Bũmb n be n são nagem bõn-sõodem

A SẼN gom “nag-teed” pagbã sẽn tũnugd ne n paasd b neermã poore, tʋm-tʋmd a Pɛɛr sagla woto: “Walla tɩ yɩ woto, yãmb neermã segd n yɩɩ yãmb meng sũurã pʋgẽ dẽnda, neerem sẽn pa loogd sẽn yaa sõmblem, yam bãan sẽn tar yõod wʋsg n yɩɩd Wẽnnaam nifẽ wã.”—1 Pɩɛɛr 3:3, 4, Today’s English Version.

Ges-y tɩ tʋm-tʋmdã sẽn gʋls n gom nag tɩ b yã a woto wã poore, a tũnuga ne gerɛk gom-biig sẽn yaa kosmos sẽn leb n yaa moor gom-bi-yẽgr ning sẽn yaa “nagem bõn-sõodmã,“ sẽn dat n yeel tɩ “maan tɩ yɩ neere sẽn yɩɩd fãa yĩn-gãong neerem.” A Pɩɛɛr da modgda kiris-nin-pogsã tɩ b bas yĩn-gãong ka-sõodem bɩ nagem bõn-yood sẽn wõnd woto bɩ? Bũmb pa be Wẽnnaam Gomdẽ wã sẽn wilgd woto ye. Walla tɩ yɩ woto, a kõta sor tɩ ned fãa rɩk a toorẽ sard yel-kãngã wɛɛngẽ, woto kɩtame tɩ ned fãa tõe n wilg a raab sẽn ta zĩig ning ne yel-kãngã.

Baasg zãnga, yĩn-gãong ka-sõodmã sã n dɩk n tʋm tɩ loog nugu, bɩ b maan-a tɩ wa tiisd neb wʋsgo, yaa bõe koɛɛg la a taasda? Rẽ yĩnga, woto pa toolem, maan-tɩ-looge, sẽn ka neere, wilg-m-meng bɩ rat-m-yembr sɩda? Sɩda, a tõe n paooga pag n sãam a neermã. Rẽ tõeeme meng n kɩt tɩ b tags t’a yaa pʋg-yoodre.—Mak-y ne Ezekɩɛll 23:36-42.

Pag “sẽn sakd Wẽnnaam” sakd n deega woto n mao t’a sã n yãk n na n tũnug ne nagem bõn-sõodem me, bɩ yɩ vẽeneg t’a maand-a-la ne yam-sõngo, sõmblem la maan-tɩ-zemse. Zʋg-sõma a woto na n paasa a sõmblmã la a neermã. Sɩda, a yãk n na n naga ne yĩn-gãong ka-sõodmã tɩ pa woto me, a segd n puka burkĩnd la sũur pʋgẽ rasãnde. Rẽ na n wilgame t’a mi a Pɩɛɛr sẽn togs goam nins tɩ be yĩngrã võore. Gom-kãens wilgdame tɩ bũmb n be n são nagem bõn-sõodmã.—1 Tɩmote 2:9, 10.