ a reemd reem sẽn be ordinatɛɛrã pʋgẽ. D tõeeme n wa rɩk lɛɛr dãmb wʋsg n get televiziõ, n debd sĩnema, n karemd dũniyã sɛba, n maand yĩn-wɩsgre, bɩ n dɩkd sẽk wʋsg tɩ loog d roagdb sẽn yaa dũniyã neb yĩngã, tɩ sẽk bɩ pãng ka le ket tɩ d tõe n dɩk n maan yɛl sẽn tɩ loe ne tẽebã ye. Yaa sɩd tɩ pemsem kokr bɩ reem tõe n kõo ned vʋʋsg wakat bilf pʋgẽ, la d menga Biibl zãmsg n paas d zaka pʋgẽ Biibl zãmsgã tara nafa sẽn kaoosd wakat sẽn ka sɛta. (1 Tɩm. 4:7, 8) Yãmb baooda sẽk n bʋgsd Wẽnnaam Gomdã zug daar fãa bɩ?—Ef. 5:15-17, NW.
4 D tõe n talla mi-beoog ne a Zeova, a siglgã sẽn maan zãmsg na-kẽndr tẽebã wɛɛngẽ n na n sõng tõnd tɩ d ‘paam pãng n põs bõn-kãens fãa sẽn na n wa wã, la [d] yals Ninsaal Biiga taoorã.’ (Luk 21:36) Bɩ d rɩ zãms-kãngã nafa tɩ pidi, la d ‘segle,’ sẽn na yɩl tɩ d tẽebã kɩt tɩ d ‘paam pẽgr ne ziir la waoogr a Zezi Kirist waoonga raare.’—1 Pɩɛ. 1:7.