SAK 16
Bõe la a Zeezi maan-yã, a sẽn wa n be tẽngã zugã?
B sã n wa gomd a Zeezi yelle, sẽn wat neb wʋsg yamẽ, yaa bi-pɛɛlg sẽn pa tõe n maan baa fʋɩ, tɩ kẽer tagsd no-rɛɛs sẽn da tar yam yelle, tɩ sẽn wat sãnda me yamẽ, yaa a sẽn ki to-to wã. La d sã n bao n bãng a Zeezi vɩɩmã sẽn yɩ to-to tẽngã zugã, na n sõng-d lame tɩ d bãng-a n paas bɩ? Sag-kãngã pʋgẽ, d na n goma bõn-kãsems kẽer a Zeezi sẽn maan yelle, la rẽ sẽn tõe n naf-y to-to wã.
1. Tʋʋm-bʋg la a Zeezi tʋm n tɩ yɩɩda?
Tʋʋmd ning a Zeezi sẽn da tʋmd n tɩ yɩɩdã yaa ‘moon Wẽnnaam Rĩungã koe-noogã.’ (Karm-y Luk 4:43.) A moona koe-noogã, n wilg tɩ Wẽnnaam na n lugla Rĩung bɩ goosneema sẽn na n welg ãdem-biisã zu-loeesã fãa.a Na maan yʋʋm a tãab la pʋɩ-sʋka, a modga wʋsg sẽn na yɩl n taas nebã koe-kãngã sẽn kengd raoodã.—Matiye 9:35.
2. Bõe yĩng t’a Zeezi ra maand yel-soalma?
Biiblã pʋgẽ, b gomda “tʋʋm-kãsemse, bõn-bãn la yel-soalem” nins Wẽnnaam sẽn kɩt t’a Zeezi maanã yelle. (Tʋʋma 2:22) Ne Wẽnnaam pãngã maasem, a Zeezi tõogame tɩ sob-kãsems yalse, a rɩlga neb tusa, a maaga bãad-rãmba, la a vʋʋg kũ-rãmb menga. (Matiye 8:23-27; 14:15-21; Mark 6:56; Luk 7:11-17) Yel-soalem nins a Zeezi sẽn maanã wilga vẽeneg tɩ yaa Wẽnnaam n tʋm-a. Leb n wilgame t’a Zeova tara tõog n tõe n welg tõnd zu-loeesã fãa.
3. A Zeezi sẽn vɩɩmd to-to wã sõngda tõnd tɩ d bãng bõe?
A Zeezi ra sakda a Zeova bũmb fãa pʋgẽ. (Karm-y Zã 8:29.) A Zeezi kell n maana bũmb nins fãa a Ba wã sẽn yeel-a t’a maanã hal n tãag a kũum, baa neb kẽer sẽn bao n na n gɩdg-a wã. A sẽn maan woto wã wilgdame tɩ ninsaal tõe n maana Wẽnnaam daabo, baa ne zu-loe-kɛgemse. A Zeezi basa ‘mamsg sẽn na yɩl tɩ d tũ a naoã neere.’—1 Pɩyɛɛr 2:21.
D BAO N BÃNG N PAASE
D ges a Zeezi sẽn moon koe-noogã to-to, la a maan yel-soalmã.
4. A Zeezi moona koe-noogã
A Zeezi kẽna kilo ka tɛka, soay sẽn yaa wubsg zutu, n taas neb wʋsg koe-noogã wa a sẽn tõe tɛka. Karm-y Luk 8:1, tɩ rẽ poor bɩ y leok sogsgã:
Yaa neb nins sẽn da tigimd n kelgd a Zeezi balã la a ra taasd koɛɛgã bɩ?
Wãn to la a Zeezi modg sẽn na yɩl n paam nebã n taas koɛɛgã?
Wẽnnaam ra pĩnd n togsame tɩ Mesi wã na n moona koe-noogã. Karm-y Ezayi 61:1, 2, tɩ rẽ poor bɩ y leok sogsgã:
Wãn to la a Zeezi pids gom-kãensã?
Yãmb tagsdame tɩ rũndã-rũndã, nebã segd n paama koe-no-kãngã n kelg bɩ?
5. A Zeezi zãmsa nebã bũmb wʋsg sẽn tar yõodo
Wẽnnaam Rĩungã koe-noogã mooneg sẽn yãk a toogo, a Zeezi zãmsa nebã bũmb wʋsg sẽn naf-ba. Wala makre, d ges bũmb kẽer a sẽn zãms nebã, a sẽn wa n sõsd ne-b tãngã zugã. Karm-y Matiye 6:14, 34 la 7:12, tɩ rẽ poor bɩ y leok sogsgã:
Sagl-bʋs la a Zeezi kõ vɛrse-kãensã pʋgẽ?
Yãmb tagsdame t’a saglsã ket n tõe n nafa nebã bɩ?
6. A Zeezi maana yel-soalma
A Zeova kõo a Zeezi tõogo, t’a maan yel-soalem wʋsgo. Karm-y Mark 5:25-34, wall y ges VIDEO wã tɩ y na n yãa makr a ye. Rẽ poor bɩ y leok sogsgã.
Video wã pʋgẽ, pag ning sẽn da bẽedã ra kɩsa sɩd ne bõe?
Bõe n yɩ yãmb noog yel-solem-kãngã pʋgẽ?
Karm-y Zã 5:36, tɩ rẽ poor bɩ y leok sokrã:
Bõe la a Zeezi yel-soalmã wilg yẽ mengã zugu?
Yãmb mime bɩ?
Bũmb nins d sẽn mi a Zeezi zugã fãa la bal bee Biiblã sɛb a naas nins b sẽn boond tɩ evãnzill-dãmbã pʋgẽ. Yaa Matiye, Mark, Luk, la Zã sebrã. Evãnzill gʋlsd fãa togsa bũmb toor-toor a Zeezi zugu. D sã n karem evãnzill-dãmb a naasã, d yãta a Zeezi vɩɩmã sẽn sɩd yɩ to-to wã, hal tɩ be yamleoogo.
A MATIYE
n yɩ pipi n gʋls a evãnzillã. A gomda bũmb nins a Zeezi sẽn zãms nebã yell n tɩ yɩɩda, sẽn yɩɩd fãa a sẽn zãms-b bũmb nins Wẽnnaam Rĩungã wɛɛngẽ wã.
A MARK
evãnzillã n yaa koɛɛg n tɩ yɩɩda. A gomda bõn-kãsems wʋsg sẽn maan yelle.
A LUK
evãnzillã wilgda pʋʋsgã sẽn da tar yõod wʋsg to-to ne a Zeezi wã, la a manesem sẽn da yaa to-to ne pagbã.
A ZÃ
togsda kibay wʋsg sẽn wilgd a Zeezi sẽn sõsd ne a karen-biisã la neb a taabã, tɩ sõngd tõnd tɩ d bãng a sẽn yaa ned ning buudã.
NEB KẼER SẼN YETE: “A Zeezi waa tẽngã zug n na n fãag tõndo?”
Yãmb tagsdame tɩ yaa rẽ yĩng bal bɩ?
KƲMSGO
A Zeezi moona koɛɛgã n gom Wẽnnaam Rĩungã yelle, a maana yel-soalma, la a ra sakd a Zeova bũmb fãa pʋgẽ.
Lebg-n-gese
A Zeezi sẽn wa n be tẽngã zugã, tʋʋm-bʋg la a tʋm n tɩ yɩɩda?
Bõe la yel-soalem nins a Zeezi sẽn maanã wilgda?
Bõe la a Zeezi zãms nebã tɩ sɩd naf-ba?
BŨMB A TAABA
Bõe yell la a Zeezi gom n tɩ yɩɩda?
Bũmb nins sẽn kɩt tɩ d tõe n kɩs sɩd tɩ yel-soalem nins b sẽn yet t’a Zeezi maname wã sɩd zĩndame.
Rao a ye vɩɩm sẽn toeem to-to, a sẽn wa n bãng a Zeezi sẽn wilg to-to tɩ nebã yell sɩd pak-a lame wã.
“M da vɩɩ m meng yĩng bala” (Yʋʋmd 2014 zĩ-likr kiuug pipi daar Gũusg Gasgã)
Yel-kãsems nins sẽn maan a Zeezi koe-moonegã sasa wã pʋgdg-pʋgdga.